ܥܒܳܕ̥̈ܶܐ ܕܰܫܠܺܝܚ̈ܶܐ 2

ܢܚܰܬܬܳܐ ܕܪܽܘܚܳܐ ܕܩܽܘܕܫܳܐ

1ܘܺܗ̄ܝ ܢܰܩܠܐ ܕܟܰܡܺܝܠܺܝ ܗ̄ܰܝّܰܘܡ̈ܳܬ̥ܳܐ ܕܦܶܢܛܺܝܩܳܘܣܛܺܝ (ܚܰܡܫܺܝ ܝܰܘܡ̈ܶܐ)، ܘܟܽܘܠّܶܗ ܠܰܬܺܝܡ̈ܶܐ ܗ̄ܘܰܝܢܶܝ ܥܰܡ ܚܕ̥ܳܕ̥̈ܶܐ، 2ܡܶܢ̱ ܫܶܠܝܳܐ ܗܰܘܺܝ ܩܳܠܳܐ ܐܟ̥ ܕܗܰܘܰܐ ܚ݄ܨܬܳܐ ܡܺܗ̄ܝ ܫܡܰܝܳܐ، ܘ݄ܡܠܶܐ ܗ̄ܘܰܐ ܡܶܢܰܗ ܟܽܘܠܶܗ ܗ̄ܽܘ ܒܰܝܬܰܘܳܐ ܕܶܐܒܶܗ ܝܳܬܒ̥ܺܝ ܗ̄ܘܰܘ̱. 3ܘ݄ܚܙ݄ܢ ܐܰ‌ܠّܶܗ ܠܶܫܳܢ̈ܶܐ ܕܡܺܝܦܰܠܓ̥ܺܝ ܗ̄ܘܰܘ̱ ܐܟ̥ ܕܺܗ̄ܝ ܢܽܘܪܳܐ، ܘܡܰܚ݄ܬّܶܗ ܥܰܠ ܚܰܕ̱ ܚܰܕ̱ ܡ݄ܢّܶܗ. 4ܘܟܽܘܠّܶܗ ܡܠ݄ܢ ܒܪܽܘܚܳܐ ܕܩܽܘܕܫܳܐ، ܘ݄ܡܫܰܪܰܠّܶܗ ܕܡ݄ܫܓ̥ܳܠܺܝ ܒܠܶܫܳܢܳܐ ܠܶܫܳܢܳܐ ܐܟ̥ ܕܽܗ̄ܘ ܪܽܘܚܳܐ ܗ̄ܳܒܶܐ ܗ̄ܘܰܐ ܠّܶܗ ܕܡ݄ܫܓ̥ܳܠܺܝ. 5ܘܟ݄ܬ ܗ̄ܘܰܘ̱ ܓܰܒܪ̈ܶܐ ܕܥܳܡܪܺܝ ܗ̄ܘܰܘ̱ ܒܽܐܘܪܶܫܠܶܡ ܕܙܰܝܥܺܝ ܗ̄ܘܰܘ̱ ܡܰܢ̱ ܐ‌ܠܳܗܳܐ، ܝܽܘܕ̥̈ܳܝܶܐ ܡܶܢ̱ ܟܽܘܠ ܥܰܡ̈ܶܐ ܕܬܰܚܬ ܗ̄ܺܝ ܫܡܰܝܳܐ. 6ܘܺܗ̄ܝ ܢܰܩܠܐ ܕܗܰܘܺܝ ܗ̄ܽܘ ܩܳܠܰܘܳܐ، ܠܰܬ݄ܡ ܗ̄ܽܘ ܥܰܡܳܐ ܟܽܘܠܶܗ ܘ݄ܫܓ̥ܺܝܫ ܥܰܠ ܕܫܳܡܰܥ ܗ̄ܘܰܐ ܟܽܘܠ ܚܰܕ̱ ܚܰܕ̱ ܡ݄ܢّܶܗ ܕܡ݄ܫܓ̥ܳܠܺܝ ܗ̄ܘܰܘ̱ ܒܠܶܫܳܢ̈ܰܝّܶܗ. 7ܘܟܽܘܠّܶܗ ܡܚܰܝܪܺܝ ܘ݄ܡܕܰܘܡܪܺܝ ܘ݄ܐܡّܺܪ̱ܝ ܗ̄ܘܰܘ̱ ܚܰܕ̱ ܠܚܰܕ̱: ”ܗܰܢܺܝ ܟܽܘܠّܶܗ ܕܟܳܡ݄ܫܓ̥ܳܠܺܝ، ܠܳܐ ܟܰܐܠܶܗ ܓܠܺܝܠܳܝ̈ܶܐ ܢܶܝ؟ 