ܥܒܳܕ̥̈ܶܐ ܕܰܫܠܺܝܚ̈ܶܐ 4

ܡܰܚܰܬܳܐ ܕܺܐܝܕ̥ܳܐ ܥܰܠ ܕܫܶܡܥܽܘܢ ܘܝܽܘܚܰܢܳܢ

1ܘܺܗ̄ܝ ܢܰܩܠܐ ܕܰܡّܰܐܡܪ̈ܰܢܺܝ ܡ݄ܫܓ̥ܳܠܺܝ ܗ̄ܘܰܘ̱ ܠܽܗ̄ܘ ܥܰܡܳܐ، ܩܰܝܺܝܡܺܝ ܐܰܥܠܰܝّܶܗ ܗ̄ܰܟّܳܗ̈ܢܶܐ ܘܰܙّܰܕ̈ܽܘܩܳܝܶܐ ܘܰܪّܺܝܫܳܢ̈ܶܐ ܕܽܗ̄ܘ ܗܰܝܟܠܳܐ، 2ܘܗ݄ܢّܶܝ ܪ̈ܓ̥ܺܝܙܶܐ ܐܰܥܠܰܝّܶܗ ܥܰܠ ܕܡܰܘܠܦܺܝ ܗ̄ܘܰܘ̱ ܠܽܗ̄ܘ ܥܰܡܳܐ ܘܟܳܪܙܺܝ ܗ̄ܘܰܘ̱ ܒ݄ܡܫܺܝܚܳܐ ܥܰܠ ܗ̄ܺܝ ܩܝܰܡܬܳܐ ܕܡܶܢ̱ ܒܰܝܢ ܗ̄ܰܡّܺܝ̈ܬ̥ܶܐ. 3ܘܡܰܚܰܬّܶܗ ܐܰܥܠܰܝّܶܗ ܐܺܝܕ̥ܳܐ ܘ݄ܢܛܺܝܪ݄ܢّܶܗ ܠܝܰܘܡܳܐ ܚܪܶܢܳܐ ܥܰܠ ܕܩܰܪܽܒ̥ ܗ̄ܘܰܐ ܗ̄ܽܘ ܝܰܘܡܳܐ ܕܓܳܢܶܐ. 4ܘܓ̥ܰܠܰܒܶܐ ܡܰܗ̄ܢܺܝ ܕܫܰܡܺܝܥܺܝ ܗ̄ܽܘ ܡܰܐܡܪܳܐ ܡܗܰܝܡܰܢّܶܗ، ܘܗܳܘ݄ܢ ܗ̄ܘܰܘ̱ ܒܽܗ̄ܘ ܡܶܢܝܳܢܳܐ ܠܰܐܦ ܚܰܡܫܰܐܠܦܳܐ ܓܰܒܪ̈ܶܐ.

