ᕉᒪᒥᐅᓄᑦ 7

ᓄᓕᐊᕇᖕᓂᐅᑉ ᐊᑦᔨᐅᔫᓂᖓ

1ᓇᓗᖏᓐᓇᑦᓯ ᐅᒃᐱᕐᑑᖃᑎᒃᑲ, ᐱᖁᔭᓂᒃ ᖃᐅᔨᒪᔪᓄᑦ ᐅᖃᕐᐳᖓ, ᐱᖁᔭᖅ ᐊᑐᒐᒃᓴᐅᖕᒪᑦ ᐃᓄᖕᒧᑦ ᐃᓅᓂᖓᓂ ᑭᓯᐊᓂ. 2ᐊᕐᓇᖅ ᐅᐃᓕᒃ ᕿᓚᒃᓱᕐᓯᒪᕗᖅ ᐱᖁᔭᑎᒍᑦ ᐅᐃᒥᓄᑦ ᐅᐃᖓᑕ ᐃᓅᓂᖓᓂ; ᐅᐃᖓᓕ ᑐᖁᒃᐸᑦ ᐱᖁᔭᒧᑦ ᕿᓚᒃᓱᕐᑕᐅᓯᒪᔪᓐᓃᕐᐳᖅ ᐅᐃᒥᓄᑦ. 3ᐊᓯᓐᓂᐊᕐᑐᒥᒃ ᑍᔭᐅᒐᔭᕐᐳᖅ ᐊᖑᒻᒥᒃ ᐊᓯᐊᓂᒃ ᓇᔪᕐᑎᖃᕈᓂ ᐅᐃᖓ ᐃᓅᑎᓪᓗᒍ ᓱᓕ; ᐅᐃᖓᓕ ᑐᖁᒃᐸᑦ ᐱᖁᔭᒧᑦ ᕿᓚᒃᓱᕐᑕᐅᓯᒪᔪᓐᓃᕐᐳᖅ, ᐊᓯᐊᓂᒃ ᐅᐃᓂᒃᑲᓗᐊᕈᓂ ᐊᓯᓐᓂᐊᕐᑐᒥᒃ ᑍᔭᐅᓐᖏᓚᖅ.

4ᑍᒤᒃᑭᕗᓯᑦᑕᐅᖅ ᐃᓚᒃᑳ, ᐱᖁᔭᒧᑦ ᑐᖁᓯᒪᒐᑦᓯ ᙭ᔅᑑᓯᐅᑉ ᑎᒥᖓᒍᑦ, ᐊᓯᑦᓯᓐᓄᑦ ᐱᑖᕆᔭᐅᖁᓪᓗᓯ, ᑖᑦᓱᒧᖓ ᑐᖁᖓᔪᓂᑦ ᒪᑭᓚᐅᕐᑐᒧᑦ ᒎᑎᐅᑉ ᐱᓇᓱᐊᕐᓂᖓᓄᑦ ᐸᐅᕐᖓᕆᔭᐅᖁᓪᓗᑕ. 5ᑎᒥᒃᑯᑦ ᐃᓅᑎᓪᓗᑕ, ᐊᔪᕐᓂᕐᒥᒃ ᐱᔪᒪᓂᕗᑦ ᐱᖁᔭᓄᑦ ᐆᒻᒪᕐᑎᑕᐅᕗᑦ, ᑎᒥᕗᑦ ᐱᓇᓱᐊᕐᕕᐅᕗᑦ ᐱᕈᕐᕕᐅᖁᓪᓗᒋᑦ ᑐᖁᒥᒃ. 6ᒫᓐᓇᓕ ᐱᖁᔭᒥᑦ ᐲᕐᑎᑕᐅᓯᒪᓕᕋᑦᑕ, ᑐᖁᖓᓕᕐᐳᒍᑦ ᑖᑦᓱᒧᖓ ᑎᒍᒥᐊᕐᑎᒋᓚᐅᕐᑕᑦᑎᓐᓄᑦ, ᑭᒡᒐᕐᑐᖁᓇᑕ ᐱᖁᔧᑦ ᑎᑎᕋᕐᓯᒪᔪᑐᕾᑦ ᒪᓕᒡᓗᒋᑦ, ᑭᒡᒐᕐᑐᖁᓪᓗᑕᓕ ᐃᓅᓯᕐᒥᒃ ᓄᑖᒥᒃ ᐊᓂᕐᓂᒃᑯᑦ.

ᒨᓯᓯᐅᑉ ᐱᖁᔭᖏᑦ ᐊᔪᕐᓂᕐᓗ

7 # ᒨᓯᓯ ᐂᑉᐸᖏᑦ 20:17; ᒨᓯᓯ ᑕᓪᓕᒪᖏᑦ 5:21. ᖃᓄᕐᓕ ᑍᒪ ᐅᖃᕐᓂᐊᓕᕐᐱᑖ? ᐱᖁᔧᑦ ᐊᔪᕐᓂᐅᓂᕋᕐᓗᒌᑦ? ᑍᒤᑦᑐᓐᓇᖏᓚᖅ! ᐱᖁᔭᖃᓚᐅᖏᑉᐸᑦ, ᐊᔪᕐᓂᖅ ᖃᓄᐃᑦᑑᖕᒪᖔᑦ ᖃᐅᔨᒪᒐᔭᓐᖏᓚᖓ. ᐃᒃᓯᒎᕐᓂᖅ ᖃᓄᐃᑦᑑᖕᒪᖔᑦ ᖃᐅᔨᒪᒐᔭᓐᖏᓚᖓ, ᐱᖁᔭᑦ ᐅᖃᓯᒪᖏᑉᐸᑕ, “ᐃᓅᖃᑎᕕᑦ ᐱᖁᑎᖓᓂᒃ ᐃᒃᖠᒎᕐᑐᒃᓴᐅᓐᖏᓚᑎᑦ.” 8ᐊᔪᕐᓂᖅ ᐱᕕᒃᓴᖃᓕᕋᒥ ᐱᖁᔭᑎᒍᑦ, ᐅᕙᓐᓄᑦ ᓴᖅᑭᑎᑦᓯᓕᕐᐳᖅ ᓱᓇᑐᐃᓐᓇᕐᓂᒃ ᐃᒃᓯᒎᕐᓂᕐᒥᒃ. ᐱᖁᔭᖃᖏᑦᑐᓂ, ᐊᔪᕐᓂᖅ ᑐᖁᖓᖕᒪᑦ. 9ᐱᖁᔭᖃᕐᓇᖓ ᐃᓅᓯᕐᒪ ᐃᓚᖓᓂ ᐃᓅᓚᐅᕋᒪ; ᐱᖁᔧᓪᓕ ᓴᖅᑭᒻᒪᑕ ᐊᔪᕐᓂᖅ ᐆᒻᒪᕐᐳᖅ ᑐᖁᓪᓗᖓᓗ. 10ᖃᐅᔨᕗᖓ ᐱᖁᔭᖅ ᑖᓐᓇᑦᓮᓐᓇᖅ ᐃᓅᓯᕐᑖᕐᑎᑦᓯᓇᓱᐊᕐᑐᖅ ᐅᕙᓐᓂᒃ ᑐᖁᑎᑦᓯᖕᒪᑦ. 11#ᒨᓯᓯ ᓯᕗᓪᓖᑦ 3:13.ᐊᔪᕐᓂᖅ ᐱᖁᔭᒃᑯᑦ ᐱᕕᒃᓴᒥᓂᒃ ᓇᓂᓯᒐᒥ, ᐅᐃᕕᕆᕚᖓ, ᑖᑦᓱᒨᓇᓗ ᐱᖁᔭᒃᑯᑦ ᑐᖁᑕᐅᓪᓗᖓ.

12ᑍᒤᒻᒪᑦ ᐱᖁᔭᖅ ᐃᑦᔪᕐᓁᑉᐳᖅ, ᐱᖁᔧᓪᓗ ᖁᓕᑦ ᐃᑦᔪᕐᓁᒃᑭᕗᑦ, ᐃᓗᐊᕐᑑᓪᓗᑎᒡᓗ ᐱᐅᕗᑦ. 13ᑍᒪᓖ ᑕᒪᑐᒪ ᐱᐅᔫᑉ ᑐᖁᑎᑉᐹᖔ? ᑍᒫᖑᓐᖏᓚᖅ! ᐊᔪᕐᓂᖅ ᓇᓗᓇᕈᓐᓁᖁᓪᓗᒍ ᐊᔪᕐᓂᐅᓂᖓᓂᒃ, ᐅᕙᓐᓄᑦ ᑐᖁᓐᓇᕐᑐᓐᖑᕐᐳᖅ ᐱᐅᔪᖅ ᐊᑐᕐᓗᒍ, ᐱᖁᔭᑎᒍᑦ ᐊᔪᕐᓂᖅ ᓇᓗᓁᕐᑕᐅᖁᓪᓗᒍ ᐊᔪᕐᓂᓪᓚᕆᐅᓂᖓ.

