ܡܓܰܠܝܘܢ ܕܠܘܩܐ 10

ܝܶܫܽܘܥ ܟ݄ܡܫܰܕ݄ܪ ܫܰܒ̥ܥܺܝ ܡܣܰܒܪ̈ܳܢܶܐ

1ܒ݄ܬ̥݄ܪ ܡܰܗ̄ܢܺܝ، ܦܪ݄ܫ ܠܶܗ ܝܶܫܽܘܥ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܗ̄ܰܚܪ̈ܶܢܶܐ ܫܰܒ̥ܥܺܝ، ܘ݄ܡܫܰܕܪܺܝ ܠܶܗ ܬܪܶܝ ܬܪܶܝ ܠܩܰܕ̱ܡܽܘܬ̥ܶܗ، ܠܟܽܘܠ ܐܰܬ̥ܪܳܐ ܘ݄ܡܕ̥ܺܝܢ̱ܬܳܐ ܕ݄ܡܛܰܝܰܒ ܗ̄ܘܰܝ ܠܶܗ ܪܽܘܚܶܗ (ܐܳܒܰܥ ܗ̄ܘܰܐ) ܕ݄ܐܙّܶܗ. 2ܘܐܡ݄ܪ ܠܰܗ ܠّܶܗ: ”ܗ̄ܽܘ ܚܨܳܕܳܐ ܓ̥ܰܠܰܒܶܐ ܝܳܐ ܐܶ‌ܠܳܐ ܗ̄ܰܦّܳܥ̈ܠܶܐ ܐ݄ܫܡܳܐ ܢܶܝ. ܗܰܢ ܢܰܩܠܐ ܝܺܒܰܥܽܘ ܡܽܗ̄ܘ ܡܳܪܳܐ ܕܽܗ̄ܘ ܚܨܳܕܳܐ ܕܡܰܘܦ݄ܩ ܦܳܥ̈ܠܶܐ ܠܽܗ̄ܘ ܚܨܳܕܰܝܕ̥ܶܗ. 3ܙܳܟ̥ܽܘ! ܟܰܐܠܺܝ ܟ݄ܡܫܰܕܰܪܢܳܢܟ̥ܽܘ ܐܟ̥ ܕܰܦّܰܪ̈ܶܐ ܒܰܝܢ ܗ̄ܰܕّܶܒ̥̈ܶܐ. 4ܠܳܐ ܫ݄ܩܠܺܝܬܽܘ ܟܺܝ̈ܣܶܐ ܘܠܳܐ ܙܘܳܕ̈ܶܐ ܘܠܳܐ ܡܣܳܢ̈ܶܐ، ܘܠܳܐ ܕܳܪܺܝܬܽܘ ܫܠܳܡܳܐ ܥܰܠ ܢܳܫܳܐ ܒܽܗ̄ܘ ܕܰܪܒܳܐ. 5ܘܠܰܐܝܢܰܐ ܒܰܝܬܳܐ ܕܥܳܒܪܺܝܬܽܘ، ܒܺܗ̄ܝ ܩܰܕ̱ܡܰܝܬܳܐ ܐܡܰܪܽܘ ’ܫܠܳܡܳܐ ܠܽܗ̄ܘ ܒܰܝܬܰܢܳܐ.