Matiɔ 6
6
Äwä kə ko aərə kə alayïəyo
(Luki 11.2-4)
1«E bäta äwä kə ma aərə də äwänə nə̂ e lə ala azü. E mä mä ndə kə pa azü shekɔ e shekɔ ne. Kədə e ma aərə kʉ mbrə ala azü, e sə sə kə sɔtə̂ ə̈bə̈ ərə ndə Abä e ə̂në tshə sə mâ lafɔ kɔ ne.
2«Alɔ ə̂në bə yində kə kra tə̂ ə̈bə̈ əyïəyo, tä râwâ tä də əpʉ nə, mata ə̂në alayïama bishi ə ma lə aanda aangbɔ, lə äwä, ndə kə pa azü mbe əndje kɔ ne. Djatra əpʉ, mə pa kə e, əndje sɔ̂tə̂ âkrâ nə̂ əndje gâ ye. 3Bale, kədə bə sə kə kra tə̂ ə̈bə̈ əyïəyo, ə sə tə ə̂rɔ̂nə ndə kə pa kəna zə djoko ndə gəle wusə̂ ərə ə̂në ndəkɔ zə ə ma kɔ wu ne. 4Rəkɔ, zä ərə nə lə angbanə kanika Abä zə ə̂në tshə wu ərə lə angbanə kɔ, tshə za ərə mandânə kə əbə.»
Äwä kə yu Ndjapä
5«Alɔ ə̂në e sə kə yu Ndjapä, e mä tə̂ e mä mata alayïama bishi ne, ə̂në əndje yində kə ka gâ lafɔ ndə kə yu Ndjapä lə aanda aangbɔ, lə amashäwä kanika azü wu alane. Djatra əpʉ, mə pa kə e, əndje sɔ̂tə̂ aərə nə̂ əndje gâ ye. 6Bale, əbə, alɔ ə̂në bə yində kə yu Ndjapä, lï gâ lə bəlindəyea nə̂ zə ə tshü manda nə gâ tə̂ nə ə yü Abä zə ə̂në tshə sə je lə kəwû nə kɔ. Bale, Abä zə ə̂në tshə sə kə wu ərə lə kəwû nə kɔ, tshə sə kə kirə də nə kə əbə.
7«Alɔ ə̂në e sə kə yu Ndjapä, e pä əpʉ pä ngbatshe tə ambanə mata azü ə̂në əndje wusə̂ Ndjapä wu ne kɔ, ə̂në əndje wu ənə̂ əndje ə pa tə̂ äwä kə pa əpʉ ʉrrr də Ndjapä sə kə dji alane. 8E sə̈ sə̈ mata əndje ne. Mbrə ə̂në Abä e wûsə̂ ərə ə̂në e sə də əgo nə kɔ gâ ye angbʉlînə ndə kə pa e yu ətshə tə̂ nə.
9«Rəkɔ, äwä ə̂në e lï ndə kə yu Ndjapä də nə kɔ kə səye:
“Abä ä ə̂në bə sə mâ lafɔ!
Ä yində nə ə pa azü nɔ̂ lʉ əɨrɨ zə ə̂në ə sə kpî kɔ,
10əndje yerɔ əbə tə Əyïngerə nə̂ əndje,
əndje ma ərə ə̂në tshelə zə yində nə pâ ashɔ,
mata ə̂në əndje sə kə ma nə mâ lafɔ kɔ.
11Tö rəgo nə̂ ä nə̂ tshe kpəsəye kə ä.
12Gbä tshelə ködä anyaka nə̂ ä lə kumu ä,
mata ə̂në ä-ä ndje,
ä gba tshelə ködä nyaka lə kumu alayïnyaka nə̂ ä kɔ.
13Kätə̂ ä kä ä te gâ lə afrɔ ərə ne,
bale, djɔ̈ ä lə kəna ətshə ə̂në tshə sə tə əmbrʉ nə kɔ#6.13 Ətshə ə̂në tshə sə tə əmbrʉ nə kɔ: Əpʉ səkɔ yində kə pa ndə djablo..
[Mbrə ə̂në ngerə, də awlra gâ ndə kə mbe ətshe sə tə ənə̂ zə də ə̂ngû də ə̂ngû piii! Asərəmə.]#6.13 Əpʉ səke sə sə lə alabə̈ aangbrɔ afraka Ndjapä də ama grakə ne.”
14«Kədə e gba tshelə ködä nyaka lə kumu azü, Abä e ə̂në tshə sə mâ lafɔ kɔ sə kə gba tshelə nyaka lə kumu e ndje. 15Bale, kədə e gba tshelə ködä aəpʉ gba lə kumu azü ne, Abä e sə sə kə gba tshelə aəpʉ lə kumu e ne.»
Äwä kə ru tshelə tə̂ rəgo
16«Alɔ ə̂në e sə kə ru tshelə e tə̂ rəgo ndə kə yu Ndjapä, e mä tə̂ e mä koyo koyo mata ə̂në alayïama bishi ə ma kɔ ne. Əndje ko tshitshi əndje tʉ də əbru ndə kə yisə̂ nə kə azü ə pa alane sə kə ru tshelə alane tə̂ rəgo ndə kə yu Ndjapä. Djatra əpʉ, mə pa kə e, əndje sɔ̂tə̂ âkrâ nə̂ əndje gâ ye. 17Bale, əbə, kədə bə yində kə ru tshelə zə tə̂ rəgo ndə kə yu Ndjapä, yütu ala zə ə mbrə̈ kâdâ gâ ətshi zə, 18ndə kə pa azü wusə̂ nə wu ə pa bə sə kə ru tshelə zə tə̂ rəgo ne. Bale, mä ndə kə pa kʉtə̂ Abä zə ə̂në tshə sə je lə kəwû nə kɔ ka tshə wusə̂ nə. Bale, Abä zə ə̂në tshə sə kə wu ərə lə kəwû nə kɔ, tshə sə kə kirə də nə kə əbə.»
