ܥܒܳܕ̥̈ܶܐ ܕܰܫܠܺܝܚ̈ܶܐ 3
3
ܚܓ̥ܺܝܪܳܐ ܕܒܽܗ̄ܘ ܬܰܪܥܳܐ ܕܽܗ̄ܘ ܗܰܝܟܠܳܐ
1ܘܗܰܘܺܝ ܗ̄ܺܝ ܢܰܩܠܐ ܕܫܶܡܥܽܘܢ ܟܶܐܦܳܐ ܘܝܽܘܚܰܢܳܢ ܣ݄ܠܩܺܝ ܗ̄ܘܰܘ̱ ܥܰܡ ܚܕ̥ܳܕ̥̈ܶܐ ܠܽܗ̄ܘ ܗܰܝܟܠܳܐ ܒܽܗ̄ܘ ܙܰܒܢܳܐ ܕܺܗ̄ܝ ܨܠܽܘܬ̥ܳܐ ܕ݄ܬܫܰܥ ܫܳܥܺܝ̈ܢ (ܬܠ݄ܬ̥ ܒ݄ܬ̥݄ܪ ܦܰܠܓܶܗ ܕܝܰܘܡܳܐ)، 2ܘܟܰܐܠܶܗ ܚܰܕ̱ ܓܰܒ̥ܪܳܐ ܚܓ̥ܺܝܪܳܐ ܡܽܗ̄ܘ ܟܰܪܣܳܐ ܕܺܗ̄ܝ ܐܶܡܳܐ، ܛܳܥܢܺܝ ܗ̄ܘܰܝ ܠܶܗ ܢܳܫ̈ܶܐ، ܗܰܢܺܝ ܕܗܰܘܺܝ ܗ̄ܘܰܐ ܠّܶܗ ܥܝܳܕ̥ܳܐ ܕܡܰܝܬ݄ܢ ܠܶܗ ܘܡܰܚܬܺܝ ܠܶܗ ܩ݄ܕ̱ܡ ܗ̄ܽܘ ܬܰܪܥܳܐ ܕܽܗ̄ܘ ܗܰܝܟܠܳܐ ܕ݄ܟܡ݄ܩܪܶܐ ܫܰܦܺܝܪܳܐ ܠܰܫܰܢ ܕܳܐܒ݄ܥ ܙܶܕܰܩܬܳܐ ܡܰܗ̄ܢܺܝ ܕܟܳܥܳܒܪܺܝ ܠܽܗ̄ܘ ܗܰܝܟܠܳܐ. 3ܗܰܢܳܐ، ܗ̄ܺܝ ܢܰܩܠܐ ܕ݄ܚܙܶܐ ܠܶܗ ܫܶܡܥܽܘܢ ܘܝܽܘܚܰܢܳܢ ܕܟܳܥܳܒܪܺܝ ܠܽܗ̄ܘ ܗܰܝܟܠܳܐ، ܐܰܒ݄ܥ ܗ̄ܘܰܐ ܡ݄ܢّܶܗ ܕܳܗ̄ܒ݄ܢ ܠܶܗ ܙܶܕܰܩܬܳܐ. 4ܘܚ݄ܪّܶܗ ܐܶܒܶܗ، ܫܶܡܥܽܘܢ ܘܝܽܘܚܰܢܳܢ، ܘܐܡ݄ܪّܰܗ ܠܶܗ: ”ܚܘܿܪ ܐܶܒܰܢ!“ 5ܘܗܺܝّܶܗ ܚ݄ܪ ܠܶܗ ܐܰܒّܶܗ ܘܚܳܫܰܒ̥ ܗ̄ܘܰܐ ܕܓ݄ܕܡܳܝ݄ܕ ܡ݄ܢّܶܗ ܡܶܕܶܐ. 6ܫܶܡܥܽܘܢ ܐܡ݄ܪ ܠܶܗ ܠܶܗ: ”ܕܰܗܒ̥ܳܐ ܘܣܶܐܡܳܐ ܠܰܝ̱ܬ ܠܺܝ، ܐܶܠܳܐ ܗ̄ܽܘ ܡܶܕܶܐ ܕܟ݄ܬ ܠܺܝ ܓܕܳܗ̄ܒܶܢܳܟ̥: ܒ݄ܐܫܡܶܗ ܕܝܶܫܽܘܥ ܡܫܺܝܚܳܐ ܗ̄ܽܘ ܢܳܨܪܳܝܳܐ ܩܘܿܡ ܗܰܠ݄ܟ̥!