5ܘ݄ܠܝܰܘܡܳܐ ܚܪܶܢܳܐ، ܠܰܬܺܝܡܺܝ ܗ̄ܰܪّܺܝܫܳܢ̈ܶܐ ܘܰܩّܰܫ̈ܶܐ ܘܰܣّܳܦܪ̈ܶܐ، 6ܘܰܐܥܡܰܝّܶܗ ܣܬܶܝ ܚܰܢܳܢ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܘܩܰܝܳܦܳܐ ܘܝܽܘܚܰܢܳܢ ܘܰܐ‌ܠܶܟܣܰܢܕܪܳܘܣ ܘܗܰܢ݄ܟ ܕܟ݄ܬ ܗ̄ܘܰܝ ܢܶܝ ܡܺܗ̄ܝ ܫܰܪܒܬ̥ܳܐ ܕܰܪّܰܒ̈ܶܐ ܕܰܟّܳܗ̈ܢܶܐ. 7ܘܺܗ̄ܝ ܢܰܩܠܐ ܕܡܰܩܺܝܡ݄ܢّܶܗ ܒܽܗ̄ܘ ܦܰܠܓܳܐ ܡܫܰܐܺܠܺܝ ܗ̄ܘܰܘ̱ ܢّܶܗ: ”ܒܰܐܝܢܰܐ ܚܰܝܠܳܐ ܐܰܘ ܒܰܐܝܢܰܐ ܐ݄ܫܡܳܐ ܣ݄ܡܟ̥ܽܘ ܗܰܬ̥ܶܐ؟“ 8ܗ̄ܺܝ ܢܰܩܠܝܳܐ، ܫܶܡܥܽܘܢ ܟܶܐܦܳܐ ܡܠܶܐ ܪܽܘܚܳܐ ܕܩܽܘܕܫܳܐ ܘܐܡ݄ܪ ܠܰܗ ܠّܶܗ: ”ܝܰܐ ܪ̈ܰܒܶܐ ܕܽܗ̄ܘ ܥܰܡܳܐ، ܘܝܰܐ ܩܰܫ̈ܶܐ ܕܺܐܝܣܪܳܐܶܝܠ، ܫܡܰܥܽܘ: 9ܐܶܢ ܐܰܚܢܰܐ ܐܰܕܝܰܘܡܰܐ ܟܡܺܝܕܳܢܺܝܢܰܐ ܡ݄ܢܟ̥ܽܘ ܥܰܠ ܗ̄ܺܝ ܛܳܒ̥ܽܘܬ̥ܳܐ ܕܗܰܘܝܳܐ ܠܢܳܫܳܐ ܟܰܐܺܝܒ̥ܳܐ، ܕ݄ܒܡ݄ܢ ܗܰܢܳܐ ܢܰܝ݄ܚ ܠܶܗ، 10ܛܪܳܐ ܗܰܢܳܐ ܡܺܝܕ̥݄ܥ ܐܰ‌ܠܟ̥ܽܘ ܘ݄ܠܟܽܘܠܶܗ ܗ̄ܽܘ ܥܰܡܳܐ ܕܺܐܝܣܪܳܐܶܝܠ: ܒ݄ܐܫܡܶܗ ܕܝܶܫܽܘܥ ܡܫܺܝܚܳܐ ܗ̄ܽܘ ܢܳܨܪܳܝܳܐ، ܗܰܘܳܐ ܕܗܰܬܽܘ ܨܠܽܒ̥ܟ̥ܽܘ، ܗܰܘܳܐ ܕܰܐ‌ܠܳܗܳܐ ܡܰܩ݄ܡ ܠܶܗ ܡܒܰܝܢ ܗ̄ܰܡّܺܝ̈ܬ̥ܶܐ، ܐܶܒܶܗ ܒܰܗ̄ܘܳܐ ܟܰܐܠܶܗ ܗܰܢܳܐ ܟܩܳܝ݄ܡ ܩܽܘܕ̱ܡܰܝܟ̥ܽܘ ܢܰܝܺܝܚܳܐ. 11ܗܰܢܳܐ ܝܳܐ ܗ̄ܺܝ ܟܶܐܦܳܐ ܕ݄ܡܚܰܩܰܪܟ̥ܽܘ ܐܰ‌ܠܟ̥ܽܘ، ܝܰܐ ܒܰܢܳܝ̈ܶܐ، ܘܗܺܝّܶܗ ܗܰܘܺܝ ܠܪܺܝܫܰܗ ܕܺܗ̄ܝ ܩ݄ܪܢܺܝܬ̥ܳܐ. 12ܘܠܰܝܬ ܦܽܘܪܩܳܢܳܐ ܒܢܳܫܳܐ ܚܪܶܢܳܐ، ܡܺܐܝܕ̥ܶܗ ܕܠܰܝܬ ܐ݄ܫܡܳܐ ܚܪܶܢܳܐ ܬܰܚܬ ܗ̄ܺܝ ܫܡܰܝܳܐ، ܕܗܺܝܒ̥ ܠܰܗ̄ܢ ܢܳܫ̈ܶܐ، ܕܶܐܒܶܗ ܓܠܳܙ݄ܡ ܕܳܗ̄ܘ݄ܢ ܗ̄ܰܚّܰܝ̈ܶܐ.“

13ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܽܘ ܡܰܐܡܪܳܐ ܕܫܶܡܥܽܘܢ ܘܝܽܘܚܰܢܳܢ ܕ݄ܒܓܰܠܝܳܐ ܐܡ݄ܪّܶܗ، ܐܰܕ̥ܺܝܥܺܝ ܕܠܰܝ̱ܬ ܢܶܝ ܝܰܠܺܝܦ̈ܶܐ ܘܒܽܘܪ̈ܶܐ ܢܶܝ، ܘ݄ܡܕܰܘܡܪܺܝ ܐܰܒّܶܗ، ܘܰܐܕ̥ܺܝܥ݄ܢّܶܗ ܕܥܰܡ ܝܶܫܽܘܥ ܐ݄ܙّ݄ܢ ܗ̄ܘܰܘ̱ ܘܳܐܬ̥݄ܢ ܗ̄ܘܰܘ̱. 14ܘܚܳܙ݄ܢ ܗ̄ܘܰܘ̱ ܗ̄ܽܘ ܚܓ̥ܺܝܪܰܘܳܐ ܕܢܰܝ݄ܚ ܠܶܗ ܩܳܝ݄ܡ ܗ̄ܘܰܐ ܐܰܥܡܰܝّܶܗ، ܘܠܳܐ ܩܳܕܪܺܝ ܗ̄ܘܰܘ̱ ܕ݄ܐܡّܺܪ̱ܝ ܡܶܕܶܐ ܡܩܰܒ݄ܠ ܕ݄ܬّ̥ܶܗ. 15ܗ̄ܺܝ ܢܰܩܠܝܳܐ ܗܽܒّ̥ܶܗ ܦܽܘܩܕܳܢܳܐ ܕܡܰܘܦܩ݄ܢّܶܗ ܡܽܗ̄ܘ ܟܢܽܘܫܝܰܬّ̥ܶܗ، ܘ݄ܐܡّܺܪ̱ܝ ܗ̄ܘܰܘ̱ ܚܰܕ̱ ܠܚܰܕ̱: 16”ܡ݄ܢ ܣܰܝܡܺܝܢܰܐ ܠܰܓّܰܒ̥ܪ̈ܰܢܺܝ؟ ܟܰܐܠܶܗ ܐܳܬ̥ܳܐ ܓܠܺܝܬ̥ܳܐ ܕܗܰܘܝܳܐ ܒܺܐܝܕ̥̈ܳܬ̥ܰܝّܶܗ، ܘܺܝܕ̥ܺܝܥܳܐ ܠܟܘ̇ܠّܶܗ ܗ̄ܰܥّܳܡܽܘܪ̈ܶܐ ܕܽܐܘܪܶܫܠܶܡ، ܘܠܰܝܒܰܢ ܕܟܳܦܪܺܝܢܰܐ ܐܶܒܰܗ. 17ܐܶ‌ܠܳܐ ܕܠܳܐ ܒܽܗ̄ܘ ܙܳܝܽܘܕܳܐ ܢܳܦ݄ܩ ܗ̄ܽܘ ܛܶܒܰܢܳܐ ܒܰܝܢ ܗ̄ܽܘ ܥܰܡܳܐ، ܛܪܳܐ ܡܰܙܺܝܥܺܝܢܰܢّܶܗ ܕܠܳܐ ܕܳܥܪܺܝ ܡ݄ܫܓ̥ܳܠܺܝ ܒܽܗ̄ܘ ܐ݄ܫܡܰܢܳܐ ܘܠܳܐ ܠܚܰܕ̱ ܡܰܗ̄ܢ ܢܳܫ̈ܶܐ.“ 18ܘ݄ܩܪܰܢّܶܗ ܘܗܽܒّ̥ܰܢّܶܗ ܦܽܘܩܕܳܢܳܐ ܕܠܳܐ ܟܳܗ̄ܘܶܐ ܒܢܰܩܠܐ ܡ݄ܫܓ̥ܳܠܺܝ ܘܠܳܐ ܡܰܘܠܦܺܝ ܒ݄ܐܫܡܶܗ ܕܝܶܫܽܘܥ. 19ܡܰܕܥܰܪّܶܗ ܫܶܡܥܽܘܢ ܟܶܐܦܳܐ ܘܝܽܘܚܰܢܳܢ ܘܐܡ݄ܪّܰܢّܶܗ: ”ܐܶܢ ܛܳܒ̥ܳܐ ܝܳܐ ܩ݄ܕ̱ܡ ܐܰ‌ܠܳܗܳܐ ܕܰܐ‌ܠܟ̥ܽܘ ܫ݄ܡܥܺܝܢܰܐ ܙ݄ܕ ܡܰܢ̱ ܐ‌ܠܳܗܳܐ؟ ܕܽܘܢܽܘ! 20ܡܺܐܝܕ̥ܶܗ ܕܠܰܝܒܰܢ ܕܽܗ̄ܘ ܡܶܕܶܐ ܕ݄ܚܙܶܐ ܠܰܢ ܘܫܰܡܺܝܥܺܝܢܰܐ ܕܠܳܐ ܡ݄ܫܓ̥ܳܠܺܝܢܰܐ.“ 21ܘܡܰܙܺܝܥ݄ܢّܶܗ ܘܡܰܪܦܰܢّܶܗ ܥܰܠ ܕܠܳܐ ܚܙܰܢّܰܢّܶܗ ܥܶܠܬ̥ܳܐ ܕܕܰܝܢ݄ܢّܶܗ ܡܽܗ̄ܘ ܥܰܡܳܐ. ܡܺܐܝܕ̥ܶܗ ܕܟܽܘܠ ܚܰܕ̱ ܡܫܰܒܰܚ ܗ̄ܘܰܐ ܠܰܐ‌ܠܳܗܳܐ ܥܰܠ ܗ̄ܽܘ ܡܶܕܶܐ ܕܗܰܘܺܝ، 22ܡܺܐܝܕ̥ܶܗ ܕܙ݄ܕ ܡܶܢ̱ ܐܰܪܒܥܺܝ ܐ݄ܫܢ̈ܶܐ ܗ̄ܘܰܐ ܗ̄ܽܘ ܓܰܒ̥ܪܰܘܳܐ ܕܗܰܘܝܳܐ ܐܶܒܶܗ ܗ̄ܺܝ ܐܳܬ̥ܰܬ̥ܶܐ ܕܽܗ̄ܘ ܢܝܳܚܳܐ.

