Alumi 13
13
Kʉtula nʉ lwijo kʉ Atemi
1Mʉntʉ wɨhi ʉtakɨwe kʉija atemi, kʉnsoko atemi ɨhi ɨpuma kʉng'wi Itunda, akʉlʉ nɨanso nɨatemile aɨkilwe ni Itunda. 2Mʉntʉ wɨhi nʉkʉapɨlʉka akʉlʉ nɨatemile, ʉkʉmʉpɨlʉka Itunda, nawa nɨakʉtenda itɨ akisakɨɨlya ʉlamʉlwi. 3Kʉnsoko mʉkʉlʉ nʉtemile shanga ɨmʉtumba mʉntʉ nʉɨtenda nɨmaza, ingɨ kʉ mʉntʉ nʉɨtenda nɨmabɨ. Apa gwa, ʉtakilene kʉmogopa mʉtemi? Itʉme nɨmaza nʉng'wenso ʉkʉʉlʉmba, 4kʉnsoko mʉkʉlʉ nʉwanso nʉtemile ingɨ mɨtʉmi wang'wi Itunda ʉkitʉma kʉnsoko akʉʉaɨɨlya wewe. Ingɨ anga witʉme ʉbɨ, ʉʉgwa ʉkʉmogopa, kʉnsoko ʉkete ʉhumi nʉwa kʉʉpɨsɨɨlya. Nʉwanso ingɨ mitʉmi wang'wi Itunda, ʉhumile kʉmalya ʉbɨ kʉ antʉ nɨatendile ʉbɨ. 5Kʉlʉlo itakɨwe kʉija akʉlʉ nɨatemile, shanga kʉnsoko akogopa ʉpɨsɨɨlyi wang'wi Itunda, ingɨ kʉnsoko mʉlɨngile kɨna ikani nɨlanso iza kitʉma.
6Kʉnsoko yɨyo yɨɨyo ʉnyenye mɨpumya kodi, kʉnsoko akʉlʉ nɨatemile nɨanso akʉmitʉmɨla Itunda nɨakʉtima mʉlɨmo nʉwao. 7Mʉlɨpi mʉntʉ wɨhi anga mʉitakɨwe, pamadaigwa ʉshʉlʉ, lɨpi ʉshʉlʉ, hangɨ pamadaigwa kodi, lɨpi kodi, ʉyʉ nʉwakogopwa, mogopi, nʉyʉ nʉwakʉkʉligwa, mʉkʉlyi.
Kilowe anga kɨndʉgʉ
8Leki kʉdaigwi nʉ mʉntʉ wɨhi, isage widayi nʉwa wilowi ʉdu. Mʉntʉ nʉkʉmʉlowa ʉmʉya, wɨtimɨlya malagɨɨlyo ang'wi Itunda. 9Kʉnsoko malagɨɨlyo ang'wi Itunda aya alagɨɨye, “Leka kʉgoolya hangɨ leka kʉbʉlaga hangɨ leka kia hangɨ leka kʉawa,” nɨ malagɨɨlyo maʉya ɨhi, ahangʉɨwe milagɨɨlyo lɨng'wɨ, “Mʉlowe ʉmɨako anga nʉwiloilwe ʉewe.” 10Mʉntʉ nʉmʉloilwe ʉmʉya shanga ʉkʉmʉtendeela nɨ mabɨ, kʉlʉlo ʉlowi ʉkamɨnkɨɨye malagɨɨlyo ɨhi.
11Nʉ nyenye tendiʉ, mʉlɨnge kʉmolɨ matungo kɨɨ, lɨlɨ itungo nɨlakʉʉka kʉpuma mʉtʉlo. Kʉnsoko ʉgunwi witʉ wahumbeela nangalʉ kʉkɨla itungo naɨkandilye kʉhʉɨɨla. 12Ʉtikʉ ʉlongelekile kela, nɨlyoa laakatoloka. Itɨ gwa kʉleke makani ɨhi nakiti, kipɨnde yɨgɨ yɨhi niya nzelya. 13Itigwa kishiɨ nʉ lwijo, anga nɨishiɨ antʉ ʉmʉnzelya hangɨ shanga kʉtula nʉ ʉlaku nʉ ʉgala ntʉlɨ ang'wɨ kʉtula nʉ ʉdobu nʉ ʉsambo nʉ wilei nʉ wɨlu. 14Mʉtakɨwe mitʉme anga Isekʉlʉ Kilisito naɨwitʉmile, mʉleke kitʉma makani a mʉɨlɨ nɨsasha mɨlandʉ.
The New Testament in Isanzu @The Word for The World International and Isanzu Language translation. All rights reserved