ᓴᑲᕅᐊᐅᑉ ᐊᒡᓚᖏᑦ 14
14
ᔨᕉᓴᓕᒥᐅᑦ ᐊᓯᖏᓪᓗ ᐃᓅᖃᑎᒌᒡᔪᐊᑦ
1ᐊᑕᓂᐅᑉ ᐅᓪᓗᖓ ᓇᓪᓕᐅᑎᔪᒫᕐᐳᖅ, ᐅᓇᑕᕐᓂᕐᒧᑦ ᓵᓚᖃᓚᐅᕐᓗᓯ ᐱᖁᑎᑦ ᐱᔭᐅᔪᑦ ᐃᓕᑦᓯᓐᓄᑦ ᐊᒡᒍᕐᑕᐅᔪᒫᕐᒪᑕ. 2ᐃᓅᖃᑎᒌᒡᔪᐊᑦ ᑲᑎᑎᑦᓱᒫᕐᐸᒃᑲ ᐅᓇᑕᕆᐊᕐᑐᖁᓗᒋᑦ ᔨᕉᓴᓕᒥᒃ; ᓄᓇᓖᑦ ᓵᓚᒋᔭᐅᔪᒫᕐᐳᑦ, ᐃᒡᓗᐃᑦ ᐱᖁᑎᖏᑦ ᓱᕋᑦᑎᔭᐅᓗᑎᒃ ᑎᒡᓕᒐᕐᕕᐅᓗᑎᒡᓗ, ᐊᕐᓁᓪᓗ ᖁᓄᔪᕐᓂᐊᕐᑕᐅᓗᑎᒃ. ᓄᓇᓖᑦ ᐊᕝᕙᓪᓗᐊᖏᑦ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ, ᐃᓚᖏᓪᓕ ᐊᒥᐊᒃᑯᑦ ᐃᒡᓗᒐᓴᒡᔪᐊᕐᓃᖏᓐᓇᕈᒫᕐᐳᑦ. 3ᐊᑕᓂᐅᓪᓕ ᐃᓅᖃᑎᒌᒡᔪᐊᑦ ᐅᓇᑕᕆᐊᕐᑐᕐᓯᒪᔪᑦ ᐅᓇᑕᕐᕕᒋᓕᕈᒫᕐᐰᑦ, ᐅᓇᑕᕐᓂᕐᒥ ᐅᓇᑕᐅᑦᔨᖃᑦᑕᕐᓯᒪᒐᒥ. 4ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᓇᖏᕈᒫᕐᐳᖅ ᐃᑎᒐᖏᑦ ᑐᖕᒪᕐᓗᑎᒃ ᖃᖅᑲᒥ ᐅᕐᓱᒃᓴᓕᖕᓂᒃ ᓇᐹᕐᑐᓕᖕᒥ, ᔨᕉᓴᓕᒥᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥ, ᖃᖅᑲᖅ ᐅᕐᓱᒃᓴᓕᖕᓂᒃ ᓇᐹᕐᑐᓕᒃ ᐊᕕᒍᒫᕐᐳᖅ ᒪᕐᕉᓕᓗᓂ ᓯᕿᓂᐅᑉ ᓄᐃᕕᐊᑕ ᓇᓛᓂᑦ, ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᓇᕐᓴᕐᔪᐊᖃᓕᕐᓗᓂ ᐊᑯᓐᓂᖓᓂ, ᖃᖅᑲᐅᑉ ᐊᕝᕙᖓ ᐅᓐᓄᐊᑉ ᓇᓛᓄᑦ ᐃᖏᕐᕋᓯᔪᒫᕐᐳᖅ, ᐊᕝᕙᖓᓗ ᓯᕿᓂᐅᑉ ᓇᓛᓄᑦ ᐃᖏᕐᕋᓯᓗᓂ. 5ᐃᓕᑦᓯᓗ ᕿᒫᔪᒫᕐᐳᓯ ᖃᖅᑲᐅᑉ ᓇᕐᓴᕐᔪᐊᖓᒍᑦ, ᓇᕐᓴᔪᐊᖅ ᑎᑭᓯᒪᔪᒫᕐᒪᑦ ᐊᔨᐅᓪᒧᑦ: ᕿᒫᔪᒫᕐᐳᓯ ᕿᒫᓚᐅᕋᑦᓯᑐᑦ ᓄᓇ ᓴᔪᒃᐱᓗᒃᑎᓪᓗᒍ ᐊᖓᔪᖅᑳᕐᔪᐊᖅ ᐅᓮᐊ ᔫᑕᒥ ᐊᖓᔪᖅᑳᕐᔪᐊᖑᑎᓪᓗᒍ. ᐊᑕᓂᖅ ᑕᕝᕙ ᒎᑎᒐ ᑎᑭᑦᓱᒫᕐᐳᖅ, ᐃᑦᔪᕐᓁᑦᑐᖁᑎᓂ ᐃᓚᒋᓗᒋᑦ.
6ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᖃᐅᒪᔪᖃᕈᒫᓐᖏᓚᖅ, ᑖᕐᑐᖃᕈᒫᕋᓂᓗ. 7ᐅᓪᓗᖅ ᑍᓐᓇ ᐊᑦᔨᐅᔪᒫᖏᒻᒪᑦ, ᐊᑕᓂᐅᑉ ᖃᐅᔨᒪᔪᒫᕐᐹ, ᑕᒪᓐᓇ ᓇᓪᓕᐅᑎᒃᐸᑦ ᐅᓪᓗᑐᑦ ᖃᐅᒪᓂᖃᕈᒫᓐᖏᓚᖅ ᐅᓐᓄᐊᑐᓪᓗ ᑖᕐᓂᖃᕈᒫᕋᓂ. ᑕᒪᓐᓇ ᓇᓪᓕᐅᑎᒃᐸᑦ ᐅᓐᓄᒃᐸᑦ ᖃᐅᒪᔪᒫᕆᕗᖅ.
8 #
ᐃᓯᑭᐊᓕ 47:1; ᔪᐊᓇᓯ 7:38; ᑕᑯᑎ 22:1. ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᒥᖅ ᐃᓅᓯᖃᕐᓇᕐᑐᒥᒃ ᐃᒪᓕᒃ, ᔨᕉᓴᓕᒥᑦ ᑰᓕᕈᒫᕐᐳᖅ, ᐊᕝᕙᖓ ᑰᒡᓗᓂ ᐃᒪᕐᔪᐊᕐᒧᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦᑐᒧᑦ, ᐊᕝᕙᖓᓗ ᑰᒡᓗᓂ ᐃᒪᕐᔪᐊᕐᒧᑦ ᐃᑎᕕᐊᓃᑦᑐᒧᑦ, ᑰᒍᒫᕐᐳᖅ ᐊᐅᔭᒃᑯᑦ ᐅᑭᐅᒥᓗ. 9ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᖅ ᐊᖓᔪᖅᑳᕐᔪᐊᖑᔪᒫᕐᐳᖅ ᓄᓇᕐᔪᐊᓕᒫᒧᑦ: ᑍᑦᓱᒪᓂᓗ ᐊᑕᓂᖃᕈᒫᕐᐳᖅ ᐊᑕᐅᓯᕐᒥᒃ, ᐊᑎᖓᓗ ᐃᑦᔪᕐᓁᑦᑑᓗᓂ.
10ᓄᓇᓕᒫᖅ, ᒋᐸᒥᑦ ᕆᒪᓐ ᑎᑭᓪᓗᒍ, ᔨᕉᓴᓕᒥᑦ ᓯᕿᓂᐅᑉ ᓇᓛᓂᑦᑐᒧᑦ, ᑕᒪᓐᓇ ᓄᓇ ᒪᓂᕋᐅᓕᕈᒫᕐᐳᖅ. ᔨᕉᓴᓕᓕ ᐳᕐᑐᓯᒃᑲᓐᓂᕈᒫᕐᐳᖅ, ᐃᓂᒥᓃᓪᓗᓂ ᓱᓕ, ᐱᓐᔭᒥᓂᐅᑉ ᑭᖑᕚᖏᑕ ᐃᑎᕐᑕᕐᕕᖓᓂᑦ, ᐃᑎᕐᑕᕐᕕᒃ ᓯᕗᓪᓕᕐᐹᒥᒃ ᑍᔭᐅᔪᖅ ᑎᑭᓪᓗᒍ, ᖃᐅᔨᓴᕐᕕᖕᒥᑦ ᓇᐸᔪᒥᑦ ᕼᐊᓇᓂᐅᓪᒥᑦ ᐱᒋᐊᕐᓗᒍ ᐊᖓᔪᖅᑳᕐᔪᐊᑉ ᕔᓂᒃᓴᓕᐅᕐᕕᖓ ᑎᑭᓪᓗᒍ. 11#ᑕᑯᑎ 22:3.ᑕᒪᓐᓇ ᐃᓄᖏᓐᓂᒃ ᐃᓄᖃᕈᒫᕐᐳᖅ, ᓱᕋᑦᑎᔭᐅᒃᑲᓐᓂᕐᓂᐊᕈᓐᓁᕐᓗᓂ; ᔨᕉᓴᓕᒥ ᑲᑉᐱᐊᓇᕐᑐᖃᒃᑲᓐᓂᕈᒫᓐᖏᓚᖅ.
12ᑕᕝᕙ ᔨᕉᓴᓕᒥᒃ ᐊᑭᕋᕐᑐᕋᓱᒃᑐᑦ ᓄᓇᐅᑉ ᐊᓯᖏᓐᓂᑦ ᐱᓯᒪᔪᑦ ᐊᑕᓂᐅᑉ ᐃᒫᒃ ᐋᓐᓂᐊᓇᕐᑐᖃᕐᑎᑦᓱᒫᕐᐰᑦ; ᐅᕕᓂᖏᑦ ᓄᖑᔪᒫᕐᐳᑦ ᓂᑯᕕᖓᑎᓪᓗᒋᑦ ᓱᓕ, ᐃᔨᖏᓪᓗ ᓄᖑᔪᒫᕐᐳᑦ ᐃᔨᓕᕐᕕᖏᓐᓂᑦ, ᐅᖃᖏᓪᓗ ᓄᖑᓪᓗᑎᒃ ᖃᓂᖏᓐᓂᑦ.
13ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᐅᑉ ᐃᓄᐃᑦ ᐊᖏᔪᒥᒃ ᐅᐃᒪᔮᕐᑎᑦᓱᒫᕐᐰᑦ; ᐃᓅᖃᑎᒥᖕᓂᒃ ᐊᒡᒐᖏᑎᒍᑦ ᑎᒍᓯᓗᑎᒃ, ᑐᖁᕋᐅᑎᓇᓱᐊᕈᒫᕐᐳᑦ. 14ᔫᑕᒥᓗ ᓄᓇᖃᕐᑐᑦ ᔨᕉᓴᓕᒥᐅᓂᒃ ᑕᐱᖃᕈᒫᕐᐳᑦ ᐅᓇᑕᖃᑎᒌᒡᓗᑎᒃ; ᐃᓅᖃᑎᒌᒡᔪᐊᑦ ᔨᕉᓴᓕᐅᑉ ᓯᓚᑖᓃᑦᑐᑦ ᐊᔪᕐᓴᖏᑦᔪᑎᖏᑦ ᐃᒤᑦᑐᑦ ᑲᑎᕐᓱᕐᑕᐅᔪᒫᕐᐳᑦ; ᒎᓗᑦ ᓯᐅᓪᕕᕆᓪᓗ ᐊᖏᔪᐊᓗᐃᑦ, ᐊᓐᓄᕌᓪᓗ ᐅᓄᕐᑐᐊᓗᐃᑦ.
15ᐊᑦᔨᐸᓗᐊᓂᒃᑕᐅᖅ ᕿᒻᒥᕐᔪᐊᑦ, ᓯᐅᑎᖅᑯᕐᑐᔪᓪᓗ ᕿᒻᒥᕐᔪᐊᓪᓗ ᕿᑐᕐᖓᖏᑦ ᐱᔭᐅᔪᒫᕆᕗᑦ, ᑳᒥᓖᓪᓗ ᓯᐅᑎᖁᕐᑐᔪᓪᓗ, ᓄᓇᓕᖕᓂᓗ ᐆᒪᔪᖁᑎᒋᔭᐅᔪᓕᒫᑦ.