ܗ̄ܺܝ ܨܠܽܘܬ̥ܳܐ ܕܺܗ̄ܝ ܥܺܕ̱ܬܳܐ ܕܒܺܗ̄ܝ ܥܺܝܩܽܘܬ̥ܳܐ

23ܘܺܗ̄ܝ ܢܰܩܠܐ ܕܡܰܪܦ݄ܢ، ܐܰܬ̥݄ܢ ܠܓܰܒ ܗ̄ܰܢ ܐܰܚ̈ܽܘܢܳܢܰܬّ̥ܶܗ ܘܐܡ݄ܪّܰܢّܶܗ ܟܽܘܠ ܡܶܕܶܐ ܕܐܡ݄ܪّܶܗ ܗ̄ܰܟّܳܗ̈ܢܶܐ ܘܰܩّܰܫ̈ܶܐ.

24ܘܗ݄ܢّܶܝ، ܗ̄ܺܝ ܢܰܩܠܐ ܕܫܰܡܺܝܥܺܝ، ܥܰܡ ܚܕ̥ܳܕ̥̈ܶܐ ܡܰܥܠܰܠّܶܗ ܩܳܠܰܝّܶܗ ܠܰܐ‌ܠܳܗܳܐ ܘܐܡ݄ܪّܶܗ: ”ܝܰܐ ܡܳܪܝܳܐ، ܗܰܬ ܗ̄ܰܬ ܐܰ‌ܠܳܗܳܐ ܕܣ݄ܡ ܠܳܟ̥ ܗ̄ܺܝ ܫܡܰܝܳܐ ܘܺܗ̄ܝ ܐܰܪܥܳܐ ܘܰܝّܰܡ̈ܶܐ ܘܟܽܘܠ ܕܟܺܝܬ ܐܰܒّܶܗ، 25ܘܗܰܬ ܗ̄ܰܬ ܕܐܡ݄ܪ ܠܳܟ̥ ܒܪܽܘܚܳܐ ܕܩܽܘܕܫܳܐ ܥܰܠ ܦܶܡܶܗ ܕܕܰܘܺܝܕ̥، ܗ̄ܽܘ ܥܰܒܕܰܝܕ̥ܳܟ̥: ’ܠܡ݄ܢ ܫܓ̥ܺܝܫܺܝ ܗ̄ܰܥّܰܡ̈ܶܐ، ܘܰܗ̄ܢ ܐܶܡ̈ܘܳܬ̥ܳܐ ܪܢܰܠّܶܗ ܒܰܛܺܝܠܳܐ؟ 26ܩܰܝܺܝܡܺܝ ܗ̄ܰܡّܰܠܟ̈ܶܐ ܕܺܗ̄ܝ ܐܰܪܥܳܐ ܘܰܫّܰܠܺܝ̈ܛܶܐ ܡܬܰܕܒܰܪّܶܗ ܥܰܡ ܚܕ̥ܳܕ̥̈ܶܐ ܥܰܠ ܡܳܪܝܳܐ ܘܥܰܠ ܗ̄ܽܘ ܡܫܺܝܚܰܝܕ̥ܶܗ.