Mariko 9
9
1Yesu niananeena kandi na bandu abo mbu: «Mwa kuli anibabwira ku bauma mu bo bali hano, batendepfa batatsabaxunga kwa Bwami bwa Ongo buli yobuwicha mu maala.»
Abusu bwa Yesu bwashusha kundi
(Mat 17:1-9; Luk 9:28-36)
2Inyuma ya biro ndatu, Yesu nianatsimba Petero ne Yakobo, ne Yohana, nianatwalabo bonabene ku kitwa kire. Neyo abusu bwa Yesu niabunashusha kundi mwa mbere sabo. 3Asangimba siwe niasinabinduka sa mweru kutsibu nebwengabwenga. Na kwa kihuo kuno kutali mundu yangafurato mbu sibe sa mweru sityo. 4Niyo abemitsa bashatu baxunga ku Eliya ne Musa ni abashambala ne Yesu. 5Petero nianabwira Yesu mbu: «Mwiyisa, lirirene tuikale hano. Tuhimbeho mitanda ishatu, muuma wawe, na undi wa Musa, na undi wa Eliya.» 6Petero ahusha kya neena, kubwishi iye na balikyabo ni baubahire kutsibu. 7Niyo akipfu kyapfumbuka kiba nexwikabo, na mulenge nianaumpfibwa ni atenga mwa kipfu ikyo mbu: «Uyu ye Muala wani Mutsiyirwa. Muneremuumpfira!» 8Mu kashalimo, abemitsa niabanasindera kwa minda yoshe, bataxunga ku mundu woshewoshe ali ate Yesu yenawene.
9Babere bali yobakima kwa kitwa, Yesu nianakalihyabo mbu: «Mutapfuliraa mundu woshewoshe abinwa byomwamelolako ihikira arepfuka ra Muala wa Mundu.» 10Niabanatsimba kweteeko iro, wetuwe niabanatangira ibutsabutsanya mbu: «Arepfuka iro alibula lite?»
Abemitsa babutsa Yesu kuluenda Eliya
(Mat 17:10-13)
11Niabanabutsa Yesu mbu: «Kubwishi bwaki abeisa ba Muomba banerebula mbu Eliya alirene iwicha kasa?» 12Yesu nianaxubitsabo mbu: «Mwa kuli Eliya alirene iwicha kasa kwetunganyanya abinwa byoshe. Wetuwe kubwishi bwaki aMaandiko Makomire amerebula mbu Muala wa Mundu endenubibwa nenenwa kutsibu? 13Wetuwe anibabwira ku Eliya aotwere iwicha, na bandu bamukolera kya bwana, nga ko aMaandiko mabwire kuluenda iye.»
Yesu ahentsa akixwatsi mu mwana
(Mat 17:14-21; Luk 9:37-43a)
14Yesu na bemitsa bewe bashatu babere bafuluka ha bandi bemitsa babaa bali, niabanaxunga ku bandu bangi ni batsungwire kubo na beisa ba Muomba ni abakubirisanya nabo. 15Amubuanano wa bandu abere xunga ku Yesu, nianashishala kutsibu. Mo kashangi umoho, niabanalibita kweya imuketsa. 16Yesu nianabutsabo mbu: «Amukubirisanya nabo kuluendaki?» 17Mundu muuma mwa mubuanano nianamuxubitsa mbu: «Mwiyisa, namekuletera amwana wani kubwishi alimo kixwatsi kyokituma ataneena. 18Akixwatsi kinaira kyamuundira, mu kintsi kashangi, ni kyamukunula, na mwana uyo ni atengamo lufumba ni aba neshia ameno, na mubiri ni auma. Nabwiraa abemitsa bawe mbu bahentse akixwatsi ikyo, wetuwe batakocha.»
19Yesu nianabwira abemitsa bewe mbu: «Mwe bandu ba lubuto lwaretinda iimirira Ongo! Nikendeikala kuuma nemwe ihikira mangoki? Nikendebabeetsa ihikira mangoki? Muniletere amwana uyo hano.» 20Niyo bamuleteraye. Na kixwatsi kyabere kyaxunga ku Yesu, niakinahirianya amwana uyo kutsibu, nianawa hashi nealaala ni atengamo lufumba. 21Yesu nianabutsa ishe wa mwana mbu: «Ameba atya ihuluka mangoki?» Ishe wa mwana nianamuxubitsa mbu: «Ihuluka mwa bwana buwe.» 22Na ngendo nyingi akixwatsi iki kinamuuma mu muchanwa na mu mechi, kwexonda mbu kimwite. Wetuwe uli ungakocha ikola kindu, utupfire bwoncho na kandi utuasikye. 23Yesu nianamubwira mbu: «Kubwishi bwaki auneena mbu uli ungakocha? Abyoshe bikakocheka ku yaimirire.» 24Mu kashalimo, ishe wa mwana niananeena kutsibu mbu: «Niimirire! Wetuwe uniasikye kubwishi bwa aretinda iimirira!»
