ܣܶܦܪܳܐ ܕ݄ܒܪܺܝܬ̥ܳܐ 28
28
1ܘ݄ܩܪܶܐ ܠܶܗ ܐܺܝܣܚܳܩ ܠܝܰܥܩܽܘܒ، ܘ݄ܡܒܰܪܰܟ̥ ܠܶܗ ܘܡܰܩܘܶܐ ܠܶܗ ܐܰܥܠܶܗ ܘܐܡ݄ܪ ܠܶܗ ܠܶܗ: ”ܠܳܐ ܡܰܝܕܰܬ ܐܰܢ̱ܬ̥ܬܳܐ ܡܰܢ̱ ܒܢ̈ܳܬ̥ܳܐ ܕ݄ܟܢܰܥܢ. 2ܩܘ̇ܡ ܙܳܠܳܟ̥ ܠܦܳܕܳܢ ܕܳܐܪܳܡ ܠܽܗ̄ܘ ܒܰܝܬܳܐ ܕ݄ܒܬܽܘܐܶܝܠ ܗ̄ܽܘ ܒܰܒܳܐ ܕܶܐܡܳܟ̥، ܘܡܘ̇ܕ ܠܳܟ̥ ܡܶܢ̱ ܬܰܡܳܐ ܐܰܢ̱ܬ̥ܬܳܐ، ܡܰܢ̱ ܒܢ̈ܳܬ̥ܳܐ ܕܠܳܒܳܢ ܗ̄ܽܘ ܐܰܚܽܘܢܳܐ ܕܶܐܡܳܟ̥. 3ܘܺܐܝܠܫܰܕܰܝ ܡܒܰܪܰܟ̥ ܠܳܟ̥ ܘܡܰܘܪܰܒ̥ ܠܳܟ̥ ܘܡܰܙ݄ܕ ܠܳܟ̥، ܘܗܳܘܰܬ ܠܓ̥ܰܠܰܒܶܐ ܥܰܡ̈ܶܐ. 4ܘܳܗ̄ܒܶܐ ܠܳܟ̥ ܗ̄ܰܒّܽܘܪ̈ܟܳܬ̥ܳܐ ܕܰܐܒܪܳܗܳܡ، ܐܶܠܳܟ̥ ܘܠܽܗ̄ܘ ܙܰܪܥܰܝܕ̥ܳܟ̥ ܐܰܥܡܳܟ̥، ܘܡܰܘܪܰܬ̥ ܠܳܟ̥ ܗ̄ܺܝ ܐܰܪܥܳܐ ܕܥܳܡܪܰܬ ܐܶܒܰܗ ܕܗܺܝܒ̥ܳܐ ܠܶܗ ܐܰܠܳܗܳܐ ܠܰܐܒܪܳܗܳܡ.“ 5ܘ݄ܡܫܰܕܰܪ ܠܶܗ ܐܺܝܣܚܳܩ ܠܝܰܥܩܽܘܒ. ܘܰܐܙّܶܗ ܠܦܳܕܳܢ ܕܳܐܪܳܡ ܠܓܰܒ ܠܳܒܳܢ ܗ̄ܽܘ ܐܰܒܪܳܐ ܕ݄ܒܬܽܘܐܶܝܠ ܗ̄ܽܘ ܐܳܪܳܡܳܝܳܐ ܗ̄ܽܘ ܐܰܚܽܘܢܳܐ ܕܪܰܦܩܳܐ ܗ̄ܺܝ ܐܶܡܳܐ ܕܝܰܥܩܽܘܒ ܘ݄ܕܥܺܝܣܽܘ. 6ܘ݄ܚܙܶܐ ܠܶܗ ܥܺܝܣܽܘ ܕ݄ܡܒܰܪܰܟ̥ ܠܶܗ ܐܺܝܣܚܳܩ ܠܝܰܥܩܽܘܒ ܗ̄ܽܘ ܐܰܚܽܘܢܳܐ، ܘ݄ܡܫܰܕܰܪ ܠܶܗ ܠܦܳܕܳܢ ܕܳܐܪܳܡ ܕܡܳܝܰܕ ܠܶܗ ܡܶܢ̱ ܬܰܡܳܐ ܐܰܢ̱ܬ̥ܬܳܐ، ܘ݄ܡܒܰܪܰܟ̥ ܠܶܗ ܘܡܰܩܘܶܐ ܠܶܗ ܐܰܥܠܶܗ ܘܐܡ݄ܪ ܠܶܗ ܠܶܗ: ”ܠܳܐ ܡܰܝܕܰܬ ܐܰܢ̱ܬ̥ܬܳܐ ܡܰܢ̱ ܒܢ̈ܳܬ̥ܳܐ ܕ݄ܟܢܰܥܢ.