ܥܒܳܕ̥̈ܶܐ ܕܰܫܠܺܝܚ̈ܶܐ 13

ܗ̄ܽܘ ܡܰܐܙܠܳܐ ܩܰܕ̱ܡܳܝܳܐ ܠܺܗ̄ܝ ܣܒܰܪܬ̥ܳܐ

ܗ̄ܽܘ ܫܶܕܳܪܳܐ ܕܫܳܐܘܳܠ ܘܒܰܪܢܰܒܰܐ ܠܺܗ̄ܝ ܣܒܰܪܬ̥ܳܐ

1ܘܟ݄ܬ ܗ̄ܘܰܐ ܒܺܗ̄ܝ ܥܺܕ̱ܬܳܐ ܕܰܐܢܛܺܝܳܟ̥ܺܝܰܐ ܢܒܺܝ̈ܶܐ ܘܡܰܠܦܳܢ̈ܶܐ: ܒܰܪܢܰܒܰܐ ܘܫܶܡܥܽܘܢ ܕ݄ܟܡ݄ܩܪܶܐ ܐ̱ܘܟܳܡܳܐ، ܘܠܽܘܩܺܝܳܘܣ ܕܡܺܗ̄ܝ ܡܕ̥ܺܝܢ̱ܬܳܐ ܕܩܽܘܪܺܝܢܺܝ، ܘܡܰܢܰܐܶܝܠ ܕ݄ܡܪܰܒܶܐ ܥܰܡ ܗܶܪܳܘܕ̥ܶܣ ܗ̄ܽܘ ܪܺܝܫܳܐ ܕܽܗ̄ܘ ܪܽܘܒ̥ܥܳܐ، ܘܫܳܐܘܳܠ. 2ܘܺܗ̄ܝ ܢܰܩܠܐ ܕܗ݄ܢّܶܝ ܨܰܝܡܺܝ ܗ̄ܘܰܘ̱ ܘ݄ܡܨܰܠ݄ܢ ܗ̄ܘܰܘ̱ ܠܰܐ‌ܠܳܗܳܐ، ܪܽܘܚܳܐ ܕܩܽܘܕܫܳܐ ܐܡ݄ܪ ܠܰܗ ܠّܶܗ: ”ܦܪܰܫܽܘ ܠܺܝ ܠܫܳܐܘܳܠ ܘ݄ܠܒܰܪܢܰܒܰܐ ܠܽܗ̄ܘ ܥܒܳܕ̥ܰܘܳܐ ܕ݄ܩܪܶܐ ܠܺܝ ܐܰ‌ܠّܶܗ.“ 3ܘܒ݄ܬ̥݄ܪ ܕܨܰܝܺܝܡܺܝ ܘ݄ܡܨܰܠܰܠّܶܗ، ܡܰܚ݄ܬّܶܗ ܐܰܥܠܰܝّܶܗ ܐܺܝܕ̥ܳܐ ܘ݄ܡܫܰܕܪ݄ܢّܶܗ.

ܫܳܐܘܳܠ ܘܒܰܪܢܰܒܰܐ ܒܩܽܘܦܪܳܘܣ

4ܘܗ݄ܢّܶܝ ܗ̄ܺܝ ܢܰܩܠܐ ܕ݄ܡܫܰܕܪܺܝ ܡܶܢ̱ ܪܽܘܚܳܐ ܕܩܽܘܕܫܳܐ، ܢܰܚܺܝܬܺܝ ܠܣܶܠܳܘܩܺܝܰܐ ܘܡܶܢ̱ ܬܰܡܳܐ ܐܰܙّ݄ܢ ܒܽܗ̄ܘ ܝܰܡܳܐ ܗܳܠ ܠܩܽܘܦܪܳܘܣ. 5ܘܺܗ̄ܝ ܢܰܩܠܐ ܕܥܰܒܺܝܪܺܝ ܠܺܗ̄ܝ ܡܕ̥ܺܝܢ̱ܬܳܐ ܕܣܰܠܰܡܺܢܺܝ ܡܣܰܒܪܺܝ ܗ̄ܘܰܘ̱ ܗ̄ܺܝ ܡܶܠܬ̥ܳܐ ܕܡܳܪܰܢ ܒܰܟ̥ܢܽܘܫ̈ܳܬ̥ܳܐ ܕܰܝّܽܘܕ̥̈ܳܝܶܐ، ܘܝܽܘܚܰܢܳܢ ܡܫܰܡܰܫ ܗ̄ܘܰܐ ܠّܶܗ. 6ܘܺܗ̄ܝ ܢܰܩܠܐ ܕܟܰܪܺܝܟ̥ܺܝ ܠܺܗ̄ܝ ܓܙܺܝܪܬܳܐ ܟܽܘܠܰܗ ܗܳܠ ܠܺܗ̄ܝ ܡܕ̥ܺܝܢ̱ܬܳܐ ܕܦܰ̊ܦܳܘܣ، ܘܬܰܡܳܐ ܚܙܰܠّܶܗ ܚܰܕ̱ ܚܰܪܳܫܳܐ ܝܽܘܕ̥ܳܝܳܐ ܕܟ݄ܬ ܗ̄ܘܰܐ ܢܒܺܝܳܐ ܡܕܰܓܠܳܢܳܐ ܕ݄ܐܫܡܶܗ ܒܰܪܫܽܘܡܳܐ. 7ܗܰܢܳܐ ܡܰܛܺܝ ܗ̄ܘܰܐ ܠܓܰܒ̥ܪܳܐ ܚܰܟܺܝܡܳܐ ܕܟ݄ܬ ܗ̄ܘܰܐ ܫܰܠܺܝܛܳܐ ܕܡ݄ܩܪܶܐ ܗ̄ܘܰܐ ܣܶܪܓܺܝܳܘܣ ܦܰܘܠܳܘܣ. ܘܽܗ̄ܘ ܫܰܠܺܝܛܳܐ ܩܪܶܐ ܗ̄ܘܰܝ ܠܶܗ ܠܫܳܐܘܳܠ ܘ݄ܠܒܰܪܢܰܒܰܐ ܘܳܐܒܰܥ ܗ̄ܘܰܐ ܕܫܳܡ݄ܥ ܡ݄ܢّܶܗ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ. 8ܘܩܳܝܰܡ ܗ̄ܘܰܐ ܒܦܳܬ̥ܰܝّܶܗ ܗ̄ܽܘ ܚܰܪܳܫܰܢܳܐ، ܒܰܪܫܽܘܡܳܐ، ܕ݄ܟܡܺܝܬܰܪܓ݄ܡ ܐ݄ܫܡܶܗ ܐܶ‌ܠܽܘܡܰܣ، ܡܺܐܝܕ̥ܶܗ ܕܳܐܒܰܥ ܗ̄ܘܰܐ ܕܡܰܪܚ݄ܩ ܗ̄ܽܘ ܫܰܠܺܝܛܳܐ ܡܺܗ̄ܝ ܗܰܝܡܳܢܽܘܬ̥ܳܐ. 9ܘܫܳܐܘܳܠ، ܗܰܘܳܐ ܕ݄ܩܪܶܐ ܦܰܘܠܳܘܣ، ܡܠܶܐ ܒܪܽܘܚܳܐ ܕܩܽܘܕܫܳܐ، ܘܚ݄ܪ ܠܶܗ ܐܶܒܶܗ، 10ܘܐܡ݄ܪ ܠܶܗ: ”ܝܰܐ ܕܟ݄ܬ ܗ̄ܰܬ ܡܰܠܝܳܐ ܒܟܽܘܠ ܢܟ̥ܺܝܠܽܘܬ̥ܳܐ ܘܒܺܝܫܽܘܬ̥ܳܐ، ܝܰܐ ܐܰܒܪܶܗ ܕܽܗ̄ܘ ܫܺܐܕܳܐ ܘ݄ܒܥܶܠܕܒܳܒܳܐ ܕܟܽܘܠܰܗ ܗ̄ܺܝ ܟܺܐܢܽܘܬ̥ܳܐ! ܠ݄ܐ ܓܟܳܠܰܬ ܕܡܰܪܚܩܰܬ ܡܰܢ̱ ܕّܰܪ̈ܒܳܢܶܐ ܬܪ̈ܺܝܨܶܐ ܕܡܳܪܝܳܐ؟ 11ܘܳܐܥܕܳܐ ܐܺܝܕ̥ܶܗ ܕܡܳܪܝܳܐ ܐܰܥܠܳܟ̥ ܝܳܐ، ܘܗܳܘܰܬ ܣܰܡܝܳܐ ܘܠ݄ܐ ܓܚܳܙܰܬ ܗ̄ܺܝ ܫܶܡܫܳܐ ܗܳܠ ܠܙܰܒܢܳܐ.“ ܘܒܺܗ̄ܝ ܫܳܥܬ̥ܰܝܕ̥ܰܗ، ܢܰܦ݄ܠ ܐܰܥܠܶܗ ܚܶܫܟ̥ܳܐ ܘܥܰܡܛܳܢܳܐ، ܘܟܳܪܰܟ̥ ܗ̄ܘܰܐ ܘܳܐܒܰܥ ܗ̄ܘܰܐ ܢܳܫܳܐ ܕܙܳܒ݄ܛ ܒܺܐܝܕ̥ܶܗ. 12ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܗ̄ܽܘ ܫܰܠܺܝܛܳܐ ܠܽܗ̄ܘ ܡܶܕܶܐ ܕܗܰܘܺܝ، ܡܕܰܘܡ݄ܪ، ܘ݄ܡܗܰܝܡܰܢ ܠܶܗ ܒܽܗ̄ܘ ܝܽܘܠܦܳܢܳܐ ܕܡܳܪܝܳܐ.

