ܡܓܰܠܝܘܢ ܕܡܪܩܘܣ 9

1ܘܐܡ݄ܪ ܠܰܗ ܠّܶܗ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ، ܕܟܺܝܬ ܢܳܫ̈ܶܐ ܩܺܝܡ̈ܶܐ ܗܰܪܟܶܐ ܕܠ݄ܐ ܟܛ݄ܥܡܺܝ ܗ̄ܽܘ ܡܰܘܬܳܐ ܗܳܠ ܕܚܳܙ݄ܢ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ ܕܰܐܬ̥ܝܳܐ ܒܚܰܝܠܳܐ.“

ܗ̄ܽܘ ܬܶܓܠܺܝܳܐ ܕܺܗ̄ܝ ܐܰ‌ܠܳܗܽܘܬ̥ܳܐ

ܡܬܝ 17‏:1‏‐13؛ ܠܘܩܐ 9‏:28‏‐36

2ܘܒ݄ܬ̥݄ܪ ܐ݄ܫܬܳܐ ܝܰܘܡ̈ܶܐ، ܝܶܫܽܘܥ ܡܰܘܒܶܠ ܠܶܗ ܠܟܶܐܦܳܐ ܘ݄ܠܝܰܥܩܽܘܒ ܘ݄ܠܝܽܘܚܰܢܳܢ، ܘܡܰܣ݄ܠܩܺܝ ܠܶܗ ܠܛܽܘܪܳܐ ܥܶܠܳܝܳܐ ܒܶܠܚܽܘܕ̥ܰܝّܶܗ، ܘ݄ܡܚܰܠ݄ܦ ܩܽܒ̥ܠ ܥܰܝܢ̈ܳܬ̥ܰܝّܶܗ. 3ܘܡܰܒܪܰܩ ܗ̄ܘܰܐ ܗ̄ܽܘ ܠܒܽܘܫܰܝܕ̥ܶܗ ܘܡܰܚܘ݄ܪ ܓ̥ܰܠܰܒܶܐ ܐܟ̥ ܕܽܗ̄ܘ ܬܰܠܓܳܐ، ܕܢܳܫܳܐ ܒܺܗ̄ܝ ܐܰܪܥܳܐ ܠܰܝܒܶܗ ܡܰܚܘ݄ܪ ܗܰܘܟ̥ܰܐ. 4ܘ݄ܚܙ݄ܢ ܐܰ‌ܠّܶܗ ܐܶ‌ܠܺܝܳܐ ܘܡܽܘܫܶܐ ܘܗ݄ܢّܶܝ ܟܡ݄ܫܓ̥ܳܠܺܝ ܥܰܡ ܝܶܫܽܘܥ. 5ܘܐܡ݄ܪ ܠܶܗ ܠܶܗ ܟܶܐܦܳܐ: ”ܡܰܠܦܳܢܳܐ، ܫܰܦܺܝܪܳܐ ܝܳܐ ܐܶ‌ܠܰܢ ܕܗܰܪܟܶܐ ܗܳܘܺܝܢܰܐ ܘܣܰܝܡܺܝܢܰܐ ܬܠ݄ܬ̥ ܡ̈ܛܰܠܶܐ، ܚܕ̥ܳܐ ܐܶ‌ܠܳܟ̥ ܘ݄ܚܕ̥ܳܐ ܠܡܽܘܫܶܐ ܘ݄ܚܕ̥ܳܐ ܠܶܐ‌ܠܺܝܳܐ.“ 6ܘܠܳܐ ܐܕ̥ܰܥ ܗ̄ܘܰܐ ܡ݄ܢ ܟܳܐܡ݄ܪ، ܥܰܠ ܕܟ݄ܬ ܗ̄ܘܰܝܢܶܝ ܒܙܽܘܥܬ̥ܳܐ. 7ܘܗܰܘܺܝ ܥܰܝܡܳܐ ܘܣ݄ܡ ܠܶܗ ܛܶܠܳܠܳܐ ܐܰܥܠܰܝّܶܗ، ܘܩܳܠܳܐ ܗܰܘܺܝ ܡܽܗ̄ܘ ܥܰܝܡܳܐ ܕܟܳܐܡ݄ܪ: ”ܗܰܢܳܐ ܝܳܐ ܗ̄ܽܘ ܐܰܒܪܰܝܕ̥ܺܝ ܗ̄ܽܘ ܚܰܒܺܝܒܳܐ، ܫܡܰܥܽܘ ܠܶܗ.