25Mwa mango Yesu axungaa kwa bandu abaiongerera ibuanana chubachuba, nianakemera akixwatsi mbu: «We kixwatsi wotuma amundu uyu ataneena kushe aba na mutwitwi, anikukalihya mbu tenga mwa mundu uyu, utakihirexuba ifuluka!» 26Akixwatsi ikyo niakinalaka mu mulenge mule, niakinahirianya amwana kutsibu, kiba nemutengamo. Amwana nianaba nga amepfa, na bandu bangi babula mbu amepfa. 27Wetuwe Yesu nianamutsimba kwa minwe, nianamubatula, naye nianaimana.
28Yesu abere ameotola iingira mwa nyumba, abemitsa bewe niabanamubutsa ni bali bonabene mbu: «Kubwishi bwaki itwe tutakochaa ihentsa akixwatsi ikyo?» 29Yesu nianaxubitsabo mbu: «Bixwatsi biri ngakuno ibyo bingahentsibwa mu mahemo ho.»
Arepfa na repfuka ra Yesu
(Mat 17:22-23; Luk 9:43-45)
30Yesu na bemitsa bewe niabanatenga iyo, babanetsukira mwa kyango kye Ngalilaya. Yesu abaa ataxonda mbu abandu bamenye ho bali, 31kubwishi abaa aiyisa abemitsa bewe. Nianabwirabo mbu: «Muala wa Mundu akahirwa mwa minwe sa bandu, nabo bakamwita, na mwa lwire lwa kashatu inyuma ya lupfu luwe, akapfuka.» 32Wetuwe abemitsa batamenya kwa meyiso ayo mabwire. Niabanaubaha imubutsa kinwa.
Amukulukulu mwa bwami bwa Ongo
33Yesu na bemitsa bewe niabanahika i Kaperenaumu. Babere bahara mwa nyumba, Yesu nianabutsabo mbu: «Shamwerekubirisanya mwa nchira, kuluendaki?» 34Wetuwe niabanatsira, kubwishi ni shaberekubirisanya mwa nchira kuluenda inde ye mukulukulu mubo.
35Yesu nianaikala, nianabirangira abemitsa bewe ikumi na babiri nebwirabo mbu: «Amundu yaxonda iba muxondotsi alirene iihira mutsindu wa boshe neba mupfuku wa boshe.»
36Niyo atsimba mwana mulere, nianamuhira mwa mbere sabo, nenyuma wa remukokera, nianabwirabo mbu: 37«Yakokera mwana mulere yali nga uyu kubwishi bwa ingye, ni amenikokera ingye. Na yameniangirira, ate ingye ngyaangirira, wetuwe ni ameangirira ula yanilikaa.»
Yate mulenda wetu ni muuma netwe
(Luk 9:49-50)
38Yohana nianabwira Yesu mbu: «Mwiyisa, shatuxunga ku mundu muuma ni ahentsa abixwatsi mwa itsina rawe, netwe shatumuhangira kubwishi iye ni atali wa mwa kikanga kyetu.»
39Wetuwe Yesu nianaxubya mbu: «Muteremuhangira, kubwishi hatali mundu yangakola kashingishiro mwa itsina rani, nenyuma hake ni aniahula kubi.» 40Kolunali lutyo, kubwishi yate mulenda wetu, ni ali kwa munda wetu. 41Na kintsi yakendebaha lungu lwa mechi kubwishi bwa ingye, kureba imwe muli bandu ba Kirisitu, anibabwira mwa kuli, amundu uyo atendefundwa ihabwa aluhembo luwe.
Kohya utangechetoera mu ntsambi
(Mat 18:6-9; Luk 17:1-2)
42Kintsi yakendetuma muuma wa mwa bake bobaniimirire aba atoera mu ntsambi, ni shalingakwirire kwiye aminwe lushyo lunene mweosi nekabulwa mwa nyancha. 43Aminwe yawe iketuma ukola ntsambi, ni wachayo! Ni likwirire kwiwe kweingira mwa buingo bwa kuli ni uli na minwe nguma, ilengya iya na saminwe ibiri i ku tsimu, mo mutatsima muchanwa kiro na hake. 44Umo munaba mipfunyu yoitapfa, na muchanwa watatsima. 45Akishando kyawe ni kingaba kiketuma ukola ntsambi, ni wachakyo. Kubwishi ni likwirire kwiwe kweingira mwa buingo bwa kuli ni uli na kishando kiuma, kwebula mbu uingire na bishando bibiri i kutsimu. 46Umo munaba mipfunyu yoitapfa, na muchanwa watatsima. 47Alisha rawe liri lingatuma ukola ntsambi, ni wakularo. Kubwishi ni likwirire kwiwe kweingira mwa bwami bwa Ongo ni uli na lisha liuma, ilengya iba na mesha mabiri nelekerwa i kutsimu. 48Umo muli mipfunyu yoitapfa, na muchanwa watatsima.
49Abandu boshe bendetsuka mu muchanwa#9:49 Mwa mango aBayahuti babaa banaletera Ongo amitulo, babaa banahakayo munyu. Soma Balawi 2:13. wa minubo nehakwa munyu we komibwa.
50Amunyu kindu kibuya. Wetuwe amunyu akehetsa abuloke bwao, ni mungahirwaki kandi kwebula mbu atwe? Munereba na munyu mwimwe, neba na buholo mwa kati kenyu.
Currently Selected:
Mariko 9: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
