ܡܓܰܠܝܘܢ ܕܡܪܩܘܣ 8

ܝܶܫܽܘܥ ܟܡܰܣܒ̥݄ܥ ܐܰܪܒܥܳܐ ܐܰ‌ܠܦܳܐ

ܡܬܝ 15‏:32‏‐39

1ܘܒܰܝّܰܘܡ̈ܳܬ̥ܰܢ݄ܟ، ܐܶܡܰܐ ܕܠܰܬ݄ܡ ܗ̄ܘܰܘ̱ ܢܳܫ̈ܶܐ ܓ̥ܰܠܰܒܶܐ ܘܠܰܝ̱ܬ ܗ̄ܘܰܐ ܡܶܕܶܐ ܕܳܐܟ̥ܠܺܝ، ܩܪܶܐ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ ܘܐܡ݄ܪ ܠܰܗ ܠّܶܗ: 2”ܟܡܰܪܚܰܡ ܐ̱ܢܳܐ ܥܰܠ ܗ̄ܰܢ ܢܳܫ̈ܰܢܺܝ، ܗܰܢܺܝ ܬܠܳܬ̥ܳܐ ܝܰܘܡ̈ܶܐ ܟܰܐܠ݄ܢ ܣܺܝܕ̥ܺܝ، ܘܠܰܝ̱ܬّܶܗ ܡܶܕܶܐ ܕܳܐܟ̥ܠܺܝ. 3ܘܶܐܢ ܕܡܰܪܦܺܝܢܰܢّܶܗ ܨܰܝܳܡ̈ܶܐ ܠܰܒّܳܬ̈ܰܬّ̥ܶܗ، ܓܥܰܝܦܺܝ ܒܽܗ̄ܘ ܕܰܪܒܳܐ، ܡܺܐܝܕ̥ܶܗ ܕܗ݄ܢ ܡ݄ܢّܶܗ ܡܶܢ̱ ܪܽܘܚܩܳܐ ܐܰܬ̥݄ܢ.“ 4ܘܬّܰܠܡܺܝܕ̥̈ܰܝܕ̥ܶܗ ܟ݄ܐܡّܺܪ̱ܝ ܠܶܗ: ”ܡܰܐܝܟܳܐ ܚܰܕ̱ ܟܺܝܒܶܗ ܡܰܣܒ̥݄ܥ ܠܰܗ̄ܢܺܝ ܟܘ̇ܠّܶܗ ܠܰܚܡܳܐ ܗܰܪܟܶܐ ܒܽܗ̄ܘ ܡܰܕ̥ܒܪܳܐ؟“ 5ܘ݄ܡܫܰܐܠܺܝ ܠܶܗ: ”ܟܡܳܐ ܛܰܠܡ̈ܶܐ (ܕܠܰܚܡܳܐ) ܟ݄ܬܟ̥ܽܘ؟“ ܘܟ݄ܐܡّܺܪ̱ܝ ܠܶܗ: ”ܫܒ̥ܰܥ.“ 6ܘܗܽܒ̥ ܠܶܗ ܦܽܘܩܕܳܢܳܐ ܠܰܗ̄ܢ ܢܳܫ̈ܶܐ ܕܝܳܬܒ̥ܺܝ ܥܰܠ ܗ̄ܺܝ ܐܰܪܥܳܐ، ܘܡ݄ܕ ܠܶܗ ܗ̄ܰܫܒ̥ܰܥ ܛܰܠܡ̈ܰܢ݄ܟ (ܕܽܗ̄ܘ ܠܰܚܡܳܐ) ܘ݄ܡܒܰܪܰܟ̥ ܠܶܗ ܘ݄ܩܨܶܐ ܠܶܗ ܘܗܽܒ̥ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ ܕܡܰܚܬ݄ܢّܶܗ، ܘܡܰܚܬ݄ܢّܶܗ ܩ݄ܕ̱ܡ ܗ̄ܰܢ ܢܳܫ̈ܶܐ. 7ܘܟ݄ܬ ܗ̄ܘܰܐ ܐ݄ܫܡܳܐ ܕܢܽܘܢ̈ܶܐ، ܐܰܥܠܰܝّܶܗ ܣܬܶܝ ܡܒܰܪܰܟ̥ ܠܶܗ ܘܐܡ݄ܪ ܠܶܗ ܕܡܰܚܬ݄ܢّܶܗ. 8ܘܰܐܟ̥݄ܠّܶܗ ܘܣܰܒ̥ܺܝܥܺܝ، ܘ݄ܫܩ݄ܠّܶܗ ܗ̄ܰܩّܰܨܝ̈ܶܐ ܬܒ̥ܺܝܪ̈ܶܐ ܫܒ̥ܰܥ ܣ̈ܰܠܶܐ.

9ܘܰܗ̄ܢ ܢܳܫ̈ܶܐ ܕܰܐܟ̥݄ܠّܶܗ ܢܳܦܩܺܝ ܗ̄ܘܰܘ̱ ܐܟ̥ ܕܐܰܪܒܥܳܐ ܐܰ‌ܠܦܳܐ. 10ܘܡܰܪܦܰܠّܶܗ، ܘܡܶܚܕ̥ܳܐ ܣܰܠ݄ܩ ܠܺܗ̄ܝ ܣܦܺܝܢ̱ܬܳܐ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܰܐܬ̥ܺܝ ܠܽܗ̄ܘ ܐܰܬ̥ܪܳܐ ܕܕܰܠܡܳܢܽܘܬ̥ܳܐ.

ܗ̄ܰܦܪ̈ܺܝܫܶܐ ܟ݄ܡܫܰܐܺܠܺܝ ܡܶܢܶܗ ܐܳܬ̥ܳܐ

ܡܬܝ 16‏:1‏‐4؛ ܠܘܩܐ 12‏:54‏‐56

11ܘܢܰܦܺܝܩܺܝ ܗ̄ܰܦܪ̈ܺܝܫܶܐ، ܘ݄ܡܫܰܪܰܠّܶܗ ܕܕܳܪܫܺܝ ܐܰܥܡܶܗ ܘ݄ܐܒܥܺܝ ܡܶܢܶܗ ܐܳܬ̥ܳܐ ܡܺܗ̄ܝ ܫܡܰܝܳܐ ܠܰܫܰܢ ܕ݄ܡܢܰܣ݄ܢ ܠܶܗ. 12ܘܡܰܐܢ݄ܢ ܒܺܗ̄ܝ ܪܽܘܚܰܝܕ̥ܶܗ ܘܐܡ݄ܪ ܠܶܗ: ”ܠܡ݄ܢ ܗ̄ܽܘ ܕܳܪܰܢܳܐ ܟܳܐܒ݄ܥ ܐܳܬ̥ܳܐ؟ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܠ݄ܐ ܟܡܺܝܬܰܗܒ̥ܶܐ ܐܳܬ̥ܳܐ ܠܽܗ̄ܘ ܕܳܪܰܢܳܐ.“ 13ܘ݄ܛܪܰܠّܶܗ، ܘܣܰܠ݄ܩ ܠܺܗ̄ܝ ܣܦܺܝܢ̱ܬܳܐ ܘܰܐܙّ݄ܢ ܠܽܗ̄ܘ ܓܰܒܳܐ ܚܪܶܢܳܐ ܕܽܗ̄ܘ ܝܰܡܳܐ.

ܗ̄ܽܘ ܚܡܺܝܪܳܐ ܕܰܦܪ̈ܺܝܫܶܐ ܘ݄ܕܗܺܝܪܳܘܕܳܣ

ܡܬܝ 16‏:5‏‐12

14ܘܛܰܥ݄ܢ ܕܡܰܝܕܺܝ ܠܰܚܡܳܐ، ܘܠܰܝ̱ܬ ܗ̄ܘܰܐ ܐܰܥܡܰܝّܶܗ ܒܺܗ̄ܝ ܣܦܺܝܢ̱ܬܳܐ ܐܶ‌ܠܳܐ ܚܕ̥ܳܐ ܛܠܰܡܬ̥ܳܐ. 15ܘܡܰܩܘܶܐ ܠܶܗ ܐܰܥܠܰܝّܶܗ ܘܐܡ݄ܪ ܠܰܗ ܠّܶܗ: ”ܚܙܰܝܽܘ، ܘܡܰܒܶܗܽܘ ܡܽܗ̄ܘ ܚܡܺܝܪܳܐ ܕܰܦܪ̈ܺܝܫܶܐ ܘܡܽܗ̄ܘ ܚܡܺܝܪܳܐ ܕܗܶܪܳܘܕ̥ܶܣ!“ 16ܘܗ݄ܢّܶܝ ܚܳܫܒ̥ܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱ ܚܰܕ̱ ܠܽܗ̄ܘ ܚܪܶܢܳܐ: ”ܥܰܠ ܕܠܰܝ̱ܬ ܠܰܢ ܠܰܚܡܳܐ.“ 17ܘܝܶܫܽܘܥ ܐܰܕ̥݄ܥ ܘܐܡ݄ܪ ܠܰܗ ܠّܶܗ: ”ܡ݄ܢܝܳܐ ܕ݄ܟܚ݄ܫܒ̥ܺܝܬܽܘ ܕܠܰܝ̱ܬܟ̥ܽܘ ܠܰܚܡܳܐ؟ ܗܳܠ ܐܳܥܕܳܐ ܠ݄ܐ ܟ݄ܐܕ̥ܺܝܥܺܝܬܽܘ ܘܠ݄ܐ ܟܝ݄ܠܦܺܝܬܽܘ؟ ܗܶܫ ܠܶܒܳܐ ܩܰܫܝܳܐ ܟ݄ܬܟ̥ܽܘ؟ 18ܘܥܰܝܢ̈ܶܐ ܟ݄ܬܟ̥ܽܘ ܘܠ݄ܐ ܟܚܳܙܺܝܬܽܘ، ܘܰܐܕ̥̈ܢܶܐ ܟ݄ܬܟ̥ܽܘ ܘܠ݄ܐ ܟܫ݄ܡܥܺܝܬܽܘ؟ ܘܠ݄ܐ ܟܳܐܬ̥ܶܐ ܠܒܳܠܰܝܟ̥ܽܘ؟ 19ܗ̄ܺܝ ܢܰܩܠܐ ܕ݄ܩܨܶܐ ܠܺܝ ܗ̄ܰܚّܰܡّ݄ܫ ܛܰܠܡ̈ܶܐ ܕܽܗ̄ܘ ܠܰܚܡܳܐ ܠܚܰܡܫܰܠܦܳܐ، ܟܡܳܐ ܣ̈ܰܠܶܐ ܡܰܠܝ̈ܶܐ ܕܰܩّܰܨܝ̈ܶܐ ܫܩ݄ܠܟ̥ܽܘ؟“ ܟ݄ܐܡّܺܪ̱ܝ ܠܶܗ: ”ܬܪܰܥܣܰܪ.“ 20ܟܳܐܡܰܪّܶܗ: ”ܘܺܗ̄ܝ ܢܰܩܠܐ (ܕ݄ܩܨܶܐ ܠܺܝ) ܗ̄ܰܫܒ̥ܰܥ ܠܰܗ̄ܢ ܕܐܰܪܒܥܳܐ ܐܰ‌ܠܦܳܐ، ܟܡܳܐ ܣ̈ܰܠܶܐ ܡܰܠܝ̈ܶܐ ܕܰܩّܰܨܝ̈ܶܐ ܫܩ݄ܠܟ̥ܽܘ؟“ ܐܡ݄ܪّܶܗ: ”ܫܒ̥ܰܥ.“ 21ܘܐܡ݄ܪ ܠܰܗ ܠّܶܗ: ”ܐܰܝܕܰܪܒܳܐ ܗܳܠ ܐܳܥܕܳܐ ܠ݄ܐ ܟܝ݄ܠܦܺܝܬܽܘ؟“