16 #
ᒨᓯᓯ ᐱᖓᔪᖏᑦ 23:39-43. ᔨᕉᓴᓕᒥᒡᓕ ᐅᓇᑕᕋᓱᐊᓚᐅᕐᑐᑦ ᐃᓅᖃᑎᒌᒡᔪᐊᓂᑦ ᐊᒥᐊᒃᑯᖏᑦ, ᐊᕐᕌᒍᑕᒫᑦ ᔨᕉᓴᓕᒧᑦ ᒪᔪᐊᖃᑦᑕᕈᒫᕐᐳᑦ ᐊᖓᔪᖅᑳᕐᔪᐊᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑐᒃᓯᐊᕐᕕᒋᔭᕐᑐᕐᓗᒍ, ᓇᓪᓕᐅᓐᓂᕐᓯᐅᕆᐊᕐᑐᕐᓗᑎᒃ ᓇᓪᓕᐅᓂᕐᒥᒃ ᑐᐱᕐᓯᒪᕕᖕᒥᒃ. 17ᐃᓄᐃᑦ ᓄᓇᒦᑦᑐᑦ ᓇᓪᓕᐊᑐᐃᓐᓇᖅ ᔨᕉᓴᓕᒨᖏᑉᐸᑕ ᐊᖓᔪᖅᑳᕐᔪᐊᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑐᒃᓯᐊᕐᕕᒋᔭᕐᑐᕐᓗᒍ, ᕾᖏᑦᑐᑦ ᓯᓚᓗᒡᕕᐅᖃᑦᑕᕈᒫᓐᖏᓚᑦ. 18ᐄᑦᔨᑉᑎᒥᐅᑦ ᓇᓪᓕᐅᓐᓂᕐᓯᐅᕆᐊᑐᖏᑉᐸᑕ, ᑖᒃᑯᐊ ᓯᓚᓗᒡᕕᐅᓂᐊᓐᖏᓚᑦ. ᐊᑕᓂᐅᑉ ᐋᓐᓂᐊᓇᕐᑐᒥᒃ ᑎᑭᕝᕕᐅᑎᑦᓱᒫᐰᑦ ᐃᓅᖃᑎᒌᒡᔪᐊᑦ ᓇᓪᓕᐅᓐᓂᕐᓯᐅᕆᐊᖏᑦᑐᑦ ᓇᓪᓕᐅᓐᓂᕐᒥᒃ ᑐᐱᕐᓯᒪᕕᖕᒥᒃ ᐋᓐᓂᐊᕐᑎᑕᐅᑦᔪᓯᖏᑎᑐᑦ. 19ᑕᒪᓐᓇ ᓱᒋᐊᕐᑕᐅᓂᐅᔪᒫᕐᐳᖅ ᐄᑦᔨᑉᑎᒥᐅᓄᑦ ᐃᓅᖃᑎᒌᒡᔪᐊᓄᓪᓗ ᐊᓯᖏᓐᓄᑦ ᓇᓪᓕᐅᓐᓂᕐᒥ ᑐᐱᕐᓯᒪᕕᖕᒥᒃ ᓇᓪᓕᐅᓐᓂᕐᓯᐅᕆᐊᖏᑦᑐᓄᑦ.
20ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᒻᒥᕐᔪᐊᑦ ᓯᕙᓂᐅᑎᖏᓐᓂ ᑎᑎᕋᕐᓯᒪᔪᒫᕐᐳᑦ ᐃᒫᒃ, “ᐊᑕᓂᖅ ᐃᑦᔪᕐᓁᐳᖅ.” ᓂᕿᓕᐅᕈᑎᓕᒫᓪᓗ ᐊᑕᓂᐅᑉ ᐃᒡᓗᖓᓃᑐᑦ ᐅᐊᓴᕐᕖᑦ ᑐᓂᕐᕈᓯᕐᕕᐅᑉ ᓵᖓᓃᑦᑐᑦ ᐃᑦᔪᕐᓁᖃᑕᐅᔪᒫᕐᐳᑦ. 21ᖃᑦᑍᑦ ᓂᕿᓕᐅᕈᑎᓕᒫᑦ ᔨᕉᓴᓕᒥ ᔫᑕᒥᓗ ᐃᑦᔪᕐᓁᑦᑑᔪᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓄᑦ, ᑐᓂᕐᕈᓯᕆᐊᕐᑐᕐᑐᓕᒫᑦ ᖃᑦᑕᕐᓂᑦ ᑖᒃᑯᓇᓂ ᓂᕿᓕᐅᕈᒫᕐᐳᑦ, ᐅᓪᓗᓂ ᑍᒃᑯᓇᓂ ᓂᐅᕕᕋᓱᐊᕐᑐᖃᕈᓐᓁᕈᒫᕐᐳᖅ ᐊᑕᓂᐅᑉ ᐃᒡᓗᖓᓂ.
Currently Selected:
ᓴᑲᕅᐊᐅᑉ ᐊᒡᓚᖏᑦ 14: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