Əpʉ gâ pâ kə bata aərə mâ lafɔ
(Luki 12.33-34)
19«E ngbö aərə nə̂ e ngbö gâ tə̂ nə pâ ashɔ səye ne. Pâ ashɔ səye, akɔ də ngbʉndji sə kə gba tshelə aərə, alayïangba sə kə ngɔ manda ə zɨ angba aərə. 20Bale, e ngbö aərə nə̂ e gâ tə̂ nə mâ lafɔ-e, tə̂ ətshe ə̂në akɔ də ngbʉndji ndɨ ərə ndɨ tə̂ nə ne kɔ, alayïangba ngɔ manda ngɔ wala ə zɨ angba ərə zɨ tə̂ nə ne kɔ. 21Mbrə ə̂në tə̂ ətshe ə̂në aərə nə̂ zə sə tə̂ nə, lɔsu zə ndje sə kə sə mâ je.»
Ala sə tə lamba tshekotə̂ əzü
(Luki 11.34-36)
22«Ala sə tə lamba tshekotə̂ əzü. Kədə ala zə sə tə ə̂rɔ̂nə, tshekotə̂ zə nɔ̂ sə lə ə̂yîtshe. 23Bale, kədə ala zə ndɨ̂ gâ ye, tshekotə̂ zə nɔ̂ sə lə əbutshe. Rəkɔ, kədə ə̂yîtshe ə̂në ə sə lə zə kɔ, ə do tə̂ ye tə əbutshe, əbutshe nə sə kə bu nə shiwu.»
E mä kosəra kʉ kə Ndjapä
(Luki 16.13)
24«Ə̈bə̈ əyïkosəra lï lï ndə kə ma kosəra kə aâgbɔ̂ azü bishi ne. Mbrə ə̂në, tshelə ye sə kə yində ə̈bə̈ nə bale ə wəra tə̂ ye tə̂ bale nə, wala tshə sə kə wu bale nə tə amba əzü lə ala ye, â sə kə tɔ popo ə̈bə̈ nə bale. E lï lï ndə kə pa e vrɔ Ndjapä də ngendja äwä bale ne.»
E zä lɔsu e kʉ gâ pâ Ndjapä
(Luki 12.22-31)
25«Âdârə ə̂në mə pa kə e ə pa: e lï tshelə e lï gâ pâ kə sə e pâ ashɔ səye ndə kə pa e sɔtə̂ rəgo kotâ â zɨ wala e sɔtə̂ aləba kotâ â yi ne. Sorô əzü sə sə tə âgbɔ̂ ərə ə rô pâ rəgo ne a? Tshekotə̂ əzü sə sə tə âgbɔ̂ ərə ə rô pâ ləba ne a? 26E wü ayanu. Əndje lu rəgo lu ne, ə kɔ angwa rəgo kɔ lə kəndɨ ne, ə sə sə də agrɔ ndə kə ngbo rəgo gâ lə nə ne. Bale, Abä e mâ lafɔ sə kə ko rəgo kə əndje. E-e, e rô əndje rô ngbatshe ne a?
27«Əde lə takpa tə̂ e kə lï ndə kə pa tshə za ə̈bə̈ əlo gâ pâ əlo ye pâ ashɔ səye tə̂ äwä kə li tshelə ye? 28E li tshelə e gâ pâ ləba mbrə yekɔ? E wü äwä ə̂në andɔkɔ ayɔ ə wutu də nə lə güsü kɔ: əndje mbrə kosəra mbrə ne, ə su ləba su ne, 29bale, mə pa kə e: əyïngerə Salomɔ ə̂në tshə sə̂ də aərə leme-e tə bandanə kɔ, tshə yî ləba yî ə fʉ ə rô ə̈bə̈ ndɔkɔ ayɔ sə̂ bale ne. 30Kədə Ndjapä kə ko ə̂rɔ̂ ləba gâ tə̂ güsü ə̂në ə sə kpəsəye lə ngbûndû kɔ ə̂në tshekratshe əwo sə kə ju nə kɔ, ə ma atâ â tshə ma kə e ma ə rô ərə ə̂në tshə mâ gâ tə̂ güsü kɔ ne? Ah, alayï aya lɔsu!
31«E lï tshelə e lï ə pa: “A sə kə zɨ yekɔ? A sə kə ndju yekɔ? A sə kə yi yekɔ gâ tə̂ əzə̂ ne?” 32Mbrə ə̂në azü ə̂në əndje wusə̂ Ndjapä wu ne kɔ kə sə kə pra äwä aərə sə̂ nɔ̂ kɔ. Abä e ə̂në tshə sə mâ lafɔ kɔ wusə̂ nə ə pa e sə də əgo aərə səkɔ ndje. 33E prä angbʉlînə äwä Əgɔngerə nə̂ ye ə mbrə̈ ərə də äwänə lə ala ye ka tshə ko aərə səkɔ nɔ̂ gâ pâ nə kə e.
34«Rəkɔ, e lï tshelə e lï gâ pâ tshekratshe ne. Tshekratshe sə də əyo nə̂ ye də ə̂tə̂ ye. Əyo nə̂ əlo bale bale lï də əlo bale bale.»
Currently Selected:
Matiɔ 6: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
