ܡܓܰܠܝܘܢ ܕܡܪܩܘܣ 16

ܗ̄ܺܝ ܩܝܰܡܬܳܐ ܕ݄ܡܫܺܝܚܳܐ

ܡܬܝ 28‏:1‏‐8؛ ܠܘܩܐ 24‏:1‏‐12؛ ܝܘܚܢܢ 20‏:1‏‐10

1ܘܺܗ̄ܝ ܢܰܩܠܐ ܕܫܰܦ̊ܺܝܥܳܐ ܗ̄ܺܝ ܫܰܒܬ̥ܳܐ، ܡܰܪܝܰܡ ܗ̄ܺܝ ܡܰܓ̥ܕܠܰܝܬܳܐ ܘܡܰܪܝܰܡ (ܗ̄ܺܝ ܐܶܡܳܐ) ܕܝܰܥܩܽܘܒ ܘܫܳܠܽܘܡ ܙܒ̥݄ܢّܶܗ ܒܰܣܡ̈ܶܐ ܠܰܫܰܢ ܕܳܐܬ̥݄ܢ ܡ݄ܫܚܺܝ ܠܶܗ.

2ܘ݄ܒܩܶܕܰܡܬܳܐ ܕܽܗ̄ܘ ܚܽܕ̱ܒ̥ܫܰܒܳܐ ܐܰܬ̥݄ܢ ܠܽܗ̄ܘ ܩܰܒ̥ܪܳܐ ܥܰܡ ܣܠܳܩܶܗ ܕܫܶܡܫܳܐ. 3ܘ݄ܐܡّܺܪ̱ܝ ܗ̄ܘܰܘ̱ ܒܢܰܦܫ̈ܰܝّܶܗ: ”ܡܰܢ ܓ݄ܡܓܰܢܕܰܪ ܠܰܢ ܗ̄ܺܝ ܟܶܐܦܳܐ ܡܽܗ̄ܘ ܬܰܪܥܳܐ ܕܽܗ̄ܘ ܩܰܒ̥ܪܳܐ؟“ 4ܘܚ݄ܪّܶܗ ܘ݄ܚܙܰܠّܶܗ ܕ݄ܡܓܰܢܕܪܳܐ ܗ̄ܺܝ ܟܶܐܦܰܝܳܐ، ܘܪܰܒܬ̥ܳܐ ܗ̄ܘܰܐ ܓ̥ܰܠܰܒܶܐ. 5ܘܥܰܒܺܝܪܺܝ ܠܽܗ̄ܘ ܩܰܒ̥ܪܳܐ، ܘ݄ܚܙܰܠّܶܗ ܥܠܰܝܡܳܐ ܝܰܬܺܝܒ̥ܳܐ ܡܽܗ̄ܘ ܝܰܡܺܝܢܳܐ ܘ݄ܠܒ̥ܺܝܫܳܐ ܩܶܡ݄ܣܬܳܐ ܚܶܘܰܪܬܳܐ، ܘ݄ܡܒܰܠ݄ܗܕܺܝ. 6ܘܗܺܝّܶܗ ܐܡ݄ܪ ܠܰܗ ܠّܶܗ: ”ܠܳܐ ܙܰܝܥܺܝܬܽܘ! ܗܰܬܽܘ ܟ݄ܐܒܥܺܝܬܽܘ ܝܶܫܽܘܥ ܗ̄ܽܘ ܢܳܨܪܳܝܳܐ ܗܰܘܳܐ ܕ݄ܨܠܺܝܒ̥. ܩܰܝ݄ܡ! ܠܰܝ̱ܬ ܝܳܐ ܗܰܪܟܶܐ! ܟܰܐܠܰܗ ܗ̄ܺܝ ܕܽܘܟܬ̥ܳܐ ܐܰܝܟܳܐ ܕܡܰܚܰܬ (ܕ݄ܡܬܰܚܰܬ) ܗ̄ܘܰܐ. 7ܐܶ‌ܠܳܐ ܙܳܟ̥ܽܘ ܐܡܰܪܽܘ ܠܰܬّܰܠܡܺܝܕ̥̈ܰܝܕ̥ܶܗ ܘ݄ܠܟܶܐܦܳܐ: ܟܰܐܠܶܗ ܟܩܳܕܰܡܩ݄ܕ̱ܟ̥ܽܘ ܠܽܗ̄ܘ ܓܠܺܝܠܳܐ، ܘܬܰܡܳܐ ܓܚܳܙܺܝܬܽܘ ܠܶܗ، ܐܟ̥ ܕܐܡ݄ܪ ܠܶܗ ܠܟ̥ܽܘ.“ 8ܘܺܗ̄ܝ ܢܰܩܠܐ ܕܫܰܡܺܝܥܺܝ ܥܰܪܺܝܩܺܝ ܘܢܰܦܺܝܩܺܝ ܡܽܗ̄ܘ ܩܰܒ̥ܪܳܐ، ܨ݄ܕّܰܠّܶܗ ܬܶܗܪܳܐ ܘ݄ܪܥܳܠܳܐ، ܘ݄ܠܢܳܫܳܐ ܡܶܕܶܐ ܠܳܐ ܐܡ݄ܪّܶܗ ܥܰܠ ܕܙܰܝܥܺܝ ܗ̄ܘܰܘ̱.