“ 8ܘܒܽܗ̄ܘ ܚܝܳܪܳܐ ܕܚ݄ܪّܶܗ ܗ̄ܰܬّܰܠܡܺܝܕ̥̈ܶܐ، ܠܢܳܫܳܐ ܠܳܐ ܚܙܰܠّܶܗ ܐܶ‌ܠܳܐ ܠܝܶܫܽܘܥ ܒܶܠܚܽܘܕ̥ܶܗ ܐܰܥܡܰܝّܶܗ. 9ܘܗ݄ܢّܶܝ ܢܳܚܬܺܝ ܗ̄ܘܰܘ ܡܽܗ̄ܘ ܛܽܘܪܳܐ، ܡܰܩܘܶܐ ܠܶܗ ܐܰܥܠܰܝّܶܗ ܕܠ݄ܐ ܐܡّܺܪ̱ܝ ܠܢܳܫܳܐ ܗ̄ܽܘ ܡܶܕܶܐ ܕ݄ܚܙܰܠّܶܗ ܐܶܠܳܐ ܗܳܠ ܕܩܳܝ݄ܡ ܐܰܒܪܶܗ ܕܢܳܫܳܐ ܡܒܰܝܢ ܗ̄ܰܡّܺܝ̈ܬ̥ܶܐ. 10ܘ݄ܢܛ݄ܪّܶܗ ܗ̄ܽܘ ܡܰܐܡܪܳܐ ܒܠܶܒܰܝّܶܗ، ܐܶ‌ܠܳܐ ܡܫܰܐܺܠܺܝ ܗ̄ܘܰܘ̱ ܠ݄ܚܕܳܕ̥̈ܶܐ ܕܡ݄ܢܝܳܐ ܗ̄ܽܘ ܡܰܐܡܪܰܢܳܐ: ”ܗܳܠ ܕܩܳܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ.“ 11ܘ݄ܡܫܰܐܺܠܺܝ ܗ̄ܘܰܝ ܠܶܗ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢ ܢܰܩܠܐ ܡ݄ܢܝܳܐ ܕܟ݄ܐܡّܺܪ̱ܝ ܗ̄ܰܣّܳܦܪ̈ܶܐ: ܐܶ‌ܠܺܝܳܐ ܟܳܐܒ݄ܥ (ܠܳܙ݄ܡ) ܕܳܐܬ̥ܶܐ ܒܺܗ̄ܝ ܩܰܕ̱ܡܰܝܬܳܐ؟“ 12ܟܳܐܡܰܪّܶܗ: ”ܐܶ‌ܠܺܝܳܐ ܓܕܳܐܬ̥ܶܐ ܒܺܗ̄ܝ ܩܰܕ̱ܡܰܝܬܳܐ ܕ݄ܡܬܰܪ݄ܨ ܟܽܘܠ ܡܶܕܶܐ. ܘܰܐܝܕܰܪܒܳܐ ܟܬ̥ܺܝܒ̥ܳܐ ܥܰܠ ܐܰܒܪܶܗ ܕܢܳܫܳܐ ܕܛܳܥ݄ܢ ܚܰܫܳܐ ܪܰܒܳܐ ܘܠ݄ܐ ܓܡܺܝܬܰܩܒ݄ܠ. 13ܐܶ‌ܠܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܐܶ‌ܠܺܝܳܐ ܣܬܶܝ ܐܰܬ̥ܺܝ، ܘܣ݄ܡّܶܗ ܐܶܒܶܗ ܟܽܘܠ ܡܶܕܶܐ ܕܰܐܒܺܝܥܺܝ، ܐܟ̥ ܕ݄ܟܬ̥ܺܝܒ̥ ܐܰܥܠܶܗ.“

