Toma 19
19
Pɔɔl Naŋ Be A Efesus Poɔ
1Apolos naŋ da naŋ be a Korint poɔ, Pɔɔl da tu la a teŋɛ poɔ a wa a Efesus teŋɛ. O da wa nyɛ la a potuuribo mine a be. 2#Tom 2:38 O da soore ba la, “Yɛ de la a Vooroŋ Soŋ a saŋ na yɛ naŋ da sage de a Yeezu yɛlɛ?” Ka ba leɛ yeli, “Ai, te daŋ ba woŋ ka Vooroŋ Soŋ bebe la.” 3Lɛ la ka o soore ba, “Boŋ suobu la ka yɛ da de?” Ka ba yeli, “Gyɔɔn suobu la.” 4#Mat 3:11 Ka a Pɔɔl da yeli, “Gyɔɔn da tere la meŋɛ-leɛbo suobu, a da yele korɔ a noba ka ba sage de neɛ na naŋ na tu o puori wa. Ona la Yeezu.” 5Ba naŋ da wa woŋ a lɛ, ba da de la a suobu a Daana Yeezu yuori eŋɛ. 6#Tom 8:17; 10:44; 10:46 A Pɔɔl naŋ da wa de o nuuri pare ba zuri, a Vooroŋ Soŋ da wa la ba zie, ka ba da yele kɔkɔsaama ane Ŋmen-yelmanna yelyelii. 7Ba zaa da ta la noba pie ne bayi.
8A Pɔɔl da be la a be kyuuri ata, a da maŋ kpɛ a puoruudie a te yele yɛlɛ a ba zoro dabeɛ̃, kyɛ ŋmɛ nɔkpeɛne ne ba, a erɛ aneɛ ka ba na sage de a Naaŋmen naaloŋ yɛlɛ. 9#2 Tim 1:15; Tom 9:2 Kyɛ ba mine naŋ da e zukpeɛ̃-yɛlɛ a da ba sage de a Yeezu yɛlɛ, kyɛ da yele yɛlɛ saana a Daana Sori yɛlɛ a laŋne deme niŋesogɔ zuiŋ, a Pɔɔl da ŋmaa la ba yɛlɛ bare, kyɛ bebiri zaa o da maŋ taa la a potuuribo kpɛ ne a Tirano kannoo die poɔ a te ŋmɛ nɔkpeɛne ne a Tirano kannoo die deme. 10A yɛlɛ ama da e la lɛ yuomo ayi, ka a noba zaa naŋ da kpeɛrɛ a Ezeya paaloŋ poɔ, a Gyuumine ane a Girik noba da woŋ a Daana yelbiri.
A Siva Bidɔbɔ Yɛlɛ
11 #
Tom 14:3
Naaŋmen da tu la a Pɔɔl zie a toŋ tonseɛlɛ naŋ ba taa mannoo, 12#Tom 5:15 ka a lɛ da vɛŋ ka ba da maŋ de a Pɔɔl hankyeɛ bee pɛn-ŋmaa zaa naŋ tɔ o eŋɛ a wa tɔ ne a baalba, ka ba baaloŋ da maŋ baare kyɛ ka sefaare yi ba enne. 13#Luk 9:49 Lɛ la ka Gyuu noba mine naŋ da maŋ yoɔrɔ a digre sefaare, meŋ da de a Daana Yeezu yuori a boɔrɔ ka ba digi ne sefaare naŋ da be noba mine enneŋ a yele, “A Yeezu ŋa a Pɔɔl naŋ moɔlɔ O yɛlɛ, maa yele korɔ fo, wa yi!” 14A Gyuumine Naaŋmen bagmaale neŋkpoŋ kaŋ yuori naŋ da di Siva biiri bayopoĩ la da erɛ a lɛ. 15Kyɛ a sefaa da yelsɔge ba la, “N baŋ la Yeezu, a baŋ Pɔɔl meŋ, kyɛ aŋ mine la yɛ?” 16Lɛ la ka a dɔɔ na naŋ da taa a sefaa da vare iri nyɔge ba, a da toɔ̃ ŋmɛ ba zaa, a pere ba, ka ba da zo ne parekpolo a yi a yiri poɔ. 17#Tom 5:5; 5:11 A noba zaa naŋ da kpeɛrɛ a Efesus poɔ, a Gyuumine ane Girik noba da baŋ la a yeli ŋa. Dabeɛ̃ da kpɛ la ba zaa, kyɛ ka a Daana Yeezu yuori da nyɛ puubu. 18Lɛ meŋ la ka noba yaga naŋ da sage de a Yeezu yɛlɛ da wa, a wuoro bamenne kyɛ kyiire ba yelfaare. 19Noba yaga naŋ da taa gama a da erɛ ne yelbeere da wuo la a gama lantaa a nyege a noba zaa niŋesogɔ. Ba naŋ da sɔre a gama ama ba naŋ nyege libie, a da e la warbie turi lezaayi ne pie. 20#Tom 6:7; 12:24 Lɛ la ka a Daana yelbiri da yɛllɛ yaga kyɛ da taa faŋ.