ܝܶܫܽܘܥ ܟܡ݄ܚܙܶܐ ܒ݄ܬ̥݄ܪ ܡܺܗ̄ܝ ܩܝܰܡܬܰܝܕ̥ܶܗ ܠܡܰܪܝܰܡ ܡܰܓ̥ܕܠܰܝܬܳܐ

ܡܬܝ 28‏:9‏‐10؛ ܝܘܚܢܢ 20‏:11‏‐18

9ܘ݄ܒܩܶܕܰܡܬܳܐ ܕܽܗ̄ܘ ܚܽܕ̱ܒ̥ܫܰܒܳܐ، ܩܰܝ݄ܡ! ܘ݄ܚܙܶܐ ܒܺܗ̄ܝ ܩܰܕ̱ܡܰܝܬܳܐ ܠܡܰܪܝܰܡ ܗ̄ܺܝ ܡܰܓ̥ܕܠܰܝܬܳܐ، ܗܰܝܳܐ ܕܡܰܘܦܰܩ ܠܶܗ ܡܶܢܰܗ ܫܰܒ̥ܥܳܐ ܫܺܐܕ̈ܶܐ. 10ܘܗܺܝّܰܗ ܐܰܙّܰܗ ܡܣܰܒܰܪ ܠܰܗ ܠܰܗ̄ܢ݄ܟ ܕܟ݄ܬ ܗ̄ܘܰܝܢܶܝ ܐܰܥܡܶܗ، ܗܰܢ݄ܟ ܕܒܳܟ̥݄ܢ ܗ̄ܘܰܘ̱ ܘܠܶܒܰܝّܶܗ ܬܒ̥ܺܝܪܳܝܳܐ. 11ܘܗ݄ܢّܶܝ ܗ̄ܺܝ ܢܰܩܠܐ ܕܫܰܡܺܝܥܺܝ (ܡܰܗ̄ܢ ܢܶܫ̈ܶܐ) ܕܟ݄ܐܡّܺܪ̱ܝ: ܚܰܝܳܐ ܝܳܐ، ܘ݄ܚܙܶܐ ܐܰ‌ܠّܶܗ، ܠܳܐ ܡܗܰܝܡܢ݄ܢّܶܗ.

ܝܶܫܽܘܥ ܟܡ݄ܚܙܶܐ ܒ݄ܬ̥݄ܪ ܡܺܗ̄ܝ ܩܝܰܡܬܰܝܕ̥ܶܗ ܠܰܬܪܶܝ ܡܣܰܒܪ̈ܳܢܶܐ

12ܘܒ݄ܬ̥݄ܪ ܡܰܗ̄ܢܺܝ، ܚܙܶܐ ܠ݄ܬܪܶܝ ܡ݄ܢّܶܗ ܒܨܽܘܪܬܳܐ ܚܪܶܬܳܐ، ܘܗ݄ܢّܶܝ ܡܗܰܠܟ̥ܳܢ̈ܶܐ ܘܰܐܙ̈ܳܠܶܐ ܠ݄ܩܪܺܝܬ̥ܳܐ. 13ܘܗܰܢ݄ܟ ܐܰܙّ݄ܢ ܐܡ݄ܪّܶܗ ܠ݄ܚܪ̈ܶܢܶܐ، ܘܠܰܬܪܰܢ݄ܟ ܣܬܶܝ ܠܳܐ ܡܗܰܝܡܰܢّܶܗ.

