ᔮᓱᐊᑉ ᐊᒡᓚᖏᑦ 1
1
ᒎᑎᐅᑉ ᔮᓱᐊᒥᒃ ᑎᓕᓯᓂᖓ ᓵᓚᖃᖁᓪᓗᒍ ᑬᓇᒥᐅᓂᒃ
1ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑐᖁᓂᖓᑕ ᑭᖑᓂᐊᒍᑦ, ᐊᑕᓂᖅ ᐅᖃᖅᐳᖅ ᒨᓯᓯᐅᑉ ᐃᑲᔪᖅᑎᖓᓄᑦ, ᔮᓱᐊᒧᑦ ᓈᓂᐅᑉ ᐃᕐᖕᓂᖓᓄᑦ. 2ᐅᖃᖅᓗᓂ, “ᐱᔨᒐ ᒨᓯᓯ ᑐᖁᖕᒪᑦ ᐊᑐᐃᓐᓇᐅᓕᕆᑦ, ᐃᓴᕆᐊᓕᒥᐅᓄᑦ ᔪᐊᕐᑕᓂᐅᑉ ᑰᖓ ᐃᑳᖅᓗᒍ ᓄᓇᒧᑦ ᑐᓂᓯᒪᔭᓐᓄᑦ ᑖᒃᑯᓄᖓ ᐃᓴᕆᐊᓕᒥᐅᓄᑦ. 3#ᒨᓯᓯ ᑕᓪᓕᒪᖏᑦ 11:24,25.ᒨᓯᓯ ᐊᖏᕐᕕᒋᓚᐅᕋᒃᑯ ᐃᒫᒃ, ᑐᓂᔪᒫᖅᐸᒃᑲ ᐃᓄᖁᑎᒃᑲ ᓄᓇᒥᒃ ᐱᓱᒃᕕᒋᔭᖏᓐᓂᒃ. 4ᓄᓇᖁᑎᓯ ᑭᒡᓕᖓ ᐃᓱᖃᕈᒫᖅᐳᖅ ᓕᐸᓇᓂᒥᑦ ᐃᓄᖃᔪᐃᑦᑐᒧᑦ ᑰᖕᒧᑦ ᑎᑭᓪᓗᒍ ᑍᔭᐅᔪᒧᑦ ᐃᕗᕅᑎᒧᑦ, ᕼᐃᑍᑎᐅᓪᓗ ᓄᓇᓕᒫᖓᓂᑦ ᐃᒪᕐᔪᐊᒧᑦ ᑎᑭᓪᓗᒍ. 5#ᒨᓯᓯ ᑕᓪᓕᒪᖏᑦ 31:6,8; ᐄᑉᕈᐃᓄᑦ 13:5.ᔮᓱᐊ ᑭᓇᒧᓪᓘᓐᓃᑦ ᓵᓚᐅᓂᐊᓐᖏᓚᑎᑦ ᐃᓅᑎᓪᓗᑎᑦ ᓇᔪᐃᓐᓇᕐᖕᓂᐊᖅᐸᒋᑦ ᑍᒫᑦᓮᓐᓇᖅ ᒨᓯᓯ ᓇᔪᓚᐅᕋᒃᑯ ᓇᔪᐃᓐᓇᕐᖕᓂᐊᖅᐸᒋᑦ ᕿᒪᖕᓂᐊᕐᖕᓇᒡᓗ. 6#ᒨᓯᓯ ᑕᓪᓕᒪᖏᑦ 31:6,7,23.ᓲᖑᓂᖃᓕᕆᑦ ᖁᓚᖏᓪᓗᑎᓪᓗ; ᓯᕗᓕᖅᑎᐅᓛᕋᕕᑦ ᐃᓄᖕᓄᑦ ᓄᓇᑖᓕᖅᑎᓪᓗᒋᑦ ᑕᒪᓐᓇ ᑍᒫᒃ ᓯᕗᓕᖏᓐᓄᑦ ᐊᖏᕈᑎᒋᓚᐅᕋᒃᑯ. 7ᓲᖑᓂᖃᓕᕆᑦ ᓯᕘᕋᖏᑦᓯᐊᖅᓗᑎᓪᓗ, ᓈᓚᑦᓯᐊᓪᓗᑎᑦ ᐱᖁᔭᓐᓂᒃ ᒨᓯᓯᐅᑉ ᐱᔨᒪ ᑐᓂᓚᐅᖅᑕᖏᓐᓂᒃ ᐃᓕᖕᓄᑦ, ᑕᓕᖅᐱᒧᓪᓘᓐᓃᑦ, ᓴᐅᒥᒧᓪᓘᓐᓃᑦ ᓴᖑᑦᑍᓕᒋᑦ ᐱᔪᓐᓇᑦᓯᐊᖁᓪᓗᑎᑦ ᓇᒧᓐᖓᕐᖕᓂᐊᕋᓗᐊᕈᕕᑦ. 