Mariko 8
8
Yesu auutya bandu bihumbi bine
(Mat 15:32-39)
1Mo biro umo bandu bangi niabanabuanana kandi. Nabo babere bamehusha kyo balya, Yesu nianabirangira abemitsa bewe, nianabwirabo mbu: 2«Anipfira abandu aba bo bwoncho, kubwishi tsene biro bishatu bino ni banali kuuma nani, nabo batakiwete ku bilyo. 3Nani nikebwirabo mbu bafuluke yobatengaa butsira ilya ni bakatetera mwa nchira, kubwishi bauma mubo shabatenga hale.»
4Abemitsa bewe niabanamuxubyitsa mbu: «Waliha! Mundu angakocha itengya bilyo hai byeuutya abandu aba mwa bweru muno?» 5Yesu nianabutsabo mbu: «Muwete ku mikati ingahe?» Nabo niabanamuxubitsa mbu: «Tuwete ku mikati irinda.»
6Yesu nianakalihya abandu mbu baikale hashi. Nianatsimba amikati irinda iyo, nianasima Ongo, nianacha muyo, nianahayo abemitsa bewe mbu baabireyo kwa bandu. Na bemitsa niabanaabirayo kwa bandu. 7Babaa bawete na ku twafi. Yesu nianaashanira atwafi uto, nebwira abemitsa mbu baabeto. 8Aboshe niabanalya newuuta. Niabanatololera abiche bya mikati byoshabishiba, niabanauchutsa bitonga birinda. 9Abandu bobalyaa kwa bilyo uko, babaa balume abashembashemba bihumbi bine. Abere amelaabo, 10nianauruka mu bwato kuuma na bemitsa bewe, nianaya mwa kyango kye Ndalimanuta.
aBafarisayo abaxonda kalolero
(Mat 16:1-4)
11aBafarisayo niabanahikira Yesu baba netangira ikubirisanya naye. Niabanamuereka kwemuhema mbu abwerekyebo kalolero kokabereretsa kwa maala mewe amatenga mu mbingu. 12Yesu nianaikya mbumu kutsibu mu buyongwa mwa mwete uwe mbu: «Kubwishi bwaki mo bandu balubuto luno amuxonda mbu muxunge ku kalolero? Anibabwira mwa kuli, mutibwerekyibwe kalolero!»
13Inyuma kwaho, nianasiyabo, nianauruka kandi mu bwato, neshabuka angetsi.
Achachu ya Bafarisayo na ya Herote
(Mat 16:5-12)
14Abemitsa babaa ni bameibirira iheka mikati, banabaa na mukati muumaho mwa bwato. 15Yesu nianateekabo mbu: «Munakohya kutsibu, munerekenga achachu ya Bafarisayo na ya Herote.» 16Abemitsa niabanatangira ibutsabutsanya mbu: «Aneenatyo kubwishi tutawete ku mikati.»
17Yesu nianakengula abinwa byoshabaneena, niyo abutsabo mbu: «Kubwishi bwaki amushambala kuluenda arehusha amikati? Mutanatsamwamenya neri iumpfa? Amyete yenyu ikinali mitsibu? 18Muli na mesha, wetuwe mutamulola? Muli na matwi, wetuwe mutamuumpfa? Mutaubukire, 19mwa mango nachaa mwa mikati itano, niha bandu bihumbi bitano bilyo? Mwa mango umo mwauchutsaa bitonga bingahe byabicheche bya mikati?» Niabanaxubya mbu: «Ikumi na bibiri.» 20Naye nianabutsabo kandi mbu: «Na mwa mango nachaa mwa mikati irinda nihayo bandu bihumbi bine balyayo, mwauchutsaa bitonga bingahe byamisialitsa?» Niabanaxubya mbu: «Birinda.» 21Yesu nianabutsabo mbu: «Nehika tsene, mutanatsamwaumpfa kindu kyoshekyoshe?»
