ܣܶܦܪܳܐ ܕ݄ܒܪܺܝܬ̥ܳܐ 44
44
1ܘܗܽܒ̥ ܠܶܗ ܦܽܘܩܕܳܢܳܐ ܠܽܗ̄ܘ ܪܰܒܳܐ ܕܽܗ̄ܘ ܒܰܝܬܰܝܕ̥ܶܗ ܘܐܡ݄ܪ ܠܶܗ: ”ܡܠܰܝ ܗ̄ܰܛّܰܥܢ̈ܶܐ ܕܰܓّܰܒ̥ܪ̈ܶܐ ܚ̈ܶܛܶܐ ܡ݄ܩܰܐ ܕܟ݄ܒّܶܗ ܛܳܥܢܺܝ. ܘܡܰܚ݄ܬ ܗ̄ܽܘ ܣܶܐܡܳܐ ܕܟܘ̇ܠ ܓܰܒ̥ܪܳܐ ܒܦܶܡܶܗ ܕܽܗ̄ܘ ܛܰܥܢܰܝܕ̥ܶܗ. 2ܘܡܘ̇ܕ ܗ̄ܽܘ ܟܳܣܳܐ ܕܽܗ̄ܘ ܣܶܐܡܳܐ ܘܡܰܚܶܬܶܗ ܒܦܶܡܶܗ ܕܽܗ̄ܘ ܛܰܥܢܳܐ ܕܽܗ̄ܘ ܢܰܥܺܝܡܳܐ، ܥܰܡ ܗ̄ܽܘ ܣܶܐܡܳܐ ܕܰܚّܶܛ̈ܶܐ.“ ܘܣ݄ܡ ܠܶܗ ܗ̄ܽܘ ܓܪܶܝܥܳܐ ܐܟ̥ ܕܽܗ̄ܘ ܡܰܐܡܪܳܐ ܕܝܰܘܣܶܦ. 3ܘ݄ܒܩܶܕܰܡܬܳܐ ܛܪܰܠّܶܗ ܘܰܐܙّ݄ܢ ܗ̄ܰܓّܰܒ̥ܪ̈ܶܐ، ܗ݄ܢّܶܝ ܘܰܚܡܳܪ̈ܰܬّ̥ܶܗ. 4ܗ݄ܢّܶܝ ܢܰܦܺܝܩܺܝ ܡܺܗ̄ܝ ܡܕ̥ܺܝܢ̱ܬܳܐ ܘܠܳܐ ܪܰܚܺܝܩܺܝ، ܝܰܘܣܶܦ ܐܡ݄ܪ ܠܶܗ ܠܽܗ̄ܘ ܪܰܒܳܐ ܕܽܗ̄ܘ ܒܰܝܬܰܝܕ̥ܶܗ: ”ܩܘ̇ܡ ܫܕ̥ܰܝ ܒ݄ܬ̥݄ܪ ܗ̄ܰܓّܰܒ̥ܪ̈ܶܐ، ܘ݄ܡܛܰܝ ܐܰܠّܶܗ ܘܐܡܰܪّܶܗ: ܠܡ݄ܢ ܣ݄ܡܟ̥ܽܘ ܚܰܪܒܽܘܬ̥ܳܐ ܡܶܢ̱ ܚܠܳܦ ܕܺܗ̄ܝ ܛܳܒ̥ܽܘܬ̥ܳܐ؟ 5ܗܰܢܳܐ ܝܳܐ ܗ̄ܽܘ ܟܳܣܳܐ ܕܟܳܫܳܬܶܐ ܐܶܒܶܗ ܗ̄ܽܘ ܡܳܪܰܝܕ̥ܺܝ، ܘܶܐܒܶܗ ܟܳܐܕ̥݄ܥ ܗ̄ܽܘ ܡܶܕܶܐ ܕܟ݄ܬ ܝܳܐ ܟܰܣܝܳܐ. ܒܺܝܫܬܳܐ ܣ݄ܡܟ̥ܽܘ ܒܽܗ̄ܘ ܡܶܕܶܐ ܕܣ݄ܡܟ̥ܽܘ.“
