ܡܓܰܠܝܘܢ ܕܡܪܩܘܣ 10

ܗ̄ܽܘ ܙܽܘܘܳܓ̥ܳܐ ܘܽܗ̄ܘ ܟܬ̥ܳܒ̥ܳܐ ܕܽܗ̄ܘ ܬܶܪܦܺܝܝܳܐ

ܡܬܝ 19‏:1‏‐21؛ ܠܘܩܐ 16‏:18

1ܘܩܰܝ݄ܡ ܡܶܢ̱ ܬܰܡܳܐ، ܘܰܐܬ̥ܺܝ ܠܽܗ̄ܘ ܬܚܽܘܡܳܐ ܕܺܝܗܽܘܕ̥، ܠܽܗ̄ܘ ܓܰܒܳܐ ܚܪܶܢܳܐ (ܡܽܗ̄ܘ ܢܰܗܪܳܐ) ܕܝܽܘܪܕܢܳܢ. ܘܰܐܙّ݄ܢ ܠܬܰܡܳܐ ܠܓܰܒܶܗ ܓ̥ܰܠܰܒܶܐ ܢܳܫ̈ܶܐ. ܘܡܰܘܠܰܦ ܗ̄ܘܰܐ ܠّܶܗ ܐܟ̥ ܕܽܗ̄ܘ ܥܝܳܕ̥ܰܝܕ̥ܶܗ. 2ܘ݄ܡܩܰܪܰܒّ̥ܶܗ ܦܪ̈ܺܝܫܶܐ ܕ݄ܡܢܰܣ݄ܢ ܠܶܗ، ܘܟܳܡܫܰܐܺܠܺܝ: ”ܐܶܢ ܟܺܝܬ ܫܽܘܠܛܳܢܳܐ ܠܽܗ̄ܘ ܓܰܒ̥ܪܳܐ ܕܡܰܪܦܶܐ ܗ̄ܺܝ ܐܰܢ̱ܬ̥ܬܰܝܕ̥ܶܗ؟“ 3ܐܡ݄ܪ ܠܰܗ ܠّܶܗ: ”ܡ݄ܢ ܦܽܘܩܕܳܢܳܐ ܗܽܒ̥ ܠܶܗ ܠܟ̥ܽܘ ܡܽܘܫܶܐ؟“ 4ܘܗ݄ܢّܶܝ ܟ݄ܐܡّܺܪܺܝ: ”ܡܽܘܫܶܐ ܛܪܶܐ ܠܶܗ ܠܰܢ ܕܟ݄ܬ̥ܒ̥ܺܝܢܰܐ ܟܬ̥ܳܒ̥ܳܐ ܕܽܗ̄ܘ ܬܶܪܦܺܝܝܳܐ ܘܡܰܪܦܺܝܢܰܐ.“ 5ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܡܽܘܫܶܐ ܡܺܗ̄ܝ ܩܰܫܝܽܘܬ̥ܳܐ ܕܠܶܒܰܝܟ̥ܽܘ ܟܬ̥ܽܒ̥ ܠܶܗ ܠܟ̥ܽܘ ܗ̄ܽܘ ܦܽܘܩܕܳܢܰܢܳܐ. 6ܐܶ‌ܠܳܐ ܡܺܗ̄ܝ ܩܰܕ̱ܡܰܝܬܳܐ، ܓܰܒ̥ܪܳܐ ܘܰܐܢ̱ܬ̥ܬܳܐ ܐܰ‌ܠܳܗܳܐ ܣܺܝܡܺܝ ܠܶܗ. 7ܡܰܗ̄ܘܟ̥ܰܐ ܗ̄ܽܘ ܓܰܒ̥ܪܳܐ ܟܛܳܪܶܐ ܗ̄ܽܘ ܒܰܒܳܐ ܘܺܗ̄ܝ ܐܶܡܳܐ ܘ݄ܓܡܳܛܶܐ ܠܺܗ̄ܝ ܐܰܢ̱ܬ̥ܬܰܝܕ̥ܶܗ، 8ܘܰܬܪ̈ܰܝّܶܗ ܟܳܗ̄ܘ݄ܢ ܚܰܕ̱ ܦܰܓ̥ܪܳܐ. ܘܗܰܘܟ̥ܰܐ ܠܰܐ ܗ̄ܘ݄ܢ ܬܪܶܝ ܐܶ‌ܠܳܐ ܚܰܕ̱ ܦܰܓ̥ܪܳܐ. 9ܘܽܗ̄ܘ ܡܶܕܶܐ ܕܰܐ‌ܠܳܗܳܐ ܡܙܰܘܰܓ̥ ܠܶܗ، ܢܳܫܳܐ ܠܳܐ ܦܳܪܰܫ ܠܶܗ.“ 10ܘܕܰܥܺܝܪܺܝ ܡܫܰܐܶܠّܶܗ ܗ̄ܰܬّܰܠܡܺܝܕ̥̈ܶܐ ܒܽܗ̄ܘ ܒܰܝܬܳܐ ܥܰܠ ܗܰܬ̥ܶܐ؟ 11ܘܐܡ݄ܪ ܠܰܗ ܠّܶܗ: ”ܟܽܘܠ ܡܰܢ ܕܡܰܪܦܶܐ ܗ̄ܺܝ ܐܰܢ̱ܬ̥ܬܰܝܕ̥ܶܗ ܘܡܳܝ݄ܕ ܚܪܶܬܳܐ ܟܓܳܝ݄ܪ. 12ܘܶܐܢ ܐܰܢ̱ܬ̥ܬܳܐ ܡܰܪܦܝܳܐ ܗ̄ܽܘ ܓܰܒ̥ܪܰܝܕ̥ܰܗ ܘܗܳܘܝܳܐ ܠ݄ܚܪܶܢܳܐ ܟܓܰܝܪܳܐ.“

ܝܶܫܽܘܥ ܟ݄ܡܒܰܪ݄ܟ̥ ܠܰܛܠܳܝ̈ܶܐ

ܡܬܝ 19‏:13‏‐15؛ ܠܘܩܐ 18‏:15‏‐17

13ܘ݄ܡܩܰܪܒ̥ܺܝ ܗ̄ܘܰܘ̱ ܠܶܗ ܛܠܳܝ̈ܶܐ ܕܡܰܚ݄ܬ ܐܺܝܕ̥ܶܗ ܐܰܥܠܰܝّܶܗ. ܐܶ‌ܠܳܐ ܗ̄ܰܬّܰܠܡܺܝܕ̥̈ܰܝܕ̥ܶܗ ܙܳܒܪܺܝ ܗ̄ܘܰܘ̱ ܒܗܰܢܺܝ ܕ݄ܡܩܰܪܒܺܝ ܗ̄ܘܰܢّܶܗ. 14ܘ݄ܚܙܶܐ ܠܶܗ ܝܶܫܽܘܥ ܘܥܰܝ݄ܩ ܠܶܗ ܘܐܡ݄ܪ ܠܰܗ ܠّܶܗ: ”ܛܪܰܝܽܘ ܗ̄ܰܛܠܳܝ̈ܶܐ ܐܳܬ̥݄ܢ ܠܣܺܝܕ̥ܺܝ ܘܠܳܐ ܡܰܟܠܺܝܬܽܘܢّܶܗ، ܡܺܐܝܕ̥ܶܗ ܕܠܰܐܝܢܰܐ ܕ݄ܐܟ̥ ܕܰܗ̄ܢܺܝ ܝܳܐ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ. 15ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܟܽܘܠ ܕܠܳܐ ܡܰܩܒ݄ܠ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ ܐܟ̥ ܕܢܰܥܺܝܡܳܐ ܠ݄ܐ ܓܥܳܒܰܪ ܠܰܗ.“ 16ܘ݄ܛܥܺܝܢܺܝ ܠܶܗ ܥܰܠ ܕܪ̈ܳܥܳܢܶܗ ܘܡܰܚܰܬ ܠܶܗ ܐܺܝܕ̥ܶܗ ܐܰܥܠܰܝّܶܗ ܘ݄ܡܒܰܪܟ̥ܺܝ ܠܶܗ.

ܝܶܫܽܘܥ ܘܽܗ̄ܘ ܥܽܘܬ̥ܪܳܐ

ܡܬܝ 19‏:16‏‐30؛ ܠܘܩܐ 18‏:18‏‐30

17ܘܗܺܝّܶܗ ܡܗܰܠܰܟ̥ ܗ̄ܘܰܐ ܒܽܗ̄ܘ ܕܰܪܒܳܐ، ܪܰܗ݄ܛ ܚܰܕ̱ ܢܰܦ݄ܠ ܥܰܠ ܒܰܪ̈ܟܳܬ̥ܶܗ ܘ݄ܡܫܰܐܶܠ ܠܶܗ ܠܶܗ ܘܟܳܐܡ݄ܪ: ”ܡܰܠܦܳܢܳܐ ܛܳܒ̥ܳܐ! ܡ݄ܢ ܣܳܝܰܡ ܐ̱ܢܳܐ ܕܝܳܪܰܬ̥ ܐ̱ܢܳܐ ܗ̄ܰܚّܰܝ̈ܶܐ ܕ݄ܠܥܳܠܰܡ؟“ 18ܐܡ݄ܪ ܠܶܗ ܠܶܗ ܝܶܫܽܘܥ: ”ܡ݄ܢܝܳܐ ܕܟܳܩܳܪܰܬ ܠܺܝ ܛܳܒ̥ܳܐ؟ ܠܰܝܬ ܛܳܒ̥ܳܐ ܐܶ‌ܠܳܐ ܚܰܕ̱.. ܐܰ‌ܠܳܗܳܐ. 19ܟ݄ܐܕ̥ܥܰܬ ܗ̄ܰܦّܽܘܩܕ̈ܳܢܶܐ: ܠܳܐ ܓܰܝܪܰܬ، ܠܳܐ ܓ݄ܢܒ̥ܰܬ، ܠܳܐ ܩ݄ܛܠܰܬ، ܘܠܳܐ ܣ݄ܗܕܰܬ ܣܳܗܕܽܘܬ̥ܳܐ ܒܕ̈ܽܘܓܠܶܐ، ܠܳܐ ܛ݄ܠܡܰܬ، ܘ݄ܡܝܰܩ݄ܪ ܠܒܰܒܳܟ̥ ܘܠܶܐܡܳܟ̥.“ 20ܘܗܺܝّܶܗ ܡܰܕܥܰܪ ܠܶܗ ܘܐܡ݄ܪ ܠܶܗ ܠܶܗ: ”ܡܰܠܦܳܢܳܐ، ܗܰܢܺܝ ܟܽܘܠّܶܗ ܢܛܺܝܪܺܝ ܠܺܝ ܡܶܢ̱ ܢܰܥܡܽܘܬ̥ܺܝ.“ 21ܘܝܶܫܽܘܥ ܚ݄ܪ ܠܶܗ ܐܶܒܶܗ ܘ݄ܪܚ݄ܡ ܠܶܗ، ܘܐܡ݄ܪ ܠܶܗ ܠܶܗ: ”ܚܰܕ̱ ܡܶܕܶܐ ܟܢܳܩܰܨ ܠܳܟ̥: ܙܳܟ̥ ܡܙܰܒ݄ܢ ܟܽܘܠ ܡܶܕܶܐ ܕܟ݄ܬ ܠܳܟ̥ ܘܗܰܒ̥ ܠܰܡّܶܣܟܶܢ̈ܶܐ، ܘ݄ܓܕܳܗ̄ܘܶܐ ܠܳܟ̥ ܣܺܝܡܬܳܐ ܒܺܗ̄ܝ ܫܡܰܝܳܐ، ܘܡ݄ܕ ܗ̄ܽܘ ܨܠܺܝܒܳܐ ܘܬܳܟ̥ ܒ݄ܬ̥ܪܺܝ.“ 22ܐܶ‌ܠܳܐ ܗܺܝّܶܗ ܟܰܪܝܳܐ ܠܶܗ ܡܽܗ̄ܘ ܡܰܐܡܪܰܢܳܐ، ܘܰܐܙّܶܗ ܡܰܥܺܝܩܳܐ، ܥܰܠ ܕܟ݄ܬ ܗ̄ܘܰܝ ܠܶܗ ܙܽܘܙ̈ܶܐ (ܡܳܠܳܐ) ܓ̥ܰܠܰܒܶܐ. 23ܘܚ݄ܪ ܠܶܗ ܝܶܫܽܘܥ ܒܰܬّܰܠܡܺܝܕ̥̈ܰܝܕ̥ܶܗ ܘܐܡ݄ܪ ܠܰܗ ܠّܶܗ: ”ܡ݄ܩܰܐ ܥܰܣܩܳܐ ܝܳܐ ܠܰܐܝܢܰܐ ܕܟ݄ܬّܶܗ ܙܽܘܙ̈ܶܐ ܕܥܳܒܪܺܝ ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ!“ 24ܘܰܬّܰܠܡܺܝܕ̥̈ܶܐ ܡܺܝܕܰܘܡܪܺܝ ܗ̄ܘܰܘ̱ ܥܰܠ ܗ̄ܰܡّܰܐܡܪ̈ܰܝܕ̥ܶܗ. ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܝܰܐ ܐܰܒܢ̈ܰܝܕ̥ܺܝ! ܡ݄ܩܰܐ ܥܰܣܩܳܐ ܝܳܐ ܥܰܠ ܐܰܝܢܰܐ ܕ݄ܬܟ̥ܺܝܠܺܝ ܥܰܠ ܗ̄ܰܙّܽܘܙ̈ܰܬّ̥ܶܗ ܕܥܳܒܪܺܝ ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ. 25ܦܫܺܝܩܳܐ ܝܳܐ ܠܽܗ̄ܘ ܓܰܡܠܳܐ ܕܥܳܒ݄ܪ ܒܽܗ̄ܘ ܢܰܩܒ̥ܳܐ ܕܺܗ̄ܝ ܡܚܰܛܳܐ ܙ݄ܕ ܡܶܢ̱ ܕܽܗ̄ܘ ܥܰܬܺܝܪܳܐ (ܕܥܳܒ݄ܪ) ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“ 26ܘܗ݄ܢّܶܝ ܒܙ݄ܕ ܡܺܝܕܰܘܡܪܺܝ ܗ̄ܘܰܘ̱، ܘ݄ܐܡّܺܪ̱ܝ ܗ̄ܘܰܘ̱ ܒܰܝܢ ܚܕ̥ܳܕ̥̈ܶܐ: ”ܡܰܢ ܟܺܝܒܶܗ ܥܳܒ݄ܪ ܠܰܚّܰܝ̈ܶܐ؟“ 27ܘܚ݄ܪ ܠܶܗ ܝܶܫܽܘܥ ܐܰܒّܶܗ ܘܐܡ݄ܪ ܠܰܗ ܠّܶܗ: ”ܓܰܒ ܗ̄ܰܢ ܢܳܫ̈ܶܐ، ܗܰܬ̥ܶܐ ܠܳܐ ܟܳܗ̄ܘܝܳܐ، ܐܶ‌ܠܳܐ ܓܰܒ ܐܰ‌ܠܳܗܳܐ. ܥܰܠ ܟܽܘܠ ܡܶܕܶܐ ܟܺܝܒܶܗ ܕܳܗ̄ܘܶܐ ܓܰܒ ܐܰ‌ܠܳܗܳܐ.“

28ܘ݄ܡܫܰܪܶܐ ܠܶܗ ܟܶܐܦܳܐ ܕܳܐܡ݄ܪ: ”ܟܰܐܠܶܗ ܐܰܚܢܰܐ ܛܪܶܐ ܠܰܢ ܟܽܘܠ ܡܶܕܶܐ ܘܰܐܬ̥ܺܝܢܰܐ ܒ݄ܬ̥ܪܳܟ̥.“ 29ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܠܰܝܬ ܢܳܫܳܐ ܕܛܳܪܶܐ ܒ̈ܳܬܶܐ ܐܰܘ ܐܰܚ̈ܽܘܢܳܢܶܐ ܐܰܘ ܐܰܚ̈ܘܳܬ̥ܳܐ ܐܰܘ ܒܰܒܳܐ ܐܰܘ ܐܶܡܳܐ ܐܰܘ ܐܰܢ̱ܬ̥ܬܳܐ ܐܰܘ ܐܰܒܢ̈ܶܐ ܐܰܘ ܚܰܩ̈ܠܳܬ̥ܳܐ ܠܰܫܰܢܺܝ ܘܠܰܫܰܢ ܗ̄ܺܝ ܣܒܰܪܬ̥ܰܝܕ̥ܺܝ، 30ܘܠ݄ܐ ܓܡܳܝ݄ܕ ܡܳܐܐ ܟܳܪ̈ܶܐ ܙ݄ܕ، ܐܳܥܕܳܐ ܒܽܗ̄ܘ ܙܰܒܢܰܢܳܐ، ܒ̈ܳܬܶܐ ܘܰܐܚ̈ܘܿܢܳܢܶܐ ܘܰܐܚ̈ܘܳܬ̥ܳܐ ܘܶܐܡ̈ܳܬ̥ܳܐ ܘܰܐܒܢ̈ܶܐ ܘܚܰܩ̈ܠܳܬ̥ܳܐ ܥܰܡ ܪܕܽܘܦܝܳܐ، ܘܒܽܗ̄ܘ ܥܳܠܡܳܐ ܕܳܐܬ̥ܶܐ ܚܰܝ̈ܶܐ ܕ݄ܠܥܳܠܰܡ. 31ܘܓ̥ܰܠܰܒܶܐ ܩܰܕ̱ܡܳܝ̈ܶܐ ܓܕܳܗ̄ܘ݄ܢ ܚܰܪ̈ܳܝܶܐ، ܘܚܰܪ̈ܳܝܶܐ ܩܰܕ̱ܡܳܝ̈ܶܐ.“