ܝܶܫܽܘܥ ܟܡܰܢ݄ܚ ܛܰܠܝܳܐ ܕܟܺܝܬ ܐܶܒܶܗ ܕܰܝܘܳܐ

ܡܬܝ 17‏:14‏‐21؛ ܠܘܩܐ 9‏:37‏‐43

14ܘܺܗ̄ܝ ܢܰܩܠܐ ܕܰܐܬ̥ܺܝ ܓܰܒ ܗ̄ܰܬّܰܠܡܺܝܕ̥̈ܶܐ، ܚܙܶܐ ܠܶܗ ܓܰܒܰܝّܶܗ ܢܳܫ̈ܶܐ ܓ̥ܰܠܰܒܶܐ، ܘܣܳܦܪ̈ܶܐ ܟܳܗ̄ܒ݄ܢ ܘܫܳܩܠܺܝ ܐܰܥܡܰܝّܶܗ. 15ܘܒܺܗ̄ܝ ܫܳܥܬ̥ܰܝܕ̥ܰܗ ܟܽܘܠّܶܗ ܗ̄ܰܢ ܢܳܫ̈ܶܐ ܚܙܰܠّܶܗ، ܘ݄ܡܒܰܠܗܕܺܝ ܘܪܰܗܺܝܛܺܝ ܕ݄ܡܫܰܐܺܠܺܝ ܒܽܗ̄ܘ ܫܠܳܡܰܝܕ̥ܶܗ. 16ܘ݄ܡܫܰܐܶܠ ܗ̄ܘܰܐ ܠܰܣّܳܦܪ̈ܶܐ: ”ܡ݄ܢܝܳܐ ܕܟܳܗ̄ܒܺܝܬܽܘ ܘܫܳܩܠܺܝܬܽܘ ܐܰܥܡܰܝّܶܗ؟“ 17ܘܡܰܕܥܰܪ ܠܶܗ ܚܰܕ̱ ܡܰܗ̄ܢ ܢܳܫ̈ܶܐ ܘܐܡ݄ܪ ܠܶܗ: ”ܡܰܠܦܳܢܳܐ، ܡܰܝܬܶܐ ܠܺܝ ܗ̄ܽܘ ܐܰܒܪܰܝܕ̥ܺܝ ܠܓܰܒܳܟ̥ ܥܰܠ ܕܟܺܝܬ ܐܶܒܶܗ ܪܽܘܚܳܐ ܕܠ݄ܐ ܟܡ݄ܫܓ̥ܳܠܳܐ، 18ܘܰܐܝܟܳܐ ܕܨܰܝܕܳܐ ܠܶܗ ܟܚܳܒ̥ܛܳܐ ܠܶܗ، ܘ݄ܟܡܰܘܦ݄ܩ ܪ̈ܽܘܩܶܐ ܡܶܢ̱ ܦܶܡܶܗ ܘ݄ܟܓܳܢ݄ܨ ܥܰܪ̈ܫܳܢܶܗ ܘ݄ܟܝܳܒ݄ܫ (ܟܢܳܫ݄ܦ). ܘܐܡ݄ܪ ܠܺܝ ܠܰܬّܰܠܡܺܝܕ̥̈ܰܝܕ̥ܳܟ̥ ܕܡܰܘܦܩܺܝ ܠܶܗ ܘܠܳܐ ܩܰܕܺܝܪܺܝ.“ 19ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܐܰܗ ܕܳܪܳܐ ܠܳܐ ܡܗܰܝܡܢܳܐ، ܗܳܠ ܠܶܐܡܰܐ ܓܕܳܗ̄ܘܶܐ ܐ̱ܢܳܐ ܐܰܥܡܰܝܟ̥ܽܘ، ܘܗܳܠ ܠܶܐܡܰܐ ܓ݄ܡܣܰܝܒܰܪ ܐ̱ܢܳܐ ܐܰܥܠܰܝܟ̥ܽܘ؟ ܡܰܝܬܰܝܽܘ ܠܶܗ ܠܓܰܒܺܝ.“ 20ܘܡܰܝܬܰܠّܶܗ ܠܓܰܒܶܗ. ܘܺܗ̄ܝ ܢܰܩܠܐ ܕ݄ܚܙܶܐ ܠܰܗ ܠܶܗ ܗ̄ܺܝ ܪܽܘܚܳܐ، ܒܺܗ̄ܝ ܫܳܥܬ̥ܰܝܕ̥ܰܗ ܚܒ̥݄ܛ ܠܰܗ، ܘܢܰܦ݄ܠ ܥܰܠ ܗ̄ܺܝ ܐܰܪܥܳܐ ܘ݄ܡܨܰܪܨܰܥ ܗ̄ܘܰܐ ܘܡܰܘܦ݄ܩ ܗ̄ܘܰܐ ܪ̈ܽܘܩܶܐ ܡܶܢ̱ ܦܶܡܶܗ. 21ܘܝܶܫܽܘܥ ܡܫܰܐܶܠ ܠܶܗ ܗ̄ܽܘ ܒܰܒܳܐ: ”ܡ݄ܩܰܐ ܗܰܘܺܝ ܠܶܗ ܕܟ݄ܬ ܝܳܐ ܗܰܘܟ̥ܰܐ؟