ܡܓܰܠܝܘܢ ܕܠܘܩܐ 3

ܗ̄ܽܘ ܛܽܘܝܳܒܳܐ ܠܺܗ̄ܝ ܡܕܰܒܪܳܢܽܘܬ̥ܳܐ ܕܝܶܫܽܘܥ

ܗ̄ܺܝ ܩܪܰܝܬܳܐ ܕܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ

ܡܬܝ 3‏:1‏‐12؛ ܡܪܩܘܣ 1‏:1‏‐8؛ ܝܘܚܢܢ 1‏:19‏‐28

1ܒܺܗ̄ܝ ܫܰܢ̱ܬܳܐ ܕܰܚّܰܡܫܰܥܣܰܪ ܕܺܗ̄ܝ ܡܰܡܠܰܟ̥ܬܳܐ ܕܛܺܝܒܶܪܺܝܳܘܣ ܩܶܣܰܪ، ܘܒܽܗ̄ܘ ܫܽܘܠܛܳܢܳܐ ܕܦܳ̊ܢܛܺܝܳܘܣ ܦܺ̊ܝܠܰܛܳܘܣ ܒܺܝܗܽܘܕ̥، ܘܺܗ̄ܝ ܢܰܩܠܐ ܕܟ݄ܬ ܗ̄ܘܰܐ ܗܶܪܳܘܕ̥ܶܣ ܪܺܝܫܳܐ ܕܪܽܘܒ̥ܥܳܐ ܒ݄ܓܠܺܝܠܳܐ، ܘܦܺܝܠܺܝܦܳܘܣ، ܗ̄ܽܘ ܐܰܚܽܘܢܳܐ ܪܺܝܫܳܐ ܕܪܽܘܒ̥ܥܳܐ ܒܺܐܝܛܽܘܪܺܝܰܐ ܘܒܽܗ̄ܘ ܐܰܬ̥ܪܳܐ ܕ݄ܛܪܰܟ̥ܳܘܢܳܐ، ܘܠܽܘܣܰܢܺܝܰܐ ܪܺܝܫܳܐ ܕܪܽܘܒ̥ܥܳܐ ܕܰܐܒܺܝܠܺܝܢܺܝ، 2ܘܒܽܗ̄ܘ ܙܰܒܢܳܐ ܕܟ݄ܬ ܗ̄ܘܰܐ ܚܰܢܳܢ ܘܩܰܝܳܦܳܐ ܪ̈ܰܒܶܐ ܕܰܟّܳܗ̈ܢܶܐ، ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܗܰܘܝܳܐ ܥܰܠ ܝܽܘܚܰܢܳܢ، ܗ̄ܽܘ ܐܰܒܪܳܐ ܕ݄ܙܟ̥ܰܪܝܳܐ، ܘܗܺܝّܶܗ ܒܽܗ̄ܘ ܡܰܕ̥ܒܪܳܐ. 3ܘܰܐܬ̥ܺܝ ܠܽܗ̄ܘ ܐܰܬ̥ܪܳܐ ܟܽܘܠܶܗ ܕܚܶܕ̥ܳܪ ܕܽܗ̄ܘ ܢܰܗܪܳܐ ܕܝܽܘܪܕܢܳܢ، ܘܗܺܝّܶܗ ܟܟܳܪ݄ܙ ܗ̄ܺܝ ܡܰܥܡܽܘܕ̥ܺܝܬ̥ܳܐ ܕܺܗ̄ܝ ܬܝܳܒܽܘܬ̥ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ، 4ܐܟ̥ ܕ݄ܟܬ̥ܺܝܒ̥ ܒܽܗ̄ܘ ܟܬ̥ܳܒ̥ܳܐ ܕܶܐܫܰܥܝܳܐ ܗ̄ܽܘ ܢܒܺܝܳܐ ܕܐܡ݄ܪ ܠܶܗ: ”ܩܳܠܳܐ ܕܩܳܪܶܐ ܒܽܗ̄ܘ ܡܰܕ̥ܒܪܳܐ، ܡܛܰܝܶܒܽܘ ܗ̄ܽܘ ܕܰܪܒܳܐ ܕܡܳܪܝܳܐ، ܘ݄ܡܬܰܪܶܨܽܘ ܒܺܗ̄ܝ ܐܰܪܥܳܐ ܫܒ̥ܺܝ̈ܠܶܐ ܠܰܐ‌ܠܳܗܰܝܕ̥ܰܢ. 5ܟܽܘܠّܶܗ ܗ̄ܰܫّܰܠܒ̥̈ܶܐ ܓܡ݄ܡܠ݄ܢ، ܘܰܛّܽܘܪ̈ܶܐ ܘܰܛّܽܘܪ̈ܳܢܶܐ ܓܢ݄ܚܬܺܝ، ܘܽܗ̄ܘ ܕܰܪܒܳܐ ܥܰܣܩܳܐ ܓܡ݄ܦܬ݄ܚ، ܘܺܗ̄ܝ ܕܽܘܟܬ̥ܳܐ ܥܰܣ݄ܩܬܳܐ ܓܡܺܝܣܰܘܝܳܐ. 6ܘܟܽܘܠ ܢܳܫܳܐ ܓ݄ܕܚܳܙܶܐ ܗ̄ܰܚّܰܝ̈ܶܐ (ܗ̄ܽܘ ܦܽܘܪܩܳܢܳܐ) ܕܰܐ‌ܠܳܗܳܐ.“

