Alumi 10
10
1Anyandʉgʉ ane, ndoilwe nʉ kʉsʉmbɨɨlya mʉnkolo ane ɨhi, Aisilaeli akomolwe. Hangɨ mahikʉ ɨhi kʉalompeela kʉng'wi Itunda. 2Kʉnsoko kʉmʉɨla kɨna nɨanso akagupile kʉmʉduma Itunda, ingɨ ʉkagupi wao shanga ɨpembeeye mʉʉmanyi nʉwa tai. 3Shanga aɨalɨngile itɨ Itunda wɨatenda antʉ agombekile kʉng'wakwe. Antʉ agemile kʉtyata ntendoao amɨhitile ɨnzɨla ang'wi Itunda nakʉatenda agombeke kʉng'wakwe. 4Kʉlʉlo kɨza kʉng'wa Kilisito wamatendile malagɨɨlyo ang'wa Musa aleke kʉtula kɨntʉ ka kʉsania kʉ antʉ ɨhi nɨakʉmʉhʉɨɨla Itunda. Ingɨ antʉ ɨgombwa ni Itunda kʉkɨɨla kʉmʉhʉɨɨla ʉ Kilisito.
Ʉgunwi ingɨ kʉ antʉ ɨhi
5Kʉ mpola niyakʉgombeka kʉng'wi Itunda kɨze kʉtyatile malagɨɨlyo, Musa aɨʉtambʉe itɨ, “Mʉntʉ wɨhi nʉkʉtimɨlya malagɨɨlyo nalagɨigwe ʉkishiɨ kʉtyata malagɨɨlyo nanso.” 6Ingɨ kitʉme makani nagombekile kʉng'wi Itunda kʉkɨɨla ʉhʉɨɨli, yandɨkilwe itɨ, “Ʉleke kʉlʉnga mʉ nkolo ako kɨna ‘Nyenyu nʉkʉnankɨla kigʉlʉ?’ Kʉlʉnga itɨ yihanga kʉmʉsimya pihɨ ʉ Kilisito. 7Hangɨ ʉleke kʉlʉnga, “Nyenyu nʉkʉsima wende kʉʉlʉngʉ?” Kʉlʉnga itɨ yihanga wamʉpumye ʉ Kilisito kʉashi.” 8Ʉandɨkwa wang'wi Itunda ʉtambʉe itɨ, “Lʉkani nʉlanso nʉlang'wi Itunda lʉkolɨ pakupɨ nʉewe, lʉkolɨ mʉ mʉlomo wako, nʉ mʉnkolo ako.” Nʉwanso wʉwo ʉhʉɨɨli wʉwo nɨkʉʉtanantya. 9Anga ʉtambɨle kʉ mʉlomo wako ʉewe kɨna ʉ Yesʉ ingɨ Isekʉlʉ hangɨ ʉhʉɨɨle mʉnkolo ako kɨna Itunda aɨʉmiʉkilwe, ʉkʉgunɨka. 10Kʉlʉlo mʉntʉ anga wahʉɨɨle mʉnkolo wɨkagombwa ni Itunda, hangɨ anga watambʉle kʉ mʉlomo wakwe, ʉkʉgunwa. 11Anga mʉyandɨkile Mʉwandɨkwa wang'wi Itunda, “Mʉntʉ wɨhi nʉmʉhʉɨɨe Yesʉ shanga ʉkʉhumigwa mɨnyala.” 12Ikani ɨlɨ ingɨ laantʉ ɨhi, tilɨ kʉtemanʉla Mʉyahudi nʉyʉ nɨshanga Mʉyahudi, Isekʉlʉ waantʉ ɨhi, nʉyo mʉkende ɨtai taai kʉ antʉ ɨhi nɨɨmʉlompa. 13Kʉlʉlo Ʉandɨkwa wang'wi Itunda ʉtambʉe itɨ, “Mʉntʉ wɨhi nʉkʉmitanga Isekʉlʉ waaɨɨligwe, ʉkʉgunwa.”
14Itɨgwa, akʉmʉlompa ʉlɨ ʉyʉ nɨshangaamʉhʉɨɨe? Hangɨ akʉmʉhʉɨɨla ʉlɨ nɨakɨlɨ kija impola yakwe? Akija ʉlɨ impola yakwe angaize kʉtilɨ mʉtanantyi? 15Hangɨ antu akʉtanatya ʉlɨ angaize shangaatʉmilwe? Anga niyandɨkilwe Mʉwandɨkwa wang'wi Itunda kɨna, “Ingɨ ikani lakʉloeelya kɨza kʉ antʉ nɨakʉtananatya Mpola Nza!” 16Ingɨ shanga antʉ ɨhi nɨaigombile Nkani Nza. Yɨyo nsoko ʉ Isaya aɨʉlʉngile, “Isekʉlʉ, itɨ nyenyu naɨʉhʉɨɨe impola yɨtʉ?” 17Kʉlʉlo gwa, kʉhʉɨɨla yandɨɨlya kija Mpola Ninza, ni Mpola Ninza niyanso ize ipumile mʉlʉkani lang'wa Kilisito.
18Ingɨ kʉkolya. Itɨɨ, nɨanso shanga aɨigulyene impola niyanso? Kʉlʉ kʉʉlʉ aɨigulye, Anga Wandɨkwa wang'wi Itunda nʉʉtambʉe,
“Antʉ atanantilye Mpola niyang'wi Itunda ga yɨhi,
antʉ igulye mpola yang'wi Itunda ga yɨhi mihɨɨ.”
19Kʉkolya hangɨ, Itɨɨ ihumɨkile kɨna Aisilaeli shanga aɨalɨngilene? Kɨna Musa aɨwang'wandyo kʉlʉnga itɨ,
“Kʉatenda mʉaonele wɨlu
antʉ nɨshanga ihɨɨ ane,
hangɨ kʉmʉsasha mʉtule nɨmakuo
antʉ ihɨɨ aapʉngʉ.”
20Hangɨ ʉ Isaya kʉlʉnga kʉ ʉkamatɨku kɨna,
“Antʉ awa nɨshanga aɨɨnduma, ampantɨka,
nigeeleka kʉ antʉ awo nɨshanga ɨduma impola yane.”
21Ingɨ kʉ Aisilaeli Itunda ʉlʉngile itɨ, “Ng'ʉng'wɨ pii aɨnɨapepelya antʉ nɨapɨlʉki hangɨ nɨagila ʉlwijo.”
The New Testament in Isanzu @The Word for The World International and Isanzu Language translation. All rights reserved