San Mateo 9
9
Ri Jesús xuknaj jun achi che xa skirnaq ch'qap che ub'qil
(Mr 2:3-12; Lc 5:18-26)
1Tik'ri xok Jesús chpam jun barco, x'ax ch'qap che nu'ab' mar, tik'ri xo'pan chpam utinmit Re. 2Echi' o chla', iy'o nk'aj achjab' xiyo'pnik, ktelem b'i jun yab' chu ch'atim che', che xa skirnaq ch'qap che ub'qil. Echi' xuril Jesús che mas kikkub'a kk'u'x chrij, xub'ij che nachi che skirnaq ch'qap che ub'qil:
—Achi, china jun kowlaj k'u'x. Jumpa amak olik, ya kuytajnaq chik, —xche che.
3Iy'o keb' uxib' chke nk'aj ajtojnel rech upxab' Dios xikb'ij pikk'u'x:
«Nachi ri', xa kuretz'b'ej uwuch Dios». Jala xikb'ij pikk'u'x.
4Per ni Jesús rit'am chik sutaq kikb'ij pikk'u'x, ena xub'ij chke:
—¿Suche che xaq xaw rech itzel kichomaj pik'u'x? 5¿Chinchke k'ax t ub'ixik, we kimb'ij che un yab', “Xuytaj amak” ruk' we kimb'ij che, “Katwa'ljoq katb'inoq”? —xche chke.
6Tik'ri xub'ij chik chke:
—Rech kiwit'amaj che in nAchi nuK'jol Dios, o n'atb'altzij pkijlom mnaq chi' chuchlew rech kinkuy kmak, utz kinya jun k'utb'alre chiwuch che mas k'ax u'anik, —xche chke.
Ena xub'ij chik che nachi che skirnaq ch'qap che ub'qil:
—¡Katwa'ljoq, chiyka b'i asok, jat chawchoch! —xche che.
7Ena xwa'laj nachi, x'e chirchoch. 8Kunjel jumpa nk'aj mnaq che xkilo, jwert xiyok il. Ena xiyok che ukojik u'ij Dios, xa rmal che jare Re uy'om atb'altzij pik'ab' mnaq rech kiyikunik kik'an nmaq taq k'utb'al.
Ri Jesús xusk'ij u Mte'y rech k'e ruk'
(Mr 2:13-17; Lc 5:27-32)
9Echi' xel b'i Jesús chla', xuril pnoq jun achi Mte'y ub'i' ku'l chla' jachi ktoj alkawal. Ena xub'ij che: «Katjosaj wuk'», xche che. Nu Mte'y xwa'laj chanim, x'e ruk'.
10Xurqa jun ij, kitjin Jesús che utijwik uwa kuk' nk'aj udiscípulo chirchoch u Mte'y. Xiyo'pan ik'i nk'aj aj'esal alkawal rich'il nk'aj chik che xa iyajmak. Kunjel ke jnam kiwa' ruk' Jesús chla'. 11Echi' xkil nk'aj fariseo che xutij uwa Jesús kuk' nk'aj mnaqe', xikta chke nk'aj udiscípulo, xikb'ij:
—¿Suche che kutij uwa niwajtojnel kuk' nk'aj aj'esal alkawal rich'il nk'aj chik che xa iyajmak? —xiche chke.
12Echi' xuta Jesús che jala xikb'ij, xub'ij chke:
—Chin iyab' taj nmister t ajkun chke, xaq xawi chin iyab' nmister ajkun chke rech kkiknaj. 13Per o mow kix'ek y kitjoj iwib' che, su kilwi ri tzij tz'ib'tal kan chpam Tyox Wuj che kub'ij: “Kiwil to'b'al kwuch mnaq. Kwaj taj che kikamsaj tiko'n rech kisipaj chwe”.#Os 6:6. Jala tz'ib'tal kan chpam Tyox Wuj. In npitnaq taj che ksik'xik mnaq che utz kinom chjuch Dios kikb'ij, xani jare npitnaq che ksik'xik mnaq che kit'am che xa iyajmak, —xche Jesús chke.
