ܡܓܰܠܝܘܢ ܕܠܘܩܐ 4

ܗ̄ܰܢ ܢܶܣܝܽܘ̈ܢܶܐ ܕܝܶܫܽܘܥ

ܡܬܝ 4‏:1‏‐11؛ ܡܪܩܘܣ 1‏:21‏‐31

1ܘܝܶܫܽܘܥ، ܡܰܠܝܳܐ ܪܽܘܚܳܐ ܕܩܽܘܕܫܳܐ، ܕܰܥ݄ܪ ܡܶܢ̱ ܝܽܘܪܕܢܳܢ. ܘܺܗ̄ܝ ܪܽܘܚܳܐ ܡܰܘܒ݄ܠ ܠܰܗ ܠܽܗ̄ܘ ܡܰܕ̥ܒܪܳܐ 2ܐܰܪܒܥܺܝ ܝܰܘܡ̈ܶܐ ܕܡܺܝܢܰܣܶܐ ܡܽܗ̄ܘ ܣܳܛܳܢܳܐ. ܘܠܰܐ ܐܟ̥ܺܝܠ ܠܶܗ ܡܶܕܶܐ ܒܰܝّܰܘܡ̈ܳܬ̥ܰܢ݄ܟ. ܘܺܗ̄ܝ ܢܰܩܠܐ ܕ݄ܡܟܰܡܠܺܝ ܠܶܗ، ܟܰܦ݄ܢ ܒܺܗ̄ܝ ܚܰܪܰܝܬܳܐ. 3ܘܽܗ̄ܘ ܣܳܛܳܢܳܐ ܐܡ݄ܪ ܠܶܗ ܠܶܗ: ”ܐܶܢ ܗ̄ܽܘ ܐܰܒܪܳܐ ܕܰܐ‌ܠܳܗܳܐ ܗܰܬ، ܐܰܡܰܪ ܠܺܗ̄ܝ ܟܶܐܦܰܬ̥ܶܐ ܕܳܗ̄ܘܝܳܐ ܠܰܚܡܳܐ.“ 4ܝܶܫܽܘܥ ܡܰܕܥܰܪ ܠܶܗ ܘܐܡ݄ܪ ܠܶܗ ܠܶܗ: ”ܟܬ̥ܺܝܒ̥ܳܐ ܝܳܐ، ܠܳܐ ܒܽܗ̄ܘ ܠܰܚܡܳܐ ܠܚܽܘܕ̥ܶܗ ܟܚܳܝܶܐ ܗ̄ܽܘ ܢܳܫܳܐ، ܐܶ‌ܠܳܐ ܒܟܽܘܠ ܡܰܐܡܪܳܐ ܕܰܐ‌ܠܳܗܳܐ.“

5ܘܽܗ̄ܘ ܣܳܛܳܢܳܐ ܡܰܣܠܰܩ ܠܶܗ ܠܛܽܘܪܳܐ ܥܶܠܳܝܳܐ، ܘܡܰܚܘܶܐ ܠܶܗ ܠܶܗ ܗ̄ܰܡّܰܡ݄ܠܟ̈ܳܬ̥ܳܐ ܕܺܗ̄ܝ ܐܰܪܥܳܐ ܟܽܘܠّܶܗ ܒܙܰܒܢܳܐ ܟܰܪܝܳܐ. 6ܘܐܡ݄ܪ ܠܶܗ ܠܶܗ ܗ̄ܽܘ ܣܳܛܳܢܳܐ: ”ܐܶ‌ܠܳܟ̥ ܓܕܳܗ̄ܒܶܐ ܐ̱ܢܳܐ ܗ̄ܽܘ ܫܽܘܠܛܳܢܰܢܳܐ ܟܽܘܠܶܗ ܘܽܗ̄ܘ ܫܽܘܒܚܰܝܕ̥ܶܗ، ܡܺܐܝܕ̥ܶܗ ܕܶܐ‌ܠܺܝ ܗܺܝܒ̥، ܘ݄ܠܡܰܢ ܕܳܐܒܰܥ ܐ̱ܢܳܐ ܓܕܳܗ̄ܒܶܐ ܐ̱ܢܳܐ ܠܶܗ. 7ܗܶܕܺܝ ܐܶܢ ܕܣܳܓ̥ܕܰܬ ܩܽܘܕ̱ܡܺܝ، ܐܶ‌ܠܳܟ̥ ܓܕܳܗ̄ܘܶܐ ܟܽܘܠܶܗ.“ 8ܝܶܫܽܘܥ ܡܰܕܥܰܪ ܠܶܗ ܘܐܡ݄ܪ ܠܶܗ ܠܶܗ: ”ܟܬ̥ܺܝܒ̥ܳܐ ܝܳܐ ܠܡܳܪܝܳܐ ܐܰ‌ܠܳܗܰܝܕ̥ܳܟ̥̥ ܓܣܳܓ̥ܕܰܬ ܘܶܐ‌ܠܶܗ ܠܚܽܘܕ̥ܶܗ ܓܥ݄ܒܕܰܬ.“

