Luki 13

E tshï angbrɔ kə mbrə tə̂ e tʉ

1Tə̂ alɔ nə səkɔ, alabə̈ azü nâ ə pâ ndə əpʉ ərə ə̂në Pilatə mâ kɔ kə Jezu, ə̂në tshə wô azü əgɔ Galile tə̂ alɔ ə̂në əndje sə kə to əkrɔ kə Ndjapä kɔ. 2Jezu kîrə əpʉ kə əndje ə pa: «E pa ənə̂ e ə pa azü əgɔ Galile səkɔ ə̂në əndje tshû marä tə̂ kuzu rə kɔ, əndje sə tə aâgbɔ̂ alayïnyaka ə rô ə̂dû azü əgɔ Galile nə nɔ̂ a? 3Bale ne! Mə pa kə e: bale, kədə e tshi äwä angbrɔ kə mbrə tə̂ e tshi tʉ ne, e sə kə tshu nə nɔ̂ mata əndje. 4Wala azü grʉvəta amanə vəta ə̂në əgerə anda ə̂në ə sə̂ o na ye gâ lafɔ kɔ ə tê gâ pâ əndje ə wô əndje mâ Silɔwe kɔ, e pa ənə̂ e ə pa əndje sə tə aâgbɔ̂ alayïnyaka ə rô ə̂dû azü əgɔ Jeruzalamə nɔ̂? 5Bale ne! Mə pa kə e: kədə e tshi äwä angbrɔ kə mbrə tə̂ e tshi tʉ ne, e sə kə tshu nɔ̂ mata əndje!»

Ayɔ ə̂në ə lê lê ne

6Mandânə, Jezu pâ əpʉ kəwû səye kə əndje ə pa: «Ə̈bə̈ əzü lû ə̈bə̈ ayɔ figə gâ lə kəndɨ nə̂ ye. Ndə ə̈bə̈ alɔ, tshə nâ ndə kə kɔ leyɔ nə, bale, tshə sɔ̂tə̂ nə sɔ̂ ne. 7Bale, tshə pâ kə əyïkosəra kəndɨ nə ə pa: “Ə mbrə̂ ə̂ngû vəta kpəsəye â mə na ndə kə kɔ leyɔ nə, â mə sɔtə̂ nə sɔ ne. Dë gâ tʉ! Mbrə yekɔ də̂ ə sə pə lə kəndɨ nə tə ambanə kɔ?” 8Bale, əyïkosəra kəndɨ nə kîrə əpʉ kə ətshə ə pa: “Âgbɔ̂ əzü, kätə̂ nə də ə̂ngû səye a wü kane. Mə sə kə dji ashɔ dji ndʉ nə ə tu grishi gâ tə̂ nə. 9Tro də ə̂ngû mandânə ə sə kə le nə. Kədə tə nə kə le le ne, bə za ama əndje de gâ tʉ je.”»

Tə̂ əlo saaba, Jezu grɔ rəka tə̂ ə̈bə̈ yashe

10Tə̂ ə̈bə̈ əlo saaba, Jezu sə̂ kə yisə̂ əpʉ lə ə̈bə̈ anda aangbɔ. 11Ə̈bə̈ yashe sə̂ je ə̂në afrɔ yîrə̂ mbrə̂ tə̂ ye â tshə sə̂ də rəka tə̂ ye ə mâ ə̂ngû grʉvəta amanə vəta. Rəka nə lû ətshə gâ tə̂ nə, äwä kə gbətɔ tshelə ye ndji gûta gü ne. 12Jezu wû ətshə ə ê ətshə ə pâ kə ətshə ə pa: «Yashe, rəka nə̂ zə nglɔ̂ gâ ye.»

13Tshə zâ kəna ye gâ pâ yashe nə â trale tshə gbə̂tɔ tshelə ye ndji â vɔ̂tə̂ kə mbe Ndjapä. 14Tshelə makɔndji anda aangbɔ nə kô ətshə mbrə ə̂në Jezu grɔ̂ rəka tə̂ yashe nə tə̂ əlo saaba. Bale, tshə pâ kə ə̂kpû azü nə ə pa: «Aəlo mindû amanə bale sə tə aəlo kə ma kosəra lə nə. E nä lə aəlo nə səkɔ ka əndje grɔ arəka tə̂ e, ə də̂ tə̂ əlo saaba də̂ ne!» 15Âgbɔ̂ Əyïngerə nə kîrə əpʉ kə ətshə ə pa: «Alayïama bishi ə̂në e lə ye! Tə̂ əlo saaba, əzü bale bale lə takpa tə̂ e wora pagra wala kunda nə̂ ye wora lə ângâ ndə kə pa tshə na də ətshə ndə kə pa tshə ndju ə̂ngû ne a? 16Bale, yashe səye ə̂në tshə sə tə ätä Abraamo, ə̂në Sataa î ətshə ə mâ ə̂ngû grʉvəta amanə vəta kɔ, mə lï lï ndə kə pa mə wora ətshə lə əyo ə̂në tshə sə lə nə kɔ tə̂ əlo saaba ne a?» 17Alɔ ə̂në Jezu kîrə əpʉ rəkɔ, gana mbrə̂ alayïəpʉ nə̂ ye nə nɔ̂. Ə̂kpû azü, ənə̂ əndje, tshelə əndje mɔ̂ mbrə aə̂rɔ̂ aərə ə̂në tshə mbrə̂ kɔ.

Əgɔngerə nə̂ Ndjapä sə mata yekɔ?

