ܣܶܦܪܳܐ ܕ݄ܒܪܺܝܬ̥ܳܐ 24

1ܘܰܐܒܪܳܗܳܡ ܡܰܣܽܒ̥ ܠܶܗ ܘܥܰܒ݄ܪ ܒܰܗ̄ܢ ܐ݄ܫܢ̈ܶܐ. ܘܡܳܪܝܳܐ ܡܒܰܪܰܟ̥ ܠܶܗ ܠܰܐܒܪܳܗܳܡ ܒܟܘ̇ܠ ܡܶܕܶܐ. 2ܘ݄ܩܪܶܐ ܠܶܗ ܐܰܒܪܳܗܳܡ ܠܽܗ̄ܘ ܓܪܶܝܥܰܝܕ̥ܶܗ ܗ̄ܽܘ ܣܳܒ̥ܳܐ، ܗ̄ܽܘ ܪܰܒܳܐ ܕܽܗ̄ܘ ܒܰܝܬܰܝܕ̥ܶܗ ܕܟ݄ܬ ܝܳܐ ܫܰܠܺܝܛܳܐ ܥܰܠ ܟܘ̇ܠ ܡܶܕܶܐ ܕܟ݄ܬ ܠܶܗ، ܘܐܡ݄ܪ ܠܶܗ ܠܶܗ: ”ܡܰܚ݄ܬ ܐܺܝܕ̥ܳܟ̥ ܬܰܚܬܶܗ ܚܰܨܺܝ، 3ܘ݄ܟܡܰܘܡܶܢܳܟ̥ ܒܡܳܪܝܳܐ ܐܰ‌ܠܳܗܳܐ ܕܺܗ̄ܝ ܫܡܰܝܳܐ ܘܰܐ‌ܠܳܗܳܐ ܕܺܗ̄ܝ ܐܰܪܥܳܐ، ܕܠܳܐ ܡܰܝܕܰܬ ܐܰܢ̱ܬ̥ܬܳܐ ܠܽܗ̄ܘ ܐܰܒܪܰܝܕ̥ܺܝ ܡܰܢ̱ ܒܢ̈ܳܬ̥ܳܐ ܕܰܟܢܰܥܢܳܝ̈ܶܐ ܕ݄ܟܝܳܬܰܒ̥ ܐ̱ܢܳܐ ܒܰܝܢܳܬ̥ܰܝّܶܗ. 4ܐܶܠܳܐ ܠܺܗ̄ܝ ܐܰܪܥܰܝܕ̥ܺܝ ܘ݄ܠܓܰܒ ܗ̄ܰܢ ܢܳܫ̈ܰܝܕ̥ܺܝ ܙܳܟ̥ ܘܡܘ̇ܕ ܐܰܢ̱ܬ̥ܬܳܐ ܠܽܗ̄ܘ ܐܰܒܪܰܝܕ̥ܺܝ ܐܺܝܣܚܳܩ.“ 5ܘܐܡ݄ܪ ܠܶܗ ܠܶܗ ܗ̄ܽܘ ܓܪܶܝܥܳܐ: ”ܘܶܐܢ ܕܠܳܐ ܐܒܥܳܐ ܗ̄ܺܝ ܐܰܢ̱ܬ̥ܬܳܐ ܕܳܐܬ̥ܝܳܐ ܒ݄ܬ̥ܪܺܝ ܠܺܗ̄ܝ ܐܰܪܥܰܬ̥ܶܐ، ܬܶܕܥܺܝܪܳܐ ܡܰܕܥܰܪ ܐ̱ܢܳܐ ܗ̄ܽܘ ܐܰܒܪܰܝܕ̥ܳܟ̥ ܠܺܗ̄ܝ ܐܰܪܥܳܐ ܕܢܰܦܺܝܩܰܬ ܡܶܢܰܗ؟“ 6ܘܐܡ݄ܪ ܠܶܗ ܠܶܗ ܐܰܒܪܳܗܳܡ: ”ܚܙܰܝ! ܡܰܒ݄ܗ، ܕܠ݄ܐ ܐܙّܶܗ ܡܰܕܥܪܰܬ ܗ̄ܽܘ ܐܰܒܪܰܝܕ̥ܺܝ ܠܬܰܡܳܐ. 7ܡܳܪܝܳܐ ܐܰ‌ܠܳܗܳܐ ܕܺܗ̄ܝ ܫܡܰܝܳܐ ܕܡ݄ܕ ܠܶܗ ܠܺܝ ܡܶܢ̱ ܬܰܡܳܐ، ܡܽܗ̄ܘ ܒܰܝܬܳܐ ܕܒܰܒܺܝ، ܘܡܺܗ̄ܝ ܐܰܪܥܳܐ ܕܰܗ̄ܘܺܝ ܐ̱ܢܳܐ ܐܶܒܰܗ، ܘܐܡ݄ܪ ܠܶܗ ܠܺܝ ܘܡܰܩ݄ܡ ܠܶܗ ܠܺܝ ܩܝܳܡܳܐ: ܕܠܽܗ̄ܘ ܙܰܪܥܰܝܕ̥ܳܟ̥ ܓܕܳܗ̄ܒܶܐ ܐ̱ܢܳܐ ܗ̄ܺܝ ܐܰܪܥܰܬ̥ܶܐ، ܗܺܝّܶܗ ܓ݄ܡܫܰܕ݄ܪ ܗ̄ܽܘ ܡܰܠܰܐܟ̥ܰܝܕ̥ܶܗ ܩܽܘܕ̱ܡܳܟ̥، ܘ݄ܓܡܰܝܕܰܬ ܐܰܢ̱ܬ̥ܬܳܐ ܠܽܗ̄ܘ ܐܰܒܪܰܝܕ̥ܺܝ ܡܶܢ̱ ܬܰܡܳܐ. 8ܘܶܐܢ ܠܰܐ ܐܒܺܝܥܳܐ ܗ̄ܺܝ ܐܰܢ̱ܬ̥ܬܳܐ ܕܳܐܬ̥ܝܳܐ ܐܰܥܡܳܟ̥، ܡܒܰܪܝܳܐ ܗܳܘܰܬ ܡܽܗ̄ܘ ܝܺܡܳܝܰܢܳܐ. ܒܶܠܚܽܘܕ̥ܶܗ ܠܳܐ ܡܰܕܥܪܰܬ ܗ̄ܽܘ ܐܰܒܪܰܝܕ̥ܺܝ ܠܬܰܡܳܐ.“ 9ܘܡܰܚ݄ܬ ܠܶܗ ܗ̄ܽܘ ܓܪܶܝܥܳܐ ܐܺܝܕ̥ܶܗ ܬܰܚܬܶܗ ܚܰܨܶܗ ܕܰܐܒܪܳܗܳܡ ܗ̄ܽܘ ܡܳܪܰܝܕ̥ܶܗ، ܘܺܝܡܶܐ ܠܶܗ ܠܶܗ ܥܰܠ ܗ̄ܽܘ ܡܰܐܡܪܰܢܳܐ.