7ܘܳܐܡܰܪ ܗ̄ܘܰܐ ܠܰܗ̄ܢ ܢܳܫ̈ܰܢ݄ܟ ܕܳܐܬ̥݄ܢ ܗ̄ܘܰܘ̱ ܠܓܰܒܶܗ ܕܥܳܡܕܺܝ: ”ܐܰܒܢ̈ܶܐ ܕܰܟّܽܘܪ̈ܦܶܐ، ܡܰܢ ܡܰܚܘܶܐ ܠܶܗ ܠܟ̥ܽܘ ܕܥܳܪܩܺܝܬܽܘ ܡܽܗ̄ܘ ܪܽܘܓ̥ܙܳܐ ܕܳܐܬ̥ܶܐ؟ 8ܗܶܕܺܝ ܣܽܘܡܽܘ ܦܺܐܪ̈ܶܐ ܕܫܳܘ݄ܢ ܠܺܗ̄ܝ ܬܝܳܒܽܘܬ̥ܳܐ، ܘܠܳܐ ܡܫܰܪܺܝܬܽܘ ܐ݄ܡّܺܪ̱ܝܬܽܘ ܒܢܰܦܫ̈ܰܝܟ̥ܽܘ ܕܟ݄ܬ ܠܰܢ ܒܰܒܳܐ، ܐܰܒܪܳܗܳܡ. ܟܰܐܠܺܝ ܟܳܐܡܰܪ ܐ̱ܢܳܐ ܠܟ̥ܽܘ، ܐܰ‌ܠܳܗܳܐ ܟܺܝܒܶܗ ܡܰܩ݄ܡ ܡܰܢ̱ ܟّܶܐܦ̈ܰܢܺܝ ܐܰܒܢ̈ܶܐ ܠܰܐܒܪܳܗܳܡ. 9ܟܰܐܠܶܗ ܗ̄ܽܘ ܢܰܪܓܳܐ ܡܰܚܬܳܐ ܝܳܐ ܥܰܠ ܗ̄ܽܘ ܩܽܘܪܡܳܐ ܕܰܗ̄ܢ ܐܺܝܠܳܢ̈ܶܐ، ܟܽܘܠ ܐܺܝܠܳܢܳܐ ܕܦܺܐܪ̈ܶܐ ܛܳܒ̥̈ܶܐ ܠܳܐ ܣܳܝ݄ܡ، ܟܡ݄ܩܛ݄ܥ ܘܒܺܗ̄ܝ ܢܽܘܪܳܐ ܟܢܳܦ݄ܠ.“ 10ܘܰܗ̄ܢ ܢܳܫ̈ܶܐ ܡܫܰܐܺܠܺܝ ܗ̄ܘܰܝ ܠܶܗ ܘ݄ܐܡّܺܪ̱ܝ ܗ̄ܘܰܘ̱: ”ܡ݄ܢ ܣܰܝܡܺܝܢܰܐ؟“ 11ܡܰܕܥܰܪ ܠܶܗ ܘܐܡ݄ܪ ܠܰܗ ܠّܶܗ: ”ܡܰܢ ܕܟ݄ܬ ܠܶܗ ܬܪܶܝ ܠܒܽܘܫ̈ܶܐ ܛܪܳܐ ܗ̄ܳܒܶܐ ܠܰܗ̄ܘܳܐ ܕܠܰܝ̱ܬ ܠܶܗ، ܘܡܰܢ ܕܟ݄ܬ ܠܶܗ ܡܽܐܘܟܠܳܐ، ܛܪܳܐ ܗܰܘܟ̥ܰܐ ܣܳܝ݄ܡ.“ 12ܘܰܐܬ̥݄ܢ ܗ̄ܰܡّܳܟ̥ܣ̈ܶܐ ܕܥܳܡܕܺܝ، ܘܐܡ݄ܪّܰܗ ܠܶܗ: ”ܡܰܠܦܳܢܳܐ، ܡ݄ܢ ܣܰܝܡܺܝܢܰܐ؟“ 13ܘܗܺܝّܶܗ ܐܡ݄ܪ ܠܰܗ ܠّܶܗ: ”ܠܳܐ ܛܳܠܒܺܝܬܽܘ ܘܡܰܝܕܺܝܬܽܘ ܙ݄ܕ ܡܽܗ̄ܘ ܡܶܕܶܐ ܕܐܡܺܝܪ ܐܰ‌ܠܟ̥ܽܘ ܕܡܰܝܕܺܝܬܽܘ.“ 14ܘ݄ܡܫܰܐܺܠܺܝ ܗ̄ܘܰܝ ܠܶܗ ܗ̄ܰܕّܰܚܫ̈ܶܐ ܘ݄ܐܡّܺܪ̱ܝ ܗ̄ܘܰܘ̱: ”ܘܰܐܚܢܰܐ ܣܬܶܝ ܡ݄ܢ ܣܰܝܡܺܝܢܰܐ؟“ ܐܡ݄ܪ ܠܰܗ ܠّܶܗ: ”ܠܳܐ ܡܰܙܺܝܥܺܝܬܽܘ ܗ̄ܰܢ ܢܳܫ̈ܶܐ ܘܠܳܐ ܛ݄ܠܡܺܝܬܽܘܢّܶܗ، ܘܡܰܟܦܰܠܟ̥ܽܘ ܗ̄ܽܘ ܐܰܓ̥ܪܳܐ ܕ݄ܟܡܰܝܕܺܝܬܽܘ.“ 15ܘܺܗ̄ܝ ܢܰܩܠܐ ܕܽܗ̄ܘ ܥܰܡܳܐ ܪܳܢܶܐ ܗ̄ܘܰܐ ܥܰܠ ܝܽܘܚܰܢܳܢ، ܘܚܳܫܒ̥ܺܝ ܗ̄ܘܰܘ̱ ܒܠܶܒܰܝّܶܗ ܕܟܺܝܬ ܕܳܗ̄ܘܶܐ ܗܺܝّܶܗ ܡܫܺܝܚܳܐ. 16ܡܰܕܥܰܪ ܠܶܗ ܝܽܘܚܰܢܳܢ ܘܐܡ݄ܪ ܠܰܗ ܠّܶܗ: ”ܟܰܐܠܺܝ ܐܳܢܳܐ ܟܡܰܥܡܰܕ̥ ܐ̱ܢܳܐ ܠܟ̥ܽܘ ܒܰܡّܰܝ̈ܶܐ، ܐܶ‌ܠܳܐ ܓܕܳܐܬ̥ܶܐ ܗܰܘܳܐ ܕܟ݄ܬ ܝܳܐ ܙ݄ܕ ܒܚܰܝܠܳܐ ܡܶܢܺܝ، ܗܰܘܳܐ ܕܳܐܢܳܐ ܠ݄ܐ ܟܫܳܘܶܐ ܐ̱ܢܳܐ ܕܫܳܪܶܐ ܐ̱ܢܳܐ ܗ̄ܰܫّܽܘܒܰܩ̈ܶܐ ܕܰܣܥܽܘ̈ܢܰܝܕ̥ܶܗ، ܗܺܝّܶܗ ܓܡܰܥܡܰܕ̥ܟ̥ܽܘ ܒܪܽܘܚܳܐ ܕܩܽܘܕܫܳܐ ܘܒܺܗ̄ܝ ܢܽܘܪܳܐ. 17ܗܰܘܳܐ ܕܙܳܒ݄ܛ ܗ̄ܽܘ ܪܰܘܫܳܐ ܒܺܐܝܕ̥ܶܗ، ܘ݄ܡܕܰܪܶܐ ܗ̄ܺܝ ܐܰܕܪܰܝܕ̥ܶܗ، ܘܡܰܠܬ݄ܡ ܗ̄ܰܚّܶܛ̈ܶܐ ܠܰܟّܳܪ̈ܰܝܕ̥ܶܗ، ܘܡܰܘܩ݄ܕ̥ ܗ̄ܽܘ ܬܰܒ̥ܢܳܐ ܒܺܗ̄ܝ ܢܽܘܪܳܐ ܕܠ݄ܐ ܟܛ݄ܦܝܳܐ.“ 18ܘܓ̥ܰܠܰܒܶܐ ܡܶܕ̈ܳܢܶܐ ܚܪ̈ܶܢܶܐ ܡܰܘܠܰܦ ܗ̄ܘܰܐ ܘ݄ܡܣܰܒܰܪ ܗ̄ܘܰܐ ܗ̄ܽܘ ܥܰܡܳܐ. 19ܘܗܶܪܳܘܕ̥ܶܣ، ܪܺܝܫܳܐ ܕܽܗ̄ܘ ܪܽܘܒ̥ܥܳܐ، ܥܰܠ ܕܝܽܘܚܰܢܳܢ ܡܺܝܢܰܟܰܦ ܗ̄ܘܰܝܠܶܗ ܥܰܠ ܗܶܪܳܘܕܺܝܰܐ ܗ̄ܺܝ ܐܰܢ̱ܬ̥ܬܳܐ ܕܽܗ̄ܘ ܐܰܚܽܘܢܳܐ ܦܺܝܠܺܝܦܳܘܣ، ܘܥܰܠ ܟܽܘܠ ܡܶܕܶܐ ܒܺܝܫܳܐ ܕܣܳܝܰܡ ܗ̄ܘܰܐ، 20ܡܰܙ݄ܕ ܠܶܗ ܗܰܬ̥ܶܐ ܣܬܶܝ ܥܰܠ ܗܰܢܺܝ ܟܽܘܠّܶܗ، ܘ݄ܚܒ݄ܫ ܠܶܗ ܝܽܘܚܰܢܳܢ ܒܽܗ̄ܘ ܚܒܽܘܫܝܳܐ.