9ܘܡܰܝܬܶܐ ܠܶܗ ܠܽܐܘܪܶܫܠܶܡ، ܘܡܰܩ݄ܡ ܠܶܗ ܥܰܠ ܗ̄ܽܘ ܟܶܢܦܳܐ ܕܽܗ̄ܘ ܗܰܝܟܠܳܐ، ܘܐܡ݄ܪ ܠܶܗ ܠܶܗ: ”ܐܶܢ ܗ̄ܽܘ ܐܰܒܪܳܐ ܕܰܐ‌ܠܳܗܳܐ ܗܰܬ، ܡܚܰܠ݄ܩ ܪܽܘܚܳܟ̥ ܡܰܗ̄ܪܟܶܐ ܠܰܠܬܰܚ، 10ܥܰܠ ܕ݄ܟܬ̥ܺܝܒ̥: ܓܕܳܗ̄ܒܶܐ ܦܽܘܩܕܳܢܳܐ ܠܰܡّܰܠܰܐܟ̥̈ܰܝܕ̥ܶܗ ܠܰܫܰܢܳܟ̥ ܕܢܳܛܪܺܝ ܠܳܟ̥، 11ܘܥܰܠ ܕܪ̈ܳܥܰܝّܶܗ ܓܛܳܥܢܺܝ ܠܳܟ̥ ܕܠܳܐ ܡܺܝܬܰܪܩܠܳܐ ܪܰܓ̥ܠܳܟ̥ ܒܟܶܐܦܳܐ.“ 12ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܘܐܡܺܝܪ: ܠܳܐ ܡܢܰܣܰܬ ܠܡܳܪܝܳܐ ܐܰ‌ܠܳܗܰܝܕ̥ܳܟ̥̥.“ 13ܘܺܗ̄ܝ ܢܰܩܠܐ ܕ݄ܡܟܰܡܶܠ ܠܶܗ ܗ̄ܽܘ ܣܳܛܳܢܳܐ ܟܽܘܠّܶܗ ܗ̄ܰܢ ܢܶܣܝ̈ܽܘܢܰܝܕ̥ܶܗ، ܪܰܚ݄ܩ ܡܶܢ̱ ܓܰܒܶܗ ܠܙܰܒܢܳܐ.

ܗ̄ܺܝ ܡܕܰܒܪܳܢܽܘܬ̥ܳܐ ܕܝܶܫܽܘܥ ܒܽܗ̄ܘ ܓܠܺܝܠܳܐ

ܗ̄ܽܘ ܪܺܝܫܳܐ ܕܺܗ̄ܝ ܡܕܰܒܪܳܢܽܘܬ̥ܳܐ ܕܝܶܫܽܘܥ

ܡܬܝ 4‏:12‏‐17؛ ܡܪܩܘܣ 1‏:14‏‐15

14ܘܒܽܗ̄ܘ ܚܰܝܠܳܐ ܕܺܗ̄ܝ ܪܽܘܚܳܐ، ܕܰܥ݄ܪ ܝܶܫܽܘܥ ܠܽܗ̄ܘ ܓܠܺܝܠܳܐ، ܘܢܰܦ݄ܩ ܐ݄ܫܡܶܗ ܒܽܗ̄ܘ ܐܰܬ̥ܪܳܐ ܟܽܘܠܶܗ ܕܚܶܕ̥ܳܪܰܝّܶܗ. 15ܘܗܺܝّܶܗ ܡܰܘܠܰܦ ܗ̄ܘܰܐ ܒܰܟܢܽܘܫ̈ܳܬ̥ܰܬّ̥ܶܗ، ܘܡܺܝܫܰܒܰܚ ܗ̄ܘܰܐ ܡܶܢ̱ ܟܽܘܠ ܢܳܫܳܐ.

