ᐃᓐᖏᕈᑎᑦ 9
9
ᖁᔭᓕᓂᖅ ᐊᑕᓂᐅᑉ ᐃᖅᑲᕐᑐᐃᓂᖏᑦ ᓈᒻᒪᓈᕐᑐᑦ ᐱᓪᓗᒋᑦ
ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ
1ᐊᑕᓃᖅ ᓂᕐᑐᕈᒪᕙᒋᑦ ᐆᒻᒪᑎᓐᓄᑦ ᑕᒤᓐᓄᑦ;
ᐱᓂᐊᕐᓂᑎᓪᓗ ᑲᒪᓇᕐᑐᑦ ᐅᖃᐅᓯᕆᔪᒪᕙᒃᑲ.
2ᖁᕕᐊᓱᖕᓂᐊᕐᐳᖓ ᐃᖀᕐᑐᕐᓗᖓᓗ ᐱᑦᔪᑎᒋᓗᑎᑦ;
ᐃᓐᖏᕈᒪᕗᖓᓗ ᐊᑏᑦ ᐱᑦᔪᑎᒋᓗᒍ, ᖁᑦᓯᖕᓂᕐᐹᖑᔪᑎᑦ.
3ᐊᑭᕋᕐᑐᕐᑎᒃᑲ ᐅᑎᓕᕈᑎᒃ, ᐅᕐᕈᔪᒫᕐᐳᑦ ᑐᖁᓗᑎᒡᓗ,
ᐃᕝᕕᑦ ᓇᔪᕐᓂᕐᓄᑦ.
4ᐊᔪᖏᓐᓂᕋ ᖃᓄᐃᓕᐅᕋᓱᐊᕐᑕᒃᑲᓗ ᑲᔪᓯᑎᑉᐸᑎᑦ;
ᐃᒃᓯᕙᕗᑎᑦ, ᐃᓱᐊᕐᑐᒥᒡᓗ ᐃᖅᑲᕐᑐᐃᓪᓗᑎᑦ.
5ᐃᓅᖃᑎᒌᒡᔪᐊᑦ ᐃᓂᕐᑎᕐᐸᑎᑦ, ᐱᐅᖏᑦᑐᓕᔪᓪᓗ ᑐᖁᓪᓗᒋᑦ;
ᐊᑎᖏᓪᓗ ᓄᖑᑎᑉᐸᑎᑦ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.
6ᐊᑭᕋᕐᑐᕐᑏᑦ ᓯᖁᒥᑕᐅᓂᕐᒧᑦ ᐃᓱᖃᖏᑦᑐᒧᑦ ᓵᓚᐅᕗᑦ;
ᐃᒡᓗᒐᓴᔪᐊᑦ ᑐᓐᖓᕕᖏᑎᒍᑦ ᓄᓱᒃᐸᑎᑦ; ᐃᖅᑲᐅᒪᔭᐅᔪᓐᓃᕐᐳᑦ ᐊᒡᓛᑦ.
7ᐊᑕᓂᖅ ᐊᐅᓚᑦᓯᕗᖅ ᐃᓱᖃᖏᑦᑐᒧᑦ;
ᐃᒃᓯᕙᐅᑕᕐᔪᐊᓂ ᐋᖅᑭᒃᐹ ᐃᖅᑲᕐᑐᐃᓂᕐᒧᑦ.
8ᓯᓚᕐᔪᐊᕐᒥᐅᑦ ᓱᓕᑦᓯᐊᕐᑐᒥᒃ ᐃᖅᑲᕐᑐᕈᒫᕐᐰᑦ.
ᐃᖅᑲᕐᑐᐃᓂᕐᒥᒃ ᐊᐅᓚᑦᓯᔪᒫᕐᐳᖅ ᓱᓕᑦᓯᐊᕐᓂᕐᒥᒃ ᑐᓐᖓᕕᖃᕐᓗᓂ.
9ᐊᑕᓂᖅ ᕿᒫᕕᒃᓴᐅᓂᐊᕆᕗᖅ ᐅᖁᒤᒃᓴᕐᑎᑕᐅᔪᓄᑦ;
ᕿᒫᕕᒃᓴᐅᕗᖅ ᐅᖁᒤᑦᑐᖃᕐᑎᓪᓗᒍ.
10ᐊᑎᕐᓂᒡᓗ ᖃᐅᔨᒪᔪᑦ ᐃᓕᖕᓂᒃ ᑕᑎᖃᕐᓂᐊᕐᐳᑦ:
ᐃᕝᕕᑦ ᐊᑕᓃᖅ ᕿᒪᖏᓐᓇᕕᒋᑦ ᐃᓕᖕᓂᒃ ᕿᓂᕐᑐᑦ.
11ᐊᑕᓂᖅ ᓂᕐᑐᕈᑎᓂᒃ ᐃᓐᖏᕐᕕᒋᓯᐅᒃ, ᓮᐅᓂᒥ ᐃᓂᖃᕐᑐᖅ:
ᐱᓂᐊᕐᓂᖏᓪᓗ ᐃᓄᖕᓄᑦ ᐅᖃᐅᑎᒋᓕᕐᓯᐅᒃ.