“ ܐܡ݄ܪ ܠܶܗ ܠܶܗ: ”ܡܶܢ̱ ܢܰܥܡܽܘܬ̥ܶܗ. 22ܘܓ̥ܰܠܰܒܶܐ ܟܳܪ̈ܶܐ ܡܚܰܠܰܩ ܠܰܗ ܒܺܗ̄ܝ ܢܽܘܪܳܐ ܘܒܰܡّܰܝ̈ܶܐ ܠܰܫܰܢ ܕ݄ܡܣܰܟܪܳܐ ܠܶܗ. ܐܶ‌ܠܳܐ ܗ̄ܽܘ ܡܶܕܶܐ ܕܟܺܝܒܳܟ̥ ܡܥܰܕ݄ܪ ܠܺܝ ܘܡܰܪܚ݄ܡ ܐܰܥܠܺܝ.“ 23ܘܐܡ݄ܪ ܠܶܗ ܠܶܗ ܝܶܫܽܘܥ: ”ܐܶܢ ܟܺܝܒܳܟ̥ ܕ݄ܡܗܰܝܡܢܰܬ، ܟܽܘܠ ܡܶܕܶܐ ܟܳܗ̄ܘܶܐ ܠܡܰܢ ܕ݄ܡܗܰܝܡ݄ܢ.“ 24ܘܒܺܗ̄ܝ ܫܳܥܬ̥ܰܝܕ̥ܰܗ، ܡܰܙܥܰܩ ܠܶܗ ܗ̄ܽܘ ܒܰܒܳܐ ܕܽܗ̄ܘ ܛܰܠܝܳܐ ܘܗܺܝّܶܗ ܟܒܳܟ̥ܶܐ ܘܐܡ݄ܪ ܠܶܗ: ”ܟܳܡܗܰܝܡܰܢ ܐ̱ܢܳܐ ܡܳܪܝ! ܡܥܰܕ݄ܪ ܗ̄ܺܝ ܗܰܝܡܳܢܽܘܬ̥ܰܝܕ̥ܺܝ ܗ̄ܺܝ ܢܳܩܽܘܨܬܳܐ.“ 25ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܝܶܫܽܘܥ ܕܽܗ̄ܘ ܥܰܡܳܐ ܟܪܳܗ݄ܛ ܘܠܳܬ݄ܡ ܓܰܒܶܗ، ܡܥܰܝܰܛ ܠܶܗ ܥܰܠ ܗ̄ܺܝ ܪܽܘܚܳܐ ܛܰܢ݄ܦܬ̥ܳܐ ܘܐܡ݄ܪ ܠܶܗ ܠܰܗ: ”ܪܽܘܚܳܐ ܚܰܪ݄ܫܬܳܐ ܕܠ݄ܐ ܟܡ݄ܫܓ̥ܳܠܳܐ! ܦܽܘܩܕܳܢܳܐ ܟܳܗ̄ܒܶܐ ܐ̱ܢܳܐ ܠܰܟ̥: ܢܦܰܩ ܡܶܢܶܗ ܘܢܰܩܠܐ ܚܪܶܬܳܐ ܠܳܐ ܥ݄ܒܪܰܬ ܠܶܗ!“ 26ܘܡܰܙܥܰܩ ܠܶܗ ܗ̄ܽܘ ܫܺܐܕܰܘܳܐ ܓ̥ܰܠܰܒܶܐ، ܘ݄ܚܒ̥݄ܛ ܠܶܗ ܘܢܰܦ݄ܩ. ܘܗܰܘܺܝ ܐܟ̥ ܕܽܗ̄ܘ ܡܺܝܬ̥ܳܐ ܗܳܠ ܕܓ̥ܰܠܰܒܶܐ ܐܡ݄ܪّܶܗ ܕܡܰܝ݄ܬ̥. 27ܘܝܶܫܽܘܥ ܨ݄ܕ ܠܶܗ ܒܺܐܝܕ̥ܶܗ ܘܡܰܩ݄ܡ ܠܶܗ. 28ܘܺܗ̄ܝ ܢܰܩܠܐ ܕܥܰܒ݄ܪ ܝܶܫܽܘܥ ܠܽܗ̄ܘ ܒܰܝܬܳܐ، ܡܫܰܐܶܠّܰܗ ܠܶܗ ܗ̄ܰܬّܰܠܡܺܝܕ̥̈ܶܐ ܠܪܽܘܚܰܝّܶܗ: ”ܠܡ݄ܢ ܐܰܚܢܰܐ ܠܳܐ ܩܰܕܺܝܪܺܝܢܰܐ ܕܡܰܘܦܩܺܝܢܰܐ ܠܶܗ؟“ 29ܟܳܐܡܰܪّܶܗ: ”ܗ̄ܽܘ ܓܶܢܣܰܢܳܐ ܒܡܶܕܶܐ ܠܰܝܒܶܗ ܢܳܦ݄ܩ ܐܶ‌ܠܳܐ ܒܽܗ̄ܘ ܨܰܘܡܳܐ ܘܒܺܗ̄ܝ ܨܠܽܘܬ̥ܳܐ.“