ܝܶܫܽܘܥ ܠ݄ܐ ܟܡܺܝܬܰܩܒ݄ܠ ܒܢܳܨܪܰܬ ܗ̄ܺܝ ܡܕ̥ܺܝܢ̱ܬܰܝܕ̥ܶܗ

ܡܬܝ 13‏:53‏‐58؛ ܡܪܩܘܣ 6‏:1‏‐6

16ܘܰܐܬ̥ܺܝ ܠܢܳܨܪܰܬ̥، ܐܰܝܟܳܐ ܕܝܰܪܽܒ̥، ܘܥܰܒ݄ܪ، ܐܟ̥ ܕܽܗ̄ܘ ܥܝܳܕ̥ܰܝܕ̥ܶܗ، ܠܺܗ̄ܝ ܟ̥ܢܽܘܫܬܳܐ ܒܝܰܘܡܶܗ ܕܫܰܒܬ̥ܳܐ، ܘܩܰܝ݄ܡ ܕܩܳܪܶܐ. 17ܘܗܺܝܒ̥ ܐܶ‌ܠܶܗ ܗ̄ܽܘ ܣܶܦܪܳܐ ܕܶܐܫܰܥܝܳܐ ܗ̄ܽܘ ܢܒܺܝܳܐ. ܘܝܶܫܽܘܥ ܦܬ݄ܚ ܠܶܗ ܗ̄ܽܘ ܣܶܦܪܳܐ ܘ݄ܚܙܶܐ ܠܶܗ ܗ̄ܺܝ ܕܽܘܟܬ̥ܳܐ ܐܰܝܟܳܐ ܕ݄ܟܬ̥ܺܝܒ̥: 18”ܗ̄ܺܝ ܪܽܘܚܳܐ ܕܡܳܪܝܳܐ ܐܰܥܠܺܝ ܝܳܐ، ܡܰܗ̄ܘܟ̥ܰܐ ܡܫ݄ܚ ܠܶܗ ܠܺܝ: ܕ݄ܡܣܰܒܰܪ ܐ̱ܢܳܐ ܠܰܡّܶܣܟܶܢ̈ܶܐ. ܘ݄ܡܫܰܕܰܪ ܠܶܗ ܠܺܝ ܕܡܰܢ݄ܚ ܐ̱ܢܳܐ ܗ̄ܰܡّܰܥܺܝܩ̈ܶܐ، ܘܟܳܪܰܙ ܐ̱ܢܳܐ ܫܽܘܒܩܳܢܳܐ ܠܰܝّܰܣܺܝܪ̈ܶܐ ܘ݄ܚܙܳܝܳܐ ܠܰܣّܰܡܝ̈ܶܐ، ܘܒܽܗ̄ܘ ܫܽܘܒܩܳܢܳܐ ܡܚܰܪܰܪ ܐ̱ܢܳܐ ܠܰܬܒ̥ܺܝܪ̈ܶܐ، 19ܘܟܳܪܰܙ ܐ̱ܢܳܐ ܫܰܢ̱ܬܳܐ ܡܰܩܒܰܠܬܳܐ ܠܡܳܪܝܳܐ.