Matayo 14
14
Kʉsha kʉng'wa Yohana Mʉbadisi
Maliko 6:14-29; Lʉka 9:7-9
1Matʉngo nanso, mʉtemi Helode Mʉtemi nʉwa kʉ Galilaya wɨkija ʉlʉkʉmo lang'wa Yesʉ. 2Itɨ gwa, wɨkaaɨla itʉmi akwe, “Mʉntʉ ʉyʉ ingɨ Yohana Mʉbadisi wiyʉka. Kʉlʉlo ʉhumi nɨ mampɨlʉ akolɨ mʉng'waakwe zizo yʉkitʉma.”
3Helode wɨka mʉamba Yohana Mʉbadisi, wɨkamʉtʉnga wɨkamʉlʉgaɨla mʉ kadulumu, kʉnsoko ang'wa Helodɨa mʉsʉngʉ wang'wa Pilipo, naɨ heʉ wang'wa Helode. 4Kɨnsasha kɨna nkʉa yɨdʉ Yohana Mʉbadisi aɨ wɨmʉɨla Helode itɨ, “Shanga inonee ʉewe ʉmʉtine ʉmʉsʉngʉ nʉanso!” 5Helode akahiya kʉmʉbʉlaga ʉ Yohana Mʉbadisi ingɨ aɨ wogopile antʉ, kʉnsoko antʉ aɨ amʉaɨɨye ʉ Yohana Mʉbadisi kɨna mʉmanga wao.
6Naɨ lapɨka lʉhikʉ nʉ liloeelya nɨla kʉtʉgwa ʉ Helode, mʉnanso wang'wa Helodia akaina iza pantongeela niya antʉ naɨ anilwe. Helode wɨkaloeligwa nangaluu, 7Sʉnga ʉ Helode wɨkalapa, “Kʉʉpa kɨntʉ kɨhi nʉkʉnompa.”
8Nʉyo wɨkamanyisigwa nʉ nyinya, munanso wikalʉnga, “Mpe ino inoo itwe lang'wa Yohana Mʉbadisi mʉntʉa.”
9Mʉtemi Helode wɨkahʉsha, ingɨ kʉnsoko ilapo lakwe nɨ antʉ nɨikalanilye miloeeya lakwe, wɨkalagɨɨlya ʉ mʉnanso wapegwe ʉdu ɨkɨ nʉlompile. 10Kʉlʉlo gwa Helode wɨkalagɨɨlya amboi ende mʉkadulumu amʉdumʉle ʉ Yohana Mʉbadisi itwe. 11Itwe lang'wa Yohana Mʉbadisi lɨkaletwa lɨkenkilwe mʉsahani, Helode wɨkamʉpa ʉmʉnanso wang'wa Helodia, nʉyo wɨkamʉtwaɨla ʉnyinya. 12Amʉnyisigwa ang'wa Yohana Mʉbadisi ɨkɨza, ɨkaʉhola ʉmʉimba wang'wa Yohana Mʉbadisi, ɨkenda ɨkaʉɨka. Sʉnga ɨkamʉpikɨlya ʉ Yesʉ mpola niyanso.
Yesʉ ʉkʉalɨsa antʉ akɨile elupu itaano
Maliko 6:30-44; Lʉka 9:10-17; Yohana 6:1-14
13Yesʉ naɨwija impola niyanso, wɨkanankɨla mibɨnɨ wɨkahega pang'wanso, wɨkalongola patilɨ antʉ watule wing'wene. Ingɨ antʉ naɨija kʉkoli, ɨkamʉtyata azegenda na mɨgʉlʉ kʉpuma palʉzɨ. 14Yesʉ naɨ wahulumʉka mʉlʉgʉlʉ, wɨkaona milʉndo waantʉ, wɨkaaonela kɨnyaʉwai, naɨ alwae wɨkaakomya.
15Naɨ yatula mpɨndɨ amanyisigwa akwe ɨkamʉhanga ɨkamʉɨla, “Apa itɨ nɨkʉkolɨ ingɨ mʉwɨɨ, nɨlyoa laembama. Itɨ gwa alage ɨantʉ ende igʉɨlye indya mʉkɨsalɨ alye.”
16Yesʉ wɨkasʉkɨɨlya, “Kʉtilɨ anga nsoko akʉlongola, api nyenye indya.”