“ 7ܘܨ݄ܕ ܠܶܗ ܒܺܐܝܕ̥ܶܗ ܕܽܗ̄ܘ ܝܰܡܺܝܢܳܐ ܘܡܰܩ݄ܡ ܠܶܗ. ܘܒܺܗ̄ܝ ܫܳܥܬ̥ܰܝܕ̥ܰܗ ܚܺܝܨܺܝ ܪ̈ܰܓ̥ܠܳܬ̥ܶܗ ܘܰܥّܰܪ̈ܩܽܒّ̥ܰܝܕ̥ܶܗ. 8ܘܫܰܘ݄ܪ (ܩܰܙ݄ܦ) ܩܰܝ݄ܡ ܘ݄ܡܗܰܠܰܟ̥ ܠܶܗ ܘܥܰܒ݄ܪ ܐܰܥܡܰܝّܶܗ ܠܽܗ̄ܘ ܗܰܝܟܠܳܐ، ܘܗܺܝّܶܗ ܟ݄ܡܗܰܠ݄ܟ̥ ܘܛܳܝ݄ܪ (ܫܳܘ݄ܪ) ܘ݄ܡܫܰܒ݄ܚ ܠܰܐܠܳܗܳܐ. 9ܘܽܗ̄ܘ ܥܰܡܳܐ ܟܽܘܠܶܗ ܚܙܰܠّܶܗ ܟ݄ܡܗܰܠ݄ܟ̥ ܘ݄ܡܫܰܒ݄ܚ ܠܰܐܠܳܗܳܐ. 10ܘܰܐܕ̥ܺܝܥܺܝ ܠܶܗ ܕܗܺܝّܶܗ ܝܳܐ ܗ̄ܽܘ ܓܰܒ̥ܳܝܳܐ ܕܝܳܬܰܒ̥ ܗ̄ܘܰܐ ܟܽܘܠ ܝܰܘܡܳܐ ܘܳܐܒܰܥ ܗ̄ܘܰܐ ܙܶܕܰܩܬܳܐ ܥܰܠ ܗ̄ܽܘ ܬܰܪܥܳܐ ܕ݄ܟܡ݄ܩܪܶܐ ܫܰܦܺܝܪܳܐ، ܘ݄ܡܠ݄ܢ ܬܶܗܪܳܐ ܘܕܽܘܡܳܪܳܐ ܥܰܠ ܗ̄ܽܘ ܡܶܕܶܐ ܕܗܰܘܺܝ.
11ܘܗܺܝّܶܗ ܙܳܒܰܛ ܗ̄ܘܰܐ ܠܫܶܡܥܽܘܢ ܘ݄ܠܝܽܘܚܰܢܳܢ، ܪܰܗ݄ܛ ܠܓܰܒܰܝّܶܗ ܗ̄ܽܘ ܥܰܡܳܐ ܟܽܘܠܶܗ ܡܕܰܘܡܪܳܐ ܠܽܗ̄ܘ ܐܶܣܛܽܘܳܐ ܕ݄ܟܡ݄ܩܪܶܐ ܕ݄ܫܠܶܝܡܳܘܢ.
ܗ̄ܺܝ ܟܳܪܽܘܙܽܘܬ̥ܳܐ ܚܪܶܬܳܐ ܕܫܶܡܥܽܘܢ
12ܘܫܶܡܥܽܘܢ ܗ̄ܺܝ ܢܰܩܠܐ ܕ݄ܚܙܶܐ ܠܶܗ، ܡܰܕܥܰܪ ܠܶܗ ܐܡ݄ܪ ܠܰܗ ܠّܶܗ: ”ܝܰܐ ܓܰܒܪ̈ܶܐ، ܐܰܒܢ̈ܶܐ ܕܺܐܝܣܪܳܐܶܝܠ، ܡ݄ܢܝܳܐ ܗܰܬ̥ܶܐ ܕܟܳܡܺܝܕܰܘܡܪܺܝܬܽܘ ܒܰܗ̄ܢܳܐ؟ ܘܡ݄ܢܝܳܐ ܕܟܳܚܰܝܪܺܝܬܽܘ ܐܶܒܰܢ ܐܟ̥ ܕܒܽܗ̄ܘ ܚܰܝܠܰܝܕ̥ܰܢ ܐܰܘ ܒܽܗ̄ܘ ܫܽܘܠܛܳܢܰܝܕ̥ܰܢ ܣ݄ܡ ܠܰܢ ܗܰܬ̥ܶܐ ܕ݄ܡܗܰܠ݄ܟ̥ ܗܰܢܳܐ؟ 