ᐃᓐᖏᕈᑎᑦ 86
86
ᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ
ᑍᕕᑎᐅᑉ ᑐᒃᓯᐊᕐᓂᖓ
1ᐊᑕᓃᖅ ᓯᐅᑏᒃᑭᒃ ᒪᓂᓚᐅᒃᑭᑦ, ᑐᓴᕐᓗᖓᓗ,
ᓴᐱᕐᓇᕐᑐᒦᓕᕋᒪ ᐃᑲᔪᕐᑕᐅᔭᕆᐊᖃᕐᓗᖓᓗ.
2ᐃᓅᓯᕋ ᓴᐳᑎᓚᐅᕈᒃ, ᐃᑦᔪᕐᓁᓐᓇᒪ ᐃᕝᕕᑦ ᒎᑎᒋᒐᒃᑭᑦ;
ᐱᔩᑦ ᐱᐅᓕᓚᐅᕈᒃ ᐃᓕᖕᓂᒃ ᑕᑎᖃᕐᒪᑦ.
3ᐊᑕᓃᖅ, ᓈᒃᑭᒋᓐᖓ, ᐅᓪᓗᓕᒫᖅ ᓂᓪᓕᐊᕕᒋᒐᒃᑭᑦ.
4ᐱᔨᕕᑦ ᑕᕐᓂᖓ ᖁᕕᐊᓱᓕᕐᑎᓚᐅᕈᒃ,
ᐊᑕᓃᖅ, ᑕᕐᓂᓐᓂᒃ ᐂᑦᑐᐃᕕᒋᒐᒃᑭᑦ.
5ᐊᑕᓃᖅ, ᐱᐅᔫᒐᕕᑦ ᐃᓱᒪᒋᔪᓐᓁᕐᕕᖃᕐᓗᑎᓪᓗ,
ᓇᒡᓕᖕᓂᖃᕐᐳᑎᓪᓗ ᓱᖁᓯᔪᐃᑦᑐᒥᒃ ᑕᒤᓐᓄᑦ
ᐃᓕᖕᓄᑦ ᓂᓪᓕᐊᕕᖃᕐᑐᓄᑦ.
6ᐊᑕᓃᖅ ᑐᒃᓯᐊᕐᓂᕋ ᑐᓴᓚᐅᕈᒃ;
ᕿᓄᑦᔪᑎᒋᔭᒃᑲᓗ ᐊᐅᓚᑦᔭᒋᐊᕈᑎᒋᓚᐅᒃᑭᑦ.
7ᐊᑲᐅᓐᖏᓕᐅᕈᑎᖃᓕᕐᑎᓪᓗᖓ ᓂᓪᓕᐊᕕᒋᕙᒋᑦ,
ᐃᕝᕕᑦ ᑭᐅᓂᐊᕋᕕᖓ.
8ᐊᑕᓃᖅ ᓇᓂᓕᒫᖅ ᐃᓕᒃᑐᑦ ᑍᒤᑦᑐᒥᒃ ᒎᑎᑕᖃᓐᖏᓚᖅ,
ᐃᓕᒃᑐᓪᓗ ᐱᓇᓱᐊᕈᓐᓇᕐᑎᒋᔪᒥᒃ ᐱᑕᖃᕋᓂ.
9 #
ᑕᑯᑎ 15:4. ᐃᓅᖃᑎᒌᒡᔪᐊᓕᒫᑦ ᐱᓐᖑᕐᑎᓚᐅᕐᑕᑎᑦ
ᕾᓗᑎᒃ ᐃᓕᖕᓄᑦ ᑐᒃᓯᐊᕈᒫᕐᐳᑦ ᓵᖕᓂ,
ᐊᑕᓃᖅ, ᐊᑎᕐᓂᒃ ᓂᕐᑐᐃᓗᑎᒃ.
10ᐊᔪᖏᑦᑐᕐᔪᐊᖑᒐᕕᑦ ᐱᓇᓱᐊᕐᓂᑎᓪᓗ ᐱᐅᔪᐊᓘᓪᓗᑎᒃ,
ᐃᕝᕕᑐᐊᑦᓯᐊᖅ ᒎᑎᐅᕗᑎᑦ ᐊᓯᖃᖏᑦᑐᖅ.