‘ 6ܘܕܳܗ̄ܘܶܐ ܬܰܡܳܐ ܢܳܫܳܐ ܕܫܳܘܶܐ ܠܽܗ̄ܘ ܫܠܳܡܳܐ، ܗ̄ܽܘ ܫܠܳܡܰܬ̥ܟ̥ܽܘ ܓܢܳܚ݄ܬ ܐܰܥܠܶܗ، ܘ݄ܕܠܳܐ ܫܳܘܶܐ، ܗ̄ܽܘ ܫܠܳܡܰܬ̥ܟ̥ܽܘ ܓܕܳܥ݄ܪ ܐܰܥܠܰܝܟ̥ܽܘ. 7ܘܶܐܒܶܗ ܒܽܗ̄ܘ ܒܰܝܬܳܐ ܦܽܘܫܽܘ: ܐܰܟ̥̈ܳܠܶܐ ܘܫܰܬܳܝ̈ܶܐ ܡܽܗ̄ܘ ܡܶܕܶܐ ܕܟ݄ܬّܶܗ، ܡܺܐܝܕ̥ܶܗ ܕܽܗ̄ܘ ܦܳܥܠܳܐ ܟܫܳܘܶܐ ܗ̄ܽܘ ܐܰܓ̥ܪܰܝܕ̥ܶܗ، ܘܠ݄ܐ ܐܙّܳܟ̥ܽܘ ܡܶܢ̱ ܒܰܝܬܳܐ ܠܒܰܝܬܳܐ. 8ܘܠܰܐܝܢܰܐ ܡܕ̥ܺܝܢ̱ܬܳܐ ܕܥܳܒܪܺܝܬܽܘ ܘܡܰܩܒܠ݄ܢܟ̥ܽܘ، ܐܰܟ̥ܽܘܠܽܘ ܗ̄ܽܘ ܡܶܕܶܐ ܕܡܺܝܬܰܚ݄ܬ ܩܽܘܕ̱ܡܰܝܟ̥ܽܘ. 9ܘܡܰܢܶܚܽܘ ܗ̄ܰܟّܰܐܺܝܒ̥̈ܶܐ ܕܟܺܝܬ ܐܶܒܰܗ. ܘܐܡܰܪܽܘܢّܶܗ: ’ܡܩܰܪܰܒ̥ ܠܰܗ ܐܰܥܠܰܝܟ̥ܽܘ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.‘ 10ܘܠܰܐܝܢܰܐ ܡܕ̥ܺܝܢ̱ܬܳܐ ܕܥܳܒܪܺܝܬܽܘ ܘܠ݄ܐ ܡܰܩܒܠ݄ܢܟ̥ܽܘ، ܢܦܰܩܽܘ ܠܺܗ̄ܝ ܫܽܘܩܳܐ ܘܐܡܰܪܽܘ: 11’ܗܳܠ ܠܽܗ̄ܘ ܥܰܦܪܳܐ ܕܩܰܝ݄ܬ̥ ܒܪ̈ܰܓ̥ܠܰܝܢܰܐ ܡܺܗ̄ܝ ܡܕ̥ܺܝܢ̱ܬܰܬ̥ܟ̥ܽܘ ܟܢ݄ܦܨܺܝܢܰܐ ܠܶܗ ܐܰ‌ܠܟ̥ܽܘ. ܐܶ‌ܠܳܐ ܗܰܬ̥ܶܐ ܝܕ̥ܰܥܽܘ: ܕ݄ܡܩܰܪܰܒ̥ ܠܰܗ ܐܰܥܠܰܝܟ̥ܽܘ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.‘ 12ܟܳܐܡܰܪ ܐ̱ܢܳܐ ܠܟ̥ܽܘ: ܠ݄ܣܕ̥ܽܘܡ ܓܕܳܗ̄ܘܶܐ ܬ̥ܢܰܚܬܳܐ ܒܝܰܘܡܶܗ ܕܽܗ̄ܘ ܕܺܝܢܳܐ ܙ݄ܕ ܡܺܗ̄ܝ ܡܕ̥ܺܝܢ̱ܬܰܝܳܐ.