ܝܶܫܽܘܥ ܟܡܰܘܕܶܐ ܠܢܰܩܠܐ ܕܰܬّܰܪܬܶܝ ܥܰܠ ܗ̄ܽܘ ܚܰܫܰܝܕ̥ܶܗ ܘܽܗ̄ܘ ܡܰܘܬܰܝܕ̥ܶܗ ܘܺܗ̄ܝ ܩܝܰܡܬܰܝܕ̥ܶܗ

ܡܬܝ 17‏:22‏‐23؛ ܠܘܩܐ 9‏:34‏‐45

30ܘܺܗ̄ܝ ܢܰܩܠܐ ܕܢܰܦ݄ܩ ܡܶܢ̱ ܬܰܡܳܐ ܥܰܒܺܝܪܺܝ ܠܽܗ̄ܘ ܓܠܺܝܠܳܐ، ܘܠܳܐ ܐܒܰܥ ܗ̄ܘܰܐ ܕܢܳܫܳܐ ܐܳܕ̥݄ܥ ܐܶܒܶܗ، 31ܥܰܠ ܕܡܰܘܠܰܦ ܗ̄ܘܰܐ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܳܐܡ݄ܪ ܗ̄ܘܰܐ ܠّܶܗ: ”ܐܰܒܪܶܗ ܕܢܳܫܳܐ ܟܡܺܝܬܰܫܠ݄ܡ ܒܺܐܝܕ̥̈ܶܐ ܕܰܗ̄ܢ ܢܳܫ̈ܶܐ، ܘܓ݄ܕܩܳܛܠܺܝ ܠܶܗ، ܘܡ݄ܐ ܕܡ݄ܩܛ݄ܠ ܒܝܰܘܡܳܐ ܕܰܬܠܳܬ̥ܳܐ ܓ݄ܕܩܳܝ݄ܡ.“ 32ܘܗ݄ܢّܶܝ ܠ݄ܐ ܐܕ̥ܥܺܝ ܗ̄ܘܰܘ̱ ܠܽܗ̄ܘ ܡܰܐܡܪܰܢܳܐ، ܘܙܰܝܥܺܝ ܗ̄ܘܰܘ̱ ܕ݄ܡܫܰܐܺܠܺܝ ܠܶܗ.