11ᐊᑕᓃᖅ ᐊᔪᕆᕐᑐᓚᐅᓐᖓ ᐊᑐᕐᑕᐅᖁᔭᕐᓂᒃ,
ᐃᕝᕕᑦ ᓱᓕᑦᓯᐊᕐᓂᖓᓄᑦ ᐃᓅᖁᓪᓗᖓ;
ᐆᒻᒪᑎᒐ ᑲᑦᓱᖎᑦᓯᐊᕐᑎᓚᐅᕈᒃ ᐊᑎᕐᓂᒃ ᓯᕘᕋᔪᓐᓇᖁᓪᓗᖓ.
12ᓂᕐᑐᕐᓂᐊᕐᐸᒋᑦ ᐊᑕᓃᖅ ᒎᑎᒐ, ᐆᒻᒪᑎᓕᒫᓐᓄᑦ,
ᐊᑏᓪᓗ ᓂᕐᑐᕐᓇᕐᓯᑎᓐᓂᐊᕐᐸᕋ ᐃᓱᖃᖏᑦᑐᒧᑦ.
13ᐅᕙᓐᓄᑦ ᓱᖁᓯᔪᐃᑦᑐᒥᒃ ᓇᒡᓕᖕᓂᖃᕋᕕᑦ;
ᑕᕐᓂᕋ ᓴᐳᑎᓚᐅᕋᕕᐅᒃ ᑲᑉᐱᐊᓇᕐᑐᕐᔪᐊᕐᒥᑦ ᑐᖁᖓᔪᑦ ᐃᓂᖓᓂᑦ.
14ᒎᑏᒃ, ᐱᐅᔪᕆᔪᑦ ᐊᑭᕋᕐᑐᕐᐹᖓ;
ᑕᐱᕇᖑᓪᓗᑎᒃ ᐱᕋᔧᑦ ᑐᖁᑦᓯᔪᒪᕗᑦ ᐅᕙᓐᓂᒃ,
ᐃᓕᖕᓂᒡᓗ ᐃᒃᐱᒋᔭᖃᖏᑦᓯᐊᕐᓗᑎᒃ.
15ᐃᕝᕕᓪᓕ ᐊᑕᓃᖅ, ᒎᑎᐅᕗᑎᑦ ᓂᑲᒍᓱᒃᑐᖅ ᐱᑦᓯᐊᕐᓗᑎᓪᓗ,
ᕿᓄᐃᑦᑑᕗᑎᑦ ᓇᒡᓕᒍᓱᖕᓃᓪᓗ ᓱᖁᓯᔪᐃᑦᑑᓃᓪᓗ ᐃᓱᖃᕋᑎᒃ.
16ᓵᕝᕕᒋᓗᖓ ᓂᑲᒋᓚᐅᓐᖓ; ᐱᔪᓐᓇᕐᓃᑦ ᑐᓂᓚᐅᕈᒃ ᐱᔨᖕᓄᑦ,
ᐱᐅᓕᓗᒍᓗ ᐱᔨᕕᑦ ᐊᕐᓇᐅᑉ ᐃᕐᓂᖓ.
17ᐊᑕᓃᖅ ᓇᓗᓁᕐᓯᕕᒋᓚᐅᓐᖓ ᖁᓚᕐᓇᖏᑦᑐᒥᒃ ᐱᐅᓂᕆᔭᕐᓂᒃ;
ᐅᕙᓐᓂᒃ ᐆᒥᓱᒃᑐᑦ ᑕᑯᒍᑎᒃ ᑲᓐᖑᓱᓕᖁᓪᓗᒋᑦ
ᐃᓕᖕᓄᑦ ᐊᑕᓃᖅ, ᓮᒻᒪᕐᑎᑕᐅᓯᒪᓂᓐᓂᒃ ᐃᑲᔪᕐᑕᐅᓯᒪᓂᓐᓂᒡᓗ.
Currently Selected:
ᐃᓐᖏᕈᑎᑦ 86: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
