ܡܓܰܠܝܘܢ ܕܠܘܩܐ 9

ܝܶܫܽܘܥ ܟ݄ܡܫܰܕ݄ܪ ܗ̄ܰܬܪܰܥܣܰܪ ܬܰܠܡܺܝܕ̥̈ܶܐ ܠܺܗ̄ܝ ܣܒܰܪܬ̥ܳܐ

ܡܬܝ 10‏:5‏‐15؛ ܡܪܩܘܣ 6‏:7‏‐13

1ܘ݄ܩܪܶܐ ܠܶܗ ܝܶܫܽܘܥ ܗ̄ܰܬܪܰܥܣܰܪܰܝܕ̥ܶܗ، ܘܗܽܒ̥ ܠܰܗ ܠّܶܗ ܚܰܝܠܳܐ ܘܫܽܘܠܛܳܢܳܐ ܥܰܠ ܟܽܘܠّܶܗ ܗ̄ܰܫّܺܐܕ̈ܶܐ ܘܰܟّܶܐܒ̥̈ܶܐ ܕܡܰܢܺܝܚܺܝ. 2ܘ݄ܡܫܰܕܪܺܝ ܠܶܗ ܕܟܳܪܙܺܝ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ ܘ݄ܕܡܰܢܺܝܚܺܝ ܗ̄ܰܟّܰܐܺܝܒ̥̈ܶܐ. 3ܘܐܡ݄ܪ ܠܰܗ ܠّܶܗ: ”ܠܳܐ ܫ݄ܩܠܺܝܬܽܘ ܡܶܕܶܐ ܠܽܗ̄ܘ ܕܰܪܒܳܐ: ܠܳܐ ܚܰܛܪܳܐ ܘܠܳܐ ܟܺܝܣܳܐ (ܕܽܗ̄ܘ ܙܘܳܕܳܐ)، ܘܠܳܐ ܠܰܚܡܳܐ ܘܠܳܐ ܡܳܠܳܐ (ܙܽܘܙ̈ܶܐ) ܘܠܳܐ ܗ̄ܘܰܠܟ̥ܽܘ ܬܰܪܬܶܝ ܩܶܡ݄ܣܝ̈ܳܬ̥ܳܐ. 4ܘܠܰܐܝܢܰܐ ܒܰܝܬܳܐ ܕܥܳܒܪܺܝܬܽܘ ܠܶܗ، ܬܰܡܳܐ ܦܽܘܫܽܘ، ܘܡܶܢ̱ ܬܰܡܳܐ ܢܦܰܩܽܘ. 5ܘ݄ܠܡܰܢ ܕܠܳܐ ܡܰܩܒܠ݄ܢܟ̥ܽܘ، ܗ̄ܺܝ ܢܰܩܠܐ ܕܢܳܦܩܺܝܬܽܘ ܡܺܗ̄ܝ ܡܕ̥ܺܝܢ̱ܬܰܝܳܐ، ܗ̄ܽܘ ܥܰܦܪܳܐ ܣܬܶܝ ܡܶܢ̱ ܪ̈ܰܓ̥ܠܰܝܟ̥ܽܘ ܢܦܰܨܽܘ ܠܶܗ ܐܰܥܠܰܝّܶܗ ܠܺܗ̄ܝ ܣܳܗܕܽܘܬ̥ܳܐ.“ 6ܘܢܰܦܺܝܩܺܝ ܗ̄ܰܫܠܺܝܚ̈ܶܐ، ܘܟܳܪܟ̥ܺܝ ܗ̄ܘܰܘ̱ ܒܰܩّ݄ܪ̈ܝܰܘܳܬ̥ܳܐ ܘܒܰܡܕ̥̈ܺܝܢܳܬ̥ܳܐ، ܘ݄ܡܣܰܒܪܺܝ ܗ̄ܘܰܘ̱ ܘܡܰܢܺܝܚܺܝ ܒܟܽܘܠ ܕܽܘܟܬ̥ܳܐ.

ܗ̄ܺܝ ܡܕܰܘܡܪܳܢܽܘܬ̥ܳܐ ܕܗܶܪܳܘܕ̥ܶܣ

ܡܬܝ 14‏:1‏‐21؛ ܡܪܩܘܣ 6‏:14‏‐29

7ܘܫܰܡ݄ܥ ܗܶܪܳܘܕ̥ܶܣ ܗ̄ܽܘ ܪܺܝܫܳܐ ܕܽܗ̄ܘ ܪܽܘܒ̥ܥܳܐ ܥܰܠ ܟܽܘܠّܶܗ (ܗ̄ܰܚّܰܝ̈ܠܶܐ) ܕܳܗ̄ܘ݄ܢ ܗ̄ܘܰܘ̱ ܒܺܐܝܕ̥ܶܗ (ܕܝܶܫܽܘܥ)، ܘܡܺܝܕܰܘܡܰܪ ܗ̄ܘܰܐ، ܡܺܐܝܕ̥ܶܗ ܕܗ݄ܢ ܢܳܫ̈ܶܐ ܐ݄ܡّܺܪ̱ܝ ܗ̄ܘܰܘ̱: ܝܽܘܚܰܢܳܢ ܩܰܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ. 8ܘ݄ܚܪ̈ܶܢܶܐ ܐ݄ܡّܺܪ̱ܝ ܗ̄ܘܰܘ̱: ܐܶ‌ܠܺܝܳܐ ܚܙܶܐ، ܘ݄ܚܪ̈ܶܢܶܐ: ܢܒܺܝܳܐ ܡܰܢ̱ ܢܒܺܝ̈ܶܐ ܩܰܕ̱ܡܳܝ̈ܶܐ ܩܰܝ݄ܡ. 9ܘܗܶܪܳܘܕ̥ܶܣ ܐܡ݄ܪ ܠܶܗ: ”ܪܺܝܫܶܗ ܕܝܽܘܚܰܢܳܢ ܐܳܢܳܐ ܩܛ݄ܥ ܠܺܝ، ܘܡܰܢܝܳܐ ܗܰܢܳܐ ܕ݄ܟܫܳܡܰܥ ܐ̱ܢܳܐ ܐܰܥܠܶܗ ܗܰܢܺܝ؟“ ܘܳܐܒܰܥ ܗ̄ܘܰܐ ܕܚܳܙܶܐ ܠܶܗ.

