ᓴᑲᕅᐊᐅᑉ ᐊᒡᓚᖏᑦ 7
7
ᐊᑕᓂᐅᑉ ᐱᐅᒋᓐᖏᓔᑦ ᓂᕆᑦᑍᓕᓐᖑᐊᑐᐃᓐᓇᕐᑐᑦ
1ᐊᕐᕌᒍᑦ ᓯᑕᒪᒋᓕᕐᑕᖓᓐᓂ ᑍᕉᓯᐅᑉ ᐊᖓᔪᖅᑳᕐᔪᐊᖑᓂᖓᓂ, ᐊᑕᓂᐅᑉ ᐅᖃᐅᓯᖓᓄᑦ ᓴᑲᕅᐊ ᑎᑭᑕᐅᕗᖅ, ᐅᓪᓗᐃᑦ ᓯᑕᒪᖓᓐᓂ ᑕᖅᑮᑦ 9ᒋᓕᕐᑕᖓᓐᓂ, ᑕᖅᑭᖅ ᐊᑎᖃᓚᐅᕐᑐᖅ ᑭᔅᓕᕕᒥᒃ.
2ᐃᓄᐃᑦ ᐱᑎᓕᒥᐅᑦ ᑎᓕᓯᓚᐅᕐᑎᓪᓗᒋᑦ ᓴᕆᔨᕆᒥᒃ ᕌᒋᒻ-ᒥᓕᑭᒥᒡᓗ, ᐃᓄᖁᑎᖏᓐᓂᒡᓗ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓄᑦ ᑐᒃᓯᐅᑦᔭᐅᔭᕐᑐᖁᔨᓪᓗᑎᒃ. 3ᑐᓂᕐᕈᓯᕐᑎᑦᓯᔨᓂᒃ ᒎᑎᐅᓪᓗ ᐅᖃᕐᑎᖏᓐᓂᒃ ᐊᐱᕆᔭᕐᑐᓚᐅᕐᒪᑕ ᐊᑕᓂᐅᑉ ᐊᔪᒐᖃᖏᑦᑑᑉ ᑐᒃᓯᐊᕐᕕᒡᔪᐊᖓ ᐱᓪᓗᒍ ᐅᖃᕐᓗᑎᒃ, “ᑕᖅᑮᑦ ᑕᓪᓕᒪᖓᓐᓂ ᓱᓕ ᕿᒃᓵᒍᑎᖃᕆᐊᖃᕐᐱᑖ ᓂᕆᑦᑍᓕᓗᑕᓗ, ᑍᒫᒃ ᐱᕙᒃᑲᑦᑕ ᑍᒪᓐᖓᓂᐊᓗᒃ?”
4ᐃᒫᒃ ᐊᑕᓂᐅᑉ ᐊᔪᒐᖃᖏᑦᑑᑉ ᐅᖃᐅᓯᖓᑕ ᑎᑭᑉᐹᖓ: 5“ᐃᓄᐃᑦ ᑕᒫᓂ ᓄᓇᖃᕐᑐᓕᒫᑦ ᑐᓂᕐᕈᓯᕐᑎᑦᓯᔩᓪᓗ ᐊᐱᕆᒃᑭᑦ, ‘ᓂᕆᑦᑍᓕᔭᕌᖓᑦᓯ ᕿᒃᓵᒡᓗᓯᓗ ᑕᖅᑮᑦ ᑕᓪᓕᒪᖓᓐᓂ ᑕᖅᑮᓪᓗ 7ᖓᓂ ᐊᕐᕌᒍᓂᒃ 70ᓂᒃ, ᑍᒤᓕᐅᕐᐸᓚᐅᕐᐱᓰ ᐅᕙᓐᓂᒃ ᐱᑦᔪᑎᖃᕐᓗᓯ? 6ᓂᕆᓕᕌᖓᑦᓯ ᐃᒥᕐᓗᓯᓗ, ᓂᕆᔪᒪᓂᑐᐃᓐᓇᕐᒧᑦ ᓂᕆᕕᒡᔪᐊᕐᐸᓐᖏᓚᓰ?’”
7ᐊᑕᓂᖅ ᑍᒫᒃ ᐅᖃᖃᑦᑕᓚᐅᕐᐳᖅ ᐅᖃᕐᑎᒥᒍᑦ ᓯᕗᓪᓕᕐᑎᒍᑦ ᔨᕉᓴᓕᒻᒥᐅᑦ ᖃᓂᒋᔭᖏᓐᓃᑦᑐᓪᓗ ᓮᒻᒪᖃᑎᒌᑦᓯᐊᕐᑎᓪᓗᒋᑦ ᐊᔪᕐᓴᖏᑦᓯᐊᕐᑎᓪᓗᒋᓪᓗ, ᓂᕆᕕᒃ ᐃᓄᖃᕐᑎᓪᓗᒍ ᓯᕿᓂᐅᓪᓗ ᓂᐱᕕᐊᑕ ᓇᓛᓃᑦᑐᑦ ᐱᖑᐃᑦ ᐊᑖᓂ ᓄᓇᓕᖃᕐᑎᓪᓗᒋᑦ.
