Alumi 14
14
Leka kʉalamʉla ɨako
1Mʉsɨngɨɨlyi mʉntʉ wɨhi nʉwa ʉhʉɨɨli ʉniino, ingɨ leki kʉmʉlamʉli mʉmasɨgo akwe. 2Antʉ shanga impyana, mʉntʉ ʉng'wɨ ʉhʉɨɨli wakwe ʉmʉgombilye kʉlya kintʉ kɨhi, nʉ mʉya ʉkete ʉhʉɨɨli ʉniino, wɨlya nyenyi niya mapwa dʉ. 3Mʉntʉ nʉwɨlya intʉ yɨhi waleke kʉmʉdalaha mʉntʉ nɨshanga ʉhumile kʉlya intʉ yɨhi, nʉ mʉtʉ nʉwɨlya nyenyi ya mapwa waleke kʉmʉlamʉla ʉmʉntʉ nʉwɨlya intʉ yɨhi, kʉnsoko Itunda ʉmʉgombile. 4Ʉewe wɨnyenyu nʉkʉmʉlamʉla mitʉmi nʉwamʉngɨza? Anga wimɨke ang'wɨ wagwe ʉkimɨkigwa ni mʉkʉlʉ wakwe, kʉnsoko mʉkʉlʉ ʉkete ʉhumi nʉwa kʉmimɨsha.
5Mʉntʉ ʉng'wɨ ʉhumile kʉsɨnga lʉhikʉ lʉng'wɨ lʉza kʉkila ʉlʉlya, nʉ mʉya ʉine mahikʉ ɨhi impyani. Mʉntʉ wɨhi nʉwatyate anga nʉsɨgɨɨe mʉmahala akwe. 6Mʉntʉ nʉkʉsɨgɨɨla lʉhikʉ lʉng'wɨ lʉza kʉkɨla ʉlʉlya, ʉtendile itɨ kʉnsoko akʉmʉkʉlya Itunda, nʉ mʉntʉ nʉkʉsɨgɨɨla ndya ying'wɨ nza, ʉkʉtenda itɨ kʉmʉkʉlya Isekʉlʉ kʉnsoko akʉmʉsongeelya Itunda. Nʉ mʉntʉ nʉkʉleka kʉlya indya ying'wɨ wɨtenda itɨ kʉnsoko akʉmʉkʉlya Isekʉlʉ, nʉ mʉntʉ ʉyʉ wɨmʉkʉlya Itunda. 7Kʉnsoko mʉng'witʉ kʉtilɨ mʉntʉ nʉwishiɨ kʉnsoko akwe ʉng'wenso, hangɨ kʉtilɨ mʉntʉ nʉwɨkuza kʉnsoko akwe ʉng'wenso. 8Itungo nɨkishiɨ, kishiɨ kʉnsoko ang'wi Isekʉlʉ, matungo anga kʉshe, kʉkule kʉnsoko ang'wi Isekʉlʉ. Itɨ gwa, anga kishiɨ ang'wɨ kʉshe, ʉsese kɨ antʉ ang'wi Isekʉlʉ. 9Yɨyo nsoko Kilisito aɨʉkule, nʉkiʉka hangɨ watule Isekʉlʉ kʉ antʉ nɨapanga nawa nɨakʉle. 10Itɨ gwa, nɨkɨ ʉewe ʉmʉlamʉle ʉmʉnyandʉgʉ wako? Nʉewe, nɨkɨ ʉmʉdalahe ʉmʉnyandʉgʉ wako? Ʉsese kɨhi kʉzɨɨzimɨka pituntu nɨla ʉlamʉli nɨlang'wi Itunda. 11Kʉnsoko Mʉʉandɨkwa yandɨkilwe itɨ, Isekʉlʉ ʉlɨɨye,
“Anga nɨnogolekile kishiɨ,
mʉntʉ wɨhi ʉzetugama pang'wane,
hangɨ mʉntʉ wɨhi ʉzɨɨzatambʉla ʉng'weno kɨna ʉnene ni Itunda.”
