ᕉᒪᒥᐅᓄᑦ 6

ᐊᔪᕐᓂᕐᒧᑦ ᑐᖁᖓᓂᖅ ᐃᓅᓂᕐᓗ ᙭ᔅᑑᓯᒥᒃ ᐃᓚᖃᕐᓂᒃᑯᑦ

1ᖃᓄᕐᓕ ᐅᖃᕐᓂᐊᓕᕐᐱᑖ? ᐊᔪᕐᓂᕐᒦᖏᓐᓇᕐᑐᒃᓴᐅᕕᑖ? ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐊᖏᒡᓕᒃᑲᓐᓂᖁᓪᓗᒎ? 2ᑍᒤᑦᑐᓐᓇᖏᑦᑐᖅ! ᐅᕙᒍᑦ ᐊᔪᕐᓂᕐᒧᑦ ᑐᖁᓯᒪᔪᒍᑦ, ᓱᓕ ᐃᓅᔪᒃᓴᐅᒋᕕᑖ ᐊᔪᕐᓂᕐᒥ? 3ᖃᐅᔨᒪᓐᖏᓚᓰ ᑕᒪᑦᑕ ᙭ᔅᑑᓯ ᔩᓱᓯᒧᑦ ᐹᑉᑎᑕᐅᓯᒪᔪᒍᑦ ᑐᖁᖓᓄᑦ ᐹᑉᑎᑕᐅᓯᒪᒐᑦᑕ? 4#ᑯᓘᓯ 2:12.ᐃᓗᕕᕐᑕᐅᖃᑎᒋᓯᒪᕙᕗᑦ ᑐᖁᒧᑦ ᐹᑉᑎᑕᐅᓂᒃᑯᑦ, ᙭ᔅᑑᓯᑦᑕᐅᖅ ᐆᒻᒪᕐᑎᑕᐅᖕᒪᑦ ᑐᖁᒥᑦ ᐊᑖᑕᐅᑉ ᓂᕐᑐᕐᓇᕐᓂᕐᔪᐊᖓᒍᑦ, ᐅᕙᒍᑦᑕᐅᖅ ᐃᓅᓯᕐᒥ ᓄᑖᒥ ᐃᓅᔪᓐᓇᕐᓯᖁᓪᓗᑕ.

5ᑕᕝᕙ ᑍᒫᒃ ᑐᖁᖃᑎᒋᓯᒪᒍᑦᑎᒍ ᐊᑕᐅᓯᓐᖑᖃᑎᒋᓗᒍ, ᑖᑦᓱᑐᓇᕐᑕᐅᖅ ᖁᓚᕐᓇᖏᑦᑐᒥᒃ ᒪᑭᑦᓱᒫᕆᕗᒍᑦ ᐊᑕᐅᓯᓐᖑᖃᑎᒋᓗᒍ. 6ᖃᐅᔨᒪᒐᑦᑕ ᐃᓅᓯᑐᖃᕗᖅ ᙭ᔅᑑᓯᐅᑉ ᑭᑭᐊᒃᑐᕐᑕᐅᖃᑎᒋᓚᐅᕐᒪᒍ ᓴᓐᓂᖓᔪᓕᖕᒥ ᑎᒥᐅᑉ ᐊᔪᕐᑐᓕᔪᒪᓂᖓ ᓵᓚᐅᖁᓪᓗᒍ, ᕿᓚᒃᓱᕐᑕᐅᓯᒪᔪᓐᓃᖁᓪᓗᑕᓗ ᐊᔪᕐᓂᕐᒧᑦ. 7ᑕᕝᕙ ᑐᖁᓯᒪᔪᖅ ᕿᓚᕈᑦᔮᕐᑕᐅᕗᖅ ᐊᔪᕐᓂᕐᒥᑦ. 8᙭ᔅᑑᓯᓕ ᑐᖁᖃᑎᒋᓯᒪᒍᑦᑎᒍ, ᐅᒃᐱᕐᐳᒍᑦᑕᐅᖅ ᐃᓅᖃᑎᒋᔪᒫᕋᑦᑎᒍ. 9ᖃᐅᔨᒪᕗᒍᑦ ᙭ᔅᑑᓯ ᑐᖁᒥᑦ ᒪᑭᑎᑕᐅᔪᖅ ᑐᖁᒃᑲᓐᓂᕐᓂᐊᕈᓐᓃᕐᒪᑦ; ᑐᖁ ᐱᔪᓐᓇᕐᓂᖃᕈᓐᓃᕐᒪᑦ ᑖᑦᓱᒧᖓ. 10ᑐᖁᒐᒥ ᐊᔪᕐᓂᕐᒧᑦ ᐊᑕᐅᓯᐊᕐᓗᓂ ᑐᖁᕗᖅ; ᑐᖁᒃᑲᓐᓂᕐᓂᐊᕈᓐᓃᕐᓗᓂ, ᐃᓅᓯᕐᓕ ᐃᓅᓯᕆᔭᖓ ᐃᓅᓯᕆᕚ ᒎᑎᒧᑦ. 11ᑍᒫᒃᑕᐅᖅ ᐃᓕᑦᓯᓐᓂᒃ ᐃᓱᒪᒋᔪᒃᓴᐅᕗᓯ ᐊᔪᕐᓂᕐᒧᑦ ᑐᖁᓯᒪᓂᑦᓯᓐᓂᒃ ᐃᓅᓗᓯᓗ ᒎᑎᒧᑦ ᙭ᔅᑑᓯ ᔩᓱᓯᒥ.

12ᑍᒤᒻᒪᑦ ᐊᔪᕐᓂᖅ ᐊᐅᓚᑦᓯᔨᐅᔪᓐᓃᕐᓕ ᑎᒥᑦᓯᓐᓂ ᑐᖁᔪᒃᓴᒥ, ᑎᒥᑦᓯ ᐱᔪᒪᕕᒡᔪᐊᕐᓂᖏᑦ ᓈᓚᒍᓐᓁᕐᓯᒋᒃ. 13ᐊᕙᑎᓯᓗ ᐊᔪᕐᑐᓕᑦᑍᓕᑦᔪᑎᒋᓕᕐᓯᐅᒃ ᐱᐅᖏᑦᑐᒧᑦ ᐊᖅᑯᑕᐅᖁᓇᒋᑦ, ᐃᓕᑦᓯᓐᓂᒡᓕ ᑐᓂᓕᕆᑦᓯ ᒎᑎᒧᑦ ᑕᓯᐅᕐᑕᐅᓯᒪᔪᑎᑐᑦ ᑐᖁᒥᑦ ᐃᓅᓯᕐᒧᑦ, ᐊᕙᑎᓯᓗ ᑐᓂᓯᒋᒃ ᒎᑎᒧᑦ ᐊᑐᕐᑕᐅᖁᓪᓗᒋᑦ ᐃᓗᐊᕐᑐᓕᓂᕐᒧᑦ. 14ᐊᔪᕐᓂᖅ ᐱᔪᓐᓇᕐᓂᖃᕈᓐᓃᕐᒪᑦ ᐃᓕᑦᓯᓐᓄᑦ, ᐱᖁᔭᓄᑦ ᐱᓯᒪᔭᐅᔪᓐᓃᕋᑦᓯ ᒎᑎᐅᓪᓕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᐱᓯᒪᔭᐅᓕᕐᐳᓯ.

ᐃᓗᐊᕐᑐᓕᓂᕐᒧᑦ ᑭᒡᒐᕆᔭᐅᓂᖅ

15ᖃᓄᕐᓕ ᑕᕝᕙ ᐊᔪᕐᑐᓕᑐᐃᓐᓇᑐᒃᓴᐅᕕᑖ, ᐱᖁᔭᓂᑦ ᐱᓯᒪᔭᐅᔪᓐᓃᕋᑦᑕ ᒎᑎᐅᓪᓕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᔪᐊᖓᓄᑦ ᐱᓯᒪᔭᐅᓕᕋᑦᑕ? ᑍᒤᑦᑐᓐᓇᖏᓚᖅ! 16ᖃᐅᔨᒪᓐᖏᓚᓰ ᑐᓂᒍᑦᓯ ᐃᓕᑦᓯᓐᓂᒃ ᑭᓇᑐᐃᓐᓇᕐᒧᑦ ᑭᒡᒐᑎᑐᑦ ᒪᓕᑦᓯᐊᕐᓂᐊᕐᑐᑎᑐᑦ, ᑭᒡᒐᐅᓕᕐᐳᓯ ᑕᕝᕙ ᓈᓚᒃᑕᑦᓯᓐᓄᑦ, ᐊᔪᕐᓂᕐᒧᓪᓘᓐᓃᑦ ᑐᖁᑎᑦᓯᔪᒧᑦ, ᐅᕝᕙᓗ ᓈᓚᖕᓂᕐᒧᑦ, ᐃᓗᐊᕐᑐᓐᖑᕐᑎᑦᓯᔪᒧᑦ? 17ᒎᑎ ᖁᔭᒋᔭᐅᓕ, ᐊᔪᕐᓂᕐᒧᑦ ᑭᒡᒐᐅᓚᐅᕐᑐᓯ ᓈᓚᑦᓯᐊᓕᕐᓯᒪᒐᑦᓯ ᐊᔪᐃᓐᓇᕐᓗᓯ ᐊᔪᕆᕐᑐᐃᑦᔪᑕᐅᓚᐅᕐᑐᓂᒃ ᐃᓕᑦᓯᓐᓄᑦ. 18ᐊᔪᕐᓂᕐᒥᑦ ᕿᓚᕈᑦᔮᕐᑕᐅᓯᒪᓂᑦᓯᓐᓄᑦ, ᐃᓗᐊᕐᑐᓕᓂᕐᒧᑦ ᑭᒡᒐᕆᔭᐅᓕᕐᓯᒪᒐᑦᓯ. 19ᐃᓄᑐᐃᓐᓇᕐᑎᑐᑦ ᐅᖃᕐᐳᖓ, ᓴᓐᖐᑦᑑᓂᓯ ᐱᑦᔪᑎᒋᓪᓗᒍ. ᐊᕙᑎᓯ ᑐᓂᓯᒪᓚᐅᕋᑦᓯᒋᒃ ᓴᓗᒪᖏᑦᑐᒧᑦ ᐊᔪᕐᑐᓕᓂᕐᒥᒡᓗ ᐊᖏᓕᕙᓪᓕᐊᑎᑦᓯᓪᓗᓯ ᐱᓇᓱᐊᕐᓂᑦᓯᓐᓄᑦ, ᒫᓐᓇᓕ ᐊᕙᑎᓯ ᑐᓂᓕᕐᓯᒋᒃ ᐃᓗᐊᕐᑐᓕᓂᕐᒧᑦ ᐃᑦᔪᕐᓁᑎᑕᐅᖁᓪᓗᒋᑦ.

20ᐊᔪᕐᓂᕐᒧᑦ ᑭᒡᒐᕆᔭᐅᑎᓪᓗᓯ, ᐊᑲᐅᔪᒧᑦ ᐊᐅᓚᑕᐅᓚᐅᖏᓐᓇᑦᓯ. 21ᓱᓇᒥᒡᓕ ᑖᒃᑯᓇᓐᖓᑦ ᐱᕙᓪᓕᕈᑎᒃᓴᖃᕐᐱᓰ ᒫᓐᓇ ᑲᓐᖑᓇᕐᓂᕋᓕᕐᑕᑦᓯᓐᓂᒃ? ᑕᒪᒃᑯᐊ ᐃᓱᖃᕐᒪᑕ ᑐᖁᒥᒃ. 22ᒫᓐᓇᓕ ᐊᔪᕐᓂᕐᒥᑦ ᕿᓚᕈᑦᔮᕐᑕᐅᓯᒪᓕᕋᑦᓯ ᒎᑎᒧᓪᓗ ᑭᒡᒐᐅᓕᕐᓗᓯ, ᐊᑭᓕᕐᑕᐅᕗᓯ ᑕᕝᕙ ᐃᑦᔪᕐᓁᑎᑕᐅᓂᕐᒥᒃ ᐃᓱᐊᓂᓗ ᐃᓅᓯᕐᒥᒃ ᓄᖑᓱᐃᑦᑐᒥᒃ. 23ᐊᔪᕐᓂᐅᑉ ᐊᑭᓕᐅᑖ ᑕᕝᕙ ᑐᖁ, ᒎᑎᐅᓪᓕ ᑐᓂᕐᕈᑖ ᐊᑭᖃᖏᑦᑐᖅ ᑕᕝᕙ ᐃᓅᓯᖅ ᓄᖑᓱᐃᑦᑐᖅ ᙭ᔅᑑᓯ ᔩᓱᓯᒥ ᐊᑕᓂᑦᑎᓐᓂ.

Currently Selected:

ᕉᒪᒥᐅᓄᑦ 6: EAIB

Highlight

Copy

Compare