17Ingɨ amanyisigwa ɨkamʉɨla, “Ʉsese kʉkete mɨkate itaano ninsamaki ibɨɨlɨ dʉ
18Yesʉ wɨkaaɨla, “Sileti apa.” 19Yesʉ wɨkalagɨɨlya antʉ alame mʉmapwa. Wɨkahʉmbʉla mɨkate ni itaano ni nsamaki ni ibɨɨlɨ, wɨkalangamɨla kigʉlʉ, wɨkaɨkembeta. Sʉnga wɨkaegania ɨmɨkate nanso, wɨkaapa amanyisigwa akwe, nɨenso ɨkaapa ɨantʉ. 20Antʉ ɨhi ɨkalya ɨkikʉta. Sʉnga amanyisigwa ɨkahoeela naɨasagilye, yikizʉla nkapʉ ikʉmi na ibɨɨlɨ. 21Antʉ ɨhi naɨalɨe aɨapikile itʉnja elupu itaano, leka kʉaɨɨlya asʉngʉ nɨ ang'enya.
Yesʉ ʉkʉgenda migʉlya a mazɨ
Maliko 6:45-52; Yohana 6:15-21
22Itʉngo lɨlo, Yesʉ wɨkaaɨla amanyisigwa akwe anankɨle mibɨnɨ, atongele kitʉmbɨ la lʉzɨ nʉanso naɨwakɨlɨ ʉkʉlaga maʉmbɨ aantʉ. 23Naɨwakondya kʉalaga antʉ, wɨkanankila mʉlʉgʉlʉ wamʉlompe Itunda. Akatula kʉko wing'wene sunga kiti kɨkituma, 24itʉngo nɨlanso ibɨnɨ naɨanankɨe ɨamanyisigwa akwe aɨlapɨka pakatɨ alʉzi, ibɨnɨ lɨkatula yʉngʉya kʉnsoko ng'wega ʉkʉlʉ aɨʉkʉkunka.
25Ʉtikʉ, naɨyahumbeela kilya kʉtamʉka, Yesʉ wɨkaatyata ɨamanyisigwa akwe wazegenda migʉlya amazɨ. 26Amanyisigwa akwe naɨamʉona ʉkʉgenda migʉlya amazɨ ɨkaambwa woa, ɨkakʉta ɨkalʉnga, “Ʉyʉ mʉtumbʉka!”
27Papo Yesʉ wɨkaatambʉlya, “Komyi ɨnkolo, ingɨ nene. Leki kogopi!”
28Petelo wɨkamʉɨla “Isekʉlʉ angaɨze tai yʉ wewe, ngombye nʉnene ngende migʉlya amazɨ nize kʉng'waako.”
29Yesʉ wɨkalʉnga, “Alɨ genda pembya.” Papo, Petelo wɨkasima mibɨnɨ, wɨkagenda migʉlya amazɨ ʉhongile kʉng'wa Yesʉ. 30Ingɨ Petelo naɨ waona ʉng'wega wakʉnka, wɨkogopa, wɨkatʉla nyohela mʉmazɨ; wɨkakʉta, “Isekʉlʉ ngune!”
31Papo ʉ Yesʉ, wɨkamʉamba mʉkono, wɨkamʉɨla “Ʉewe nʉkete ʉhʉɨɨli ʉniino! Nɨkɨ wogopa?” 32Sʉnga ɨkanankɨla mibɨnɨ, nʉng'wega ʉkakilaja. 33Ɨhi naɨ amoli mibɨnɨ ɨkatugama nʉkʉmʉkʉlya, ɨkalʉnga, “Kʉlʉ kʉʉlʉ ʉewe wɨ Ng'wana wang'wi Itunda.
Yesʉ ʉkʉakomya alwae kihɨɨ akʉ Genezaleti
Maliko 6:53-56
34Ɨkatambʉka ʉlʉzi, ɨkapɨka kihɨɨ a Genezaleti. 35Anya kʉ Genezaleti naɨ amʉlɨnga kɨna Yesʉ, ɨkakumʉsha mpola yakwe nkɨka yɨhi niya kʉng'wanso. Itɨ gwa, Antʉ akaaleta alwae ɨhi kʉng'wa Yesʉ, 36ɨkamʉlompa waalekele atonie ga ʉkunzɨlo nʉa matʉgalo akwe. Nawa ɨhi naɨ atonyilye ɨkakomya.
Currently Selected:
Matayo 14: IBV
Highlight
Share
Copy
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved
