ᐃᓐᖏᕈᑎᑦ 89
89
ᐃᖅᑲᐅᒪᓂᖅ ᑍᕕᑎᒧᑦ ᐊᖏᖃᑎᒌᒍᑕᐅᓯᒪᔪᒥᒃ
ᓮᒻᒪᕐᑎᑕᐅᓂᕐᒥᒡᓗ ᐊᓯᐅᔨᓂᐅᑉ ᕿᒃᓵᖕᓇᕐᓂᖓ
1ᐊᑕᓃᖅ ᓇᒡᓕᖕᓃᑦ ᓱᖁᓯᔪᐃᑦᑐᖅ ᐃᓐᖏᐅᑎᒋᔪᒪᕙᕋ ᐃᓱᖃᖏᑦᑐᒧᑦ:
ᓱᖁᓯᔪᐃᓐᓃᑦ ᐅᖃᐅᓯᕆᔪᒪᕙᕋ ᑭᖑᕚᕇᓕᒫᓄᑦ.
2ᓇᒡᓕᖕᓃᑦ ᓱᖁᓯᔪᐃᑦᑐᖅ ᐋᖅᑭᒃᓯᒪᓂᐊᕐᐳᖅ ᐃᓱᖃᖏᑦᑐᒧᑦ;
ᓱᖁᓯᔪᐃᓐᓃᑦ ᐋᖅᑭᒃᓯᒪᒋᕙᑦ ᕿᓚᐅᑉ ᓱᖁᓯᔪᐃᓐᓂᖓᑐᑦ.
3ᐃᕝᕕᓪᓕ ᐅᖃᕐᐳᑎᑦ, “ᓂᕈᐊᕐᓯᒪᔭᕋ ᐊᖏᖃᑎᒋᓯᒪᕙᕋ,
ᐱᔨᒐ ᑍᕕᑎ ᐊᖏᒻᒪᕆᖃᑎᒋᓚᐅᕐᐸᕋ:
4 #
ᓴᒧᐃᓕ ᐂᑉᐸᖏᑦ 7:12-16; ᑯᕉᓂᑲ ᓯᕗᓪᓖᑦ 17:11-14; ᐃᓐᖏᕈᑦ 132:11; ᐋᐴᓯᑕᓖᑦ 2:30. ‘ᑭᖑᕚᒃᓴᑎᑦ ᐋᖅᑭᒃᓯᒪᓂᐊᕐᐸᒃᑲ ᐃᓱᖃᖏᑦᑐᒧᑦ,
ᐊᖓᔪᖅᑳᕐᔪᐊᖑᕖᓪᓗ ᐋᖅᑭᒃᓱᕐᓂᐊᕐᐸᕋ ᐃᓱᖃᖏᑦᑐᒧ.’” ᓰᓚ
5ᐊᑕᓃᖅ, ᕿᓔᑦ ᓂᕐᑐᐃᓚᐅᕐᓕᑦ ᑲᒪᓇᕐᑐᓕᓂᑎᑦ ᐱᓪᓗᒋᑦ,
ᓱᖁᓯᔪᐃᑦᑑᓃᓪᓗ ᐃᑦᔪᕐᓁᑦᑐᖁᑎᕕᑦ ᑲᑎᓐᖓᓂᖓᓃᑉᐳᖅ.
6ᑭᓇᓖ ᕿᓚᖕᒦᑦᑐᖅ ᐊᑦᔨᖃᕈᓐᓇᕐᐸ ᐊᑕᓂᕐᒥᒃ?
ᑭᓇᓘ ᕿᓚᖕᒥᐅᑕᐅᔪᓂ ᐊᑕᓂᕐᑐᑦ ᑍᒤᑦᓱᓐᓇᕐᐹ?
7ᒎᑎ ᓯᕘᕋᒋᔭᐅᕗᖅ ᐃᑦᔪᕐᓁᑎᑕᐅᓯᒪᔪᑦ ᑲᑎᒪᓂᖏᓐᓂ,
ᐃᒃᐱᒋᔭᐅᑦᓯᐊᒻᒪᕆᒃᓱᓂᓗ ᐊᕙᑖᓃᑦᑐᓕᒫᓄᑦ.
