Romanos 6
6
Peche mow ujkamnaq chjuch uchu'ab' mak, per kujk'se' na rmal uchu'ab' Qajaw Jesucristo
1¿Su kqab'ij qo'j chrij runjel nk'aji'? ¿Le jare utz che qataqem u'anik qamak mal kuk'ut na mas ut'ob' Dios chiquch? 2¡Jala taj! Chewa chanim peche mow ujkamnaq chik chjuch uchu'ab' qamak. We jala', ¿su mow che qataqem u'anik qamak we ot chu chu'ab' kitqan pqajlom? Ot mow che jala'. 3¿Le kich'ob' taj che qunjel qo'j che xqa'an qasna', xqaya qib' pu'ab' Qajaw Jesucristo, rech kqa'an jun ruk' Re? We jala', xaq jnam ruk' peche mow xujkam ruk' Re echi' x'an qasna' chqe. Jare kilwi che xujkam chjuch uchu'ab' qamak. 4Ri qasna' xqa'ano, xaq jnam ruk' peche xujkam ruk' Jesucristo. We jala', peche mow jnam xujmuqtaj ruk' Re. Rmal che xk'astaj uwuch Qajaw Jesucristo chikxo'l nk'aj kamnaq rmal uchu'ab' uQaw che nim u'ij, jare qo'j peche mow jnam xujk'astaj ruk' Re, rech kikje jun k'ak' qak'asnmal.
5We xqajach qib' pu'ab' Jesucristo, jare kilwi che jnam xujkam ruk', echi' xkam Re. Ena jare kilwi che jnam kujk'astaj na ruk' Re, jala peche xk'astaj Re chikxo'l nk'aj kamnaq. 6Qit'am chik che jumpa nk'aj ujer taq qak'asnmal che xa rmal xqa'an qamak, xsachtaj uwuch echi' xkam Jesucristo chjuch un cruz rmal qech qo'j. Chanim, nmister t chik chqe kqataqej u'anik mak, mal uj'o t chik pu'ab' mak rech kitqan pqajlom. 7Un kamnaq peche mow tzaqpim chik, mal kitqan t chik mak pujlom. 8Ni le' chik, we jnam xujkam ruk' Jesucristo, soq kqakub'a qak'u'x chrij che kujk'se' na ruk' Re chpam jun k'ak' qak'asnmal, jala peche xu'on Re. 9Qit'am chik che Jesucristo xk'astaj uwuch chikxo'l nk'aj kamnaq. Le' kkam t chik, mal xich'kan pujlom un kmik. Xa rmal che ot chu chu'ab' un kmik pujlom. 10Echi' xkam Qajaw Jesucristo, xa jun b'welt xkamik, rech xusach uwuch uchu'ab' mak pkijlom mnaq. Rmal xk'astaj uwuch chikxo'l nk'aj kamnaq, chanim k'as chik rech unmirsaxik u'ij Dios. 11Nmister che kich'ob'o che peche mow ixkamnaq chik chjuch uchu'ab' mak, jala peche jun che kamnaq chik otchich su kuna' ucuerpo. Chanim ri ix o jun k'ak' ik'asnmal. Jala' pre chiwe che kinmirsaj u'ij Dios, xa rmal che ix'o chik ruk' Qajaw Jesucristo. 12Xa miya chik che mak che kitqan pijlom chanim. Xa miya iwib' che u'anik su kurij icuerpo ku'ono che xa ustaj chjuch Dios. 13Xa miyach icuerpo chpam mak che ku'ono jumpa sutaq'ik che xa rech itzel. Xa miya che mak kitqan pijlom. Xaw kijach iwib' pu'ab' Dios, jala peche ixk'astajnaq chik chikxo'l nk'aj kamnaq rmal uchu'ab' Dios che kitqan pijlom chanim. Chijcha icuerpo pu'ab' Dios, rech ki'ano su kqaj chjuch Re. 14Chewa chanim, pre t chik chiwe che kitqan uchu'ab' imak pijlom. Ot chu taqnik un pxab' pijlom che kixuya chpam jun k'ejsb'al iwuch rmal imak. Ixtzaqpim chik, mal ix'o chik pu'ab' Dios rech kixk'se' chpam ut'ob' Re.
Jun k'amb'al n'oj chrij jun che peche o pu'ab' jun chik
15Xa rmal ri' che ximb'ij chiwe, ¿le utz kqataqej loq u'anik qamak, xa rmal mel qo'j uj'o t chik chuxe' un pxab' che kuya che Dios che kuk'ejsaj qawuch? ¡Ot mow che kqataqej u'anik qamak! 16Kinya jun k'amb'al n'oj chiwe. Jare ix iwit'am chik we kijach iwib' pu'ab' jun mnaq, rech kixok ruk' pchak, nmister kinmaj utzij su kub'ij. We kiya iwib' che u'anik mak, kilik peche mow jare jun iwjaw, kixuk'am b'i chpam un kmik. Soq we kiya iwib' che u'anik su kub'ij Dios, kixuk'am b'i chpam jun sk'umlaj ik'asnmal ruk' Dios. 17Per in kintyoxij che Dios che ix, miskini' nab'e xa mak ki'ano mal jare kixtaq che u'anik, jala t chik le', rmal mel ruk' runjel iwanma' kixtjinik kinmaj saqlaj tzij rech Dios che k'tum chiwuch kmal nk'aj mnaq rech Dios. 18Chewa chanim jare Dios ixuresam chik pu'ab' jumpa sutaq'ik che xa ustaj mal xa mak. Ot chu chu'ab' che kitqan pijlom. Xix'ax pu'ab' Dios rech kitaqej u'anik su ri' che sk'um chjuch Re. 19Kimb'ij wari' chiwe chpam qatzij qo'j che xa ujmnaq xa rmal che k'ax uch'ob'ik runjel ri'. Ujer, peche mow xijach icuerpo che u'anik mak che jare nk'aj tz'il laj taq mak che kurij icuerpo ki'ano. Per chewa chanim nmister kijach iwib' pu'ab' Dios, che u'anik sk'um chpam ik'asnmal, rech kixel tyoxlaj taq ajkojnel chjuch.
20Echi' ix'o kan che u'anik runjel jumpa sutaq'ik che xa rech mak, ot iwe che sk'umlaj b'e rech Dios. 21¿Su xiriqo che xiwechb'ej kan rmal su xi'an nab'e kanoq? Otaj. Xa kuya k'ixb'al chiwe che kina'tsaj su xi'an ujer che xa rech itzel, mal xa jare kixuk'am b'i chpam ikmik. 22Chewa chanim ixelnaq chik pu'ab' jumpa sutaq'ik che xa ustaj. Nmister t chik kitaqej u'anik imak, mal ix'o pu'ab' Iwjaw Dios. Jare le' kiwechb'ej jun k'ak' ik'asnmal, che qatz tyoxlaj k'asnmal, che ot uk'isik. 23Chewa chanim, qalom chik che ri tojb'al kuriq jun rmal umak, jare un kmik che su pxab' kkamik. Per jare ut'ob' Dios xusipaj chqe rmal Qajaw Jesucristo, kujuk'am b'i chpam jun qak'asnmal che ot uk'isik.
Currently Selected:
Romanos 6: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