12Kʉlʉlo, mʉng'witʉ kɨhi kʉzɨɨzatambʉla impola niya likalo lakwe pang'wi Itunda.
Leka kʉsasha kɨnkwaatya kʉ mɨɨako
13Kʉlʉlo gwa, kʉleke kʉalamʉla ɨitʉ, ingɨ kʉsɨgɨɨla kʉleka kʉtula kɨnkwaatya kʉ anyandʉgʉ ang'wɨ kʉmʉsasha wagwɨle mʉmɨlandʉ. 14Mʉ mʉhangʉ ni Isekʉlʉ Yesʉ, ningile ɨkʉlʉ kʉʉlʉ kɨna kʉtilɨ kintʉ kɨhi kʉʉpumo wakwe nɨshanga kɨtakɨwe kʉmipoelya Itunda, ingɨ mʉntʉ anga wasɨge kɨna kɨntʉ ka kɨtʉʉnga shanga kɨtakɨwe kʉmipoelya Itunda, ʉʉgwa, kʉng'wakwe kɨtula shanga kɨtakɨwe kʉmipoelya Itunda ɨkʉlʉ kʉʉlʉ. 15Anga ʉmʉsashe mʉnyandʉgʉ wako wasolopaɨlwe indya nʉkʉlya, ʉlɨnge kɨna shanga ʉtogilwe nʉʉlowa. Leka kʉgomba lʉkʉlʉ indya yako kʉtula kinkwaata ka kʉmʉlimansɨɨlya ʉmɨako mʉ mɨladʉ nʉ Kilisito aɨʉkʉle kʉnsoko akwe! 16Leki kʉgombi kɨntʉ ʉnyenye nɨmʉkɨine kɨza antʉ akɨdalahe. 17Nsoko ingɨ sɨyɨ Ʉtemi wang'wi Itunda shanga kʉlya nʉ kʉng'wa, kʉng'wanso ɨza makani namʉloeeye Itunda nɨ matiliga nʉ wiloi mʉ Ng'wahʉ Ng'welʉ. 18Mʉntʉ nʉkʉmitʉmɨla itɨ ʉ Kilisito wɨmʉloeelya Itunda, nʉkʉgombwa nɨantʉ.
19Kʉlʉlo ang'wɨ ʉyɨlɨ, mahikʉ ɨhi komanɨɨlyi kitʉma nɨmaza nɨleta matiliga, aya nɨkʉaɨɨlya kizenga ʉsese. 20Leka kʉgazanja mʉlɨmo wang'wi Itunda kʉnsoko ankʉngʉmi mʉndya. Ndya yɨhi nza, hangɨ shanga inonee kʉlya ndya niyɨkʉmʉtenda mʉntʉ witʉme mɨlandʉ. 21Ingɨ bahu kʉleka kʉlya nyama, ang'wɨ kʉng'wa dibai ang'wɨ kitʉma kɨntʉ kɨhi nɨkɨhumile kʉmʉsasha mʉnyandʉgʉ wako witʉme mʉlandʉ. 22Itɨ gwa, ambɨɨla nʉkɨhʉɨɨe ʉewe ni Itunda wako. Ʉkembetilwe mʉntʉ nʉkilamʉɨlya nɨkakitʉma, shanga wikʉngʉma nɨ masɨgo akwe. 23Ingɨ mʉntʉ nʉkisinsɨla kʉlya indya, ʉkʉlamʉlwa anga walye, kʉnsoko shanga ʉkʉlya kʉ ʉhʉɨɨli. Kʉnsoko kɨntʉ kɨhi nʉkitʉma ɨze shanga ʉhʉɨɨe ingɨ mʉlandʉ.
The New Testament in Isanzu @The Word for The World International and Isanzu Language translation. All rights reserved