ܝܶܫܽܘܥ ܟܚܳܝ݄ܨ ܥܰܠ ܗ̄ܰܡܕ̥ܺܝ̈ܢܳܬ̥ܳܐ ܕܠܳܐ ܡܰܩܒܰܠّܶܗ ܗ̄ܺܝ ܣܒܰܪܬ̥ܳܐ

ܡܬܝ 11‏:20‏‐24

13”ܘܰܝ ܠܰܟ̥ ܝܰܐ ܟܳܘܪܰܙܺܝܢ، ܘܰܝ ܠܰܟ̥ ܝܰܐ ܒܶܝܬ̥ ܨܰܝܳܕ̥ܳܐ! ܕܳܗ̄ܘ݄ܢ ܗ̄ܘܰܘ̱ ܒܨܽܘܪ ܘ݄ܒܨܰܝܕܳܢ ܗ̄ܰܚّܰܝ̈ܠܶܐ ܕܗܰܘ݄ܢ ܐܰܒܟ̥ܽܘ، ܟܺܝܬ ܕ݄ܒܕܰܠܩ̈ܶܐ ܘܩܰܛܡܳܐ ܬܰܝܒܺܝ ܗ̄ܘܰܘ̱. 14ܐܶ‌ܠܳܐ ܠܨܽܘܪ ܘ݄ܠܨܰܝܕܳܢ ܓܕܳܗ̄ܘܶܐ ܬ̥ܢܳܚܳܐ ܒܽܗ̄ܘ ܝܰܘܡܳܐ ܕܽܗ̄ܘ ܕܺܝܢܳܐ ܙ݄ܕ ܡܶܢ̱ ܕ݄ܬ̥ܟ̥ܽܘ. 15ܘܗܰܬ ܝܰܐ ܟܦܰܪܢܰܚܽܘܡ، ܗܰܝܳܐ ܕܗ݄ܠ ܠܺܗ̄ܝ ܫܡܰܝܳܐ ܥܰܠܰܬ، ܗܳܠ ܠ݄ܫܝܽܘܠ ܓܢܳܚܬܰܬ. 16ܡܰܢ ܕܫܳܡܰܥܟ̥ܽܘ، ܐܶ‌ܠܺܝ ܟܫܳܡ݄ܥ، ܘܡܰܢ ܕܛܳܠܰܡܟ̥ܽܘ ܐܶ‌ܠܺܝ ܟܛܳܠ݄ܡ، ܘܡܰܢ ܕܛܳܠܰܡ ܠܺܝ ܟܛܳܠ݄ܡ ܠܡܰܢ ܕ݄ܡܫܰܕܰܪ ܠܶܗ ܠܺܝ.“

ܗ̄ܽܘ ܕܥܳܪܳܐ ܕܰܫّܰܒ̥ܥܺܝ

17ܘܕܰܥܺܝܪܺܝ ܗ̄ܰܫّܰܒ̥ܥܺܝ ܕ݄ܡܫܰܕܪܺܝ ܠܶܗ ܒ݄ܦܨܺܝܚܽܘܬ̥ܳܐ ܪܰܒܬ̥ܳܐ، ܘܐܡ݄ܪّܰܗ ܠܶܗ: ”ܡܳܪܰܢ، ܗ̄ܰܫّܺܐܕ̈ܶܐ ܣܬܶܝ ܡ݄ܫܬܰܥܒܕܺܝ ܗ̄ܘܰܘ̱ (ܫ݄ܡܥܺܝ ܗ̄ܘܰܘ̱) ܠܰܢ ܒ݄ܐܫܡܳܟ̥.“ 18ܘܗܺܝّܶܗ ܐܡ݄ܪ ܠܰܗ ܠّܶܗ: ”ܚܳܙܶܐ ܗ̄ܘܰܝ ܐ̱ܢܳܐ ܗ̄ܽܘ ܣܳܛܳܢܳܐ ܕܢܰܦ݄ܠ ܡܺܗ̄ܝ ܫܡܰܝܳܐ ܐܟ̥ ܕܽܗ̄ܘ ܒܰܪܩܳܐ. 19ܟܰܐܠܶܗ ܟܳܗ̄ܒܶܐ ܐ̱ܢܳܐ ܠܟ̥ܽܘ ܫܽܘܠܛܳܢܳܐ ܕܕܰܝܫܺܝܬܽܘ ܗ̄ܰܟّܽܘܪ̈ܦܶܐ ܘܰܥّܺܩܰܪ̈ܒ̥ܶܐ ܘܟܽܘܠܶܗ ܗ̄ܽܘ ܚܰܝܠܳܐ ܕܽܗ̄ܘ ܒܥܶܠܕܒܳܒܳܐ، ܘܡܶܕܶܐ ܚܰܪܒܳܐ ܠܳܐ ܟܳܗ̄ܘܶܐ ܐܰ‌ܠܟ̥ܽܘ. 20ܐܶ‌ܠܳܐ ܒܰܗ̄ܬ̥ܶܐ ܠܳܐ ܡ݄ܦܨܳܚܺܝܬܽܘ ܕܰܫّܺܐܕ̈ܶܐ ܡ݄ܫܬܰܥܒܕ݄ܢܟ̥ܽܘ (ܫ݄ܡܥ݄ܢܟ̥ܽܘ)، ܐܶ‌ܠܳܐ ܡ݄ܦܨܶܚܽܘ ܕܰܗ̄ܢ ܐ݄ܫܡܳܢ̈ܰܬ̥ܟ̥ܽܘ ܟܬ̥ܺܝܒ̥ܺܝ ܒܺܗ̄ܝ ܫܡܰܝܳܐ.“