ܝܶܫܽܘܥ ܟܦܳܬ݄ܚ ܥܰܝܢܳܐ ܕܽܗ̄ܘ ܣܰܡܝܳܐ ܒܒܶܝܬ̥ ܨܰܝܳܕ̥ܳܐ

22ܘܰܐܬ̥ܺܝ ܠܒܶܝܬ̥ ܨܰܝܳܕ̥ܳܐ، ܘܡܰܝܬܰܠّܰܗ ܠܶܗ ܣܰܡܝܳܐ، ܘ݄ܐܒܥܺܝ ܗ̄ܘܰܘ̱ ܡܶܢܶܗ ܕܡܰܚ݄ܬ ܐܺܝܕ̥ܶܗ ܐܰܥܠܶܗ. 23ܘܨ݄ܕ ܠܶܗ ܒܺܐܝܕ̥ܶܗ ܕܽܗ̄ܘ ܣܰܡܝܳܐ، ܘܡܰܘܦܰܩ ܠܶܗ ܠܰܪܒ̥ܰܠ ܡܺܗ̄ܝ ܩܪܺܝܬ̥ܳܐ، ܘܪ݄ܩ ܠܶܗ ܒܥܰܝܢ̈ܳܬ̥ܶܗ، ܘܡܰܚܰܬ ܠܶܗ ܐܺܝܕ̥ܶܗ، ܘ݄ܡܫܰܐܶܠ ܠܶܗ ܠܶܗ: ”ܡ݄ܢ ܟܚܳܙܰܬ؟“ 24ܚ݄ܪ ܠܶܗ ܘܐܡ݄ܪ ܠܶܗ: ”ܟܚܳܙܶܐ ܐ̱ܢܳܐ ܗ̄ܰܢ ܢܳܫ̈ܶܐ ܐܟ̥ ܕܰܗ̄ܢ ܐܺܝܠܳܢ̈ܶܐ ܕܟ݄ܡܗܰܠܟ̥ܺܝ.“ 25ܘܢܰܩܠܐ ܚܪܶܬܳܐ ܡܰܚܰܬ ܠܶܗ ܐܺܝܕ̥ܶܗ ܥܰܠ ܥܰܝܢ̈ܳܬ̥ܶܗ، ܘܢܰܝ݄ܚ ܠܶܗ، ܘܚܳܙܶܐ ܗ̄ܘܰܐ ܟܽܘܠ ܡܶܕܶܐ ܓ̥ܰܠܰܒܶܐ ܛܳܒ̥ܳܐ. 26ܘ݄ܡܫܰܕܰܪ ܠܶܗ ܠܽܗ̄ܘ ܒܰܝܬܰܝܕ̥ܶܗ ܘܐܡ݄ܪ ܠܶܗ: ”ܠܳܐ ܥܳܒܪܰܬ ܠܺܗ̄ܝ ܩܪܺܝܬ̥ܳܐ. ܘܠ݄ܐ ܐܡّܰܪ̱ܬ ܠܢܳܫܳܐ ܒܺܗ̄ܝ ܩܪܺܝܬ̥ܳܐ.“