8ᐊᑕᓃᖅ ᒎᑏ, ᕿᓚᖕᒥᐅᒐᓴᒡᔪᐃᑦ ᒎᑎᖓᑦ,
ᑭᓈ ᐃᓕᒃᑐᑦ ᐊᔪᖏᑦᑐᕐᔪᐊᖑᑎᒋᕚ, ᐊᑕᓃᖅ?
ᓱᖁᓯᔪᐃᑦᑑᓂᕐᓄᑦ ᐊᕙᑕᖏᕐᑕᐅᓯᒪᒐᕕᑦ.
9ᐊᐅᓚᑦᓯᕗᑎᑦ ᐃᒪᕕᐅᑉ ᐊᐅᓚᓂᖓᓂᒃ,
ᐃᖏᐅᓕᖏᑦ ᖁᒻᒧᐊᒃᑕᓕᕐᑎᓪᓗᒋᑦ, ᕿᑲᕐᓯᑎᖃᑦᑕᕐᐸᑎᑦ.
10ᕅᕼᐋᐱ ᓯᖁᒥᓚᐅᕐᐸᑦ ᓯᖃᓪᓕᑦᓯᐊᕐᓗᒍ,
ᑐᖁᑕᐅᓯᒪᔪᑎᑐᑦ ᑍᒤᓕᑎᓪᓗᒍ;
ᐊᑭᕋᕐᑐᕐᑎᑎᑦ ᐊᕕᑎᑉᐸᑎᑦ ᐱᔪᓐᓇᕐᓂᕐᔪᐊᕐᓄᑦ.
11ᕿᓚᒡᓗ ᓄᓇᓗ ᐱᖁᑎᒋᕚᒃᑭᒃ;
ᓄᓇᕐᔪᐊᖅ ᐃᓗᓕᓕᒫᖏᓪᓗ, ᐱᒋᐊᕐᑎᓯᒪᕙᑎᑦ.
12ᐅᓐᓄᐊᓪᓗᐊᖅ ᐅᓪᓗᓪᓗᐊᕐᓗ, ᐱᓐᖑᕐᑎᓯᒪᕚᒃᑭᒃ;
ᖃᖅᑳᒃ ᑍᐸᕆ ᕼᐊᕐᒪᓂᓗ ᖁᕕᐊᓱᒡᓗᑎᒃ ᐊᑎᕐᓂᖅ ᓂᕐᑐᐃᕘᒃ.
13ᐱᔪᓐᓇᕐᓂᕐᔪᐊᖃᕐᐳᑎᑦ, ᓲᖑᔪᕐᔪᐊᖑᓪᓗᑎᑦ,
ᓴᓐᖏᔪᕐᔪᐊᖑᓪᓗᑎᓪᓗ.
14ᐃᓱᐊᕐᑐᓕᓂᖅ ᐋᖅᑭᒃᓱᐃᑦᓯᐊᕐᓂᕐᓗ
ᐊᖓᔪᖅᑳᕐᔪᐊᖑᓂᕐᐱᑦ ᑐᓐᖓᕕᒋᕚᒃ;
ᓇᒡᓕᖕᓂᖅ ᓱᖁᓯᔪᐃᓐᓂᕐᓗ ᐃᕝᕕᑦ ᓵᖓᓃᑉᐴᒃ.
15ᖁᕕᐊᓱᒍᑎᒃᓴᖃᕐᐳᑦ ᐃᓄᐃᑦ ᖁᕕᐊᓱᖕᓂᕐᒧᑦ ᕾᒐᓛᕐᓂᕐᒥᒃ ᖃᐅᔨᒪᔪᑦ,
ᐊᑕᓃᖅ, ᑖᒃᑯᐊ ᐃᓅᓂᐊᕐᐳᑦ ᑮᓇᕕᑦ ᖃᐅᒪᓂᖓᒍᑦ.