“ 20ܘܡܰܟܪܰܟ̥ ܠܶܗ ܗ̄ܽܘ ܣܶܦܪܳܐ ܘܗܽܒ̥ ܠܶܗ ܠܽܗ̄ܘ ܫܰܡܳܫܳܐ، ܘܰܐܙّܶܗ ܝܰܬܽܒ̥. ܘܟܽܘܠّܶܗ ܕܒܺܗ̄ܝ ܟ̥ܢܽܘܫܬܳܐ ܥܰܝܢ̈ܳܬ̥ܰܝّܶܗ ܚܰܝܪܺܝ ܗ̄ܘܰܘ̱ ܐܶܒܶܗ. 21ܘ݄ܡܫܰܪܶܐ ܠܶܗ ܕܳܐܡܰܪّܶܗ: ”ܐܰܕܝܰܘܡܰܐ ܟܰܡ݄ܠ ܗ̄ܽܘ ܟܬ̥ܳܒ̥ܰܢܳܐ ܕܫܰܡܺܝܥܺܝܬܽܘ ܒܰܐܕ̥̈ܢܰܝܟ̥ܽܘ.“ 22ܘܟܽܘܠّܶܗ ܣܳܗܕܺܝ ܗ̄ܘܰܝ ܠܶܗ ܘܡܺܝܕܰܘܡܪܺܝ ܗ̄ܘܰܘ̱ ܒܰܡّܰܐܡܪ̈ܶܐ ܕܺܗ̄ܝ ܛܰܝܒܽܘܬ̥ܳܐ ܕܢܳܦܩܺܝ ܗ̄ܘܰܘ̱ ܡܶܢ̱ ܦܶܡܶܗ، ܘ݄ܐܡّܺܪ̱ܝ ܗ̄ܘܰܘ̱: ”ܠܰܝ̱ܬ ܝܳܐ ܗܰܢܳܐ ܗ̄ܽܘ ܐܰܒܪܳܐ ܕܝܰܘܣܶܦ؟“ 23ܝܶܫܽܘܥ ܐܡ݄ܪ ܠܰܗ ܠّܶܗ: ”ܟܺܝܬ ܕ݄ܐܡّܺܪ̱ܝܬܽܘ ܠܺܝ ܗ̄ܽܘ ܡܰܬ̥ܠܰܢܳܐ، ܐܳܣܝܳܐ ܡܰܢ݄ܚ ܪܽܘܚܳܟ̥. ܘܟܽܘܠ ܕܫܰܡܺܝܥܺܝܢܰܐ ܕܣ݄ܡ ܠܳܟ̥ ܒ݄ܟܦܰܪܢܰܚܽܘܡ ܣܘܿܡ ܗܰܪܟܶܐ ܣܬܶܝ ܒܺܗ̄ܝ ܡܕ̥ܺܝܢ̱ܬܰܝܕ̥ܳܟ̥.“ 24ܘܗܺܝّܶܗ ܐܡ݄ܪ ܠܶܗ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ، ܕܠܰܝܬ ܢܒܺܝܳܐ ܕܡܺܝܬܰܩܒ݄ܠ ܒܺܗ̄ܝ ܡܕ̥ܺܝܢ̱ܬܰܝܕ̥ܶܗ. 25ܘ݄ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ، ܕܓ̥ܰܠܰܒܶܐ ܐܰܪ̈ܡܠܳܬ̥ܳܐ ܟ݄ܬ ܗ̄ܘܰܐ ܒܺܐܝܣܪܳܐܶܝܠ ܒܝܰܘܡ̈ܶܐ ܕܶܐ‌ܠܺܝܳܐ ܗ̄ܽܘ ܢܒܺܝܳܐ، ܗ̄ܺܝ ܢܰܩܠܐ ܕ݄ܣܟ̥ܺܝܪܺܝ ܗ̄ܰܫܡܰܝ̈ܶܐ ܬܠ݄ܬ̥ ܐ݄ܫܢ̈ܶܐ ܘ݄ܫܬܳܐ ܝܰܪ̈ܚܶܐ، ܘܗܰܘܺܝ ܟܰܦܢܳܐ ܪܰܒܳܐ ܒܟܽܘܠܰܗ ܗ̄ܺܝ ܐܰܪܥܳܐ، 26ܘ݄ܠܓܰܒ ܚܕ̥ܳܐ ܡ݄ܢّܶܗ، ܠܳܐ ܡܫܰܕ݄ܪ ܐܶ‌ܠܺܝܳܐ، ܐܶ‌ܠܳܐ (ܡܫܰܕ݄ܪ) ܠܓܰܒ ܨܰܪܦܰܬ ܕܨܰܝܕܳܢ، ܠܓܰܒ ܐܰܢ̱ܬ̥ܬܳܐ ܐܰܪܡܰܠܬܳܐ. 27ܘܓ̥ܰܠܰܒܶܐ ܓܰܪ̈ܒ̥ܳܢܶܐ ܟ݄ܬ ܗ̄ܘܰܘ̱ ܒܺܐܝܣܪܳܐܶܝܠ ܒܰܝّܰܘܡ̈ܶܐ ܕܶܐ‌ܠܺܝܫܰܥ ܗ̄ܽܘ ܢܒܺܝܳܐ، ܘܚܰܕ̱ ܡ݄ܢّܶܗ ܠܳܐ ܡܕܰܟܶܐ (ܘܢܰܝ݄ܚ)، ܐܶ‌ܠܳܐ ܢܰܥܡܳܢ ܗ̄ܽܘ ܐܰܪܡܳܝܳܐ.“ 28ܘܺܗ̄ܝ ܢܰܩܠܐ ܕܗܰܢܺܝ ܫܰܡܺܝܥܺܝ ܗܰܢ݄ܟ ܕܒܺܗ̄ܝ ܟ̥ܢܽܘܫܬܳܐ، ܟܽܘܠّܶܗ ܡܠ݄ܢ ܪܽܘܓ̥ܙܳܐ ܐܰܥܠܶܗ. 29ܘܩܰܝܺܝܡܺܝ ܡܰܘܦܰܩّܶܗ ܠܰܪܒ̥ܰܠ ܡܺܗ̄ܝ ܡܕ̥ܺܝܢ̱ܬܳܐ ܘܡܰܝܬܰܠّܶܗ ܗܳܠ ܣܶܦܶܗ ܕܽܗ̄ܘ ܛܽܘܪܳܐ، ܐܰܝܟܳܐ ܕܺܗ̄ܝ ܡܕ̥ܺܝܢ̱ܬܰܬّ̥ܶܗ ܒܰܢܝܳܐ ܗ̄ܘܰܐ ܐܰܥܠܶܗ، ܠܰܫܰܢ ܕ݄ܡܚܰܠܩܺܝ ܠܶܗ ܡܽܗ̄ܘ ܫܩܺܝܦܳܐ. 30ܐܶ‌ܠܳܐ ܗܺܝّܶܗ ܥܰܒ݄ܪ ܒܰܝܢܳܬ̥ܰܝّܶܗ ܘܰܐܙّܶܗ.