ܗ̄ܽܘ ܟܪܳܟ̥ܳܐ ܕܰܫܠܺܝܚ̈ܶܐ ܒܰܐܣܺܝܰܐ ܙܥܽܘܪܬܳܐ

13ܘܦܰܘܠܳܘܣ ܘܒܰܪܢܰܒܰܐ ܐܰܙّ݄ܢ ܒܽܗ̄ܘ ܝܰܡܳܐ ܡܺܗ̄ܝ ܡܕ̥ܺܝܢ̱ܬܳܐ ܕܦܰ̊ܦܳܘܣ ܘܰܐܬ̥݄ܢ ܠܺܗ̄ܝ ܡܕ̥ܺܝܢ̱ܬܳܐ ܕܦܶ̊ܪܓܺܝ ܕܦܰ̊ܡܦܽܘܠܺܝܰܐ. ܘ݄ܦܪܺܝܫ ܡ݄ܢّܶܗ ܝܽܘܚܰܢܳܢ ܘܰܐܙّܶܗ ܠܽܐܘܪܶܫܠܶܡ. 14ܘܗ݄ܢّܶܝ ܢܰܦܺܝܩܺܝ ܡܶܢ̱ ܦܶ̊ܪܓܺܝ ܘܰܐܬ̥݄ܢ ܠܺܗ̄ܝ ܡܕ̥ܺܝܢ̱ܬܳܐ ܕܰܐܢܛܺܝܳܟ̥ܺܝܰܐ ܕܦܺ̊ܝܣܺܝܕ̥ܺܝܰܐ. ܘܥܰܒܺܝܪܺܝ ܠܺܗ̄ܝ ܟ̥ܢܽܘܫܬܳܐ ܘܝܰܬܺܝܒ̥ܺܝ ܒܝܰܘܡܶܗ ܕܫܰܒܬ̥ܳܐ. 15ܘܒ݄ܬ̥݄ܪ ܕ݄ܩܪܶܐ ܗ̄ܽܘ ܢܳܡܽܘܣܳܐ ܘܰܗ̄ܢ ܢܒܺܝ̈ܶܐ، ܗ̄ܰܩّܰܫ̈ܶܐ ܕܺܗ̄ܝ ܟ̥ܢܽܘܫܬܳܐ ܡܫܰܝܰܥّܶܗ ܒ݄ܬ̥ܪܰܝّܶܗ ܘܐܡ݄ܪّܶܗ: ”ܓܰܒܪ̈ܶܐ ܐܰܚ̈ܽܘܢܳܢܶܐ، ܐܶܢ ܟ݄ܬܟ̥ܽܘ ܡܶܠܬ̥ܳܐ ܕ݄ܡܒܰܣܡܳܐ ܠܠܶܒܳܐ، ܡ݄ܫܓ̥ܶܠܽܘ ܥܰܡ ܗ̄ܽܘ ܥܰܡܳܐ.“ 16ܘܩܰܝ݄ܡ ܦܰܘܠܳܘܣ ܘ݄ܪܡ݄ܙ ܠܶܗ ܒܺܐܝܕ̥ܶܗ ܘܐܡ݄ܪ ܠܶܗ: ”ܝܰܐ ܓܰܒܪ̈ܶܐ، ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܘܗܰܢܺܝ ܕ݄ܟܙܰܝܥܺܝ ܡܰܢ̱ ܐ‌ܠܳܗܳܐ، ܫܡܰܥܽܘ: 17ܐܰ‌ܠܳܗܳܐ ܕܽܗ̄ܘ ܥܰܡܰܢܳܐ ܓܒܶܐ ܠܶܗ ܠܰܒّܰܒܳܢ̈ܰܝܕ̥ܰܢ، ܘܡܰܥܠܰܠّܶܗ ܘܡܰܘܪܒ̥ܺܝ ܠܶܗ ܗ̄ܺܝ ܢܰܩܠܐ ܕܟ݄ܬ ܗ̄ܘܰܝܢܶܝ ܒܺܗ̄ܝ ܓܳܠܽܘܬ̥ܳܐ ܒܺܗ̄ܝ ܐܰܪܥܳܐ ܕܡܶܨܪܶܝܢ. ܘܒ݄ܕܪܳܥܳܐ ܥܶܠܳܝܳܐ (ܒܽܗ̄ܘ ܚܰܝܠܰܝܕ̥ܶܗ) ܡܰܘܦܩܺܝ ܠܶܗ ܡܶܢܰܗ. 18ܘܡܽܘܟܠܺܝ ܠܶܗ ܒܽܗ̄ܘ ܡܰܕ̥ܒܪܳܐ ܐܰܪܒܥܺܝ ܐ݄ܫܢ̈ܶܐ. 