Toma 14
14
Pɔɔl Ane Banabas Naŋ Moɔle A Yelnoore A Ikonio Teŋɛ Poɔ
1A lɛ ne o zu la da e a Ikonio teŋɛ poɔ, a saŋ Pɔɔl ane Banabas naŋ da kpɛ a Gyuumine puoruudie poɔ. Ba da yeli la yɛlɛ velaa ka a Gyuumine ane Girik noba yaga da sage de a Yeezu yɛlɛ. 2#Tom 13:45 Kyɛ a Gyuumine banaŋ naŋ da ba sage de a Yeezu yɛlɛ da tɔ la a Nemboore-yobo eŋ, a sãã ba teɛroŋ ka ba zɔɔrɔ ne a yɔɔmine. 3#Tom 19:11; Hib 2:4 A lɛ zuiŋ, a Pɔɔl ane Banabas da be la a be kɔɔre a da yele yɛlɛ a Daana yuori eŋɛ kyɛ ba zoro dabeɛ̃. A Daana da di la O yelbiri maaloo danseɛ, a da vɛŋ ka yelwulii ane toŋkpeɛne tu ba zie a nyɛ eebo. 4Kyɛ a teŋɛ deme da wɛle la taa, ka ba mine da are ko a Gyuumine, kyɛ ka ba mine meŋ da are ko a apostoliimine. 5#Tom 14:19; 2 Tim 3:11 A Nemboore-yobo ane a Gyuumine ane ba namine naŋ da boɔrɔ ka ba dɔgre a apostoliimine kyɛ za ba ne kubo, 6a Pɔɔl ane Banabas da baŋnea la a da zo gaa Listera ane Dɛɛbe naŋ da waa Lekaniya tenne ane a paaloŋ na naŋ ŋmaagyili o; 7#Tom 11:19-20 a da moɔlɔ a yelnoore a be.
Pɔɔl Ane Banabas Naŋ Gaa Listera Ane Dɛɛbe Tenne
8 #
Tom 3:2
A Listera teŋɛ poɔ, dɔɔ kaŋ da be la a be a gbɛre zeŋ a yi a o dɔgebo saŋ zaa a daŋ ba kyɛŋ togitogi zaa. 9#Mat 9:28 O da kyɛllɛ la a yɛlɛ a Pɔɔl naŋ da yele. A Pɔɔl da kaara o la tĩĩ a wa nyɛ ka o taa la yeldeebo naŋ na toɔ̃ e ka o nyɛ sammo. 10Ka a Pɔɔl da yeli ne kɔkɔkpeɛŋaa, “Vaa-iri are dendeŋ.” Ka a dɔɔ da vaa-iri are a piili kyɛnɛ. 11#Tom 28:6 A nembeɛoŋ naŋ da wa nyɛ bonna a Pɔɔl naŋ da e, ba da kyeere la yaga zaa ne a Listera deme kɔkɔre, “A ŋmemɛ sigi wa la te zie a taa nensaala waaloŋ!” 12Ba da boɔle la a Banabas ka Ziyos, kyɛ da boɔle a Pɔɔl ka Hɛmes, bonso, ona la da yele a yɛlɛ zaa. 13A Ziyos puoruudie da are la a teŋkpoŋ niŋesogɔ. A Ziyos bagmaala da taa la naadɛɛ ane tepuuri a wa ne, o ne a nembeɛoŋ da boɔrɔ la ka ba maale bagre. 14A apostoliimine, Banabas ane Pɔɔl naŋ da wa woŋ a lɛ, ba da kyeɛre la ba kparre ne posaanaa, kyɛ zo kpɛ a nen-yaga poɔ a kyeerɛ yele: 15#Tom 10:26 “N bamine, bonso ka yɛ erɛ a ŋaa? Te meŋ waa la nensaalba aŋa yɛ naŋ waa lɛ, kyɛ te taa la a yelnoore wa ne ka te wa ko yɛ ka yɛ na bare a bonweere ama kyɛ wa a Naaŋmen naŋ voorɔ zie, a Onaŋ naŋ iri a sazu ane a teŋɛ ane a mane ane a boma zaa naŋ be a poɔ. 16#Tom 17:30 A dakoroŋ saŋ na, O da bare la a nemboorɔ zaa ka ba erɛ seŋ lɛ ba naŋ boɔrɔ. 17#Yiel 147:8; Gyɛ 5:24 Anealɛzaa, O da maŋ taa la dansediribe ka ba wullo a O tonveɛle; a korɔ yɛ saa ka yɛ boma maŋ maale, a maŋ ko yɛ bondirii kyɛ e ka yɛ taa popeɛloŋ.” 18Ane a ba yeluu ŋa zaa, ba da ba toɔ̃ pigi a noba sori ka ba na ta maale a bagre ko ba.
19 #
2 Kor 11:25; 2 Tim 3:11 Kyɛ a Gyuumine da yi la Anteyɔk ane Ikonio a wa a be, a da wa leɛre a nembeɛoŋ teɛroŋ. Lɛ la ka ba da za a Pɔɔl ne kubo kyɛ vu o yi ne a teŋɛ poɔ a te bare a be a teɛre ka o kpie la. 20Kyɛ a potuuribo naŋ da wa ŋmaagyili o, o da iree la a da leɛ kpɛ a teŋkpoŋ poɔ. Zie naŋ da wa nyaa, o ne Banabas da gaa la Dɛɛbe.
A Pɔɔl Ane Banabas Naŋ Leɛ Gaa Anteyɔk Naŋ Be Siiriya Paaloŋ
21Ba naŋ da wa te moɔle a yelnoore a Dɛɛbe poɔ a nyɛ potuuribo yaga a be, ba pãã da leɛ gaa la Listera, a yi a be gaa Ikonio ane a Anteyɔk. 22#Tom 11:23; 1 Tɛs 3:3 A be, ba da yeli la yɛlɛ teɛ a potuuribo a ko ba faŋ-paalaa ka ba na eŋ faŋ a kyɛnɛ a ba yeldeebo poɔ, a yele, “A ferɛɛ la ka te nyɛ dɔgroŋ yaga kyɛ pãã kpɛ a Naaŋmen naaloŋ poɔ.” 23#Tom 13:3 Ba naŋ da wa kaa-iri nembɛrɛ a puoruu laŋne yie zaa poore baare, ba pãã da leŋ la noɔre, a puori eŋ ba kyɛ de ba ko a Daana, a Onaŋ yɛlɛ ba naŋ da sage de.
24Lɛ la ka ba da tu Pisidiya a te gaa Pamfiliya. 25Ba naŋ da wa kanne a Naaŋmen yelbiri a Pɛɛga teŋɛ poɔ, ba da sigi la Ataliya. 26#Tom 13:1-2 Be la ka ba da kpɛ gbori a gaa Anteyɔk, a be la ka a noba da daŋ sɔre a Naaŋmen maaloo ko ba ane a toma na ba naŋ da toŋ baare. 27#1 Kor 16:9 Ba naŋ da wa te ta, ba da boɔle la a puoruu laŋne deme lantaa, a manne a toma zaa Naaŋmen naŋ da de ba toŋ ne, ane a lɛ O naŋ yuo a yeldeebo dendɔre a ko a Nemboore-yobo meŋ. 28A Pɔɔl ane Banabas da be la a potuuribo zie ka a kɔɔre belãã.
Currently Selected:
Toma 14: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.