ᕉᒪᒥᐅᓄᑦ 13

ᐱᓇᓱᐊᒐᒃᓴᕗᑦ ᐊᐅᓚᑦᓯᔨᐅᔪᓄᑦ

1ᐃᓄᓕᒫᑦ ᓈᓚᒃᑐᒃᓴᐅᕗᑦ ᐱᔪᓐᓇᕐᓂᖃᕐᑎᑕᐅᔪᓂᒃ ᐊᐅᓚᑦᓯᔨᐅᔪᓂᒡᓗ, ᐊᐅᓚᑦᓯᔩᐅᓃᑦ ᒎᑎᒥᑦ ᐱᓯᒪᔪᐃᓐᓇᐅᖕᒪᑕ, ᒫᓐᓇ ᐊᐅᓚᑦᓯᔨᐅᔪᑦ ᒎᑎᐅᑉ ᑕᕝᕗᓐᖓᕐᑎᓯᒪᕔᑦ. 2ᑍᒤᒻᒪᑦ ᐊᐅᓚᑦᓯᔨᐅᔪᓂᒃ ᐊᑭᕋᕐᑐᕐᑐᑦ ᒎᑎᐅᑉ ᑎᓕᓯᒪᔭᖏᓐᓂᒃ ᐊᑭᕋᕐᑐᕐᐳᑦ; ᑖᒃᑯᐊ ᐊᑭᕋᕐᑐᕐᑐᑦ ᐃᖅᑲᕐᑐᕐᑕᐅᓂᒃᓴᒥᖕᓂᒃ ᐋᖅᑭᒃᓱᐃᕗᑦ. 3ᐊᐅᓚᑦᓯᔨᐅᔪᑦ ᑲᑉᐱᐊᓇᖏᒻᒪᑕ ᐱᓇᓱᐊᑦᓯᐊᕐᑐᓄᑦ, ᓈᒻᒪᖏᑦᑐᒥᒡᓕ ᐃᓕᖅᑯᓯᖃᕐᑐᓄᑦ ᑭᓯᐊᓂ. ᓯᕘᕋᔪᒪᓐᖏᓚᑏᑦ ᐊᐅᓚᑦᓯᔨᐅᔪᓂᒃ? ᐊᑏ ᐱᓇᓱᐊᑦᓯᐊᓕᕆᑦ, ᑕᕝᕙ ᑖᒃᑯᓇᖓᑦ ᐅᐱᒋᔭᐅᓂᐊᕐᐳᑎᑦ. 4ᐊᐅᓚᑦᓯᔨᐅᔪᑦ ᒎᑎᐅᑉ ᐱᔨᓯᕐᑎᒋᖕᒪᒋᑦ ᐱᕙᓪᓕᕈᑎᒃᓴᕐᓄᑦ. ᓈᒻᒪᖏᑦᑐᒥᒡᓕ ᐱᒍᕕᑦ, ᓯᕘᕋᒋᑦ, ᑕᒪᐅᖓᑐᐃᓐᓇᖅ ᓱᒋᐊᕐᓯᓂᕐᒥᒃ ᐱᔪᓐᓇᕐᓂᖃᕐᑎᑕᐅᖏᒻᒪᑕ; ᒎᑎᐅᓪᓕ ᐱᔨᑦᓯᕐᑎᒋᒪᒋᑦ ᖃᓄᐃᖏᑦᑎᐊᕐᓇᕐᑐᒥ ᐃᓅᖁᓪᓗᑎᑦ. 5ᑍᒤᒻᒪᑦ ᓈᓚᒃᑐᒃᓴᐅᕗᓯ ᐊᐅᓚᑦᓯᔨᐅᔪᓂᒃ, ᐊᑭᓂᐊᕐᑕᐅᓂᖅ ᐱᑦᔪᑎᒋᑐᐃᓐᓇᕐᓇᒍ, ᐃᓱᒪᔮᕈᑎᒃᓴᖃᖏᓐᓂᕐᓴᐅᖁᓪᓗᓯ.

6 # ᒫᑎᐅᓯ 22:21; ᒫᑯᓯ 12:17; ᓘᑲᓯ 20:25. ᑍᒫᒃᑕᐅᖅ ᑖᒃᓰᔭᕈᑎᓂᒃ ᒐᕙᒪᒃᑯᓐᓄᑦ ᐊᑭᓖᕙᒃᐳᓯ, ᐊᐅᓚᑦᓯᔨᐅᔪᑦ ᐱᓇᓱᐊᕐᑎᐅᖕᒪᑕ ᒎᑎᒧᑦ, ᑍᒫᒃ ᐱᓇᓱᐊᒐᒃᓴᖃᕐᒪᑕ. 7ᐊᑭᓖᕕᒋᓯᐅᒃ ᐊᑭᓕᕆᐊᓕᖕᓂᒃ, ᑖᒃᓰᕈᑎᑦᓯᓐᓂᒃ ᐊᑭᓖᕕᒋᓯᐅᒃ, ᓄᓇᖁᑎᑦᓯᓐᓄᓪᓗ ᐊᑭᓕᒃᓴᖃᕈᑦᓯ ᐊᑭᓖᕕᒋᓯᐅᒃ, ᑲᒪᑦᓯᐊᕆᑦᓯ ᑲᒪᒋᔭᐅᑦᓯᐊᕆᐊᓕᖕᓄᑦ; ᐅᐱᒍᓱᑦᓯᐊᕐᓗᓯᓗ ᐅᐱᒋᔭᐅᔭᕆᐊᓕᖕᓂᒃ.