‘ 27ܘܡܺܐܝܕ̥ܶܗ ܕܒ݄ܫܪܳܪܳܐ، ܠܰܬܺܝܡܺܝ ܒܺܗ̄ܝ ܡܕ̥ܺܝܢ̱ܬܰܬ̥ܶܐ ܥܰܠ ܗ̄ܽܘ ܩܰܕܺܝܫܳܐ ܗ̄ܽܘ ܐܰܒܪܰܝܕ̥ܳܟ̥، ܝܶܫܽܘܥ، ܕܗܰܬ ܡܫ݄ܚ ܠܳܟ̥، ܗܶܪܳܘܕ̥ܶܣ ܘܦܺܝܠܰܛܳܘܣ ܥܰܡ ܗ̄ܰܥّܰܡ̈ܶܐ ܘܰܗ̄ܢ ܢܳܫ̈ܶܐ ܕܺܐܝܣܪܳܐܶܝܠ، 28ܠܰܫܰܢ ܕܣܰܝܡܺܝ ܟܽܘܠ ܡܶܕܶܐ ܕܺܐܝܕ̥ܳܟ̥ ܘܽܗ̄ܘ ܨܶܒܝܳܢܰܝܕ̥ܳܟ̥ ܡܶܢ̱ ܡܶܩ݄ܕ̱ܡ ܪܫ݄ܡ ܠܶܗ ܕܳܗ̄ܘܶܐ. 29ܘܳܐܥܕܳܐ ܣܬܶܝ، ܝܰܐ ܡܳܪܝܳܐ، ܚܘܿܪ ܘ݄ܚܙܺܝ ܠܬܶܙܺܝܥܰܬّ̥ܶܗ، ܘܗܰܒ̥ ܠܰܥّܰܒ̈ܕܰܝܕ̥ܳܟ̥ ܒܓܰܠܝܽܘܬ̥ܳܐ ܕܟܳܪܙܺܝ ܗ̄ܺܝ ܡܶܠܬ̥ܰܝܕ̥ܳܟ̥، 30ܕܦܳܫܛܰܬ ܐܺܝܕ̥ܳܟ̥ ܠܺܗ̄ܝ ܐܳܣܝܽܘܬ̥ܳܐ (ܬܶܬ̥ܢܺܝܚܳܐ) ܘܠܰܬّܶܕ݄ܡܪ̈ܳܬ̥ܳܐ ܘܠܰܗ̄ܢ ܐܳܬ̥ܘ̈ܳܬ̥ܳܐ ܒ݄ܐܫܡܶܗ ܕܽܗ̄ܘ ܐܰܒܪܰܝܕ̥ܳܟ̥ ܗ̄ܽܘ ܩܰܕܺܝܫܳܐ، ܝܶܫܽܘܥ.“ 31ܘܺܗ̄ܝ ܢܰܩܠܐ ܕ݄ܡܨܰܠܰܠّܶܗ ܘܰܐܒܺܝܥܺܝ، ܗܺܝܙܳܐ ܗ̄ܺܝ ܕܽܘܟܬ̥ܳܐ ܕܠܰܬܺܝܡܺܝ ܗ̄ܘܰܘ̱ ܐܶܒܰܗ، ܘܟܽܘܠّܶܗ ܡܠ݄ܢ ܒܪܽܘܚܳܐ ܕܩܽܘܕܫܳܐ، ܘܡ݄ܫܓ̥ܳܠܺܝ ܗ̄ܘܰܘ̱ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܒܓܰܠܝܳܐ.

ܗ̄ܰܚّܰܝ̈ܶܐ ܕܰܡܗܰܝܡܢ̈ܶܐ ܥܰܡ ܚܕ̥ܳܕ̥̈ܶܐ ܐܟ̥݄ܚܕ̥ܳܕ̥̈ܶܐ

32ܘܰܗ̄ܢ ܢܳܫ̈ܶܐ ܕ݄ܡܗܰܝܡܰܢّܶܗ ܟ݄ܬ ܗ̄ܘܰܐ ܠّܶܗ ܚܕ̥ܳܐ ܢܰܦܫܳܐ ܘܚܰܕ̱ ܪܶܥܝܳܢܳܐ. ܘܢܳܫܳܐ ܡ݄ܢّܶܗ ܠܳܐ ܐܡܰܪ ܗ̄ܘܰܐ ܥܰܠ ܗ̄ܽܘ ܡܳܠܳܐ ܕܟ݄ܬ ܠܶܗ ܕܕܺܝܕ̥ܶܗ ܢܶܝ، ܐܶ‌ܠܳܐ ܟܽܘܠ ܡܶܕܶܐ ܕܟ݄ܬ ܗ̄ܘܰܐ ܠّܶܗ ܕܟܽܘܠّܶܗ ܗ̄ܘܰܘ̱. 33ܘ݄ܒܚܰܝܠܳܐ ܪܰܒܳܐ ܣ݄ܗܕܺܝ ܗ̄ܘܰܘ̱ ܗ̄ܰܫܠܺܝܚ̈ܶܐ ܥܰܠ ܗ̄ܺܝ ܩܝܰܡܬܳܐ ܕܝܶܫܽܘܥ ܡܫܺܝܚܳܐ، ܘܛܰܝܒܽܘܬ̥ܳܐ ܪܰܒܬ̥ܳܐ ܟ݄ܬ ܗ̄ܘܰܐ ܥܰܡ ܟܽܘܠّܶܗ. 34ܘܠܰܝ̱ܬ ܗ̄ܘܰܐ ܢܳܫܳܐ ܒܰܝܢܳܬ̥ܰܝّܶܗ ܣܢܺܝܩܳܝܳܐ؛ ܗܰܢܺܝ ܕܟ݄ܬ ܗ̄ܘܰܘ̱ ܠّܶܗ ܚܰܩ̈ܠܳܬ̥ܳܐ ܘܒ̈ܳܬܶܐ ܡܙܰܒܢܺܝ ܗ̄ܘܰܘ̱ ܘܡܰܝܬ݄ܢ ܗ̄ܘܰܘ̱ ܗ̄ܽܘ ܛܺܝܡܳܐ ܕܽܗ̄ܘ ܡܶܕܶܐ ܕ݄ܡܙܰܒ݄ܢ 35ܘܡܰܚܬܺܝ ܗ̄ܘܰܝ ܩ݄ܕ̱ܡ ܗ̄ܰܪّܰܓ̥̈ܠܳܬ̥ܳܐ ܕܰܫܠܺܝܚ̈ܶܐ، ܘܡܺܝܬܰܗܒ̥ܶܐ ܗ̄ܘܰܐ ܠܟܽܘܠ ܢܳܫܳܐ ܢܳܫܳܐ ܐܟ̥ ܕܽܗ̄ܘ ܡܶܕܶܐ ܕ݄ܣܢܺܝܩܳܝܳܐ ܗ̄ܘܰܐ.

36ܘܝܰܘܣܶܦ، ܗܰܘܳܐ ܕ݄ܩܪܶܐ ܡܰܢ̱ ܫܠܺܝܚ̈ܶܐ ܒܰܪܢܰܒܰܐ، ܕ݄ܟܡܺܝܬܰܪܓ݄ܡ، ܗ̄ܽܘ ܐܰܒܪܳܐ ܕܽܗ̄ܘ ܒܽܘܝܳܐܳܐ، ܠܶܘܳܝܳܐ ܡܽܗ̄ܘ ܐܰܬ̥ܪܳܐ ܕܩܽܘܦܪܳܘܣ. 37ܗܰܢܳܐ، ܟ݄ܬ ܗ̄ܘܰܝ ܠܶܗ ܚܰܩܠܳܐ، ܘ݄ܡܙܰܒܢܳܐ ܠܶܗ ܘܡܰܝܬܶܐ ܠܶܗ ܗ̄ܽܘ ܛܺܝܡܰܝܕ̥ܰܗ ܘܡܰܚܰܬ ܠܶܗ ܩ݄ܕ̱ܡ ܗ̄ܰܪّܰܓ̥̈ܠܳܬ̥ܳܐ ܕܰܫܠܺܝܚ̈ܶܐ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 4: ܟܬܒܐ

Highlight

Copy