ᓲᓗᒨᓂᐅᑉ ᐃᓐᖏᕈᓯᖏᑦ 8
8
1ᑕᕝᕙᑐᖅ ᐊᓂᑦᑐᑦ ᑍᒤᓪᓚᒋᑦ,
ᐊᓈᓇᒪ ᐃᕕᐊᖏᖏᖕᓂᑦ ᐊᒫᒫᒃᑐᕕᓂᕐᑎᑐᑦ!
ᓯᓚᒥ ᑕᑯᒍᒃᑭᑦ ᑯᓂᒃᓴᑐᐃᓐᓇᖃᑕᕋᔭᕋᒃᑭᑦ, ᑭᓇᒥᒃ ᑲᓐᖑᓱᖏᓪᓗᖓ.
2ᑕᕝᕙ ᑕᓯᐅᕋᔭᕐᐸᒋᑦ ᐊᓈᓇᒪ ᐃᒡᓗᖓᓄᑦ,
ᑖᑦᓱᒪ ᐃᓕᓐᓂᐊᕐᑎᓚᐅᕐᒪᖓ.
ᑕᕝᕙ ᐃᒥᕐᑎᒐᔭᕐᐸᒋᑦ ᕔᓂᒥᒃ ᐃᓚᐅᕈᓯᕐᓯᒪᔪᒥᒃ,
ᐸᐅᕐᖎᓪᓗ ᐹᒪᒍᕌᓂᖁᑎᒪ ᐃᑦᑎᖓᓂᒃ.
3ᑕᓕᖓ ᓴᐅᒥᖓ ᓂᐊᖁᕐᒪ ᐊᑖᓂᑉᐳᖅ,
ᑕᓕᕐᐱᖕᒥᓄᓪᓗ ᐃᕿᒻᒥᕚᖓ.
4ᐱᖁᕙᑦᓯ, ᔨᕉᓴᓕᒥᐅᑦ ᐸᓂᖏᑦ,
ᕿᑦᓯᓵᕇᓂᐊᕋᓯ, ᑐᐸᒃᑎᑦᓯᓂᐊᕋᓯᓗ ᓇᒡᓕᒃᑎᒌᖕᓂᕐᒥᒃ
ᐱᔭᕇᖏᓐᓂᖓᓂ.
ᐃᓐᖏᕈᓰᑦ ᐱᖓᓲᔪᕐᑐᖓᑦ
ᐊᕐᓁᑦ
5ᑭᓇᐅᓇ ᐃᓄᖃᖏᑦᑐᒥᑦ ᕾᔪᖅ?
ᓇᒡᓕᒋᔭᒥᓂᒃ ᐃᕿᒻᒥᓪᓗᓂ.
ᐊᕐᓇᖅ
ᑐᐹᓚᐅᕐᐸᒋᑦ ᓇᐹᕐᑑᑉ ᐋᐳᓂᒃ ᐸᐅᕐᖓᓕᐅᑉ ᐊᑖᓂ.
ᑍᑲᓂ ᐊᓈᓇᕕᑦ ᓇᑦᔨᐊᕆᓕᕐᑕᕕᓂᕆᕚᑎᑦ,
ᑍᑲᓂᓗ ᐃᕐᓂᐊᕆᔭᕕᓂᕆᕚᑎᑦ.
6ᐆᒻᒪᑎᖕᓄᑦ ᓇᕿᑦᔪᑎᑐᑦ ᐅᒃᑯᐃᕐᑕᐅᑦᔧᒃᑯᑎᑐᑦ ᑍᒤᓚᐅᓐᖓ,
ᑕᓕᕐᓄᓪᓗ ᐊᓯᓐᓂᒃ ᐃᕿᑦᓯᑦᑍᓕᑦᔪᑎᑐᑦ;
ᓇᒡᓕᖕᓂᖅ ᑐᖁᒧᑦ ᐃᓕᖓᔫᔮᕐᒪᑦ,
ᓯᖕᓇᓂᕐᑐᓪᓗ ᐃᓗᕕᐅᑉ ᑲᑉᐱᐊᓇᕐᓂᖓᑐᑦ ᑍᒤᑦᑐᑐᑦ;
ᐃᑯᒪᖓ ᐃᑯᐊᓚᕗᖅ ᐃᑯᒪᕐᔪᐊᑐᑦ.
7ᐃᒪᕐᔪᐃᑦ ᐅᓄᕐᑐᑦ ᓇᒡᓕᖕᓂᖅ ᖃᒥᑦᓱᓐᓇᖏᓛᑦ,
ᓄᓇᐅᓪᓘᓐᓃᑦ ᖄᒥᓐᓂᖓᑕ ᐃᐱᑎᑦᓱᓇᖏᓐᓂᕚᑦ.