6ܘܡܰܛ݄ܠّܶܗ، ܘܐܡ݄ܪ ܠܰܗ ܠّܶܗ ܐܟ̥ ܕܰܡّܰܐܡܪ̈ܰܢܺܝ. 7ܟ݄ܐܡّܺܪ̱ܝ ܠܶܗ: ”ܛܪܳܐ ܠܳܐ ܐܡ݄ܪ ܗ̄ܽܘ ܡܳܪܰܝܕ̥ܰܢ ܗ̄ܰܡّܰܐܡܪ̈ܰܢܺܝ. ܪܰܚ݄ܩ ܡܰܢ̱ ܓܪ̈ܶܝܥܰܝܕ̥ܳܟ̥ ܕܣܰܝܡܺܝ ܗ̄ܽܘ ܡܶܕܰܢܳܐ. 8ܟܰܐܠܶܗ ܗ̄ܽܘ ܣܶܐܡܳܐ ܕ݄ܚܙܶܐ ܠܰܢ ܒܦܶܡܶܗ ܕܰܛّܰܥܢܰܝ̈ܕ̥ܰܢ ܡܰܕܥܰܪ ܠܰܢ ܡܺܗ̄ܝ ܐܰܪܥܳܐ ܕ݄ܟܢܰܥܢ، ܐܰܝܕܰܪܒܳܐ ܓ݄ܕܓܳܢܒ̥ܺܝܢܰܐ ܡܽܗ̄ܘ ܒܰܝܬܳܐ ܕܽܗ̄ܘ ܡܳܪܰܝܕ̥ܳܟ̥ ܕܰܗܒ̥ܳܐ ܐܰܘ ܣܶܐܡܳܐ؟ 9ܡܰܢ ܕܡܰܢ̱ ܓܪ̈ܶܝܥܰܝܕ̥ܳܟ̥ ܕܡ݄ܚܙܶܐ ܓܰܒܶܗ، ܛܪܳܐ ܡܳܝ݄ܬ̥. ܘܰܐܚܢܰܐ ܓܕܳܗ̄ܘܺܝܢܰܐ ܓܪ̈ܶܝܥܶܐ ܠܽܗ̄ܘ ܡܳܪܰܝܕ̥ܰܢ.“ 10ܐܡ݄ܪ ܠܰܗ ܠّܶܗ: ”ܐܳܥܕܳܐ ܐܟ̥ ܕܽܗ̄ܘ ܡܰܐܡܪܰܬ̥ܟ̥ܽܘ ܛܪܳܐ ܗܳܘܶܐ ܗܰܘܟ̥ܰܐ. ܡܰܢ ܕܡ݄ܚܙܶܐ ܓܰܒܶܗ، ܗܺܝّܶܗ ܓܕܳܗ̄ܘܶܐ ܠܺܝ ܓܪܶܝܥܳܐ. ܘܗܰܬܽܘ ܓܕܳܗ̄ܘܺܝܬܽܘ ܒܰܪ̈ܝܶܐ (ܒܪܺܝܪ̈ܶܐ).“ 11ܘܡܰܠ݄ܙّܶܗ ܘܡܰܢܚܰܬّܶܗ ܟܘ̇ܠ ܚܰܕ̱ ܗ̄ܽܘ ܛܰܥܢܰܝܕ̥ܶܗ ܥܰܠ ܗ̄ܺܝ ܐܰܪܥܳܐ ܘ݄ܦܬ݄ܚّܶܗ ܟܘ̇ܠ ܚܰܕ̱ ܗ̄ܽܘ ܛܰܥܢܰܝܕ̥ܶܗ. 12ܘ݄ܡܒܰܥܰܛّܶܗ. ܘ݄ܡܫܰܪܶܐ ܠܶܗ ܡܽܗ̄ܘ ܪܰܒܳܐ ܗ݄ܠ ܠܽܗ̄ܘ ܢܰܥܺܝܡܳܐ. ܘ݄ܚܙܶܐ ܗ̄ܽܘ ܟܳܣܳܐ ܒܽܗ̄ܘ ܛܰܥܢܳܐ ܕܒܶܢܝܳܡܶܝܢ. 13ܘ݄ܩܛ݄ܥّܶܗ ܗ̄ܰܠܒܽܘܫ̈ܰܬّ̥ܶܗ، ܘܪܰܒ̥ܺܝܟ̥ܺܝ ܟܘ̇ܠ ܚܰܕ̱ ܥܰܠ ܗ̄ܽܘ ܚܡܳܪܰܝܕ̥ܶܗ ܘܕܰܥܺܝܪܺܝ ܠܺܗ̄ܝ ܡܕ̥ܺܝܢ̱ܬܳܐ.