19ܘ݄ܬܒ̥݄ܪ ܠܶܗ ܫܰܒ̥ܥܳܐ ܥܰܡ̈ܶܐ ܒܺܗ̄ܝ ܐܰܪܥܳܐ ܕ݄ܟܢܰܥܢ ܘܗܽܒ̥ ܠܰܗ ܠّܶܗ ܗ̄ܺܝ ܐܰܪܥܰܬّ̥ܶܗ ܠܝܽܘܪܬ̥ܳܢܳܐ. 20ܘܰܐܪܒܰܥܡܳܐܐ ܘܚܰܡܫܺܝ ܐ݄ܫܢ̈ܶܐ ܗܽܒ̥ ܠܰܗ ܠّܶܗ ܕ̈ܰܝܳܢܶܐ ܗܳܠ ܠ݄ܫܡܽܘܐܶܝܠ ܗ̄ܽܘ ܢܒܺܝܳܐ. 21ܒ݄ܬ̥݄ܪ ܐܰܒܺܝܥ݄ܢّܶܗ ܡܰܠܟܳܐ، ܘܰܐ‌ܠܳܗܳܐ ܗܽܒ̥ ܠܰܗ ܠّܶܗ ܠܫܳܐܘܳܠ ܗ̄ܽܘ ܐܰܒܪܳܐ ܕܩܺܝܫ، ܓܰܒ̥ܪܳܐ ܡܺܗ̄ܝ ܫܰܪܒܬ̥ܳܐ ܕܒܶܢܝܳܡܶܝܢ، ܐܰܪܒܥܺܝ ܐ݄ܫܢ̈ܶܐ، 22ܘܡ݄ܕ ܠܶܗ (ܠܫܳܐܘܳܠ) ܘܡܰܩ݄ܡ ܠܶܗ ܠܕܰܘܺܝܕ̥ ܡܰܠܟܳܐ ܐܰܥܠܰܝّܶܗ. ܘ݄ܣܗ݄ܕ ܠܶܗ ܐܰܥܠܶܗ ܘܐܡ݄ܪ ܠܶܗ: ’ܚܙܶܐ ܠܺܝ ܕܰܘܺܝܕ̥ ܗ̄ܽܘ ܐܰܒܪܳܐ ܕܺܐܝܫܰܝ ܓܰܒ̥ܪܳܐ ܐܰܟ̥ ܕܠܶܒܺܝ، ܗܺܝّܶܗ ܓܣܳܝ݄ܡ ܟܽܘܠ ܡܶܕܶܐ ܕܟܳܐܒܰܥ ܐ̱ܢܳܐ.‘ 23ܘܡܽܗ̄ܘ ܙܰܪܥܳܐ ܕܰܗ̄ܢܳܐ ܐܰ‌ܠܳܗܳܐ ܡܰܩ݄ܡ ܠܶܗ ܠܺܐܝܣܪܳܐܶܝܠ ܝܶܫܽܘܥ ܦܳܪܽܘܩܳܐ ܐܟ̥ ܕ݄ܡܘܰܥܰܕ ܠܶܗ. 24ܘ݄ܡܫܰܕܰܪ ܠܶܗ ܠܝܽܘܚܰܢܳܢ ܕܟܳܪ݄ܙ ܡܶܩ݄ܕ̱ܡ ܡܽܗ̄ܘ ܡܰܐܬ̥ܝܰܝܕ̥ܶܗ ܗ̄ܺܝ ܡܰܥܡܽܘܕ̥ܺܝܬ̥ܳܐ ܕܺܗ̄ܝ ܬܝܳܒܽܘܬ̥ܳܐ ܠܟܽܘܠܶܗ ܗ̄ܽܘ ܥܰܡܳܐ ܕܺܐܝܣܪܳܐܶܝܠ. 25ܘܒܺܗ̄ܝ ܚܰܪܰܝܬܳܐ ܕܺܗ̄ܝ ܬܶܫܡܶܫܬܰܝܕ̥ܶܗ، ܝܽܘܚܰܢܳܢ ܐܳܡܰܪ ܗ̄ܘܰܐ: ’ܡܰܢ ܟܚ݄ܫܒ̥ܺܝܬܽܘ ܕܟ݄ܬ ܐ̱ܢܳܐ؟ ܠܰܝ̱ܬ ܐ̱ܢܳܐ ܐܳܢܳܐ (ܡܫܺܝܚܳܐ). ܐܶ‌ܠܳܐ ܟܰܐܠܶܗ ܟܳܐܬ̥ܶܐ ܒ݄ܬ̥ܪܺܝ ܗܰܘܳܐ ܕܠ݄ܐ ܟܫܳܘܶܐ ܐ̱ܢܳܐ ܕܫܳܪܶܐ ܐ̱ܢܳܐ ܗ̄ܰܫّܽܘܒܰܩ̈ܶܐ ܕܰܡܣܳܢ̈ܰܝܕ̥ܶܗ.