8ᐅᑯᐊ ᐱᖁᔭᑦ ᖃᓂᒃᑯᑦ ᐅᖃᐅᓯᕆᔪᓐᓃᖅᑍᓕᒃᑭᑦ, ᐃᓱᒪᒃᓴᖅᓯᐅᕈᑎᒋᖃᑦᑕᒃᑭᑦ ᐅᓪᓗᑯᑦ ᐅᓐᓄᒃᑯᓪᓗ, ᓈᓚᑦᓯᐊᖅᓗᒋᓪᓗ ᑎᑎᕋᖅᓯᒪᓂᖏᑦ ᒪᓕᒡᓗᒋᑦ, ᑍᒤᒃᑯᕕᑦ ᐊᖅᑯᑎᒋᔭᕐᖕᓂ ᖃᓄᐃᓕᐅᖅᑕᓕᒫᕐᖕᓂᓗ ᐱᕙᓪᓕᐊᑎᑦᓯᖃᑦᑕᕐᖕᓂᐊᖅᐳᑎᑦ. 9ᐃᖅᑲᐅᒪᓂᐊᖅᐳᑎᑦ ᑎᓕᓚᐅᕋᒃᑭᑦ, ᓴᓐᖏᔫᓕᕆᑦ ᓴᐱᖏᓪᓗᑎᓪᓗ; ᑲᑉᐱᐊᓱᒃᑍᓕᒋᑦ, ᖁᓚᖏᓪᓗᑎᓪᓗ; ᐊᑕᓂᐅᑉ ᒎᑎᕕᑦ ᐃᓚᒋᓂᐊᖅᐹᑎᑦ ᓇᒧᓐᖓᕐᖕᓂᐊᕈᕕᓪᓘᓐᓃᑦ.”
ᔮᓱᐊᑉ ᑎᓕᓯᓂᖓ ᐃᓄᖕᓂᒃ
10ᑕᕝᕙ ᔮᓱᐊᑉ ᓯᕗᓕᖅᑏᑦ ᑎᓕᕔᑦ ᐅᖃᐅᑎᓪᓗᒋᑦ, 11“ᐃᓄᐃᑦ ᑕᖕᒫᖅᓯᒪᔪᑦ ᐅᖃᐅᑎᓯᐅᒃ, ‘ᓂᕿᓂᒃ ᐊᑐᐃᓐᓇᕈᐃᒋᑦᓯ, ᐅᓪᓗᐃᑦ ᐱᖓᓱᑦ ᓈᒃᐸᑕ ᐃᑳᕐᖕᓂᐊᕋᑦᓯ ᔪᐊᕐᑕᓂᐅᑉ ᑰᖓᒍᑦ ᓄᓇᓗ ᓄᓇᑖᕆᓗᒍ, ᐊᑕᓂᐅᑉ ᒎᑎᕕᑦ ᑐᓂᓯᒪᔭᖓ ᐃᓕᑦᓯᓐᓄᑦ.’” 12#ᒨᓯᓯ ᓯᑕᒪᖏᑦ 32:28-32; ᒨᓯᓯ ᑕᓪᓕᒪᖏᑦ 3:18-20; ᔮᓱᐊ 22:1-6.ᔮᓱᐊᑉ ᐅᖃᐅᑎᓚᐅᖅᐰᑦ ᐅᑯᐊ ᕉᐱᓂᐅᑉ ᒑᑎᐅᑉ ᑭᖑᕚᒋᑦ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ, 13“ᐃᖅᑲᐅᒪᒋᑦᓯ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᐅᖃᐅᓯᖏᓐᓂᒃ ᑎᓕᓯᓚᐅᕐᖕᒪᑦ ᐃᓕᑦᓯᓐᓂᒃ, ᐅᖃᖅᓗᓂ, ‘ᐊᑕᓂᐅᑉ ᒎᑎᕕᑦ ᑐᓂᕚᑎᑦ ᑕᕾᖅᓯᕐᕕᖕᒥᒃ, ᑕᒪᓐᓇᓗ ᓄᓇ ᑐᓂᕚ ᐃᓕᑦᓯᓐᓄᑦ.’ 