ᕉᑎᐅᑉ ᐅᓂᒃᑲᐅᓯᓂᖓ 4
4
ᐳᐊᓯᐅᑉ ᓄᓕᐊᓂᖕᓂᖓ ᕉᑎᒥᒃ
1ᐳᐊᓯᓕ ᑲᑎᕕᐅᖃᑦᑕᕐᑐᒧᐊᕐᓗᓂ ᐃᒃᓯᕙᓕᕐᐳᖅ ᓄᓇᓕᑦ ᐃᑎᕐᑕᕐᕕᖓᓐᓂ; ᑕᕝᕙ ᐃᓔᒥᓕᑭᐅᑉ ᐃᓚᒋᔭᖏᑕ ᖃᓂᒋᓂᕐᐹᖓᑦ ᑕᕝᕗᓐᖓᕐᐳᖅ ᐳᐊᓯᐅᑉ ᐅᖃᐅᓯᕆᓚᐅᕐᑕᖓ ᑖᓐᓇ ᕉᑎᒧᑦ. ᐳᐊᓯᐅᑉ ᐅᖃᐅᑎᕚ, “ᕾᓚᐅᕆᑦ ᐃᖏᓪᓗᑎᑦ ᐅᖃᖃᑎᒌᓚᐅᕐᓗᒃ.” ᑕᕝᕙ ᐳᐊᓯᒧᐊᕐᐳᖅ ᐃᒃᓯᕙᖃᑎᒋᓕᕐᓗᒍᓗ. 2ᑕᕝᕙ ᐳᐊᓯ ᑕᕝᕙᓂ ᓄᓇᓕᖕᓂ ᐊᖓᔪᖅᑳᓂᒃ ᕾᖁᔨᕗᖅ 10ᓂᒃ ᐅᖃᖃᑎᒋᔪᒪᓪᓗᒋᑦ ᐃᒃᓯᕙᖁᕔᑦ, ᑕᕝᕙᓂ ᐃᒃᓯᕙᓕᕐᒪᑕ. 3ᐳᐊᓯᐅᑉ ᑭᖑᕚᖑᖃᑎᒥᒍᑦ ᐃᓚᒋᔭᓂ ᐅᖃᐅᑎᕚ, “ᓁᐅᒥ ᐅᑎᕐᓯᒪᓕᕋᒥ ᒧᐊᐱᒥᐅᓂᑦ, ᐃᓚᒋᓚᐅᕐᑕᑦᑕ ᐃᓔᒥᓕᑭᐅᑉ ᐱᕈᕐᓰᕕᖁᑎᖓᓂᒃ ᓂᐅᕐᕈᑎᖃᕈᒪᓕᕐᒪᑦ. 4ᑕᒪᓐᓇ ᐃᓕᖕᓄᑦ ᖃᐅᔨᔭᐅᔭᕆᐊᖃᕋᓱᒋᒐᒃᑯ, ᐱᔪᒪᑐᐊᕈᕕᐅᒃ ᓂᐅᕕᐊᕆᔪᓐᓇᕋᕕᐅᒃ ᐅᑯᐊ ᓄᓇᓕᖕᓂ ᐊᖓᔪᖅᑳᑦ ᑕᒃᑯᐊᓐᓂ. ᓂᐅᕕᐊᕆᔪᓐᓇᖏᒃᑯᕕᐅᒡᓕ ᐅᖃᑦᓯᐊᖁᕙᒋᑦ ᐱᐅᓯᕗᑦ ᒪᓕᒡᓗᒋᑦ ᐃᕝᕕᑦ ᓯᕗᓪᓕᐅᔭᕆᐊᖃᕋᕕᑦ, ᐱᔪᓐᓇᖏᒃᑯᕕᓪᓕ ᐅᕙᖓ ᓂᐅᕕᐊᕆᔭᕆᐊᖃᕋᔭᕋᒃᑯ.”
ᑖᓐᓇ ᐊᖑᑦ ᐅᖃᕐᐳᖅ, “ᓂᐅᕕᐊᕆᓂᐊᓕᕐᐸᕋ.”