“ 7ܘܫܰܡ݄ܥ ܝܰܥܩܽܘܒ ܠܽܗ̄ܘ ܒܰܒܳܐ ܘܠܺܗ̄ܝ ܐܶܡܳܐ ܘܰܐܙّܶܗ ܠܦܳܕܳܢ ܕܳܐܪܳܡ. 8ܘ݄ܚܙܶܐ ܠܶܗ ܥܺܝܣܽܘ ܕܒܺܝܫ̈ܶܐ ܢܶܝ ܗ̄ܰܒܢ̈ܳܬ̥ܳܐ ܕ݄ܟܢܰܥܢ ܒܥܰܝܢܶܗ ܕܺܐܝܣܚܳܩ ܗ̄ܽܘ ܒܰܒܳܐ. 9ܘܰܐܙّܶܗ ܥܺܝܣܽܘ ܠܓܰܒ ܐܺܝܫܡܳܥܶܝܠ، ܘܡ݄ܕ ܠܶܗ ܠܒܶܣܡܰܬ ܗ̄ܺܝ ܒܰܪܬ̥ܳܐ ܕܺܐܝܫܡܳܥܶܝܠ ܗ̄ܽܘ ܐܰܒܪܳܐ ܕܰܐܒܪܳܗܳܡ، ܗ̄ܺܝ ܚܳܬ̥ܳܐ ܕ݄ܢܒܺܝܽܘܬ̥، ܥܰܠ ܗ̄ܰܢ ܢܶܫ̈ܰܝܕ̥ܶܗ ܐܰܢ̱ܬ̥ܬܳܐ ܠܪܽܘܚܶܗ. ܗ̄ܽܘ ܚ݄ܠܡܳܐ ܕܝܰܥܩܽܘܒ
10ܘܢܰܦ݄ܩ ܝܰܥܩܽܘܒ ܡܶܢ̱ ܒܺܪܫܒܰܥ ܕ݄ܐܙّܶܗ ܠܚܳܪܳܢ. 11ܘܡܰܛܺܝ ܠܕܽܘܟܬ̥ܳܐ ܘܕܰܡ݄ܟ̥ ܬܰܡܳܐ ܥܰܠ ܕܛܰܒ̥ܺܝܥܳܐ ܗ̄ܘܰܐ ܗ̄ܺܝ ܫܶܡܫܳܐ. ܘܡ݄ܕ ܠܶܗ ܟܶܐܦܳܐ ܕܺܗ̄ܝ ܕܽܘܟܬ̥ܰܝܳܐ ܘܡܰܚܬܳܐ ܠܶܗ ܬܰܚܬܶܗ ܪܺܝܫܶܗ ܘܕܰܡ݄ܟ̥ ܒܽܗ̄ܘ ܐܰܬ̥ܪܰܘܳܐ. 12ܘ݄ܚܙܶܐ ܠܶܗ ܒܚ݄ܠܡܶܗ ܘܟܰܐܠܰܗ ܣܶܒܶܠܬܳܐ ܕܟܳܩܰܝܡܳܐ ܒܺܗ̄ܝ ܐܰܪܥܳܐ ܘܪܺܝܫܰܗ ܟܳܡܳܛܶܐ ܠܺܗ̄ܝ ܫܡܰܝܳܐ. ܘܟܰܐܠ݄ܢ ܗ̄ܰܡّܰܠܰܐܟ̥̈ܶܐ ܕܰܐܠܳܗܳܐ ܟܳܣܳܠܩܺܝ ܘܟܳܢܳܚܬܺܝ ܐܶܒܰܗ. 