12ᑐᖁᑦᓯᔪᕕᓂᕐᓂᒃ ᐊᑭᓂᐊᕐᐸᒃᑑᑉ, ᑖᒃᑯᐊ ᐃᓱᒪᒋᕙᒃᐰᑦ;
ᐅᖁᒤᒃᓴᕐᑎᑕᐅᓂᕐᒧᓪᓗ ᐃᑲᔪᕐᑕᐅᔪᒪᓪᓗᑎᒃ ᓂᓪᓕᐊᓂᖏᑦ ᐳᐃᒍᓐᖏᓔᑦ.
13ᐊᑕᓃᖅ, ᓈᒃᑭᒋᓚᐅᓐᖓ!
ᐅᕙᓐᓂᒃ ᐆᒥᓱᒃᑐᓂᑦ ᐅᖁᒤᒃᓴᕐᑎᑕᐅᓂᒃᑲ ᐃᓱᒪᒋᒃᑭᒃ,
ᐃᕝᕕᑦ ᒪᑭᑎᒐᕕᖓ ᑐᖂᑉ ᐃᑎᕐᑕᕐᕕᖓᓂᑦ.
14ᐅᖃᐅᓯᖃᕈᓐᓇᖁᓪᓗᖓ ᓂᕐᑐᕐᓇᕐᓂᕐᓂᒃ ᓱᓇᒥᒡᓗᒍ,
ᓮᐅᓂᐅᑉ ᐸᓂᖏᑕ ᐃᑎᕐᑕᕐᕕᒡᔪᐊᖏᓐᓂ.
ᐱᐅᓕᕐᓯᓂᕐᓂᒡᓗ ᐃᖀᕐᑐᕈᑎᖃᕈᒪᕗᖓ.
15ᐃᓅᖃᑎᒌᒡᔪᐊᑦ ᑭᕕᓯᒪᕗᑦ ᐃᑎᕐᓴᕐᔪᐊᕐᒧᑦ ᓴᓇᓯᒪᔭᒥᖕᓄᑦ;
ᓄᓗᐊᓄᑦ ᓇᖕᒥᓂᖅ ᐃᔨᕐᓯᒪᔭᒥᖕᓄᑦ ᐃᑎᒐᖏᑦ ᓂᒐᕕᑉᐳᑦ.
16ᐊᑕᓂᖅ ᖃᐅᔨᒪᔭᐅᕗᖅ ᐃᖅᑲᕐᑐᐃᓂᖏᑕ ᐱᓂᐊᕐᓂᖏᑎᒍᑦ;
ᐱᐅᖏᑦᑐᓕᔪᑦ ᓂᒐᕐᓯᒪᕗᑦ ᓇᖕᒥᓂᖅ ᐊᒡᒐᖕᒥᖕᓄᑦ ᓴᓇᓯᒪᔭᒥᖕᓄᑦ.
ᐃᓱᒪᒃᓴᕐᓯᐅᕐᓂᖅ ᑐᒃᓯᐊᕐᓂᒃᑯᑦ. ᓰᓚ
17ᐱᐅᖏᑦᑐᓕᔪᑦ ᓵᑎᑕᐅᔪᒫᕐᐳᑦ ᑲᑉᐱᐊᓇᕐᑐᕕᖕᒧᑦ,
ᑕᒪᕐᒥᓕᒫᕐᓗ ᐃᓅᖃᑎᒌᒡᔪᐊᑦ ᒎᑎᒥᒃ ᐳᐃᒍᕐᑐᑦ.
18ᐊᔪᕐᓴᕐᑐᑦ ᐳᐃᒍᕐᑕᐅᓯᒤᓇᕐᓂᐊᖏᒻᒪᑕ;
ᐊᒃᓗᔪᑦ ᓂᕆᐅᒋᔭᖏᑦ ᐃᓱᖃᖏᑦᑐᒧᑦ ᐊᓯᐅᓯᒪᓂᐊᓐᖏᓚᑦ.
19ᐆ, ᐊᑕᓃᖅ ᒪᑭᓕᕆᑦ, ᐃᓄᒃ ᓵᓚᖃᕐᑎᑦᑍᓕᒍᒃ;
ᐃᓅᖃᑎᒌᒡᔪᐊᑦ ᐃᖅᑲᕐᑐᕐᑕᐅᓕᑦ ᐃᔨᕕᑦ ᑕᒃᑯᐊᓂ.
20ᐆ, ᐊᑕᓃᖅ, ᓯᕘᕋᓂᕐᒦᑎᓚᐅᒃᑭᑦ,
ᐃᓅᖃᑎᒌᒡᔪᐊᑦ ᐃᓄᑐᐃᓐᓇᐅᓂᕐᒥᖕᓂᒃ ᖃᐅᔨᒪᖁᓪᓗᒋᑦ. ᓰᓚ
Currently Selected:
ᐃᓐᖏᕈᑎᑦ 9: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
