ᓴᒧᐃᓕ ᓯᕗᓪᓖᑦ 1
1
ᐃᐅᓪᑳᓇᐅᑉ ᐃᓚᖏᑕᓗ ᓮᓗᐊᒦᓐᓂᖏᑦ
1ᐊᖑᑎᑕᖃᓚᐅᕐᐳᖅ ᐃᐅᓪᑳᓇᒥᒃ ᐊᑎᓕᖕᒥᒃ, ᐃᕗᕅᑎᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ, ᓄᓇᖃᕐᐳᖅ ᓄᓇᓕᖕᓂ ᕋᒪᑍᒻ-ᔫᐱᒻᒥ ᖃᖅᑲᓂ ᐃᕗᕅᑎᒥ, ᔨᕈᕼᐋᒻ ᐃᕐᓂᖓ ᐃᕐᖑᑕᕆᔭᐅᓪᓗᓂᓗ ᐃᓕᕼᐅᒧᑦ, ᑐᕼᐆᑉ ᐃᓚᖏᓐᓄᑦ ᐃᓚᒋᔭᐅᓪᓗᓂ, ᔪᐸᒃᑯᑦ ᐃᓚᖏᑕ ᐃᓚᖏᓐᓄᑦ ᐃᕗᕅᒥᐅᓄᑦ. 2ᐃᐅᓪᑳᓇᓕ ᓄᓕᐊᖃᕐᐳᖅ ᒪᕐᕉᖕᓂᒃ; ᕼᐋᓇᒥᒃ ᐱᓃᓇᒥᒡᓗ. ᐱᓃᓇ ᕿᑐᕐᖓᖃᕐᐳᖅ, ᕼᐋᓇᓕ ᕿᑐᕐᖓᖃᓚᐅᓐᖏᓚᖅ. 3ᐊᕐᕌᒍᑕᒫᓪᓕ ᐃᐅᓪᑳᓇ ᐂᕙᓚᐅᕐᐳᖅ ᕌᒪᒥᑦ ᓮᓗᐊᒧᑦ ᑐᓂᕐᕈᓯᕆᐊᕐᑐᕐᓗᓂ ᑐᒃᓯᐊᕆᐊᕐᓗᓂᓗ ᐊᑕᓂᕐᒧᑦ ᐊᔪᒐᖃᖏᑦᑐᒧᑦ, ᕼᐅᐱᓂ ᐱᓂᕼᐋᓯᓗ ᐃᓔᑉ ᐃᕐᓂᖏᒃ ᐃᓚᒋᒡᓗᒋᒃ, ᑖᒃᑯᐊᒃ ᑐᓂᕐᕈᓯᕐᑎᑦᓯᔨᐅᔫᒃ ᐊᑕᓂᕐᒧᑦ. 4ᑍᒪᓐᖓᑦ ᐃᐅᓪᑳᓇ ᑐᓂᕐᕈᓯᕌᖓᒥ, ᐂᑦᑐᐃᕙᓚᐅᕐᐳᖅ ᑐᓂᔭᒥᑕ ᐃᓚᖓᓂᒃ ᐱᓃᓇᒧᑦ ᕿᑐᕐᖓᖏᓐᓄᓪᓗ. 5ᕼᐋᓇᒧᓪᓕ ᑐᓂᓯᕙᒃᐳᖅ ᐊᑕᐅᓯᕐᓯᐅᑎᒥᒃ, ᓇᒡᓕᒋᒻᒪᕆᒃᑲᓗᐊᕐᓗᒍ ᕼᐋᓇ, ᐊᑕᓂᐅᑉ ᒪᑐᓯᒪᓚᐅᕐᒪᒍ ᐃᒡᓕᐊᖓ. 6ᐱᓃᓇᓗ, ᑖᑦᓱᒧᖓ ᐸᒡᕕᓵᖃᑕᐅᕙᓚᐅᕐᐳᖅ ᑲᓐᖑᓱᒃᑎᓪᓗᒍᓗ, ᐊᑕᓂᕐᒧᑦ ᐃᒡᓕᐊᖓ ᒪᑐᔭᐅᓯᒪᓂᖓ ᐱᑦᔪᑎᒋᓪᓗᒍ. 7ᑍᒤᓕᐅᖃᑦᑕᓚᐅᕐᐳᖅ ᐊᕐᕌᒍᑕᒫᑦ; ᑍᒪᓐᖓᑦ ᐊᑕᓂᐅᑉ ᐃᒡᓗᖓᓄᐊᕌᖓᒥᒃ, ᐱᓃᓇᐅᑉ ᖁᕕᐊᓱᒍᓐᓃᕐᑎᑉᐸᓚᐅᕐᐹ. ᑍᒤᒻᒪᑦ ᕼᐋᓇ ᕿᐊᓕᓚᐅᕐᐳᖅ ᓂᕆᔪᒪᔪᓐᓃᕐᓗᓂᓗ. 8ᐅᐃᖓᑕ ᐃᐅᓪᑳᓇᐅᑉ ᐊᐱᕆᕚ, “ᕼᐋᓇ, ᓱᖕᒪᑦ ᕿᐊᕖᑦ? ᓱᖕᒪᓪᓗ ᓂᕆᔪᒪᓐᖏᓚᑏᑦ? ᓱᖕᒪᑦ ᐆᒻᒪᑎᖕᓂ ᕿᒃᓵᒃᐲᑦ? ᐱᐅᓂᕐᓴᐅᓐᖏᓚᖔ ᐃᕐᓂᓂᑦ 10ᓃᑦ?”