ܗ̄ܺܝ ܡܰܘܕܝܳܢܽܘܬ̥ܳܐ ܕܫܶܡܥܽܘܢ ܒܰܐ‌ܠܳܗܽܘܬ̥ܳܐ ܕ݄ܡܫܺܝܚܳܐ

ܡܬܝ 16‏:13‏‐20؛ ܠܘܩܐ 9‏:18‏‐21

27ܘܢܰܦ݄ܩ ܝܶܫܽܘܥ ܘܰܬّܰܠܡܺܝܕ̥̈ܰܝܕ̥ܶܗ ܠܰܩّ݄ܪ̈ܝܰܘܳܬ̥ܳܐ ܕܩܶܣܰܪܺܝܰܐ ܕܦܺܝܠܺܝܦܳܘܣ. ܘ݄ܡܫܰܐܶܠ ܗ̄ܘܰܐ ܠܰܬّܰܠܡܺܝܕ̥̈ܰܝܕ̥ܶܗ ܒܽܗ̄ܘ ܕܰܪܒܳܐ، ܘܳܐܡܰܪ ܗ̄ܘܰܐ ܠّܶܗ: ”ܡܰܢ ܟ݄ܐܡّܺܪ̱ܝ ܐܰܥܠܺܝ ܗ̄ܰܢ ܢܳܫ̈ܶܐ ܕܟ݄ܬ ܐ̱ܢܳܐ؟“ 28ܘܗ݄ܢّܶܝ ܐܡ݄ܪّܶܗ: ”ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ، ܘ݄ܚܪ̈ܶܢܶܐ: ܐܶ‌ܠܺܝܳܐ، ܘ݄ܚܪ̈ܶܢܶܐ: ܚܰܕ̱ ܡܰܗ̄ܢ ܢܒܺܝ̈ܶܐ.“ 29ܘܟܳܐܡܰܪّܶܗ ܝܶܫܽܘܥ: ”ܘܗܰܬܽܘ ܡܰܢ ܟ݄ܐܡّܺܪ̱ܝܬܽܘ ܐܰܥܠܺܝ ܕܟ݄ܬ ܐ̱ܢܳܐ؟“ ܘܡܰܕܥܰܪ ܠܶܗ ܫܶܡܥܽܘܢ ܘܐܡ݄ܪ ܠܶܗ ܠܶܗ: ”ܗܰܬ ܗ̄ܰܬ ܡܫܺܝܚܳܐ، ܗ̄ܽܘ ܐܰܒܪܳܐ ܕܰܐ‌ܠܳܗܳܐ ܗ̄ܽܘ ܚܰܝܳܐ.“ 30ܘ݄ܡܥܰܝܰܛ ܠܶܗ ܐܰܥܠܰܝّܶܗ ܕܠ݄ܐ ܐܡّܺܪ̱ܝ ܐܰܥܠܶܗ ܠܢܳܫܳܐ.

ܡܫܺܝܚܳܐ ܟܡܰܘܕ̥݄ܥ ܥܰܠ ܗ̄ܽܘ ܚܰܫܰܝܕ̥ܶܗ ܘܽܗ̄ܘ ܡܰܘܬܰܝܕ̥ܶܗ ܘܺܗ̄ܝ ܩܝܰܡܬܰܝܕ̥ܶܗ

ܡܬܝ 16‏:21‏‐28؛ ܠܘܩܐ 9‏:22‏‐27

31ܘ݄ܡܫܰܪܶܐ ܠܶܗ ܕܡܰܘܠܰܦّܶܗ: ܕܰܐܒܪܶܗ ܕܢܳܫܳܐ ܓܛܳܥ݄ܢ ܚܰܫܳܐ ܪܰܒܳܐ، ܘܠ݄ܐ ܓܡܺܝܬܰܩܒ݄ܠ ܡܰܢ̱ ܩّܰܫ̈ܶܐ ܘܡܰܢ̱ ܪّܺܝܫ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ، ܘ݄ܓܡ݄ܩܛ݄ܠ، ܘܒ݄ܬ̥݄ܪ ܬܠܳܬ̥ܳܐ ܝܰܘܡ̈ܶܐ ܓ݄ܕܩܳܝ݄ܡ. 32ܘ݄ܒܓܰܠܝܳܐ ܡ݄ܫܓ̥ܰܠ ܗ̄ܘܰܐ ܗ̄ܺܝ ܡܶܠܬ̥ܳܐ. ܘܟܶܐܦܳܐ ܡܰܘܒܶܠ ܠܶܗ ܠܶܗ ܘ݄ܡܫܰܪܶܐ ܠܶܗ ܕܡܰܥܠܶܐ ܩܳܠܳܐ ܐܰܥܠܶܗ. 33ܘܝܶܫܽܘܥ ܕܰܥ݄ܪ ܘܚ݄ܪ ܠܶܗ ܒܰܬّܰܠܡܺܝܕ̥̈ܰܝܕ̥ܶܗ ܘ݄ܡܥܰܝܰܛ ܠܶܗ ܥܰܠ ܫܶܡܥܽܘܢ ܘܐܡ݄ܪ ܠܶܗ: ”ܙܳܟ̥ ܡܶܢ̱ ܦܳܬ̥ܺܝ ܝܰܐ ܣܳܛܳܢܳܐ، ܥܰܠ ܕܠ݄ܐ ܟܡܰܚܬܰܬ ܒܠܶܒܳܟ̥ ܗܰܢܺܝ ܕܰܐ‌ܠܳܗܳܐ، ܐܶ‌ܠܳܐ ܕܰܗ̄ܢ ܢܳܫ̈ܶܐ.“