ܝܶܫܽܘܥ ܟܡܰܣܒ̥݄ܥ ܚܰܡܫܰܐܠܦܳܐ

ܡܬܝ 14‏:13‏‐21؛ ܡܪܩܘܣ 6‏:30‏‐44؛ ܝܘܚܢܢ 6‏:1‏‐14

10ܘܺܗ̄ܝ ܢܰܩܠܐ ܕܕܰܥܺܝܪܺܝ ܗ̄ܰܫܠܺܝܚ̈ܶܐ، ܐܡ݄ܪّܶܗ ܠܝܶܫܽܘܥ ܟܽܘܠ ܡܶܕܶܐ ܕܣ݄ܡّܶܗ، ܘܡܰܘܒܠܺܝ ܠܶܗ ܒܶܠܚܽܘܕ̥ܰܝّܶܗ ܠܰܐܬ̥ܪܳܐ ܡܰܕ̥ܒܪܳܐ ܕܒܶܝܬ̥ ܨܰܝܳܕܳܐ. 11ܐܶ‌ܠܳܐ ܗ̄ܺܝ ܢܰܩܠܐ ܕܰܐܕ̥ܺܝܥܺܝ ܗ̄ܰܢ ܢܳܫ̈ܶܐ، ܐܰܙّ݄ܢ ܒ݄ܬ̥ܪܶܗ، ܘܗܺܝّܶܗ ܡܰܩܒܶܠ ܠܰܗ ܠّܶܗ ܘ݄ܫܓ̥ܺܝܠ ܐܰܥܡܰܝّܶܗ ܥܰܠ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ، ܘܡܰܢ݄ܚ ܗ̄ܘܰܐ ܠܰܐܝܢܰܐ ܕܟܳܐܒܰܥّܶܗ ܐܳܣܝܽܘܬ̥ܳܐ. 12ܘܺܗ̄ܝ ܢܰܩܠܐ ܕ݄ܡܫܰܪܶܐ ܠܶܗ ܠܽܗ̄ܘ ܝܰܘܡܳܐ ܕܓܳܢܶܐ، ܡܩܰܪܰܒّ̥ܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܐܡ݄ܪّܰܗ ܠܶܗ: ܫܪܰܝ ܗ̄ܰܢ ܢܳܫ̈ܶܐ ܕ݄ܐܙّ݄ܢ ܠܰܩّ݄ܪ̈ܝܰܘܳܬ̥ܳܐ ܕܚܶܕ̥ܳܪܰܢ ܘܠܰܟّܰܦܪ̈ܽܘܢܶܐ ܕܫܳܪ݄ܢ ܐܰܒّܶܗ، ܘ݄ܕܚܳܙ݄ܢّܶܗ ܡܽܐܘܟܠܳܐ، ܥܰܠ ܕܟ݄ܬܢܰܐ ܒܰܐܬ̥ܪܳܐ ܡܰܕ̥ܒܪܳܐ. 13ܝܶܫܽܘܥ ܐܡ݄ܪ ܠܰܗ ܠّܶܗ: ܗܰܒ̥ܽܘܢّܶܗ ܗܰܬܽܘ ܕܳܐܟ̥ܠܺܝ. ܘܗ݄ܢّܶܝ ܐܡ݄ܪّܶܗ: ”ܠܰܝ̱ܬ ܠܰܢ ܙ݄ܕ ܡܶܢ̱ ܚܰܡّ݄ܫ ܛܰܠܡ̈ܶܐ ܕܠܰܚܡܳܐ ܘܬܰܪܬܶܝ ܢܽܘܢ̈ܶܐ، ܐܶ‌ܠܳܐ ܐܶܢ ܐܰܙّܰܢ ܘ݄ܙܒ̥݄ܢ ܠܰܢ ܡܽܐܘܟܠܳܐ ܠܽܗ̄ܘ ܥܰܡܰܢܳܐ ܟܽܘܠܶܗ!“ 14ܥܰܠ ܕܳܗ̄ܘ݄ܢ ܗ̄ܘܰܘ̱ ܠܰܐܦ ܚܰܡܫܰܐܠܦܳܐ ܓܰܒܪ̈ܶܐ. ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܡܰܘܬܶܒ̥ܽܘܢّܶܗ ܚܰܡܫܺܝ ܚܰܡܫܺܝ.“ 15ܘܗܰܘܟ̥ܰܐ ܣ݄ܡّܶܗ ܗ̄ܰܬّܰܠܡܺܝܕ̥̈ܶܐ ܘܡܰܘܬܰܒّ̥ܶܗ ܠܟܘ̇ܠّܶܗ. 16ܘܡ݄ܕ ܠܶܗ ܝܶܫܽܘܥ ܗܰܢ݄ܟ ܗ̄ܰܚّܰܡّ݄ܫ ܛܰܠܡ̈ܶܐ ܕܠܰܚܡܳܐ ܘܬܰܪܬܶܝ ܢܽܘܢ̈ܶܐ، ܘܚ݄ܪ ܠܶܗ ܒܺܗ̄ܝ ܫܡܰܝܳܐ ܘ݄ܡܒܰܪܰܟ̥ ܠܶܗ ܘ݄ܩܨܶܐ ܠܶܗ ܘܗܽܒ̥ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ ܕܡܰܚܬܺܝ ܠܰܗ̄ܢ ܢܳܫ̈ܶܐ. 17ܘܰܐܟ̥݄ܠّܶܗ ܟܽܘܠّܶܗ ܘܣܰܒ̥ܺܝܥܺܝ ܘܡ݄ܕّܶܗ ܬܪܰܥܣܰܪ ܣ̈ܰܠܶܐ ܡܰܢ̱ ܩّܰܨܝ̈ܶܐ ܕܙܰܝܺܝܕܺܝ.