ᐃᓅᑉ ᐃᓗᒥᓂ ᐅᓇᑕᕐᓂᖃᓲᖑᓂᖓ

14ᖃᐅᔨᒪᒐᑦᑕ ᐱᖁᔭᑦ ᒎᑎᒥᑦ ᐱᓯᒪᖕᒪᑕ; ᐅᕙᖓᓕ ᑎᒥᓐᓄᑦ ᐊᐅᓚᑕᐅᕗᖓ, ᐊᔪᕐᓂᕐᒧᑦ ᓂᐅᕐᕈᑕᐅᓯᒪᓪᓗᖓ. 15#ᒐᓔᑎ 5:17.ᐱᓂᐊᕐᓂᒃᑲ ᓇᖕᒥᓂᖅ ᑐᑭᓯᓐᖏᓚᒃᑲ. ᐱᓂᐊᕈᒪᔭᓐᓂᒃ ᐱᕙᖏᓐᓇᒪ, ᐱᐅᒋᓐᖏᑕᓐᓂᒡᓕ ᐱᓂᐊᕐᐸᒃᐳᖓ. 16ᐱᓂᐊᕈᒪᓐᖏᑕᓐᓂᒡᓕ ᐱᓂᐊᕈᒪ, ᑕᕝᕙ ᐊᖏᕐᐳᖓ ᐱᖁᔭᖅ ᐱᐅᓂᕋᕐᓗᒍ. 17ᑕᕝᕙ ᐅᕙᖓᐅᓐᖏᓚᖅ ᑍᒤᓕᐅᕐᑐᖅ, ᐊᔪᕐᓂᕐᓕ ᐃᓗᓐᓃᑦᑐᖅ ᑍᒤᓕᐅᕐᐳᖅ. 18ᖃᐅᔨᒪᕗᖓ ᐱᐅᔪᒥᒃ ᐃᓗᓐᓃᑦᑐᖃᖏᒻᒪᑦ, ᑕᕝᕙ ᑎᒥᓐᓂ. ᓈᒻᒪᒃᑐᒥᒃ ᐱᔪᒪᓂᖃᕋᓗᐊᕐᐳᖓ, ᑭᓯᐊᓂᓕ ᐱᔪᓐᓇᓐᖏᓚᕋ. 19ᐱᐅᔪᖅ ᐱᔪᒪᒐᓗᐊᕐᑕᕋ ᐊᑐᓐᖏᓚᕋ, ᐱᐅᖏᑦᑐᕐᓕ ᐱᔪᒪᓐᖏᑕᕋ ᐊᑐᕐᐸᕋ. 20ᐱᔪᒪᓐᖏᑕᓐᓂᒡᓕ ᐱᒍᒪ, ᑕᕝᕙ ᐅᕙᖓᐅᔪᓐᓃᕐᐳᖅ ᑍᒤᓕᐅᕐᑐᖅ, ᐊᔪᕐᓂᕐᓕ ᐃᓗᓐᓃᑦᑐᖅ ᑍᒤᓕᐅᕐᐳᖅ.

21ᐱᖁᔭᖅ ᖃᐅᔨᕙᕋ ᐱᐅᔪᒥᒃ ᐱᓂᐊᖁᔨᔪᖅ ᓈᒻᒪᒃᑐᒥᒃ ᐱᓂᐊᕈᒪᑎᓪᓗᖓ, ᐱᐅᖏᑦᑑᓪᓕ ᓇᔪᕐᑎᒌᓐᓇᕐᐹᖓ. 22ᒎᑎᐅᑉ ᐱᖁᔭᖏᑦ ᖁᕕᐊᒋᕙᒃᑲ, ᐃᓗᒃᑯᑦ. 23ᖃᐅᔨᕗᖓᓕ ᑎᒥᓐᓂ ᐱᖁᔧᑦ ᐊᓯᖏᓐᓂᒃ ᐅᓇᑕᕐᑐᓂᒃ ᐃᓱᒪᒪ ᐱᖁᔭᖓᓄᑦ ᑖᒃᑯᐊᓗ ᑎᒍᔭᐅᓯᒪᑎᑉᐹᖓ ᐊᔪᕐᓂᐅᑉ ᐱᖁᔭᖓᓄᑦ ᑎᒥᓐᓃᑦᑐᒧᑦ. 24ᐅᕙᖔᓗ ᖁᕕᐊᓇᖏᑦᑐᒦᑦᑐᖓ! ᑭᐊ ᓴᐳᑎᔪᓐᓇᕐᐹᖔ ᐆᒪᓐᖓᑦ ᑎᒥᒥᑦ ᐅᕙᓐᓂᒃ ᑐᖁᑎᑦᓯᔪᒦᑦ? 25ᒎᑎ ᖁᔭᒋᔭᐅᓕ ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ!

ᑕᕝᕙ ᐅᕙᖓ, ᐃᓱᒪᒃᑯᑦ ᒎᑎᐅᑉ ᐱᖁᔭᖏᓐᓂᒃ ᐱᔨᑦᓯᕐᐳᖓ, ᑎᒥᒃᑯᓪᓕ ᐱᔨᑦᓯᕐᐳᖓ ᐊᔪᕐᓂᐅᑉ ᐱᖁᔭᖓᓂᒃ.

Currently Selected:

ᕉᒪᒥᐅᓄᑦ 7: EAIB

Highlight

Copy

Compare