16ᐊᑎᕐᓂᒃ ᐊᖏᒡᓕᑎᕆᓪᓗᑎᒃ ᖁᕕᐊᓲᑎᖃᕐᐳᑦ ᐅᓪᓗᓕᒫᖅ,
ᑖᒃᑯᐊ ᐃᓱᐊᕐᑐᓕᓂᕐᓄᑦ ᐊᖏᔪᕈᕐᑎᑕᐅᓂᐊᕐᐳᑦ.
17ᐃᕝᕕᑦ ᓂᕐᑐᕐᓇᕐᓃᑦ ᐱᔪᓐᓇᐅᑎᒋᕚᑦ;
ᐱᔪᓐᓇᕐᑎᑦᓯᓂᕐᓄᑦ ᐱᔪᓐᓇᕐᓂᕗᑦ ᐊᖏᔪᕈᕐᑎᑕᐅᕗᖅ.
18ᐊᑕᓂᖅ ᓴᐴᓗᑕᕆᒐᑦᑎᒍ,
ᐃᓴᕆᐊᓕᒥᓗ ᐃᑦᔪᕐᓁᑦᑑᔪᖅ ᐊᖓᔪᖅᑳᕐᔪᐊᕆᕙᕗᑦ.
19ᑍᑦᓱᒪᓂ ᑕᑯᑎᑦᔪᑎᒃᑯᑦ ᐅᖃᓪᓚᖃᑦᑕᓚᐅᕐᐳᑎᑦ
ᐃᑦᔪᕐᓁᑦᑐᖁᑎᖕᓄᑦ, ᐅᖃᕐᓗᑎᑦ:
“ᐃᑲᔪᕐᑕᐅᑦᔪᑎᒃᓴᒥᒃ ᐋᖅᑭᒃᓯᓚᐅᕐᐳᖓ ᐱᔪᓐᓇᕐᓂᖃᕐᑐᒧᑦ,
ᐃᓄᒋᐊᒃᑐᕐᔪᐊᓂᓪᓗ ᓂᕈᐊᕐᓯᒪᔭᕋ ᐊᖏᔪᕈᕐᑎᓚᐅᕐᐸᕋ.
20 #
ᓴᒧᐃᓕ ᓯᕗᓪᓖᑦ 13:14; ᐋᐴᓯᑕᓖᑦ 13:22;
ᓴᒧᐃᓕ ᓯᕗᓪᓖᑦ 16:12. ᐱᔨᒐ ᑍᕕᑎ ᓇᒡᕚᕐᓯᒪᕙᕋ;
ᐅᕐᓱᒧᑦ ᐃᑦᔪᕐᓁᑦᑐᖁᑎᓐᓄᑦ ᐅᕐᓱᕐᑎᓚᐅᕐᐸᕋ.
21ᐊᒡᒐᒃᑲ ᑍᒪᓐᖓᑦ ᑖᑦᓱᒪᓃᑦᑐᒃᓴᐅᕗᑦ;
ᐱᔪᓐᓇᕐᓂᕐᒪᓗ ᐱᔪᓐᓇᕐᑎᑕᒃᓴᕆᕚ.
22ᐆᒥᓱᒃᑎᐅᑉ ᓵᓚᒋᔭᒃᓴᕆᓐᖏᓛ,
ᐃᓱᐃᑦᑑᓪᓗ ᐃᕐᓂᖓᑕ ᒥᑭᒡᓕᑎᑕᒃᓴᕆᓐᖏᓛ.
23ᐊᑭᕋᕐᑐᕐᑎᖏᓪᓕ ᐋᓐᓂᕐᓯᕈᒪᕙᒃᑲ ᑖᑦᓱᒪ ᓯᕗᕐᖓᓂ
ᐆᒥᒋᔨᖏᓪᓗ ᐊᓇᐅᓕᕈᒪᕙᒃᑲ ᖃᓄᐃᓐᓇᕐᑐᓄᑦ.