ᕼᐋᓇᓗ ᐃᓔᓗ
9ᓂᕆᔭᕇᕋᒥᒃ ᐃᒥᕇᕋᒥᒡᓗ ᐊᑕᓂᐅᑉ ᐃᒡᓗᖓᓂ ᓮᓗᐊᒥ, ᕼᐋᓇ ᒪᑭᑉᐳᖅ. ᐃᓔᓕ ᑐᓂᕐᕈᓯᕐᑎᑦᓯᔨ ᐃᒃᓯᕙᓚᐅᕐᐳᖅ ᐃᒃᓯᕙᐅᑕᕐᒥ ᐊᑕᓂᐅᑉ ᑐᐱᖓᑕ ᐃᑎᕐᑕᕐᕕᖓᑕ ᓴᓂᐊᓂ. 10ᕼᐋᓇ ᐅᖁᒤᒃᓴᒻᒪᕆᒃᓗᓂ ᑐᒃᓯᐊᕐᐳᖅ ᐊᑕᓂᕐᒧᑦ, ᕿᐊᓪᓗᓂᓗ. 11#ᒨᓯᓯ ᓯᑕᒪᖏᑦ 6:5.ᐊᖏᒻᒪᕆᒡᓗᓂᓗ ᐅᖃᕐᐳᖅ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᑕᑯᔪᓐᓇᕈᕕᐅᒃ ᐊᑲᐅᓐᖏᓕᐅᕈᑎᒋᔭᕋ, ᐃᖅᑲᐅᒪᓚᐅᓐᖓ, ᐳᐃᒍᕐᑍᓕᓗᓐᖓ, ᐃᕐᓂᕐᑖᕐᑎᓚᐅᓐᖓ, ᐊᖏᒻᒪᕆᒃᐳᖓ ᐃᓕᖕᓄᑦ ᐊᑕᓃᖅ ᐃᓅᓯᓕᒪᖓ ᑐᓂᔪᒫᕐᐸᕋ, ᓄᔭᖏᓪᓗ ᑭᑦᔭᕐᑕᐅᓚᐅᕐᓯᒪᒐᔭᓐᖏᓚᑦ.”
12ᕼᐋᓇ ᑲᔪᓯᓪᓗᓂ ᑐᒃᓯᐊᕐᑎᓪᓗᒍ ᐊᑕᓂᕐᒧᑦ, ᐃᓔ ᑕᑯᓐᓇᕐᐳᖅ ᖃᓂᖓᓂᒃ. 13ᕼᐋᓇᓕ ᑐᒃᓯᐊᕐᓗᓂ ᓂᐱᖃᖏᒻᒪᑦ; ᖃᓂᖓ ᐊᐅᓚᒐᓗᐊᕐᑎᓪᓗᒍ, ᓂᐱᖓ ᑐᓴᕐᓴᐅᓚᐅᖏᒻᒪᑦ; ᑍᒤᒻᒪᑦ ᐃᓔ ᐃᓱᒪᓕᕐᐳᖅ ᑖᓐᓇ ᐊᕐᓇᖅ ᐋᖓᔮᕋᓱᒋᓪᓗᒍ. 14ᐃᓔᓪᓗ ᐅᖃᐅᑎᕚ, “ᖃᓄᖅ ᐊᑯᓂᐅᑎᒋᔪᖅ ᐋᖓᔮᕐᓂᐊᕐᐲᑦ? ᐃᒥᐊᓗᒍᓐᓃᕆᑦ ᐋᖓᔮᕈᓐᓂᕐᓗᑎᓪᓗ.”