ܗ̄ܽܘ ܥܡܳܕ̥ܳܐ ܕ݄ܡܫܺܝܚܳܐ

ܡܬܝ 3‏:13‏‐17؛ ܡܪܩܘܣ 1‏:9‏‐11

21ܘܗܰܘܺܝ، ܗ̄ܺܝ ܢܰܩܠܐ ܕܥܰܡ݄ܕ̥ ܗ̄ܽܘ ܥܰܡܳܐ ܟܽܘܠܶܗ، ܝܶܫܽܘܥ ܣܬܶܝ ܥܰܡ݄ܕ̥. ܘܗܺܝّܶܗ ܟ݄ܡܨܰܠܶܐ ܦܬܺܝܚܺܝ ܗ̄ܰܫܡܰܝ̈ܶܐ، 22ܘܪܽܘܚܳܐ ܕܩܽܘܕܫܳܐ ܢܰܚܺܝܬܳܐ ܐܰܥܠܶܗ ܒܺܗ̄ܝ ܨܽܘܪܬܳܐ ܕܓܽܘܫܡܳܐ ܕܝܰܘܢܳܐ، ܘܩܳܠܳܐ ܗܰܘܺܝ ܡܺܗ̄ܝ ܫܡܰܝܳܐ ܕܟܳܐܡ݄ܪ: ”ܗܰܬ ܗ̄ܰܬ ܗ̄ܽܘ ܐܰܒܪܰܝܕ̥ܺܝ ܗ̄ܽܘ ܚܰܒܺܝܒܳܐ ܕܶܐܒܳܟ̥ ܦܨ݄ܚ ܐ̱ܢܳܐ.“