14ܘܥܰܒ݄ܪ ܝܺܗܽܘܕ̥ܳܐ ܘܰܗ̄ܢ ܐܰܚ̈ܽܘܢܳܢܶܐ ܠܓܰܒ ܝܰܘܣܶܦ، ܘܗܺܝّܶܗ ܗܶܫ ܬܰܡܳܐ. ܘܢܰܦܺܝܠܺܝ ܩܽܘܕ̱ܡܶܗ ܥܰܠ ܗ̄ܺܝ ܐܰܪܥܳܐ. 15ܘܝܰܘܣܶܦ ܐܡ݄ܪ ܠܰܗ ܠّܶܗ: ”ܡ݄ܢܝܳܐ ܗܰܢܳܐ ܕܣ݄ܡܟ̥ܽܘ؟ ܠ݄ܐ ܟܳܐܕ̥ܥܺܝܬܽܘ ܕܓܰܒ̥ܪܳܐ ܐܟ̥ܳܬ̥ܺܝ ܟܳܐܕ̥݄ܥ ܗ̄ܰܟّܰܣ̈ܝܳܬ̥ܳܐ؟“ 16ܘܐܡ݄ܪ ܠܶܗ ܝܺܗܽܘܕ̥ܳܐ: ”ܡ݄ܢ ܐ݄ܡّܺܪ̱ܝܢܰܐ ܠܽܗ̄ܘ ܡܳܪܰܝܕ̥ܺܝ؟ ܘܡ݄ܢ ܡ݄ܫܓ̥ܳܠܺܝܢܰܐ؟ ܘ݄ܒܡ݄ܢ ܡܺܝܒܰܪܺܝܢܰܐ؟ ܡܶܢ̱ ܩܽܘܕ̱ܡܶܗ ܕܰܐܠܳܗܳܐ ܡܰܚܘܝܳܐ ܗ̄ܺܝ ܚܛܺܝܬ̥ܰܬ̥ܶܐ ܠܰܓܪ̈ܶܝܥܰܝܕ̥ܳܟ̥. ܟܰܐܠܰܢ ܐܰܚܢܰܐ ܓܪ̈ܶܝܥܶܐ ܠܽܗ̄ܘ ܡܳܪܰܝܕ̥ܺܝ، ܐܰܚܢܰܐ ܥܰܡ ܗܰܘܳܐ ܕ݄ܚܙܶܐ ܗ̄ܽܘ ܟܳܣܳܐ ܓܰܒܶܗ.“ 17ܐܡ݄ܪ ܠܰܗ ܠّܶܗ: ”ܪܰܚ݄ܩ ܡܶܢܺܝ ܕܣܳܝܰܡ ܐ̱ܢܳܐ ܗܰܬ̥ܶܐ. ܗ̄ܽܘ ܓܰܒ̥ܪܳܐ ܕ݄ܚܙܶܐ ܗ̄ܽܘ ܟܳܣܳܐ ܓܰܒܶܗ، ܗܺܝّܶܗ ܓܕܳܗ̄ܘܶܐ ܠܺܝ ܓܪܶܝܥܳܐ، ܘܗܰܬܽܘ ܣܠܰܩܽܘ ܒ݄ܫܠܳܡܳܐ ܠܓܰܒ ܗ̄ܽܘ ܒܰܒܰܬ̥ܟ̥ܽܘ.“