Yesu ahumula amesha ma kihumahumi i Betesaita
(Mat 16:13-20; Luk 9:18-21)
22Yesu na bemitsa bewe niabanahika i Betesaita. Iyo niabanaletera Yesu yo mundu muuma kihumahumi, nehema Yesu mbu amupfuleko nge akocha ilola. 23Yesu nianatsimba kwa kuboko ra kihumahumi ikyo nemutwala ira mbua ya mutsi. Yesu abere ameotola ihaka mate kwa mesha ma mundu uyo nemuhirako asaminwe, nianamubutsa mbu: «Utsene ku kindu?» 24Akihumahumi niakinabatula amesha mewe nebula mbu: «Nitsene ku bandu, nitsene kubo nga miti, wetuwe abaenda.» 25Yesu nianapfula kandi kwa mesha ma kihumahumi ikyo, nakyo niakinalola kushe. Amesha mewe niamanahumukala, aba nelola kwa bindu byoshe kyenene. 26Inyuma kwaho, Yesu nianamubwira mbu afuluke mwamwe, wetuwe ataingiraa mwa mulungu.
Petero abwerekya ku Yesu ye Kirisitu
(Mat 16:13-20; Luk 9:18-21)
27Yesu na bemitsa bewe niabanaya kwa munda wa mitsi yo iri hofi na mulungu we Kaisariya Firipi. Mwa nchira umo, Yesu nianabutsabo mbu: «Abandu aberebula kwingye ngye inde?» 28Nabo niabanamuxubyitsa mbu: «Bauma aberebula kwiwe we Yohana Murubiki, na bandi aberebula kwiwe we mutahwa Eliya, na bandi aberebula ku uli muuma wa mwa batahwa.» 29Niyo Yesu abutsabo mbu: «Nemwe amwerebula kwingye, ngye inde?» Petero nianaxubya mbu: «Iwe we Kirisitu.» 30Yesu nianateekabo ku batendebwira mundu woshewoshe akinwa ikyo.
Amwatsi wa lupfu na warepfuka ra Yesu
(Mat 21:24-28; Luk 9:23-27)
31Yesu nianatangira iyisa abemitsa bewe mbu: «Muala wa Mundu alirene inuba netindwa na bemanitsi ba bandu, na boshebakungu kuuma na beisa ba Muomba. Akaitwa na mwa lwire lwa kashatu inyuma yarepfa liwe, akapfuka.» 32Abwiraabo abinwa ibyo kyenene. Niyo Petero abwira Yesu mbu baisiike. Petero nianatangira imukemera. 33Wetuwe Yesu nianabindukira abemitsa bewe nekemeranga Petero mbu: «Ipfunde hale nani we Shitani, kubwishi amuanikire wawe ate wa Ongo, wetuwe wa mundu.»
Bate kotungakulira Yesu
(Mat 16:24; Luk 9:23-27)
34Inyuma kwaho Yesu nianabirangira amubuanano wa bandu kuuma na bemitsa bewe, nianabwirabo mbu: «Amundu ali axonda inikulikira, ni atilae kwa buingo buwe yenawene, wetuwe ni aheka amusalaba uwe nenikulikira. 35Kubwishi amundu yaxonda iufula abuingo buwe, akahetsabo, wetuwe yakatula abuingo buwe kubwishi bwa ingye na kubwishi bwa Mwatsi Mubuya, endeufulabo. 36Mbeni amundu angaba na mungurukoki akeata kwa buxoki bwoshe bwa kwa kihuo, nehetsa abuingo buwe! 37Hatali kindu kyoshekyoshe kyamundu angatula kwetongotsa abuingo buwe. 38Kubwishi bwekyo, mundu woshewoshe yanipfira xoni na yapfira ameyiso mani mo xoni mwa bandu ba lubuto luno, lolutali na mwinihiro mwa mbere sa Ongo, na loluli na ntsambi, Muala wa Mundu endemupfira xoni mwa lwire endehika mwa ngulu ya Tata kuuma na bamalaika bakomire.»
Currently Selected:
Mariko 8: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