8ܐܰܝܕܰܪܒܳܐ ܐܰܚܢܰܐ ܟܫܳܡܥܺܝܢܰܐ، ܟܽܘܠ ܚܰܕ̱ ܡܶܢܰܢ ܗ̄ܽܘ ܠܶܫܳܢܰܝܕ̥ܶܗ ܕܶܐܒܶܗ ܡܰܘܠܕܺܝܢܰܐ؟ 9ܦܰܪ̈ܬ̥ܘܳܝܶܐ ܘܡܳܕ̈ܳܝܶܐ ܘܰܐ‌ܠܰܢܳܝ̈ܶܐ، ܘܰܐܝܢܰܐ ܕܟܳܥܳܡܪܺܝ ܒܒܶܝܬ̥ ܢܰܗܪ̈ܺܝܢ، ܝܽܘܕ̥̈ܳܝܶܐ ܘܩܰܦܰܕ̈ܽܘܩܳܝܶܐ، ܘܗܰܢܺܝ ܕܡܽܗ̄ܘ ܐܰܬ̥ܪܳܐ ܕܦܳ̊ܢܛܳܘܣ ܘܕܰܐܣܺܝܰܐ، 10ܘ݄ܕܡܽܗ̄ܘ ܐܰܬ̥ܪܳܐ ܕ݄ܦܪܽܘܓ̥ܺܝܰܐ ܘ݄ܕܦܰܡܦܽܘܠܺܝܰܐ ܘ݄ܕܡܶܨܪܶܝܢ، ܘܕܰܗ̄ܢ ܐܰܬ̥ܪ̈ܰܘܳܬ̥ܳܐ ܕܠܽܘܒܺܝ ܕܟ݄ܬ ܢܶܝ ܩܰܪ̈ܺܝܒ̥ܶܐ ܠܩܽܘܪܺܝܢܰܐ، ܘܰܐܝܢܰܐ ܕܰܐܬ̥݄ܢ ܡܶܢ̱ ܪܗ̄ܽܘܡܺܝ، ܝܽܘܕ̥̈ܳܝܶܐ ܘܢܽܘܟ̥ܪ̈ܳܝܶܐ (ܕܗܰܘ݄ܢ ܝܽܘܕ̥̈ܳܝܶܐ)، 11ܘܗܰܢܺܝ ܕܡܶܢ̱ ܩܪܺܝܛܺܝ ܘܥܰܪ̈ܒܳܝܶܐ. ܟܰܐܠܶܗ ܟܳܫ݄ܡܥܺܝܢܰܐ ܡ݄ܢّܶܗ ܕܟܳܡ݄ܫܓ̥ܳܠܺܝ ܒܰܠّܶܫܳܢ̈ܰܝܕ̥ܰܢ ܬّܶܕ݄ܡܪ̈ܳܬ̥ܳܐ ܕܰܐ‌ܠܳܗܳܐ.“ 12ܘܟܽܘܠّܶܗ ܡܺܝܕܰܘܡܪܺܝ ܗ̄ܘܰܘ̱ ܘܡܺܝܚܰܝܪܺܝ ܗ̄ܘܰܘ̱ ܘܟܳܐܡّܺܪ̱ܝ ܚܰܕ̱ ܠܚܰܕ̱: ”ܗܰܬ̥ܶܐ ܡ݄ܢܝܳܐ؟“ 13ܘܗ݄ܢ ܓܳܚܟ̥ܺܝ ܗ̄ܘܰܘ̱ ܐܰܥܠܰܝّܶܗ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢܺܝ ܫܬܳܝܳܐ ܫܬܰܠّܶܗ ܘܪܰܘ݄ܢ.“