10ܘܡܰܘܒܶܠ ܠܶܗ ܗ̄ܽܘ ܓܪܶܝܥܳܐ ܥܰܣܪܳܐ ܓܰܡ̈ܠܶܐ ܡܰܢ̱ ܓّܰܡ̈ܠܶܐ ܕܽܗ̄ܘ ܡܳܪܰܝܕ̥ܶܗ ܘܰܐܙّܶܗ، ܘܡܶܢ̱ ܟܘ̇ܠ ܛܳܒ̥̈ܳܬ̥ܳܐ ܕܽܗ̄ܘ ܡܳܪܰܝܕ̥ܶܗ ܒܺܐܝܕ̥ܶܗ. ܘܩܰܝ݄ܡ ܐܰܙّܶܗ ܠܳܐܪܳܡ ܢܰܗܪ̈ܶܝܢ، ܠܺܗ̄ܝ ܡܕ̥ܺܝܢ̱ܬܳܐ ܕܢܳܚܽܘܪ. 11ܘܡܰܪܒ̥ܰܥ ܠܶܗ ܗ̄ܰܓّܰܡ̈ܠܰܝܕ̥ܶܗ ܠܰܪܒ̥ܰܠ ܡܺܗ̄ܝ ܡܕ̥ܺܝܢ̱ܬܳܐ ܥܰܠ ܗ̄ܺܝ ܒܺܐܪܳܐ ܕܰܡّܰܝ̈ܶܐ ܠܰܐܦ ܓܢܰܝܬܶܗ ܕܝܰܘܡܳܐ، ܒܽܗ̄ܘ ܙܰܒܢܳܐ ܕܟܳܢܳܦܩܺܝ (ܗ̄ܰܢ ܢܶܫ̈ܶܐ) ܕܡܳܠ݄ܢ ܡܰܝ̈ܶܐ. 12ܘ݄ܡܨܰܠܶܐ ܠܶܗ ܘܐܡ݄ܪ ܠܶܗ: ”ܝܰܐ ܡܳܪܝܳܐ ܐܰ‌ܠܳܗܳܐ ܕܽܗ̄ܘ ܡܳܪܰܝܕ̥ܺܝ ܐܰܒܪܳܗܳܡ، ܡܛܰܝ݄ܒ ܩܽܘܕ̱ܡܺܝ ܐܰܕܝܰܘܡܰܐ، ܘܣܘ̇ܡ ܛܳܒ̥ܽܘܬ̥ܳܐ ܥܰܡ ܗ̄ܽܘ ܡܳܪܰܝܕ̥ܺܝ ܐܰܒܪܳܗܳܡ. 13ܟܰܐܠܺܝ ܐ̱ܢܳܐ ܩܺܝܡܳܐ ܥܰܠ ܗ̄ܺܝ ܒܺܐܪܳܐ ܕܰܡّܰܝ̈ܶܐ، ܘܰܒܢ̈ܳܬ̥ܳܐ ܕܰܗ̄ܢ ܢܳܫ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܓܢܳܦܩܺܝ ܕܡܳܠ݄ܢ ܡܰܝ̈ܶܐ. 14ܘܺܗ̄ܝ ܥܠܰܝܡܬܳܐ ܕܳܐܡܰܪ ܐ̱ܢܳܐ ܠܰܗ: ܡܰܢܚܰܬ ܠܺܝ ܗ̄ܺܝ ܩܳܩܬܰܝܕ̥ܰܟ̥ ܕܫܳܬܶܐ ܐ̱ܢܳܐ ܘܕܳܐܡّܳܪ̱ܐ ܠܺܝ ܫܬܰܝ، ܘ݄ܓܡܰܫܬܝܳܐ ܐ̱ܢܳܐ ܗ̄ܰܓّܰܡ̈ܠܰܝܕ̥ܳܟ̥ ܣܬܶܝ، ܗܺܝّܰܗ ܝܳܐ ܕ݄ܡܛܰܝܒܳܐ ܠܳܟ̥ ܠܽܗ̄ܘ ܥܰܒܕܰܝܕ̥ܳܟ̥ ܐܺܝܣܚܳܩ. ܘܒܰܗ̄ܬ̥ܶܐ ܓܕܳܐܕ̥ܰܥ ܐ̱ܢܳܐ ܕܟܳܣܰܝܡܰܬ ܛܳܒ̥ܽܘܬ̥ܳܐ ܘܩܽܘܫܬܳܐ ܥܰܡ ܗ̄ܽܘ ܡܳܪܰܝܕ̥ܺܝ.“

15ܘܗܶܫ ܗܺܝّܶܗ ܠܳܐ ܡܟܰܡ݄ܠ ܠܶܗ ܗ̄ܽܘ ܡܰܐܡܪܰܝܕ̥ܶܗ، ܟܰܐܠܰܗ ܪܰܦܩܳܐ ܢܰܦܺܝܩܳܐ، ܗ̄ܺܝ ܒܰܪܬ̥ܳܐ ܕ݄ܒܬܽܘܐܶܝܠ (ܕܡܰܘܠܕܳܐ ܠ݄ܒܬܽܘܐܶܝܠ)، ܗ̄ܽܘ ܐܰܒܪܳܐ ܕܡܶܠܟܰܐ، ܗ̄ܺܝ ܐܰܢ̱ܬ̥ܬܳܐ ܕܢܳܚܽܘܪ، ܗ̄ܽܘ ܐܰܚܽܘܢܳܐ ܕܰܐܒܪܳܗܳܡ، ܘܩܳܩܬܳܐ ܥܰܠ ܟܰܬܦܰܗ. 16ܘ݄ܥܠܰܝܡܬܳܐ ܫܰܦ݄ܪܬܳܐ ܗ̄ܘܰܐ ܓ̥ܰܠܰܒܶܐ ܒܺܗ̄ܝ ܚܙܰܝܬܰܝܕ̥ܰܗ. ܒܬ̥ܽܘܠܬܳܐ ܕܠܰܐ ܐܕ̥݄ܥ ܠܰܗ ܓܰܒ̥ܪܳܐ. ܘܢܰܚܺܝܬܳܐ ܠܺܗ̄ܝ ܒܺܐܪܳܐ ܘ݄ܡܠܶܐ ܠܰܗ ܗ̄ܺܝ ܩܳܩܬܰܝܕ̥ܰܗ ܘܣܰܠܺܝܩܳܐ. 17ܘܪܰܗ݄ܛ ܗ̄ܽܘ ܓܪܶܝܥܳܐ ܩܰܕ̱ܡܽܘܬ̥ܰܗ، ܘܐܡ݄ܪ ܠܶܗ ܠܰܗ: ”ܡܰܫܬܰܝ ܠܺܝ ܐ݄ܫܡܳܐ ܕܡܰܝ̈ܶܐ ܡܺܗ̄ܝ ܩܳܩܬܰܝܕ̥ܰܟ̥؟“ 18ܘܐܡ݄ܪ ܠܰܗ ܠܶܗ: ”ܫܬܰܝ ܡܳܪܝ̱.“ ܘܡܰܠ݄ܙ ܠܰܗ ܘܡܰܢܚܰܬ ܠܰܗ ܗ̄ܺܝ ܩܳܩܬܰܝܕ̥ܰܗ ܥܰܠ ܐܺܝܕ̥̈ܳܬ̥ܰܗ، ܘܡܰܫܬܶܐ ܠܰܗ. 19ܘܡ݄ܐ ܕܡܰܫܬܶܐ ܠܰܗ ܐܡ݄ܪ ܠܰܗ: ”ܠܰܓّܰܡ̈ܠܰܝܕ̥ܳܟ̥ ܣܬܶܝ ܓܡܳܠܝܳܐ ܐ̱ܢܳܐ ܗ݄ܠ ܕܫܳܬ݄ܢ ܛܳܒ̥ܳܐ.“ 20ܘܡܰܠ݄ܙ ܠܰܗ ܘ݄ܢܦ݄ܨ ܠܰܗ ܗ̄ܺܝ ܩܳܩܬܰܝܕ̥ܰܗ ܒܽܗ̄ܘ ܓܽܘܪܢܳܐ، ܘܪܰܗܺܝܛܳܐ ܣܬܶܝ ܠܺܗ̄ܝ ܒܺܐܪܳܐ ܕܡܳܠܝܳܐ. ܘܡܰܫܬܶܐ ܠܰܗ ܠܟܽܘܠّܶܗ ܗ̄ܰܓّܰܡ̈ܠܰܝܕ̥ܶܗ. 21ܘܽܗ̄ܘ ܓܰܒ̥ܪܳܐ ܟܳܡܰܫܬܶܐ ܘ݄ܟܚܳܝ݄ܪ ܐܶܒܰܗ ܘ݄ܟܢܳܛ݄ܪ ܕܳܐܕ̥݄ܥ ܕܶܐܢ ܡܳܪܝܳܐ ܡܰܟܫܰܪ ܠܶܗ ܗ̄ܽܘ ܕܰܪܒܰܝܕ̥ܶܗ ܐܰܘ ܠܳܐ. 22ܘܡ݄ܐ ܕ݄ܫܬܰܠّܶܗ ܗ̄ܰܓّܰܡ̈ܠܶܐ، ܡ݄ܕ ܠܶܗ ܗ̄ܽܘ ܓܪܶܝܥܳܐ ܡܰܪܘܳܕ̥ܳܐ ܕܕܰܗܒ̥ܳܐ ܡܰܬ̥ܩܳܠܳܐ ܗ̄ܽܘ ܝܽܘܩܪܰܝܕ̥ܶܗ، ܘ݄ܬܪܶܝ ܫܰܝܪ̈ܶܐ ܥܰܠ ܐܺܝܕ̥̈ܳܬ̥ܰܗ ܡܶܢ̱ ܥܰܣܪܳܐ ܡܰܬ̥ܩ̈ܳܠܶܐ ܕܕܰܗܒ̥ܳܐ ܗ̄ܽܘ ܝܽܘܩܪܰܬّ̥ܶܗ. 23ܘܐܡ݄ܪ ܠܶܗ ܠܰܗ: ”ܗ̄ܺܝ ܒܰܪܬ̥ܳܐ ܕܡܰܢ ܗܰܬ، ܡܰܘܕ̥ܰܥ ܠܺܝ ܐܶܢ ܟ݄ܬ ܠܰܢ ܕܽܘܟܬ̥ܳܐ ܒܽܗ̄ܘ ܒܰܝܬܳܐ ܕܒܰܒܰܟ̥ ܕܦܰܝܫܺܝܢܰܐ؟“ 24ܘܐܡ݄ܪ ܠܰܗ ܠܶܗ: ”ܗ̄ܺܝ ܒܰܪܬ̥ܳܐ ܕ݄ܒܬܽܘܐܶܝܠ ܐ̱ܢܳܐ، ܗ̄ܽܘ ܐܰܒܪܳܐ ܕܡܶܠܟܰܐ ܕܡܰܘܠܰܕ ܠܰܗ ܠܢܳܚܽܘܪ.“ 25ܘܐܡ݄ܪ ܠܰܗ ܠܶܗ ܣܬܶܝ: ”ܬܰܒ̥ܢܳܐ ܘ݄ܣܥܳܪ̈ܶܐ ܓ̥ܰܠܰܒܶܐ ܟ݄ܬ ܠܰܢ ܘܕܽܘܟܬ̥ܳܐ ܣܬܶܝ ܕܦܰܝܫܺܝܬܽܘ.