ᐊᖑᑦ ᐃᒡᓗᒥ ᐱᖁᑎᖏᓐᓂᒃ ᑐᓂᓯᒐᓗᐊᕐᐸᑦ ᓇᒡᓕᖕᓂᖅ ᐱᑦᔪᑎᒋᓗᒍ,
ᑕᒪᓐᓇ ᐊᑐᕋᔭᖏᑦᓯᐊᕐᐳᖅ.
ᐊᕐᓇᐅᑉ ᐊᓂᖏᑦ
8ᓇᔭᑯᓗᖃᕐᐳᒍᑦ, ᓱᓕ ᐃᕕᐊᖏᖏᒃ ᐱᕈᕐᓯᒪᖏᑦᑑᒃ.
ᖃᓄᕐᓕ ᐱᓛᓕᕐᐱᑖ ᓇᔭᑯᓗᑦᑎᓐᓂᒃ,
ᐅᓪᓗᒥ ᑍᑦᓱᒪᓂ ᐱᔪᒪᔭᐅᓕᕐᐸᑦ?
9ᐃᒡᓘᑉ ᐊᕙᓗᒋᒃᐸᒍ, ᖄᖓᒍᑦ ᓴᓇᕕᒋᒐᔭᕐᐸᕗᑦ ᓇᐸᔪᓂᒃ ᓯᐅᓪᕕᕆᓂᒃ.
ᐅᒃᑯᐊᖑᒃᐸᓪᓗ ᓯᓚᑎᓕᕋᔭᕐᐸᕗᑦ
ᕿᔪᖕᒥᒃ ᓰᑕᕆᒥᒃ ᐊᑎᓕᖕᒥᒃ.
ᐊᕐᓇᖅ
10ᐃᒡᓘᑉ ᐊᕙᓗᒋᕚᖓ, ᐃᕕᐊᖐᒃᑲᒃ ᓇᐸᔪᑎᑐᑦ ᖃᐅᔨᓴᕐᕕᒃᑎᑐᑦ ᑍᒤᑉᐳᒃ;
ᑖᑦᓱᒪ ᐃᔨᖏᖕᓂ ᓈᒻᒪᒃᓯᑎᑦᓯᔪᓐᓇᕐᑐᑐᑦ ᑍᒤᑉᐳᖓ.
ᐊᖑᑎ
11ᓲᓗᒨᓂ ᕔᓂᒃᓴᓕᐅᕐᕕᖕᒥᒃ ᐱᕈᕐᓰᕕᖁᑎᖃᓚᐅᕐᐳᖅ
ᓄᓇᒥ ᐰᓕ-ᕼᐋᒪᓂᒥ;
ᐱᕈᕐᓰᕕᖁᑎᓂᓗ ᑲᒪᔨᓄᑦ ᐊᑐᕐᑕᐅᑎᓚᐅᕐᐹ;
ᐊᑭᓕᕐᓱᐃᑎᓚᐅᕐᐰᓪᓗ ᑮᓇᐅᔭᓂᒃ 1,000ᓂᒃ ᓯᐅᓪᕕᕆᓂᒃ ᐸᐅᕐᖓᖏᓐᓄᑦ.
12ᐱᕈᕐᓰᕕᖁᑎᒐᓕ ᕔᓂᒃᓴᓕ ᐱᒋᕙᕋ,
ᓲᓗᒨᓂ ᑮᓇᐅᔭᓂᒃ 1,000ᓂᒃ ᐱᔭᕆᐊᖃᕐᐳᖅ,
ᑲᒪᔨᐅᔪᓪᓗ ᑮᓇᐅᔭᓂᒃ 200ᓂᒃ ᐱᔭᕆᐊᖃᕐᓗᑎᒃ.
13ᐃᓕᑦᓯ ᐱᕈᕐᓰᕕᖕᓂ ᐃᓂᖃᕐᑐᓯ,
ᐃᓚᓐᓇᕆᔭᑦᓯᓂᒡᓗ ᐃᓚᖃᕐᑐᓯ,
ᓂᐱᓯ ᑐᓴᓚᐅᕐᓚᒃᑲ!
ᐊᕐᓇᖅ
14ᓇᒡᓕᒋᔮᒃ, ᕾᒋᑦ ᑐᐊᕕᕐᓗᑎᑦ,
ᑐᒃᑐᖓᔪᑎᑐᑦ ᓱᒃᑲᓕᔪᑎᑐᑦ ᐅᕝᕙᓘᓐᓃᑦ ᐸᖕᓂᖑᕋᑖᕐᑐᑐᑦ,
ᖃᖅᑲᑎᒍᑦ ᑎᐱᑦᓯᐊᕆᒃᑐᓂᒃ ᐱᕈᕐᕕᐅᔪᑎᑐᑦ.
Currently Selected:
ᓲᓗᒨᓂᐅᑉ ᐃᓐᖏᕈᓯᖏᑦ 8: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