Xtay che Jesús chrij ayuno
(Mr 2:18-22; Lc 5:33-39)
14Xipi nk'aj udiscípulo u Wan ajb'nal qasna', xikb'ij che Jesús:
—K'i b'welt kqach'ij qanumik qo'j rich'il nk'aj fariseo, ayuno kb'ix che, jare costumbre kik'ano, kojb'alre upxab' Dios. ¿Suche k'ut che jala taj kik'an nk'aj discípulo la? —xiche che.
15Ni Jesús xub'ij chke:
—¿Xatb'a o mow che kiyib'son mnaq che iyisk'im chpam jun k'ulnem we o un ji'xel kuk'? Ot mow che kiyib'sonik we o na re kuk', nmister che kiki'ktik. Per kurqan jun ij echi' kesax b'i un ji'xel chikxo'l, tik'ri k'ut o mow kikch'ij knumik,#9:15 Ri Jesús kraj kuk'ut chikuch che ustaj kiyib'sonik echi' o na Re kuk'. Re jala peche jun ji'xel. Ni nk'aj udiscípulo peche mow ijare iyisk'im chpam un nim'ij rech k'ulnem. —xche chke.
16Xub'ij chik Jesús chke:
—Ot chin jun kukoj ch'qap k'ojb'al k'saq che jun e'l atz'yaq. We jala ku'on che, ustaj kelik, mal le ch'qap k'ul che k'saq xa kujek' rib' y xa kub'it' mas natz'yaq. 17Mowni kya k'ak' u'al uva chpam nk'aj e'l taq srum tz'um peche eb'al. We jala ku'on che, ustaj, mal le k'ak' u'al uva xa kuxer un srum. Ku'on k'ax un srum y ktix nk'aj u'al uva chuchlew. Jare nmister che le k'ak' u'al uva kkol chpam nk'aj srum che k'saq, rech ku'on t k'ax nk'aj u'al uva soq mowni ku'on k'ax un srum.#9:17 O mnaq che jaljoj xik'an che uch'ob'ik chrij jun tziji'. O nk'aj kikb'ij che jare k'utb'alre che ustaj we o nk'aj mnaq che kiktaq nk'aj chik mnaq che u'anik ujer taq kcostumbre. Kikb'ij che otchich mow kikkoj utzij Qajaw Jesús we jnam kiktaqej u'anik peche xik'an ujer. Kikb'ij che kumaj taj. —Jala xub'ij Jesús chke.
Ri Jesús xuk'suj jun ali che xa kamnaq soq xuknaj jun ixoq
(Mr 5:22-43; Lc 8:41-56)
18Echi' kitjin Jesús kch'aw kuk' mnaq, o jun achi tk'al pkijlom nk'aj aj Israel xo'pan ruk', xixke' chjuch, xub'ij che:
—O jun nimb'al tela kkamik, per chna la pawor chwe. ¡Jo wuk', chiy'a ab' la pujlom rech kik'se'ik! —xche che.
19Ri Jesús xwa'ljik, x'e ruk', jnam xib'e kuk' nk'aj udiscípulo. 20Kiyitjin che kb'e ib'enaq ti xaq t'et xpi jun ixoq ruk'. Kab'aljuj (12) jnab' b'enaq chik che che umjom loq nuyab'. Un yab'il urqom xa kik' kitne' t chik che. Ena xqib' koq chrij Jesús y xuchap koq uchi' ritz'yaq. 21Jala xu'on nixoq, mal xub'ij puk'u'x: «Xaq ruk' we kinchap ritz'yaq, kink'chojik», xcha'. 22Ri Jesús xutza'mej rib' che rilik, xub'ij che:
—China jun kowlaj k'u'x, ixoq. Xatik'chojik rmal xakub'a ak'u'x chwij, —xche che.
Xaq ruk' jala xub'ij, xik'choj nixoq.