(Matiɔ 13.31-33; Markə 4.30-32)

18Jezu pâ kwatə̂ye ə pa: «Əgɔngerə nə̂ Ndjapä sə mata yekɔ? Mə yisə̂ nə gâ tə̂ yekɔ? 19Ə sə mata ə̂ndjî ayɔ ə̂në əɨrɨ nə kə də̂ mutardə kɔ#13.19 Mutardə sə tə ayɔ ə̂në ə̂ndjî nə sə teashe. ə̂në ə̈bə̈ əzü zâ ə lû gâ lə kəndɨ nə̂ ye. Ə kô ə mâ tə əgerə ayɔ â ayanu mbrə akomɔ əndje gâ lə ayana nə.»

20Jezu pâ kwatə̂ye ə pa: «Mə yisə̂ Əgɔngerə nə̂ Ndjapä gâ tə̂ yekɔ? 21Ə sə mata əyï mapa ə̂në ə̈bə̈ yashe zâ ə vɔ̂ gâ lə əgerə ndjuwu kə ma də mapa ə zâ tshelə nə ʉrrr â ômɔ nɔ̂.»

Əde kə sə kə li gâ lə Əgɔngerə nə̂ Ndjapä?

(Matiɔ 7.13-14,21-23)

22Alɔ ə̂në Jezu zâ äwä ndə kə na mâ Jeruzalamə kɔ, tshə rô lə agala də atshelagɔ ə yîsə̂ Əpʉ nə̂ Ndjapä kə azü na na ye. 23Ə̈bə̈ əzü yû ətshə ə pa: «Âgbɔ̂ Əyïngerə, kʉtə̂ azü bale bale kə she lə kuzu a?» Jezu kîrə əpʉ kə əndje ə pa: 24«E prä äwä də awlra ndə kə pa e li lə əngʉ tshelə manda, mbrə ə̂në, mə pa kə e, azü ngbatshe sə kə pra äwä ndə kə li nə, bale əndje to tro.

25«Alɔ ə̂në əyïnga anda nə sə kə afɔ ə sə kə tshu manda nə gâ tə̂ nə, e sə kə sə pə mashu. E vɔtə̂ kə da manda ə sə kə pa nə ə pa: “Âgbɔ̂ əzü, krɔ̈ manda kə ä!” Tshə sə kə kirə əpʉ kə e ə pa: “Mə wusə̂ ətshe ə̂në e âfɔ tə̂ nə ə nâ kɔ wu ne!” 26Bale, e vɔtə̂ kə pa nə ə pa: “A da e zɨ̂ rəgo ə ndju ərə äwä bale, bə yîsə̂ əpʉ lə äwä lə gala nə̂ ä.” 27Tshə sə kə kirə əpʉ kə e ə pa: “Mə wusə̂ e wu ne. E gï tə̂ e ngrʉ̂ gashe tə̂ əmə, e-e nɔ̂ də̂ azü kə mbrə nyaka!” 28Kôto də̂ e sə kə kɨ nə də ngɔla e ə sə kə lo tshelə əji e alɔ ə̂në e sə kə wu Abraamo də Izakə də Jakɔbə gâ ndə aawopandəma Ndjapä nɔ̂ mâ lə Əgɔngerə nə̂ Ndjapä â e-e, əndje sə kə ko e wli gashu. 29Azü sə kə afɔ djoko tə̂ tshepalɔ də lɔtebanga gâ ndə tshepagəle də tshepakɔnɔ ə na ə sə gâ tʉ ndə kə zɨ rəgo lə Əgɔngerə nə̂ Ndjapä. 30Bale, alabə̈ azü tshe mandânə sə kə sə tə azü tshitshinə â alabə̈ azü tshitshinə sə kə sə tə azü tshe mandânə.»

Jezu lï ndə kə tshu mâ Jeruzalamə

(Matiɔ 23.37-39)

31Tə̂ alɔ nə səkɔ, alabə̈ Afariza nâ ə pa kə Jezu ə pa: «Äfɔ kotəye ə rö tə̂ ə̈bə̈ ətshe mbrə ə̂në Erɔdə pra äwä ndə kə wo əbə.» 32Tshə pâ kə əndje ə pa: «E nä ə pä kə gbagraba səkɔ ə pa: “Mə sə kə grɔ aafrɔ ayirə̂ də arəka tə̂ azü kpəsəye də tshekratshe, tə̂ vəta əlo nə kosəra nə̂ əmə sə kə nglɔ nə. 33Bale, mə lï ndə kə pa mə daka pə tə̂ ana nə̂ əmə kpəsəye də tshekratshe gâ ndə tshekrapanə, mbrə ə̂në ə̈bə̈ awopandəma Ndjapä lï lï ndə kə tshu lə ə̈bə̈ ətshe kpî tə̂ Jeruzalamə ne.”

34«Azü əgɔ Jeruzalamə! Azü əgɔ Jeruzalamə! E-e ə̂në e wo aawopandəma Ndjapä ə gbo azü ə̂në Ndjapä wlâ əndje kə e kɔ də badja ndə kə wo əndje kɔ. Äwä ngbatshe mə yîndə kə ngbo e gâ tə̂ əmə mata ə̂në əyï ngatə ə ngbo aaya nə gâ tshekudu kombo ye kɔ, bale e yîndə nə yî ne. 35E wü-a, mandânə səye, Ndjapä tshî anda nə̂ e tʉ kə e gâ ye. Bale mə pa kə e: e sə sə kə wu əmə kwatə̂-e ne ʉrrr ndjɔ gâ tə̂ əlo ə̂në e sə kə pa nə ə pa: “Ndjapä tö ngwarə gâ pâ ətshə ə̂në tshə sə kə na də əɨrɨ Əyïlingû kɔ!”»#13.35 Wu Ətsh 118.26.

Currently Selected:

Luki 13: liy

Highlight

Copy