13ܘܟܰܐܠܶܗ ܡܳܪܝܳܐ ܩܺܝܡܳܐ ܠܰܠܥ݄ܠ ܡܶܢܰܗ ܘܟܳܐܡ݄ܪ: ”ܐܳܢܳܐ ܐ̱ܢܳܐ ܡܳܪܝܳܐ، ܗ̄ܽܘ ܐܰܠܳܗܳܐ ܕܰܐܒܪܳܗܳܡ ܗ̄ܽܘ ܒܰܒܰܝܕ̥ܳܟ̥ ܘܽܗ̄ܘ ܐܰܠܳܗܳܐ ܕܺܐܝܣܚܳܩ. ܗ̄ܺܝ ܐܰܪܥܳܐ ܕܟܳܕܳܡܟ̥ܰܬ ܐܰܥܠܰܗ ܐܶܠܳܟ̥ ܓܕܳܗ̄ܒܶܢܰܗ ܘܠܽܗ̄ܘ ܙܰܪܥܰܝܕ̥ܳܟ̥. 14ܘ݄ܓܕܳܗ̄ܘܶܐ ܗ̄ܽܘ ܙܰܪܥܰܝܕ̥ܳܟ̥ ܐܟ̥ ܕܽܗ̄ܘ ܥܰܦܪܳܐ ܕܺܗ̄ܝ ܐܰܪܥܳܐ، ܘ݄ܓܙܰܝܕܰܬ ܠܽܗ̄ܘ ܡܰܕ݄ܢܚܳܐ ܘܠܽܗ̄ܘ ܡܰܥܪܒܳܐ ܘܠܽܗ̄ܘ ܓܰܪܒܝܳܐ ܘܠܽܗ̄ܘ ܬܰܝܡܢܳܐ. ܘ݄ܓܡܺܝܒܰܪܟ̥ܺܝ ܐܶܒܳܟ̥ ܟܽܘܠّܶܗ ܗ̄ܰܫّܰܪ̈ܒܳܬ̥ܳܐ ܕܺܗ̄ܝ ܐܰܪܥܳܐ ܘܒܽܗ̄ܘ ܙܰܪܥܰܝܕ̥ܳܟ̥. 15ܘܟܰܐܠܶܗ ܐܳܢܳܐ ܐܰܥܡܳܟ̥ ܐ̱ܢܳܐ ܘ݄ܓܢܳܛܰܪܢܳܟ̥ ܠܰܐܝܟܳܐ ܕ݄ܐܙّܳܟ̥، ܘ݄ܓܡܰܕܥܰܪܢܳܟ̥ ܠܺܗ̄ܝ ܐܰܪܥܰܬ̥ܶܐ. ܘܠ݄ܐ ܓܡܰܪܦܶܢܳܟ̥ ܗ݄ܠ ܕܠܳܐ ܣܳܝܰܡ ܐ̱ܢܳܐ ܗ̄ܽܘ ܡܶܕܶܐ ܕܐܡ݄ܪ ܠܺܝ ܠܳܟ̥.“
16ܘܩܰܝ݄ܡ ܝܰܥܩܽܘܒ ܡܺܗ̄ܝ ܫܰܢܬ̥ܰܝܕ̥ܶܗ ܘܐܡ݄ܪ ܠܶܗ: ”ܒ݄ܫܪܳܪܳܐ ܟܺܝܬ ܡܳܪܝܳܐ ܒܽܗ̄ܘ ܐܰܬ̥ܪܰܢܳܐ. ܘܳܐܢܳܐ ܠܰܐ ܐܕ̥݄ܥ ܐ̱ܢܳܐ.“ 17ܘܙܰܝ݄ܥ ܝܰܥܩܽܘܒ ܙܽܘܥܬ̥ܳܐ ܪܰܒܬ̥ܳܐ ܘܐܡ݄ܪ ܠܶܗ: ”ܡ݄ܩܰܐ ܡܰܙܺܝܥܳܢܳܐ ܝܳܐ ܗ̄ܽܘ ܐܰܬ̥ܪܰܢܳܐ ܐܰܕܝܰܘܡܰܐ. ܠܰܝ̱ܬ ܝܳܐ ܗܰܢܳܐ ܐܶܠܳܐ ܗ̄ܽܘ ܒܰܝܬܳܐ ܕܰܐܠܳܗܳܐ، ܘܗܰܢܳܐ ܝܳܐ ܗ̄ܽܘ ܬܰܪܥܳܐ ܕܺܗ̄ܝ ܫܡܰܝܳܐ.