Luki 14
14
Tə̂ əlo saaba, Jezu grɔ rəka tə̂ ə̈bə̈ əzü
1Tə̂ ə̈bə̈ əlo saaba, Jezu nâ mâ lə anda nə̂ ə̈bə̈ âgbɔ̂ əzü nə̂ Afariza bale ndə kə zɨ rəgo. Azü nə lə anda nə sə̂ kə shekɔ ətshə ndə kə wu ərə ə̂në tshə sə kə ma nə kɔ. 2Ə̈bə̈ koshe də rəka əmerə̂ tə̂ ye sə̂ gâ ətshi Jezu. 3Jezu zâ əpʉ ə pâ kə aawoyisə̂ âgbɔ̂ əpʉ nə̂ Əyïlingû də Afariza ə pa: «Âgbɔ̂ əpʉ zâ äwä kə əzü ndə kə pa tshə grɔ rəka tə̂ ə̈bə̈ əzü tə̂ əlo saaba wala ə zâ äwä zâ kə ətshə ne a?» 4Əndje â ama əndje â bale ne. Bale, Jezu gôro əyïrəka nə ə grɔ̂ rəka nə tə̂ ye ə pâ kə ətshə ə pa tshə gu na ye. 5Mandânə, tshə pâ kə əndje ə pa: «Əde lə takpa tə̂ e də̂ əgblə nə̂ ye wala pagra nə̂ ye kə te gâ lə kudû ə̂ngû tə̂ əlo saaba â tshə sə sə kə gbətɔ ətshə diawû gashu ne?» 6Əndje lî lî ndə kə kirə əpʉ gâ pâ əpʉ nə̂ ye nə bale ne.
Jezu pa azü ke ə̂sə̂ kə sə tə̂ nə mâ mandânə
7Jezu wû ə pa azü ə̂në əndje ê əndje ndə kə zɨ rəgo nə kɔ, əndje prâ ətshe ndə kə sə tə̂ nə kʉ mâ ətshi nə. Bale, tshə pâ əpʉ kə əndje ə pa: 8«Kədə əzü kə e əbə ndə sandaga kə ko tə̂ ətshe, nä nä ə sə̈ gâ tʉ gâ pâ əlî gbarə ne. Bə wusə̂ nə wu ne, ə̈bə̈ âgbɔ̂ əzü ə̂në tshə rô əbə gâ ye sə lə takpa tə̂ azü nə ə̂në əndje ê əndje kɔ. 9Kədə awo-e e nɔ̂ bishi kə na â pa: “Äfɔ ə kätə̂ ə̂sə̂ zə kə ətshə.” Rəkɔ, gana sə kə za əbə ndə kə pa bə na ə sə gâ tʉ mâ mandânə. 10Bale, kədə əndje e əbə ndə sandaga, nä ə sə̈ gâ tʉ mâ mandânə. Kədə awo-e əbə kə na â pa kə əbə ə pa: “Gbɔbəngâ, nä ə sə̈ gâ tʉ mâ ətshi nə.” Bale, bə sə kə lʉ lə ala azü nɔ̂ ə̂në e də aəndje sə gâ tʉ ndə kə zɨ rəgo nə kɔ. 11Mbrə ə̂në əzü ə̂në tshə mbrə tə̂ ye tə âgbɔ̂ əzü, əndje sə kə mbrə ətshə tə əngʉ əzü, əzü ə̂në tshə mbrə tə̂ ye tə əngʉ əzü, əndje sə kə mbrə ətshə tə âgbɔ̂ əzü.»