15ᕼᐋᓇᓕ ᑭᐅᕗᖅ, “ᐊᖓᔪᖅᑳᒃ, ᐋᖓᔮᓐᖏᓚᖓ, ᐃᒥᐊᓗᓚᐅᕐᓇᖓᓗ ᕔᓂᒥᒃ ᓴᓐᖏᔪᒥᒡᓘᓐᓃᑦ, ᐃᓗᖏᕐᓱᒻᒪᕆᒡᓗᖓᓕ ᑐᒃᓯᐊᕐᐳᖓ; ᐅᖁᒤᒃᓴᐅᑎᒋᔭᒃᑲ ᑕᕐᓂᓐᓂ ᑐᓂᕙᒃᑲ ᐊᑕᓂᕐᒧᑦ. 16ᐱᔩᑦ ᓱᓇᐅᖏᑦᑑᓇᓱᒋᓂᐊᕐᓇᒍ, ᑍᒫᒃ ᑐᒃᓯᐊᓚᐅᕐᐳᖓ ᐊᖏᔪᒥᒃ ᐊᑲᐅᖏᑦᔪᑎᖃᕋᒪ ᕿᒃᓵᕕᒡᔪᐊᕐᓗᖓᓗ.”
17ᑕᕝᕙ ᐃᓔᑉ ᑭᐅᕚ, “ᐃᓱᒫᓗᖏᓪᓗᑎᑦ ᐊᓂᓕᕆᑦ, ᐃᓴᕆᐊᓕᒥᐅᑦ ᒎᑎᖓᑕ ᑐᓂᓯᕕᒋᓕᑎᑦ ᑖᑦᓱᒪᓐᖓᑦ ᐱᔪᒪᔭᕐᓂᒃ.”
18ᕼᐋᓇ ᑭᐅᕗᖅ, “ᐱᔩᑦ ᖁᕕᐊᒋᓗᒍ ᐃᓱᒪᒋᑦᓯᐊᕈᒃ,” ᑕᕝᕙ ᐊᕐᓇᖅ ᑕᕝᕙᓐᒐᑦ ᐊᓂᒐᒥ ᓂᕆᓕᓚᐅᕐᐳᖅ, ᑮᓇᖓᓗ ᖁᕕᐊᓱᖏᓐᓂᕐᒧᑦ ᑕᑯᑦᓱᓇᕈᓐᓃᕐᓗᓂ.
ᓴᒧᐃᓕᐅᑉ ᐃᕐᓂᐊᖑᓂᖓ ᑐᓂᕐᕈᑕᐅᓂᖓᓗ
19ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᑉᐳᑦ ᐊᑕᓂᕐᒧᓪᓗ ᑐᒃᓯᐊᕐᐳᑦ; ᑭᖑᓂᖓᒍᑦ ᐅᑎᕐᐳᑦ ᐊᖏᕐᕋᒧᑦ ᕌᒪᒧᑦ. ᐃᐅᓪᑳᓇᐅᓪᓗ ᕼᐋᓇ ᓄᓕᐊᓂ ᐱᖃᑎᒋᖕᒪᒍ, ᑐᒃᓯᐊᕐᓂᖓ ᐊᑕᓂᐅᑉ ᐃᖅᑲᐅᒪᓚᐅᕐᐹ. 20ᑕᒪᑐᒪ ᑭᖑᓂᖓᒍᑦ ᕼᐋᓇ ᓄᑕᕋᒃᓴᕐᑖᕐᐳᖅ, ᕿᑐᕐᖓᕐᑖᕐᕕᒃᓴᖓᓗ ᓇᓪᓕᐅᑎᖕᒪᑦ ᐃᕐᓂᕐᑖᕐᐳᖅ, ᐊᑦᓯᕐᐹᓗ ᓴᒧᐃᓕᒥ, ᐅᖃᕐᓗᓂ, “ᐊᑕᓂᖅ ᕿᓄᕕᒋᓚᐅᕋᒃᑯ ᑖᑦᓱᒥᖓ.”
21ᐃᐅᓪᑳᓇᐅᓪᓗ ᐃᓚᓕᒫᖏᑕᓗ ᐊᐅᓪᓚᕐᕕᒃᓴᖓ ᓮᓗᐊᒧᑦ ᓇᓪᓕᐅᑎᖕᒪᑦ ᑐᓂᕐᕈᓯᕆᐊᕐᑐᕐᐳᖅ ᐊᑕᓂᕐᒧᑦ ᐊᕐᕌᒍᑕᒫᕐᓯᐅᑎᒥᒃ ᑐᓂᕐᕈᓯᕆᐊᕐᑐᕐᓗᑎᒃ, ᐊᖏᕈᑎᒋᓯᒪᔭᒥᓂᒡᓗ ᑐᓂᕐᕈᓯᕆᐊᕐᑐᕐᓗᓂ. 22ᕼᐋᓇᓕ ᑍᑦᓱᒪᓂ ᐱᖃᑕᐅᓚᐅᓐᖏᓚᖅ, ᐅᐃᓂᓗ ᐅᖃᐅᑎᓚᐅᕐᐹ, “ᓱᕈᓯᖅ ᐃᒻᒥᓂᒃ ᐱᔪᓐᓇᕐᓯᑐᐊᕐᐸᑦ, ᐊᑕᓂᐅᑉ ᐃᒡᓗᖓᓄᐊᕈᑎᔪᒫᕐᐸᕋ, ᐊᑕᓂᐅᑉ ᓵᖓᓄᑦ ᓴᖅᑭᑎᑦᓱᒫᕋᒃᑯ, ᑍᑲᓂᓗ ᐃᓂᖃᓕᕈᒫᕐᒪᑦ ᐃᓅᓯᓕᒫᒥᓂ.”
