San Mateo 10
10
Ri Jesús xyuchay kab'aljuj (12) apóstol
(Mr 3:13-19; 6:7-13; Lc 6:12-16; 9:1-6; Hch 1:13)
1Ri Jesús xyusk'ij kab'aljuj (12) udiscípulo, xyumolo. Xuya kchu'ab' rech kiyikunik kikkesaj itzel taq espíritu chke mnaq, soq rech kiyikunik kkiknaj runjel jumpa yab'il rich'il jumpa k'ax o chke mnaq. 2Jarewa kb'i' kab'aljuj (12) apóstol:
Un nab'e, jare u Simón, che Lu' kb'ix che rmal Jesús,
rich'il u Trix, che jare ucha' u Simón.
Keb' chik, jare keb' uk'jol u Zebedeo, jun Santiago#10:2 U Santiago soq kb'ix Jacobo che. ub'i',
nun chik Wan ub'i'.
3Soq xyusk'ij u Pelipe,
u To'l,
u Max,
rich'il u Mte'y che xa aj'esal alkawal nab'e.
Soq xusk'ij u Santiago che jare uk'jol u Alfeo,
soq rich'il u Tadeo.
4Soq xyusk'ij jun chik Simón ub'i', che zelote kb'ix che, che soq Cananista kb'ix che.#10:4 Cananista kel kub'ij zelote.
Soq xusk'ij u Judas Iscariote che xuk'ij Jesús pik'ab' nk'aj rajch'oj. Jarela kb'i' kab'aljuj (12) apóstol.
5Jarewa kab'aljuj (12) apóstol xyutaq b'i Jesús. Xyupixb'ej b'ik, xub'ij b'i chke: «Xa mix'e kuk' nk'aj mnaq che iyaj Israel taj, soq xa mixok ptaq ktinmit aj Samaria. 6Jare jix kuk' nk'aj aj Israel, mal ke xa ijala peche nk'aj chij che isachnaq kanoq. 7Runjel jachi taq kix'e wi, chib'ij chke mnaq che ri utzlaj atb'altzij rech Dios xa nqaj chik k'wi. 8Chiknaj chintaq mnaq che xa iyab', chik'suj chintaq xa ikamnaq chik, y chiknaj chintaq xa o ch'a'k chkij, awas ub'i', soq chiwesaj nk'aj itzel taq espíritu o chke mnaq. Ri Dios xa usipam ichu'ab' ix, soq jala china ix, xa mitz'noj iwjil echi' ki'an ichak ruk' Dios rech to'b'alke mnaq. 9Echi' kix'ek xa mik'am b'i pwaq chpam uk'olb'al irjil. 10Soq xa mik'am b'i ikuxtar, soq xa mik'am b'i keb' iwitz'yaq, xaq xaw jun che kikoj b'ik, xa mik'am b'i ixjab', xaq xaw keb' che kikoj b'ik, soq xa mik'am b'i ich'mi'y. Xawi kikoj b'ik, xa rmal mel tqal che jun ajchak che ksipax che sutaq ku'on nmister che, rech kutijo soq rech kukojo.
11»Chinchke tinmit kixok wi, we chpam jun nim tinmit, seno chpam jun ch'in tinmit, seno chpam jun kanton, chitzkuj jun utzlaj mnaq chla' rech kixuk'laj chirchoch. Chla' kixkanaj kan wi. Xa mik'ex iposada, ast retal echi' kixel b'i chpam un tinmite'. 12Echi' kixo'pan chpam jun ja, chiy'a rtzil kwuch rjaw ja, chib'ij chke: “Jaretb'a Qajaw Dios kuya nimlaj utzil chixo'l”, kixche che. 13We o jun mnaq chla' che kraj kikje utzil ruk', chuk'ma kanoq. Per we ot jun kraj kuk'amo, iwuk' ix kkanaj kan wi ri utzil. 14We o jun tinmit che kixkik'laj taj mnaq chpam, mowni kkaj kikta' su kib'ij chke, echi' kixel loq chpam un ja, seno chpam un tinmit, kitota kan ulew che iwqan, k'utb'alre che o kmak. 15Ruk' saqlaj tzij kimb'ij chiwe che echi' kuriq ij che k'an atb'altzij pkijlom kunjel jumpa mnaq, mas nim k'ax kikriq mnaq ti kk'ejsax kwuch che iy'o chpam un tinmiti' che kixkik'laj taj. Nim na k'ax kikriqo chjuch k'ejsb'al kwuch xikriq nk'aj mnaq chpam keb' tinmit Sodoma rich'il Gomorra.#Gn 19:24-25.