ܫܶܡܥܽܘܢ ܟܡܰܘܕܶܐ ܒܺܗ̄ܝ ܐܰ‌ܠܳܗܽܘܬ̥ܳܐ ܕܝܶܫܽܘܥ

ܡܬܝ 16‏:13‏‐19؛ ܡܪܩܘܣ 8‏:27‏‐29

18ܘܺܗ̄ܝ ܢܰܩܠܐ ܕ݄ܡܨܰܠܶܐ ܗ̄ܘܰܐ ܠܚܽܘܕ̥ܶܗ، ܘܰܬّܰܠܡܺܝܕ̥̈ܰܝܕ̥ܶܗ ܐܰܥܡܶܗ، ܡܫܰܐܺܠܺܝ ܠܶܗ ܘܐܡ݄ܪ ܠܶܗ: ”ܡܰܢܝܳܐ ܟ݄ܐܡّܺܪ̱ܝ ܐܰܥܠܺܝ ܗ̄ܰܢ ܢܳܫ̈ܶܐ ܕܟ݄ܬ ܐ̱ܢܳܐ؟“ 19ܘܡܰܕܥܰܪّܶܗ ܘܐܡ݄ܪّܰܗ ܠܶܗ: ”ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ، ܘ݄ܚܪ̈ܶܢܶܐ: ܐܶ‌ܠܺܝܳܐ، ܘ݄ܚܪ̈ܶܢܶܐ: ܢܒܺܝܳܐ ܡܰܗ̄ܢ ܢܒܺܝ̈ܶܐ ܩܰܕ̱ܡܳܝ̈ܶܐ ܕܩܰܝ݄ܡ.“ 20ܘܐܡ݄ܪ ܠܰܗ ܠّܶܗ: ”ܘܗܰܬܽܘ ܡܰܢ ܟ݄ܐܡّܺܪ̱ܝܬܽܘ ܕܟ݄ܬ ܐ̱ܢܳܐ؟“ ܡܰܕܥܰܪ ܠܶܗ ܫܶܡܥܽܘܢ ܘܐܡ݄ܪ ܠܶܗ: ”ܡܫܺܝܚܳܐ ܕܰܐ‌ܠܳܗܳܐ.“ 21ܘܗܺܝّܶܗ (ܝܶܫܽܘܥ) ܡܥܰܝܰܛ ܠܶܗ ܐܰܥܠܰܝّܶܗ ܘ݄ܡܙܰܗܪܺܝ ܠܶܗ ܕܠ݄ܐ ܐܡّܺܪ̱ܝ ܠܢܳܫܳܐ.

