San Mateo 11
11
U Wan ajb'nal qasna' xutaq b'i nk'aj utaqo'n ruk' Jesús
(Lc 7:18-35)
1Echi' xuk'is ub'ixik tzij Jesús chke kab'aljuj (12) udiscípulo rech xyupixb'ej, xel b'i chla'. X'e ptaq nk'aj chik tinmit rech kub'ij utzij Dios chke mnaq chla', kyutjoj che sutaq kilwi. 2Nu Wan ajb'nal qasna' o pkarsa, per echi' xuta rson sutaq kitjin Cristo#11:2 Cristo kel kub'ij jun chaytajnaq rmal Dios. Un tzij Mesías xaq jnam kilwi. che u'anik, xyutaq loq nk'aj udiscípulo ruk' rech kikta che, ¿chin re? kikta che. 3Ena xikta che Jesús, xikb'ij:
—¿Le jare la ri ajTo'lqe che pitnaq ruk' Dios? We jare t la, nmister kqi'ej jun chik. ¿Su kb'ij la? —xiche che.
4Ri Jesús xuk'ul uwuch ktzij, xub'ij chke:
—Jix jib'ij che u Wan sutaq kixtjin che rilik che kin'ano, soq rich'il sutaq kixtjin che utayik chwij. 5Chib'ij che, che wmal in, kika'y chik nk'aj mnaq chin xa ipotz' nab'e, soq kib'in chik chin xa kib'in taj nab'e. Chin nk'aj che o kan jun yab'il chkij che awas ub'i', jarela xiyik'chojsaxik, xu'on saq kib'qil. Ni nk'aj che xa itak nab'e, jarela kikta chik ti kich'ab'xik. Iy'o nk'aj kamnaq che ik'astajnaq chi kwuch. Soq kb'ix utzlaj taq rson chrij utzij Dios chke nk'aj pobre.#Is 61:1. Jarela kintjin che u'anik. 6Utz re chin jun ku'on t keb' uk'u'x wuk'. —Jala xub'ij Jesús chke nk'aj udiscípulo u Wan.
7Echi' xib'e nk'aj udiscípulo u Wan, ri Jesús xumaj ub'ixik chke mnaq sutaq kitjin u Wan che u'anik, xub'ij: «¿Su xix'e che rilik chpam un lyar che xa chqi'j ulew? ¿Su iwi'em chik? ¿Le jare jun mnaq che peche jun aj kislib'sax rmal tew? ¿Le kiwi'ej jun achi che kukoj pachinchke tzij kub'ij jun chik mnaq? Jare taj. 8We jare t re iwi'em, ¿su k'ut xix'e che rilik? ¿Xatb'a xix'e che rilik jun achi che ukjom atz'yaq mas utz ka'yik? Jare taj. Chintaq kikkoj atz'yaq che mas utz ka'yik, jare ke kiriqtaj chpam kchoch nmaq keqle'n. 9¿Su xiwla k'ut? ¿Le jare jun ajb'il utzij Dios xiwla'? Jare', jare jun ajb'il utzij Dios xiwla'. Per ni re, mas nim u'ij chikuch nk'aj chik ajb'il utzij Dios. 10Jare chrij u Wan xtz'ib'ax kan nk'aj tzij chpam Tyox Wuj. Chla' tz'ib'tal wi che Dios kuch'ab'ej jun ajTo'liwe ti kuya rson chrij u Wan, jawa kub'iji':
“¡Chtampe'! Kintaq nub'i jun ntaqo'n, knab'aj chawuch
rech kuyijb'a ab'e, rech jala' katikk'am nk'aj mnaq”, kcha'. (Mal 3:1)
Jala tz'ib'tal kan chpam Tyox Wuj.
11»Ruk' saqlaj tzij kimb'ij chiwe che chikxo'l kunjel jumpa mnaq iyalaxnaq chi' chuchlew, ot jun ajb'il utzij Dios che mas nim u'ij chjuch u Wan ajb'nal qasna', per chin jun kok chpam utzlaj atb'altzij rech Dios, miskini' xa ch'in reqle'n, jare re mas nim u'ij chjuch u Wan ajb'nal qasna'». Jala xub'ij Jesús chke nk'aj mnaq. 12Tik'ri xub'ij chik: «Ruk' nimlaj chu'ab' tik'ri kikun jun kok chpam utzlaj atb'altzij rech Dios. Jala unom echi' xpi u Wan ajb'nal qasna', soq jala na unom chanim, xaq xawi chintaq kikkoj kchu'ab' kiyikunik kiyokik. 13Kunjel jumpa nk'aj ajb'il utzij Dios xikb'ij kanoq che kpi na ri utzlaj atb'altzij rech Dios, soq jala utz'ib'am kan u Moisés, ast retal echi' xpi u Wan ajb'nal qasna'. 14We kiwaj kikojo su kimb'ij chiwe, u Wan ajb'nal qasna' ri', jarewa uk'xel u Elías ajb'il utzij Dios, che nmister kpi na. 15Chin kkaj kikta ntzij, chiktatb'ej ruk' kixkin, utz utatb'xik kik'an che», xche chke.
