Toma 16
16
Timoti Naŋ Tu Pɔɔl Ane Silas
1 #
Tom 17:14; 19:22; 2 Tim 1:5 A Pɔɔl da gaa la Dɛɛbe meŋ a yi be gaa Listera. A Yeezu potuuro kaŋ da be la a Listera teŋɛ poɔ ka o yuori di Timoti. O ma da waa la Gyuumine pɔgeyaa naŋ sage de a Yeezu yɛlɛ, kyɛ ka o saa da waa Girik neɛ. 2#Tom 6:3 O da taa la yosoŋ a yelderebɛ naŋ da be a Listera ane Ikonio poɔ. 3A Pɔɔl da boɔrɔ la ka a Timoti tu o; lɛ la ka o da e ka ba iri o dɛgre. Bonso, a Gyuumine naŋ da be a ziiri na poore zaa da baŋ ka a Timoti saa da waa la Girik neɛ. 4#Tom 15:23-29 Ba naŋ da yɔ yoɔrɔ a tenne poore, ba da manna korɔ la a yelderebɛ ka ba sagra a yɛlɛ na zaa a apostoliimine ane nembɛrɛ naŋ da yeli biŋ a Gyeruzɛlɛm poɔ. 5Ka a lɛ da vɛŋ ka a puoruu laŋne deme yeldeebo da zɛge do saa, kyɛ ka ba noɔre da yɛllɛ bebiri zaa.
Pɔɔl Naŋ Nyɛ Nyaabo Kyaare Ne Masedoniya Dɔɔ Kaŋ Yɛlɛ
6 #
Tom 18:23
Ba da tu la Firigyeya ane Galesiya paaloŋ tɔle, a Vooroŋ Soŋ naŋ da ba ko ba sori ka ba kanne a yelbiri a Ezeya poɔ zuiŋ. 7Ba naŋ da wa te ta Mesiya teŋɛ niŋe, ba da boɔrɔ la ka ba da te kpɛ Bitinia poɔ, kyɛ a Yeezu Vooroŋ da ba sage ka ba kpɛ a be. 8Lɛ la ka ba da te beɛ a Mesiya teŋɛ bare kyɛ sigi gaa Turos. 9A tensogɔ saŋ, Pɔɔl da nyɛ la nyaabo kaŋ, ka Masedoniya dɔɔ kaŋ da are sɔrɔ o a yele, “Wa a Masedoniya poɔ, a wa soŋ te.” 10O naŋ da wa nyɛ a nyaabo, a daadaalɛ ka te da e aneɛ ka te gaŋ gaa a Masedoniya, te naŋ da baŋ ka Naaŋmen la boɔle te ka te gaa te moɔle a yelnoore ko ba zuiŋ.
Lidiya Naŋ Sage De A Daana Yɛlɛ Filipae Teŋɛ Poɔ
11Te da kpɛ la gbori a yi Turos kyɛ mɔŋ daadaa gaa Samoterase, ka a zie da wa nyaa ka te da gaa Neɛpolis, 12a da la yi a be gaa Filipae naŋ da waa Masedoniya teŋkpoŋ kaŋ kyɛ da be a Rom noba nuuriŋ. Te da be la a teŋkpoŋ ŋa poɔ ka a kɔɔre belãã. 13A pɛnnoo bebiri daare naŋ da wa ta, te da yi la a teŋɛ poɔ a gaa baa kaŋ noɔre, te naŋ da teɛre ka puoruu zie be la a be. Te da zeŋ la a be a yeli yɛlɛ ko a pɔgeba naŋ da lantaa. 14#Gyn 6:44 Pɔge kaŋ naŋ da puoro Naaŋmen ka o yuori di Lidiya, a yi Tatira teŋɛ, a da waa yɛreyɛrɛ naŋ koɔrɔ pɛmɛ daaroŋ naŋ ba wono, da kyɛllɛ la a te yɛlɛ. A Daana da eɛɛ la ka o yuo o sukyiri a eŋ toori kyɛllɛ a yɛlɛ na a Pɔɔl naŋ da yele. 15A Lidiya ane o yideme naŋ da wa de suobu, o da sɔre te la a yele, “Ka yɛnee wa sage ka N waa la a Daana yelderɛ serɛzaa, yɛ wa kpeɛrɛ n yiri poɔ.” Kyɛ o da sɔre te la yaga zaa ka te da te sage.
Ba Naŋ Nyɔge A Pɔɔl Ane Silas Pɔge
16 #
Tom 19:24
Daare kaŋ, te naŋ da gɛrɛ a puoruudie, te da tuori la pɔgsarlee kaŋ naŋ da waa gbaŋgbaa kyɛ da waa bagebogrɔ, ka a o bageboge da yire libie yaga korɔ a o demee. 17#Mak 1:24; 1:34 O naŋ da tuuro te ane a Pɔɔl, a da ŋmeɛrɛ kpɛlle yele, “A noba bama waa la a Kpeɛ̃õ Zaa Naaŋmen gbaŋgbaare naŋ wa ka ba moɔle a faabo yɛlɛ ko yɛ.” 18#Mak 16:17 O da erɛ la a ŋaa beri yaga, ka a Pɔɔl suuri da te iri yaga ka o leɛ yeli ko a sefaa, “A Yeezu Kirista yuori eŋɛ ka N yele korɔ fo, wa yi o eŋɛ.” Ka a sefaa da wa yi a gogo na poɔ.