ܗ̄ܺܝ ܟܳܪܽܘܙܽܘܬ̥ܳܐ ܩܰܕ̱ܡܰܝܬܳܐ ܕܫܶܡܥܽܘܢ

14ܒ݄ܬ̥݄ܪܟܶܐ ܩܰܝ݄ܡ ܫܶܡܥܽܘܢ ܟܶܐܦܳܐ ܥܰܡ ܗ̄ܰܚܕ̥ܰܥܣܰܪ ܫܠܺܝܚ̈ܶܐ، ܘܡܰܥܠܶܐ ܠܶܗ ܩܳܠܶܗ ܘܐܡ݄ܪ ܠܰܗ ܠّܶܗ: ”ܓܰܒܪ̈ܶܐ ܝܽܘܕ̥̈ܳܝܶܐ، ܘܟܽܘܠّܶܗ ܕܟܳܥܳܡܪܺܝ ܒܽܐܘܪܶܫܠܶܡ، ܗܰܬ̥ܶܐ ܛܪܳܐ ܡܺܝܕ̥ܳܥܳܐ ܐܰ‌ܠܟ̥ܽܘ، ܘܡܰܨܶܝܬ̥ܽܘ ܠܰܡّܰܐܡܪ̈ܰܝܕ̥ܺܝ: 15ܠܰܝ̱ܬ ܝܳܐ ܐܟ̥ ܕܟܳܚ݄ܫܒ̥ܺܝܬܽܘ ܕܗܰܢܺܝ ܪ̈ܰܘܳܝܶܐ ܢܶܝ، ܘܟܰܐܠܰܗ ܗ̄ܺܝ ܫܳܥܬ̥ܳܐ ܐܳܥܕܳܐ ܬܠ݄ܬ̥ ܝܳܐ (ܬܫܰܥ ܨܰܦܪܰܝܬܳܐ). 16ܐܶ‌ܠܳܐ ܗܰܬ̥ܶܐ ܝܳܐ ܕܐܡܺܝܪܳܐ ܒܝܽܘܐܶܝܠ ܗ̄ܽܘ ܢܒܺܝܳܐ: 17’ܓܕܳܗ̄ܘܶܐ ܒܰܝّܰܘܡ̈ܳܬ̥ܳܐ ܚܰܪ̈ܳܝܶܐ، ܐܰ‌ܠܳܗܳܐ ܟܳܐܡ݄ܪ، ܓܒܳܝܰܙ ܐ̱ܢܳܐ ܗ̄ܺܝ ܪܽܘܚܰܝܕ̥ܺܝ ܥܰܠ ܟܽܘܠ ܢܳܫܳܐ، ܘ݄ܓܡ݄ܬ̥ܢܰܒ݄ܢ ܗ̄ܰܢ ܐܰܒܢ̈ܰܬ̥ܟ̥ܽܘ ܘܰܒܢ̈ܳܬ̥ܰܬ̥ܟ̥ܽܘ، ܗ̄ܰܥܠܰܝ̈ܡܰܬ̥ܟ̥ܽܘ ܚ݄ܙܘܳܢ̈ܶܐ ܓܚܳܙ݄ܢ، ܘܰܣّܳܒ̥̈ܰܬ̥ܟ̥ܽܘ ܚܶܠܡ̈ܶܐ ܓܚ݄ܠܡܺܝ. 18ܘܥܰܠ ܗ̄ܰܓܪ̈ܶܝܥܰܝܕ̥ܺܝ ܘܰܓܪ̈ܰܥܝܳܬ̥ܰܝܕ̥ܺܝ ܓܡܰܢܚܰܬ ܐ̱ܢܳܐ ܗ̄ܺܝ ܪܽܘܚܰܝܕ̥ܺܝ ܒܰܝّܰܘܡ̈ܳܬ̥ܰܢ݄ܟ ܘ݄ܓܡ݄ܬ̥ܢܰܒ݄ܢ. 19ܘ݄ܓܕܳܗ̄ܒܶܐ ܐ̱ܢܳܐ ܐܳܬ̥ܘ̈ܳܬ̥ܳܐ ܒܺܗ̄ܝ ܫܡܰܝܳܐ ܘܬܶܕ݄ܡܪ̈ܳܬ̥ܳܐ ܥܰܠ ܗ̄ܺܝ ܐܰܪܥܳܐ، ܐܰܕܡܳܐ ܘܢܽܘܪܳܐ ܘܥܶܛܪܳܐ ܕܒܰܣܡ̈ܶܐ. 20ܗ̄ܺܝ ܫܶܡܫܳܐ ܓܡܺܝܚܰܠܦܳܐ ܒܥܰܡܛܳܢܳܐ ܘܽܗ̄ܘ ܣܰܗܪܳܐ ܒܰܐܕ̥ܡܳܐ ܡܶܩ݄ܕ̱ܡ ܕܳܐܬ̥ܶܐ ܗ̄ܽܘ ܝܰܘܡܳܐ ܪܰܒܳܐ ܘܡܰܙܺܝܥܳܢܳܐ ܕܡܳܪܝܳܐ. 21ܘܟܽܘܠ ܕܩܳܪܶܐ ܒ݄ܐܫܡܶܗ ܕܡܳܪܝܳܐ ܓܚܳܝܶܐ.‘ 22ܝܰܐ ܓܰܒܪ̈ܶܐ، ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ، ܫܡܰܥܽܘ ܗ̄ܰܡّܰܐܡܪ̈ܰܢܺܝ: ܝܶܫܽܘܥ ܗ̄ܽܘ ܢܳܨܪܳܝܳܐ، ܓܰܒ̥ܪܳܐ ܡܰܢ̱ ܐ‌ܠܳܗܳܐ، ܚܙܶܐ ܐܰ‌ܠܟ̥ܽܘ ܒܚܰܝ̈ܠܶܐ ܘܒܳܐܬ̥ܘ̈ܳܬ̥ܳܐ ܘ݄ܒܬܶܕ݄ܡܪ̈ܳܬ̥ܳܐ، ܐܰܝܢܰܐ ܕܰܐ‌ܠܳܗܳܐ ܣܺܝܡܺܝ ܠܶܗ ܒܰܝܢܳܬ̥ܰܝܟ̥ܽܘ ܒܺܐܝܕ̥ܶܗ، ܐܟ̥ ܕܗܰܬܽܘ ܟ݄ܐܕ̥ܥܺܝܬܽܘ. 23ܠܰܗ̄ܢܳܐ ܕܟ݄ܬ ܗ̄ܘܰܐ ܦܪܺܝܫܳܐ ܠܰܗ̄ܬ̥ܶܐ ܡܶܢ̱ ܡܶܩ݄ܕ̱ܡ ܒܺܗ̄ܝ ܝܕ̥ܰܥܬܳܐ ܕܰܐ‌ܠܳܗܳܐ ܘܒܽܗ̄ܘ ܨܶܒܝܳܢܰܝܕ̥ܶܗ، ܗܰܬܽܘ ܗܽܒ̥ܟ̥ܽܘ ܒܺܐܝܕ̥̈ܶܐ ܕܰܟّܳܦܽܘܪ̈ܶܐ، ܘ݄ܨܠܽܒ̥ܟ̥ܽܘ ܘ݄ܩܛ݄ܠܟ̥ܽܘ. 24ܐܶ‌ܠܳܐ ܐܰ‌ܠܳܗܳܐ ܡܰܩ݄ܡ ܠܶܗ ܘ݄ܡܒܰܛܶܠ ܠܶܗ ܗ̄ܰܟّܶܐܒ̥̈ܶܐ ܕ݄ܫܝܽܘܠ، ܡܺܐܝܕ̥ܶܗ ܕܠܰܝ̱ܬ ܗ̄ܘܰܐ ܚܰܝܠܳܐ ܕܙܳܒܰܛ ܠܶܗ ܒ݄ܫܝܽܘܠ. 25ܡܺܐܝܕ̥ܶܗ ܕܕܰܘܺܝܕ̥ ܐܡ݄ܪ ܠܶܗ ܐܰܥܠܶܗ: ’ܗܶܫ ܡܶܢ̱ ܡܶܩ݄ܕ̱ܡ، ܟܽܘܠ ܙܰܒܢܳܐ ܚܳܙܶܐ ܗ̄ܘܰܝ ܐ̱ܢܳܐ ܗ̄ܽܘ ܡܳܪܰܝܕ̥ܺܝ، ܕܡܽܗ̄ܘ ܝܰܡܺܝܢܰܝܕ̥ܺܝ ܝܳܐ ܕܠܳܐ ܡܺܝܙܰܥܙܰܥ ܐ̱ܢܳܐ. 26ܡܰܗ̄ܘܟ̥ܰܐ ܒܰܣ݄ܡ ܠܶܒܺܝ ܘܒܰܣܺܝܡܳܐ ܗ̄ܺܝ ܬܶܫܒܽܘܚܬܰܝܕ̥ܺܝ، ܘܽܗ̄ܘ ܦܰܓ̥ܪܰܝܕ̥ܺܝ ܣܬܶܝ ܓܡ݄ܬ̥ܢ݄ܚ ܥܰܠ ܣܰܒܪܳܐ، 27ܡܺܐܝܕ̥ܶܗ ܕܠ݄ܐ ܟܛܳܪܰܬ ܠܢܰܦܫܺܝ ܒ݄ܫܝܽܘܠ (ܒܰܝܢ ܗ̄ܰܡّܺܝ̈ܬ̥ܶܐ)، ܘܠ݄ܐ ܟܛܳܪܰܬ ܗ̄ܽܘ ܩܰܕܺܝܫܰܝܕ̥ܳܟ̥ ܕܚܳܙܶܐ ܚܪܳܒ̥ܳܐ. 28ܓܠܶܐ ܠܳܟ̥ ܠܺܝ ܗ̄ܽܘ ܕܰܪܒܳܐ ܕܰܚّܰܝ̈ܶܐ، ܡܰܣܒ̥ܰܥ ܠܳܟ̥ ܠܺܝ ܒܰܣܺܝܡܽܘܬ̥ܳܐ ܥܰܡ ܗ̄ܺܝ ܚܙܰܝܬܳܐ ܕܦܳܬ̥ܳܟ̥.‘ 29ܝܰܐ ܓܰܒܪ̈ܶܐ ܐܰܚ̈ܽܘܢܳܢܶܐ: ܛܪܰܝܽܘ ܦܬܺܝܚܳܐ ܕܳܐܡܰܪ ܐ̱ܢܳܐ ܠܟ̥ܽܘ ܥܰܠ ܗ̄ܽܘ ܪܺܝܫܳܐ ܕܰܗ̄ܢ ܐܰܒܳܗ̈ܳܬ̥ܳܐ، ܕܰܘܺܝܕ̥، ܕܡܰܝ݄ܬ̥ ܘ݄ܩܒ̥ܺܝܪ، ܘܽܗ̄ܘ ܩܰܒ̥ܪܰܝܕ̥ܶܗ ܓܰܒܰܢ ܝܳܐ ܗܳܠ ܠܰܐܕܝܰܘܡܰܐ. 30ܘܗܺܝّܶܗ ܢܒܺܝܳܐ ܗ̄ܘܰܐ، ܘܳܐܕ̥ܰܥ ܗ̄ܘܰܐ ܘܺܝܡܳܝܳܐ ܝܺܡܶܐ ܠܶܗ ܠܶܗ ܐܰ‌ܠܳܗܳܐ: ’ܕܡܰܢ̱ ܦّܺܐܪ̈ܶܐ ܕܽܗ̄ܘ ܟܰܪܣܰܝܕ̥ܳܟ̥ ܓܡܰܘܬܰܒ̥ ܐ̱ܢܳܐ ܥܰܠ ܗ̄ܽܘ ܟܽܘܪܣܝܰܝܕ̥ܳܟ̥.