Matayo 15
15
Ʉmanyisi nʉa anyakalɨ
Maliko 7:1-13
1Sʉnga Apalisayo ang'wɨ nɨ amanyisi amalagɨɨlyo ang'wa Musa naɨapʉmile kʉ Yelʉsalemu ɨkamʉhanga ʉ Yesʉ, ɨkamʉkolya, 2“Nɨkɨ amanyisigwa ako shanga akee ʉmanyisi naɨ kʉmanyisigwe nɨanyakalɨ? Kʉnsoko shanga ɨkʉkalala mɨkono kʉpikɨɨla mʉinkokola anga mʉitakɨwe nɨakandya kʉlya indya!”
3Yesʉ wɨkaasʉkɨɨlya, “Kʉnɨkɨ ʉnyenye shanga mʉkee malagɨɨlyo ang'wi Itunda ingɨ mʉtyatile ʉmanyisigwa wanyu ʉnyenye? 4Itunda ʉliiye, ‘Mʉkʉlye tata wako nʉ iyaa wako,’ hangi ‘Nʉkʉmʉtʉkɨla ihe ang'wɨ nyinya nʉwabʉlagwe.’ 5Ingɨ ʉnyenye mɨmanyisa kɨna mʉntʉ anga ɨze ʉkete kɨntʉ kakʉmʉaɨilya ihe ang'wɨ nyinya, ingɨ walʉnge. ‘Kɨntʉ ɨkɨ kʉkɨpʉmya kʉng'wɨ Itunda,’ 6ʉnyenye mɨmanyisa mʉntʉ ʉyʉ waleke kʉmʉkʉlya ihe ang'wɨ nyinya! Itɨ gwa mʉgʉmaniiye inkani yang'wɨ Itʉnda mʉtyatile ʉmanyisigwa wanyʉ. 7Ʉnyenye mitendisaa kɨna mɨaza! Mʉmanga Isaya aɨʉpumilye ʉmanga kʉng'wanyʉ kɨna.
8‘Itunda ʉlɨɨye, antʉ awa ɨnitetemba kʉnkani ʉdu,
ingɨ mʉnkolo yao shanga anihʉɨɨe ʉnene.
9Ɨnkʉlya ʉnene nakanda,
kʉnsoko ɨnkani nɨakʉmanyisa akɨʉntʉ ʉdu azelunga apembeeye kʉng'wi Itunda.”’
Makani nɨmʉtenda mʉntʉ wahitwe pa kʉʉmʉkʉlya Itunda
Maliko 7:14-23
10Sʉnga Yesʉ wɨkitanga milʉndo nʉa antʉ, wɨkaaɨla, “Tegeelyi hangɨ mʉlɨnge! 11Kɨntʉ nɨkɨkolɨ kʉnzi amʉntʉ nɨkɨkingɨla mʉkatɨ shanga kɨhumile kʉmʉsasha mʉntʉ wahitwe kʉmʉkʉlya Itunda. Ingɨ kɨntʉ nɨkɨkolɨ mʉkatɨ akwe anga kɨmʉpume kɨko kɨkʉmʉsasha mʉntʉ wahitwe kʉmʉkʉlya Itunda.”
12Sʉnga amanyisigwa ɨkamʉhanga ʉ Yesʉ, ɨkamʉɨla, “Itɨ, ʉlɨngilene kɨna Apalisayo naza ategeeye abɨpɨlwa inkani yako?
13Yesʉ wɨkaasʉkɨɨlya amanyisigwa, “Kɨntʉ kɨhɨ nɨshanga kɨtemewe nʉ Tata nʉwa kigulu, kɨkipwa. 14Aleki nɨanso! Ingɨ atongeeli aapoku, mʉpoku anga wamʉtongeele mʉpoku mʉya, ɨhi mʉʉbɨɨlɨ akʉgwɨla mikombo.”
15Petelo wɨkamʉɨla “Kʉtambʉile ndogoelyo ampyani nanso.”
16Yesʉ wɨkaakolya, “Nʉnyenye ga shanga mʉlingɨlene ikani ɨlɨ? 17Itɨɨ, shanga mʉlingɨle kɨna kɨntʉ nɨkɨkolɨ kʉnzi amʉntʉ kenda mʉnda nʉ kʉtwalwa kʉshoo? 18Ingɨ kɨntʉ nɨkɨkʉpʉma mʉmʉlomo, nɨkanso kɨko kɨkʉmʉsasha mʉntʉ wahitwe kʉmʉkʉlya Itunda. 19Kʉnsoko mʉnkolo amʉntʉ ɨpuma masɨgo aʉbʉlagi nʉ ʉgoolya nʉ ʉsambo nʉ wii nitegete ni itʉki. 20Ʉbɨ nʉwanso wʉwo wɨmʉsasha mʉntʉ wahitwe kʉmʉkʉlya Itunda. Ingɨ kʉlya mʉitakɨwe kʉpikɨɨla kʉinkokola shanga ikʉmʉsasha mʉntʉ wahitwe kʉmʉkʉlya Itunda.”