ܝܶܫܽܘܥ ܟܡ݄ܚܙܶܐ ܒ݄ܬ̥݄ܪ ܡܺܗ̄ܝ ܩܝܰܡܬܰܝܕ̥ܶܗ ܠܰܚܕ̥ܰܥܣܰܪ ܬܰܠܡܺܝܕ̥̈ܶܐ ܘܟ݄ܡܫܰܕܰܪّܶܗ ܠܽܗ̄ܘ ܥܳܠܡܳܐ

14ܘܒܺܗ̄ܝ ܚܰܪܰܝܬܳܐ ܚܙܶܐ ܠܰܚܕ̥ܰܥܣܰܪ ܘܗ݄ܢّܶܝ ܝܰܬܺܝܒ̥̈ܶܐ، ܘ݄ܡܢܰܟܦܺܝ ܠܶܗ ܥܰܠ ܗ̄ܺܝ ܗܰܝܡܳܢܽܘܬ̥ܰܬّ̥ܶܗ ܗ̄ܺܝ ܢܳܩܽܘܨܬܳܐ، ܘܥܰܠ ܗ̄ܺܝ ܩܰܫܝܽܘܬ̥ܳܐ ܕܠܶܒܰܝّܶܗ ܕܠܳܐ ܡܗܰܝܡܰܢّܶܗ ܠܰܗ̄ܢ݄ܟ ܕ݄ܚܙܰܠّܶܗ ܕܩܰܝ݄ܡ. 15ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܠܽܗ̄ܘ ܥܳܠܡܳܐ ܟܽܘܠܶܗ، ܘ݄ܟܪܰܙܽܘ ܗ̄ܺܝ ܣܒܰܪܬ̥ܰܝܕ̥ܺܝ ܒܟܽܘܠܰܗ ܒܪܺܝܬ̥ܳܐ. 16ܐܰܝܢܰܐ ܕ݄ܡܗܰܝܡ݄ܢ ܘܥܳܡ݄ܕ̥ ܟܚܳܝܶܐ، ܘܰܐܝܢܰܐ ܕܠܳܐ ܡܗܰܝܡ݄ܢ ܓܡܺܝܕ݄ܢ. 17ܐܰܝܢܰܐ ܕ݄ܡܗܰܝܡܢܺܝ، ܐܳܬ̥ܘ̈ܳܬ̥ܳܐ ܓܕܳܗ̄ܘܶܐ ܐܰܥܡܰܝّܶܗ: ܒ݄ܐܫܡܺܝ ܫܺܐܕ̈ܶܐ ܓܡܰܘܦܩܺܝ، ܘ݄ܒܠܶܫܳܢ̈ܶܐ ܚܰܕ̱̈ܬ̥ܶܐ ܓܡ݄ܫܓ̥ܳܠܺܝ، 18ܘܟܽܘܪ̈ܦܶܐ ܓܛܳܥܢܺܝ {ܒܺܐܝܕ̥̈ܳܬ̥ܰܝّܶܗ}، ܘܶܐܢ ܣܰܡܳܐ ܕܽܗ̄ܘ ܡܰܘܬܳܐ ܫܳܬ݄ܢ ܠܳܐ ܟܡܰܟܽܒّ̥ܶܗ، ܘܺܐܝܕ̥̈ܳܬ̥ܰܝّܶܗ ܓܡܰܚܬܺܝ ܥܰܠ ܗ̄ܰܟّܰܐܺܝܒ̥̈ܶܐ ܘ݄ܓܢܳܝܰܚّܶܗ.“

ܗ̄ܽܘ ܣܽܘܠܳܩܳܐ ܕܝܶܫܽܘܥ ܠܺܗ̄ܝ ܫܡܰܝܳܐ

19ܘܡܳܪܰܢ ܝܶܫܽܘܥ ܒ݄ܬ̥݄ܪ ܕ݄ܫܓ̥ܺܝܠ ܐܰܥܡܰܝّܶܗ، ܣܰܠ݄ܩ ܠܺܗ̄ܝ ܫܡܰܝܳܐ، ܘܝܰܬܽܒ̥ ܡܽܗ̄ܘ ܝܰܡܺܝܢܳܐ ܕܰܐ‌ܠܳܗܳܐ. 20ܘܗ݄ܢّܶܝ ܢܰܦܺܝܩܺܝ ܘ݄ܟܪ݄ܙّܶܗ ܒܟܽܘܠ ܕܽܘܟܬ̥ܳܐ، ܘܡܳܪܰܢ ܡܥܰܕܰܪ ܗ̄ܘܰܐ ܠّܶܗ، ܘܡܰܫ݄ܪ ܗ̄ܘܰܐ ܗ̄ܽܘ ܡܰܐܡܪܰܬّ̥ܶܗ ܒܰܬّܶܕ݄ܡܪ̈ܳܬ̥ܳܐ ܕܣܰܝܡܺܝ ܗ̄ܘܰܘ̱.

Currently Selected:

ܡܓܰܠܝܘܢ ܕܡܪܩܘܣ 16: ܟܬܒܐ

Highlight

Copy