24ᓱᖁᓯᔪᐃᑦᑑᓂᕐᒪ ᓇᒡᓕᒍᓱᖕᓂᕐᒪᓗ ᐃᓚᒋᓂᐊᕐᐹ;
ᑖᑦᓱᒪ ᐱᔪᓐᓇᕐᓂᖓ ᐊᑎᓐᓂ ᐊᖏᔪᕈᕐᑎᑕᐅᓂᐊᕐᐳᖅ.
25ᑖᑦᓱᒪ ᐊᒡᒐᖏᑦ ᐃᒪᕐᕕᖕᒧᐊᖓᑎᓐᓂᐊᕐᐸᒃᑲ
ᑕᓕᕐᐱᖓᓗ ᑰᖕᓄᐊᖓᑎᓪᓗᒍ.
26ᑖᑦᓱᒪ ᓂᓪᓕᐊᕕᒋᔪᒫᕐᐹᖓ, ‘ᐊᑖᑕᒋᕙᒋᑦ,
ᒎᑎᒋᕙᒋᑦ, ᐱᐅᓕᔭᐅᓂᕐᒪᓗ ᕾᕐᑐᕆᕚᑎᑦ.’
27 #
ᑕᑯᑎ 1:5. ᐅᕙᖓᓗ ᐃᕐᓂᐊᖑᖅᑳᕐᑐᓐᖑᕐᑎᑦᓱᒪᕙᕋ,
ᐊᖓᔪᖅᑲᐅᓂᕐᐸᐅᓗᓂᓗ ᐊᖓᔪᖅᑳᕐᔪᐊᓂᑦ ᓄᓇᕐᔪᐊᒥ.
28ᓇᒡᓕᖕᓂᕋ ᑖᑦᓱᒧᖓ ᓱᖁᓯᔪᐃᑎᑦᓮᓐᓇᕐᓂᐊᕐᐸᕋ ᐃᓱᖃᖏᑦᑐᒧᑦ,
ᐊᖏᖃᑎᖃᕐᓯᒪᓂᕋᓗ ᐊᐅᓚᔪᐃᑦᓮᓐᓇᕐᑐᒃᓴᐅᕗᖅ ᑖᑦᓱᒧᖓ.
29ᑭᖑᕚᖏᑦ ᓱᕐᕋᔪᐃᑎᑦᓱᒪᕙᒃᑲ ᐃᓱᖃᖏᑦᑐᒧᑦ,
ᐊᖓᔪᖅᑲᐅᕕᖓᓗ ᓱᖁᓯᔪᐃᑦᑑᓂᐊᕐᐳᖅ ᕿᓚᖃᕐᓂᖓᓂ.
30ᕿᑐᕐᖓᖏᑕ ᐱᖁᔭᒃᑲ ᕿᒪᒃᐸᒋᑦ,
ᐊᑐᕐᑕᐅᖁᔭᒃᑲᓗ ᒪᓕᒡᓗᒋᑦ ᐃᓅᖏᑉᐸᑕ.
31ᐃᓕᖅᑯᓯᐅᖁᔭᒃᑲ ᓯᖁᒥᑉᐸᒋᑦ, ᐱᖁᔭᒃᑲᓗ ᒪᓕᖏᑉᐸᒋᑦ.
32ᑕᕝᕙ ᐊᔪᕐᓂᖏᑦ ᐊᓇᐅᑕᕐᒧᑦ ᓱᒋᐊᕐᓂᐊᕐᐸᒃᑲ,
ᐊᔪᕐᑐᓕᓂᖏᓪᓗ ᑏᒐᕐᑐᕐᑕᐅᓂᕐᒧᑦ;
33ᑭᓯᐊᓂᓕ ᑖᑦᓱᒧᖓ ᓇᒡᓕᖕᓂᕋ ᐲᕐᓂᐊᓐᖏᓚᕋ,
ᓱᖁᓯᔪᐃᑦᑑᓂᕋᓗ ᑖᑦᓱᒧᖓ ᓱᓕᔪᓐᓃᕐᑎᓐᓂᐊᓐᖏᓚᕋ.