ܡܰܢܝܳܐ ܗ̄ܽܘ ܪܰܒܳܐ ܕܒܰܝܢܳܬ̥ܰܝّܶܗ؟

ܡܬܝ 18‏:1‏‐5؛ ܠܘܩܐ 9‏:46‏‐48

33ܘܰܐܬ̥݄ܢ ܠ݄ܟܦܰܪܢܰܚܽܘܡ. ܘܺܗ̄ܝ ܢܰܩܠܐ ܕܥܰܒܺܝܪܺܝ ܠܽܗ̄ܘ ܒܰܝܬܳܐ ܡܫܰܐܺܠܺܝ ܠܶܗ: ”ܡ݄ܢ ܚܳܫܒ̥ܺܝܬܽܘ ܗ̄ܘܰܘ̱ ܒܰܝܢܳܬ̥ܰܝܟ̥ܽܘ ܒܽܗ̄ܘ ܕܰܪܒܳܐ؟“ 34ܘܗ݄ܢّܶܝ ܟܰܠ݄ܢ (ܠܳܐ ܡܬܰܢܰܠّܶܗ) ܡܺܐܝܕ̥ܶܗ ܕܳܗ̄ܒ݄ܢ ܗ̄ܘܰܘ̱ ܘܫ݄ܩܠܺܝ ܗ̄ܘܰܘ̱ ܥܰܡ ܚܕ̥ܳܕ̥̈ܶܐ ܒܽܗ̄ܘ ܕܰܪܒܳܐ ܕܡܰܢܝܳܐ ܕܪܰܒ ܚܰܕ̱ ܕܒܰܝܢܳܬ̥ܰܝّܶܗ. 35ܘܝܰܬܽܒ̥ ܝܶܫܽܘܥ ܘ݄ܩܪܶܐ ܠܶܗ ܗ̄ܰܬܪܰܥܣܰܪ ܘܐܡ݄ܪ ܠܰܗ ܠّܶܗ: ”ܡܰܢ ܕܳܐܒ݄ܥ ܕܳܗ̄ܘܶܐ ܩܰܕ̱ܡܳܝܳܐ، ܛܪܳܐ ܗܳܘܶܐ ܗ̄ܽܘ ܚܰܪܳܝܳܐ ܕܟܽܘܠ ܢܳܫܳܐ ܘ݄ܡܫܰܡܫܳܢܳܐ ܕܟܽܘܠ ܢܳܫܳܐ.“ 36ܘܡ݄ܕ ܠܶܗ ܚܰܕ̱ ܛܰܠܝܳܐ، ܘܡܰܩ݄ܡ ܠܶܗ ܒܽܗ̄ܘ ܦܰܠܓܳܐ ܘ݄ܛܥ݄ܢ ܠܶܗ ܥܰܠ ܕܪ̈ܳܥܳܢܶܗ ܘܐܡ݄ܪ ܠܰܗ ܠّܶܗ: 37”ܟܽܘܠ ܡܰܢ ܕܡܰܩܒ݄ܠ ܛܰܠܝܳܐ ܐܟ̥ ܕܰܗ̄ܢܳܐ ܒ݄ܐܫܡܺܝ، ܐܶ‌ܠܺܝ ܟܡܰܩܒ݄ܠ، ܘܡܰܢ ܕܶܐ‌ܠܺܝ ܟܡܰܩܒ݄ܠ، ܠܳܐ ܐܶ‌ܠܺܝ ܟܡܰܩܒ݄ܠ، ܐܶ‌ܠܳܐ ܠܡܰܢ ܕ݄ܡܫܰܕܰܪ ܠܶܗ ܠܺܝ.“