ܗ̄ܽܘ ܐܰܒܳܐ ܘܽܗ̄ܘ ܐܰܒܪܳܐ

ܡܬܝ 11‏:25‏‐27؛ 13‏:16‏‐17

21ܒܺܗ̄ܝ ܫܳܥܬ̥ܰܝܕ̥ܰܗ، ܦܨܺܝܚ ܝܶܫܽܘܥ ܒܪܽܘܚܳܐ ܕܩܽܘܕܫܳܐ، ܘܐܡ݄ܪ ܠܶܗ: ”ܟܡܰܘܕܶܐ ܐ̱ܢܳܐ ܠܳܟ̥، ܝܰܐ ܗ̄ܽܘ ܐܰܒܰܝܕ̥ܺܝ، ܡܳܪܳܐ ܕܺܗ̄ܝ ܫܡܰܝܳܐ ܘܕܺܗ̄ܝ ܐܰܪܥܳܐ، ܥܰܠ ܕ݄ܡܟܰܣܶܐ ܠܳܟ̥ ܗܰܢܺܝ ܡܰܢ̱ ܚّܰܟܺܝܡ̈ܶܐ ܘܰܝّܰܕ̥ܳܥ̈ܶܐ، ܘ݄ܓܠܰܠّܳܟ̥ ܠܰܝّܰܠܽܘܕ̥̈ܶܐ. ܐܺܝܢ، ܝܰܐ ܗ̄ܽܘ ܐܰܒܰܝܕ̥ܺܝ، ܕܰܗ̄ܘܟ̥ܰܐ ܗܰܘܺܝ ܗ̄ܽܘ ܨܶܒܝܳܢܳܐ ܩܽܘܕ̱ܡܳܟ̥.“ 22ܘܕܰܥ݄ܪ ܠܓܰܒ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܐܡ݄ܪ ܠܰܗ ܠّܶܗ: ”ܟܽܘܠ ܡܶܕܶܐ ܗܺܝܒ̥ ܐܶ‌ܠܺܝ ܡܽܗ̄ܘ ܐܰܒܰܝܕ̥ܺܝ، ܘܠܳܐ ܢܳܫܳܐ ܟܳܐܕ̥݄ܥ ܡܰܢܝܳܐ ܗ̄ܽܘ ܐܰܒܪܳܐ ܐܶ‌ܠܳܐ ܗ̄ܽܘ ܐܰܒܳܐ، ܘܠܳܐ ܡܰܢܝܳܐ ܗ̄ܽܘ ܐܰܒܳܐ ܐܶ‌ܠܳܐ ܗ̄ܽܘ ܐܰܒܪܳܐ، ܘ݄ܠܡܰܢ ܕܟܳܐܒ݄ܥ ܗ̄ܽܘ ܐܰܒܪܳܐ ܕܓܳܠܶܐ.“ 23ܘܕܰܥ݄ܪ ܠܓܰܒ ܗ̄ܰܬّܰܠܡܺܝܕ̥̈ܰܝܕ̥ܶܗ ܠܚܽܘܕ̥ܰܝّܶܗ، ܘܐܡ݄ܪ ܠܶܗ: ”ܛܽܘܒܳܐ ܠܰܥّܰܝܢ̈ܶܐ ܕܚܳܙ݄ܢ ܗ̄ܽܘ ܡܶܕܶܐ ܕܗܰܬܽܘ ܟܳܚܳܙܺܝܬܽܘ. 24ܘܟܳܐܡܰܪ ܐ̱ܢܳܐ ܠܟ̥ܽܘ: ܢܒܺܝ̈ܶܐ ܓ̥ܰܠܰܒܶܐ ܘܡܰܠܟ̈ܶܐ ܐܰܒܺܝܥܺܝ ܕܚܳܙ݄ܢ ܗ̄ܽܘ ܡܶܕܶܐ ܕܟܳܚܳܙܺܝܬܽܘ، ܘܠܳܐ ܚܙܰܠّܶܗ، ܘ݄ܕܫܳܡܥܺܝ ܗ̄ܽܘ ܡܶܕܶܐ ܕܗܰܬܽܘ ܟܳܫ݄ܡܥܺܝܬܽܘ ܘܠܳܐ ܫܰܡܺܝܥܺܝ.“