ܡܫܺܝܚܳܐ ܟܡܰܘܕ̥݄ܥ ܥܰܠ ܗ̄ܽܘ ܚܰܫܰܝܕ̥ܶܗ ܘܽܗ̄ܘ ܡܰܘܬܰܝܕ̥ܶܗ ܘܺܗ̄ܝ ܩܝܰܡܬܰܝܕ̥ܶܗ

ܡܬܝ 16‏:20‏‐28؛ ܡܪܩܘܣ 8‏:30‏‐38؛ 9‏:1

22ܘܐܡ݄ܪ ܠܰܗ ܠّܶܗ: ”ܐܰܒܪܶܗ ܕܢܳܫܳܐ ܓ݄ܕܛܳܥ݄ܢ ܚܰܫܳܐ ܪܰܒܳܐ، ܘܠ݄ܐ ܟܡܺܝܬܰܩܒ݄ܠ ܡܰܢ̱ ܩّܰܫ̈ܶܐ ܘܡܰܢ̱ ܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ، ܘܓ݄ܕܩܳܛܠܺܝ ܠܶܗ، ܐܶ‌ܠܳܐ ܒܽܗ̄ܘ ܝܰܘܡܳܐ ܕܰܬܠܳܬ̥ܳܐ ܓ݄ܕܩܳܝ݄ܡ.“ 23ܘܳܐܡܰܪ ܗ̄ܘܰܐ ܩ݄ܕ̱ܡ ܟܽܘܠ ܢܳܫܳܐ: ”ܡܰܢ ܕܳܐܒ݄ܥ ܐܳܬ̥ܶܐ ܒ݄ܬ̥ܪܺܝ ܛܪܳܐ ܟܳܦ݄ܪ ܒܢܰܦܫܶܗ ܘܛܳܥ݄ܢ ܗ̄ܽܘ ܨܠܺܝܒܰܝܕ̥ܶܗ ܟܽܘܠ ܝܰܘܡܳܐ ܘܳܐܬ̥ܶܐ ܒ݄ܬ̥ܪܺܝ. 24ܡܺܐܝܕ̥ܶܗ ܕܡܰܢ ܕܳܐܒ݄ܥ ܕܡܰܚܶܐ ܢܰܦܫܶܗ ܟ݄ܡܣܰܟܰܪ ܠܰܗ، ܐܶ‌ܠܳܐ ܡܰܢ ܕ݄ܡܣܰܟ݄ܪ ܢܰܦܫܶܗ ܡ݄ܛܠܳܬ̥ܺܝ (ܠܰܫܰܢܺܝ)، ܗܰܢܳܐ ܟܡܰܚܶܐ ܠܰܗ. 25ܘܡ݄ܢ ܓܡܺܝܗܰܢܶܐ ܗ̄ܽܘ ܢܳܫܳܐ ܕܪܳܒ݄ܚ ܗ̄ܽܘ ܥܳܠܡܳܐ ܟܽܘܠܶܗ، ܐܶ‌ܠܳܐ ܡܣܰܟ݄ܪ ܢܰܦܫܶܗ ܐܰܘ ܚܳܣܰܪ ܠܰܗ. 26ܘܡܰܢ ܕܡܺܝܢܰܟ݄ܦ ܐܶܒܺܝ ܘܒܰܡّܰܐܡܪ̈ܰܝܕ̥ܺܝ، ܓ݄ܕܡܺܝܢܰܟ݄ܦ ܐܶܒܶܗ ܐܰܒܪܶܗ ܕܢܳܫܳܐ ܗ̄ܺܝ ܢܰܩܠܐ ܕܳܐܬ̥ܶܐ ܒܽܗ̄ܘ ܫܽܘܒܚܳܐ ܕܽܗ̄ܘ ܒܰܒܰܝܕ̥ܶܗ ܥܰܡ ܗ̄ܰܡّܰܠܰܐܟ̥̈ܰܝܕ̥ܶܗ ܗ̄ܰܩّܰܕ̈ܺܝܫܶܐ. 27ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܟܺܝܬ ܢܳܫ̈ܶܐ ܕ݄ܟܩܰܝܡܺܝ ܗܰܪܟܶܐ ܕܠ݄ܐ ܓܛ݄ܥܡܺܝ ܗ̄ܽܘ ܡܰܘܬܳܐ ܗܳܠ ܕܚܳܙ݄ܢ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“

ܝܶܫܽܘܥ ܟܓܳܠܶܐ ܐ݄ܫܡܳܐ ܡܽܗ̄ܘ ܫܽܘܒܚܰܝܕ̥ܶܗ

ܡܬܝ 17‏:1‏‐8؛ ܡܪܩܘܣ 9‏:2‏‐8

28ܘܗܰܘܺܝ ܒ݄ܬ̥݄ܪ ܡܰܢ̱ ܗ̄ܰܡّܰܐܡܪ̈ܰܢܺܝ ܒ݄ܬܡܰܢܝܳܐ ܝܰܘܡ̈ܶܐ، ܝܶܫܽܘܥ ܡܰܘܒܶܠ ܠܶܗ ܠܫܶܡܥܽܘܢ ܘ݄ܠܝܰܥܩܽܘܒ ܘ݄ܠܝܽܘܚܰܢܳܢ ܘܣܰܠ݄ܩ ܠܽܗ̄ܘ ܛܽܘܪܳܐ ܕ݄ܡܨܰܠܶܐ. 29ܘܗܺܝّܶܗ ܟ݄ܡܨܰܠܶܐ، ܡܚܰܠ݄ܦ ܗ̄ܽܘ ܚܶܙܘܳܐ ܕܦܳܬ̥ܶܗ ܘܚܰܘܺܝܪܺܝ ܗ̄ܰܠܒܽܘܫ̈ܰܝܕ̥ܶܗ ܘܡܰܒܪܩܺܝ ܗ̄ܘܰܘ̱. 30ܘܟܰܐܠܶܗ ܬܪܶܝ ܓܰܒܪ̈ܶܐ ܡ݄ܫܓ̥ܳܠܺܝ ܗ̄ܘܰܘ̱ ܐܰܥܡܶܗ ܕܟ݄ܬܢܶܝ ܡܽܘܫܶܐ ܘܶܐ‌ܠܺܝܳܐ 31ܕ݄ܚܙ݄ܢ ܒܬܶܫܒܽܘܚܬܳܐ. ܘ݄ܐܡّܺܪ̱ܝ ܗ̄ܘܰܘ̱ ܥܰܠ ܗ̄ܽܘ ܢܦܳܩܰܝܕ̥ܶܗ ܗܰܢܳܐ ܕܓ݄ܕܟܳܡ݄ܠ ܒܽܐܘܪܶܫܠܶܡ. 32ܘܫܶܡܥܽܘܢ ܘܗܰܢܺܝ ܕܰܐܥܡܶܗ ܝܰܩܺܝܪܳܐ ܗ̄ܺܝ ܫܰܢܬ̥ܳܐ ܐܰܥܠܰܝّܶܗ، ܘ݄ܒܥܰܣܩܽܘܬ̥ܳܐ ܩܰܝܺܝܡܺܝ ܘ݄ܚܙܰܠّܶܗ ܗ̄ܽܘ ܫܽܘܒܚܰܝܕ̥ܶܗ ܘܠܰܬܪ̈ܰܢ݄ܟ ܕܩܰܝܡܺܝ ܗ̄ܘܰܘ̱ ܣܺܝܕ̥ܶܗ.