Ʉhʉɨɨli nʉwa mʉsʉngʉ
Maliko 7:24-30
21Yesʉ wɨkahega pang'wanso wɨkenda kʉtanantya kʉ Tilo nʉkʉ Sidoni. 22Mʉsʉngʉ ʉng'wɨ naɨwishiɨ mʉnkɨka niyanso nɨ shanga aɨ Mʉyahudi wɨkamʉhanga ʉ Yesʉ, wɨkitʉnta wazelʉnga. Isekʉlʉ, Ng'wana wang'wa Daudi, mbaisɨɨlye! Mʉnanso wane wingɨɨwe ahing'wi wagigwa ikʉlʉ.”
23Yesʉ ingɨ shanga wɨkamʉsʉkɨɨlya anga lʉkani lɨhi. Amanyisigwa akwe ɨkamʉhanga, ɨkamʉɨla, “Mʉɨle ʉmʉsʉngʉ ʉyʉ wahege kʉnsoko ʉkʉtyatiie kʉnʉ ʉkʉʉzogoeye.”
24Yesʉ wɨkasʉkɨɨlya, “Ʉnene ntʉmilwe kʉ Aisilaeli nɨatuile anga nkolo nɨyilimɨe.”
25Papo gwa ʉmʉsʉngʉ nʉanso wɨkahʉgeela, wɨkatʉgama ntongeela ang'wa Yesʉ, wɨkamʉɨla, “Isekʉlʉ itʉnʉ nzaɨɨlye.” 26Yesʉ wɨkamʉsʉkɨɨlya, wɨkamʉɨla “Shanga iza kʉhola indya niya ana ʉigʉmɨle imbwa.”
27Mʉsʉngʉ nʉwanso wɨkamʉɨla “Itaɨ Isekʉlʉ, ingɨ ga ni mbwa ilɨza ʉsigo nʉʉgwɨe pihɨ nʉkʉlya Isekulu wakwe.”
28Papo ʉ Yesʉ wɨkamʉsʉkɨɨlya, “Mʉsʉngʉ, ʉkete ʉhʉɨɨli ʉkʉlʉ, tendelwa anga nʉloilwe.” Kʉpʉma itungo lɨlo mʉnanso wakwe wɨkakomya.
Yesʉ ʉkʉkomya antʉ ɨdʉ
29Yesʉ wɨkahega pang'wanso wɨkalongola pampelo alʉzi nʉla Galilaya, wɨkanankila mʉlʉgʉlʉ, wɨkikiɨ pihɨɨ. 30Antʉ ɨdʉ ɨkamʉletela antʉ naɨ alema nɨ apokʉ nɨakɨtele nɨakɨmʉmɨ nɨalwae ɨhi, nʉkʉaɨka pantongeela ang'wa Yesʉ, nʉyo wɨkaakomya. 31Milʉndo wɨhi nʉa antʉ naɨaona akɨmʉmɨ akʉligitya nawa naɨapoiye akʉkomya nɨakɨtele akʉgenda nɨapokʉ akʉona, ɨkakʉɨlwa, ɨkamʉlʉmbɨɨlya Itunda nʉa Aisilaeli.
Yesʉ ʉkʉlɨsa antʉ elupu innɨ
Maliko 8:1-10
32Itɨ gwa Yesʉ wɨkaitanga amanyisigwa akwe, wɨkaaɨla, “Nɨa aisɨɨye ɨantʉ awa, kʉnsoko akolɨ palʉng'wɨ nʉnene mahikʉ ataatʉ, nitungo ɨlɨ agila nɨkakʉlya. Shanga ndoilwe kʉaleka alongole na nzala, ahʉmile kʉgwa mpʉmbɨɨli nanzala.
33Amanyisigwa akwe ɨkamʉɨla, “Apa kʉkolɨ mʉwɨɨ, kʉʉligɨlya pɨɨ indya niyakʉlɨsa ɨantʉ awa niidʉ iti?”
34Yesʉ wɨkaakolya amanyisigwa akwe, “Mʉkete mɨkate ɨnga?” Ɨkamʉsʉkɨɨlya, “Kʉkete mɨkate mʉpʉngatɨ nɨ pisamaki pikeehʉ.
35Itɨ gwa, Yesʉ wɨkalagɨɨlya antʉ ɨhi alame pihɨ. 36Wɨkahola mɨkate nanso nɨ mʉpʉngatɨ nɨ pisamaki, wɨkamʉsongelya Itunda, wɨkaega, wɨkaapa amanyisigwa akwe ɨkaatengela antʉ ɨhi. 37Antʉ ɨhi ɨkalya nʉkikʉta, sʉnga amanyisigwa akwe ɨkahoeela ʉsigo ɨkizʉla nkapu mʉpʉngatɨ. 38Awa naɨalie aɨ antʉ elupu innɨ, asʉngʉ nɨang'enya shanga aɨ aaɨgwe.
39Itɨ gwa ʉ Yesʉ wɨkaalaga antʉ nɨanso, nʉanso wɨkanankɨla mibɨnɨ, wɨkalongola kʉ kɨsalɨ ka Magadani.
Currently Selected:
Matayo 15: IBV
Highlight
Share
Copy
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved
