ܡܓܰܠܝܘܢ ܕܡܪܩܘܣ 7

ܗ̄ܰܥܝܳܕ̥̈ܶܐ ܕܰܗ̄ܢ ܐܰܒܳܗ̈ܶܐ

ܡܬܝ 15‏:1‏‐9

1ܘܠܰܬܺܝܡܺܝ ܣܺܝܕ̥ܶܗ ܦܪ̈ܺܝܫܶܐ ܘܣܳܦܪ̈ܶܐ ܕܰܐܬ̥݄ܢ ܗ̄ܘܰܘ̱ ܡܶܢ̱ ܐܽܘܪܶܫܠܶܡ، 2ܘ݄ܚܙܰܠّܶܗ ܠܗ݄ܢ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܕܟܳܐܟ̥ܠܺܝ ܠܰܚܡܳܐ ܘܺܐܝܕ̥̈ܳܬ̥ܰܝّܶܗ ܠܳܐ ܡܰܫܺܝܓ̥̈ܶܐ. ܘ݄ܡܢܰܟܰܦّܶܗ. 3ܡܺܐܝܕ̥ܶܗ ܕܟܽܘܠّܶܗ ܗ̄ܰܝّܽܘܕ̥̈ܳܝܶܐ ܘܰܦܪ̈ܺܝܫܶܐ ܠ݄ܐ ܐܟ̥ܠܺܝ ܗ̄ܘܰܘ̱ ܕܠܳܐ ܡܰܫܺܝܓ̥ܺܝ ܗ̄ܘܰܘ̱ ܐܺܝܕ̥̈ܳܬ̥ܰܝّܶܗ ܛܳܒ̥ܳܐ ܛܳܒ̥ܳܐ، ܥܰܠ ܕܢܳܛܪܺܝ ܗ̄ܘܰܘ̱ ܗ̄ܰܥܝܳܕ̥̈ܶܐ (ܡܰܫܠܡܳܢܽܘܬ̥ܳܐ) ܕܰܣّܳܒ̥̈ܶܐ. 4ܘܡܺܗ̄ܝ ܫܽܘܩܳܐ ܕܠܳܐ ܡܰܫܺܝܓ̥ܺܝ ܗ̄ܘܰܘ̱ ܠ݄ܐ ܐܟ̥ܠܺܝ ܗ̄ܘܰܘ̱. ܘܓ̥ܰܠܰܒܶܐ ܚܪ̈ܶܢܶܐ ܕܡܰܩܒܰܠّܶܗ ܕܢܳܛܪ݄ܢّܶܗ ܐܟ̥ ܕܺܗ̄ܝ ܡܰܥܡܽܘܕ̥ܺܝܬ̥ܳܐ (ܬܶܫܺܝܓ̥ܳܐ) ܕܰܟّܳܣ̈ܶܐ ܘܕܰܓܕ̈ܳܢܶܐ ܘܕܰܣّܶܦܳܩ̈ܶܐ ܕܽܗ̄ܘ ܢܚܳܫܳܐ ܘܕ̈ܰܓّܰܠܶܐ. 5ܘ݄ܡܫܰܐܶܠّܰܗ ܠܶܗ ܗ̄ܰܣّܳܦܪ̈ܶܐ ܘܰܦܪ̈ܺܝܫܶܐ: ”ܠܡ݄ܢ ܗ̄ܰܬّܰܠܡܺܝܕ̥̈ܰܝܕ̥ܳܟ̥ ܠ݄ܐ ܟ݄ܡܗܰܠܟ̥ܺܝ ܐܟ̥ ܕܰܥܝܳܕ̥̈ܶܐ ܕܰܣّܳܒ̥̈ܶܐ، ܘܟ݄ܐܟ̥ܠܺܝ ܠܰܚܡܳܐ ܘܺܐܝܕ̥̈ܳܬ̥ܰܝّܶܗ ܠܳܐ ܡܰܫܺܝܓ̥̈ܶܐ؟“ 6ܘܗܺܝّܶܗ ܐܡ݄ܪ ܠܰܗ ܠّܶܗ: ”ܫܰܦܺܝܪܳܐ ܡ݄ܬ̥ܢܰܒܶܐ ܠܶܗ ܐܰܥܠܰܝܟ̥ܽܘ ܐܶܫܰܥܝܳܐ ܗ̄ܽܘ ܢܒܺܝܳܐ ܝܰܐ ܕܰܬّܰܪܬܶܝ ܦ̈ܳܬ̥ܳܬ̥ܳܐ!، ܐܟ̥ ܕ݄ܟܬ̥ܺܝܒ̥: ’ܗ̄ܽܘ ܥܰܡܰܢܳܐ ܒܣܰܦ̊ܘ̈ܳܬ̥ܶܗ ܟ݄ܡܝܰܩܰܪ ܠܺܝ، ܐܶ‌ܠܳܐ ܠܶܒܰܝّܶܗ ܓ̥ܰܠܰܒܶܐ ܪܰܚܽܘܩܳܐ ܝܳܐ ܡܶܢܺܝ. 7ܘܥܰܠ ܒܰܛܺܝܠܳܐ ܟܥ݄ܒܕܺܝ ܠܺܝ ܘܗ݄ܢّܶܝ ܟܡܰܘܠܦܺܝ ܝܽܘܠܦܳܢ̈ܶܐ ܕܰܦّܽܘܩܕ̈ܳܢܶܐ ܕܰܗ̄ܢ ܢܳܫ̈ܶܐ.‘ 8ܥܰܠ ܕ݄ܛܪܰܠܟ̥ܽܘ ܗ̄ܽܘ ܦܽܘܩܕܳܢܳܐ ܕܰܐ‌ܠܳܗܳܐ ܘ݄ܢܛ݄ܪܟ̥ܽܘ ܗ̄ܰܥܝܳܕ̥̈ܶܐ ܕܰܗ̄ܢ ܢܳܫ̈ܶܐ.“ ܐܟ̥ ܕܺܗ̄ܝ ܡܰܥܡܽܘܕ̥ܺܝܬ̥ܳܐ ܕܰܟّܳܣ̈ܶܐ ܘܕܰܓܕ̈ܳܢܶܐ، ܘܓ̥ܰܠܰܒܶܐ ܡܶܕ̈ܳܢܶܐ ܐ̱ܟ̥ܳܬ̥ܰܝّܶܗ. 9ܘܐܡ݄ܪ ܠܰܗ ܠّܶܗ: ”ܫܰܦܺܝܪܳܐ ܟܛܳܠܡܺܝܬܽܘ ܗ̄ܽܘ ܦܽܘܩܕܳܢܳܐ ܕܰܐ‌ܠܳܗܳܐ ܠܰܫܰܢ ܕܡܰܩܺܝܡܺܝܬܽܘ ܗ̄ܰܥܝܳܕ̥̈ܰܬ̥ܟ̥ܽܘ؟ 10ܥܰܠ ܕܡܽܘܫܶܐ ܐܡ݄ܪ ܠܶܗ: ’ܡܝܰܩܰܪ ܠܒܰܒܳܟ̥ ܘܠܶܐܡܳܟ̥.‘ ’ܘܡܰܢ ܕ݄ܡܨܰܥ݄ܪ ܠܽܗ̄ܘ ܒܰܒܳܐ ܘܠܺܗ̄ܝ ܐܶܡܳܐ ܡܰܘܬܳܐ ܓܡܳܝ݄ܬ̥.‘ 11ܐܶ‌ܠܳܐ ܗܰܬܽܘ ܟ݄ܐܡّܺܪ̱ܝܬܽܘ ܕܢܳܫܳܐ ܐܳܡ݄ܪ ܠܽܗ̄ܘ ܒܰܒܳܐ ܐܰܘ ܠܺܗ̄ܝ ܐܶܡܳܐ ܗ̄ܽܘ ܢܰܕ̥ܪܰܝܕ̥ܺܝ ܝܳܐ ܗ̄ܽܘ ܡܶܕܶܐ ܕܡܺܝܥܰܕܪܺܝܬܽܘ ܡܶܢܺܝ، 12ܘܠ݄ܐ ܟܛܳܪܺܝܬܽܘ ܠܶܗ ܕܣܳܝ݄ܡ ܡܶܕܶܐ ܠܽܗ̄ܘ ܒܰܒܳܐ ܐܰܘ ܠܺܗ̄ܝ ܐܶܡܳܐ. 13ܘ݄ܟܬܰܒ̥ܪܺܝܬܽܘ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܠܰܫܰܢ ܗ̄ܰܥܝܳܕ̥̈ܶܐ ܕܡܰܫܠܰܡܟ̥ܽܘ، ܘ݄ܕܟܳܕܳܡ݄ܢ ܠܰܗ̄ܢܺܝ ܓ̥ܰܠܰܒܶܐ ܟܣܰܝܡܺܝܬܽܘ.“

ܡ݄ܢܝܳܐ ܕܟ݄ܡܚܰܪ݄ܡ ܗ̄ܽܘ ܢܳܫܳܐ؟

ܡܬܝ 15‏:10‏‐20

14ܘܝܶܫܽܘܥ ܩܪܶܐ ܠܶܗ ܠܟܘ̇ܠّܶܗ ܗ̄ܰܢ ܢܳܫ̈ܶܐ ܘܐܡ݄ܪ ܠܰܗ ܠّܶܗ: ”ܫܡܰܥܽܘ ܠܺܝ ܟܽܘ̇ܠܟ̥ܽܘ ܘܺܝܠܰܦܽܘ: 15ܠܰܝܬ ܡܶܕܶܐ ܕܡܶܢ̱ ܠܰܪܒ̥ܰܠ ܥܳܒ݄ܪ ܠܽܗ̄ܘ ܢܳܫܳܐ ܟܺܝܒܶܗ ܡܚܰܪܰܡ ܠܶܗ. ܐܶ‌ܠܳܐ ܗ̄ܽܘ ܡܶܕܶܐ ܕܢܳܦ݄ܩ ܡܶܢܶܗ ܗܰܘܳܐ ܝܳܐ ܕܟ݄ܡܚܰܪ݄ܡ ܗ̄ܽܘ ܢܳܫܳܐ. 16ܡܰܢ ܕܟ݄ܬ ܠܶܗ ܐܰܕ̥̈ܢܶܐ ܕܫܳܡ݄ܥ ܛܪܳܐ ܫܳܡ݄ܥ!“

17ܘܺܗ̄ܝ ܢܰܩܠܐ ܕܥܰܒ݄ܪ ܝܶܫܽܘܥ ܠܽܗ̄ܘ ܒܰܝܬܳܐ ܡܰܗ̄ܢ ܢܳܫ̈ܶܐ، ܡܫܰܐܺܠّܰܗ ܠܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܥܰܠ ܗ̄ܽܘ ܡܰܬ̥ܠܰܘܳܐ. 18ܘܐܡ݄ܪ ܠܰܗ ܠّܶܗ: ”ܗܰܘܟ̥ܰܐ ܗܰܬܽܘ ܣܬܶܝ ܛܰܥܝ̈ܶܐ ܗܰܬܽܘ؟ ܠ݄ܐ ܟ݄ܐܕ̥ܥܺܝܬܽܘ ܟܽܘܠ ܡܶܕܶܐ ܕܡܶܢ̱ ܠܰܪܒ̥ܰܠ ܥܳܒ݄ܪ ܠܽܗ̄ܘ ܢܳܫܳܐ ܠܰܝܒܶܗ ܡܚܰܪܰܡ ܠܶܗ؟ 19ܥܰܠ ܕܠ݄ܐ ܟܥܳܒ݄ܪ ܠܠܶܒܶܗ، ܐܶ‌ܠܳܐ ܠܓܰܘܶܗ، ܘ݄ܟܡܺܝܚܰܠ݄ܩ ܒܺܗ̄ܝ ܬܰܕܟ̥ܺܝܬ̥ܳܐ. ܘܗܰܘܟ̥ܰܐ ܗ̄ܽܘ ܡܽܐܘܟܠܳܐ ܟܽܘܠܶܗ ܕܰܟ̥ܝܳܐ ܝܳܐ. 20ܘܽܗ̄ܘ ܡܶܕܶܐ ܕܢܳܦ݄ܩ ܡܽܗ̄ܘ ܢܳܫܳܐ، ܗܰܘܳܐ ܝܳܐ ܕܟ݄ܡܚܰܪ݄ܡ ܗ̄ܽܘ ܢܳܫܳܐ، 21ܥܰܠ ܕܡܶܢ̱ ܠܰܘܓ̥݄ܠ، ܡܽܗ̄ܘ ܠܶܒܳܐ ܕܰܗ̄ܢ ܢܳܫ̈ܶܐ، ܟܢ݄ܦܩܺܝ ܗ̄ܰܪّܶܢܝ̈ܶܐ ܒܺܝܫ̈ܶܐ: ܓܰܘܪܳܐ، ܙܳܢܝܽܘܬ̥ܳܐ، ܓܰܢܳܒܽܘܬ̥ܳܐ. ܩܰܛܠܳܐ، 22ܝܰܥܢܽܘܬ̥ܳܐ، ܒܺܝܫܽܘܬ̥ܳܐ، ܢܟ̥ܺܝܠܽܘܬ̥ܳܐ، ܨܰܚܢܽܘܬ̥ܳܐ، ܥܰܝܢܳܐ ܒܺܝܫܬܳܐ، ܓܽܘܕܳܦܳܐ، ܫܰܒܗܪܳܢܽܘܬ̥ܳܐ، ܫܳܛܝܽܘܬ̥ܳܐ. 23ܗܰܢܺܝ ܟܽܘܠّܶܗ ܗ̄ܰܒّܺܝܫ̈ܳܬ̥ܳܐ ܟܢ݄ܦܩܺܝ ܡܶܢ̱ ܠܰܘܓ̥݄ܠ ܘܟ݄ܡܚܰܪܡܺܝ ܗ̄ܽܘ ܒܰܪܢܳܫܳܐ.“

ܗ̄ܽܘ ܟܪܳܟ̥ܳܐ ܕܝܶܫܽܘܥ ܠܰܪܒ̥ܰܠ ܡܶܢ̱ ܝܺܗܽܘܕ̥ܳܐ

ܗ̄ܺܝ ܗܰܝܡܳܢܽܘܬ̥ܳܐ ܕܺܗ̄ܝ ܐܰܢ̱ܬ̥ܬܳܐ ܦܽܘܢܺܝܩܳܝܬܳܐ

ܡܬܝ 15‏:21‏‐28

24ܘܡܶܢ̱ ܬܰܡܳܐ ܩܰܝ݄ܡ ܝܶܫܽܘܥ ܘܰܐܬ̥ܺܝ ܠܽܗ̄ܘ ܬܚܽܘܡܳܐ ܕܨܽܘܪ ܘ݄ܕܨܰܝܕܳܢ، ܘܥܰܒ݄ܪ ܠܚܰܕ̱ ܒܰܝܬܳܐ، ܘܠܳܐ ܐܒܰܥ ܗ̄ܘܰܐ ܕܢܳܫܳܐ ܐܳܕ̥݄ܥ ܐܶܒܶܗ، ܘܠܳܐ ܩܰܕ݄ܪ ܕܡܰܬܠܶܐ ܪܽܘܚܶܗ، 25ܡܺܐܝܕ̥ܶܗ ܕܡܶܚܕ̥ܳܐ ܫܰܡܺܝܥܳܐ ܐܶܒܶܗ ܚܕ̥ܳܐ ܐܰܢ̱ܬ̥ܬܳܐ ܕܟ݄ܬ ܗ̄ܘܰܐ ܒܺܗ̄ܝ ܒܰܪܬ̥ܰܝܕ̥ܰܗ ܪܽܘܚܳܐ ܛܰܢ݄ܦܬ̥ܳܐ، ܘܰܐܬ̥ܝܳܐ ܢܰܦܺܝܠܳܐ ܩ݄ܕ̱ܡ ܪ̈ܰܓ̥ܠܳܬ̥ܶܗ. 26ܘܺܗ̄ܝ ܐܰܢ̱ܬ̥ܬܳܐ ܚܰܢܦܬܳܐ ܗ̄ܘܰܐ، ܡܶܢ̱ ܦܽܘܢܺܝܩܺܝ ܕܣܽܘܪܺܝܰܐ، ܘܳܐܒܥܳܐ ܗ̄ܘܰܐ ܡܶܢܶܗ ܕܡܰܘܦ݄ܩ ܗ̄ܽܘ ܫܺܐܕܳܐ ܡܺܗ̄ܝ ܒܰܪܬ̥ܰܝܕ̥ܰܗ. 27ܘܝܶܫܽܘܥ ܐܡ݄ܪ ܠܶܗ ܠܰܗ: ”ܛܪܰܝ ܒܺܗ̄ܝ ܩܰܕ̱ܡܰܝܬܳܐ ܕܣܰܒ̥ܥܺܝ ܗ̄ܰܢ ܐܰܒܢ̈ܶܐ، ܡܺܐܝܕ̥ܶܗ ܕܠܰܝ̱ܬ ܝܳܐ ܫܰܦܺܝܪܳܐ ܕܡܰܝܕܺܝܢܰܐ ܗ̄ܽܘ ܠܰܚܡܳܐ ܕܰܗ̄ܢ ܐܰܒܢ̈ܶܐ ܘ݄ܡܚܰܠܩܺܝܢܰܐ ܠܰܟّܰܠܒ̈ܶܐ.“ 28ܘܗܺܝّܰܗ ܡܰܕܥܰܪ ܠܰܗ ܘܐܡ݄ܪ ܠܰܗ ܠܶܗ: ”ܐܺܝܢ ܡܳܪܝ، ܗ̄ܰܟّܰܠܒ̈ܶܐ ܣܬܶܝ ܡܶܢ̱ ܬܰܚܬ ܗ̄ܰܦّܳܬܽܘܪ̈ܶܐ ܟ݄ܐܟ̥ܠܺܝ ܗ̄ܰܦّܰܪ̈ܕܘܢܶܐ ܕܰܗ̄ܢ ܐܰܒܢ̈ܶܐ!“ 29ܘܐܡ݄ܪ ܠܶܗ ܠܰܗ ܝܶܫܽܘܥ: ”ܙܰܟ̥، ܥܰܠ ܗ̄ܽܘ ܡܰܐܡܪܰܢܳܐ، ܗ̄ܽܘ ܫܺܐܕܳܐ ܢܰܦ݄ܩ ܡܺܗ̄ܝ ܒܰܪܬ̥ܰܝܕ̥ܰܟ̥.“ 30ܘܕܰܥܺܝܪܳܐ ܠܽܗ̄ܘ ܒܰܝܬܰܝܕ̥ܰܗ، ܘ݄ܚܙܶܐ ܠܰܗ ܗ̄ܺܝ ܒܰܪܬ̥ܰܝܕ̥ܰܗ ܡܚܰܠܰܩܬܳܐ ܒ̈ܰܓّܰܠܶܐ، ܘܽܗ̄ܘ ܫܺܐܕܳܐ ܢܰܦ݄ܩ ܡܶܢܰܗ.

ܗ̄ܽܘ ܬܶܬ̥ܢܺܝܚܳܐ ܕܽܗ̄ܘ ܓܰܒ̥ܪܳܐ ܚܰܪܫܳܐ ܘܠܰܥܓܳܐ

31ܢܰܩܠܐ ܚܪܶܬܳܐ ܢܰܦ݄ܩ ܝܶܫܽܘܥ ܡܽܗ̄ܘ ܬܚܽܘܡܳܐ ܕܨܽܘܪ ܘ݄ܕܨܰܝܕܳܢ، ܘܰܐܬ̥ܺܝ ܠܽܗ̄ܘ ܝܰܡܳܐ ܕܽܗ̄ܘ ܓܠܺܝܠܳܐ، ܒܽܗ̄ܘ ܬܚܽܘܡܳܐ ܕ݄ܥܣܰܪ ܡܕ̥ܺܝ̈ܢܳܬ̥ܳܐ. 32ܘܡܰܝܬܰܠّܰܗ ܠܶܗ ܚܰܕ̱ ܚܰܪܫܳܐ ܘܠܰܥܓܳܐ، ܘ݄ܐܒܥܺܝ ܗ̄ܘܰܘ̱ ܡܶܢܶܗ ܕܡܰܚ݄ܬ ܐܰܥܠܶܗ ܐܺܝܕ̥ܳܐ. 33ܘ݄ܓܪ݄ܫ ܠܶܗ ܡܒܰܝܢ ܗ̄ܰܢ ܢܳܫ̈ܶܐ ܒܶܠܚܽܘܕ̥ܶܗ، ܘܡܰܚܰܬ ܠܶܗ ܨܰܒ̥ܥ̈ܳܬ̥ܶܗ ܒܰܐܕ̥̈ܢܶܗ، ܘܪ݄ܩ ܠܶܗ ܘܓ݄ܫ ܠܶܗ ܒܠܶܫܳܢܶܗ. 34ܘܚ݄ܪ ܠܶܗ ܒܺܗ̄ܝ ܫܡܰܝܳܐ ܘܡܰܐܢ݄ܢ ܠܶܗ، ܘܐܡ݄ܪ ܠܶܗ: ”ܡ݄ܦܬܰܚ!“ 35ܘܒܺܗ̄ܝ ܫܳܥܬ̥ܰܝܕ̥ܰܗ ܦܬܺܝܚܺܝ ܐܰܕ̥̈ܢܳܬ̥ܶܗ، ܘ݄ܫܪܶܐ ܗ̄ܽܘ ܬܶܐܣܺܝܪܳܐ ܕܠܶܫܳܢܶܗ، ܘ݄ܫܓ̥ܺܝܠ ܛܳܒ̥ܳܐ. 36ܘ݄ܡܙܰܗܪܺܝ ܠܶܗ ܕܠ݄ܐ ܐܡّܺܪ̱ܝ ܠܢܳܫܳܐ. ܘܡ݄ܩܰܐ ܕܗܺܝّܶܗ ܡܙܰܗܰܪ ܗ̄ܘܰܐ ܠّܶܗ، ܗ݄ܢّܶܝ ܙ݄ܕ ܟܳܪܙܺܝ ܗ̄ܘܰܘ̱. 37ܘܒܽܗ̄ܘ ܙܳܝܽܘܕܳܐ ܡܺܝܕܰܘܡܪܺܝ ܗ̄ܘܰܘ̱ ܘܟ݄ܐܡّܺܪ̱ܝ: ”ܟܽܘܠ ܡܶܕܶܐ ܛܳܒ̥ܳܐ ܟܣܳܝ݄ܡ! ܟܛܳܪܶܐ ܗ̄ܰܚّܰܪ̈ܫܶܐ ܕܫ݄ܡܥܺܝ، ܘܗܰܢܺܝ ܕܠ݄ܐ ܟܡ݄ܫܓ̥ܳܠܺܝ ܕܡ݄ܫܓ̥ܳܠܺܝ.“

Currently Selected:

ܡܓܰܠܝܘܢ ܕܡܪܩܘܣ 7: ܟܬܒܐ

Highlight

Copy