5ᑕᕝᕙ ᐳᐊᓯ ᐅᖃᕐᐳᖅ, “ᑕᒪᓐᓇ ᓈᒻᒪᑦᓯᐊᕐᐳᖅ ᑖᓐᓇ ᐱᕈᕐᓰᕕᒃ ᓂᐅᕕᐊᕆᒍᕕᐅᒃ ᓁᐅᒥᒥᑦ, ᖃᐅᔨᒪᖁᕙᒋᑦ ᕉᑎ ᐅᐃᒡᒐᕐᓂᐅᔪᖅ ᐱᖃᓯᐅᑎᔭᕆᐊᖃᕐᓂᐊᕋᕕᐅᒃ ᒧᐊᐱᒥᐅᑕᖅ, ᐃᓚᒋᓚᐅᕐᑕᑦᑕ ᓄᓕᐊᕕᓂᖓ, ᑖᓐᓇ ᐱᕈᕐᓰᕕᒃ ᐃᓚᒋᓚᐅᕐᑕᖏᓐᓂᑦ ᐊᑎᖏᓐᓄᓪᓗ ᑭᖑᕐᖑᑎᔭᐅᑦᓯᐊᖁᓪᓗᒍ.”
6ᐊᖑᑎᐅᑉ ᑭᐅᕚ, “ᑍᒤᓕᖓᓂᐊᑐᐊᕐᐸᑦ ᓯᕗᓪᓕᐅᔭᕆᐊᖃᕐᓂᕋ ᐂᑑᑎᒋᖔᕐᐸᕋ ᐃᓕᖕᓄᑦ, ᓂᐅᕕᐊᕆᑐᐊᕈᒃᑯ ᕿᑐᕐᖓᒃᑲ ᑭᖑᕚᒃᑲᓗ ᑖᑦᓱᒥᖓ ᐱᕈᕐᓰᕕᖕᒥᒃ ᑭᖑᕐᖑᑦᔨᔪᓐᓇᑦᔮᖏᒻᒪᑕ, ᐃᕝᕕᑦ ᓂᐅᕕᐊᕆᓕᕈᒃ, ᓂᐅᕕᐊᕆᔪᓐᓇᖏᓐᓇᒃᑯ.” 7#ᒨᓯᓯ ᑕᓪᓕᒪᖏᑦ 25:9.ᑍᑦᓱᒪᓂᐅᑎᓪᓗᒍ ᐱᐅᓯᖃᕐᐸᓚᐅᕐᒪᑕ ᓂᐅᕕᖃᑦᑕᐅᑎᑐᐊᕈᑎᒃ ᐅᕝᕙᓘᓐᓃᑦ ᓱᓇᑐᐃᓐᓇᒥᒃ ᑕᐅᕐᓰᖃᑦᑕᐅᑎᓪᓗᑎᒃ ᓇᓗᓁᑯᑦᓯᕐᓯᕙᓚᐅᕐᐳᑦ ᐃᒫᒃ: ᑖᓐᓇ ᓂᐅᕕᕐᑎᑦᓯᔪᖅ ᑕᐅᕐᓰᔪᕐᓘᓐᓃᑦ ᐃᑎᒐᒍᑎᒥᓂᒃ ᐲᕐᓯᓪᓗᓂ ᓂᐅᕕᕐᑐᒧᑦ ᑐᓂᓯᔭᕆᐊᖃᕐᐸᒡᓗᑎᒃ, ᑍᒤᓕᑐᐊᕌᖓᑕ ᑕᕝᕙ ᐃᓴᕆᐊᓕᒥᐅᑦ ᓇᓗᓁᕐᓯᕙᓚᐅᕐᐳᑦ ᑕᒪᓐᓇ ᐋᖅᑭᒐᓱᐊᕐᑕᖓᑦ ᐊᖏᖃᑎᒌᒍᑕᐅᔭᕇᕐᓂᖓᓂᒃ.