ܝܶܫܽܘܥ ܟܡܰܘܕ̥݄ܥ ܠܺܗ̄ܝ ܢܰܩܠܐ ܕܰܬܠ݄ܬ̥ ܥܰܠ ܗ̄ܽܘ ܚܰܫܰܝܕ̥ܶܗ ܘܽܗ̄ܘ ܡܰܘܬܰܝܕ̥ܶܗ ܘܺܗ̄ܝ ܩܝܰܡܬܰܝܕ̥ܶܗ

ܡܬܝ 20‏:17‏‐19؛ ܠܘܩܐ 18‏:31‏‐34

32ܘܗ݄ܢّܶܝ ܣܳܠܩܺܝ ܗ̄ܘܰܘ̱ ܒܽܗ̄ܘ ܕܰܪܒܳܐ ܠܽܐܘܪܶܫܠܶܡ، ܝܶܫܽܘܥ ܡܗܰܠܰܟ̥ ܗ̄ܘܰܐ ܩܽܘܕ̱ܡܰܝّܶܗ. ܘܡܺܝܕܰܘܡܪܺܝ ܗ̄ܘܰܘ̱، ܘ݄ܐܙّ݄ܢ ܗ̄ܘܰܘ̱ ܒ݄ܬ̥ܪܶܗ ܘܗ݄ܢّܶܝ ܙܰܝܳܥ̈ܶܐ. ܘܡܰܘܒܶܠ ܠܶܗ ܗ̄ܰܬܪܰܥܣܰܪܰܝܕ̥ܶܗ ܘ݄ܡܫܰܪܶܐ ܠܶܗ ܕܳܐܡܰܪّܶܗ ܗ̄ܽܘ ܡܶܕܶܐ ܕ݄ܓܕܳܗ̄ܘܶܐ ܠܶܗ: 33”ܟܰܐܠܶܗ ܟܣ݄ܠܩܺܝܢܰܐ ܠܽܐܘܪܶܫܠܶܡ، ܘܰܐܒܪܶܗ ܕܢܳܫܳܐ ܓ݄ܕܡܺܝܬܰܫܠ݄ܡ ܠܰܪّܰܒ̈ܶܐ ܕܰܟّܳܗ̈ܢܶܐ ܘܠܰܣّܳܦܪ̈ܶܐ، ܘܓ݄ܕܕܰܝܢܺܝ ܠܶܗ ܠܽܗ̄ܘ ܡܰܘܬܳܐ، ܘ݄ܓܡܰܫܠܡܺܝ ܠܶܗ ܠܰܥّܰܡ̈ܶܐ، 34ܘܓ݄ܡܨܰܥܪܺܝ ܠܶܗ ܘ݄ܓܡܳܚ݄ܢ ܠܶܗ، ܘ݄ܓܪܰܝܩܺܝ ܒܦܳܬ̥ܶܗ، ܘ݄ܓܩܳܛܠܺܝ ܠܶܗ، ܘܒܽܗ̄ܘ ܝܰܘܡܳܐ ܕܰܬܠܳܬ̥ܳܐ ܓܩܳܝ݄ܡ.“