14ᓄᓕᐊᓯ, ᕿᑐᕐᖓᓯ, ᐆᒪᔪᖁᑎᓯᓗ ᑕᒫᓃᓐᓂᐊᖅᐳᑦ ᒨᓯᓯᐅᑉ ᑐᓂᓚᐅᖅᑕᖓᓂ ᔪᐊᕐᑕᓂᐅᑉ ᐊᑭᐊᓂ, ᐅᓇᑕᖅᑐᒃᓴᖁᑎᓯᓕ ᐅᓇᑕᐅᑎᒥᓂᒃ ᐊᑎᓂᐊᖅᐳᑦ, ᐃᑳᖅᓗᑎᒡᓗ ᓯᕗᓪᓕᐅᓗᑎᒃ ᐃᓴᕆᐊᓕᒥᐅᖑᖃᑎᒥᖕᓂᒃ ᐃᑲᔪᕆᐊᖅᓗᑎᒃ. 15ᓄᓇᖃᓕᖅᐸᑕ ᑭᓯᐊᓂ ᔪᐊᕐᑕᓂᐅᑉ ᓯᕿᓂᖓᑕ ᓄᐃᕕᐊᑕ ᓇᓛᓂ ᒎᑎᐅᑉ ᑐᓂᓚᐅᖅᑕᖓᓂᒃ ᑖᒃᑯᓄᖓ ᐃᓕᑦᓯᓐᓄᓪᓗ; ᓄᓇᑖᕈᒫᕆᕗᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᑖᒃᑯᓄᖓ, ᑕᕝᕙ ᐅᑎᕈᒫᖅᐳᓯ ᓄᓇᖁᑎᑦᓯᓐᓄᑦ ᓄᓇᑖᕆᓗᒍᓗ ᓄᓇ ᑕᒪᓐᓇ ᒨᓯᓯᐅᑉ ᐊᑕᓂᐅᑉ ᐱᔨᖓᑕ ᑐᓂᓚᐅᖅᑕᖓ ᔪᐊᕐᑕᓂᒥᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ.”
16ᑖᒃᑯᐊ ᑭᐅᕗᑦ ᔮᓱᐊᒧᑦ, “ᑎᓕᓯᑦᔪᑎᓕᒫᕐᖕᓂᒃ ᐊᑐᕐᖕᓂᐊᖅᐳᒍᑦ ᓇᒧᑐᐃᓐᓇᕐᓗ ᑎᓕᓯᓂᐊᕈᕕᑦ ᐂᓂᐊᖅᐳᒍᑦ. 17ᑍᒫᑦᓮᓐᓇᖅ ᒨᓯᓯ ᓈᓚᓚᐅᕋᑦᑎᒍᑦ ᓱᓇᓕᒫᓄᑦ, ᑍᒫᒃᑕᐅᖅ ᐃᓕᖕᓂᒃ ᓈᓚᖕᓂᐊᕆᕗᒍᑦ ᐊᑕᓂᐅᑉ ᒎᑎᕕᑦ ᐃᓚᒋᓕᑎᑦ, ᑍᒫᑦᓮᓐᓇᖅ ᒨᓯᓯ ᐃᓚᒋᓚᐅᕐᖕᒪᒍ. 18ᓇᓪᓕᐊᑦ ᐃᓕᖕᓂᒃ ᐊᑭᕋᖅᑐᖅᑐᑦ ᓈᓚᖏᑦᑐᓪᓘᓐᓃᑦ ᐅᖃᐅᓯᕐᖕᓂᒃ ᑎᓕᓯᑎᓪᓗᑎᑦ, ᑖᓐᓇ ᑐᖁᑕᒃᓴᐅᕗᖅ. ᓲᖑᓂᖃᖅᓯᐊᕆᑦ ᓴᐱᖏᓪᓗᑎᓪᓗ.”
Currently Selected:
ᔮᓱᐊᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.