Matiɔ 5
5
Jezu mʉ̂ əpʉ pâ kaga
Matiɔ 5–7
Djatra ə̂rɔ̂ kə sə əzü
(Luki 6.20-23)
1Alɔ ə̂në Jezu wû ə̂kpû azü səkɔ, tshə ô gâ pâ kaga ə sə̂ gâ tʉ. Atrawaya nə̂ ye nâ gâ ngotə̂ ye. 2Mandânə, tshə vɔ̂tə̂ kə yisə̂ ərə kə əndje ə pâ:
3«Ənə̂ əndje tə ə̂rɔ̂nə,
azü ə̂në əndje wusə̂ nə ə pa alane sə tə alayïəyo lə aərə nə̂ Ndjapä kɔ,
mbrə ə̂në Əgɔngerə tshelafɔ sə tə ənə̂ əndje!
4Ənə̂ əndje tə ə̂rɔ̂nə,
azü ə̂në əndje sə kə kɨ nə kɔ,
mbrə ə̂në Ndjapä ə tru ngɔla əndje je!
5Ənə̂ əndje tə ə̂rɔ̂nə,
azü ə̂në əndje ma awlra ma tə̂ angâ əndje ne kɔ,
mbrə ə̂në ashɔ sə kə sə tə ərə ə̂në Ndjapä sə kə za kə əndje!
6Ənə̂ əndje tə ə̂rɔ̂nə,
azü ə̂në əgo kə ma ərə də äwänə mi əndje ə mi kɔ,
mbrə ə̂në tshelə əndje ə su je!
7Ənə̂ əndje tə ə̂rɔ̂nə,
azü ə̂në əndje sə kə wu əyo angâ əndje kɔ,
mbrə ə̂në Ndjapä ə wu əyo əndje je!
8Ənə̂ əndje tə ə̂rɔ̂nə,
azü ə̂në lɔsu əndje sə mvo kɔ,
mbrə ə̂në əndje ə wu Ndjapä je!
9Ənə̂ əndje tə ə̂rɔ̂nə,
azü ə̂në əndje sə kə ma ndə kə pa blatshe sə lə takpa tə̂ azü kɔ,
mbrə ə̂në əndje e əndje tə aləvu Ndjapä je!
10Ənə̂ əndje tə ə̂rɔ̂nə,
azü ə̂në əndje sə kə gi əyo tə̂ əndje mbrə kə ma ərə də äwänə kɔ,
mbrə ə̂në Əgɔngerə tshelafɔ ə sə tə ənə̂ əndje je!
11«Ənə̂ e tə ə̂rɔ̂nə, alɔ ə̂në azü sə kə gu e, ə sə kə ma awlra tə̂ e, ə sə kə pa aâkâ aâkâ aəmbrʉ aəpʉ əterə nɔ̂ gâ lə kumu e, mbrə əmə. 12E sə̈ də amɔ tshelə e ə sə̈ də âgbɔ̂ ə̂rû tə̂ lɔsu e, mbrə ə̂në âkrâ nə̂ e sə kə sə gerətshe mâ lafɔ-e. Mbrə ə̂në ə sə ndje äwä bale rə də̂ azü mâ awlra tə̂ aawopandəma Ndjapä ə̂në əndje sə̂ ətshinə tə̂ e kɔ.»
Atrawaya sə tə əngbrʉ də ə̂yîalɔ tshepashɔ
(Markə 9.50; Luki 14.34-35)
13«E-e kə sə̂ tə əngbrʉ pâ ashɔ. Bale, kədə atshɔ əngbrʉ nə kə nglɔ̂ lə nə gâ ye, əzü sə kə ma atâ ndə kə pa tshə kirə də atshɔ nə gâ mandânə? Ə̈bə̈ ərə kə ma də nə guta gu ne. Ə lï ndə kə pa əndje vɔ ve-e gashu, azü dɔ tshelə nə də ə̈nü əndje.