ܗ̄ܽܘ ܒܥܳܝܳܐ ܕܰܗ̄ܢ ܐܰܒܢ̈ܶܐ ܕܙܰܒܕܰܝ

ܡܬܝ 20‏:20‏‐28

35ܘ݄ܡܩܰܪܰܒّ̥ܶܗ ܠܣܺܝܕ̥ܶܗ ܝܰܥܩܽܘܒ ܘܝܽܘܚܰܢܳܢ، ܗ̄ܰܢ ܐܰܒܢ̈ܶܐ ܕܙܰܒܕܰܝ، ܘܐܡ݄ܪّܰܗ ܠܶܗ: ”ܡܰܠܦܳܢܳܐ، ܟ݄ܐܒܥܺܝܢܰܐ ܟܽܘܠ ܡܶܕܶܐ ܕܳܐܒܥܺܝܢܰܐ ܕܣܰܝܡܰܬ ܠܰܢ.“ 36ܘܐܡ݄ܪ ܠܰܗ ܠّܶܗ: ”ܡ݄ܢ ܟ݄ܐܒܥܺܝܬܽܘ ܕܣܳܝܰܡ ܐ̱ܢܳܐ ܠܟ̥ܽܘ؟“ 37ܟ݄ܐܡّܺܪ̱ܝ ܠܶܗ: ”ܗܰܒ̥ ܠܰܢ ܕܝܳܬܒ̥ܺܝܢܰܐ، ܚܰܕ̱ ܡܽܗ̄ܘ ܝܰܡܺܝܢܰܝܕ̥ܳܟ̥ ܘܚܰܕ̱ ܡܽܗ̄ܘ ܣܶܡܳܠܰܝܕ̥ܳܟ̥، ܒܽܗ̄ܘ ܫܽܘܒܚܰܝܕ̥ܳܟ̥.“ 38ܘܗܺܝّܶܗ ܐܡ݄ܪ ܠܰܗ ܠّܶܗ: ”ܗܰܬܽܘ ܠ݄ܐ ܟ݄ܐܕ̥ܥܺܝܬܽܘ ܡ݄ܢ ܟ݄ܐܒܥܺܝܬܽܘ: ܟ݄ܒܟ̥ܽܘ ܕܫܳܬܺܝܬܽܘ ܗ̄ܽܘ ܟܳܣܳܐ ܕܳܐܢܳܐ ܫܳܬܶܐ ܐ̱ܢܳܐ، ܘܺܗ̄ܝ ܡܰܥܡܽܘܕ̥ܺܝܬ̥ܳܐ ܕܳܐܢܳܐ ܥܳܡܰܕ̥ ܐ̱ܢܳܐ ܕܥܳܡܕܺܝܬܽܘ؟“ 39ܘܐܡ݄ܪّܰܗ ܠܶܗ: ”ܟܺܝܒܰܢ.“ ܘܐܡ݄ܪ ܠܰܗ ܠّܶܗ ܝܶܫܽܘܥ: ”ܗ̄ܽܘ ܟܳܣܳܐ ܕܫܳܬܶܐ ܐ̱ܢܳܐ ܓܫܳܬܺܝܬܽܘ، ܘܺܗ̄ܝ ܡܰܥܡܽܘܕ̥ܺܝܬ̥ܳܐ ܕܥܳܡܰܕ̥ ܐ̱ܢܳܐ ܓܥܳܡܕ̥ܺܝܬܽܘ، 40ܐܶ‌ܠܳܐ ܕܝܳܬܒ̥ܺܝܬܽܘ ܡܽܗ̄ܘ ܝܰܡܺܝܢܰܝܕ̥ܺܝ ܘܡܽܗ̄ܘ ܣܶܡܳܠܰܝܕ̥ܺܝ، ܠܰܝ̱ܬ ܝܳܐ ܕܺܝܕ̥ܺܝ ܕܳܗ̄ܒܶܐ ܐ̱ܢܳܐ. ܐܶ‌ܠܳܐ ܠܰܗ̄ܢܺܝ ܕ݄ܢܛܺܝܪܳܐ ܐܰ‌ܠّܶܗ.“ 41ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܰܥّܰܣܪܳܐ (ܬܰܠܡܺܝܕ̥̈ܶܐ)، ܡܫܰܪܰܠّܶܗ ܕ݄ܡܛܰܪܛܡܺܝ ܥܰܠ ܝܰܥܩܽܘܒ ܘܝܽܘܚܰܢܳܢ. 42ܘ݄ܩܪܶܐ ܠܰܗ ܠّܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܟ݄ܐܕ̥ܥܺܝܬܽܘ ܕܰܐܝܢܰܐ ܕܟܳܡ݄ܚܫܳܒ̥ܺܝ ܪ̈ܺܝܫܳܢܶܐ ܕܰܥّܰܡ̈ܶܐ ܗ̄ܰܡّܳܪ̈ܰܬّ̥ܶܗ ܢܶܝ، ܘܰܪّܰܒ̈ܰܬّ̥ܶܗ ܡܫ̈ܰܠܛܶܐ ܢܶܝ ܐܰܥܠܰܝّܶܗ. 43ܛܪܳܐ ܠܳܐ ܗ̄ܘܶܐ ܗܰܘܟ̥ܰܐ ܒܰܝܢܳܬ̥ܰܝܟ̥ܽܘ. ܐܶ‌ܠܳܐ ܡܰܢ ܕܳܐܒ݄ܥ ܐܰܒܟ̥ܽܘ ܕܳܗ̄ܘܶܐ ܪܰܒܳܐ، ܛܪܳܐ ܗܳܘܰܠܟ̥ܽܘ ܡܫܰܡܫܳܢܳܐ. 44ܘܰܐܝܢܰܐ ܡ݄ܢܟ̥ܽܘ ܕܳܐܒ݄ܥ ܗܳܘܶܐ ܩܰܕ̱ܡܳܝܳܐ، ܛܪܳܐ ܗܳܘܶܐ ܓܪܶܝܥܳܐ ܕܟܽܘܠ ܢܳܫܳܐ. 45ܡܺܐܝܕ̥ܶܗ ܕܰܐܒܪܶܗ ܕܢܳܫܳܐ ܣܬܶܝ ܠܰܐ ܐܬ̥ܺܝ ܕܡܺܝܫܰܡ݄ܫ ܐܶ‌ܠܳܐ ܕ݄ܡܫܰܡ݄ܫ ܘܕܳܗ̄ܒܶܐ ܗ̄ܺܝ ܢܰܦܫܰܝܕ̥ܶܗ ܦܽܘܪܩܳܢܳܐ ܡܶܢ̱ ܚܠܳܦ ܓ̥ܰܠܰܒܶܐ.“