“ 18ܘܩܰܝ݄ܡ ܝܰܥܩܽܘܒ ܒܩܶܕܰܡܬܳܐ، ܘܡ݄ܕ ܠܶܗ ܗ̄ܺܝ ܟܶܐܦܳܐ ܕܡܰܚܬܳܐ ܠܶܗ ܬܰܚܬܶܗ ܪܺܝܫܶܗ ܘܣܺܝܡܳܐ ܠܶܗ ܩܳܝܶܡܬܳܐ. ܘ݄ܫܦ݄ܟ̥ ܠܶܗ ܡ݄ܫܚܳܐ ܥܰܠ ܪܺܝܫܰܗ. 19ܘ݄ܩܪܶܐ ܠܶܗ ܝܰܥܩܽܘܒ ܐ݄ܫܡܶܗ ܕܽܗ̄ܘ ܐܰܬ̥ܪܰܘܳܐ ܒܶܝܬ̥ ܐܺܝܠ. ܘܠܽܘܙ ܗ̄ܘܰܐ ܐ݄ܫܡܶܗ ܕܽܗ̄ܘ ܐܰܬ̥ܪܰܘܳܐ ܡܶܢ̱ ܡܶܩ݄ܕ̱ܡ. 20ܘ݄ܢܕ̥݄ܪ ܠܶܗ ܝܰܥܩܽܘܒ ܢܶܕ̥ܪܳܐ ܘܐܡ݄ܪ ܠܶܗ: ”ܐܶܢ ܕܳܗ̄ܘܶܐ ܐܰܠܳܗܳܐ ܐܰܥܡܺܝ ܘܢܳܛܰܪ ܠܺܝ ܒܽܗ̄ܘ ܕܰܪܒܰܢܳܐ ܕܟ݄ܐܙّܺܝ ܐ̱ܢܳܐ ܐܶܒܶܗ، ܘܕܳܗ̄ܒܶܐ ܠܺܝ ܠܰܚܡܳܐ ܕܳܐܟ̥ܰܠ ܐ̱ܢܳܐ ܘ݄ܠܒܽܘܫܳܐ ܕܠܳܒ̥ܰܫ ܐ̱ܢܳܐ، 21ܘܕܳܥܰܪ ܐ̱ܢܳܐ ܒ݄ܫܠܳܡܳܐ ܠܒܶܝ ܒܰܒܺܝ، ܡܳܪܝܳܐ ܓܕܳܗ̄ܘܶܐ ܠܺܝ ܝܳܐ ܐܰܠܳܗܳܐ. 22ܘܺܗ̄ܝ ܟܶܐܦܰܬ̥ܶܐ ܕܣܺܝܡܳܐ ܠܺܝ ܩܳܝܶܡܬܳܐ ܓܕܽܗ̄ܘܝܳܐ ܒܰܝܬܳܐ ܕܰܐܠܳܗܳܐ، ܘܟܘ̇ܠ ܡܶܕܶܐ ܕܳܗ̄ܒܰܬ ܠܺܝ ܣܬܶܝ ܡܶܢ̱ ܥܰܣܪܳܐ ܚܰܕ̱ ܓܕܳܗ̄ܒܶܢܳܟ̥.“
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 28: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