ܝܶܫܽܘܥ ܟܡܰܘܦ݄ܩ ܪܽܘܚܳܐ ܒܺܝܫܬܳܐ

ܡܪܩܘܣ 1‏:21‏‐28

31ܘܢܰܚ݄ܬ ܠ݄ܟܦܰܪܢܰܚܽܘܡ، ܗ̄ܺܝ ܡܕ̥ܺܝܢ̱ܬܳܐ ܕܽܗ̄ܘ ܓܠܺܝܠܳܐ، ܘܡܰܘܠܰܦ ܗ̄ܘܰܐ ܠّܶܗ ܒܰܝّܰܘܡ̈ܶܐ ܕܺܗ̄ܝ ܫܰܒܬ̥ܳܐ. 32ܘܡܺܝܕܰܘܡܪܺܝ ܗ̄ܘܰܘ̱ ܒܽܗ̄ܘ ܝܽܘܠܦܳܢܰܝܕ̥ܶܗ، ܡܺܐܝܕ̥ܶܗ ܕܽܗ̄ܘ ܡܰܐܡܪܰܝܕ̥ܶܗ ܡܫܰܠܛܳܐ ܗ̄ܘܰܐ.

33ܘܟ݄ܬ ܗ̄ܘܰܐ ܒܺܗ̄ܝ ܟ̥ܢܽܘܫܬܳܐ ܓܰܒ̥ܪܳܐ ܐܶܒܶܗ ܪܽܘܚܳܐ ܕܫܺܐܕܳܐ ܛܰܢܦܳܐ، ܘܡܰܙܥܰܩ ܠܶܗ ܒܩܳܠܳܐ ܥܶܠܳܝܳܐ، 34ܘܐܡ݄ܪ ܠܶܗ: ”ܛܪܰܝ ܡܶܢܺܝ، ܡܳܐ ܠܳܟ̥ ܡܶܢܰܢ، ܝܰܐ ܝܶܫܽܘܥ ܗ̄ܽܘ ܢܳܨܪܳܝܳܐ، ܐܰܬ̥ܰܬ ܕ݄ܡܣܰܟܪܰܬ ܠܰܢ؟ ܟܳܐܕ̥ܰܥ ܐ̱ܢܳܐ ܠܳܟ̥ ܡܰܢ ܗܰܬ، ܗ̄ܽܘ ܩܰܕܺܝܫܳܐ ܕܰܐ‌ܠܳܗܳܐ ܗܰܬ.“ 35ܘ݄ܡܥܰܝܰܛ ܠܶܗ ܐܰܥܠܶܗ ܝܶܫܽܘܥ ܘܐܡ݄ܪ ܠܶܗ: ”ܣܟ̥ܰܪ ܦܶܡܳܟ̥ ܘ݄ܢܦܰܩ ܡܶܢܶܗ.“ ܘܽܗ̄ܘ ܫܺܐܕܳܐ ܡܚܰܠܰܩ ܠܶܗ ܒܽܗ̄ܘ ܦܰܠܓܳܐ، ܘܢܰܦ݄ܩ ܡܶܢܶܗ، ܐܶ‌ܠܳܐ ܠܳܐ ܡܰܟܽܒ̥ ܠܶܗ ܒܡܶܕܶܐ. 36ܘܕܽܘܡܳܪܳܐ ܪܰܒܳܐ ܙܒ݄ܛ ܠܶܗ ܠܟܽܘܠ ܢܳܫܳܐ، ܘܡ݄ܫܓ̥ܳܠܺܝ ܗ̄ܘܰܘ̱ ܥܰܡ ܚܕ̥ܳܕ̥̈ܶܐ ܘ݄ܐܡّܺܪ̱ܝ ܗ̄ܘܰܘ̱: ”ܡ݄ܢܝܳܐ ܗ̄ܽܘ ܡܰܐܡܪܰܢܳܐ؟ ܒܫܽܘܠܛܳܢܳܐ ܘ݄ܒܚܰܝܠܳܐ ܟܳܗ̄ܒܶܐ ܦܽܘܩܕܳܢܳܐ ܠܰܪّܽܘܚ̈ܶܐ ܛܰܢ̈ܦܶܐ ܘ݄ܟܢܳܦܩܺܝ.“ 37ܘܢܰܦ݄ܩ ܐ݄ܫܡܶܗ ܒܟܽܘܠܶܗ ܗ̄ܽܘ ܐܰܬ̥ܪܳܐ ܕܚܶܕ̥ܳܪܰܝّܶܗ.