Jezu pa azü e alayïəyo ndə sandaga
12Mandânə, Jezu pâ kə əzü nə ə̂në tshə ê ətshə ndə kə zɨ rəgo nə kɔ ə pa: «Kədə bə mbrə rəgo də ə̈kü alɔ wala də lɔkədɨ kə azü ndə kə zɨ nə, ë ë də̂ agbɔbəngâ zə wala alaye zə wala alayɔ zə wala alayï kə sə də aərə ngbatshe ə̂në əndje sə trö də ə̈bə̈ kɔ ne. Mbrə ə̂në əndje lï ndə kə mbrə rəgo ə e əbə ndje ə kirə də ərə ə̂në bə mâ kə əndje kɔ kə əbə. 13Bale, kədə bə mbrə sandaga, bə e də̂ alayïəyo də azü ə̂në ə̈bə̈ ərə tshekotə̂ əndje ndɨ gâ ye kɔ də awurtʉ gâ ndə alayïbula. 14Tshelə zə sə kə sə də ə̂rû mbrə ə̂në əndje sə sə də ərə ndə kə kirə də nə kə əbə ne. Ndjapä sə kə kirə də nə kə əbə tə̂ alɔ ə̂në aə̂rɔ̂ azü sə kə she nə.»
Əpʉ gâ pâ azü ə̂në əndje e əndje ndə əgerə rəgo
(Matiɔ 22.1-14)
15Ə̈bə̈ əzü bale lə takpa tə̂ azü nə ə̂në əndje sə̂ kə zɨ rəgo nə də a-Jezu nə kɔ djî əpʉ səkɔ ə pâ kə ətshə ə pa: «Ənə̂ ye tə ə̂rɔ̂nə, əzü ə̂në tshə sə kə zɨ rəgo mâ lə Əgɔngerə nə̂ Ndjapä!»
16Jezu kîrə əpʉ kə ətshə ə pa: «Ə̈bə̈ əzü mbrə̂ rəgo gerətshe ə ê ə̂kpû azü ndə nə. 17Tə̂ alɔ kə zɨ rəgo nə, tshə wlâ əyïkosəra nə̂ ye kə azü nə ə̂në əndje ê əndje kɔ ndə kə pa kə əndje ə pa: “E nä gâ əmə, əndje gâmba aərə nə nɔ̂ gâ ye!” 18Bale, azü nə nɔ̂ vɔ̂tə̂ kə pa nə ə pa äwä kə na alane sə sə je ne, alane tegbɔ ə̈nü ye. Angbʉlî əzü nə pâ kə ətshə ə pa: “Mə yɔ̂ ə̈bə̈ kəndɨ, mə sə kə na na ye ndə kə wu nə. Mə tegbɔ ə̈nü zə, pä pä mə mbrə tə mblä ne.” 19Ə̈bə̈ ata nə pâ kə ətshə ə pa: “Mə yɔ̂ apagra kəndɨ morofo, mə sə kə na na ye ndə kə tra əndje. Mə tegbɔ ə̈nü zə, pä pä mə mbrə tə mblä ne.” 20Tshə̈bə̈ ata nə pâ kə ətshə ə pa: “Mə zâ yashe katshä katshä səye, mbrə nə äwä kə na əmə sə sə je ne.” 21Əyïkosəra nə dô tə̂ ye ə gû ə pâ ndəma əpʉ səkɔ kə âgbɔ̂ əzü nə̂ ye nə. Bale, tshelə əyïnga anda nə kô ətshə â tshə pâ kə əyïkosəra nə̂ ye nə ə pa: “Nä katshä lə gala: lə aäwä də aətshe ə̂në azü ngbo tə̂ əndje tə̂ nə kɔ ə gü də alayïəyo də azü ə̂në ə̈bə̈ ərə tshekotə̂ əndje ndɨ̂ gâ ye kɔ də alayïbula gâ ndə awurtʉ mâtəye.” 22Teashe mandânə, əyïkosəra nə gû ə pâ kə əyïnga anda nə ə pa: “Âgbɔ̂ əzü, mə mâ ərə ə̂në bə pâ ndə nə kɔ gâ ye. Ə̂dû ətshe nə daka pə je.” 23Âgbɔ̂ əzü nə pâ kə əyïkosəra nə ə pa: “Nä tə̂ aaya aäwä də äwä kəndɨ ə shëra azü ə pa əndje na gâ əmə kanika tshelə anda nə̂ əmə sə trɔ̂ də azü. 24Mə pa kə e: ə̈bə̈ əzü bale lə takpa tə̂ azü nə ə̂në mə ê əndje kɔ sə sə kə zɨ rəgo nə̂ əmə nə bale ne!”»
