Romanos 7
7
Jarewa jun k'amb'al n'oj chrij jun k'ulnem
1Qachlal, ix qatz qtzij kich'ob' chik upxab' u Moisés. Jare upxab' u Moisés kitqan pujlom jun mnaq, per xaq xawi jumpa k'aslik. We kamnaq chik, ot chu chu'ab' un pxab' pujlom. 2Kimb'ij jun k'amb'al n'oj chiwe: jare jun ixoq che o richjil, k'lunaq ruk'. We k'as na richjil, jare un pxab' kub'ij che nixoq nmister kikje na ruk'. Per we xkam un richjil, nixoq kel kanoq chuxe' un pxab' che kub'ij che nmister kikje na ruk' richjil. 3Xa rmal, we k'as na richjil, kuya t che nixoq kikje ruk' jun chik achi, mal we jala ku'ono, ku'on numak che kub'ij upxab' u Moisés che ot mow ku'ono we o richjil. Per we xkam richjil, tik'ri kto'taj kanoq chjuch su kub'ij un pxab' chrij jun ixoq che k'lunaq chik. Jala unom che ku'on t umak miskini' kik'le' ruk' jun chik achi.
4Jala ix, qachlal, peche mow ixkamnaq chik chjuch utaqnik un pxab', jala peche jun che nmister t chik che, che ku'ono su kub'ij un pxab' echi' kamnaq chik. Peche mow jnam xixkam ix ruk' Qajaw Jesucristo. Jare kilwi che ix ixrech chik Jesucristo chanim. Jare ix ixutinmit Re, che jare Re xk'astaj uwuch chikxo'l nk'aj kamnaq. Chewa chanim kqanmirsaj u'ij Dios ruk' utzlaj qachak che kujtjin che u'anik chjuch Re. 5Echi' uj'o che u'anik su kurij un qapinsar ku'ono che xa upinsar mnaq rech xqa'ano su xqaj xqa'ano, echi' mja kujkjon che Qajaw Jesucristo, xaw xqataqej u'anik su xraj qapinsar che xa jare nk'aj k'axlaj taq mak kriqtaj chi' chuchlew. Xa jala', un pxab' peche mow xa xuya qapinsar che u'anik runjel nk'aj itzel taq mak che kujuk'am b'i chpam un kmik. 6Per ni chanim, qo'j uj'o t chik chuxe' utaqnik un pxab', mal ujelnaq chik pu'ab'. Chanim jare kqa'ano su kraj Dios chqe, per xaw t rmal che jala kub'ij un pxab' chqe, xani chanim kqa'ano su kub'ij Dios chqe mal jala kqaj kqa'ano. Mas kurij qak'u'x kqa'ano su kub'ij Dios rmal Tyoxlaj Uxlab'xel che o pqanma'.
Jare mak peche mow kichkun na chpam nk'asnmal
7Ni le' chik, ¿le jare kilwi che ri upxab' Dios, xa k'ax unom chqe? Jala taj. Per in xinwit'amaj che in najmak chjuch Dios, rmal upxab' che xuk'ut chinwuch che in xa najmak. Jare in xa xinch'ob' taj che urixik uwuch su o ruk' jun chik, jare mak chjuch Dios, wet mitji o upxab' Dios che jala kub'ij: «Xa marij uwuch su o ruk' jun chik mnaq»,#Éx 20:17; Dt 5:21. kcha'. 8Echi' xinriq un pxab'i', peche mow xa xuk'suj npinsar y xinrij uwuch su o kuk' nk'aj chik mnaq. Jala xu'ono peche mow xa xichkun mak chpam nk'asnmal rmal un pxab'. Wet mitji o un pxab', k'aljan taj che o mak. 9Nab'e kanoq echi' xaq nlaj ak'al, nk'aslik y utz ninom echi' mja kinch'ob'o che o un pxab' rech Dios. Per jumpa xinwit'amaj che o un pxab', tik'ri xk'un saq chwe che xa mak ninom chjuch Dios, che xa rmal xa nkamnaq chik chjuch Dios. 10Jala unom che xinch'ob'o che naj nik'wi che Dios. Ximb'ij in che upxab' Dios kuya nk'asnmal ruk' Dios we kintz'qatsaj runjel. Per xaw xuk'ut chinwuch che naj nik'wi che Dios, mal xinkun taj che utz'qatsaxik runjel su kub'ij. 11Jare mak che xwaj xin'ano, peche mow xukoj un pxab' che nsub'ik. Xukoj uchu'ab' chwe rech xnutaq che u'anik k'ax. Un pxab' xuk'ut chinwuch che naj nik'wi che nk'asnmal ruk' Dios, peche mow xa xnukamsaj.