“ 26ܘ݄ܒܪ݄ܟ ܠܶܗ ܗ̄ܽܘ ܓܰܒ̥ܪܳܐ ܥܰܠ ܗ̄ܺܝ ܐܰܪܥܳܐ ܘ݄ܣܓ̥݄ܕ ܠܶܗ ܠܡܳܪܝܳܐ. 27ܘܐܡ݄ܪ ܠܶܗ: ”ܒܪܺܝܟ̥ܳܐ ܝܳܐ ܡܳܪܝܳܐ ܐܰ‌ܠܳܗܳܐ ܕܽܗ̄ܘ ܡܳܪܰܝܕ̥ܺܝ ܐܰܒܪܳܗܳܡ، ܕܠܳܐ ܡܰܟܠܶܐ ܠܶܗ ܗ̄ܺܝ ܛܳܒ̥ܽܘܬ̥ܰܝܕ̥ܶܗ ܘܽܗ̄ܘ ܫܪܳܪܰܝܕ̥ܶܗ ܡܽܗ̄ܘ ܡܳܪܰܝܕ̥ܺܝ. ܐܶܠܳܐ ܡܳܪܝܳܐ ܡܗܰܕܶܐ ܠܶܗ ܠܺܝ ܒܽܗ̄ܘ ܕܰܪܒܳܐ ܕ݄ܡܰܘܒ݄ܠ ܠܽܗ̄ܘ ܒܰܝܬܳܐ ܕܽܗ̄ܘ ܐܰܚܽܘܢܳܐ ܕܽܗ̄ܘ ܡܳܪܰܝܕ̥ܺܝ ܕܡܳܝܰܕ ܐ̱ܢܳܐ ܗ̄ܺܝ ܒܰܪܬ̥ܳܐ ܕܽܗ̄ܘ ܐܰܚܽܘܢܳܐ ܕܽܗ̄ܘ ܡܳܪܰܝܕ̥ܺܝ ܠܽܗ̄ܘ ܐܰܒܪܰܝܕ̥ܶܗ.“ 28ܘܪܰܗܺܝܛܳܐ ܗ̄ܺܝ ܛܠܺܝܬ̥ܳܐ ܘܡܰܘܕ̥ܰܥ ܠܰܗ ܠܽܗ̄ܘ ܒܰܝܬܳܐ ܕܽܗ̄ܘ ܒܰܒܳܐ ܗ̄ܰܡّܰܐܡܪ̈ܰܢܺܝ.

29ܘ݄ܠܪܰܦܩܳܐ ܟ݄ܬ ܗ̄ܘܰܝ ܠܰܗ ܐܰܚܽܘܢܳܐ ܐ݄ܫܡܶܗ ܠܳܒܳܢ. ܘܪܰܗ݄ܛ ܠܳܒܳܢ ܠܓܰܒ ܗ̄ܽܘ ܓܰܒ̥ܪܳܐ، ܠܰܪܒ̥ܰܠ ܠܓܰܒ ܗ̄ܺܝ ܒܺܐܪܳܐ. 30ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܗ̄ܰܡّܰܪ̈ܘܳܕ̥ܶܐ ܘܰܫّܰܝܪ̈ܶܐ ܒܺܐܝܕ̥ܰܗ ܕܺܗ̄ܝ ܚܳܬ̥ܳܐ، ܘܺܗ̄ܝ ܢܰܩܠܐ ܕܫܰܡ݄ܥ ܗ̄ܰܡّܰܐܡܪ̈ܶܐ ܕܪܰܦܩܳܐ ܗ̄ܺܝ ܚܳܬ̥ܳܐ ܕܐܡ݄ܪ ܠܰܗ ܕܰܗ̄ܘܟ̥ܰܐ ܐܡ݄ܪ ܠܶܗ ܠܺܝ ܗ̄ܽܘ ܓܰܒ̥ܪܳܐ. ܘܰܐܬ̥ܺܝ ܠܓܰܒ ܗ̄ܽܘ ܓܰܒ̥ܪܳܐ ܘܗܺܝّܶܗ ܩܺܝܡܳܐ ܓܰܒ ܗ̄ܰܓّܰܡ̈ܠܶܐ ܥܰܠ ܗ̄ܺܝ ܒܺܐܪܳܐ. 31ܘܐܡ݄ܪ ܠܶܗ ܠܶܗ: ”ܥܒܰܪ ܝܳܐ ܝܰܐ ܡܒܰܪܟ̥ܳܐ ܕܡܳܪܝܳܐ. ܠܡ݄ܢ ܩܺܝܡܳܐ ܗܰܬ ܒܺܗ̄ܝ ܫܽܘܩܳܐ، ܘܳܐܢܳܐ ܡܛܰܝܰܒ ܠܺܝ ܗ̄ܽܘ ܒܰܝܬܳܐ ܘܕܽܘܟܬ̥ܳܐ ܠܰܓّܰܡ̈ܠܶܐ.“ 32ܘܥܰܒ݄ܪ ܗ̄ܽܘ ܓܰܒ̥ܪܳܐ ܠܽܗ̄ܘ ܒܰܝܬܳܐ، ܘ݄ܫܪܶܐ ܠܶܗ ܘܡܰܢܚܰܬ ܠܶܗ ܗ̄ܰܛّܰܥܢ̈ܶܐ ܕܰܓّܰܡ̈ܠܶܐ ܘܗܽܒ̥ ܠܰܗ ܠّܶܗ ܬܰܒ̥ܢܳܐ ܘ݄ܣܥܳܪ̈ܶܐ ܠܰܓّܰܡ̈ܠܶܐ، ܘܡܰܝ̈ܶܐ ܕܡܰܫ݄ܓ̥ ܪ̈ܰܓ̥ܠܳܬ̥ܶܗ، ܘܪ̈ܰܓ̥ܠܶܐ ܕܰܓّܰܒ̥ܪ̈ܶܐ ܕܰܐܥܡܶܗ. 33ܘܡܰܚ݄ܬ ܠܶܗ ܩܽܘܕ̱ܡܰܝّܶܗ ܕܳܐܟ̥ܠܺܝ. ܘܐܡ݄ܪ ܠܶܗ: ”ܠ݄ܐ ܟܳܐܟ̥ܰܠ ܐ̱ܢܳܐ ܗ݄ܠ ܕܠܳܐ ܐܳܡܰܪ ܐ̱ܢܳܐ ܗ̄ܽܘ ܡܰܐܡܪܰܝܕ̥ܺܝ.“ ܐܡ݄ܪّܰܗ ܠܶܗ: ”ܐܰܡܰܪ.“