33ܘܗ݄ܢّܶܝ ܟܡ݄ܦܪܳܫܺܝ ܡܶܢܶܗ، ܫܶܡܥܽܘܢ ܐܡ݄ܪ ܠܶܗ ܠܝܶܫܽܘܥ: ”ܡܰܠܦܳܢܳܐ، ܫܰܦܺܝܪܳܐ ܝܳܐ ܐܶ‌ܠܰܢ ܕܗܰܪܟܶܐ ܗܳܘܺܝܢܰܐ، ܘܣܰܝܡܺܝܢܰܐ ܬܠ݄ܬ̥ ܡ̈ܛܰܠܶܐ، ܚܕ̥ܳܐ ܐܶ‌ܠܳܟ̥ ܘ݄ܚܕ̥ܳܐ ܠܡܽܘܫܶܐ ܘ݄ܚܕ̥ܳܐ ܠܶܐ‌ܠܺܝܳܐ.“ ܘܠܳܐ ܐܕ̥ܰܥ ܗ̄ܘܰܐ ܡ݄ܢ ܟܳܐܡ݄ܪ. 34ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܗܰܘܺܝ ܥܰܝܡܳܐ ܘܣ݄ܡ ܠܶܗ ܛܶܠܳܠܳܐ ܐܰܥܠܰܝّܶܗ، ܘܙܰܝܺܝܥܺܝ ܗ̄ܺܝ ܢܰܩܠܐ ܕ݄ܚܙܰܠّܶܗ ܠܡܽܘܫܶܐ ܘܠܶܐ‌ܠܺܝܳܐ ܕܥܰܒܺܝܪܺܝ ܒܽܗ̄ܘ ܥܰܝܡܳܐ. 35ܘܩܳܠܳܐ ܗܰܘܺܝ ܡܽܗ̄ܘ ܥܰܝܡܳܐ ܕܟܳܐܡ݄ܪ: ”ܗܰܢܳܐ ܝܳܐ ܗ̄ܽܘ ܐܰܒܪܰܝܕ̥ܺܝ ܗ̄ܽܘ ܚܰܒܺܝܒܳܐ، ܫܡܰܥܽܘ ܠܶܗ.“ 36ܘܺܗ̄ܝ ܢܰܩܠܐ ܕܗܰܘܺܝ ܗ̄ܽܘ ܩܳܠܳܐ، ܚܙܶܐ ܝܶܫܽܘܥ ܠܪܽܘܚܶܗ، ܘܗ݄ܢّܶܝ ܫܰܠ݄ܢ. ܘ݄ܠܢܳܫܳܐ ܠܳܐ ܐܡ݄ܪّܶܗ ܒܰܝّܰܘܡ̈ܳܬ̥ܰܢ݄ܟ ܗ̄ܽܘ ܡܶܕܶܐ ܕ݄ܚܙܰܠّܶܗ.

