Toma 20
20
Pɔɔl Naŋ Gaa Masedoniya Ane Giris
1A dɔɔne naŋ da wa baare puoriŋ, Pɔɔl da toŋ boɔle la a potuuribo. O naŋ da wa yeli yɛlɛ teɛ ba a kyɛ ko ba o gaabo yaane baare, o da yi gaa la Masedoniya. 2O naŋ da wa yɔ a tenne anaŋ, a yeli yɛlɛ yaga teɛ a potuuribo, o da wa la Giris, 3a wa kpɛ a be kyuuri ata. A Pɔɔl da nara la ka o kpɛ gbori gaa Seeriya, kyɛ a Gyuumine naŋ da bo faaloŋ kyaare ne o zuiŋ, o da leɛ la o teɛroŋ a leɛ tu Masedoniya. 4#Tom 17:10; 19:29 Pirus bidɔɔ, Sopata naŋ yi Bɛroya da tu o la gaa, ka Arestakus ane Sekundus naŋ yi Tɛsalonika da tu o gaa, ka Gayos naŋ yi Dɛɛbe ane Timoti meŋ da tu o gaa, a laŋ ne Takyikus ane Turofimus naŋ yi Ezeya meŋ da tu o la gaa. 5#Tom 16:8 Ba da de la weɛ a te kyɛllɛ te Turos poɔ; 6kyɛ a Boroboro Dambo tigri bebie puoriŋ la ka te da kpɛ gbori Filipae poɔ a gɛrɛ. Te da de la bebie anuu kyɛ te ta Turos a pɔge ba, ka te da zeŋ be bebie ayopoĩ.
Pɔɔl Turos Gaabo Parebaaraa
7 #
1 Kor 16:2; Tom 2:42; 2:46 A koseɛraa bebi-dɛndɛŋ daare, te naŋ da wa lantaa ka te ŋmaa boroboro, Pɔɔl ne ba da yeli la yɛlɛ, o naŋ da boɔrɔ ka ka zie wa nyaa ka o iri gaa zuiŋ. O da yeli la yɛlɛ ka a kɔɔre te ta tensogpozentaa. 8Fentele yaga da be la a peɛzudie poɔ, benee te naŋ da lantaa. 9Pɔlbile kaŋ yuori naŋ da di Yutaakus da zeŋ la a takoro noɔreŋ a gbire kyuuro, a Pɔɔl naŋ da yele yɛlɛ. A Pɔɔl naŋ da yeli a yɛlɛ ka a te kɔɔre, a pɔlbile da gbiree la gaa tɔɔre a da yi a peɛzuderi naŋ mɛ dɔgle taa ata soba zu a le. Ba naŋ da wa te zɛllɛ o, ka o kpie la. 10#1 Nam 17:21 Kyɛ Pɔɔl da sigi te zuuni la o zu, a nyɔge o zɛle eŋ o nuuriŋ kyɛ yeli, “Yɛ ta zoro dabeɛ̃, bonso, a o vooroŋ naŋ ba sigi.” 11Lɛ la ka a Pɔɔl da leɛ do a peɛzudie, kyɛ o naŋ da wa te ŋmaa a boroboro a ɔɔ baare, o da naŋ yeli ne ba la yɛlɛ ka a te ta zivɛlemɛ, kyɛ pãã da gaa. 12Kyɛ ba da taa la a pɔlbile na ka o waa vore a kuli ne, ka ba poore da pɛle yaga zaa.
A Pɔɔl Mine Naŋ Da Yi Turos A Gaa Miletus Teŋɛ
13Te da de la weɛ a te kpɛ a gbori a gaa Asɔs, be la ka te da boɔrɔ ka te gaa te de a Pɔɔl, bonso, o meŋɛ la da nare a lɛ biŋ, a da boɔrɔ ka o gaa be ane gbɛɛ. 14O naŋ da wa pɔge te a Asɔs poɔ, o da kpɛ la a gbori ka te gaa Mitelen. 15Te da kpɛ la gbori a be a gaŋ Kyios naŋ are kyaare a Mitelen zie naŋ da wa nyaa. A naŋ da la nyaa zie, te da wa ta la Samos, ka zie da la nyaa ka te ta Miletus. 16#Tom 18:21 A Pɔɔl da nare la o teɛroŋ poɔ ka o te lanne a Efesus teŋɛ, ka o na ta wa kɔɔre a Ezeya poɔ. O da kyerɛ la ka ka a naŋ wa taa eebo, ka o ta Gyeruzɛlɛm a Pɛnteko bebiri daare.