34ܘܐܡ݄ܪ ܠܶܗ: ”ܗ̄ܽܘ ܓܪܶܝܥܳܐ ܕܰܐܒܪܳܗܳܡ ܐ̱ܢܳܐ. 35ܘܡܳܪܝܳܐ ܡܒܰܪܰܟ̥ ܠܶܗ ܗ̄ܽܘ ܡܳܪܰܝܕ̥ܺܝ، ܘܝܰܪܽܒ̥ ܓ̥ܰܠܰܒܶܐ، ܘܗܰܘܺܝ ܠܶܗ ܥܘܳܢ̈ܶܐ ܘܬܰܘܪ̈ܶܐ ܘܣܶܐܡܳܐ ܘܕܰܗܒ̥ܳܐ ܘ݄ܓܪ̈ܶܝܥܶܐ ܘ݄ܓܪ̈ܰܥܝܳܬ̥ܳܐ، ܘ݄ܚܡ݄ܪ̈ܝܳܬ̥ܳܐ ܘܓܰܡ̈ܠܶܐ ܘ݄ܚܡܳܪ̈ܶܐ. 36ܘܡܰܘܠܰܕ ܠܰܗ ܣܰܪܳܐ ܗ̄ܺܝ ܐܰܢ̱ܬ̥ܬܳܐ ܕܽܗ̄ܘ ܡܳܪܰܝܕ̥ܺܝ ܐܰܒܪܳܐ ܠܽܗ̄ܘ ܡܳܪܰܝܕ̥ܺܝ ܒ݄ܬ̥݄ܪ ܡ݄ܐ ܕܡܰܣܽܒ̥ ܠܰܗ. ܘܗܽܒ̥ ܠܶܗ ܠܶܗ ܟܘ̇ܠ ܡܶܕܶܐ ܕܟ݄ܬ ܠܶܗ. 37ܘܽܗ̄ܘ ܡܳܪܰܝܕ̥ܺܝ ܡܰܘܡܶܐ ܠܶܗ ܠܺܝ، ܘܐܡ݄ܪ ܠܶܗ ܠܺܝ: ܠܳܐ ܡܰܝܕܰܬ ܐܰܢ̱ܬ̥ܬܳܐ ܠܽܗ̄ܘ ܐܰܒܪܰܝܕ̥ܺܝ ܡܰܢ̱ ܒܢ̈ܳܬ̥ܳܐ ܕܰܟܢܰܥܢܳܝ̈ܶܐ، ܕܟܳܝܳܬܰܒ̥ ܐ̱ܢܳܐ ܒܺܗ̄ܝ ܐܰܪܥܰܬّ̥ܶܗ. 38ܐܶܠܳܐ ܙܳܠܳܟ̥ ܠܒܶܝ ܒܰܒܺܝ ܘܠܺܗ̄ܝ ܫܰܪܒܬ̥ܰܝܕ̥ܺܝ، ܘܡܘ̇ܕ ܐܰܢ̱ܬ̥ܬܳܐ ܠܽܗ̄ܘ ܐܰܒܪܰܝܕ̥ܺܝ ܡܶܢ̱ ܬܰܡܳܐ. 39ܘܐܡ݄ܪ ܠܺܝ ܠܽܗ̄ܘ ܡܳܪܰܝܕ̥ܺܝ ܕܟܺܝܬ ܕܠܳܐ ܐܒܥܳܐ ܗ̄ܺܝ ܐܰܢ̱ܬ̥ܬܳܐ ܕܳܐܬ̥ܝܳܐ ܐܰܥܡܺܝ. 40ܘܐܡ݄ܪ ܠܶܗ ܠܺܝ ܗ̄ܽܘ ܡܳܪܰܝܕ̥ܺܝ: ܡܳܪܝܳܐ ܕ݄ܥܒ̥݄ܕ ܠܺܝ ܩܽܘܕ̱ܡܶܗ ܗܺܝّܶܗ ܓ݄ܡܫܰܕ݄ܪ ܗ̄ܽܘ ܡܰܠܰܐܟ̥ܰܝܕ̥ܶܗ ܐܰܥܡܳܟ̥، ܘ݄ܓܦܳܬ݄ܚ ܗ̄ܽܘ ܕܰܪܒܰܝܕ̥ܳܟ̥. ܘ݄ܓܡܰܝܕܰܬ ܐܰܢ̱ܬ̥ܬܳܐ ܠܽܗ̄ܘ ܐܰܒܪܰܝܕ̥ܺܝ ܡܺܗ̄ܝ ܫܰܪܒܬ̥ܰܝܕ̥ܺܝ، ܘܡܶܢ̱ ܒܶܝ ܒܰܒܺܝ. 41ܘܺܗ̄ܝ ܢܰܩܠܝܳܐ ܓܡܺܝܒܰܪܰܬ ܡܰܢ̱ ܝܺܡ̈ܳܝܰܝܕ̥ܺܝ ܗ̄ܺܝ ܢܰܩܠܐ ܕ݄ܐܙّܳܟ̥ ܓܰܒ ܗ̄ܰܢ ܢܳܫ̈ܰܝܕ̥ܺܝ. ܘܶܐܢ ܕܠܳܐ ܗ̄ܒܺܝ ܠܳܟ̥، ܗܳܘܰܬ ܡܒܰܪܝܳܐ ܡܰܢ̱ ܝܺܡ̈ܳܝܰܝܕ̥ܺܝ. 42ܘܰܐܬ̥ܺܝ ܐ̱ܢܳܐ ܐܰܕܝܰܘܡܰܐ ܠܓܰܒ ܗ̄ܺܝ ܒܺܐܪܳܐ ܘܐܡ݄ܪ ܠܺܝ: ܝܰܐ ܡܳܪܝܳܐ ܐܰ‌ܠܳܗܳܐ ܕܽܗ̄ܘ ܡܳܪܰܝܕ̥ܺܝ ܐܰܒܪܳܗܳܡ، ܐܶܢ ܦܬ݄ܚ ܠܳܟ̥ ܗ̄ܽܘ ܕܰܪܒܰܝܕ̥ܺܝ ܕܰܐܬ̥ܺܝ ܐ̱ܢܳܐ ܐܶܒܶܗ، 43ܘܗܶܫ ܐܳܢܳܐ ܩܺܝܡܳܐ ܥܰܠ ܗ̄ܺܝ ܒܺܐܪܳܐ ܕܰܡّܰܝ̈ܶܐ، ܘܺܗ̄ܝ ܥܠܰܝܡܬܳܐ ܕܢܳܦܩܳܐ ܕܡܳܠܝܳܐ ܡܰܝ̈ܶܐ ܘܳܐܡܰܪ ܐ̱ܢܳܐ ܠܰܗ: ܡܰܫܬܰܝ ܠܺܝ ܐ݄ܫܡܳܐ ܕܡܰܝ̈ܶܐ ܡܺܗ̄ܝ ܩܳܩܬܰܝܕ̥ܰܟ̥، 44ܘܕܳܐܡّܳܪ̱ܐ ܠܺܝ ܫܬܰܝ ܗܰܬ، ܘ݄ܓܡܰܫܬܝܳܐ ܐ̱ܢܳܐ ܗ̄ܰܓّܰܡ̈ܠܰܝܕ̥ܳܟ̥ ܣܬܶܝ، ܗܺܝّܰܗ ܕܗܳܘܝܳܐ ܗ̄ܺܝ ܐܰܢ̱ܬ̥ܬܳܐ ܕ݄ܡܛܰܝܰܒ ܠܶܗ ܡܳܪܝܳܐ ܠܽܗ̄ܘ ܐܰܒܪܳܐ ܕܽܗ̄ܘ ܡܳܪܰܝܕ̥ܺܝ. 45ܘܳܐܢܳܐ ܗܶܫ ܠܳܐ ܡܟܰܡ݄ܠ ܠܺܝ ܗ̄ܽܘ ܡܰܐܡܪܳܐ ܒܠܶܒܺܝ، ܘܟܰܐܠܰܗ ܪܰܦܩܳܐ ܢܰܦܺܝܩܳܐ ܘܩܳܩܬܳܐ ܥܰܠ ܟܰܬܦܰܗ. ܘܢܰܚܺܝܬܳܐ ܠܺܗ̄ܝ ܥܰܝܢܳܐ ܘ݄ܡܠܶܐ ܠܰܗ. ܘܐܡ݄ܪ ܠܺܝ ܠܰܗ: ܡܰܫܬܰܝ ܠܺܝ ܐ݄ܫܡܳܐ ܕܡܰܝ̈ܶܐ ܡܺܗ̄ܝ ܩܳܩܬܰܝܕ̥ܰܟ̥. 46ܘܡܰܠ݄ܙ ܠܰܗ ܘܡܰܢܚܰܬ ܠܰܗ ܗ̄ܺܝ ܩܳܩܬܰܝܕ̥ܰܗ ܡܶܢܰܗ، ܘܐܡ݄ܪ ܠܰܗ ܠܺܝ: ܫܬܰܝ ܘܠܰܓّܰܡ̈ܠܰܝܕ̥ܳܟ̥ ܣܬܶܝ ܓܡܰܫܬܝܳܐ ܐ̱ܢܳܐ. ܘ݄ܫܬܶܐ ܠܺܝ، ܘܠܰܓّܰܡ̈ܠܰܝܕ̥ܺܝ ܣܬܶܝ ܡܰܫܬܶܐ ܠܰܗ. 47ܘ݄ܡܫܰܐܺܠܳܐ ܠܺܝ ܘܐܡ݄ܪ ܠܺܝ ܠܰܗ: ܗ̄ܺܝ ܒܰܪܬ̥ܳܐ ܕܡܰܢ ܗܰܬ؟ ܘܐܡ݄ܪ ܠܰܗ ܗ̄ܺܝ ܒܰܪܬ̥ܳܐ ܕ݄ܒܬܽܘܐܶܝܠ ܐ̱ܢܳܐ ܗ̄ܽܘ ܐܰܒܪܳܐ ܕܢܳܚܽܘܪ ܕܡܰܘܠܰܕ ܠܰܗ ܠܶܗ ܡܶܠܟܰܐ. ܘܡܰܚܰܬ ܠܺܝ ܗ̄ܰܫّܰܝܪ̈ܶܐ ܒܺܐܝܕ̥̈ܳܬ̥ܰܗ ܘܰܡّܰܪ̈ܘܳܕ̥ܶܐ ܒܰܐܕ̥̈ܢܳܬ̥ܰܗ. 48ܘ݄ܒܪ݄ܟ ܠܺܝ ܘ݄ܣܓ̥݄ܕ ܠܺܝ ܠܡܳܪܝܳܐ. ܘ݄ܡܒܰܪܰܟ̥ ܠܺܝ ܠܡܳܪܝܳܐ ܐܰ‌ܠܳܗܳܐ ܕܽܗ̄ܘ ܡܳܪܰܝܕ̥ܺܝ ܐܰܒܪܳܗܳܡ، ܕ݄ܡܗܰܕܶܐ ܠܶܗ ܠܺܝ ܒܕܰܪܒܳܐ ܬܪܺܝܨܳܐ ܠܽܗ̄ܘ ܒܰܝܬܳܐ ܕܽܗ̄ܘ ܐܰܚܽܘܢܳܐ ܕܽܗ̄ܘ ܡܳܪܰܝܕ̥ܺܝ ܕܡܳܝܰܕ ܐ̱ܢܳܐ ܗ̄ܺܝ ܒܰܪܬ̥ܳܐ ܕܽܗ̄ܘ ܐܰܚܽܘܢܳܐ ܕܽܗ̄ܘ ܡܳܪܰܝܕ̥ܺܝ ܠܽܗ̄ܘ ܐܰܒܪܰܝܕ̥ܶܗ. 49ܘܳܐܥܕܳܐ ܐܶܢ ܕܣܰܝܡܺܝܬܽܘ ܛܰܝܒܽܘܬ̥ܳܐ ܘ݄ܫܪܳܪܳܐ ܥܰܡ ܗ̄ܽܘ ܡܳܪܰܝܕ̥ܺܝ ܐܡܰܪܽܘ ܠܺܝ. ܘܶܐܢ ܠܳܐ، ܐܡܰܪܽܘ ܠܺܝ ܕܕܳܥܰܪ ܐ̱ܢܳܐ ܠܽܗ̄ܘ ܝܰܡܺܝܢܳܐ ܐܰܘ ܠܽܗ̄ܘ ܣܶܡܳܠܳܐ.“