14«E-e kə sə̂ tə ə̂yîəwo tshepashɔ. Gala ə̂në ə sə gâ pâ kaga, ə lï lï ndə kə za tə̂ ye wu ne. 15Əzü za əwo za gâ lə lamba ndə kə za gâ tshekudu ləsû ne. Bale, tshə sə kə za di gâ tə̂ ərə gâ lafɔ ndə kə pa azü tshelə anda nə nɔ̂ lishi ndə ə̂yî nə. 16Ə̂yîəwo nə̂ e tshë ndje äwä bale rə lə ala azü, ndə kə pa əndje wu aə̂rɔ̂ aərə ə̂në e sə kə ma kɔ, ka ə mbe Abä e ə̂në tshə sə mâ lafɔ kɔ.»
Jezu yîsə̂ ərə gâ pâ âgbɔ̂ əpʉ
17«E pä ənə̂ e pä ə pa də mə nâ ndə kə gba tshelə âgbɔ̂ əpʉ nə̂ Mayïzə də Fraka nə̂ aawopandəma Ndjapä ne. Mə nâ nâ ndə kə gba tshelə nə ne, bale, mə nâ ndə kə ma ndə kə pa ndəma aəpʉ nə mbrə. 18Mbrə ə̂në, djatra əpʉ, mə pa kə e, angbʉlînə ndə kə pa tshelafɔ də ashɔ ro, ə̈bə̈ djɔklɔ wala ə̈bə̈ aya ə̈nü ngrowô lə âgbɔ̂ əpʉ nə sə sə kə ro nə ne, ʉrrr ndjɔ ndəma aəpʉ nə nɔ̂ ə wutu gâ ye kane.
19«Rəkɔ, əzü ə̂në tshə sə kə wəra tə̂ ye tə̂ ə̈bə̈ aya əpʉ lə âgbɔ̂ əpʉ səye, â yisə̂ nə kə azü ndə kə pa əndje wəra tə̂ əndje tə̂ nə äwä bale ndje, əndje sə kə e ətshə tə əngʉ əzü lə takpa tə̂ azü nɔ̂ lə Əgɔngerə tshelafɔ. Bale, əzü ə̂në tshə ma tə̂ ye Lïndə̂ nə â yisə̂ nə kə angâ nə ndə kə pa əndje ma tə̂ əndje Lïndə̂ nə, əndje sə kə e ətshə tə âgbɔ̂ əzü lə Əgɔngerə tshelafɔ. 20Mbrə ə̂në, mə pa kə e, kədə ə̂rɔ̂ kə mbrə tə̂ e kə ro ənə̂ aawoyisə̂ âgbɔ̂ əpʉ nə̂ Mayïzə də ənə̂ Afariza ro ne, e sə sə kə li gâ lə Əgɔngerə tshelafɔ ne.»
Əpʉ gâ pâ əkɔ
21«E djî əpʉ ə̂në əndje pâ kə alätä gâ ye kɔ ə pa: “Wö əzü wo ne.” Əzü ə̂në tshə wo əzü, tshə lï ndə kə pa əndje na də ətshə gâ ətshi alayïngbanga. 22Bale, ənə̂ əmə, mə pa kə e, əzü ə̂në tshə ma əkɔ tə̂ aye nə, tshə lï də ngbanga. Əzü ə̂në tshə pa kə aye nə ə pa: “Əndɨ!” tshə lï ndə kə pa əndje na də ətshə gâ ətshi aangbɔ ngbanga nə̂ Ajuwufu. Əzü ə̂në tshə pa kə aye nə ə pa: “Əyï yïrə̈!” tshə lï ndə kə pa əndje wli ətshə gâ ala əwo tə̂ ətshe ə̂në əwo rɨ rɨ tə̂ ərə tə̂ nə ne kɔ.
23«Kədə bə yində kə to əkrɔ gâ pâ gblaka kə Ndjapä â lɔsu zə te gâ pâ ə̈bə̈ aye zə ə̂në əpʉ sə lə takpa tə̂ e də ətshə kɔ, 24kätə̂ ərə əkrɔ nə̂ zə nə tʉ kôto gâ ətshi gblaka nə ə nä e də aye zə gamba əpʉ nə lə takpa tə̂ e angbʉlînə gâ ye kane. Mandânə, ka bə na ə to əkrɔ nə kə Ndjapä nə.