23ᐅᐃᖓᑕᓗ ᐃᐅᓪᑳᓇᐅᑉ ᐅᖃᐅᑎᕚ, “ᐃᓕᖕᓄᑦ ᐱᐅᔫᓇᓱᒋᔭᕐᓂᒃ ᐊᑐᓕᕆᑦ, ᐅᑕᖅᑭᓕᕆᑦ ᑖᓐᓇ ᐃᒻᒥᓂᒃ ᐱᔪᓐᓇᕐᓯᓚᐅᖏᓐᓂᖓᓂ; ᐊᑕᓂᐅᓪᓕ ᐅᖃᐅᓯᕆᓯᒪᔭᓂ ᓱᓕᑎᓪᓕᐅᒃ.” ᑍᒤᒻᒪᑦ ᕼᐋᓇ ᐊᖏᕐᕋᕐᓯᒪᓕᓚᐅᕐᐳᖅ ᐃᕐᓂᓂ ᑲᒪᒋᓪᓗᓂᐅᒃ, ᐃᒻᒥᓂᒃ ᐱᔪᓐᓇᕐᓯᓚᐅᖏᓐᓂᖓᓂ.
24ᐃᕐᓂᖓᓗ ᐃᒻᒥᓂᒃ ᐱᔪᓐᓇᕐᓯᖕᒪᑦ, ᓮᓗᐊᒧᑦ ᐂᑦᔪᑎᕚ, ᓇᒃᓴᕐᓗᓂ ᐱᖓᓱᓂᒃ ᐊᕐᕌᒍᓕᖕᒥᒃ ᐃᒻᒧᒃᓯᐅᒊᑦ ᐸᖕᓂᖓᓂᒃ, ᐃᕕᐅᔭᕐᒦᑦᑐᒥᒡᓗ ᓂᐊᖂᔭᒥᒃ, ᕿᓯᖕᒥᒡᓗ ᕔᓂᒥᒃ ᑕᑕᑦᑐᒥᒃ; ᓴᒧᐃᓕᓗ ᒥᑭᔫᒐᓗᐊᕐᑎᓪᓗᒍ; ᐊᑕᓂᐅᑉ ᐃᒡᓗᖓᓄᐊᕈᑎᕚ ᓮᓗᐊᒧᑦ. 25ᐸᖕᓃᕐᓗ ᑐᖁᑕᐅᑎᒌᕋᒥᐅᒃ, ᑕᕝᕙ ᓱᕈᓯᖅ ᐃᓔᒧᐊᕈᑎᕚ. 26ᕼᐋᓇᓗ ᐅᖃᕐᐳᖅ, “ᐊᖓᔪᖅᑳᒃ! ᐃᖅᑲᐅᒪᕕᖔ? ᑖᓐᓇᐅᕗᖓ ᐊᕐᓇᖅ ᑕᕝᕙᓃᑎᓪᓗᑎᑦ ᑕᑯᓚᐅᕐᓯᒪᔧᑦ ᑕᒫᓂ ᓇᖏᕐᑎᓪᓗᖓ, ᑐᒃᓯᐊᕐᑎᓪᓗᖓ ᐊᑕᓂᕐᒧᑦ. 27ᑐᒃᓯᐊᕐᕕᒋᓚᐅᕐᐸᕋ ᑖᑦᓱᒥᖓ ᓱᕈᓯᕐᒥᒃ; ᐊᑕᓂᐅᓪᓗ ᑐᓂᓚᐅᕐᐹᖓ ᕿᓄᑦᔪᑎᒋᓚᐅᕐᑕᓐᓂᒃ ᑖᑦᓱᒧᖓ. 28ᑍᒤᒻᒪᑦ ᑐᓂᓕᕐᐸᕋ ᐊᑕᓂᕐᒧᑦ; ᐃᓅᓯᖓ ᓈᓗᒍ ᐊᑕᓂᐅᑉ ᐱᒋᓂᐊᕐᐹ.”
ᑕᕝᕙᓂᓗ ᐊᑕᓂᕐᒥᒃ ᓂᕐᑐᐃᓪᓗᑎᒃ ᑐᒃᓯᐊᕐᐳᑦ.
Currently Selected:
ᓴᒧᐃᓕ ᓯᕗᓪᓖᑦ 1: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