ܝܶܫܽܘܥ ܟܡܰܢ݄ܚ ܛܰܠܝܳܐ ܕܶܐܒܶܗ ܪܽܘܚܳܐ ܒܺܝܫܬܳܐ

ܡܬܝ 17‏:14‏‐18؛ ܡܪܩܘܣ 9‏:1‏‐27

37ܘܠܽܗ̄ܘ ܝܰܘܡܳܐ ܕܒ݄ܬ̥ܪܶܗ، ܘܗ݄ܢّܶܝ ܢܰܚ̈ܳܬܶܐ ܡܽܗ̄ܘ ܛܽܘܪܳܐ، ܢܳܫ̈ܶܐ ܓ̥ܰܠܰܒܶܐ ܬܦܺܝܩܺܝ ܐܰܒّܶܗ. 38ܘܓܰܒ̥ܪܳܐ ܚܰܕ̱ ܡܰܗ̄ܢ ܢܳܫ̈ܶܐ ܡܰܙܥܰܩ ܠܶܗ ܘܐܡ݄ܪ ܠܶܗ: ”ܡܰܠܦܳܢܳܐ، ܟܳܐܒܰܥ ܐ̱ܢܳܐ ܡܶܢܳܟ̥، ܡܰܕܥ݄ܪ ܐܰܥܠܺܝ، ܗ̄ܽܘ ܐܰܒܪܰܝܕ̥ܺܝ ܕܟ݄ܬܝܳܐ ܝܺܚܺܝܕ̥ܳܝܳܐ ܐܶ‌ܠܺܝ، 39ܘܪܽܘܚܳܐ ܟܙܳܒܛܳܐ ܠܶܗ، ܘܡܶܚܕ̥ܳܐ ܟܡܰܙܥ݄ܩ ܘܓܳܢ݄ܨ ܥܰܪ̈ܫܳܢܶܗ ܘ݄ܟܡܰܘܦ݄ܩ ܪ̈ܽܘܩܶܐ، ܘܠ݄ܐ ܟܛ݄ܪܝܳܐ ܡܶܢܶܗ ܗܳܠ ܕܣܳܚܢܳܐ ܠܶܗ. 40ܘܰܐܒ݄ܥ ܐ̱ܢܳܐ ܡܰܢ̱ ܬّܰܠܡܺܝܕ̥̈ܰܝܕ̥ܳܟ̥ ܕܡܰܘܦܩܺܝ ܠܶܗ ܘܠܳܐ ܩܰܕܺܝܪܺܝ.“ 41ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ: ”ܐܰܗ ܝܰܐ ܕܳܪܳܐ ܠܳܐ ܡܗܰܝܡܢܳܐ ܘ݄ܦܬܺܝܠܳܐ، ܗܳܠ ܠܶܐܡܰܐ ܓܕܳܗ̄ܘܶܐ ܐ̱ܢܳܐ ܓܰܒܰܝܟ̥ܽܘ ܘܛܳܥܰܢ ܐ̱ܢܳܐ ܠܟ̥ܽܘ؟ ܡܩܰܪܽܒ̥ ܗ̄ܽܘ ܐܰܒܪܰܝܕ̥ܳܟ̥ ܠܰܗ̄ܪܟܶܐ.“ 42ܘܗܺܝّܶܗ ܟܳܡܩܰܪܰܒ̥ ܠܶܗ، ܗ̄ܽܘ ܕܰܝܘܳܐ ܡܚܰܠܰܩ ܠܶܗ ܘ݄ܡܥ݄ܣ ܠܶܗ. ܘܡܰܙܥܰܩ ܠܶܗ ܝܶܫܽܘܥ ܥܰܠ ܗ̄ܺܝ ܪܽܘܚܳܐ ܒܺܝܫܬܳܐ، ܘܡܰܢ݄ܚ ܠܶܗ ܠܽܗ̄ܘ ܛܰܠܝܳܐ ܘܗܽܒ̥ ܠܶܗ ܠܽܗ̄ܘ ܒܰܒܳܐ. 43ܘܟܽܘܠّܶܗ ܡܕܰܘܡܪܺܝ ܒܺܗ̄ܝ ܪܰܒܽܘܬ̥ܳܐ ܕܰܐ‌ܠܳܗܳܐ. ܘܺܗ̄ܝ ܢܰܩܠܐ ܕܟܽܘܠ ܢܳܫܳܐ ܡܺܝܕܰܘܡܰܪ ܗ̄ܘܰܐ ܥܰܠ ܟܽܘܠ ܕܣܳܝܰܡ ܗ̄ܘܰܐ ܝܶܫܽܘܥ، ܐܡ݄ܪ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ:

ܢܰܩܠܐ ܚܪܶܬܳܐ ܝܶܫܽܘܥ ܟܡܰܘܕ̥݄ܥ ܥܰܠ ܗ̄ܽܘ ܡܰܘܬܰܝܕ̥ܶܗ ܘܺܗ̄ܝ ܩܝܰܡܬܰܝܕ̥ܶܗ

44”ܡܰܚܶܬܽܘ ܗ̄ܰܡّܰܐܡܪ̈ܰܢܺܝ ܒܰܐܕ̥̈ܢܰܝܟ̥ܽܘ: ܐܰܒܪܶܗ ܕܢܳܫܳܐ ܓ݄ܕܡܺܝܬܰܫܠ݄ܡ ܒܺܐܝܕ̥̈ܶܐ ܕܰܗ̄ܢ ܢܳܫ̈ܶܐ.“ 45ܐܶ‌ܠܳܐ ܗ݄ܢّܶܝ ܠܰܐ ܐܕ̥ܺܝܥܺܝ ܗ̄ܽܘ ܡܰܐܡܪܰܢܳܐ ܡܺܐܝܕ̥ܶܗ ܕ݄ܡܟܰܣܝܳܐ ܗ̄ܘܰܐ ܡ݄ܢّܶܗ ܕܠܳܐ ܐܕ̥ܥܺܝ ܠܶܗ، ܘܙܰܝܺܝܥܺܝ ܕ݄ܡܫܰܐܺܠܺܝ ܠܶܗ ܥܰܠ ܗ̄ܽܘ ܡܰܐܡܪܰܢܳܐ.

ܡܰܢܝܳܐ ܪܰܒ ܒܺܗ̄ܝ ܡܰܠܟܽܘܬ̥ܳܐ ܕܺܗ̄ܝ ܫܡܰܝܳܐ؟

ܡܬܝ 18‏:1‏‐5؛ ܡܪܩܘܣ 9‏:33‏‐37

46ܘܡܰܐܡܪܳܐ ܘܬܶܢܳܝܳܐ ܗܰܘܺܝ ܒܰܝܢܳܬ̥ܰܝّܶܗ ܥܰܠ ܕܡܰܢܝܳܐ ܗ̄ܽܘ ܪܰܒܳܐ ܕܒܰܝܢܳܬ̥ܰܝّܶܗ. 47ܘܝܶܫܽܘܥ ܐܰܕ̥݄ܥ ܡ݄ܢ ܟܚܳܫܒ̥ܺܝ ܒܠܶܒܰܝّܶܗ. ܘܡ݄ܕ ܠܶܗ ܛܰܠܝܳܐ ܘܡܰܩ݄ܡ ܠܶܗ ܥܰܡ ܓܰܒܶܗ. 48ܘܐܡ݄ܪ ܠܰܗ ܠّܶܗ: ”ܡܰܢ ܕܡܰܩܒ݄ܠ ܛܰܠܝܳܐ ܐܟ̥ ܕܰܗ̄ܢܳܐ ܒ݄ܐܫܡܺܝ، ܐܶ‌ܠܺܝ ܟܡܰܩܒ݄ܠ. ܘܡܰܢ ܕܡܰܩܒܶܠ ܠܺܝ، ܟܡܰܩܒ݄ܠ ܠܡܰܢ ܕ݄ܡܫܰܕܰܪ ܠܶܗ ܠܺܝ، ܡܺܐܝܕ̥ܶܗ ܕܰܐܝܢܰܐ ܝܳܐ ܗ̄ܽܘ ܙܥܽܘܪܳܐ ܕܒܰܝܢܳܬ̥ܰܝܟ̥ܽܘ ܗܰܢܳܐ ܓܕܳܗ̄ܘܶܐ ܗ̄ܽܘ ܪܰܒܳܐ.“

ܡܰܢ ܕܠܰܐ ܗ̄ܘܺܝ ܡܩܰܒ݄ܠ ܕ݄ܬ̥ܟ̥ܽܘ ܐܰܥܡܰܝܟ̥ܽܘ ܝܳܐ

ܡܪܩܘܣ 9‏:38‏‐40

49ܘܡܰܕܥܰܪ ܠܶܗ ܝܽܘܚܰܢܳܢ ܘܐܡ݄ܪ ܠܶܗ: ”ܡܰܠܦܳܢܳܐ ܚܙܶܐ ܠܰܢ ܢܳܫܳܐ ܕܟܳܡܰܘܦ݄ܩ ܫܺܐܕ̈ܶܐ ܒ݄ܐܫܡܳܟ̥، ܘܡܰܟܠܶܐ ܠܰܢ ܥܰܠ ܕܠܰܐ ܐܬ̥ܺܝ ܐܰܥܡܰܢ ܒ݄ܬ̥ܪܳܟ̥.“ 50ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܠܳܐ ܡܰܟܠܺܝܬܽܘ! ܡܰܢ ܕܠܰܝ̱ܬ ܝܳܐ ܡܩܰܒ݄ܠ ܕ݄ܬ̥ܟ̥ܽܘ ܐܰܥܡܰܝܟ̥ܽܘ ܝܳܐ.“

ܗ̄ܽܘ ܡܰܐܙܠܳܐ ܕܝܶܫܽܘܥ ܠܽܐܘܪܶܫܠܶܡ

ܗ̄ܰܫّܳܡܪ̈ܳܝܶܐ ܠ݄ܐ ܟܡܰܩܒܠܺܝ ܝܶܫܽܘܥ

51ܘܗܰܘܺܝ ܗ̄ܺܝ ܢܰܩܠܐ ܕܩܰܪܽܒ̥ ܗ̄ܽܘ ܙܰܒܢܳܐ ܕܽܗ̄ܘ ܣܠܳܩܰܝܕ̥ܶܗ، ܗܽܒ̥ ܠܶܗ ܦܳܬ̥ܶܗ ܕ݄ܐܙّܶܗ ܠܽܐܘܪܶܫܠܶܡ. 52ܘ݄ܡܫܰܕܰܪ ܠܶܗ ܫܠܺܝܚ̈ܶܐ ܩܰܕ̱ܡܽܘܬ̥ܶܗ، ܘܰܐܙّ݄ܢ ܥܰܒܺܝܪܺܝ ܠܺܗ̄ܝ ܩܪܺܝܬ̥ܳܐ ܕܰܫّܳܡܪ̈ܳܝܶܐ ܕ݄ܡܛܰܝܒܺܝ ܠܶܗ. 53ܘܠܳܐ ܡܰܩܒܰܠّܰܗ ܠܶܗ ܥܰܠ ܕܡܰܚ݄ܬ ܗ̄ܘܰܝ ܠܶܗ ܩܽܘܕ̱ܡܶܗ ܕ݄ܐܙّܶܗ ܠܽܐܘܪܶܫܠܶܡ. 54ܘܺܗ̄ܝ ܢܰܩܠܐ ܕ݄ܚܙܰܠّܶܗ ܝܰܥܩܽܘܒ ܘܝܽܘܚܰܢܳܢ، ܗ̄ܰܬّܰܠܡܺܝܕ̥̈ܰܝܕ̥ܶܗ، ܐܡ݄ܪّܰܗ ܠܶܗ: ”ܡܳܪܰܢ، ܟ݄ܐܒܥܰܬ ܕ݄ܐܡّܺܪ̱ܝܢܰܐ ܘܢ݄ܚܬܳܐ ܢܽܘܪܳܐ ܡܺܗ̄ܝ ܫܡܰܝܳܐ ܘܡܰܣܺܝܦܰܠّܶܗ ܐܟ̥ ܕܣ݄ܡ ܠܶܗ ܐܶ‌ܠܺܝܳܐ؟“ 55ܘܚ݄ܪ ܠܶܗ ܐܰܒّܶܗ ܝܶܫܽܘܥ ܘܡܰܙܥܰܩ ܠܶܗ ܐܰܥܠܰܝّܶܗ ܘܐܡ݄ܪ ܠܶܗ: ”ܠ݄ܐ ܟ݄ܐܕ̥ܥܺܝܬܽܘ ܕܰܐܝܢܰܐ ܪܽܘܚܳܐ ܗܰܬܽܘ. 56ܡܺܐܝܕ̥ܶܗ ܕܰܐܒܪܶܗ ܕܢܳܫܳܐ ܠܰܐ ܐܬ̥ܺܝ ܕ݄ܡܣܰܟ݄ܪ ܢܰܦܫ̈ܳܬ̥ܳܐ ܐܶ‌ܠܳܐ ܕܳܗ̄ܒܰܠّܶܗ ܚܰܝ̈ܶܐ.“ ܘܰܐܙّ݄ܢ ܠ݄ܩܪܺܝܬ̥ܳܐ ܚܪܶܬܳܐ.

ܗ̄ܺܝ ܛܳܒ̥ܽܘܬ̥ܳܐ ܕܺܗ̄ܝ ܩܪܰܝܬܳܐ ܕܰܐ‌ܠܳܗܳܐ

ܡܬܝ 8‏:19‏‐22

57ܘܗ݄ܢّܶܝ ܐܰܙ̈ܳܠܶܐ ܒܽܗ̄ܘ ܕܰܪܒܳܐ، ܢܳܫܳܐ ܐܡ݄ܪ ܠܶܗ ܠܶܗ: ”ܓܕܳܐܬ̥ܶܐ ܐ̱ܢܳܐ ܒ݄ܬ̥ܪܳܟ̥ ܠܰܐܝܟܳܐ ܕ݄ܐܙّܳܟ̥، ܡܳܪܝ.“ 58ܘܐܡ݄ܪ ܠܶܗ ܠܶܗ ܝܶܫܽܘܥ: ”ܗ̄ܰܬّܰܥ̈ܠܶܐ ܟ݄ܬّܶܗ ܢܰܩܒ̥̈ܶܐ ܘܰܛّܰܝܪ̈ܶܐ ܕܺܗ̄ܝ ܫܡܰܝܳܐ ܟ݄ܬّܶܗ ܩܶܢ̈ܶܐ، ܐܶ‌ܠܳܐ ܐܰܒܪܶܗ ܕܢܳܫܳܐ ܠܰܝ̱ܬ ܠܶܗ ܐܰܝܟܳܐ ܕܣܳܡ݄ܟ̥ ܪܺܝܫܶܗ.“ 59ܘܐܡ݄ܪ ܠܶܗ ܠ݄ܚܪܶܢܳܐ: ”ܬܳܟ̥ ܒ݄ܬ̥ܪܺܝ.“ ܘܗܺܝّܶܗ ܐܡ݄ܪ ܠܶܗ ܠܶܗ: ”ܡܳܪܝ، ܛܪܰܝ ܠܺܝ ܒܺܗ̄ܝ ܩܰܕ̱ܡܰܝܬܳܐ ܕ݄ܐܙّܺܝ ܩܳܒ̥ܰܪ ܐ̱ܢܳܐ ܒܰܒܺܝ.“ 60ܘܐܡ݄ܪ ܠܶܗ ܠܶܗ ܝܶܫܽܘܥ: ”ܛܪܰܝ ܗ̄ܰܡّܺܝ̈ܬ̥ܶܐ ܩܳܒ̥ܪܺܝ ܗ̄ܰܡّܺܝ̈ܬ̥ܰܬّ̥ܶܗ، ܘܗܰܬ ܙܳܟ̥ ܡܣܰܒ݄ܪ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“ 61ܘ݄ܚܪܶܢܳܐ ܐܡ݄ܪ ܠܶܗ ܠܶܗ: ”ܓܕܳܐܬ̥ܶܐ ܐ̱ܢܳܐ ܒ݄ܬ̥ܪܳܟ̥، ܡܳܪܝ، ܐܶ‌ܠܳܐ ܛܪܰܝ ܠܺܝ ܒܺܗ̄ܝ ܩܰܕ̱ܡܰܝܬܳܐ ܐ݄ܙّܺܝ ܓܰܒ ܗ̄ܰܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܺܝ ܘܳܐܡܰܪܢܰܢّܶܗ ܦܘܿܫ ܒ݄ܫܠܳܡܳܐ، ܘܳܐܬ̥ܶܐ ܐ̱ܢܳܐ.“ 62ܘܐܡ݄ܪ ܠܶܗ ܠܶܗ ܝܶܫܽܘܥ: ”ܢܳܫܳܐ ܠ݄ܐ ܟܡܰܚ݄ܬ ܐܺܝܕ̥ܶܗ ܥܰܠ ܗ̄ܺܝ ܣܶܟܬ̥ܳܐ ܕܺܗ̄ܝ ܦܰܕܳܢܳܐ ܘܚܳܝ݄ܪ ܒ݄ܬ̥ܪܶܗ ܘ݄ܟܫܳܘܶܐ ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“

Currently Selected:

ܡܓܰܠܝܘܢ ܕܠܘܩܐ 9: ܟܬܒܐ

Highlight

Copy