ܗ̄ܽܘ ܡܰܬ̥ܠܳܐ ܕܽܗ̄ܘ ܫܳܡܪܳܝܳܐ ܛܳܒ̥ܳܐ

25ܘܟܰܐܠܶܗ ܣܳܦܪܳܐ ܚܰܕ̱ ܩܰܝ݄ܡ ܕ݄ܡܢܰܣܶܐ ܠܶܗ ܘܐܡ݄ܪ ܠܶܗ: ”ܡܰܠܦܳܢܳܐ، ܡ݄ܢ ܣܳܝܰܡ ܐ̱ܢܳܐ ܕܝܳܪܰܬ̥ ܐ̱ܢܳܐ ܗ̄ܰܚّܰܝ̈ܶܐ ܕ݄ܠܥܳܠܰܡ؟“ 26ܘܝܶܫܽܘܥ ܐܡ݄ܪ ܠܶܗ ܠܶܗ: ”ܒܽܗ̄ܘ ܢܳܡܽܘܣܳܐ، ܐܰܝܕܰܪܒܳܐ ܟܬ̥ܺܝܒ̥؟ ܘܰܐܝܕܰܪܒܳܐ ܟܩܳܪܰܬ ܠܶܗ؟“ 27ܡܰܕܥܰܪ ܠܶܗ ܘܐܡ݄ܪ ܠܶܗ ܠܶܗ: ”ܕܪܳܚܡܰܬ ܠܡܳܪܝܳܐ ܐܰ‌ܠܳܗܰܝܕ̥ܳܟ̥̥ ܡܶܢ̱ ܟܽܘܠܶܗ ܠܶܒܳܟ̥، ܘܡܶܢ̱ ܟܽܘܠܰܗ ܢܰܦܫܳܟ̥، ܘܡܶܢ̱ ܟܽܘܠܶܗ ܚܰܝܠܳܟ̥، ܘܡܶܢ̱ ܟܽܘܠܶܗ ܗܰܘܢܳܟ̥، ܘܠܽܗ̄ܘ ܩܰܪܺܝܒ̥ܰܝܕ̥ܳܟ̥ ܐܟ̥ ܕܺܗ̄ܝ ܢܰܦܫܰܝܕ̥ܳܟ̥.“ 28ܘܐܡ݄ܪ ܠܶܗ ܠܶܗ ܝܶܫܽܘܥ: ”ܬܪܺܝܨܳܐ ܐܡ݄ܪ ܠܳܟ̥، ܣܘܿܡ ܗܰܬ̥ܶܐ ܘܓ݄ܕܚܳܝܰܬ.“ 29ܘܗܺܝّܶܗ، ܐܰܒ݄ܥ ܕ݄ܡܙܰܕ݄ܩ ܪܽܘܚܶܗ، ܐܡ݄ܪ ܠܶܗ ܠܶܗ: ”ܘܡܰܢܝܳܐ ܗ̄ܽܘ ܩܰܪܺܝܒ̥ܰܝܕ̥ܺܝ؟“ 30ܘܝܶܫܽܘܥ ܐܡ݄ܪ ܠܶܗ ܠܶܗ: ”ܚܰܕ̱ ܓܰܒ̥ܪܳܐ ܢܳܚܰܬ ܗ̄ܘܰܐ ܡܶܢ̱ ܐܽܘܪܶܫܠܶܡ ܠܺܐܝܪܺܝܚܽܘ، ܘܢܰܦܺܝܠܺܝ ܐܰܥܠܶܗ ܡܫܰܠܚܳܢ̈ܶܐ، ܘܡܰܫܠܰܚّܶܗ ܘ݄ܡܚܰܠّܰܗ ܠܶܗ ܘ݄ܛܪܰܠّܶܗ ܦܰܠܓܶܗ ܕܡܺܝܬ̥ܳܐ ܘܰܐܙّ݄ܢ. 31ܘܗܰܘܺܝ ܕܚܰܕ̱ ܟܳܗܢܳܐ ܢܳܚܰܬ ܗ̄ܘܰܐ ܒܽܗ̄ܘ ܕܰܪܒܰܘܳܐ، ܘ݄ܚܙܶܐ ܠܶܗ ܘܥܰܒ݄ܪ. 32ܘܗܰܘܟ̥ܰܐ ܣܬܶܝ، ܚܰܕ̱ ܠܶܘܳܝܳܐ ܐܰܬ̥ܺܝ ܡܰܛܺܝ ܠܺܗ̄ܝ ܕܽܘܟܬ̥ܰܝܳܐ، ܘ݄ܚܙܶܐ ܠܶܗ ܘܥܰܒ݄ܪ. 33ܐܶ‌ܠܳܐ ܢܳܫܳܐ ܫܳܡܪܳܝܳܐ ܡܗܰܠܰܟ̥ ܗ̄ܘܰܐ، ܐܰܬ̥ܺܝ ܐܰܝܟܳܐ ܕܟ݄ܬ ܗ̄ܘܰܐ، ܘ݄ܚܙܶܐ ܠܶܗ ܘܡܰܪܚܰܡ ܠܶܗ ܐܰܥܠܶܗ، 34ܘ݄ܡܩܰܕܰܡ ܠܶܗ ܘܡܰܐܣ݄ܪ ܠܶܗ ܗ̄ܰܡّܰܚ̈ܘܳܬ̥ܰܝܕ̥ܶܗ ܘ݄ܡܨܰܢܨܶܠ ܠܶܗ ܐܰܥܠܰܝّܶܗ ܚܰܡܪܳܐ ܘܡܶܫܚܳܐ، ܘܡܰܪܒ̥ܰܟ̥ ܠܶܗ ܥܰܠ ܗ̄ܽܘ ܚܡܳܪܰܝܕ̥ܶܗ، ܘܡܰܝܬܶܐ ܠܶܗ ܠܽܗ̄ܘ ܦܽܘܬܩܳܐ، ܘܗܰܘܺܝ ܠܶܗ ܡܳܪܳܐ. 35ܘ݄ܠܨܰܦܪܶܗ ܕܝܰܘܡܳܐ، ܡܰܘܦܰܩ ܠܶܗ ܬܪܶܝ ܕܺܝܢܳܪ̈ܶܐ ܗܺܝܒ̥ܺܝ ܠܶܗ ܠܡܳܪܶܗ ܕܽܗ̄ܘ ܦܽܘܬܩܳܐ ܘܐܡ݄ܪ ܠܶܗ ܠܶܗ: ܗܘܰܝ ܠܶܗ ܡܳܪܳܐ، ܘܶܐܢ ܡܶܕܶܐ ܙ݄ܕ ܡܰܘܦܰܩ (ܡܰܨܪܰܦ) ܠܳܟ̥ ܐܰܥܠܶܗ، ܗ̄ܺܝ ܢܰܩܠܐ ܕܕܳܥܰܪ ܐ̱ܢܳܐ ܓܕܳܗ̄ܒܶܐ ܐ̱ܢܳܐ ܠܳܟ̥. 36ܗܰܢ ܢܰܩܠܐ، ܡܰܢ ܡܰܢ̱ ܬܠܳܬ̥ܰܢܺܝ، ܟܡ݄ܚܙܶܐ ܠܳܟ̥ ܕܗܰܘܺܝ ܩܰܪܺܝܒ̥ܳܐ ܠܰܗ̄ܘܳܐ ܕܢܰܦ݄ܠ ܒܺܐܝܕ̥̈ܶܐ ܕܰܡܫܰܠܚܳܢ̈ܶܐ؟“ 37ܘܗܺܝّܶܗ ܐܡ݄ܪ ܠܶܗ: ”ܗܰܘܳܐ ܕܡܰܪܚܰܡ ܠܶܗ ܐܰܥܠܶܗ.“ ܘܐܡ݄ܪ ܠܶܗ ܠܶܗ ܝܶܫܽܘܥ: ”ܙܳܟ̥ ܗܰܬ ܣܬܶܝ ܗܰܘܟ̥ܰܐ ܣܘܿܡ.“