Dɔɔne Naŋ Dɔ̃ɔ̃ A Efesus Teŋɛ Poɔ
21 #
Tom 23:11
A yɛlɛ ama eebo puoriŋ, Pɔɔl da maale la o teɛroŋ ka o na tu la Masedoniya ane Akaaya tenne a te gaa Gyeruzɛlɛm. O da yelee la, “Ka maa wa gaa a be baare, feroo la ka N nyɛ Rom meŋ.” 22#Tom 17:14; Rom 16:23 Lɛ la ka o da toŋ a o soŋnema bayi, Timoti ane Erastus ka ba gaa a Masedoniya kyɛ o meŋɛ eŋ da kpɛ la a Ezeya poɔ kɔɔre belãã.
23 #
Tom 19:9; 2 Kor 1:8-9 A saŋ na poɔ, dɔɔne kpoŋ da dɔ̃ɔ̃ la a Efesus poɔ a kyaare ne a Daana Sori yɛlɛ. 24#Tom 16:16 Dɔɔ kaŋ naŋ da waa kurkuro, ka o yuori da di Demeterus, da maŋ nyɛle la salem-pelaa a maale ne boma naŋ waa Atemis puoruu boma. Ka a da korɔ noba na naŋ tonɔ a toma tɔnɔ yaga zaa. 25O da boɔle la a noba bama ane a noba na naŋ tonɔ a toma ŋa taaba lantaa, a yeli, “N ba mine, yɛ baŋ ka a toma ŋa poɔ la ka a te bondaanoŋ yire. 26Yɛ meŋ nyɛɛ la kyɛ woŋ ka a ba e a Efesus yoŋ poɔ, kyɛ a Ezeya paaloŋ yaga zie zaa ka a Pɔɔl ŋa toɔ̃ nyɛ noba yaga ka ba tu o, ne o kannoo ka a ŋmemɛ ba naŋ maale ne nuuri ba waa ŋmemɛ. 27Kyɛ dabeɛ̃ bebe la, ka a te toma ŋa yoŋ naane na di vi, kyɛ ba koŋ la boɔlɔ a pɔgŋmen Atemis ŋmen-yiri bonzaa, ka o koŋ la taa yuori na naŋ vɛŋ ka a Ezeya noba zaa ane a tendaa a puoro o.”
28Ba naŋ da wa woŋ a yeli ŋa, ba suuri da iree la yaga ka ba kyeere, “A Efesus Atemis waa la kpoŋ!” 29#Tom 20:4 A teŋkpoŋ da paale ne la dɔɔne ka noba zo lantaa ŋmore te kpɛ a deɛne die poɔ, a vuuro Gayos ane Arestakus naŋ da waa Masedoniya noba a kyɛ da waa a Pɔɔl sokyɛntaaba. 30A Pɔɔl da boɔrɔ la ka o kpɛ a nembeɛoŋ poɔ, kyɛ a potuuribo da ba sage; 31a Ezeya paaloŋ tonton-nembɛrɛ mine naŋ da waa a Pɔɔl bamine meŋ gba da toŋɛɛ la ka ba sɔre o ka o ta wa kpeɛrɛ a deɛne die poɔ. 32Kyɛ a lɛ poɔ meŋ, ba mine da kyeerɛ la yele yeli ŋa, ka ba mine yele yeli yuo, bonso, buriburi da kpɛ la a kpaaroŋ noba, ka ba yaga zie da ba baŋ bon naŋ so ka ba da wa lantaa. 33A nembeɛoŋ mine da manne la a yɛlɛ ko Alɛzanda, a onaŋ a Gyuumine naŋ da e ka o de niŋe. Ka Alɛzanda da lɔɔ nu sɔre ka ba bare gɔne kyɛ ka o toɔ̃ manne a yɛlɛ ko ba. 34Kyɛ ba naŋ da wa baŋ ka o waa la Gyuu neɛ, ba zaa da kyeerɛɛ la ane kɔkɔyeni ka a te ta ŋa gogo ayi a yele, “A Efesus Atemis la waa kpoŋ!” 35Kyɛ a teŋɛ karakye naŋ da wa te e ka a noba bare a gɔne, o da yelee la, “Efesus noba, nembuo la bebe a ba baŋ ka a Efesus noba teŋkpoŋ la waa a Atemis ŋmen-yiri guuro ane a ŋmen-kuuri naŋ yi a sazu le guuro. 36Yɛ naŋ nyɛ ka neɛzaa kontoɔ̃ ŋmɛ nɔkpeɛne ne a yɛlɛ ama, a seŋɛɛ la ka yɛ e gbili lɛ a ta wa e yelzaa ne suuri. 37A noba ŋa yɛ naŋ taa wa ne a kyɛ ba waa a Naaŋmen die nannyigri bee noba naŋ to a te pɔgŋmen zone zaa. 38A lɛ zuiŋ, ka Demeterus ane a o nuuri toma noba naŋ be o zie wa taa yeli kyaare ne a neɛ kanzaa, a sɛrediribe bebe la, ka a gɔbena mine bebe, vɛŋ ka ba te sɛ taa be. 39Ka yeli kanzaa la wa bebe ka yɛ boɔrɔ ka yɛ baŋ, lɛ eŋ, a ferɛɛ la ka a gaa sɛrediribe zie ka ba te maale a be. 40Te be la yɛlɛ poɔ bonso, ba na toɔ̃ yeli ka te dɔ̃ɔ̃ la a teŋɛ zenɛ, kyɛ ka te ba taa yeli zaa na yeli de temenne yi a dɔɔne ŋa poɔ.” 41O naŋ da wa te yeli a yeli ŋa baare, o da eɛɛ la ka a noba yaare.
Currently Selected:
Toma 19: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.