50ܘܡܰܕܥܰܪّܶܗ ܠܳܒܳܢ ܘ݄ܒܬ̥ܽܘܐܶܝܠ ܘܐܡ݄ܪّܶܗ: ”ܡܶܢ̱ ܡܳܪܝܳܐ ܢܰܦܺܝܩܳܐ ܗ̄ܺܝ ܡܶܠܬ̥ܳܐ. ܠܰܝܒܰܢ ܕ݄ܐܡّܺܪ̱ܝܢܰܐ ܠܳܟ̥ ܛܰܒ̥ܬܳܐ ܐܰܘ ܒܺܝܫܬܳܐ. 51ܟܰܐܠܰܗ ܪܰܦܩܳܐ ܩܽܘܕ̱ܡܳܟ̥، ܡܽܘܕܰܗ ܘܙܳܟ̥. ܘ݄ܛܪܳܐ ܗ̄ܘܝܳܐ ܐܰܢ̱ܬ̥ܬܳܐ ܠܽܗ̄ܘ ܐܰܒܪܳܐ ܕܽܗ̄ܘ ܡܳܪܰܝܕ̥ܳܟ̥ ܐܟ̥ ܕܐܡ݄ܪ ܠܶܗ ܡܳܪܝܳܐ.“ 52ܘܺܗ̄ܝ ܢܰܩܠܐ ܕܫܰܡ݄ܥ ܗ̄ܽܘ ܓܪܶܝܥܳܐ ܕܰܐܒܪܳܗܳܡ ܗ̄ܽܘ ܡܰܐܡܪܰܬّ̥ܶܗ، ܣܓ̥݄ܕ ܠܶܗ ܥܰܠ ܗ̄ܺܝ ܐܰܪܥܳܐ ܩ݄ܕ̱ܡ ܡܳܪܝܳܐ. 53ܘܡܰܘܦܰܩ ܠܶܗ ܗ̄ܽܘ ܓܪܶܝܥܳܐ ܣܶܦܳܩ̈ܶܐ ܕܽܗ̄ܘ ܕܰܗܒ̥ܳܐ ܘܣܶܦܳܩ̈ܶܐ ܕܽܗ̄ܘ ܣܶܐܡܳܐ ܘ݄ܠܒܽܘܫ̈ܶܐ ܘܗܽܒ̥ ܠܶܗ ܠܪܰܦܩܳܐ. ܘܗܽܒ̥ ܠܶܗ ܕܳܫܢ̈ܶܐ ܠܰܗ̄ܢ ܐܰܚ̈ܽܘܢܳܢܰܝܕ̥ܰܗ ܘܠܺܗ̄ܝ ܐܶܡܰܝܕ̥ܰܗ. 54ܘܰܐܟ̥݄ܠّܶܗ ܘ݄ܫܬܰܠّܶܗ ܗܺܝّܶܗ ܘܰܓّܰܒ̥ܪ̈ܶܐ ܕܰܐܥܡܶܗ. ܘܕܰܡܺܝܟ̥ܺܝ. ܘܩܰܝ݄ܡ ܒܩܶܕܰܡܬܳܐ ܘܐܡ݄ܪ ܠܰܗ ܠّܶܗ: ”ܡܫܰܕܶܪܽܘ ܠܺܝ ܕ݄ܐܙّܺܝ ܠܓܰܒ ܗ̄ܽܘ ܡܳܪܰܝܕ̥ܺܝ.“ 55ܘܐܡ݄ܪّܰܗ ܠܶܗ ܗ̄ܰܢ ܐܰܚ̈ܽܘܢܳܢܰܝܕ̥ܰܗ ܘܺܗ̄ܝ ܐܶܡܰܝܕ̥ܰܗ: ”ܛܪܳܐ ܗ̄ܺܝ ܥܠܰܝܡܬܳܐ ܦܰܝܫܳܐ ܐܰܥܡܰܢ ܝܰܪܚܳܐ ܕܝܰܘ̈ܡܳܬ̥ܳܐ، ܘܒ݄ܬ̥݄ܪ ܛܪܳܐ ܐܙّܰܗ.“ 56ܘܐܡ݄ܪ ܠܰܗ ܠّܶܗ: ”ܠܳܐ ܡܥܰܘܩܺܝܬܽܘ ܠܺܝ، ܘܡܳܪܝܳܐ ܦܬ݄ܚ ܠܶܗ ܗ̄ܽܘ ܕܰܪܒܰܝܕ̥ܺܝ. ܡܫܰܕܶܪܽܘ ܠܺܝ، ܘ݄ܓܕ݄ܐܙّܺܝ ܐ̱ܢܳܐ ܠܓܰܒ ܗ̄ܽܘ ܡܳܪܰܝܕ̥ܺܝ.“ 57ܘܐܡ݄ܪّܶܗ: ”ܓܩܳܪܺܝܢܰܐ ܠܺܗ̄ܝ ܛܠܺܝܬ̥ܳܐ ܘ݄ܡܫܰܐܶ‌ܠܺܝܢܰܐ ܠܰܗ، ܘ݄ܛܪܳܐ ܫܳܡܥܺܝܢܰܐ ܡܶܢ̱ ܦܶܡܰܗ.“ 58ܘ݄ܩܪܰܠّܶܗ ܠܪܰܦܩܳܐ ܘܐܡ݄ܪّܰܗ ܠܰܗ: ”ܟ݄ܐܒܥܰܬ ܕ݄ܐܙّܰܟ̥ ܥܰܡ ܗ̄ܽܘ ܓܰܒ̥ܪܰܢܳܐ؟“ ܘܐܡ݄ܪ ܠܰܗ: ”ܓ݄ܐܙّܺܝ ܐ̱ܢܳܐ.