Atrawaya nə̂ Jezu lï ndə kə tshi aərə nɔ̂ tʉ
(Matiɔ 10.37-38; 5.13; Markə 9.50)
25Ə̈bə̈ əgerə ə̂kpû azü gâ ndə Jezu sə̂ kə na na ye tə̂ äwä nə. Tshə dô tə̂ ye ə pâ kə əndje ə pa: 26«Kədə əzü kə na gâ ndə əmə â yində abä nə də əyï nə də əwɔ nə də aləvu nə də alaye nə gâ ndə alakobɔ nə, ndje gâ ndə ye də ə̂tə̂ ye â ro əmə, tshə lï lï ndə kə sə tə trawaya nə̂ əmə ne. 27Əzü ə̂në tshə za masheyɔ#14.27 Wu Luk 9.23. nə̂ ye za gâ pâ əgʉ ye ne ə za äwä əmə za ne, tshə lï lï ndə kə sə tə trawaya nə̂ əmə ne.
28«Əde lə takpa tə̂ e də̂ ə yində kə mbrə əgerə anda ə̂në ə gu gâ lafɔ kɔ, â sə sə gâ tʉ angbʉlînə ndə kə wu ə pa ngendja ə̂në əne sə də nə kɔ ə lï ndə kə mbrə də anda nə nɔ̂ a? 29Də̂ ne, tshə mbrə kʉtə̂ ə̈nü anda nə â lï lï ndə kə pa tshə mbrə anda nə nɔ̂ ne, azü nɔ̂ ə̂në əndje sə kə wu ətshə, əndje sə kə mɔ ətshə 30ə pa: “Koshe səye vɔ̂tə̂ kə mbrə anda, â äwä kə pa tshə mbrə anda nə nɔ̂ guta gu ne kɔ!” 31Wala əyïngerə əde də̂ ə sə kə na ndə kə tɔ kowɔ də ə̈bə̈ ngâ nə, â sə sə gâ tʉ angbʉlînə ndə kə wu ə pa də azü sake morofo (10 000) əne lï ndə kə pa əne tɔ kowɔ də ətshə ə̂në tshə sə də azü sake zazü bale (20 000) kɔ a? 32Kədə tshə â wu â pa əne lï lï ne, tshə sə kə wla azü kə ngâ nə səkɔ alɔ ə̂në tshə sə pə ngrʉ̂ ndə kə pa alane dji tə̂ alane, blatshe sə lə takpa tə̂ alane. 33Äwä bale ndje, əzü lə takpa tə̂ e ə̂në tshə tshi aərə nə̂ ye nɔ̂ tshi tʉ ne, tshə lï lï ndə kə sə tə trawaya nə̂ əmə ne.
34«Əngbrʉ sə tə ə̂rɔ̂ ərə. Bale, kədə atshɔ əngbrʉ nə kə nglɔ̂ lə nə gâ ye, əzü sə kə ma atâ ndə kə pa tshə kirə də atshɔ nə gâ mandâ nə? 35Kədə atshɔ əngbrʉ kə kâ lə nə gâ ye, əngbrʉ nə sə sə kə ma ə̈bə̈ ə̂rɔ̂ ərə bale gâ tə̂ ashɔ wala gâ tə̂ kəndɨ ne, ə lï ndə kə pa əndje vɔ ve-e. Əzü ə̂në tshə sə də ətu kə dji də əpʉ, tshə djï!»
Currently Selected:
Luki 14: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