34ᐊᖏᖃᑎᖃᕐᓯᒪᓂᕋ ᓯᖁᒥᓐᓂᐊᓐᖏᓚᕋ,
ᐅᖃᐅᓰᓪᓗ ᐅᕙᓐᓂᑦ ᐊᓂᓯᒪᔪᑦ ᓴᖑᑎᓐᓂᐊᓐᖏᓚᒃᑲ.
35ᐊᑕᐅᓯᐊᕐᓗᖓ ᐅᖃᒻᒪᕆᓚᐅᕐᐳᖓ ᓴᖑᑎᓐᓂᐊᓐᖏᑕᓐᓂᒃ ᐃᑦᔪᕐᓁᓐᓂᕋ ᒪᓕᒡᓗᒍ;
ᑍᕕᑎᒧᑦ ᓴᒡᓗᓂᐊᓐᖏᓚᖓ.
36ᑭᖑᕚᖓ ᐃᓱᖃᖏᑦᑐᒧᑦ ᐱᔪᒫᕐᐳᖅ,
ᐊᖓᔪᖅᑲᐅᕕᖓᓗ ᓯᕿᓂᖃᕐᓂᓕᒫᖓᓂ ᑲᒪᒋᓂᐊᕐᐸᕋ.
37ᑕᖅᑭᕐᑐᑦ ᐋᖅᑭᒃᓯᒤᓐᓇᕐᓂᐊᕐᐳᖅ ᐃᓱᖃᖏᑦᑐᒧᑦ;
ᑕᑯᒃᓴᐅᖏᓐᓇᕐᑐᑎᑐᑦ ᓯᓚᖃᕐᓂᓕᒫᖓᓂ.” ᓰᓚ
38ᒫᓐᓇᓕ ᐃᒋᓯᒪᓕᕐᐸᑦ ᓇᕐᕈᒋᓕᕐᓗᒍᓗ,
ᓂᓐᖓᐅᑎᓯᒪᒻᒪᕆᓕᕐᐸᑦ ᐅᕐᓱᕐᑎᕐᓯᒪᔧᑦ.
39ᐱᔨᖕᓄᑦ ᐊᖏᖃᑎᒌᒍᑎᒋᓯᒪᔧᑦ ᐊᑐᕈᓐᓃᕐᑎᑉᐸᑦ;
ᑖᑦᓱᒪ ᓂᐊᖂᑎᖓ ᓇᕐᕈᓇᕐᓯᑎᑉᐸᑦ ᓄᓇᒧᑦ ᐃᒋᓪᓗᒍ.
40ᐊᕙᓗᕐᔪᐊᓕᒫᖏᑦ ᓯᖁᒥᑉᐸᑎᑦ;
ᐃᒡᓗᕐᔪᐊᖏᓪᓗ ᕿᒫᕕᖏᑦ ᓯᖁᑦᑎᕐᐸᑎᑦ.
41ᑕᒪᕐᒥᒃ ᓴᓂᖅᑯᑦᑐᑦ ᐊᕐᓵᕐᓂᕗᑦ ᑖᑦᓱᒥᖓ;
ᒥᑕᐅᑎᒃᓴᓐᖑᕐᐳᖅ ᐃᓅᖃᑎᒥᓄᑦ.
42ᑖᑦᓱᒥᖓ ᐱᐅᒃᓴᖏᑦᑐᑦ ᐱᔪᓐᓇᐅᑎᖏᑦ ᐊᖏᔪᕈᕐᑎᑉᐸᑎᑦ;
ᐊᑭᕋᕐᑐᕐᑎᖏᑦ ᑕᒪᕐᒥᒃ ᖁᕕᐊᓱᒃᑎᑉᐸᑎᑦ.
43ᓴᕕᒡᔪᐊᖓᑕ ᑮᓇᖓ ᐃᐱᒍᓐᓃᕐᑎᑉᐸᑦ,
ᓵᓚᒋᔭᐅᑎᓪᓗᒍᓗ ᐅᓇᑕᕐᓂᕐᒥ.
