Toma 15
15
A Gyeruzɛlɛm Kpaaroŋ Kpoŋ Yɛlɛ
1 #
Gal 5:2
Lɛ la ka noba mine da yi a Gyudiya a sigi wa Anteyɔk a wa kanna a yɔɔmine, “Ka yɛnee ba iri yɛ dɛgre a seŋ a Mooziz bege naŋ yeli lɛ, yɛ koŋ baŋ nyɛ faabo.” 2#Tom 11:30; Gal 2:1 A yeli ŋa da wa ne la tage taa, ka nɔkpeɛne da kpɛ a Pɔɔl ane Banabas ane a noba na sogɔŋ. Lɛ la ka ba da iri Pɔɔl ane Banabas ane a noba na mine ka ba gaa Gyeruzɛlɛm a te nyɛ a apostoliimine ane a nembɛrɛ ka ba gyɛle a yeli ŋa. 3A lɛ zuiŋ a puoruu laŋne deme da toŋ ba la, kyɛ ba naŋ da tu a Foniseya ane Samaareya, ba da manne la lɛ a Nemboore-yobo naŋ sage de a Yeezu yɛlɛ, ka a yelderebɛ zaa poore da pɛle yaga zaa. 4#Tom 14:27 Ba naŋ da wa ta Gyeruzɛlɛm, a puoruu laŋne deme ane a apostoliimine ane a nembɛrɛ da de ba la saanoŋ. Ba da manne la a yɛlɛ na zaa Naaŋmen naŋ da tu ba zie a e. 5Kyɛ a yelderebɛ mine naŋ da poɔ a Faraziimine laŋne poɔ da iri arɛɛ la kyɛ yeli, “A e la feroo ka a Nemboore-yobo iri ba dɛgre kyɛ tuuro a Mooziz begɛ.”
6A apostoliimine ane a nembɛrɛ da laŋ la taa ka ba kaa a yeli ŋa nyɛ. 7#Tom 10:44; 11:15 Ba naŋ da ŋmɛ a nɔkpeɛne ka a kɔɔre puoriŋ, Piita da iri arɛɛ la kyɛ yeli ko ba, “N yɔɔmine, yɛ baŋɛɛ la ka a piiluu saŋ Naaŋmen da kaa-iri ma la yɛ poɔ, ka n zie la ka a Nemboore-yobo na tu woŋ a yelnoore kyɛ sage de. 8Kyɛ Naaŋmen naŋ baŋ nensaala sukyiri, da di la danseɛ ko ba, O naŋ da ko ba a Vooroŋ Soŋ aŋa O naŋ da ko te lɛ. 9#Tom 10:34 A ba yeldeebo zuiŋ, O pɛge la a ba sukyie ka a veɛlɛ, ka tɛɛtɛɛ zaa ba kyebe te ne ba zie. 10#Gal 3:10; 5:1 Pampana ŋa, bonso ka yɛ boɔrɔ ka yɛ e Naaŋmen nyɛ ne yɛ naŋ de a gbogli na te ne te sããkommine naŋ da ba toɔ̃ na tuo a yɛre a potuuribo kɔkɔɛ eŋɛ? 11#Gal 2:16; Efe 2:4-10 Kyɛ a ba e a lɛ, te sage deɛ la ka a Daana Yeezu garaaseɛ la na faa te aŋa O naŋ na faa ba lɛ.”
12A noba zaa naŋ da lantaa da e la gbili, kyɛ da kyɛllɛ a Banabas ane Pɔɔl ka ba da manne a yelwulii ane a toŋkpeɛne Naaŋmen naŋ da tu ba zie a e a Nemboore-yobo zie. 13#Tom 21:18; Gal 2:9 Ba naŋ da wa yeli a yɛlɛ baare, Gyems da yeli sɔgɛɛ la, “N yɔɔmine, yɛ kyɛlle woŋ n noɔre yɛlɛ. 14#Tom 15:7-9 Simion da manne la lɛnɛɛ Naaŋmen naŋ da daŋ kaa a Nemboore-yobo ne nimimaaroŋ, a kaa-iri noba ba poɔ, a O yuori eŋɛ. 15#Emo 9:11-12 A yelbie ama ane a Ŋmen-yelmanneba yelbie tu la taa, a seŋ ba naŋ sɛge lɛ:
16‘A yeli ŋa puoriŋ, N na leɛ wa la,
a wa leɛ mɛ a Devid yiri naŋ le;
N na leɛ mɛ la a dabori,
a e ka o leɛ are,
17ka a lɛ vɛŋ ka noba zaa na boɔrɔ a Daana
haali a Nemboore-yobo banaŋ zaa N naŋ boɔle N yuori eŋɛ.
A ŋaa la ka a Daana yeli, a Onaŋ naŋ da maŋ erɛ
18ka ba baŋna a yɛlɛ ama a yi a dakoroŋ saŋ.’