ܗ̄ܰܒّܰܒ̈ܶܐ ܕ݄ܡܫܺܝܚܳܐ

ܡܬܝ 1‏:1‏‐17

23ܘܗܺܝّܶܗ ܝܶܫܽܘܥ ܟ݄ܬ ܗ̄ܘܰܐ ܐܰܒܪܳܐ ܕ݄ܬܠܶܬ̥ܺܝ ܐ݄ܫܢ̈ܶܐ، ܘܡܺܝܕ̥ܰܥ ܗ̄ܘܰܐ ܗ̄ܽܘ ܐܰܒܪܳܐ ܕܝܰܘܣܶܦ، ܗ̄ܽܘ ܐܰܒܪܳܐ ܕܗܶܠܺܝ، 24ܗ̄ܽܘ ܐܰܒܪܳܐ ܕܡܰܛܬ̥ܰܬ̥، ܗ̄ܽܘ ܐܰܒܪܳܐ ܕܠܶܘܺܝ، ܗ̄ܽܘ ܐܰܒܪܳܐ ܕܡܶܠܟܺܝ، ܗ̄ܽܘ ܐܰܒܪܳܐ ܕܝܰܐܢܺܝ، ܗ̄ܽܘ ܐܰܒܪܳܐ ܕܝܰܘܣܶܦ، 25ܗ̄ܽܘ ܐܰܒܪܳܐ ܕܡܰܬܬ̥ܰܐ، ܗ̄ܽܘ ܐܰܒܪܳܐ ܕܥܰܡܽܘܨ، ܗ̄ܽܘ ܐܰܒܪܳܐ ܕܢܳܚܽܘܡ، ܗ̄ܽܘ ܐܰܒܪܳܐ ܕܚܶܣܠܺܝ، ܗ̄ܽܘ ܐܰܒܪܳܐ ܕܢܰܓܺܝ، 26ܗ̄ܽܘ ܐܰܒܪܳܐ ܕܡܳܐܰܬ̥، ܗ̄ܽܘ ܐܰܒܪܳܐ ܕܡܰܛܰܬ̥، ܗ̄ܽܘ ܐܰܒܪܳܐ ܕܫܰܡܥܺܝ، ܗ̄ܽܘ ܐܰܒܪܳܐ ܕܝܰܘܣܶܦ، ܗ̄ܽܘ ܐܰܒܪܳܐ ܕܺܝܗܽܘܕ̥ܳܐ، 27ܗ̄ܽܘ ܐܰܒܪܳܐ ܕܝܽܘܚܰܢܳܢ، ܗ̄ܽܘ ܐܰܒܪܳܐ ܕܪܳܣܳܐ، ܗ̄ܽܘ ܐܰܒܪܳܐ ܕܙܽܘܪܒܳܒܶܠ، ܗ̄ܽܘ ܐܰܒܪܳܐ ܕܫܶܠܰܬ̥ܐܶܝܠ، ܗ̄ܽܘ ܐܰܒܪܳܐ ܕܢܺܪܺܝ، 28ܗ̄ܽܘ ܐܰܒܪܳܐ ܕܡܶܠܟܺܝ، ܗ̄ܽܘ ܐܰܒܪܳܐ ܕܰܐܕܺܝ، ܗ̄ܽܘ ܐܰܒܪܳܐ ܕܩܽܘܣܰܡ، ܗ̄ܽܘ ܐܰܒܪܳܐ ܕܶܐ‌ܠܡܽܘܕ̥ܳܕ̥، ܗ̄ܽܘ ܐܰܒܪܳܐ ܕܥܺܝܪ، 29ܗ̄ܽܘ ܐܰܒܪܳܐ ܕܝܽܘܣܺܝ، ܗ̄ܽܘ ܐܰܒܪܳܐ ܕܶܐ‌ܠܺܝܥܳܙܳܪ، ܗ̄ܽܘ ܐܰܒܪܳܐ ܕܝܽܘܪܰܡ، ܗ̄ܽܘ ܐܰܒܪܳܐ ܕܡܰܬ̥ܺܝܬ̥ܳܐ، ܗ̄ܽܘ ܐܰܒܪܳܐ ܕܠܶܘܺܝ، 30ܗ̄ܽܘ ܐܰܒܪܳܐ ܕܫܶܡܥܽܘܢ، ܗ̄ܽܘ ܐܰܒܪܳܐ ܕܺܝܗܽܘܕ̥ܳܐ، ܗ̄ܽܘ ܐܰܒܪܳܐ ܕܝܰܘܣܶܦ، ܗ̄ܽܘ ܐܰܒܪܳܐ ܕܝܽܘܢܳܡ، ܗ̄ܽܘ ܐܰܒܪܳܐ ܕܶܐ‌ܠܺܝܰܩܺܝܡ، 31ܗ̄ܽܘ ܐܰܒܪܳܐ ܕܡܰܠܝܳܐ، ܗ̄ܽܘ ܐܰܒܪܳܐ ܕܡܰܐܢܺܝ، ܗ̄ܽܘ ܐܰܒܪܳܐ ܕܡܰܛܬ̥ܳܐ، ܗ̄ܽܘ ܐܰܒܪܳܐ ܕܢܳܬ̥ܳܢ، ܗ̄ܽܘ ܐܰܒܪܳܐ ܕܕܰܘܺܝܕ̥، 32ܗ̄ܽܘ ܐܰܒܪܳܐ ܕܺܐܝܫܰܝ، ܗ̄ܽܘ ܐܰܒܪܳܐ ܕܥܽܘܒܺܝܕ، ܗ̄ܽܘ ܐܰܒܪܳܐ ܕܒܳܥܳܙ، ܗ̄ܽܘ ܐܰܒܪܳܐ ܕܣܰܠܡܳܘܢ، ܗ̄ܽܘ ܐܰܒܪܳܐ ܕܢܰܚܫܽܘܢ، 33ܗ̄ܽܘ ܐܰܒܪܳܐ ܕܥܰܡܺܝܢܳܕܳܒ، ܗ̄ܽܘ ܐܰܒܪܳܐ ܕܳܐܪܳܡ، ܗ̄ܽܘ ܐܰܒܪܳܐ ܕܚܶܨܪܽܘܢ، ܗ̄ܽܘ ܐܰܒܪܳܐ ܕܦܰܪܨ، ܗ̄ܽܘ ܐܰܒܪܳܐ ܕܺܝܗܽܘܕ̥ܳܐ، 34ܗ̄ܽܘ ܐܰܒܪܳܐ ܕܝܰܥܩܽܘܒ، ܗ̄ܽܘ ܐܰܒܪܳܐ ܕܺܐܝܣܚܳܩ، ܗ̄ܽܘ ܐܰܒܪܳܐ ܕܰܐܒܪܳܗܳܡ، ܗ̄ܽܘ ܐܰܒܪܳܐ ܕܬܰܪܰܚ، ܗ̄ܽܘ ܐܰܒܪܳܐ ܕܢܳܚܽܘܪ، 35ܗ̄ܽܘ ܐܰܒܪܳܐ ܕܣܳܪܽܘܓ̥، ܗ̄ܽܘ ܐܰܒܪܳܐ ܕܰܐܪܥܽܘ، ܗ̄ܽܘ ܐܰܒܪܳܐ ܕܦܳܠܳܓ̥، ܗ̄ܽܘ ܐܰܒܪܳܐ ܕܥܳܒܳܪ، ܗ̄ܽܘ ܐܰܒܪܳܐ ܕܫܳܠܳܚ، 36ܗ̄ܽܘ ܐܰܒܪܳܐ ܕܩܰܝܢܰܢ، ܗ̄ܽܘ ܐܰܒܪܳܐ ܕܰܐܪܦܰܟ̥ܫܳܪ، ܗ̄ܽܘ ܐܰܒܪܳܐ ܕܫܺܝܡ، ܗ̄ܽܘ ܐܰܒܪܳܐ ܕܢܽܘܚ، ܗ̄ܽܘ ܐܰܒܪܳܐ ܕܠܰܡܶܟ، 37ܗ̄ܽܘ ܐܰܒܪܳܐ ܕܡܰܬ̥ܽܘܫܠܰܚ، ܗ̄ܽܘ ܐܰܒܪܳܐ ܕ݄ܚܢܽܘܟ̥، ܗ̄ܽܘ ܐܰܒܪܳܐ ܕܝܰܪܕ، ܗ̄ܽܘ ܐܰܒܪܳܐ ܕܡܰܗܠܳܠܳܐܶܝܠ، ܗ̄ܽܘ ܐܰܒܪܳܐ ܕܩܰܝܢܰܢ، 38ܗ̄ܽܘ ܐܰܒܪܳܐ ܕܰܐܢܽܘܫ، ܗ̄ܽܘ ܐܰܒܪܳܐ ܕܫܺܝܬ̥، ܗ̄ܽܘ ܐܰܒܪܳܐ ܕܳܐܕܳܡ ܕܡܶܢ̱ ܐܰ‌ܠܳܗܳܐ.

Currently Selected:

ܡܓܰܠܝܘܢ ܕܠܘܩܐ 3: ܟܬܒܐ

Highlight

Copy