ܝܶܫܽܘܥ ܟܡܰܢ݄ܚ ܓ̥ܰܠܰܒܶܐ ܟܶܐܒ̥̈ܶܐ

ܡܬܝ 8‏:14‏‐17؛ ܡܪܩܘܣ 1‏:29‏‐34

38ܘܺܗ̄ܝ ܢܰܩܠܐ ܕܢܰܦ݄ܩ ܝܶܫܽܘܥ ܡܺܗ̄ܝ ܟ̥ܢܽܘܫܬܳܐ، ܥܰܒ݄ܪ ܠܽܗ̄ܘ ܒܰܝܬܳܐ ܕܫܶܡܥܽܘܢ. ܘܺܗ̄ܝ ܚܡܳܬ̥ܳܐ ܕܫܶܡܥܽܘܢ ܡܰܥ݄ܩܬܳܐ ܗ̄ܘܰܐ ܓ̥ܰܠܰܒܶܐ ܒܺܗ̄ܝ ܚ݄ܡܬܳܐ. ܘܰܐܒܺܝܥܺܝ ܡܶܢܶܗ ܡ݄ܛܳܠܳܘ̇ܬ̥ܰܗ (ܠܰܫܰܢܰܗ). 39ܘܩܰܝ݄ܡ ܐܰܙّܶܗ ܠܰܐܦ ܐܶ‌ܠܰܗ، ܘ݄ܡܥܰܝܰܛ ܠܶܗ ܥܰܠ ܗ̄ܺܝ ܚ݄ܡܬܰܝܕ̥ܰܗ، ܘܛ݄ܪܝܳܐ ܠܰܗ. ܘܡܶܚܕ̥ܳܐ ܩܰܝܺܝܡܳܐ ܘ݄ܡܫܰܡܫܳܐ ܗ̄ܘܰܐ ܠّܶܗ. 40ܘܠܰܐܦ ܗ̄ܽܘ ܛܒ̥ܳܥܳܐ ܕܺܗ̄ܝ ܫܶܡܫܳܐ، ܟܽܘܠّܶܗ ܐܰܝܢܰܐ ܕܟ݄ܬ ܗ̄ܘܰܘ̱ ܠّܶܗ ܟܰܐܺܝܒ̥̈ܶܐ ܕܢܰܦܺܝܠܺܝ ܒܟܶܐܒ̥̈ܶܐ ܓ̥ܰܠܰܒܶܐ ܡܰܝܬܰܢّܶܗ ܠܓܰܒܶܗ، ܘܗܺܝّܶܗ ܥܰܠ ܚܰܕ̱ ܚܰܕ̱ ܡ݄ܢّܶܗ ܡܰܚ݄ܬ ܗ̄ܘܰܐ ܐܺܝܕ̥ܶܗ، ܘܡܰܢ݄ܚ ܗ̄ܘܰܐ ܠّܶܗ. 41ܘܢܳܦܩܺܝ ܗ̄ܘܰܘ̱ ܣܬܶܝ ܫܺܐܕ̈ܶܐ ܡܶܢ̱ ܓ̥ܰܠܰܒܶܐ، ܘܡܰܙܥܩܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܗܰܬ ܗ̄ܰܬ ܡܫܺܝܚܳܐ، ܗ̄ܽܘ ܐܰܒܪܳܐ ܕܰܐ‌ܠܳܗܳܐ.“ ܘ݄ܡܥܰܝܰܛ ܗ̄ܘܰܐ ܐܰܥܠܰܝّܶܗ ܘܠ݄ܐ ܛܳܪܶܐ ܗ̄ܘܰܐ ܠّܶܗ ܕ݄ܐܡّܺܪ̱ܝ ܥܰܠ ܕܳܐܕ̥ܥܺܝ ܗ̄ܘܰܘ̱ ܕܗܺܝّܶܗ ܝܳܐ ܡܫܺܝܚܳܐ.

ܝܶܫܽܘܥ ܟܟܳܪ݄ܙ ܗ̄ܺܝ ܡܰܠܟܽܘܬ̥ܳܐ ܕܺܗ̄ܝ ܫܡܰܝܳܐ

ܡܪܩܘܣ 1‏:35‏‐39

42ܘ݄ܒܩܶܕܰܡܬܳܐ، ܢܰܦ݄ܩ ܐܰܙّܶܗ ܠܽܗ̄ܘ ܡܰܕ̥ܒܪܳܐ، ܘܰܗ̄ܢ ܢܳܫ̈ܶܐ ܟܳܪܟ̥ܺܝ ܗ̄ܘܰܘ̱ ܐܰܥܠܶܗ، ܘܰܐܬ̥݄ܢ ܗܳܠ ܠܓܰܒܶܗ، ܘ݄ܙܒ݄ܛّܶܗ ܕܠ݄ܐ ܐܙّܶܗ ܡܶܢ̱ ܓܰܒܰܝّܶܗ. 43ܘܗܺܝّܶܗ، ܝܶܫܽܘܥ، ܐܡ݄ܪ ܠܰܗ ܠّܶܗ: ”ܠ݄ܡܕ̈ܺܝܢܳܬ̥ܳܐ ܚܪ̈ܶܢܶܐ ܣܬܶܝ ܟܳܐܒܰܥ ܠܺܝ ܕ݄ܡܣܰܒܰܪ ܐ̱ܢܳܐ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ، ܡܰܗ̄ܘܟ̥ܰܐ ܡܫܰܕܰܪ ܐ̱ܢܳܐ.“ 44ܘܗܺܝّܶܗ ܟܳܪܰܙ ܗ̄ܘܰܐ ܒܰܟܢܽܘܫ̈ܳܬ̥ܳܐ ܕܽܗ̄ܘ ܓܠܺܝܠܳܐ.

Currently Selected:

ܡܓܰܠܝܘܢ ܕܠܘܩܐ 4: ܟܬܒܐ

Highlight

Copy