19Azuiŋ, maa eŋ teɛroŋ la ka te ta dɔɔnɔ a Nemboore-yobo bama naŋ sagra derɛ a Naaŋmen yɛlɛ, 20#Piil 9:4; Bag 3:17 kyɛ te sɛge ko ba ka ba ta dire tebɛ boma, a ta tonɔ peɛ̃mo toma, a ta ɔɔrɔ donne ba naŋ ba kɔrre kyɛ ka a kpi, a kyɛ ta dire zẽẽ. 21#Tom 13:15 Bonso, a dakoroŋ saŋ, Mooziz da taa la noba naŋ da maŋ moɔlɔ a Naaŋmen yɛlɛ a teŋkponni zaa poore, kyɛ ka a pɛnnoo bebiri zaa ka ba maŋ kanne O yɛlɛ a puoruuderi poore.”
Gane Ba Naŋ Sɛge Ko A Nemboore-yobo Naŋ Sage De A Kirista Yɛlɛ
22A apostoliimine ane a nembɛrɛ ane a puoruu laŋne deme zaa pãã da laŋ la noɔre, a kaa-iri noba a ba poɔ, a na toŋ ba ka ba gaa a Anteyɔk, a laŋ ne Pɔɔl ane Banabas. Ba da toŋ la Gyudas ba naŋ boɔlɔ Basabas ane Silas, naŋ da waa wederebɛ a yɔɔmine poɔ, 23ne a gane ŋa, “A yɛ yɔɔmine, a apostoliimine ane a nembɛrɛ puoro la a yɔɔmine, a Nemboore-yobo naŋ be Anteyɔk ane Seeriya ane Selusiya tenne poore. 24#Tom 15:1 Te woŋ ka a te noba mine naŋ yi te poɔ, te naŋ ba toŋ, da wa yeli la yɛlɛ a dɔ̃ɔ̃ yɛ teɛroŋ. 25Azuiŋ, te laŋ la noɔre a kaa-iri noba a toŋ ba yɛ zie, ba ne Banabas ane Pɔɔl te naŋ nɔŋ, 26ba naŋ de ba nyɔvoɛ zaa kpimare a te Daana Yeezu Kirista zuiŋ. 27A lɛ zuiŋ, te toŋ la Gyudas ane Silas ka ba wa manne a yeli ŋa ne ba nɔɛ a ko yɛ. 28Bonso, a Vooroŋ Soŋ ane te nyɛɛ la ka a ba seŋ ka te de dɔgroŋ zaa dɔgle yɛ zu, ka a yelfere ama yoŋ naane: 29yɛ ta dire tebɛ boma, a ta dire zẽẽ, a ta ɔɔrɔ donne ba naŋ ba kɔrre kyɛ ka a kpi, a ta tonɔ peɛ̃mo toma. Yɛ na e la a neɛ, ka yɛnee iri yɛmenne yi a ama poɔ. Yɛ zeŋ velaa.”
30Ba pãã da toŋ ba la, ka ba da sigi a Anteyɔk. Ba naŋ da wa boɔle a puoruu laŋne deme lantaa, ba da de la a gane ko ba. 31A noba naŋ da wa kanne a gane, ba poore da pɛlɛɛ la ne a gane yelbie. 32#Tom 11:27; 13:1 A Gyudas ane Silas meŋ naŋ da waa Ŋmen-yelmanneba, da yeli la yɛlɛ yaga teɛ a yɔɔmine a ko ba faŋ-paalaa. 33Ba naŋ da wa be a be ka a kɔɔre belãã, a yelderebɛ da puori ba la kyɛ eŋ ba sori ka ba leɛ gaa a noba na naŋ toŋ ba zie. 34[Kyɛ Silas eŋ zie, a da waa la velaa ko o ka o kpeɛrɛ a be] 35Kyɛ Pɔɔl ane Banabas da zeŋ la a Anteyɔk poɔ. Ba ne noba yaga mine da kanne la a noba kyɛ moɔle a Daana yelbiri a be.
Pɔɔl Ane Banabas Naŋ Wɛle Taa
36 #
1 Tɛs 3:5
Bebie mine puoriŋ, Pɔɔl da yeli ko la Banabas, “E ka te leɛ yɔ a nyɛ a yelderebɛ a tenne na zaa poore te naŋ da kanne a Daana yelbiri a nyɛ lɛ ba naŋ erɛ.” 37#Tom 12:12; 12:25 Banabas da boɔrɔ la ka ba taa a Gyɔɔn ba naŋ boɔlɔ Mak a gɛrɛ ne. 38#Tom 13:13 Kyɛ Pɔɔl da ba boɔrɔ ka o taa neɛ naŋ da zo kyɛ bare ba Pamfiliya poɔ, a ba tu ba a toŋ a toma. 39A nɔkpeɛne da wa kpɛ la faa, ka a lɛ da e ka ba da wɛltaa; Banabas da taa la a Mak ka ba kpɛ gbori a gaa Saapuru. 40Kyɛ Pɔɔl da kaa-iri la Silas, ka a yelderebɛ da sɔre a Daana maaloo ko o kyɛ ka ba gɛrɛ. 41O da tu la Seeriya ane Silisiya, a erɛ ka a puoruu laŋne noba yeldeebo erɛ kpeɛŋaa.
Dagaare First Bible © The Bible Society of Ghana, 2025.