25«Alɔ ə̂në bə sə də əpʉ də ə̈bə̈ əzü â tshə sə kə na də əbə gâ ətshi alayïngbanga, prä äwä katshä ndə kə pa e dji tə̂ e də ətshə pə lə äwä, ndə kə pa tshə za əbə za gâ lə kəna əyïngbanga, əyïngbanga nə za əbə gâ lə kəna kapita, kapita nə wli əbə gâ lə anda kânga ne. 26Djatra əpʉ, mə pa kə əbə, bə sə sə kə wutu lə anda kânga nə bale ne ʉrrr bə piyi ngendja ə̂në əndje dɨ̂ kə əbə kɔ nɔ̂ gâ ye kane.»
Əpʉ gâ pâ kə pra əwɔ əzü wala äkɔ̈ əzü
27«E djî əpʉ ə̂në əndje pâ gâ ye kɔ ə pa: “Prä əwɔ əzü wala äkɔ̈ əzü prä ne.” 28Bale, əmə, mə pa kə e ə pa: əzü nɔ̂ ə̂në tshə wu ə̈bə̈ yashe də əgo nə, mâ tə̂ lɔsu ye, tshə shô də ətshə gâ ye. 29Kədə ala zə djoko ndə ndəkɔ kə yində kə frɔ əbə ndə kə pa bə te gâ lə nyaka, tshäkəwla gâ ye ə wlï ngrʉ̂ gashe tə̂ zə. Mbrə ə̂në ə sə tə ə̂rɔ̂nə mbrə əbə ndə kə pa ə̈bə̈ ərə tshekotə̂ zə bale yu ka əndje wli əndu zə nɔ̂ wli gâ ə̂sə̂ əyo ne. 30Kədə kəna zə djoko ndə ndəkɔ kə yində kə frɔ əbə ndə kə pa bə te gâ lə nyaka, dë gâ ye ə wlï ngrʉ̂ gashe tə̂ zə, mbrə ə̂në ə sə tə ə̂rɔ̂nə mbrə əbə ndə kə pa ə̈bə̈ ərə tshekotə̂ zə bale tshu ka əndu zə nɔ̂ na na gâ ə̂sə̂ əyo ne.»
Əpʉ gâ pâ kə grɔ ayashe
(Matiɔ 19.9; Markə 10.11-12; Luki 16.18)
31«Əndje pâ ndje əpʉ ə pa: “Koshe ə̂në tshə grɔ əwo nə, tshə zä fraka kə katə̂ ye nə kə ətshə.” 32Bale, ənə̂ əmə, mə pa kə e ə pa: koshe ə̂në tshə grɔ əwɔ nə, kədə ə sə sə mbrə kə pra akoshe ne, kandää, tshə mbrə ndə kə pa yashe nə pra ə̈bə̈ koshe kpî. Koshe ə̂në tshə za ə̈bə̈ yashe ə̂në äkɔ̈ nə grɔ̂ ətshə gâ ye kɔ, tshə shô də əwɔ əzü gâ ye.»
Əpʉ gâ pâ kə dra ama
33«E kwâtə̂ e ə djî əpʉ ə̂në əndje pâ kə alätä gâ ye kɔ ə pa: “Drä ama zə drä tə ambanə ne. Bale, ərə ə̂në bə drâ ama zə kə Əyïlingû ndə kə ma nə kɔ, mä ngâ.” 34Bale, ənə̂ əmə, mə pa kə e ə pa: e drä ama e drä bale ne. E drä ama e drä də əɨrɨ tshelafɔ ne, mbrə ə̂në tshelafɔ sə tə mbata ngerə nə̂ Ndjapä. 35E drä ama e drä də əɨrɨ ashɔ ne mbrə ə̂në ashɔ sə tə mbata ə̈nü ye. E drä ama e drä də əɨrɨ Jeruzalamə ne mbrə ə̂në ə sə tə gala nə̂ Âgbɔ̂ Əyïngerə. 36Drä ama zə drä də əɨrɨ zə ne, mbrə ə̂në, bə lï lï ndə kə ma ndə kə pa ə̈bə̈ sukumu zə kpiabale do tə̂ ye tə ə̂mbînə wala tə əbu nə ne. 37Kədə e sə kə pa əpʉ, e pä: “Ayî” wala “Ə’ə ne”. Əpʉ nɔ̂ ə̂në e sə kə za gâ pâ nə kɔ, djablo kə za gâ lə ama e kɔ.»