23Echi' xiyo'pan Jesús chirchoch nachi che tk'al pkijlom nk'aj aj Israel, xurilo che kyijb'amch kib' nk'aj ajb'nal su' rech kib'e che umuqik un kamnaq, soq rich'il nk'aj mnaq jwert kiksik'b'aj kib' rmal b'is. 24Ena xub'ij chke:
—¡Kixeloq! Un laj ali kamnaq taj, xa kwarik, —xche chke.
Per ni ke xa xiktij tze' che. 25Per ni Jesús xyuresaj loq nk'aj mnaq. Tik'ri xok b'i chla' jachi k'wi nali che xkamik, xuchap qaj nali che u'ab', ena xk'astaj uwuch nali, xwa'ljik. 26Kunjel mnaq che iy'o chla' chpam un tinmit, rich'il nk'aj che iy'o chunqaj, xikta rson che jala xu'on Jesús che nali.
Ri Jesús xyuknaj uxib' mnaq
27Echi' xel b'i Jesús chla', iy'o keb' achjab' xa ipotz', kika'y taj, kiksik'b'aj kib', xkitrimb'ej b'ik, xikb'ij:
—Lal ri'y umam u David, chil k'u'x la chqe, —xiche che.
28Echi' xok Jesús chpam jun ja, xiyok b'i keb' achjab' ruk' che xa ipotz'. Ena xuta chke:
—¿Le kinkunik kixinknaj kib'ij ix? —xche chke.
—Kqab'ij che katikunik, Qajaw, —xiche ke che.
29Ena xuchap koq nk'aj kwuch, xub'ij chke:
—Ix kixik'chojik mal xikub'a ik'u'x chwij, xikoj ntzij, —xche chke.
30Ena xika'yik. Ri Jesús jwert xyupixb'ej xub'ij chke:
—Xaq o mib'ij wi che xixk'chojik, —xche chke.
31Per ni ke xik'an taj su xub'ij Jesús chke, xaw xiyel loq, chanim xiyok che ub'ixik sutaq xu'on Jesús chke.
32Echi' xiyel b'i keb' potz' che xyuknaj Jesús, o jun chik yab' xikk'am loq mnaq ruk' che xa mem, xa itzel taq espíritu iyoknaq che, xik'an mem che. 33Ri Jesús xyuresaj b'i nk'aj itzel taq espíritu che iyoknaq che un mem, ena chanim xik'chojik, xikunik xch'awik. Kunjel jumpa mnaq che xkilo, jwert xikmiyma', xikb'ij:
—Ot jun b'welt qalom chpam tinmit Israel che jala k'antjik peche wari', —xicha chikuch.
34Ni nk'aj fariseo xikb'ij:
—Nachi ri' o pu'ab' jun nimlaj itzel espíritu. Ruk' uchu'ab' nitzele' kitjin che resxik nk'aj itzel taq espíritu. —Jala xikb'ij.
Ri Jesús xel uk'u'x chke mnaq
35Runjel jumpa tinmit olik x'ax Jesús chpam, soq x'ax chpam runjel jumpa kanton. Tik'ri xok ptaq rchoch Dios, kitjin che ub'ixik utzlaj taq rson chrij utzlaj atb'altzij rech Dios chpam kk'asnmal mnaq. Xuknaj runjel jumpa yab'il o chke mnaq rich'il jumpa k'ax o chke. 36Echi' xuril Jesús che jwert ik'i nk'aj mnaq iy'o chla', xel uk'u'x chke mal xaq kcha'marsam kib' y sachnaq kk'u'x. Jala kinom peche taq chij che ot ajyu' chkij. 37Ri Jesús xub'ij chke nk'aj udiscípulo:
—Mas ik'i nk'aj mnaq che kkaj kikta ntzij, jala peche nk'aj ab'ix che mas kiwchinik. Nim ri jach', per ni mnaq che kik'an uchak tiko'n, xa ikeb' uxib'. 38Xa rmal, chita che un Rjaw tiko'n rech kyutaq loq ajchkib' che kmolik mnaq rech kiyok ruk' Dios, jala peche kik'an nk'aj ajchkib' echi' kikmol uwuch tiko'n,#Lc 10:2. —xche chke.
Currently Selected:
San Mateo 9: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