ᐱᔭᒃᓴᑦ ᐃᓅᖃᑎᑦᑎᓐᓄᑦ

8ᑭᓇᒧᓪᓘᓐᓃᑦ ᐊᑭᓕᒃᓴᖃᕐᓂᐊᕋᓯ, ᓇᒡᓕᑎᒌᖏᓐᓂᖅ ᑭᓯᐊᓂ ᐊᑭᓕᒃᓴᑎᑐᑦ ᐃᓱᒪᒋᔭᕆᐊᖃᕐᐸᓯ; ᐃᓅᖃᑎᒥᓂᒃ ᓇᒡᓕᒍᓱᒃᑐᖅ ᐱᖁᔭᓂᒃ ᓈᒻᒪᒃᓯᑎᑦᓯᖕᒪᑦ. 9#ᒨᓯᓯ ᐂᑉᐸᖏᑦ 20:14; ᒨᓯᓯ ᑕᓪᓕᒪᖏᑦ 5:18; ᒨᓯᓯ ᐂᑉᐸᖏᑦ 20:13; ᒨᓯᓯ ᑕᓪᓕᒪᖏᑦ 5:17; ᒨᓯᓯ ᐂᑉᐸᖏᑦ 20:15; ᒨᓯᓯ ᑕᓪᓕᒪᖏᑦ 5:19; ᒨᓯᓯ ᐂᑉᐸᖏᑦ 20:17; ᒨᓯᓯ ᑕᓪᓕᒪᖏᑦ 5:21; ᒨᓯᓯ ᐱᖓᔪᖏᑦ 19:18.ᐱᖁᔧᑦ ᐅᖃᕐᒪᑕ, “ᓄᓕᐊᕇᖕᓂᕐᒥᒃ ᐊᓯᕈᐃᔪᒃᓴᐅᓐᖏᓚᑎᑦ, ᐱᔮᕆᓗᑎᑦ ᐃᓄᐊᕐᑐᒃᓴᐅᓐᖏᓚᑎᑦ, ᑎᒡᓕᒃᑐᒃᓴᐅᓐᖏᓚᑎᑦ, ᐱᔪᒪᓗᐊᕐᑐᒃᓴᐅᓐᖏᓚᑎᑦ,” ᐊᓯᖏᓪᓗ ᐱᖁᔧᑦ ᑎᑎᕋᕐᓯᒪᔪᑦ ᐆᒧᖓ ᓈᒻᒪᒃᓯᑎᑕᐅᕗᑦ, “ᐃᓅᖃᑎᖕᓂᒃ ᐃᓕᒃᑐᑦ ᓇᒡᓕᒍᓱᒃᑐᒃᓴᐅᕗᑎᑦ.” 10ᓇᒡᓕᖕᓂᖅ ᐃᓅᖃᑎᒧᑦ ᓈᒻᒪᖏᑦᑐᓕᖏᒻᒪᑦ; ᑍᒤᒻᒪᑦ ᐃᓅᖃᑎᒥᒃ ᓇᒡᓕᒍᓱᒃᑐᖅ ᐱᖁᔭᓂᒃ ᒪᓕᑦᓯᐊᕐᐳᖅ.

11ᑍᒤᒻᒪᑦ ᑐᑭᓯᒋᑦᓯ ᐃᑲᕐᕋᖅ ᓇᓪᓕᐅᑎᖕᒪᑦ ᑐᐸᒃᓯᒪᔭᕆᐊᖅᑲᓕᕐᐳᓯ ᓯᓂᑐᐃᓐᓇᕈᓐᓃᕐᓗᓯ. ᐱᐅᓕᔭᐅᓂᖅ ᖃᓂᓐᓂᕐᓴᐅᓕᕐᒪᑦ ᑍᒪᓐᖓᑦ ᐅᒃᐱᓕᓚᐅᕐᓂᑦᑎᓐᓂᑦ. 12ᐅᓐᓄᐊᖅ ᐊᓂᒍᕐᒪᑦ, ᐅᓪᓘᓕᕐᓗᓂ. ᑍᒤᒻᒪᑦ ᑖᕐᑑᑉ ᐱᓂᐊᕐᓂᖏᑦ ᕿᒪᒡᓚᕗᑦ, ᖃᐅᒪᔫᑉ ᓴᐴᓗᑕᖏᓐᓂᒃ ᐊᑎᓯᓗᑕ. 13ᐃᓕᖅᑯᓯᑦᓯᐊᕆᒡᓗᑕ ᐃᓅᓕᕐᑕ ᐅᓪᓗᕐᓯᐅᕐᑐᑎᑐᑦ, ᓄᓕᐊᕐᓂᕐᒥᒃ ᐊᑐᕐᓂᕐᓗᒍᓐᓃᕐᑕ ᐋᖓᔮᕈᓐᓃᕐᓗᑕᓗ, ᑲᓐᖑᓲᑎᒃᓴᓂᒃ ᐱᓇᓱᐊᕈᓐᓃᕐᑕ ᐃᒃᓯᒎᕐᓂᕐᒥᒡᓗ, ᐂᕙᓇᑕ ᐊᓐᓂᕈᑦᔨᓇᑕᓗ. 14ᐊᑕᓂᖅ ᔩᓱᓯ ᙭ᔅᑑᓯ ᐊᑎᓕᕐᓯᐅᒃ, ᑎᒥᐅᑉ ᐃᓕᖅᑯᓯᖓ ᓈᓚᒍᓐᓃᕐᓯᐅᒃ, ᐱᔪᒪᓂᖓ ᓈᒻᒪᒃᓯᑎᓐᓇᓱᐊᕈᓐᓃᕐᓗᒍ.

Currently Selected:

ᕉᒪᒥᐅᓄᑦ 13: EAIB

Highlight

Copy

Compare