ܣܶܦܪܳܐ ܕ݄ܒܪܺܝܬ̥ܳܐ 45

1ܘܠܳܐ ܩܰܕ݄ܪ ܝܰܘܣܶܦ ܕܙܳܒ݄ܛ ܪܽܘܚܶܗ ܩ݄ܕ̱ܡ ܟܽܘܠّܶܗ ܕܩܰܝܡܺܝ ܗ̄ܘܰܘ̱ ܩܽܘܕ̱ܡܶܗ، ܘܐܡ݄ܪ ܠܶܗ: ”ܡܰܘܦܶܩܽܘ ܟܘ̇ܠ ܢܳܫܳܐ ܡܶܢ̱ ܓܰܒܺܝ.“ ܘܠܳܐ ܦܰܝ݄ܫ ܢܳܫܳܐ ܓܰܒܶܗ ܗ̄ܺܝ ܢܰܩܠܐ ܕܡܰܘܕ̥ܰܥ ܠܶܗ ܪܽܘܚܶܗ، ܝܰܘܣܶܦ، ܠܰܗ̄ܢ ܐܰܚ̈ܽܘܢܳܢܰܝܕ̥ܶܗ. 2ܘܡܰܥܠܶܐ ܠܶܗ ܩܳܠܶܗ ܒܒܰܟ̥ܝܳܐ، ܘܫܰܡܺܝܥܺܝ ܗ̄ܰܡّܶܨܪ̈ܳܝܶܐ، ܘ݄ܫܡܺܝܥ ܒܽܗ̄ܘ ܒܰܝܬܳܐ ܕܦܶܪܥܽܘܢ. 3ܘܐܡ݄ܪ ܠܶܗ ܝܰܘܣܶܦ ܠܰܗ̄ܢ ܐܰܚ̈ܽܘܢܳܢܰܝܕ̥ܶܗ: ”ܐܳܢܳܐ ܐ̱ܢܳܐ ܝܰܘܣܶܦ ܐܰܚܽܘܢܰܝܟ̥ܽܘ. ܗܶܫ ܒܰܒܺܝ ܚܰܝܳܐ ܝܳܐ؟“ ܘܠܳܐ ܩܰܕܺܝܪܺܝ ܗ̄ܰܢ ܐܰܚ̈ܽܘܢܳܢܶܐ ܕܡܰܕܥܪܺܝ ܐܰܥܠܶܗ ܒܡܶܕܶܐ ܥܰܠ ܕܙܰܝܺܝܥܺܝ ܡܶܢܶܗ. 4ܘܐܡ݄ܪ ܠܶܗ ܝܰܘܣܶܦ ܠܰܗ̄ܢ ܐܰܚ̈ܽܘܢܳܢܰܝܕ̥ܶܗ: ”ܩܪܰܒ̥ܽܘ ܣܺܝܕܺܝ.“ ܘܩܰܪܺܝܒ̥ܺܝ ܠܣܺܝܕܶܗ. ܘܐܡ݄ܪ ܠܰܗ ܠّܶܗ: ”ܐܳܢܳܐ ܐ̱ܢܳܐ ܝܰܘܣܶܦ ܐܰܚܽܘܢܰܝܟ̥ܽܘ ܕ݄ܡܙܰܒܰܢܟ̥ܽܘ ܠܺܝ ܠܰܡّܶܨܪ̈ܳܝܶܐ. 5ܘܳܐܥܕܳܐ ܛܪܳܐ ܠ݄ܐ ܟܳܪܝܰܠܟ̥ܽܘ، ܘܠܳܐ ܗ̄ܘܝܳܐ ܒܺܝܫܬܳܐ ܒܥܰܝܢ̈ܰܝܟ̥ܽܘ ܕ݄ܡܙܰܒܰܢܟ̥ܽܘ ܠܺܝ ܠܰܗ̄ܪܟܶܐ، ܡܺܐܝܕ̥ܶܗ ܠܰܫܰܢ ܗ̄ܽܘ ܡܽܐܘܟܠܳܐ ܡܫܰܕܰܪ ܠܶܗ ܠܺܝ ܐܰ‌ܠܳܗܳܐ ܩܽܘܕ̱ܡܰܝܟ̥ܽܘ. 6ܥܰܠ ܕܗܰܢܺܝ ܬܰܪܬܶܝ ܐ݄ܫܢ̈ܶܐ ܟܰܦܢܳܐ ܝܳܐ ܒܓܰܘܰܗ ܕܺܗ̄ܝ ܐܰܪܥܳܐ، ܘܗܶܫ ܚܰܡّ݄ܫ ܐ݄ܫܢ̈ܶܐ ܚܪ̈ܶܢܶܐ ܠܰܝܬ ܡܰܢ ܕܙܳܪ݄ܥ ܘ݄ܕܚܳܨ݄ܕ. 7ܘ݄ܡܫܰܕܰܪ ܠܶܗ ܠܺܝ ܐܰ‌ܠܳܗܳܐ ܩܽܘܕ̱ܡܰܝܟ̥ܽܘ ܠܰܫܰܢ ܕܛܳܪܰܠܟ̥ܽܘ ܘܳܗ̄ܒܰܠܟ̥ܽܘ ܚܰܝ̈ܶܐ ܘܦܽܘܪܩܳܢܳܐ ܪܰܒܳܐ ܒܺܗ̄ܝ ܐܰܪܥܳܐ. 8ܘܳܐܥܕܳܐ ܠܳܐ ܗܰܬܽܘ ܡܫܰܕܰܪܟ̥ܽܘ ܠܺܝ ܠܰܗ̄ܪܟܶܐ، ܐܶܠܳܐ ܐܰ‌ܠܳܗܳܐ. ܘܣ݄ܡ ܠܶܗ ܠܺܝ ܒܰܒܳܐ ܠܦܶܪܥܽܘܢ، ܘܡܳܪܳܐ ܥܰܠ ܟܽܘܠܶܗ ܗ̄ܽܘ ܒܰܝܬܰܝܕ̥ܶܗ، ܘܫܰܠܺܝܛܳܐ ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ. 9ܡܰܠܺܝܙܳܐ ܣܠܰܩܽܘ ܠܓܰܒ ܒܰܒܺܝ، ܘܐܡܰܪܽܘ ܠܶܗ ܗܰܘܟ̥ܰܐ ܟܳܐܡ݄ܪ ܗ̄ܽܘ ܐܰܒܪܰܝܕ̥ܳܟ̥ ܝܰܘܣܶܦ: ܣ݄ܡ ܠܶܗ ܠܺܝ ܐܰ‌ܠܳܗܳܐ ܡܳܪܳܐ ܥܰܠ ܡܶܨܪܶܝܢ ܟܽܘܠܰܗ. ܢܚܰܬ ܠܓܰܒܺܝ ܘܠܳܐ ܡܺܝܥܰܘܩܰܬ. 10ܘܺܝܬܰܒ̥ ܒܺܗ̄ܝ ܐܰܪܥܳܐ ܕܓܶܫܳܢ ܘ݄ܗܘܰܝ ܩܰܪܺܝܒ̥ܳܐ ܐܶ‌ܠܺܝ ܗܰܬ ܘܰܗ̄ܢ ܐܰܒܢ̈ܰܝܕ̥ܳܟ̥ ܘܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܳܟ̥، ܘܰܥܘܳܢ̈ܰܝܕ̥ܳܟ̥ ܘܰܬّܰܘܪ̈ܰܝܕ̥ܳܟ̥ ܘܟܘ̇ܠ ܕܟ݄ܬ ܠܳܟ̥، 11ܘ݄ܓܡܰܘܟܰܠ ܐ̱ܢܳܐ ܠܟ̥ܽܘ ܬܰܡܳܐ، ܡܺܐܝܕ̥ܶܗ ܕܚܰܡّ݄ܫ ܐ݄ܫܢ̈ܶܐ ܚܪ̈ܶܢܶܐ ܓܦܳܝ݄ܫ ܗ̄ܽܘ ܟܰܦܢܳܐ، ܕܠ݄ܐ ܐܙّܶܗ ܡܺܝܣܰܟܪܰܬ ܗܰܬ ܘܽܗ̄ܘ ܒܰܝܬܰܝܕ̥ܳܟ̥ ܘܟܘ̇ܠ ܕܟ݄ܬ ܠܳܟ̥. 