8ᑖᓐᓇᓕ ᐊᖑᑦ ᐳᐊᓯᒧᑦ ᐅᖃᕋᒥ, “ᐃᕝᕕᑦ ᓂᐅᕕᐊᕆᓕᕈᒃ.” ᐃᑎᒐᒍᑎᓂ ᐲᕐᐹ ᑐᓂᓪᓗᓂᐅᒡᓗ. 9ᐳᐊᓯᓗ ᑖᒃᑯᓄᖓ ᑲᑎᒪᖃᑕᐅᔪᓄᑦ ᐊᖓᔪᖅᑳᓄᑦ ᐃᓚᖏᓐᓄᓪᓗ ᐅᖃᕐᐳᖅ, “ᐃᓕᑦᓯ ᖃᐅᔨᒪᓂᐊᓕᕐᐳᓯ ᐅᓪᓗᒥ ᓁᐅᒥᒥᑦ ᓂᐅᕕᕋᒪ ᐃᓔᒥᓕᑭᒧᑦ ᑐᕌᖓᓚᐅᕐᑐᓕᒫᓂᒃ, ᐃᕐᓂᖏᓐᓄᓪᓗ ᓯᓕᐅᓂᒧᑦ ᒪᕼᐊᓚᓂᒧᓪᓗ. 10#ᒨᓯᓯ ᑕᓪᓕᒪᖏᑦ 25:5,6.ᐊᒻᒪᓗ, ᕉᑎ ᐱᖃᓯᐅᑎᓪᓗᒍ ᒧᐊᐱᒥᐅᑕᖅ ᒪᕼᐊᓚᓂᐅᑉ ᓄᓕᐊᕆᓚᐅᕐᑕᖓ ᓄᓕᐊᕐᑖᕆᔭᕆᐊᖃᓕᕋᒃᑯ, ᑍᒤᑐᐊᕐᐸᑦ ᑖᓐᓇ ᐱᕈᕐᓰᕕᒃ ᑍᒃᑯᓄᖓ ᐃᓚᒋᓚᐅᕐᑕᑦᑎᓐᓄᑦ ᑐᕌᖎᓐᓇᕐᓂᐊᕐᒪᑦ, ᐊᑎᖓᑕᓗ ᐃᓚᒌᖕᓂᖏᑕ ᑭᖑᕚᕇᖕᓂᖓᓂ ᑲᔪᓰᓐᓇᕈᓐᓇᕐᓂᐊᕐᒪᑦ ᓄᓇᑐᖃᖏᓪᓗ. ᑕᒪᑐᒥᖓ ᐃᓕᑦᓯ ᐅᓪᓗᒥ ᖃᐅᔨᒪᑦᔪᑕᐅᓂᐊᕐᐳᓯ.”
11 #
ᒨᓯᓯ ᓯᕗᓪᓖᑦ 29:31. ᑖᒃᑯᐊ ᐊᖓᔪᖅᑳᑦ ᐊᓯᖏᓪᓗ ᐅᖃᕐᐳᑦ, “ᐃᓛᒃ ᑕᒪᑐᒥᖓ ᖃᐅᔨᓯᒪᓂᐊᕐᐳᒍᑦ, ᑐᒃᓯᐊᕐᐳᒍᓪᓗ ᐊᑕᓂᕐᒧᑦ ᑖᓐᓇ ᓄᓕᐊᑖᕆᓂᐊᕐᑍᑦ ᓲᕐᓗ ᕅᒋᓕᑐᑦ ᓕᐊᑐᓪᓗ ᐱᖁᓪᓗᒍ, ᑖᒃᑯᐊᒃ ᕿᑐᕐᖏᐅᓚᐅᕐᒪᑎᒃ ᔧᑯᒃᑯᑦ; ᐊᔪᕐᓴᖏᑦᓯᐊᖁᕙᑦᑎᒋᑦ ᐃᐸᕋᑕᐅᑉ ᑭᖑᕚᕇᖑᖃᑎᒌᖏᓐᓂ ᐃᖅᑲᐅᒪᔭᐅᑦᓯᐊᖁᓪᓗᑎᓪᓗ ᐱᑦᓕᐊᒥ. 12#ᒨᓯᓯ ᓯᕗᓪᓖᑦ 38:27-30.ᕿᑐᕐᖓᑎᓪᓗ ᐊᑕᓂᐅᑉ ᑐᓂᓂᐊᕐᑕᖏᑦ ᐃᓕᖕᓄᑦ ᑖᑦᓱᒨᓇ ᐊᕐᓇᒃᑯᑦ ᑍᑦᓱᑐᓇᐅᓚᐅᕐᑐᖅ ᐱᕆᔨᐅᑉ ᕿᑐᕐᖓᖃᕐᓂᖏᑎᑐᑦ ᐱᖁᕙᑦᑎᒋᑦ ᔫᑕᐅᑉ ᑕᒫᕆᐅᓪᓗ ᐃᕐᓂᖓᑎᑐᑦ.”