44ᑖᑦᓱᒪ ᑎᒃᑯᐊᕐᓯᓂᕐᒧᑦ ᐱᔪᓐᓇᐅᑎᖓ ᐲᕐᑎᑉᐸᑦ,
ᐊᖓᔪᖅᑲᐅᓂᖓᓗ ᐅᕐᕈᑎᓪᓗᒍ ᓄᓇᒧᑦ.
45ᐃᓅᓱᖕᓂᖓᑕ ᐅᓪᓗᖏᑦ ᓁᒡᓕᑎᑉᐸᑎᑦ;
ᐅᓕᒡᓗᒍᓗ ᑲᓐᖑᓱᒃᑎᑕᐅᓂᕐᒥᒃ. ᓰᓚ
46ᐊᑕᓃᖅ ᖃᓄᖅ ᐊᑯᓂᐅᑎᒋᔪᖅ ᐃᔨᕐᓯᒪᓂᐊᕐᐲᑦ?
ᖃᓄᕐᓗ ᐊᑯᓂᐅᑎᒋᔪᖅ ᓂᓐᖓᐅᒪᓃᑦ ᐃᑯᐊᓚᔪᑎᑐᑦ ᑍᒤᓐᓂᐊᕐᐹ?
47ᐃᖅᑬᓚᐅᕆᑦ ᐃᓅᓯᕐᒪ ᓯᕕᑭᑦᑑᓂᖓᓂᒃ,
ᓱᓇᒥᒡᓕ ᐊᑑᑎᒃᓴᖃᕐᑐᓂᒃ ᐃᓄᖕᓂᒃ ᐱᓐᖑᕐᑎᑦᓯᓚᐅᕐᐲᑦ?
48ᐃᓄᒃ ᖃᓄᐃᒐᔭᕐᐸ ᑐᖁᓂᐊᖏᑦᑑᓗᓂ ᐃᓅᒐᔭᕐᐸᑦ?
ᑭᓇ ᑕᕐᓂᕐᒥᓂᒃ ᐱᐅᓕᓯᔪᓐᓇᕐᐹ ᑐᖁᖓᔪᑦ ᐃᓂᖓᓂᑦ? ᓰᓚ
49ᐊᑕᓃᖅ ᑍᑦᓱᒪᓂᐊᓗᒃ ᓱᖁᓯᔪᐃᑦᑐᒥᒃ
ᓇᒡᓕᖕᓂᕆᓚᐅᕐᑍᑦ ᖃᓄᐃᓕᖓᓕᕐᒪᑦ?
ᓱᖁᓯᔪᐃᑦᑑᓂᕐᓄᑦ ᐊᖏᕈᑎᒋᒻᒪᕆᓚᐅᕐᑍᑦ ᑍᕕᑎᒧᑦ?
50ᐊᑕᓃᖅ ᐃᖅᑬᒋᑦ, ᐱᔨᕕᑦ ᓱᐊᒃᑕᐅᓂᕆᓚᐅᕐᑕᖓᓂᒃ;
ᑭᓂᓐᓂ ᓴᕐᓕᐊᓚᐅᕋᒃᑭᑦ ᐃᓄᐃᑦ ᐅᖃᕐᓂᕐᓗᒡᕕᐅᓂᕆᓚᐅᕐᑕᖏᑦ,
51ᑍᑦᓱᒪᓂ ᐊᑕᓃᖅ, ᐆᒥᒋᔨᑎᑦ ᓂᓐᖓᒃᓮᓚᐅᕐᒪᑕ,
ᒥᑕᐅᑎᖃᕐᑎᓪᓗᒋᑦ ᐅᕐᓱᕐᑎᕐᓯᒪᔭᕐᐱᑦ ᑐᒥᖏᓐᓂᒃ.
52ᐊᑕᓂᖅ ᓂᕐᑐᕐᑕᐅᓕ ᐃᓱᖃᖏᑐᑦᒧᑦ! ᐋᒦᓐ, ᐊᒻᒪ ᐋᒦᓐ.
Currently Selected:
ᐃᓐᖏᕈᑎᑦ 89: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