Əpʉ gâ pâ kə ma əmbrʉ ərə mandâ əmbrʉ ərə
(Luki 6.29-30)
38«E djî əpʉ ə̂në əndje pâ gâ ye kɔ ə pa: “Kədə əzü kə krɔ ala ə̈bə̈ ngâ nə, əndje sə kə krɔ ndje ala ye. Kədə tshə ngɔ əji ye, əndje sə kə ngɔ ndje əji ye.” 39Bale, ənə̂ əmə, mə pa kə e ə pa: kədə əzü kə ma əmbrʉ ərə kə əbə, mä əmbrʉ ərə mä kə ətshə ne. Kədə əzü kə da ngâlâ zə djoko ndə ndəkɔ, dö ndje bale nə kə ətshə tshə da. 40Kədə əzü kə yində kə na də əbə gâ ətshi alayïngbanga ndə kə za əkro ləba nə̂ zə, kätə̂ ye ndje tshə za əgerə ləba nə̂ zə. 41Kədə əzü kə za əbə də awlra ndə kə pa bə za kongbɔ nə̂ ye ə na ana də nə ə dɨ tshelə ə̈nü zə sake bale, nä ana də nə ə dɨ̈ tshelə ə̈nü zə sake bishi. 42Kədə əzü kə yu tshuku ərə kə əbə, zä kə ətshə. Əzü â yu tshuku ködä kə əbə, drü ətshə drü ne.»
Əpʉ gâ pâ kə yində alayïəpʉ nə̂ əzə̂
(Luki 6.27-28,32-36)
43«E djî əpʉ ə̂në əndje pâ gâ ye kɔ ə pa: “Yïndə ngâ zə ə wə̈ra tə̂ zə tə̂ əyïkowɔ nə̂ zə.” 44Bale, əmə, mə pa kə e ə pa: e yïndə alayïkowɔ nə̂ e. E yü Ndjapä mbrə azü ə̂në əndje ma ərə kanga kə e kɔ. 45Rəkɔ, e sə kə sə tə aləvu Abä e ə̂në tshə sə mâ lafɔ kɔ. Mbrə ə̂në tshə mâ â alɔ nə̂ ye tɔ pâ alayïnyaka də aə̂rɔ̂ azü. Tshə mâ â yavrɨ ni pâ azü ə̂në əndje sə kə ma ərə də äwänə də azü ə̂në əndje ma aərə ma də äwänə ne kɔ. 46Kədə e yində kʉtə̂ azü ə̂në əndje yində e kɔ, ərə yekɔ də̂ e sə kə sɔtə̂ nə? Ə də̂ kʉtə̂ ərə ə̂në aaworɔ ngendja lapɔ ə ma kɔ də̂ kə sə̂ ne a? 47Kədə e bla kʉtə̂ alaye e, ərə yekɔ də̂ e ma â ro ə̂dû azü? Ə də̂ kʉtə̂ ərə ə̂në azü ə̂në əndje wusə̂ Ndjapä wu ne kɔ ə ma ndje də ə̂tə̂ əndje kɔ də kə sə̂ ne a? 48E sə̈ tə aə̂rɔ̂ azü lə aərə nɔ̂ mata ə̂në Abä e ə̂në tshə sə mâ lafɔ sə tə ə̂rɔ̂ nə nɔ̂ kɔ.»
Currently Selected:
Matiɔ 5: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