18ܘ݄ܡܩܰܪܰܒ̥ ܠܶܗ ܠܓܰܒܶܗ ܝܺܗܽܘܕ̥ܳܐ ܘܐܡ݄ܪ ܠܶܗ: ”ܟܳܐܒܰܥ ܐ̱ܢܳܐ ܡܶܢܳܟ̥، ܝܰܐ ܡܳܪܰܝܕ̥ܺܝ، ܕܡ݄ܫܓ̥݄ܠ ܗ̄ܽܘ ܓܪܶܝܥܰܝܕ̥ܳܟ̥ ܡܰܐܡܪܳܐ ܩܽܘܕ̱ܡܳܟ̥، ܝܰܐ ܡܳܪܰܝܕ̥ܺܝ، ܘ݄ܛܪܳܐ ܠܳܐ ܚܳܝ݄ܡ ܗ̄ܽܘ ܪܽܘܓ̥ܙܰܝܕ̥ܳܟ̥ ܥܰܠ ܗ̄ܽܘ ܓܪܶܝܥܰܝܕ̥ܳܟ̥ ܥܰܠ ܕܟ݄ܬ ܗ̄ܰܬ ܐܟ̥ ܕܦܶܪܥܽܘܢ. 19ܗ̄ܽܘ ܡܳܪܰܝܕ̥ܺܝ ܡܫܰܐܶܠ ܠܶܗ ܠܰܓܪ̈ܶܝܥܰܝܕ̥ܶܗ ܘܐܡ݄ܪ ܠܶܗ: ܟ݄ܬܟ̥ܽܘ ܒܰܒܳܐ ܐܰܘ ܐܰܚܽܘܢܳܐ؟ 20ܘܐܡ݄ܪ ܠܰܢ ܠܽܗ̄ܘ ܡܳܪܰܝܕ̥ܺܝ: ܟ݄ܬ ܠܰܢ ܒܰܒܳܐ ܣܳܒ̥ܳܐ ܘܰܐܒܪܳܐ ܢܰܥܺܝܡܳܐ ܕܺܗ̄ܝ ܣܳܒ̥ܽܘܬ̥ܳܐ، ܘܽܗ̄ܘ ܐܰܚܽܘܢܰܝܕ̥ܶܗ ܡܰܝ݄ܬ̥. ܘܗܺܝّܶܗ ܠܚܽܘܕ̥ܶܗ ܦܰܝ݄ܫ ܠܺܗ̄ܝ ܐܶܡܰܝܕ̥ܶܗ، ܘܽܗ̄ܘ ܒܰܒܰܝܕ̥ܶܗ ܟܪܳܚܰܡ ܠܶܗ. 21ܘܐܡ݄ܪ ܠܳܟ̥ ܠܰܓܪ̈ܶܝܥܰܝܕ̥ܳܟ̥ ܡܰܢܚܶܬܽܘ ܠܶܗ ܠܓܰܒܺܝ ܘ݄ܕܚܳܙܝܳܐ ܠܶܗ ܥܰܝܢܺܝ. 22ܘܐܡ݄ܪ ܠܰܢ ܠܽܗ̄ܘ ܡܳܪܰܝܕ̥ܺܝ: ܗ̄ܽܘ ܛܰܠܝܳܐ ܠܰܝܒܶܗ ܕܛܳܪܶܐ ܗ̄ܽܘ ܒܰܒܰܝܕ̥ܶܗ. ܘܶܐܢ ܛܪܶܐ ܠܶܗ ܠܽܗ̄ܘ ܒܰܒܳܐ ܓܡܳܝ݄ܬ̥. 23ܘܐܡ݄ܪ ܠܳܟ̥ ܠܰܓܪ̈ܶܝܥܰܝܕ̥ܳܟ̥: ܕܠܳܐ ܢܳܚ݄ܬ ܐܰܚܽܘܢܰܝܟ̥ܽܘ ܗ̄ܽܘ ܢܰܥܺܝܡܳܐ ܐܰܥܡܰܝܟ̥ܽܘ ܠܳܐ ܕܳܥܪܺܝܬܽܘ ܚܳܙܺܝܬܽܘ ܦܳܬ̥ܺܝ. 24ܘܺܗ̄ܝ ܢܰܩܠܐ ܕܣܰܠܺܝܩܺܝܢܰܐ ܠܓܰܒ ܗ̄ܽܘ ܓܪܶܝܥܰܝܕ̥ܳܟ̥ ܒܰܒܰܢ، ܘܐܡ݄ܪ ܠܰܢ ܠܶܗ ܥܰܠ ܗ̄ܰܡّܰܐܡܪ̈ܶܐ ܕܽܗ̄ܘ ܡܳܪܰܝܕ̥ܺܝ، 25ܐܡ݄ܪ ܠܶܗ ܠܰܢ ܒܰܒܰܢ ܗ̄ܽܘ ܓܪܶܝܥܰܝܕ̥ܳܟ̥: ܕܥܰܪܽܘ ܘ݄ܙܒ̥ܰܢܽܘ ܠܰܢ ܐ݄ܫܡܳܐ ܕܚ̈ܶܛܶܐ. 26ܘܐܡ݄ܪ ܠܰܢ ܠܒܰܒܰܢ: ܠܰܝܒܰܢ ܕܢܳܚܬܺܝܢܰܐ. ܐܶܢ ܕܢܳܚ݄ܬ ܐܰܥܡܰܢ ܐܰܚܽܘܢܰܢ ܗ̄ܽܘ ܢܰܥܺܝܡܳܐ ܓܢܳܚܬܺܝܢܰܐ ܡܺܐܝܕ̥ܶܗ ܕܠܰܝܒܰܢ ܕܚܳܙܺܝܢܰܐ ܦܳܬ̥ܶܗ ܕܽܗ̄ܘ ܓܰܒ̥ܪܳܐ ܗ̄ܺܝ ܢܰܩܠܐ ܕܰܐܚܽܘܢܰܢ ܗ̄ܽܘ ܢܰܥܺܝܡܳܐ ܠܳܐ ܗ̄ܘܶܐ ܐܰܥܡܰܢ. 27ܘܐܡ݄ܪ ܠܶܗ ܒܰܒܰܢ، ܗ̄ܽܘ ܓܪܶܝܥܰܝܕ̥ܳܟ̥، ܗܰܬܽܘ ܟܳܐܕ̥ܥܺܝܬܽܘ ܕ݄ܬܪܶܝ (ܢܰܥܺܝܡ̈ܶܐ) ܡܰܘܠܰܕ ܠܰܗ ܠܺܝ ܗ̄ܺܝ ܐܰܢ̱ܬ̥ܬܰܝܕ̥ܺܝ. 28ܘܢܰܦ݄ܩ ܚܰܕ̱ ܡܶܢ̱ ܓܰܒܺܝ ܘܐܡ݄ܪ ܠܺܝ ܕܩܰܛܠܳܐ ܩܛܺܝܠ، ܘܠܳܐ ܚܙܶܐ ܠܺܝ ܗ݄ܠ ܐܳܥܕܳܐ. 29ܘ݄ܓܡܰܝܕܺܝܬܽܘ ܠܰܗ̄ܢܳܐ ܣܬܶܝ ܡܶܢ̱ ܓܰܒܺܝ، ܘܚܳܙܶܐ ܩܽܘܕ̱ܡܶܗ ܡܶܕܶܐ ܒܺܝܫܳܐ، ܓܡܰܢܚܬܺܝܬܽܘ ܗ̄ܺܝ ܣܳܒ̥ܽܘܬ̥ܰܝܕ̥ܺܝ ܒܒܺܝܫܬܳܐ ܠ݄ܫܝܽܘܠ. 30ܘܳܐܥܕܳܐ ܗ̄ܺܝ ܢܰܩܠܐ ܕܕܳܥܪܺܝܢܰܐ ܠܓܰܒ ܗ̄ܽܘ ܓܪܶܝܥܰܝܕ̥ܳܟ̥ ܒܰܒܰܢ، ܘܽܗ̄ܘ ܛܰܠܝܳܐ ܠܳܐ ܗ̄ܘܶܐ ܐܰܥܡܰܢ، ܘܢܰܦܫܶܗ ܚܰܒ݄ܒܬܳܐ ܝܳܐ ܐܶܠܶܗ ܐܟ̥ ܕܪܽܘܚܶܗ، 31ܘܶܐܡܰܐ ܕܚܳܙܶܐ ܕܽܗ̄ܘ ܛܰܠܝܳܐ ܠܰܝ̱ܬ ܝܳܐ ܐܰܥܡܰܢ، ܓ݄ܕܡܳܝ݄ܬ̥. ܘܰܓܪ̈ܶܝܥܰܝܕ̥ܳܟ̥ ܓܡܰܢܚܬܺܝ ܗ̄ܺܝ ܣܳܒ̥ܽܘܬ̥ܳܐ ܕܽܗ̄ܘ ܓܪܶܝܥܰܝܕ̥ܳܟ̥ ܒܰܒܰܢ ܒܡܰܥܺܝܩܽܘܬ̥ܳܐ ܠ݄ܫܝܽܘܠ. 32ܡܺܐܝܕ̥ܶܗ ܕܽܗ̄ܘ ܓܪܶܝܥܰܝܕ̥ܳܟ̥ ܡܗܰܝܡ݄ܢ ܥܰܠ ܗ̄ܽܘ ܛܰܠܝܳܐ ܡܶܢ̱ ܒܰܒܰܢ، ܘܐܡ݄ܪ ܠܺܝ: ܕܶܐܢ ܠܳܐ ܡܰܝܬܶܐ ܐ̱ܢܳܐ ܠܳܟ̥ ܝܳܐ، ܓܚܳܛܶܐ ܐ̱ܢܳܐ ܠܒܰܒܺܝ ܟܽܘܠّܶܗ ܗ̄ܰܝّܰܘܡ̈ܶܐ (ܕܰܚّܰܝ̈ܰܝܕ̥ܺܝ). 33ܘܳܐܥܕܳܐ ܛܪܳܐ ܗ̄ܽܘ ܓܪܶܝܥܰܝܕ̥ܳܟ̥ ܦܳܝ݄ܫ ܡܶܢ̱ ܚܠܳܦ ܕܽܗ̄ܘ ܛܰܠܝܳܐ ܓܪܶܝܥܳܐ ܠܽܗ̄ܘ ܡܳܪܰܝܕ̥ܺܝ. ܘܽܗ̄ܘ ܛܰܠܝܳܐ ܛܪܳܐ ܣܳܠ݄ܩ ܥܰܡ ܗ̄ܰܢ ܐܰܚ̈ܽܘܢܳܢܰܝܕ̥ܶܗ. 34ܡܺܐܝܕ̥ܶܗ ܕܰܐܝܕܰܪܒܳܐ ܓ݄ܕܣܳܠܰܩ ܐ̱ܢܳܐ ܠܓܰܒ ܒܰܒܺܝ ܘܽܗ̄ܘ ܛܰܠܝܳܐ ܠܳܐ ܗ̄ܘܶܐ ܐܰܥܡܺܝ؟ ܕܠܳܐ ܚܳܙܶܐ ܐ̱ܢܳܐ ܗ̄ܺܝ ܒܺܝܫܬܳܐ ܗܳܘܝܳܐ ܠܒܰܒܺܝ.“
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 44: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