ܝܶܫܽܘܥ ܟܦܳܬ݄ܚ ܗ̄ܰܥّܰܝܢ̈ܶܐ ܕܽܗ̄ܘ ܐܰܒܪܳܐ ܕܛܺܝܡܰܝ ܗ̄ܽܘ ܣܰܡܝܳܐ

ܡܬܝ 20‏:29‏‐34؛ ܠܘܩܐ 18‏:35‏‐43

46ܘܰܐܬ̥݄ܢ ܠܺܐܝܪܺܝܚܽܘ. ܘܺܗ̄ܝ ܢܰܩܠܐ ܕܢܰܦ݄ܩ ܝܶܫܽܘܥ ܡܶܢ̱ ܐܺܝܪܺܝܚܽܘ ܗܺܝّܶܗ ܘܰܬّܰܠܡܺܝܕ̥̈ܰܝܕ̥ܶܗ ܘܢܳܫ̈ܶܐ ܓ̥ܰܠܰܒܶܐ، ܛܺܝܡܰܝ ܒܰܪܛܺܝܡܰܝ، ܗ̄ܽܘ ܣܰܡܝܳܐ، ܝܰܬܺܝܒ̥ܳܐ ܗ̄ܘܰܐ ܥܰܠ ܣܰܦ̊ܬܶܗ ܕܽܗ̄ܘ ܕܰܪܒܳܐ، ܘܓܳܒ̥ܶܐ ܗ̄ܘܰܐ. 47ܘܫܰܡ݄ܥ ܕܝܶܫܽܘܥ ܗ̄ܽܘ ܢܳܨܪܳܝܳܐ ܝܳܐ، ܘ݄ܡܫܰܪܶܐ ܠܶܗ ܕܡܰܙܥ݄ܩ ܘܳܐܡ݄ܪ: ”{ܝܶܫܽܘܥ} ܗ̄ܽܘ ܐܰܒܪܳܐ ܕܕܰܘܺܝܕ̥، ܡܰܪܚ݄ܡ ܐܰܥܠܺܝ!“ 48ܘܓ̥ܰܠܰܒܶܐ ܢܳܫ̈ܶܐ ܡܥܰܝܰܛّܶܗ ܐܰܥܠܶܗ ܕܫܳܠܶܐ، ܐܶ‌ܠܳܐ ܗܺܝّܶܗ ܙ݄ܕ ܡܰܙܥܰܩ ܗ̄ܘܰܐ ܘܳܐܡܰܪ ܗ̄ܘܰܐ: ”ܐܰܒܪܳܐ ܕܕܰܘܺܝܕ̥، ܡܰܪܚ݄ܡ ܐܰܥܠܺܝ.“ 49ܘܩܰܝ݄ܡ ܝܶܫܽܘܥ ܘܗܽܒ̥ ܠܶܗ ܦܽܘܩܕܳܢܳܐ ܕܩܳܪ݄ܢ ܠܶܗ، ܘ݄ܩܪܰܠّܶܗ ܠܽܗ̄ܘ ܣܰܡܝܳܐ ܘܐܡ݄ܪّܰܗ ܠܶܗ: ”ܚܘܿܨ ܪܽܘܚܳܟ̥، ܩܘܿܡ، ܟܳܩܳܪܶܐ ܠܳܟ̥.“ 50ܘܗܺܝّܶܗ ܗ̄ܽܘ ܣܰܡܝܳܐ ܡܚܰܠܰܩ ܠܶܗ ܗ̄ܽܘ ܠܒܽܘܫܰܝܕ̥ܶܗ، ܘܩܰܝ݄ܡ ܐܰܬ̥ܺܝ ܓܰܒ ܝܶܫܽܘܥ. 51ܐܡ݄ܪ ܠܶܗ ܠܶܗ ܝܶܫܽܘܥ: ”ܡ݄ܢ ܟ݄ܐܒܥܰܬ ܕܣܳܝܰܡ ܐ̱ܢܳܐ ܠܳܟ̥؟“ ܘܽܗ̄ܘ ܣܰܡܝܳܐ ܐܡ݄ܪ ܠܶܗ ܠܶܗ: ”ܡܰܠܦܳܢܳܐ، ܕܚܳܙܶܐ ܐ̱ܢܳܐ!“ 52ܘܝܶܫܽܘܥ ܐܡ݄ܪ ܠܶܗ ܠܶܗ: ”ܚܙܰܝ! ܗ̄ܺܝ ܗܰܝܡܳܢܽܘܬ̥ܰܝܕ̥ܳܟ̥ ܗܽܒ̥ ܠܰܗ ܠܳܟ̥ ܚܰܝ̈ܶܐ.“ ܘܡܶܚܕ̥ܳܐ ܚܙܶܐ ܠܶܗ، ܘܰܐܙّܶܗ ܒܽܗ̄ܘ ܕܰܪܒܳܐ {ܒ݄ܬ̥ܪܶܗ ܕܝܶܫܽܘܥ}.

Currently Selected:

ܡܓܰܠܝܘܢ ܕܡܪܩܘܣ 10: ܟܬܒܐ

Highlight

Copy