ܡܰܢ ܕܠ݄ܐ ܟܳܗ̄ܘܶܐ ܡܩܰܒ݄ܠ ܕ݄ܬ̥ܟ̥ܽܘ ܐܰܥܡܰܝܟ̥ܽܘ ܝܳܐ

ܠܘܩܐ 9‏:49‏‐50

38ܝܽܘܚܰܢܳܢ ܐܡ݄ܪ ܠܶܗ ܠܶܗ: ”ܡܰܠܦܳܢܳܐ، ܚܙܶܐ ܠܰܢ ܢܳܫܳܐ ܕܟܳܡܰܘܦ݄ܩ ܫܺܐܕ̈ܶܐ ܒ݄ܐܫܡܳܟ̥ ܘܡܰܟܠܶܐ ܠܰܢ، ܥܰܠ ܕܠܰܐ ܐܬ̥ܺܝ ܒ݄ܬ̥ܪܰܢ.“ 39ܘܐܡ݄ܪ ܠܰܗ ܠّܶܗ ܝܶܫܽܘܥ: ”ܠܳܐ ܡܰܟܠܺܝܬܽܘ ܠܶܗ! ܥܰܠ ܕܠܰܝܬ ܢܳܫܳܐ ܕܣܳܝ݄ܡ ܚܰܝ̈ܠܶܐ ܒ݄ܐܫܡܺܝ، ܘܟܺܝܒܶܗ ܒܣܽܘܪܗܳܒܳܐ ܐܳܡ݄ܪ ܐܰܥܠܺܝ ܡܶܕܶܐ ܒܺܝܫܳܐ. 40ܡܰܢ ܕܠܳܐ ܗ̄ܘܶܐ ܡܩܰܒ݄ܠ ܕ݄ܬ̥ܟ̥ܽܘ ܐܰܥܡܰܝܟ̥ܽܘ ܝܳܐ. 41ܘܟܽܘܠ ܚܰܕ̱ ܕܡܰܫܬܰܠܟ̥ܽܘ ܟܳܣܳܐ ܕܡܰܝ̈ܶܐ ܒܶܠܚܽܘܕ̥ܶܗ ܥܰܠ ܕܟ݄ܬܟ̥ܽܘ ܒ݄ܐܫܡܶܗ ܕ݄ܡܫܺܝܚܳܐ، ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ، ܗ̄ܽܘ ܐܰܓ̥ܪܰܝܕ̥ܶܗ ܠ݄ܐ ܓܡܺܝܣܰܟ݄ܪ.“