‘ 26ܓܰܒܪ̈ܶܐ ܐܰܚ̈ܽܘܢܳܢܶܐ، ܝܰܐ ܗ̄ܰܢ ܐܰܒܢ̈ܶܐ ܕܺܗ̄ܝ ܫܰܪܒܬ̥ܳܐ ܕܰܐܒܪܳܗܳܡ، ܘܗܰܢܺܝ ܕܰܐܥܡܰܝܟ̥ܽܘ ܕ݄ܟܙܰܝܥܺܝ ܡܰܢ̱ ܐ‌ܠܳܗܳܐ، ܐܰ‌ܠܟ̥ܽܘ ܡܫܰܕܪܳܐ ܗ̄ܺܝ ܡܶܠܬ̥ܳܐ ܕܰܚّܰܝ̈ܶܐ. 27ܘܡܺܐܝܕ̥ܶܗ ܕܗܰܢܺܝ ܗ̄ܰܥّܳܡܽܘܪ̈ܶܐ ܕܽܐܘܪܶܫܠܶܡ ܘܰܪّܺܝܫ̈ܳܢܰܬّ̥ܶܗ ܠܰܐ ܐܕ̥ܺܝܥܺܝ ܗ̄ܺܝ ܡܶܠܬ̥ܳܐ (ܡܫܺܝܚܳܐ)، ܘܠܳܐ ܝܰܠܺܝܦܺܝ ܗ̄ܰܟܬ̥ܳܒ̥̈ܶܐ ܕܰܗ̄ܢ ܢܒܺܝ̈ܶܐ ܕ݄ܟܡ݄ܩܪ݄ܢ ܒܟܽܘܠ ܫܰܒܬ̥ܳܐ. ܐܶ‌ܠܳܐ ܕ݄ܢّܶܗ ܘ݄ܡܟܰܡܰܠّܶܗ ܗܰܢܺܝ ܕ݄ܟܬ̥ܺܝܒ̥ܺܝ. 28ܘܥܰܡ ܕܠܳܐ ܚܙܰܠّܶܗ ܥܶܠܬ̥ܳܐ ܕܡܰܡܺܝܬ̥ܺܝ ܠܶܗ، ܐܰܒܺܝܥܺܝ ܡܶܢ̱ ܦܺܝܠܰܛܳܘܣ ܕܩܳܛܠܺܝ ܠܶܗ. 29ܘܺܗ̄ܝ ܢܰܩܠܐ ܕ݄ܡܟܰܡܰܠّܶܗ ܟܽܘܠ ܡܶܕܶܐ ܕ݄ܟܬ̥ܽܒ̥ ܗ̄ܘܰܐ ܐܰܥܠܶܗ، ܡܰܢܚܰܬّܶܗ ܡܽܗ̄ܘ ܨܠܺܝܒܳܐ ܘܡܰܚ݄ܬّܶܗ ܒܽܗ̄ܘ ܩܰܒ̥ܪܳܐ. 30ܐܶ‌ܠܳܐ ܐܰ‌ܠܳܗܳܐ ܡܰܩ݄ܡ ܠܶܗ ܡܒܰܝܢ ܗ̄ܰܡّܺܝ̈ܬ̥ܶܐ. 31ܘ݄ܚܙܶܐ ܠܰܗ̄ܢܺܝ ܕܣܰܠܺܝܩܺܝ ܐܰܥܡܶܗ ܡܽܗ̄ܘ ܓܠܺܝܠܳܐ ܠܽܐܘܪܶܫܠܶܡ ܝܰܘܡ̈ܳܬ̥ܳܐ ܓ̥ܰܠܰܒܶܐ. ܘܗ݄ܢّܶܝ ܢܶܝ ܐܳܥܕܳܐ ܗ̄ܰܣّܳܗܕ̈ܰܝܕ̥ܶܗ ܓܰܒ ܗ̄ܽܘ ܥܰܡܳܐ. 32ܘܰܐܚܢܰܐ ܣܬܶܝ ܟܳܡܣܰܒܪܺܝܢܰܐ ܠܟ̥ܽܘ ܒܽܗ̄ܘ ܘܰܥܕܳܐ ܕܗܰܘܺܝ ܠܰܒّܰܒܳܢ̈ܰܝܕ̥ܰܢ. 33ܟܰܐܠܶܗ ܡܟܰܡܶܠ ܠܶܗ ܐܰ‌ܠܳܗܳܐ (ܗ̄ܽܘ ܘܰܥܕܳܐ) ܐܰܥܡܰܢ، ܐܰܚܢܰܐ ܗ̄ܰܢ ܐܰܒܢ̈ܰܬّ̥ܶܗ، ܥܰܠ ܕܡܰܩ݄ܡ ܠܶܗ ܠܝܶܫܽܘܥ ܐܟ̥ ܕ݄ܟܬ̥ܺܝܒ̥ ܒܽܗ̄ܘ ܡܰܙܡܽܘܪܳܐ ܕܰܬܪܶܝ: ’ܗ̄ܽܘ ܐܰܒܪܰܝܕ̥ܺܝ ܗܰܬ، ܐܳܢܳܐ ܐܰܕܝܰܘܡܰܐ ܡܰܘܠܰܕ ܠܺܝ ܠܳܟ̥.