12Jare upxab' Dios, jare jun tyoxlaj pxab'. Jare utaqnik Dios, puro tyoxlaj taqnik. Ot tz'il ruk', mal puro sk'um. Jare utz chiquch. 13We jare utz upxab' Dios, ¿su mow lo xu'on chwe che kinkamik? Jare taj upxab' Dios xu'on k'ax chwe, xani jare nmak che xin'ano xnukamsaj. Peche mow jun mak xukoj jun utz che uk'utik k'ax. Jala xu'ono rech k'alnik che un mak xa ustaj. Xa jala', upxab' Dios xuk'utu che un mak, xa ustaj.
14Qo'j qit'am chik che un pxab', chpam ranma' Dios elnaq wi, y jare rmal Dios che pitnaq loq rech kichkun chpam qanma' qo'j. Per jare rmal che in xa nimnaq, xikun mak chwe xnuch'ako. Jala' peche mow xa niy'om wib' che u'anik mak, xaq jnam ruk' jun ajchak kuya rib' pu'ab' upatrón. 15Xa kinch'ob' taj su kin'ano. Kwaj kin'ano su ri' che sk'um chjuch Dios, per kinkun taj. Xa jare kin'ano jumpa nk'aj sutaq'ik che mas k'ax kinwilo, che kwaj taj kin'ano. 16We kin'ano su chak che xa ustaj che kwaj taj kin'ano, kinch'ob'o che un pxab' jare utz. 17In kwaj taj kin'ano su kintjin che u'anik che xa ustaj, peche mow in taj kintjinik kin'an nk'aj mak. Xa jare nk'aj mak che o chpam wanma' ku'on wari' che xa ustaj. 18Ot su kri' jun utz o wuk' mal xa nimnaq, n'ustaj. Miskini' kwaj kin'an jun utz chjuch Dios, per kinkun taj che u'anik. 19Jare kin'an taj chinchke utz che kwaj kin'ano. Xaq xawi jumpa sutaq'ik che xa rech itzel che kwaj taj kin'ano, jarewa kintjin che u'anik. 20Rmal che jare kin'ano chinchke kwaj taj kin'ano che xa rech itzel, jare kilwi che in taj kin'anawre. Xa jare un mak che kikje chpam wanma' knutaq che u'anik jumpa sutaq'ik che xa rech itzel.
21In kinwilo che jawa kinriq in chanim. Echi' kwaj kin'an jun utz, xa nqaj k'wi chwe jumpa sutaq'ik che xa rech itzel. 22In utz kina' upxab' Dios pink'u'x, kinki'kat ruk'. In qatz kwaj kin'ano su kub'ij. 23Per kinwilo che su o chpam npinsar in che xa nimnaq, jun chik umow chjuch su o chpam wanma' che utz. Jare su o pinpinsar ku'on ch'oj ruk' su chak kwaj kin'an chpam wanma'. Jarela knutaq che u'anik mak, xaq jnam ruk' peche jun pxab' che kitqan pnijlom, peche mow nuxmom. 24¡Ay! ¡T'ob' nwuch in, che mas k'ax nik'wi! ¿Su lo knuresaj loq pu'ab' npinsar che xa upinsar mnaq, che knuk'am b'i chpam kmik? 25Per in kintyoxij che Dios rmal Qajaw Jesucristo. Jare Re knuresaj loq pu'ab' mak che kurij npinsar kin'ano.
Chanim kinch'ob' chpam wanma' che kwaj kin'ano su kub'ij upxab' Dios, per jare npinsar che xa upinsar mnaq, knutaq che u'anik mak.
Currently Selected:
Romanos 7: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