ܛܳܘܪ̈ܒܳܠܶܐ ܘܰܒّܺܝܫ̈ܳܬ̥ܰܬّ̥ܶܗ

ܡܬܝ 18‏:6‏‐9؛ ܠܘܩܐ 17‏:1‏‐2

42”ܘܟܽܘܠ ܡܰܢ ܕܡܰܟܫ݄ܠ ܠܚܰܕ̱ ܡܰܢ̱ ܙܥܽܘܪ̈ܰܢܺܝ ܕܟ݄ܡܗܰܝܡܢܺܝ ܐܶܒܺܝ، ܛܰܒ̥ ܗ̄ܘܰܐ ܐܶ‌ܠܶܗ ܕܡܺܝܬܰܐܣܰܪܳܐ ܗ̄ܘܰܐ ܗ̄ܺܝ ܟܶܐܦܳܐ ܕܺܗ̄ܝ ܪܰܚܝܳܐ ܕ݄ܚܡܳܪܳܐ ܒ݄ܩܕ̥ܳܠܶܗ ܘܡܺܝܚܰܠ݄ܩ ܒܽܗ̄ܘ ܝܰܡܳܐ. 43ܐܶܢ ܐܺܝܕ̥ܳܟ̥ ܟ݄ܡܛܰܪܒܠܳܐ ܠܳܟ̥، ܩܛܰܥܰܗ؛ ܛܰܒ̥ ܝܳܐ ܐܶ‌ܠܳܟ̥ ܕܥܳܒܪܰܬ ܠܰܚّܰܝ̈ܶܐ ܒ݄ܚܕ̥ܳܐ ܐܺܝܕ̥ܳܐ ܡܶܢ̱ ܕܳܗ̄ܘܶܐ ܠܳܟ̥ ܬܰܪܬܶܝ ܐܺܝܕ̥̈ܳܬ̥ܳܐ ܘ݄ܐܙّܳܟ̥ ܠܺܗ̄ܝ ܓܺܗܰܢܳܐ. 44ܐܰܝܟܳܐ ܕܺܗ̄ܝ ܬܠܰܘܥܰܬّ̥ܶܗ ܠ݄ܐ ܟܡܰܝܬ̥ܳܐ ܘܺܗ̄ܝ ܢܽܘܪܰܬّ̥ܶܗ ܠ݄ܐ ܟܛ݄ܦܝܳܐ. 45ܘܶܐܢ ܪܰܓ̥ܠܳܟ̥ ܡܛܰܪܒܠܳܐ ܠܳܟ̥، ܩܛܰܥܰܗ؛ ܛܰܒ̥ ܝܳܐ ܐܶ‌ܠܳܟ̥ ܕܥܳܒܪܰܬ ܠܰܚّܰܝ̈ܶܐ ܒ݄ܚܕ̥ܳܐ ܪܰܓ̥ܠܳܐ، ܡܶܢ̱ ܕܳܗ̄ܘܶܐ ܠܳܟ̥ ܬܰܪܬܶܝ ܪ̈ܰܓ̥ܠܶܐ ܘܢ݄ܦܠܰܬ ܒܺܗ̄ܝ ܓܺܗܰܢܳܐ، 46ܐܰܝܟܳܐ ܕܺܗ̄ܝ ܬܠܰܘܥܰܬّ̥ܶܗ ܠ݄ܐ ܟܡܰܝܬܳܐ ܘܺܗ̄ܝ ܢܽܘܪܰܬّ̥ܶܗ ܠ݄ܐ ܟܛ݄ܦܝܳܐ. 47ܘܶܐܢ ܥܰܝܢܳܟ̥ ܡܛܰܪܒܠܳܐ ܠܳܟ̥، ܡܰܘܦܶܩܰܗ؛ ܛܰܒ̥ ܝܳܐ ܐܶ‌ܠܳܟ̥ ܕܒ݄ܚܕ̥ܳܐ ܥܰܝܢܳܐ ܥ݄ܒܪܰܬ ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ، ܡܶܢ̱ ܕܳܗ̄ܘܶܐ ܠܳܟ̥ ܬܰܪܬܶܝ ܥܰܝܢ̈ܶܐ ܓܢܳܦܠܰܬ ܒܺܗ̄ܝ ܓܺܗܰܢܳܐ ܕܺܗ̄ܝ ܢܽܘܪܳܐ، 48ܐܰܝܟܳܐ ܕܺܗ̄ܝ ܬܠܰܘܥܰܬّ̥ܶܗ ܠ݄ܐ ܟܡܰܝܬ̥ܳܐ ܘܺܗ̄ܝ ܢܽܘܪܰܬّ̥ܶܗ ܠ݄ܐ ܟܛ݄ܦܝܳܐ. 49ܥܰܠ ܕܟܽܘܠ ܚܰܕ̱ ܒܺܗ̄ܝ ܢܽܘܪܳܐ ܓܡܺܝܡܰܠ݄ܚ، ܘܟܽܘܠ ܕܶܒܚܬ̥ܳܐ ܒܺܗ̄ܝ ܡܰܠܚܳܐ ܓܡܺܝܡܰܠܚܳܐ. 50ܗ̄ܺܝ ܡܰܠܚܳܐ ܫܰܦ݄ܪܬܳܐ ܝܳܐ، ܐܶܢ ܕܺܗ̄ܝ ܡܰܠܚܳܐ ܗܳܘܝܳܐ ܫܰܗܽܘܬܳܐ، ܒܡ݄ܢ ܓܡܺܝܡܰܠܚܳܐ؟ ܛܪܳܐ ܗܳܘܶܐ ܐܰܒܟ̥ܽܘ ܡܰܠܚܳܐ. ܘ݄ܒܫܰܝܢܳܐ ܗܘܰܝܽܘ ܚܰܕ̱ ܥܰܡ ܚܰܕ̱.“

Currently Selected:

ܡܓܰܠܝܘܢ ܕܡܪܩܘܣ 9: ܟܬܒܐ

Highlight

Copy