Ri mnaq che kikkoj utzij Dios kikriq na k'ax
(Mr 13:9-13; Lc 21:12-17)
16»Chitampe', kixintaq b'i pchak. Jare ix peche mow ixchij ix'o chikxo'l utiw. Kixoqtaxik peche kiyoqtax taq chij kmal nk'aj utiw. China b'a che, che mas o in'oj ki'ano, jala peche kik'an nk'aj kmatz.#10:16 Ke kiyikunik kikto' kib' we o jun kraj ku'on k'ax chke, mal o mas kin'oj. Soq ki'an che, che puro ixmanxo ki'ano, kixchka'p taj, jala peche kik'an taq tz'kin che ot jun k'ax kik'ano. 17China kwent iwib' chikuch nk'aj mnaq, mal kixkjach na pik'ab' atb'altzij y kixkch'ay na chpam nk'aj rchoch Dios. 18Xa wmal in, kixkk'am nub'i chikuch nk'aj nmaq atb'altzij, peche nk'aj gobernador rich'il nk'aj rey, rech kixkunik kib'ij utzlaj taq rson chke chwij in, soq jala kib'ij chke nk'aj mnaq che iyaj Israel taj. 19Per echi' kixkk'am b'i chikuch atb'altzij, xa mib'soj sutaq kib'ij. Xa mix'ej iwib' che su ki'an che ub'ixik, mal echi' kuriqo kixch'awik, jare Dios kub'ij chiwe sutaq kib'ij. 20Xa mib'soj su kib'ij chke, mal ix taj kixch'awik, xani jare Tyoxlaj Uxlab'xel rech iQaw Dios kuya tzij rech kib'ij.
21»Iy'o mnaq kikjach na kachlal pkamsxik, soq iy'o achjab' kikjach na kalk'al pkamsxik. Soq iy'o ak'lab' kikmaj ch'oj kuk' kqaw kchuch, kikjach pkamsxik. 22Xa wmal in kunjel jumpa mnaq xa k'ax kixkkilo, per chin jun kuch'ij na ast retal echi' kk'is na runjel, jare re kto'taj na, rech kuriq uk'asnmal ruk' Dios. 23Echi' kixoqtax b'i rech k'an k'ax chiwe chpam jun tinmit, chixanmaj b'ik, jix chpam jun chik tinmit. Ruk' saqlaj tzij kimb'ij chiwe che mja kixkunik kitzlij upam runjel nk'aj tinmit o pukwent Israel, ti kpi nAchi nuK'jol Dios.
24»Ot jun mnaq che o ptojxik jare mas nim reqle'n chjuch rajtojnel, mowni o jun ajchak che jare mas nim u'ij chjuch upatrón. 25Jun mnaq che o ptojxik, kurqa jun ij nmister che xaq jnam kelik peche rajtojnel. Jun mnaq che o pmokik, kurqa jun ij nmister che xaq jnam kelik peche upatrón. We jun rjaw ja kb'ix Beelzebú#10:25 Jare un nimlaj itzel Satanás. Jare kjaw nk'aj chik itzel taq espíritu che iyajch'oj ruk' Qajaw. che, xa pyor b'ari kb'ix chke nk'aj ralk'al.