13ܗ̄ܽܘ ܐܰܠܳܗܳܐ ܕܰܐܒܪܳܗܳܡ ܝܳܐ ܘܕܺܐܝܣܚܳܩ ܘ݄ܕܝܰܥܩܽܘܒ، ܐܰܠܳܗܳܐ ܕܰܒّܰܒܳܢ̈ܰܝܕ̥ܰܢ ܡܫܰܒܰܚ ܠܶܗ ܠܽܗ̄ܘ ܐܰܒܪܰܝܕ̥ܶܗ ܝܶܫܽܘܥ، ܗܰܘܳܐ ܕܗܰܬܽܘ ܡܰܫܠܰܡܟ̥ܽܘ (ܕܗܽܒ̥ܟ̥ܽܘ ܠܺܗ̄ܝ ܐܺܝܕ̥ܳܐ)، ܘܟܰܦܺܝܪܺܝܬܽܘ ܐܶܒܶܗ ܩ݄ܕ̱ܡ ܦܳܬ̥ܶܗ ܕܦܺܝܠܰܛܳܘܣ، ܗ̄ܺܝ ܢܰܩܠܐ ܕܗܺܝّܶܗ ܡܒܰܪܶܐ ܠܶܗ ܕܡܰܪܦܶܐ ܠܶܗ. 14ܐܶܠܳܐ ܗܰܬܽܘ ܟܰܦܺܝܪܺܝܬܽܘ ܒܽܗ̄ܘ ܩܰܕܺܝܫܳܐ ܘܽܗ̄ܘ ܙܰܕܺܝܩܳܐ، ܘܰܐܒܺܝܥܺܝܬܽܘ ܠܓܰܒ̥ܪܳܐ ܩܰܛܳܠܳܐ ܕܡܺܝܬܰܗܒ̥ܰܠܟ̥ܽܘ. 15ܘܠܰܗ̄ܘܳܐ ܗ̄ܽܘ ܪܺܝܫܳܐ ܕܰܚّܰܝ̈ܶܐ ܩܛ݄ܠܟ̥ܽܘ، ܘܰܐܠܳܗܳܐ ܡܰܩ݄ܡ ܠܶܗ ܡܒܰܝܢ ܗ̄ܰܡّܺܝ̈ܬ̥ܶܐ، ܘܰܐܚܢܰܐ ܟܽܘܠܰܢ ܗ̄ܰܣّܳܗܕ̈ܰܝܕ̥ܶܗ ܢܰܐ. 16ܘܒܺܗ̄ܝ ܗܰܝܡܳܢܽܘܬ̥ܳܐ ܕ݄ܐܫܡܶܗ (ܕܝܶܫܽܘܥ)، ܚ݄ܨ ܠܶܗ ܘܡܰܢ݄ܚ ܠܶܗ ܠܰܗ̄ܢܳܐ ܕܟܳܚܳܙܺܝܬܽܘ ܘܟ݄ܐܕ̥ܥܺܝܬܽܘ. ܘܺܗ̄ܝ ܗܰܝܡܳܢܽܘܬ̥ܳܐ ܕܶܐܒܶܗ ܗܽܒ̥ ܠܰܗ ܠܶܗ ܗ̄ܽܘ ܚܽܘܠܡܳܢܰܢܳܐ ܩ݄ܕ̱ܡ ܟܽܘ̇ܠܟ̥ܽܘ. 17ܐܶܠܳܐ ܐܳܥܕܳܐ، ܝܰܐ ܐܰܚ̈ܽܘܢܳܢܶܐ، ܟܳܐܕ̥ܰܥ ܐ̱ܢܳܐ ܕ݄ܒܛܰܥܝܽܘܬ̥ܳܐ ܣ݄ܡܟ̥ܽܘ ܗܰܬ̥ܶܐ ܐܟ̥ ܕܣ݄ܡّܶܗ ܗ̄ܰܪّܺܝܫ̈ܳܢܰܬ̥ܟ̥ܽܘ. 18ܘܰܐܠܳܗܳܐ ܐܟ̥ ܕܽܗ̄ܘ ܡܶܕܶܐ ܕ݄ܟܪ݄ܙ ܠܶܗ ܘܡܰܚܘܶܐ ܠܶܗ ܡܶܢ̱ ܡܶܩ݄ܕ̱ܡ ܒܦܶܡܶܗ ܕܟܽܘܠّܶܗ ܗ̄ܰܢܒܺܝ̈ܶܐ، ’ܚܰܫܳܐ ܓܛܳܥ݄ܢ ܗ̄ܽܘ ܡܫܺܝܚܰܝܕ̥ܶܗ‘ ܘܗܰܘܟ̥ܰܐ ܗܰܘܺܝ. 19ܗܰܢ ܢܰܩܠܐ ܬܽܘܒܽܘ ܘ݄ܕܥܰܪܽܘ ܠܰܫܰܢ ܕܡ݄ܠܚ݄ܢ ܗ̄ܰܚ̈ܛܳܗܰܬ̥ܟ̥ܽܘ، ܘ݄ܓܕܳܐܬ̥݄ܢܟ̥ܽܘ ܙܰܒܢ̈ܶܐ ܕ݄ܬ̥ܢܰܚܬܳܐ ܡܶܩ݄ܕ̱ܡ ܦܳܬ̥ܶܗ ܕܡܳܪܝܳܐ، 20ܘܓ݄ܡܫܰܕܰܪܟ̥ܽܘ ܠܰܐܝܢܰܐ ܕ݄ܡܥܰܝܰܢ ܗ̄ܘܰܐ ܠܟ̥ܽܘ: ܠܝܶܫܽܘܥ ܡܫܺܝܚܳܐ، 21ܕܶܐܠܶܗ ܓܠܳܙ݄ܡ ܠܺܗ̄ܝ ܫܡܰܝܳܐ ܕܡܰܩܒܠܳܐ ܗܳܠ ܕܟܳܡܠܺܝ ܟܽܘܠّܶܗ ܗ̄ܰܙّܰܒܢ̈ܶܐ ܐܰܝܢܰܐ ܕܐܡ݄ܪ ܠܶܗ ܐܰܠܳܗܳܐ ܒܦܶܡܶܗ ܕܰܗ̄ܢ ܢܒ̈ܺܝܝܰܝܕ̥ܶܗ ܗ̄ܰܩّܰܕ̈ܺܝܫܶܐ ܕܡܶܢ̱ ܥܳܠܰܡ. 22ܡܺܐܝܕ̥ܶܗ ܕܡܽܘܫܶܐ ܐܡ݄ܪ ܠܶܗ: ’ܡܳܪܝܳܐ ܓܡܰܩ݄ܡ ܐܰܠܟ̥ܽܘ ܢܒܺܝܳܐ ܡܰܗ̄ܢ ܐܰܚ̈ܽܘܢܳܢܰܬ̥ܟ̥ܽܘ ܐܟ̥݄ܕܘܳܬ̥ܺܝ، ܫܡܰܥܽܘ ܠܶܗ ܒܟܽܘܠ ܡܶܕܶܐ ܕܡ݄ܫܓ̥݄ܠ ܐܰܥܡܰܝܟ̥ܽܘ. 23ܘ݄ܓܕܳܗ̄ܘܶܐ، ܟܽܘܠ ܢܳܫܳܐ ܕܠ݄ܐ ܫܳܡ݄ܥ ܠܽܗ̄ܘ ܢܒܺܝܰܘܳܐ ܓܡܺܝܣܰܟ݄ܪ ܡܽܗ̄ܘ ܥܰܡܰܝܕ̥ܶܗ.‘ 24ܘܟܽܘܠّܶܗ ܗ̄ܰܢܒܺܝ̈ܶܐ، ܡܶܢ̱ ܫܡܽܘܐܶܝܠ ܘܗܰܢܺܝ ܕܰܐܬ̥݄ܢ ܒ݄ܬ̥ܪܶܗ ܐܡ݄ܪّܶܗ ܘ݄ܟܪ݄ܙّܶܗ ܥܰܠ ܗ̄ܰܝّܰܘ̈ܡܳܬ̥ܰܢ݄ܟ. 25ܗܰܬܽܘ ܗ̄ܬܽܘ ܗ̄ܰܢ ܐܰܒܢ̈ܶܐ ܕܰܗ̄ܢ ܢܒܺܝ̈ܶܐ ܘܕܽܗ̄ܘ ܩܝܳܡܳܐ ܗܰܘܳܐ ܕܡܰܚܰܬ ܠܶܗ ܐܰܠܳܗܳܐ ܠܰܒّܰܒܳܢ̈ܰܝܕ̥ܰܢ ܗ̄ܺܝ ܢܰܩܠܐ ܕܐܡ݄ܪ ܠܶܗ ܠܰܐܒܪܳܗܳܡ: ’ܒܽܗ̄ܘ ܙܰܪܥܰܝܕ̥ܳܟ̥ ܓܡܺܝܒܰܪܟ̥ܺܝ ܗ̄ܰܥّܰܡ̈ܶܐ ܟܽܘܠّܶܗ ܕܺܗ̄ܝ ܐܰܪܥܳܐ.‘ 26ܘܰܐܠܟ̥ܽܘ، ܡܶܢ̱ ܡܶܩ݄ܕ̱ܡ، ܐܰܠܳܗܳܐ ܡܰܩ݄ܡ ܠܶܗ ܘ݄ܡܫܰܕܰܪ ܠܶܗ ܗ̄ܽܘ ܐܰܒܪܰܝܕ̥ܶܗ ܕ݄ܡܒܰܪܰܟ̥ܟ̥ܽܘ ܐܶܢ ܕܕܳܥܪܺܝܬܽܘ ܘܬܰܝܒܺܝܬܽܘ ܡܰܢ̱ ܒّܺܝܫ̈ܳܬ̥ܰܬ̥ܟ̥ܽܘ.“
Currently Selected:
ܥܒܳܕ̥̈ܶܐ ܕܰܫܠܺܝܚ̈ܶܐ 3: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