Pɔɔl Naŋ Yeli O Yelbaaraa Ko A Efesus Nembɛrɛ
17Pɔɔl da be la a Miletus poɔ kyɛ toŋ boɔle a puoruu laŋne nembɛrɛ naŋ be a Efesus poɔ. 18#Tom 18:19; 19:10 Ba naŋ da wa o zie, o da yeli ko ba la:
“A yi a bebi-dɛndɛŋ, a n gbɛre naŋ kpɛ a Ezeya paaloŋ te ta ŋaa, yɛmenne baŋ la lɛnɛɛ N naŋ da kpeɛrɛ a yɛ poɔ, 19a tonɔ korɔ a Daana ne meŋɛ-sigruu ane nentaŋ, kyɛ sage de yɛlɛ na zaa a Gyuumine naŋ da erɛ ka a korɔ ma dɔgroŋ. 20N da ba sɔgle ka N e yelzaa naŋ taa sommo, a da moɔlɔ a yelbiri korɔ yɛ, a wullo yɛ nen-yaga poɔ ane a yɛ yie poore, 21N da di la danseɛ ko a Gyuumine ane Girik noba ka ba leɛ ba eebo yi ba yelbebe poɔ a wa Naaŋmen zie kyɛ taa yeldeebo ne a te Daana Yeezu. 22#Tom 19:21 Pampana ŋa, a Vooroŋ Soŋ noɔre sagoo zuiŋ, N gɛrɛ la Gyeruzɛlɛm, kyɛ N ba baŋ yeli naŋ na e ma a be, 23#Tom 9:16; 21:4; 21:11 ka a yeli ŋa a Vooroŋ Soŋ naŋ maŋ yeli ko ma a teŋkpoŋ zaa poɔ N naŋ maŋ wa te kpɛ, ka ba na page ma la kyɛ ka N nyɛ dɔgɛɛ be yoŋ naane. 24#Tom 21:13 Kyɛ N ba de n nyɔvore ka o dɔgle bonzaa zu, ka maa na toɔ̃ toŋ a tonnoɔre na a Daana Yeezu naŋ ko ma, ona la ka N di a Ŋmen-yelnoore garaaseɛ danseɛ.”
25 #
Tom 18:6
“Kyɛ pampana ŋa, N baŋ ka yɛ bama poɔ N naŋ yɔ a kanne a Naaŋmen naaloŋ yɛlɛ, yɛ kanzaa daŋ koŋ la nyɛ ma zaa. 26#Tom 18:6 Azuiŋ, a zenɛ bebiri, N yele korɔ yɛ la, ka N ba taa saanaa zaa ka yɛ kanzaa wa wɛ, 27bonso, N da ba sɔgle ka N manne a Naaŋmen poboɔbo zaa ko yɛ. 28#1 Tim 4:16; 1 Pit 5:2 Yɛ kaara yɛmenne zie ane a peere zaa a Vooroŋ Soŋ naŋ e ka yɛ kaara a zu, yɛ kaara a Naaŋmen puoruu laŋne deme velaa. Bana la ka O faa ne O meŋɛ Bidɔɔ zẽẽ. 29#Mat 7:15 N baŋ ka a N gaabo puoriŋ, noba mine naŋ waa ŋa gboŋgbo-faare na wa kpɛ la yɛ poɔ, a koŋ bare a peere. 30A Noba mine gba na yi la yɛ poɔ, a yele yeltulo, ka a potuuribo na tu ba puori. 31Azuiŋ, yɛ baŋnea, a ta inni ka yuomo ata tensogɔ bee ŋmenaa, ka N ba nage ka N kpãã yɛ ane nentaŋ. 32Pampana ŋa, N de yɛ la ko Naaŋmen ane a Naaŋmen yelbiri garaaseɛ. A yelbiri taa la kpeɛ̃õ a na e ka yɛ baa, kyɛ ka o ko a yɛ banaŋ zaa naŋ pɛgeyi a o gbandiruŋ. 33#Mat 10:8; 1 Kor 9:12; 1 Sam 12:3 N ba taa zɛnzɛŋ ne neɛzaa libiri bee salema bee bonsuuri. 34#Tom 18:3; 1 Kor 4:12; 1 Tɛs 2:9 Yɛmenne baŋ ka N da toŋ la toma ane n nuuri a bɔ bonzaa maa ne n taaba naŋ da boɔrɔ. 35A yɛlɛ ama zaa poɔ, N wuli yɛ la ka toma tommo poɔ la ka te na toɔ̃ soŋ a nembaalba, kyɛ teɛre a yelbie a Daana Yeezu meŋɛ naŋ da yeli, ‘A e la maaloo yaga ka fo tere a gaŋ fo naŋ derɛ.’ ”
36 #
Tom 21:5
A Pɔɔl naŋ da wa yeli a yɛlɛ baare, o da gbi la dumo ka o ne ba zaa da laŋ puori. 37Ba zaa da koŋee la yaga, a da nyɔge a Pɔɔl kori kyɛ moore o. 38#Tom 20:25 Ba poore da sããɛ la ane yeli na o naŋ da yeli ko ba, ka ba koŋ la nyɛ o zaa. A lɛ puoriŋ, ba da taa o la gaa ne a gbori zie.
Currently Selected:
Toma 20: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.