Tik'ri xutaqej ub'ixik, xub'ij chik:
16«Nk'aj mnaq iy'o chu'ij saq, ¿su ruk' kiyinjnamsaj wi? Ri mnaq che iy'o chuchlew chanim, iyjala peche nk'aj ak'lab' iku'l pk'iyb'al, che peche itz'nem tzij kik'ano, kiyisk'in chke nk'aj kich'il, kikb'ij:
17“Xqas'uj un su'
per ix xixixjow taj;
xqab'xaj b'ix che xa b'isb'al kub'ij,
per xixo' taj”, kicha'.
18»Jala kik'an mnaq ile'. Ot su kkaj. Xk'un ut u Wan ajb'nal qasna', ot wa xutijo, xutij t u'al uva. Tik'ri kikb'ij mnaq: “Xa o itzel che”, kicha'. 19Tik'ri ximpi chik in, nAchi nuK'jol Dios, kinwa'ik, kintij runjel saqli' rich'il mi'na'. Ni mnaq kikb'ij tzij chwij, kikb'ij: “¡Chiwlampe'! Nachi le' mas kwa'ik, mas kutij u'al uva. Soq jare rich'il mnaq che xa iyaj'esal alkawal rich'il nk'aj chik iyajmak”, kicha'. Jala kikb'ij mnaq chwij. Wet xikch'ob'o su ku'on u Wan rich'il su kin'an in, kikkit'amaji' che Dios o mas un'oj. K'aljan un'oj Dios rmal sutaq kik'an kunjel jumpa ralk'al Re che kikkoj utzij». Jala xub'ij Jesús.
Nk'aj mnaq che kikkoj t utzij Dios kikriq na jun nimlaj k'ax
(Lc 10:13-15)
20Ri Jesús xumaj kyajik mnaq ptaq tinmit jachi taq xu'on nmaq taq k'utb'al, mal xikk'ex t kchomnik chpam kanma'. Xub'ij chke: 21«¡T'ob' iwuch ixjumpa ix'o chpam tinmit Corazín! ¡T'ob' iwuch ixjumpa ix'o chpam tinmit Betsaida! Wet x'an nmaq taq k'utb'al chpam un tinmit Tiro rich'il chpam un tinmit Sidón, jala peche antajnaq iwuk' ix, ujer tri xikk'ex kchomnik mnaq chpam kanma', ujer tri xikkoj kitz'yaq che o retal, k'utb'alre che kiyib'son rmal kmak. 22Per in kimb'ij chiwe che echi' ko'pan ij che k'an atb'altzij pkijlom kunjel jumpa mnaq, mas nim k'ejsb'al iwuch kiriq na chjuch kikriq mnaq xiyikje chpam un tinmit Tiro rich'il chpam un tinmit Sidón ujer. 23Ni ix ix'o chpam un tinmit Capernaúm, mas kinmirsaj iwib'; ix kib'ij che ya mer kix'e chkaj. Xani ya mer kixqasax pixb'alb'a a', rmal naj ixk'wi che Dios. Wet x'an nmaq taq k'utb'al chpam un tinmit Sodoma jala peche x'an iwuk' ix, jala tri unom un tinmit le' peche unom ujer, echi' mja ksachtaj uwuch. 24Per ruk' saqlaj tzij kimb'ij chiwe che echi' ko'pan ij che k'an atb'altzij pkijlom kunjel jumpa mnaq, mas nim k'ejsb'al iwuch kiriqo, chjuch kikriq mnaq chpam un tinmit Sodoma». Jala xub'ij Jesús chke.
Nk'aj mnaq che kikkoj utzij Jesús kikriq uxnb'al
(Lc 10:21-22)
25Echi' xk'is utzij Qajaw Jesús kuk' nk'aj mnaq, xumaj utzij ruk' Dios, xub'ij: «Kinmirsaj ij la nQaw, lal Rjaw kaj, lal Rjaw ulew. Kintyoxij che la, mal xa xwaj uwuch la ri chomb'al la chikuch mnaq che o mas kin'oj kikb'ij, che o mas kit'am kikb'ij, rech kikch'ob' taj. Ni mnaq che ot mas kit'am kikb'ij, che peche mow ak'lab', y'om la chke rech mas kikch'ob'o. 26Jala x'an la nQaw, mal jala xuchomaj anma' la». Jala xub'ij Qajaw Jesús che Qajaw Dios.
27Tik'ri xub'ij chik: «Jare nQaw ujchom chwe runjel jumpa sutaq'ik olik. Ot chin jun mnaq rit'am nwuch, xaq xaw qaQaw Dios rit'am nwuch. Soq ot chin jun mnaq rit'am uwuch qaQaw o chla' chkaj, xaq xaw in nuK'jol Dios wit'am uwuch. Soq rich'il chinoq kwaj kink'ut qaQaw chikuch, xaq xaw ke kit'am.
28»Kixjosaj wuk' iwunjel jumpa ixkosnaq rich'il jumpa o iweqa'n. In kinya u'xnem chiwe. 29Chiy'a iwib' kinya nyuku chiwij. Chiwit'amaj iwe wuk', mal in kinchka'p taj, mas ch'uch'uj wanma'. Xa jala' kiriq na jun uxnb'al rech iwanma'. 30Ri yuku che kinya chiwij, k'ax t reqxik, soq al taj un eqa'n». Jala xub'ij Jesús.
Currently Selected:
San Mateo 11: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