ᓈᓚᖏᓐᓂᖅ ᒎᑎᒥᒃ ᓄᓇᐅᑉ ᐊᓯᐊᓄᑦ ᐊᐅᓪᓚᕐᓯᒪᑦᔪᑕᐅᓚᐅᕐᐳᖅ
8ᐊᒻᒪ ᓱᓕ ᐊᑕᓂᐅᑉ ᐅᖃᐅᓯᖓ ᓴᑲᕅᐊᒧᑦ ᑎᑭᒃᑭᕗᖅ, ᐅᖃᕐᓗᓂ, 9“ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: ᓱᓕᑦᓯᐊᕐᑐᒥᒃ ᐃᖅᑲᕐᑐᐃᒋᑦᓯ; ᐱᑦᓯᐊᖃᑦᑕᐅᑎᓗᓯ ᓇᒡᓕᒋᖃᑦᑕᐅᑎᓗᓯᓗ ᐃᓕᑦᓯᓐᓄᑦ. 10ᐅᐃᒡᒐᕐᓃᑦ ᓇᒡᓕᒃᓵᕐᑎᑦᑍᓕᓗᒋᑦ ᐃᓕᐊᕐᔪᐃᓪᓗ, ᓄᓇᖃᑎᑐᖃᕆᓐᖏᑕᓯᓗ ᐊᒃᓗᔪᓪᓘᓐᓃᑦ; ᐱᐅᖏᑦᑐᒥᒃ ᐃᓅᖃᑎᑦᓯᓐᓄᑦ ᐃᔨᕐᓯᒪᔪᒥᒃ ᐃᓱᒪᖃᕐᓂᐊᕋᓯ.”
11ᐃᓄᖁᑎᒃᑲᓕ ᓈᓚᒍᒪᓚᐅᓐᖏᓚᑦ; ᐅᕙᓐᓂᒡᓗ ᑐᓄᑦᓯᕗᑦ ᓯᐅᑎᑎᒃ ᒪᑐᓪᓗᒋᑦ. 12ᐆᒻᒪᑎᑎᒃ ᐅᔭᕋᒃᑎᑐᑦ ᓯᑎᔪᕈᕐᑎᑉᐰᑦ, ᐱᖁᔭᓐᓂᒃ ᓈᓚᒍᒪᖏᓐᓂᕐᒧᑦ ᐊᑕᓂᐅᑉ ᐊᔪᒐᖃᖏᑦᑑᑉ ᐅᖃᐅᓯᖏᓐᓂᒃ ᓈᓚᒍᒪᖏᓐᓂᕐᒧᑦ ᐅᖃᐅᓯᕆᓯᒪᔭᖏᓐᓂᒃ ᐱᔪᖃᓛᕐᑐᒥᒃ ᐅᖃᕐᑎᒥᒍᑦ ᓯᕗᓕᕕᓂᑦᑎᒍᑦ ᐊᓂᕐᓂᕐᒥᒍᑦ. ᑍᒤᒻᒪᑦ ᐊᑕᓂᖅ ᐊᖏᔪᒥᒃ ᓂᓐᖓᓚᐅᕐᐳᖅ. 13ᐊᑕᓂᖅ ᐊᔪᒐᖃᖏᑦᑐᖅ ᐅᖃᕐᐳᖅ, “ᓂᓪᓕᐊᒐᒪ ᓈᓚᒍᒪᓚᐅᖏᓚᑦ, ᑍᒤᒻᒪᑦ ᓂᓪᓕᐊᒐᓗᐊᕐᒪᑕ ᐅᕙᓐᓄᑦ ᓈᓚᒍᒪᓚᐅᓐᖏᓚᒃᑲ. 14ᐅᓚᔪᔭᕐᒧᑦ ᓯᐊᒻᒪᕐᑎᓚᐅᕐᐸᒃᑲ ᐃᓅᖃᑎᒌᒡᔪᐊᓄᑦ ᐊᑦᔨᒌᖏᑦᑐᓄᑦ, ᑕᑯᓕᒪᓇᖏᑦᑑᓪᓗᑎᒃ ᓄᓇᒋᓐᖏᑕᒥᖕᓂ ᓄᓇᖃᖃᑕᐅᓕᓚᐅᕐᐳᑦ. ᓄᓇ ᕿᒪᒃᑕᖓᑦ ᑐᓐᖓᓇᕈᓐᓁᓚᐅᕐᒪᑦ, ᑕᒪᓐᓇ ᓄᓇᑦᓯᐊᕙᒃ ᓄᓇᒋᔭᐅᔪᓐᓁᓚᐅᕐᐳᖅ ᐃᓄᖃᕈᓐᓁᕐᓗᓂ.”
Currently Selected:
ᓴᑲᕅᐊᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