12ܘܟܰܐܠܶܗ ܥܰܝܢ̈ܰܝܟ̥ܽܘ ܟܚܳܙ݄ܢ، ܘܥܰܝܢ̈ܶܗ ܕܰܐܚܽܘܢܺܝ ܒܶܢܝܳܡܶܝܢ، ܕܦܶܡܺܝ ܝܳܐ ܕܟܳܡ݄ܫܓ̥݄ܠ ܐܰܥܡܰܝܟ̥ܽܘ. 13ܘܡܰܚܘܶܝܽܘ ܠܒܰܒܺܝ ܟܽܘܠܶܗ ܗ̄ܽܘ ܐܺܝܩܳܪܰܝܕ̥ܺܝ ܕ݄ܒܡܶܨܪܶܝܢ، ܘܟܘ̇ܠ ܕ݄ܚܙܰܠܟ̥ܽܘ. ܘܡܰܠܶܙܽܘ ܡܰܢܚܶܬܽܘ ܒܰܒܺܝ ܠܰܗ̄ܪܟܶܐ.“ 14ܘܢܰܦ݄ܠ ܥܰܠ ܩܕ̥ܳܠܶܗ ܕܒܶܢܝܳܡܶܝܢ ܗ̄ܽܘ ܐܰܚܽܘܢܳܐ ܘܒܰܟ̥ܺܝ. ܘܒܶܢܝܳܡܶܝܢ ܒܰܟ̥ܺܝ ܥܰܠ ܩܕ̥ܳܠܶܗ. 15ܘ݄ܢܫ݄ܩ ܠܶܗ ܠܟܽܘܠّܶܗ ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܘܒܰܟ̥ܺܝ ܘܗܺܝّܶܗ ܐܰܥܠܰܝّܶܗ. ܘܒ݄ܬ̥݄ܪܟܶܐ ܡ݄ܫܓ̥ܰܠّܶܗ ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܐܰܥܡܶܗ.

16ܘ݄ܫܡܺܝܥ ܒܽܗ̄ܘ ܒܰܝܬܳܐ ܕܦܶܪܥܽܘܢ ܩܳܠܳܐ ܕܢܳܫ̈ܶܐ ܕܟܳܐܡّܺܪ̱ܝ: ”ܐܰܬ̥݄ܢ ܗ̄ܰܢ ܐܰܚ̈ܽܘܢܳܢܶܐ ܕܝܰܘܣܶܦ.“ ܘܫܰܦ݄ܪ ܗ̄ܽܘ ܡܰܐܡܪܰܢܳܐ ܒܥܰܝܢ̈ܶܐ ܕܦܶܪܥܽܘܢ ܘܥܰܝܢ̈ܶܐ ܕܰܓܪ̈ܶܝܥܰܝܕ̥ܶܗ. 17ܘܐܡ݄ܪ ܠܶܗ ܦܶܪܥܽܘܢ ܠܝܰܘܣܶܦ: ”ܐܰܡܰܪ ܠܰܗ̄ܢ ܐܰܚ̈ܽܘܢܳܢܰܝܕ̥ܳܟ̥ ܗܰܘܟ̥ܰܐ ܣܽܘܡܽܘ: ܡܰܛܥܶܢܽܘ ܗ̄ܰܚܡܳܪ̈ܰܬ̥ܟ̥ܽܘ ܚ̈ܶܛܶܐ ܘܙܳܟ̥ܽܘ ܡܰܘܒܶܠܽܘ ܠܺܗ̄ܝ ܐܰܪܥܳܐ ܕ݄ܟܢܰܥܢ. 18ܘܡܽܘܕܽܘ ܒܰܒܰܝܟ̥ܽܘ ܘܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܰܬ̥ܟ̥ܽܘ ܘܡܰܝܬܰܝܽܘ ܢܶܝ ܠܓܰܒܺܝ، ܘ݄ܓܕܳܗ̄ܒܶܐ ܐ̱ܢܳܐ ܠܟ̥ܽܘ ܗ̄ܺܝ ܐܰܪܥܳܐ ܛܰܒ̥ܬܳܐ ܕܡܶܨܪܶܝܢ، ܘܰܐܟ̥ܽܘܠܽܘ ܗ̄ܽܘ ܡ݄ܫܚܳܐ ܕܺܗ̄ܝ ܐܰܪܥܳܐ. 19ܘܗܰܬ ܟܰܐܠܳܟ̥ ܡܫܰܠܛܳܐ ܗܰܬ، ܐܰܡܰܪ ܠܰܗ̄ܢ ܐܰܚ̈ܽܘܢܳܢܰܝܕ̥ܳܟ̥: ܗܰܘܟ̥ܰܐ ܣܽܘܡܽܘ، ܡܽܘܕܽܘ ܠܟ̥ܽܘ ܡܺܗ̄ܝ ܐܰܪܥܳܐ ܕܡܶܨܪܶܝܢ ܡܰܪ̈ܟܒܳܬ̥ܳܐ ܠܰܗ̄ܢ ܢܶܫ̈ܰܬ̥ܟ̥ܽܘ ܘܠܰܗ̄ܢ ܢܰܥܺܝܡ̈ܰܬ̥ܟ̥ܽܘ. ܘܡܽܘܕܽܘ ܒܰܒܰܝܟ̥ܽܘ ܘܬܳܟ̥ܽܘ. 20ܘܥܰܝܢ̈ܳܬ̥ܰܝܟ̥ܽܘ ܛܪܳܐ ܠܳܐ ܦܰܝܫܺܝ ܥܰܠ ܗ̄ܰܣّܶܦܳܩ̈ܰܬ̥ܟ̥ܽܘ، ܡܺܐܝܕ̥ܶܗ ܕܺܗ̄ܝ ܛܳܒ̥ܽܘܬ̥ܳܐ ܕܺܗ̄ܝ ܐܰܪܥܳܐ ܕܡܶܨܪܶܝܢ ܟܽܘܠܰܗ ܕ݄ܬ̥ܟ̥ܽܘ ܝܳܐ.“ 21ܘܣ݄ܡّܶܗ ܗܰܘܟ̥ܰܐ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ. ܘܗܽܒ̥ ܠܰܗ ܠّܶܗ ܝܰܘܣܶܦ ܡܰܪ̈ܟܒܳܬ̥ܳܐ ܐܟ̥ ܕܐܡ݄ܪ ܠܶܗ ܦܶܪܥܽܘܢ، ܘܗܽܒ̥ ܠܰܗ ܠّܶܗ ܙܘܳܕ̈ܶܐ ܠܽܗ̄ܘ ܕܰܪܒܳܐ. 22ܘܗܽܒ̥ ܠܶܗ ܠܟܘ̇ܠ ܚܰܕ̱ ܙܰܘܓܳܐ ܕ݄ܠܒܽܘܫ̈ܶܐ، ܘ݄ܠܒܶܢܝܳܡܶܝܢ ܗܽܒ̥ ܠܶܗ ܬܠ݄ܬ̥ܡܳܐܐ ܕܣܶܐܡܳܐ ܘܚܰܡܫܳܐ ܙܰܘ̈ܓܶܐ ܕ݄ܠܒܽܘܫ̈ܶܐ. 23ܘܠܽܗ̄ܘ ܒܰܒܰܝܕ̥ܶܗ ܡܫܰܕܰܪ ܠܶܗ ܗܰܘܟ̥ܰܐ: ܥܰܣܪܳܐ ܚܡܳܪ̈ܶܐ ܡܰܛ݄ܥܢ̈ܶܐ ܡܺܗ̄ܝ ܛܳܒ̥ܽܘܬ̥ܳܐ ܕܺܗ̄ܝ ܐܰܪܥܳܐ ܕܡܶܨܪܶܝܢ، ܘ݄ܥܣܰܪ ܚܡ݄ܪ̈ܝܳܬ̥ܳܐ ܡܰܛ݄ܥܢ̈ܶܐ ܚ̈ܶܛܶܐ ܘܚܰܡܪܳܐ ܘ݄ܙܘܳܕ̈ܶܐ ܠܽܗ̄ܘ ܒܰܒܰܝܕ̥ܶܗ ܠܽܗ̄ܘ ܕܰܪܒܳܐ. 24ܘ݄ܡܫܰܕܪܺܝ ܠܶܗ ܘܰܐܙّ݄ܢ، ܘܐܡ݄ܪ ܠܰܗ ܠّܶܗ: ”ܠܳܐ ܢܳܦܠܺܝܬܽܘ ܒ݄ܚܕ̥ܳܕ̥̈ܶܐ ܒܽܗ̄ܘ ܕܰܪܒܳܐ.“

25ܘܣܰܠܺܝܩܺܝ ܡܶܢ̱ ܡܶܨܪܶܝܢ ܘܰܐܬ̥݄ܢ ܠܺܗ̄ܝ ܐܰܪܥܳܐ ܕ݄ܟܢܰܥܢ ܠܓܰܒ ܝܰܥܩܽܘܒ ܗ̄ܽܘ ܒܰܒܰܬّ̥ܶܗ. 26ܘܡܰܚܘܰܠّܰܗ ܠܶܗ ܘܐܡ݄ܪّܰܗ ܠܶܗ: ”ܗܶܫ ܝܰܘܣܶܦ ܚܰܝܳܐ ܝܳܐ. ܘܗܺܝّܶܗ ܝܳܐ ܗ̄ܽܘ ܫܰܠܺܝܛܳܐ ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ.“ ܘܠܳܐ ܡܰܨ݄ܬ ܠܶܗ ܐ‌ܰܥܠܰܝّܶܗ ܥܰܠ ܕܠܳܐ ܡܗܰܝܡܰܢܺܝ ܠܶܗ. 27ܘܡܰܚܘܰܠّܰܗ ܠܶܗ ܟܽܘܠّܶܗ ܗ̄ܰܡّܰܐܡܪ̈ܶܐ ܕܐܡ݄ܪ ܠܶܗ ܝܰܘܣܶܦ. ܘ݄ܚܙܶܐ ܠܶܗ ܝܰܥܩܽܘܒ ܗ̄ܰܡّܰܪ̈ܟܒܳܬ̥ܳܐ ܕ݄ܡܫܰܕܪܺܝ ܠܶܗ ܝܰܘܣܶܦ ܕܡܰܛܥܢܺܝ ܠܶܗ، ܘ݄ܬ̥ܢܺܝܚܳܐ ܗ̄ܺܝ ܪܽܘܚܳܐ ܕܝܰܥܩܽܘܒ ܗ̄ܽܘ ܒܰܒܰܬّ̥ܶܗ. 28ܘܐܡ݄ܪ ܠܶܗ: ”ܪܰܒܬ̥ܳܐ ܝܳܐ ܐܶ‌ܠܺܝ ܗܰܬ̥ܶܐ ܕܗܶܫ ܝܰܘܣܶܦ ܗ̄ܽܘ ܐܰܒܪܰܝܕ̥ܺܝ ܒܰܚّܰܝ̈ܶܐ ܝܳܐ. ܓܕ݄ܐܙّܺܝ ܚܳܙܶܢܶܗ ܡܶܩ݄ܕ̱ܡ ܕܡܳܝܰܬ̥ ܐ̱ܢܳܐ.“

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 45: ܟܬܒܐ

Highlight

Copy