“ 59ܘ݄ܡܫܰܕܰܪّܶܗ ܠܪܰܦܩܳܐ ܗ̄ܺܝ ܚܳܬ̥ܰܬّ̥ܶܗ ܘܠܺܗ̄ܝ ܡܰܘܢܩܳܢܺܝܬ̥ܰܝܕ̥ܰܗ ܘܠܽܗ̄ܘ ܓܪܶܝܥܳܐ ܕܰܐܒܪܳܗܳܡ ܘܠܰܓّܰܒ̥ܪ̈ܰܝܕ̥ܶܗ. 60ܘ݄ܡܒܰܪܰܟّ̥ܶܗ ܠܪܰܦܩܳܐ ܗ̄ܺܝ ܚܳܬ̥ܰܬّ̥ܶܗ، ܘܐܡ݄ܪّܰܗ ܠܰܗ: ”ܚܳܬ̥ܰܢ ܗܰܬ، ܗܘܰܝ ܠܰܐ‌ܠܦ̈ܶܐ ܘܪ̈ܶܒܘܳܬ̥ܳܐ، ܘܝܳܪ݄ܬ̥ ܗ̄ܽܘ ܙܰܪܥܰܝܕ̥ܰܟ̥ ܗ̄ܰܢ ܐܰܪ̈ܥܳܬ̥ܳܐ ܕܰܒܥܶܠܕ̈ܒܳܒܰܝܕ̥ܶܗ.“ 61ܘܩܰܝܺܝܡܳܐ ܪܰܦܩܳܐ ܘܰܥܠܰܝܡ̈ܳܬ̥ܰܝܕ̥ܰܗ ܘܪܰܒ̥ܺܝܟ̥ܺܝ ܥܰܠ ܗ̄ܰܓّܰܡ̈ܠܶܐ، ܘܰܐܙّ݄ܢ ܒ݄ܬ̥݄ܪ ܗ̄ܽܘ ܓܰܒ̥ܪܳܐ. ܘܡ݄ܕ ܠܶܗ ܗ̄ܽܘ ܓܪܶܝܥܳܐ ܠܪܰܦܩܳܐ ܘܰܐܙّܶܗ.

62ܘܺܐܝܣܚܳܩ ܐܰܬ̥ܳܝܳܐ ܗ̄ܘܰܐ ܡܺܗ̄ܝ ܒܺܐܪܳܐ ܕܽܗ̄ܘ ”ܚܰܝܳܐ ܚܙܶܐ ܠܶܗ ܠܺܝ.“ ܘܗܺܝّܶܗ ܝܰܬܽܒ̥ ܗ̄ܘܰܐ ܒܺܗ̄ܝ ܐܰܪܥܳܐ ܕܽܗ̄ܘ ܬܰܝܡܢܳܐ. 63ܘܢܰܦ݄ܩ ܐܺܝܣܚܳܩ ܕ݄ܡܗܰܠ݄ܟ̥ ܒܺܗ̄ܝ ܚܰܩܠܳܐ ܒ݄ܓܢܰܝܬܶܗ ܕܝܰܘܡܳܐ، ܘܡܰܥܠܶܐ ܠܶܗ ܥܰܝܢ̈ܳܬ̥ܶܗ ܘ݄ܚܙܶܐ ܠܶܗ ܟܰܐܠܶܗ ܗ̄ܰܓّܰܡ̈ܠܶܐ ܟܳܐܬ̥݄ܢ. 64ܘܡܰܥܠܶܐ ܠܰܗ ܪܰܦܩܳܐ ܥܰܝܢ̈ܳܬ̥ܶܗ ܘܗܺܝّܰܗ ܥܰܠ ܗ̄ܽܘ ܓܰܡܠܳܐ، ܘܺܗ̄ܝ ܢܰܩܠܐ ܕ݄ܚܙܶܐ ܠܰܗ ܠܺܐܝܣܚܳܩ ܟ݄ܦ ܠܰܗ ܪܺܝܫܰܗ. 65ܘܐܡ݄ܪ ܠܰܗ ܠܽܗ̄ܘ ܓܪܶܝܥܳܐ: ”ܡܰܢܝܳܐ ܗ̄ܽܘ ܓܰܒ̥ܪܰܢܳܐ ܒܺܗ̄ܝ ܚܰܩܠܳܐ ܕܟܳܐܬ̥ܶܐ ܠܩܰܕ̱ܡܽܘܬ̥ܰܢ؟“ ܘܐܡ݄ܪ ܠܶܗ ܗ̄ܽܘ ܓܪܶܝܥܳܐ: ”ܗ̄ܽܘ ܡܳܪܰܝܕ̥ܺܝ ܝܳܐ.“ ܘܡ݄ܕ ܠܰܗ ܐܰܪܕܺܝܕܳܐ (ܡܰܢܕܺܝܠܳܐ) ܘ݄ܡܟܰܣܶܐ ܠܰܗ ܪܺܝܫܰܗ. 66ܘܽܗ̄ܘ ܓܪܶܝܥܳܐ ܐܡ݄ܪ ܠܶܗ ܠܺܐܝܣܚܳܩ ܟܘ̇ܠ ܡܶܕܶܐ ܕܣ݄ܡ ܠܰܗ. 67ܘܡܰܥ݄ܒܪܳܐ ܠܶܗ ܐܺܝܣܚܳܩ ܠܽܗ̄ܘ ܡܰܫܟܢܳܐ ܕܣܰܪܳܐ ܗ̄ܺܝ ܐܶܡܳܐ. ܘܡ݄ܕ ܠܶܗ ܠܪܰܦܩܳܐ ܘܗܰܘܝܳܐ ܠܶܗ ܐܰܢ̱ܬ̥ܬܳܐ. ܘ݄ܪܚܺܝܡܳܐ ܠܶܗ ܘܒܰܣ݄ܡ ܠܶܒܶܗ ܕܺܐܝܣܚܳܩ ܒ݄ܬ̥݄ܪ (ܡܽܗ̄ܘ ܡܰܘܬܳܐ) ܕܺܗ̄ܝ ܐܶܡܳܐ.

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 24: ܟܬܒܐ

Highlight

Copy