19Kyɛ a o demee naŋ da wa nyɛ ka ba koŋ la baŋ nyɛrɛ a libie ba naŋ da nyɛrɛ, ba da nyɔge la a Pɔɔl ane Silas, a tage ba gaa ne a daa poɔ a nembɛrɛ zie. 20#Tom 17:6; 1 Nam 18:17 Ba naŋ da taa ba wa ne a sɛrediribe zie, ba da yelee la, “A noba bama waa la Gyuumine, a wa dɔɔnɔ a te teŋɛ, 21a wullo a noba ka ba tuuro yel-erre te Rom noba naŋ ba taa sori ka te tu bee a e.” 22#2 Kor 11:25; Fil 1:30; 1 Tɛs 2:2 A nembeɛoŋ da iri zɔɔrɔ ne la a Pɔɔl ane Silas, ka a sɛrediribe da e ka ba yaare ba bonsuuri kyɛ e ka ba feɛ ba. 23Ba naŋ da wa feɛ ba yaga baare, ba da pɔge ba la kyɛ tere noɔre ka a nempagdie kaara gu ba velaa. 24Ba naŋ da ko o a noɔre ŋa zuiŋ, o da de ba la kpɛ te pɔge a dikpaare poɔ, a leŋ ba gbɛɛ mare kpullo.
25Aŋa tensogpozentaa saŋ, Pɔɔl ane Silas da puoro la kyɛ yiele puubu yieluŋ korɔ Naaŋmen, ka a nempɔgre da kyɛllɛ wono. 26Ba wa berɛ ka a zie gbigri yaga yaga zaa, ka a nempagdie dankyime da zɛŋ a sigi te tɔ a pare. A daadaalɛ ka a dendɔɛ zaa da yuori, kyɛ ka a nempɔgre zaa banzɔlɔ da lori. 27A nempagdie kaara naŋ da wa dɔ̃ɔ̃-iri o goɔŋ poɔ a nyɛ ka a dendɔɛ zaa yuore, o da voɔ la o zɔɔzɔɔ-soɔ a da boɔrɔ ka o ko o meŋɛ, bonso, o da teɛre ka a nempɔgre da yi zoe la. 28Kyɛ a Pɔɔl da zɛge la o kɔkɔre a kyeere yele, “Ta e fo meŋɛ yelfaa zaa, bonso, te zaa bebe la.” 29A nempagdie kaara da eɛɛ la ka ba ko o vũũ, ka o da ŋmore kpɛ a nempagdie poɔ, a te le vɔgle a Pɔɔl ane Silas niŋesogɔ a miine ne dabeɛ̃. 30#Tom 2:37 Lɛ la ka o da taa ba yi ne yeŋ a te soore ba, “N bamine, wola ka N na e a nyɛ faabo?” 31Ka ba leɛ yelsɔge, “Sage de a Daana Yeezu yɛlɛ, kyɛ fo na nyɛ la faabo, fõõ ne a fo yideme zaa.” 32Ba da kanne la a Daana yelbiri a ko o ane banaŋ zaa naŋ da be a o yiri poɔ. 33A tensogɔ na zaa, a gogo na poɔ, a nempagdie kaara da taa ba la a te pɛge ba felɛ. Lɛ la ka o ne o yideme zaa da de suobu a daadaalɛ. 34O da taa ba la do ne o yiri, a te ko ba bondirii kyɛ ka o ne o yideme da taa popeɛloŋ, o naŋ da sage de a Naaŋmen yɛlɛ zuiŋ.
35Zie naŋ da wa nyaa, a sɛrediribe da toŋ la a polisiri, a yele, “Vɛŋ ka a noba na gɛrɛ.” 36A nempagdie kaara da ko la Pɔɔl a duoro a yele, “A sɛrediribe tere la noɔre ka ba bare yɛ ka yɛ gɛrɛ; azuiŋ, yɛ wa yi a gɛrɛ ne emmaaroŋ.” 37#Tom 22:25 Kyɛ ka Pɔɔl leɛ yelsɔge, “Te waa la Rom noba kyɛ ka ba ŋmɛ te noba poɔ, a page te, kyɛ ka te ba taa saanaa zaa. Kyɛ a pampana ŋa, ba boɔrɔ la ka ba sɔgle bare te be? A koŋ baŋ waa lɛ togitogi! Vɛŋ ka bamenne wa taa te yi ne.” 38A polisiri da te yeli la a yɛlɛ ama ko a sɛrediribe, ka dabeɛ̃ da kpɛ ba, ba naŋ da wa woŋ ka ba waa la Rom noba; 39lɛ la ka ba da wa sɔre saanaa a yi ba zie. A lɛ puoriŋ, ba da taa ba la yi ne a te yeli ko ba ka ba yi a teŋɛ poɔ. 40Ba naŋ da wa yi a nempagdie poɔ, ba da gaa la Lidiya yiri. Ba naŋ da wa te nyɛ a ba yɔɔmine ane ba yɔɔpuuli a yeli yɛlɛ teɛ a ba yeldeebo, ba pãã da yi la a be a gaa.
Currently Selected:
Toma 16: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.