34ܘ݄ܩܪܶܐ ܠܶܗ ܝܶܫܽܘܥ ܠܰܗ̄ܢ ܢܳܫ̈ܶܐ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܐܡ݄ܪ ܠܰܗ ܠّܶܗ: ”ܡܰܢ ܕܳܐܒ݄ܥ ܕܳܐܬ̥ܶܐ ܒ݄ܬ̥ܪܺܝ، ܛܪܳܐ ܟܳܦ݄ܪ ܒܢܰܦܫܶܗ ܘܫܳܩ݄ܠ ܗ̄ܽܘ ܨܠܺܝܒܰܝܕ̥ܶܗ ܘܳܐܬ̥ܶܐ ܒ݄ܬ̥ܪܺܝ. 35ܥܰܠ ܕܟܽܘܠ ܡܰܢ ܕܳܐܒ݄ܥ ܕܡܰܚܶܐ ܢܰܦܫܶܗ ܓ݄ܡܣܰܟܰܪ ܠܰܗ، ܘܟܽܘܠ ܕ݄ܡܣܰܟ݄ܪ ܢܰܦܫܶܗ ܠܰܫܰܢܺܝ ܘܠܰܫܰܢ ܗ̄ܺܝ ܣܒܰܪܬ̥ܳܐ ܓܡܰܚܶܐ ܠܰܗ. 36ܒܡ݄ܢ ܟܡܺܝܥܰܕ݄ܪ ܗ̄ܽܘ ܒܰܪܢܳܫܳܐ ܕܶܐܢ ܗ̄ܽܘ ܥܳܠܡܳܐ ܟܽܘܠܶܗ ܪܳܒ݄ܚ ܘܢܰܦܫܶܗ ܚܳܣ݄ܪ؟ 37ܐܰܘ ܡ݄ܢ ܓܕܳܗ̄ܒܶܐ ܗ̄ܽܘ ܢܳܫܳܐ ܡܶܢ̱ ܚܠܳܦ ܢܰܦܫܶܗ؟ 38ܡܺܐܝܕ̥ܶܗ ܕܟܽܘܠ ܕܡܺܝܢܰܟ݄ܦ ܐܶܒܺܝ ܘܒܰܡّܰܐܡܪ̈ܰܝܕ̥ܺܝ ܒܽܗ̄ܘ ܕܳܪܰܢܳܐ ܗ̄ܽܘ ܚܰܛܳܝܳܐ ܘܽܗ̄ܘ ܓܰܝܳܪܳܐ، ܐܰܒܪܶܗ ܕܢܳܫܳܐ ܣܬܶܝ ܓܡܺܝܢܰܟ݄ܦ ܐܶܒܶܗ ܐܶܡܰܐ ܕܳܐܬ̥ܶܐ ܒܽܗ̄ܘ ܫܽܘܒܚܳܐ ܕܽܗ̄ܘ ܒܰܒܰܝܕ̥ܶܗ ܥܰܡ ܗ̄ܰܡّܰܠܰܐܟ̥̈ܰܝܕ̥ܶܗ ܗ̄ܰܩّܰܕ̈ܺܝܫܶܐ.“

Currently Selected:

ܡܓܰܠܝܘܢ ܕܡܪܩܘܣ 8: ܟܬܒܐ

Highlight

Copy