‘ 34ܘܗܰܘܟ̥ܰܐ ܐܰ‌ܠܳܗܳܐ ܡܰܩ݄ܡ ܠܶܗ ܡܒܰܝܢ ܗ̄ܰܡّܺܝ̈ܬ̥ܶܐ ܕܢܰܩܠܐ ܚܪܶܬܳܐ ܠܳܐ ܕܳܥ݄ܪ ܚܳܙܶܐ ܚܪܳܒ̥ܳܐ ܐܟ̥ ܕܐܡ݄ܪ ܠܶܗ: ’ܓܕܳܗ̄ܒܶܐ ܐ̱ܢܳܐ ܠܟ̥ܽܘ ܗ̄ܺܝ ܛܰܝܒܽܘܬ̥ܳܐ ܕܕܰܘܺܝܕ̥ ܗ̄ܺܝ ܡܗܰܝܡܰܢܬܳܐ.‘ 35ܘܕܰܥ݄ܪ ܐܡ݄ܪ ܠܶܗ ܒܕܽܘܟܬ̥ܳܐ ܚܪܶܬܳܐ: ’ܕܠܳܐ ܛܪܶܐ ܠܳܟ̥ ܗ̄ܽܘ ܩܰܕܺܝܫܰܝܕ̥ܳܟ̥ ܚܳܙܶܐ ܚܪܳܒ̥ܳܐ.‘ 36ܡܺܐܝܕ̥ܶܗ ܕܕܰܘܺܝܕ̥، ܒܽܗ̄ܘ ܙܰܒܢܰܝܕ̥ܶܗ، ܡܫܰܡܰܫ ܠܶܗ ܗ̄ܽܘ ܨܶܒܝܳܢܳܐ ܕܰܐ‌ܠܳܗܳܐ، ܘܕܰܡ݄ܟ̥ ܘ݄ܩܒ̥ܺܝܪ ܓܰܒ ܗ̄ܰܒّܰܒܳܢܰܝ̈ܕ̥ܶܗ ܘ݄ܚܙܶܐ ܠܶܗ ܚܪܳܒ̥ܳܐ. 37ܐܶ‌ܠܳܐ ܗܰܢܳܐ ܕܡܰܩ݄ܡ ܠܶܗ ܐܰ‌ܠܳܗܳܐ ܠܳܐ ܚܙܶܐ ܠܶܗ ܚܪܳܒ̥ܳܐ. 38ܝܕ̥ܰܥܽܘ، ܝܰܐ ܗ̄ܰܢ ܐܰܚ̈ܽܘܢܳܢܰܝܕ̥ܰܢ، ܐܶܒܶܗ ܒܰܗ̄ܢܳܐ ܟܡ݄ܟܪ݄ܙ ܐܰ‌ܠܟ̥ܽܘ ܫܽܘܒܩܳܢܳܐ ܕܰܚܛܳܗ̈ܶܐ. 39ܘܡܶܢ̱ ܟܽܘܠ ܕܠܳܐ ܩܰܕܺܝܪܺܝܬܽܘ ܒܽܗ̄ܘ ܢܳܡܽܘܣܳܐ ܕܡܽܘܫܶܐ ܕܡܺܝܙܰܕܩܺܝܬܽܘ، ܒܰܗ̄ܢܳܐ (ܡܫܺܝܚܳܐ) ܟܽܘܠ ܕ݄ܡܗܰܝܡ݄ܢ ܟܡܺܝܙܰܕ݄ܩ. 40ܗܰܢ ܢܰܩܠܐ، ܡܰܒܶܗܽܘ، ܕܠ݄ܐ ܐܙّܶܗ ܐܳܬ̥ܶܐ ܐܰܥܠܰܝܟ̥ܽܘ ܗ̄ܽܘ ܡܶܕܶܐ ܕ݄ܟܬ̥ܺܝܒ̥ ܒܰܗ̄ܢ ܢܒܺܝ̈ܶܐ: 41’ܚܙܰܝܽܘ، ܝܰܐ ܡܨܰܥܪ̈ܳܢܶܐ! ܘܓ݄ܕܡܺܝܕܰܘܡܪܺܝܬܽܘ ܘܓ݄ܕܚܳܪܒ̥ܺܝܬܽܘ! ܡܶܕܶܐ ܓܣܳܝܰܡ ܐ̱ܢܳܐ ܒܰܝّܰܘܡ̈ܳܬ̥ܰܬ̥ܟ̥ܽܘ، ܡܶܕܶܐ ܕܠ݄ܐ ܟܡܰܫܪܺܝܬܽܘ ܐܶܢ ܢܳܫܳܐ ܕܳܐܡܰܪܟ̥ܽܘ.‘“

ܗ̄ܰܥّܰܡ̈ܶܐ ܟܡܰܩܒܠܺܝ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܘܰܝّܽܘܕ̥̈ܳܝܶܐ ܟܬ݄ܦܟܺܝ ܠܰܗ

42ܘܗ݄ܢّܶܝ ܢܰܦܳܩ̈ܶܐ ܡܶܢ̱ ܣܺܝܕܰܝّܶܗ، ܐܰܒܺܝܥܺܝ ܡ݄ܢّܶܗ ܕܳܐܬ̥݄ܢ ܒܺܗ̄ܝ ܫܰܒܬ̥ܳܐ ܚܪܶܬܳܐ ܕܡ݄ܫܓ̥ܳܠܺܝ ܐܰܥܡܰܝّܶܗ ܗ̄ܰܡّܰܐܡܪ̈ܰܢܺܝ. 43ܘܒ݄ܬ̥݄ܪ ܕ݄ܡܒܰܪܒܙܳܐ ܗ̄ܺܝ ܟ̥ܢܽܘܫܬܳܐ، ܝܽܘܕ̥̈ܳܝܶܐ ܓ̥ܰܠܰܒܶܐ ܘܢܽܘܟ̥ܪ̈ܳܝܶܐ (ܠܳܐ ܝܽܘܕ̥̈ܳܝܶܐ) ܗܰܢܺܝ ܕܙܰܝܥܺܝ ܗ̄ܘܰܘ̱ ܡܰܢ̱ ܐ‌ܠܳܗܳܐ ܐܰܙّ݄ܢ ܒ݄ܬ̥ܪܰܝّܶܗ. ܘܗ݄ܢّܶܝ (ܦܰܘܠܳܘܣ ܘܒܰܪܢܰܒܰܐ) ܡ݄ܫܓ̥ܳܠܺܝ ܗ̄ܘܰܘ̱ ܐܰܥܡܰܝّܶܗ ܘ݄ܐܒܥܺܝ ܗ̄ܘܰܘ̱ ܡ݄ܢّܶܗ ܕܳܗ̄ܘ݄ܢ ܡܰܐܣܪ̈ܶܐ ܒܺܗ̄ܝ ܛܰܝܒܽܘܬ̥ܳܐ ܕܰܐ‌ܠܳܗܳܐ.

44ܘܒܺܗ̄ܝ ܫܰܒܬ̥ܳܐ ܚܪܶܬܳܐ ܗ̄ܺܝ ܡܕ̥ܺܝܢ̱ܬܳܐ ܟܽܘܠܰܗ ܠܰܬܺܝܡܳܐ ܕܫܳܡܥܳܐ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ. 45ܘܺܗ̄ܝ ܢܰܩܠܐ ܕܰܝّܽܘܕ̥̈ܳܝܶܐ ܚܙܰܠّܶܗ ܗ̄ܽܘ ܥܰܡܳܐ ܓ̥ܰܠܰܒܶܐ ܕܠܰܬ݄ܡ، ܡܠ݄ܢ ܚܣܳܡܳܐ ܘܩܰܝܡܺܝ ܗ̄ܘܰܘ̱ ܡܩܰܒ݄ܠ ܕܰܡّܰܐܡܪ̈ܶܐ ܕܳܐܡܰܪ ܗ̄ܘܰܐ ܦܰܘܠܳܘܣ، ܘܟ݄ܦܪܺܝ ܗ̄ܘܰܘ̱. 46ܘܦܰܘܠܳܘܣ ܘܒܰܪܢܰܒܰܐ ܐܡ݄ܪّܶܗ ܒܓܰܠܝܳܐ: ”ܐܰ‌ܠܟ̥ܽܘ ܠܳܙ݄ܡ ܗ̄ܘܰܐ ܒܺܗ̄ܝ ܩܰܕ̱ܡܰܝܬܳܐ ܕܡܺܝܬܰܘܡܪܳܐ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ، ܐܶ‌ܠܳܐ ܥܰܠ ܕܟܳܡܰܪܚܩܺܝܬܽܘ ܠܰܗ ܡ݄ܢܟ̥ܽܘ، ܗܰܬܽܘ ܩܛ݄ܥܟ̥ܽܘ ܥܰܠ ܪܽܘܚܰܝܟ̥ܽܘ ܕܠ݄ܐ ܟܫܳܘܺܝܬܽܘ ܠܰܚّܰܝ̈ܶܐ ܕ݄ܠܥܳܠܰܡ. ܟܰܐܠܶܗ ܓܕܳܥܪܺܝܢܰܐ ܓܰܒ ܗ̄ܰܥّܰܡ̈ܶܐ. 47ܡܺܐܝܕ̥ܶܗ ܕܗܰܘܟ̥ܰܐ ܡܳܪܰܢ ܗܽܒ̥ ܠܶܗ ܠܰܢ ܦܽܘܩܕܳܢܳܐ، ܐܟ̥ ܕ݄ܟܬ̥ܺܝܒ̥: ’ܣ݄ܡ ܠܺܝ ܠܳܟ̥ ܢܽܘܗܪܳܐ ܠܰܥّܰܡ̈ܶܐ ܕܳܗ̄ܘܰܬ ܚܰܝ̈ܶܐ (ܦܽܘܪܩܳܢܳܐ) ܠܰܚّܰܪ̈ܳܝܳܬ̥ܳܐ ܕܺܗ̄ܝ ܐܰܪܥܳܐ.‘“

48ܘܺܗ̄ܝ ܢܰܩܠܐ ܕܫ݄ܡܥܺܝ ܗ̄ܘܰܘ̱ ܗ̄ܰܥّܰܡ̈ܶܐ ܡ݄ܦܨܳܚܺܝ ܗ̄ܘܰܘ̱ ܘ݄ܡܫܰܒܚܺܝ ܗ̄ܘܰܘ̱ ܠܰܐ‌ܠܳܗܳܐ، ܘ݄ܡܗܰܝܡܰܢّܶܗ ܗܰܢܺܝ ܕܣܺܝܡܺܝ ܠܰܚّܰܝ̈ܶܐ ܕ݄ܠܥܳܠܰܡ. 49ܘܺܗ̄ܝ ܡܶܠܬ̥ܳܐ ܕܡܳܪܝܳܐ ܡ݄ܟܪܳܙܳܐ ܗ̄ܘܰܐ ܒܟܽܘܠܶܗ ܗ̄ܽܘ ܐܰܬ̥ܪܰܘܳܐ. 50ܐܶ‌ܠܳܐ ܗ̄ܰܝّܽܘܕ̥̈ܳܝܶܐ ܡܰܩ݄ܡّܶܗ ܐܰܥܡܰܝّܶܗ ܗ̄ܰܪّܺܝܫܳܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܘܰܗ̄ܢ ܢܶܫ̈ܶܐ ܥܰܬܺܝܪ̈ܶܐ ܗܰܢܺܝ ܕܙܰܝܥܺܝ ܗ̄ܘܰܘ̱ ܡܰܢ̱ ܐ‌ܠܳܗܳܐ ܘ݄ܫܕܰܠّܶܗ ܒ݄ܬ̥ܪܶܗ ܕܦܰܘܠܳܘܣ ܘ݄ܕܒܰܪܢܰܒܰܐ ܘ݄ܛܪܺܝܕ݄ܢّܶܗ ܘܡܰܘܦܩ݄ܢّܶܗ ܡܰܢ̱ ܬܚ̈ܽܘܡܰܬّ̥ܶܗ. 51ܘܺܗ̄ܝ ܢܰܩܠܐ ܕܢܰܦܺܝܩܺܝ، ܢܦ݄ܨّܶܗ ܐܰܥܠܰܝّܶܗ ܗ̄ܽܘ ܥܰܦܪܳܐ ܕܪ̈ܰܓ̥ܠܳܬ̥ܰܝّܶܗ، ܘܰܐܬ̥݄ܢ ܠܺܗ̄ܝ ܡܕ̥ܺܝܢ̱ܬܳܐ ܕܺܐܝܩܳܢܺܘܳܢ. 52ܘܰܬّܰܠܡܺܝܕ̥̈ܶܐ ܡ݄ܡܠ݄ܢ ܗ̄ܘܰܘ̱ ܦܨܺܝܚܽܘܬ̥ܳܐ ܘܪܽܘܚܳܐ ܕܩܽܘܕܫܳܐ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 13: ܟܬܒܐ

Highlight

Copy