ᐳᐊᓯᐅᑉ ᑭᖑᕚᖏᓪᓗ ᑍᕕᑎᒧᑦ ᑎᑭᓪᓗᒍ
13ᑕᕝᕙ ᐳᐊᓯᐅᑉ ᕉᑎ ᐊᖏᕐᕋᐅᑎᕚ ᓄᓕᐊᕐᑖᕆᓪᓗᓂᐅᒃ; ᐱᖃᑎᒋᓕᕐᒪᒍᓗ, ᐊᑕᓂᐅᑉ ᓮᒻᒪᕐᑎᐹᒃ ᕉᑎ ᓄᑕᕋᒃᓴᕐᑖᓚᐅᕐᒪᑦ, ᐃᕐᓂᕐᑖᕐᓗᓂᓗ. 14ᐊᕐᓁᓪᓗ ᐱᑦᓕᐊᒥᐅᑦ ᓁᐅᒥ ᐅᖃᐅᑎᕚᑦ, “ᐊᑕᓂᖅ ᓂᕐᑐᓚᐅᕐᓚᕗᑦ ᐅᓪᓗᒥ ᐃᕐᖑᑕᕐᑖᕐᑎᒻᒪᑎᑦ ᐊᖑᑎᑯᓗᖕᒥᒃ ᐃᑲᔪᕐᑎᒋᓂᐊᕐᑕᕐᓂᒃ, ᑖᓐᓇᓗ ᐊᖑᑎᑯᓗᒃ ᐃᖅᑲᐅᒪᔭᐅᓂᖃᑦᓯᐊᖁᕙᕗᑦ ᐃᓴᕆᐊᓕᒥᐅᓄᑦ. 15ᐅᑯᐊᕕᑦ ᓇᒡᓕᒋᒐᒥᑎᑦ, ᐊᒡᓛᑦ ᐃᕐᓂᖃᕋᔭᕈᕕᑦ 7ᓂᒃ ᐃᑲᔪᕐᓂᕐᓴᕆᕚᑎᑦ, ᒫᓐᓇᓕ ᐃᕐᖑᑕᕐᑖᕐᑎᒻᒪᑎᑦ ᐊᖑᑎᑯᓗᖕᒥᒃ, ᐃᓕᖕᓂᒃ ᐋᖅᑭᒃᓯᒃᑲᓐᓂᕐᓂᐊᕐᑐᒥᒃ ᐃᓄᑐᖃᐅᓕᕐᑎᓪᓗᑎᓪᓗ ᐰᕆᔨᒋᓂᐊᕐᑕᕐᓂᒃ.” 16ᓁᐅᒥᐅᓪᓗ ᐃᕐᖑᑕᓂ ᑎᒍᓪᓗᒍ ᓴᕐᓕᐊᓕᕐᐹ, ᐃᕿᓪᓗᒍᓗ ᐰᕆᓕᕐᐹ.
17ᐊᕐᓇᐅᖃᑎᖏᓐᓂᓪᓗ ᐊᑎᕐᑖᕐᑎᑕᐅᕗᖅ ᐅᐱᑎᒥᒃ, ᐅᖃᐅᑦᔨᓕᕐᓗᑎᒡᓗ, “ᓁᐅᒥ ᐊᖑᑎᑯᓗᖕᒥᒃ ᐃᕐᖑᑕᖃᓕᕐᒪᑦ.”
ᑖᓐᓇ ᐅᐱᑎ ᐃᕐᓂᕐᑖᓚᐅᕐᐳᖅ ᔨᓯᒥᒃ, ᑍᕕᑎᐅᑉ ᐊᑖᑕᒋᓚᐅᕐᑕᖓᓂᒃ.
18ᑖᒃᑯᐊ ᑕᕝᕙ ᐱᕆᔾᒥᑦ ᑍᕕᑎᒧᑦ ᑎᑭᓪᓗᒋᑦ ᑭᖑᕚᕇᑦ ᐃᒤᓕᖓᕗᑦ: ᐱᕆᔾ ᐃᕐᓂᖃᓚᐅᕐᐳᖅ ᕼᐃᔅᕋᓐᒥᒃ; 19ᕼᐃᔅᕋᓐᓗ ᐃᕐᓂᕐᑖᕐᐳᖅ ᕌᒥᒥᒃ, ᕌᒥᓗ ᐃᕐᓂᕐᑖᕐᐳᖅ ᐊᒥᓇᑕᐱᒥᒃ; 20ᐊᒥᓇᑕᐱᓗ ᐃᕐᓂᕐᑖᕐᐳᖅ ᓈᓲᓐᒥᒃ, ᓈᓱᓐᓗ ᐃᕐᓂᕐᑖᕐᐳᖅ ᓵᓪᒪᓂᒥᒃ; 21ᓵᓪᒧᓂᓗ ᐃᕐᓂᕐᑖᕐᐳᖅ ᐳᐊᓯᒥᒃ, ᐳᐊᓯᓗ ᐃᕐᓂᕐᑖᕐᐳᖅ ᐅᐱᑎᒥᒃ; 22ᐅᐱᑎᓗ ᐃᕐᓂᕐᑖᕐᐳᖅ ᔨᓯᒥᒃ, ᔨᓯᓗ ᐃᕐᓂᕐᑖᕐᐳᖅ ᑍᕕᑎᒥᒃ.
Currently Selected:
ᕉᑎᐅᑉ ᐅᓂᒃᑲᐅᓯᓂᖓ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.