Ri Jesús xub'ij che utz kux'ej rib' jun chjuch Dios
(Lc 12:2-7)
26»Per xa mix'ej iwib' chke nk'aj mnaq che kkaj kik'an k'ax chiwe, mal runjel sutaq chla'al ch'uqtal uwi', k'aljan na chsaq. Runjel sutaq chla'al wam, runjel kit'amax na. 27Kelik che runjel sutaq nb'im in chiwe pqu'm, runjel ktataj na, k'aljan na chsaq. Runjel jumpa sutaq kimb'ij in chiwe itkel, runjel ktataj na kmal ik'i mnaq, peche we o jun ko kusik'b'aj rib' che ub'ixik puwi taq ja. 28Xa mix'ej iwib' chikuch mnaq che xaw kikkamsaj icuerpo. Xaq xawi kiyikun che u'anik, per kiyikun taj kik'an k'ax che iwanma'. Jare chix'ej iwib' chjuch Qajaw Dios che echi' ixukamsam chik, soq o uchu'ab' rech kixuk'eq p'a'.#Lc 12:4. 29Ix iwit'am che o taq tz'kin che ot mas keqlem, xa jun rqan pwaq reqlem keb' taq tz'kin. Per miskini' xa ch'in rjil, Dios mas kyuchjij taq tz'kini', ot jun kkam chke we jare taj iQaw o chla' chkaj kub'ij che kkamik. 30Soq jala ku'on iQaw Dios chiwe ix, kixuchjij. Ast rejlam chik runjel iwi' o che ijlom. 31Xab'a mix'ej iwib', mal mas nim iweqlem ix chjuch keqlem k'ilaj taq tz'kin. Ot su kiriqo che rit'am taj Qajaw». Jala xub'ij Jesús.
Nmister kqab'ij chikuch mnaq we qo'j ujrech Jesucristo
(Lc 12:8-9)
32Xub'ij chik Jesús «Iy'o nk'aj mnaq kkix'ej t kib' che ub'ixik che iwech in, mal kikjom ntzij. Chin jun che jawa kub'ij chikuch nk'aj chik mnaq, soq jala chik kin'an in. Kimb'ij chik chjuch nQaw o chla' chkaj che wech in un mnaqi', mal xukoj ntzij. 33Per chin jun kub'ij chke mnaq che rit'am t nwuch in, soq jala chik kin'an in, kimb'ij na chjuch nQaw o chla' chkaj, che wit'am t uwuch re», xche Jesús chke.
Xa rmal Jesús che kikjach kwuch kib' mnaq
(Lc 12:51-53; 14:26-27)
34«Xa mib'ij ix che in npitnaq che uya'ik jun utzil chikxo'l mnaq chi' chuchlew, mal jare taj npitnaq che, xani npitnaq che ukojik ch'oj chikxo'l mnaq, mal o nk'aj che kikkoj ntzij, soq rich'il nk'aj chik che kiyikjon taj. 35Xa wmal in,
“jun achi kuk'eq rib' chrij uqaw,
soq jun ali kuk'eq rib' chrij uchuch,
soq jun ali kuk'eq rib' chrij jun rlib' ixoq.
36Xa jala', xa chikxo'l jun ja mnaq kik'an ch'oj chikuch”. (Mi 7:6)
37»Chin jun che jare mas kul'oj uqaw uchuch, ni in knul'oj t mas, tqal taj che, kikje wuk'. Soq chin jun che jare mas kyul'oj ralk'al, ni in knul'oj t mas, tqal taj che, kikje wuk'. 38Chin jun kraj kok wuk' chpam nchak, nmister che peche kutelej b'i ucruz,#10:38 Kel kub'ij che nmister che jun kutij k'ax che u'anik su kraj Qajaw Jesús. kitrij chwij. We kuch'ij taj che jala ku'ono, tqal taj che kikje wuk'. 39Chin jun kuto' uwi' uk'asnmal chi' chuchlew, echi' ksachtaj uwuch, ot su kuri'ej chik. Per chin jun che kub'soj taj uk'asnmal chi' chuchlew, jarela kuriq na jun uk'asnmal chla' chkaj ruk' Dios che ot uk'isik.
Jarewa tojb'alre ri qachak kqa'ano
(Mr 9:41)
40»Chin jun mnaq kixuk'amo, jare kilik che in knuk'amo. Chin jun knuk'am in, jare kilik che kuk'am Qajaw Dios che xnutaq loq. 41Chin jun mnaq kuk'am jun ajb'il utzij Dios, xa rmal che jare Dios utqom loq, kya na tojb'alre, jala peche tojb'al kya che jun ajb'il utzij Dios. Chin jun mnaq kuk'am jun utzlaj mnaq xa rmal che utzlaj mnaq chjuch Dios, kya na tojb'alre, jala peche tojb'al kya che jun utzlaj mnaq. 42Chin jun mnaq che kuya jun vaso jron che jun mnaq che ot reqle'n, xa rmal che jare ndiscípulo in, ruk' saqlaj tzij kimb'ij chiwe che kya na tojb'alre». Jala xub'ij Jesús chke nk'aj udiscípulo.
Currently Selected:
San Mateo 10: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