ܝܶܫܽܘܥ ܒܽܗ̄ܘ ܒܰܝܬܳܐ ܕܡܰܪܝܰܡ ܘ݄ܕܡܳܪܬܳܐ

38ܘܗܰܘܺܝ ܘܗ݄ܢّܶܝ ܟ݄ܡܗܰܠܟ̥ܺܝ ܒܽܗ̄ܘ ܕܰܪܒܳܐ، ܥܰܒ݄ܪ ܠ݄ܚܕ̥ܳܐ ܩܪܺܝܬ̥ܳܐ، ܘܰܐܢ̱ܬ̥ܬܳܐ ܕ݄ܐܫܡܰܗ ܡܳܪܬܳܐ ܡܰܩܒܶܠ ܠܰܗ ܒܽܗ̄ܘ ܒܰܝܬܰܝܕ̥ܰܗ. 39ܘܟ݄ܬ ܗ̄ܘܰܝ ܠܰܗ ܚܳܬ̥ܳܐ ܕ݄ܐܫܡܰܗ ܡܰܪܝܰܡ، ܘܰܐܬ̥ܝܳܐ ܝܰܬܺܝܒ̥ܳܐ ܓܰܒ ܪ̈ܰܓ̥ܠܳܬ̥ܶܗ ܕܡܳܪܰܢ، ܘܫ݄ܡܥܳܐ ܗ̄ܘܰܐ ܗ̄ܰܡّܰܐܡܪ̈ܰܝܕ̥ܶܗ. 40ܘܡܳܪܬܳܐ ܠܒܺܝܟܬܳܐ ܗ̄ܘܰܐ ܒܬܶܫܡܶܫܬܳܐ ܪܰܒܬ̥ܳܐ. ܘܰܐܬ̥ܝܳܐ ܐ݄ܡّܳܪ̱ܐ ܠܶܗ: ”ܡܳܪܝ، ܠܳܐ ܚܰܪܽܒ̥ ܠܳܟ̥ ܕܚܳܬ̥ܺܝ ܛܪܶܐ ܠܰܗ ܠܺܝ ܒܶܠܚܽܘܕ̥ܺܝ ܕ݄ܡܫܰܡܫܳܐ ܐ̱ܢܳܐ، ܐܡܰܪ ܠܰܗ ܕܳܐܬ̥ܝܳܐ ܡܥܰܕܪܳܐ ܠܺܝ.“ 41ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܰܗ: ”ܡܳܪܬܳܐ، ܡܳܪܬܳܐ، ܟܡ݄ܠܒܳܟܰܬ ܘܟܳܩ݄ܠܩܰܬ ܥܰܠ ܡܶܕ̈ܳܢܶܐ ܓ̥ܰܠܰܒܶܐ، 42ܚܰܕ̱ ܝܳܐ ܕܟܳܐܒ݄ܥ. ܘܡܰܪܝܰܡ ܓܒܶܐ ܠܰܗ ܗ̄ܺܝ ܡܢܳܬ̥ܳܐ ܛܰܒ̥ܬܳܐ، ܗܰܝܳܐ ܕܠ݄ܐ ܓܡܺܝܡܳܕ̥ܳܐ ܡܶܢܰܗ.“

Currently Selected:

ܡܓܰܠܝܘܢ ܕܠܘܩܐ 10: ܟܬܒܐ

Highlight

Copy