‘ 31ܘܗܶܫ ܡܶܢ̱ ܡܶܩ݄ܕ̱ܡ ܚܙܶܐ ܗ̄ܘܰܝ ܠܶܗ ܘ݄ܫܓ̥݄ܠ ܗ̄ܘܰܐ ܥܰܠ ܗ̄ܺܝ ܩܝܰܡܬܳܐ ܕ݄ܡܫܺܝܚܳܐ (ܘܐܡ݄ܪ ܠܶܗ): ’ܠܳܐ ܛܪܶܐ ܒ݄ܫܝܽܘܠ، ܘܠܳܐ ܗ̄ܽܘ ܦܰܓ̥ܪܰܝܕ̥ܶܗ ܚܙܶܐ ܠܶܗ ܚܪܳܒ̥ܳܐ.‘ 32ܠܰܗ̄ܢܳܐ ܝܶܫܽܘܥ، ܐܰ‌ܠܳܗܳܐ ܡܰܩ݄ܡ ܠܶܗ، ܘܰܐܚܢܰܐ ܟܽܘܠܰܢ ܗ̄ܰܣّܳܗܕ̈ܰܝܕ̥ܶܗ ܢܰܐ. 33ܘܗܺܝّܶܗ ܝܳܐ ܕܒܽܗ̄ܘ ܝܰܡܺܝܢܶܗ ܕܰܐ‌ܠܳܗܳܐ ܥܰܠܺܝ، ܘܡ݄ܕ ܠܶܗ ܡܽܗ̄ܘ ܐܰܒܳܐ ܘܰܥܕܳܐ ܕܥܰܠ ܪܽܘܚܳܐ ܕܩܽܘܕܫܳܐ، ܘܡܰܢܚܰܬ ܠܶܗ ܗ̄ܺܝ ܡܰܘܗܰܒܬ̥ܰܬ̥ܶܐ، ܕܟܰܐܠܶܗ ܕܟܳܚܳܙܺܝܬܽܘ ܘܟܳܫ݄ܡܥܺܝܬܽܘ. 34ܡܺܐܝܕ̥ܶܗ ܕܠܰܝ̱ܬ ܗ̄ܘܰܐ ܕܰܘܺܝܕ̥ ܕܣܰܠ݄ܩ ܠܺܗ̄ܝ ܫܡܰܝܳܐ ܥܰܠ ܕܗܺܝّܶܗ ܐܡ݄ܪ ܠܶܗ: ’ܡܳܪܝܳܐ ܐܡ݄ܪ ܠܶܗ ܠܽܗ̄ܘ ܡܳܪܰܝܕ̥ܺܝ، ܝܺܬܰܒ̥ ܠܳܟ̥ ܡܽܗ̄ܘ ܝܰܡܺܝܢܰܝܕ̥ܺܝ 35ܗܳܠ ܕܡܰܚ݄ܬ ܐ̱ܢܳܐ ܗ̄ܰܒܥܶܠܕ̈ܒܳܒܰܝܕ̥ܳܟ̥ ܕܝܰܫܬܳܐ ܠܪܰܓ̥ܠܳܟ̥.‘ 36ܗܰܢ ܢܰܩܠܐ ܒ݄ܫܪܳܪܳܐ ܛܪܳܐ ܟܽܘܠܶܗ ܗ̄ܽܘ ܒܰܝܬܳܐ ܕܺܐܝܣܪܳܐܶܝܠ ܐܳܕ̥݄ܥ: ܠܰܗ̄ܢܳܐ ܝܶܫܽܘܥ ܕܗܰܬܽܘ ܨܠܽܒ̥ܟ̥ܽܘ، ܐܰ‌ܠܳܗܳܐ ܡܰܩ݄ܡ ܠܶܗ ܡܳܪܝܳܐ ܘ݄ܡܫܺܝܚܳܐ.“

ܗ̄ܰܡܫܺܝܚܳܝ̈ܶܐ ܩܰܕ̱ܡܳܝ̈ܶܐ

37ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܰܡّܰܐܡܪ̈ܰܢܺܝ، ܬܒ̥ܺܝܪ ܠܶܒܰܝّܶܗ ܘܐܡ݄ܪّܶܗ ܠܫܶܡܥܽܘܢ ܘܠܰܫܠܺܝܚ̈ܶܐ ܚܪ̈ܶܢܶܐ: ”ܡ݄ܢ ܣܰܝܡܺܝܢܰܐ، ܐܰܚ̈ܽܘܢܳܢܶܐ؟“ 38ܫܶܡܥܽܘܢ ܐܡ݄ܪ ܠܰܗ ܠّܶܗ: ”ܬܽܘܒܽܘ ܘ݄ܥܡܰܕܽܘ، ܟܽܘܠ ܚܰܕ̱ ܚܰܕ̱ ܡ݄ܢܟ̥ܽܘ، ܒ݄ܐܫܡܶܗ ܕܡܳܪܝܳܐ ܝܶܫܽܘܥ {ܡܫܺܝܚܳܐ} ܠܽܗ̄ܘ ܫܽܘܒܩܳܢܳܐ ܕܰܚܛܳܗ̈ܶܐ ܕܡܰܩܒܠܺܝܬܽܘ ܗ̄ܺܝ ܡܰܘܗܰܒܬܳܐ ܕܪܽܘܚܳܐ ܕܩܽܘܕܫܳܐ. 39ܡܺܐܝܕ̥ܶܗ ܕܰܐ‌ܠܟ̥ܽܘ ܗܰܘܺܝ ܗ̄ܽܘ ܘܰܥܕܳܐ ܘܠܰܗ̄ܢ ܐܰܒܢ̈ܰܬ̥ܟ̥ܽܘ، ܘ݄ܠܟܽܘܠّܶܗ ܗ̄ܰܪّܰܚܽܘܩ̈ܶܐ، ܐܰܝܢܰܐ ܕܰܐ‌ܠܳܗܳܐ ܟܳܩܳܪܰܠّܶܗ.“ 40ܘ݄ܒܓ̥ܰܠܰܒܶܐ ܡܰܐܡܪ̈ܶܐ ܚܪ̈ܶܢܶܐ ܣܳܗܰܕ ܗ̄ܘܰܐ ܐܰ‌ܠّܶܗ ܘܳܐܒܰܥ ܗ̄ܘܰܐ ܡ݄ܢّܶܗ ܘܳܐܡ݄ܪ ܗ̄ܘܰܐ: ”ܪܚܰܩܽܘ ܡܽܗ̄ܘ ܕܳܪܰܢܳܐ ܗ̄ܽܘ ܦܬܺܝܠܳܐ!“ 41ܘܢܳܫ̈ܶܐ ܡ݄ܢّܶܗ ܡܶܚܕ̥ܳܐ ܡܰܩܒܰܠّܶܗ ܗ̄ܽܘ ܡܰܐܡܪܰܝܕ̥ܶܗ، ܘ݄ܡܗܰܝܡܰܢّܶܗ ܘܥܰܡܺܝܕ̥ܺܝ. ܘܒܽܗ̄ܘ ܝܰܘܡܰܘܳܐ ܙܰܝܺܝܕܺܝ ܐܟ̥ ܕ݄ܬܠܳܬ̥ܳܐ ܐܰ‌ܠܦܳܐ ܢܰܦܫ̈ܳܬ̥ܳܐ. 42ܘܡܰܐܡܢܺܝ ܗ̄ܘܰܘ̱ ܒܽܗ̄ܘ ܝܽܘܠܦܳܢܳܐ ܕܰܫܠܺܝܚ̈ܶܐ، ܘܥܰܡ ܚܕ̥ܳܕ̥̈ܶܐ ܣܰܝܡܺܝ ܗ̄ܘܰܘ̱ ܨܠܽܘܬ̥ܳܐ ܘ݄ܩܨܳܝܳܐ (ܕܠܰܚܡܳܐ) ܕܬܰܘܕܺܝܬ̥ܳܐ.

ܗ̄ܰܚّܰܝ̈ܶܐ ܕܰܡܗܰܝܡܢ̈ܶܐ ܩܰܕ̱ܡܳܝ̈ܶܐ

43ܘܗܰܘܺܝ ܗ̄ܘܰܐ ܙܽܘܥܬ̥ܳܐ ܒܟܽܘܠ ܢܰܦܫܳܐ، ܘܳܐܬ̥ܘ̈ܳܬ̥ܳܐ ܓ̥ܰܠܰܒܶܐ ܘܬܶܕ݄ܡܪ̈ܳܬ̥ܳܐ ܗܳܘ݄ܢ ܗ̄ܘܰܘ̱ ܒܺܐܝܕ̥̈ܶܐ ܕܰܫܠܺܝܚ̈ܶܐ ܒܽܐܘܪܶܫܠܶܡ. 44ܘܟܽܘܠّܶܗ ܗܰܢܺܝ ܕ݄ܡܗܰܝܡܰܢ ܗ̄ܘܰܘ̱ ܠّܶܗ ܥܰܡ ܚܕ̥ܳܕ̥̈ܶܐ ܗ̄ܘܰܝܢܶܝ، ܘܟܽܘܠ ܡܶܕܶܐ ܕܟ݄ܬ ܗ̄ܘܰܐ ܠّܶܗ ܕܟܽܘܠّܶܗ ܗ̄ܘܰܘ̱. 45ܘܗܰܢܺܝ ܕܟ݄ܬ ܗ̄ܘܰܐ ܠّܶܗ ܩܶܢܝܳܢܳܐ، ܡܙܰܒܢܺܝ ܗ̄ܘܰܝ ܠܶܗ ܘ݄ܡܦܰܠܓ̥ܺܝ ܗ̄ܘܰܘ̱ ܥܰܠ ܟܽܘܠ ܚܰܕ̱ ܕܢܳܩܰܨ ܠܶܗ ܡܶܕܶܐ. 46ܘܟܽܘܠ ܝܰܘܡܳܐ ܠ݄ܬܡܺܝ ܗ̄ܘܰܘ̱ ܒܽܗ̄ܘ ܗܰܝܟܠܳܐ ܒ݄ܚܕ̥ܳܐ ܢܰܦܫܳܐ. ܘܒܽܗ̄ܘ ܒܰܝܬܳܐ ܩܳܨ݄ܢ ܗ̄ܘܰܘ̱ ܗ̄ܽܘ ܠܰܚܡܳܐ، ܘܳܐܟ̥ܠܺܝ ܗ̄ܘܰܘ̱ ܗ̄ܽܘ ܡܽܐܘܟܠܳܐ ܒ݄ܦܨܺܝܚܽܘܬ̥ܳܐ. ܘ݄ܒܠܶܒܳܐ ܫܰܦܝܳܐ 47ܡܫܰܒܚܺܝ ܗ̄ܘܰܘ̱ ܠܰܐ‌ܠܳܗܳܐ، ܘܡ݄ܪܚܳܡܺܝ ܗ̄ܘܰܘ̱ ܡܽܗ̄ܘ ܥܰܡܳܐ ܟܽܘܠܶܗ. ܘܟܽܘܠ ܝܰܘܡܳܐ ܡܳܪܰܢ ܡܰܙ݄ܕ ܗ̄ܘܰܐ ܒܺܗ̄ܝ ܥܺܕ̱ܬܳܐ ܠܰܐܝܢܰܐ ܕܟܳܗ̄ܘܰܠّܶܗ ܚܰܝ̈ܶܐ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 2: ܟܬܒܐ

Highlight

Copy